Tag: магілеў

Па Магілёве ездзіў гарадскі аўтобус з вялікай дзіркай у падлозе

Навіна ад

Толькі з’яўленне відэа з дзіравай падлогай ў магілёўскім гарадскім аўтобусе прымусіла прыняць меры кіраўніцтва аўтобуснага парку.

У Threads пабліка super.mogilev з’явілася відэа з аўтобуса №18, дзе проста пад двухмесным сядзеннем пасажыры ўбачылі вялікую дзірку ў падлозе. Праз адтуліну добра праглядваўся карданны вал, які круціўся падчас руху аўтобуса, а рэшткі гумовага пакрыцця бесперашкодна трапяталі на ветры. Памер праёму быў такім, што карыстальнікі сацсетак сур’ёзна абмяркоўвалі, ці не можа праз яго праваліцца чалавек.

Відэа хутка разышлося па інтэрнэце і сабрала сотні рэакцый. Адны жартавалі пра «кандыцыянер» і натуральную вентыляцыю салона, другія адзначалі, што ў Магілёве, відаць, можна выйсці не толькі праз дзверы аўтобуса. Былі і тыя, хто без гумару заўважыў, што пры рэзкім тармажэнні або няўдалым руху чалавек сапраўды мог атрымаць цяжкія траўмы.

У каментарыях зноў усплылі і старыя скаргі на стан гарадскога транспарту. Магілёўцы пісалі, што такіх зношаных аўтобусаў не бачылі ў іншых гарадах, а нехта нагадаў, што пасля эксплуатацыі ў Магілёве гэтыя ж машыны яшчэ доўгія гады працягваюць працаваць у Бабруйску.

Толькі пасля таго, як гісторыя набыла шырокі розгалас, на сітуацыю адрэагавала кіраўніцтва аўтобуснага парку.

Намеснік дырэктара па пасажырскіх перавозках Магілёўскага філіяла «Аўтобусны парк №1» Рыгор Бараноўскі заявіў, што выпадак быў адзінкавым. Паводле яго, кіроўца адразу закрыў тэхналагічны люк, а пасля здарэння на прадпрыемстве правялі пазапланавую работу з механікамі, кантралёрамі і кіроўцамі, якім нагадалі пра неабходнасць больш уважліва аглядаць аўтобусы перад выездам на маршрут.

Пасажырам жа прапанавалі ў выпадку выяўлення падобных праблем неадкладна паведамляць кіроўцу або ў дыспетчарскую службу.

У сваю чаргу ДАІ абвясціла аб правядзенні з 15 па 22 ліпеня ў Магілёве і Магілёўскім раёне прафілактычных мерапрыемстваў па кантролі за перавозкамі пасажыраў у гарадскіх і прыгарадных аўтобусах. Будуць правяраць выкананне правілаў перавозкі і бяспеку на маршрутах. За парушэнні кіроўцам пагражае штраф да чатыры базавых велічынь, а пры паўторным парушэнні на працягу года – ад двух да васьмі базавых.

Скрынштот: super.mogilev

Намесніца дырэктара Магілёўскага АЦІС Наталля Шэмбалава абурылася «Залюстэр’ем». Каму, як не ёй

Навіна ад

Пад адным з нашых матэрыялаў у TikTok з’явіўся кароткі, але эмацыйны каментар:

«Божа, як можна ўсё перавярнуць! Усё навыварат, у вас нібыта нейкае Залюстэр’е!». Подпіс – Наталля Шэмбалава.

Наталля ўважліва праглядае наш канал, але да гэтага абмяжоўвалася толькі кароткімі заўвагамі кшталту «трызненне» і «лухта».

Mogilev.media вырашыў даведацца пра Шэмбалаву больш.

Цёзак з такім спалучэннем імя і прозвішча ў Магілёве няшмат, а публічная – адна: Наталля Рыгораўна Шэмбалава (на фота), намесніца дырэктара КУП «Магілёўскі абласны цэнтр інфармацыйных сістэм». Таго самага прадпрыемства, якое вядзе разлікова-касавыя цэнтры па ўсёй вобласці, абслугоўвае базу даўжнікоў за камунальныя паслугі.

Пра Залюстэр’е Наталля сапраўды ведае больш, чым сярэдні чытач нашай стужкі. І не паводле кнігі Льюіса Кэрала.

Першы ўзровень Залюстэр’я: спісы даўжнікоў

У 2016 годзе ў Магілёўскім абласным судзе слухалася справа «чорных рыэлтараў» – Ігара Гершанкова і яго саўдзельнікаў. Як мінімум шасцёра адзінокіх магілёўцаў былі забітыя дзеля іх кватэр. Схема працавала гадамі.

Ключавым інструментам у ёй быў спіс даўжнікоў за камуналку – з адрасамі, колькасцю зарэгістраваных у кватэры і пазнакай, ці прыватызаваная яна.

Паводле паказанняў Гершанкова, гэты спіс яму рэгулярна перадавала за грошы супрацоўніца магілёўскага РКЦ №3.

Сведкай і экспертам па справе праходзіла і начальніца суседняга магілёўскага РКЦ №5 – Наталля Шэмбалава.

Адказ на судзе яна дала класічны, ведамасны: доступ да базы даўжнікоў маюць толькі спецыялісты, якія даюць падпіску аб неразгалошванні.

Што ж, будзем лічыць, што гэта не праблема сістэмы, а непаразуменне з кадрамі ў асобна ўзятым РКЦ.

Другі ўзровень: бяздонныя вочы міністра

З РКЦ №5 Наталля Рыгораўна прайшла прадказальны для беларускай чыноўніцы шлях. Спачатку – намесніца начальніка службы камунальных сістэм і разлікаў усяго АЦІС. З ліпеня 2024 года – намесніца дырэктара прадпрыемства. Гэта значыць, сёння ў яе вядзенні – усе магілёўскія РКЦ.

Публічна яна заўсёды выступае ў жанры «адабрамс»: хваліць удзельніцу конкурсу «Лепшы малады работнік ЖКГ» ад службы «Кантакт-цэнтр 115» АЦІС, удзельнічае ў вучэбна-метадычных зборах па дакументаванні і рэгістрацыйным уліку насельніцтва сумесна з УУС аблвыканкама, дзеліцца з прафсаюзнай газетай «Беларускі час» уражаннямі ад сустрэчы з міністрам ЖКГ: «асабістая сустрэча з міністрам ЖКГ – нешта асаблівае. Зносіны “вочы ў вочы” пакінулі толькі прыемныя ўражанні».

Трэці ўзровень: плённае супрацоўніцтва

І вось чалавек, які працуе намесніцай дырэктара дзяржаўнага прадпрыемства, што абслугоўвае ўсю разлікова-камунальную інфраструктуру Магілёўшчыны, заходзіць на старонку незалежнай рэдакцыі, прызнанай у Беларусі «экстрэмісцкім фарміраваннем», каб пакінуць каментары.

Нас, шчыра кажучы, такая ўвага радуе. Mogilev.media ўлічыць усе заўвагі Наталлі Рыгораўны і будзе ўдасканальваць свой інфармацыйны рэсурс, каб разам з Шэмбалавай зрабіць яго яшчэ лепшым, яшчэ больш інфарматыўным.

Не можам абяцаць, што пачнем апісваць бяздонныя вочы міністра ЖКГ, дапамагаць УУС складаць спісы або хваліць РКЦ за тое, што з сем’яў вымушаных эмігрантаў спаганяюцца дадатковыя грошы за неаказаныя камунальныя паслугі.

Але ва ўсім астатнім – мы за плённае супрацоўніцтва. Па абодва бакі люстэрка.

Фота ведамаснага сайта АЦІС.

15 ліпеня ў гісторыі. Грунвальдская бітва. Вывяржэнне Этны. Бухенвальд. Нарадзіліся Цётка, У. Дубоўка

Навіна ад

1410 год. Адбылася бітва пры Грунвальдзе.

Паміж Тэўтонскім ордэнам з аднаго боку і Польскім каралеўствам і ВКЛ – з другога адбылася вырашальная бітва “Вялікай вайны” 1409-1411 гадоў.

У выніку гэтага пабоішча польска-літоўска-рускія войскі пад камандаваннем польскага караля Уладзіслава II Ягайлы разграмілі галоўныя сілы Ордэна, якія ўзначальваў вялікі магістра Ульрых фон Юнгінген. Грунвальдская бітва нанесла смяротны ўдар па нямецкай экспансіі на Усход, на балтыйскія і ўсходнеславянскія землі.

Вялікае Княства Літоўскае атрымала выхад на балтыйскія гандлёвыя шляхі і ў Еўропу.

У гонар бітвы названы вуліцы ў Брэсце, Гарадку, Гродне, Полацку, Магілёве.

У гонар гадавіны бітвы ў Дудутках 22-23 ліпеня 2023 года пройдзе чарговы маштабны беларускі фестываль ваенна-гістарычнай рэканструкцыі «Наш Грунвальд».

1606 год. Мяшчане Магілёва ўварваліся ў ратушу і разагналі старую раду.

Была абрана новая, у складзе якой пераважалі незаможныя рамеснікі.

Падзея адбылася падчас гарадскога паўстання 1606-1610 гадоў, якое распачалося 20 чэрвеня 1606 года пад кіраўніцтвам саладоўніка Стахора Мітковіча.

Новая рада кіравала Магілёвам больш за два гады, асаблівая ўвага надавалася інтарэсам гарадскіх нізоў.

Нагадаем, што ў гэты час Магілёў налічваў 15 000 жыхароў, 2211 дамоў, 18 цэхаў, меў права на правядзенне двух рэгулярных кірмашоў.

1669 год. Скончылася вывяржэнне вулкана Этна на Сіцыліі.

Яно цягнулася з 11 сакавіка. Падчас катаклізму загінула 50 мястэчак і гарадоў, 100 000 чалавек.

Вулкан нарадзіўся 600 000 гадоў таму і з’яўляецца галоўнай славутасцю вострава Сіцылія. Гэта самы высокі з дзеючых у Еўропе і адзін з самых актыўных вулканаў у свеце.

1861 год. Памёр Адам Ежы Чартарыйскі (1770-1861).

Польскі і расійскі дзяржаўны дзеяч, пісьменнік. Намагаўся аднавіць Рэч Паспалітую ў межах 1772 года.

Удзельнічаў у абарончай вайне супраць Расіі (1792). Служыў у расійскім конна-гвардзейскім палку, камер-юнкерам і ад’ютантам Аляксандра I, пасланнікам у Сардзініі, міністрам замежных спраў (1804-1806), куратарам Віленскай навучальнай акругі (1803-1824).

Аўтар плана аднаўлення Рэчы Паспалітай і Вялікага Княства Літоўскага. Рэдактар Канстытуцыі Каралеўства Польскага, сенатар-ваявода і член Адміністрацыйнай рады ў Варшаве.

Падчас Паўстання 1830-1831 гадоў узначаліў Сенат і кансерватыўны Нацыянальны ўрад у Варшаве.

З 1831 года ў эміграцыі ў Англіі, Францыі развіваў праграму аднаўлення незалежнай Рэчы Паспалітай пры падтрымцы заходнееўрапейскіх дзяржаў. Развіваў ідэі славянскага федэралізму без Расіі.

Мецэнат літаратуры і навукі. Аўтар палітычных і публіцыстычных твораў, успамінаў, навуковых даследаванняў, вершаў.

1876 год. Нарадзілася Алаіза Пашкевіч (Цётка, 1876-1916).

Беларуская паэтэса, адна са стваральнікаў Беларускай Сацыялістычнай Грамады,  адна з пачынальніц беларускай прозы.

Удзельніца пецярбургскага гуртка студэнтаў-беларусаў «Круг беларускай народнай прасветы». Аўтар кніг «Першае чытанне для дзетак беларусаў», першага «Беларускага лемантара», «Гасцінец для малых дзяцей», вершаў, публіцыстычных артыкулаў, нарысаў, даследаванняў па гісторыі беларускага тэатра.

Асноўныя матывы яе паэзіі – любоў да радзімы, да прыроды, самаахвярнае служэнне народу.

Памерла 18 лютага 1916 года.

1900 год. Нарадзіўся Уладзімір Дубоўка (1900-1976).

Беларускі паэт, празаік, перакладчык, крытык.

Паэт незалежніцкай арыентацыі, член кіраўніцтва літаратурных аб’яднанняў «Маладняк», «Узвышша». Ініцыятар стварэння адмысловых літар для перадачы на пісьме ўнікальных гукаў беларускай мовы: «дж», «дз».

У 1926 годзе напісаў палітычны верш «За ўсе краі, за ўсе народы свету…», які быў надрукаваны ананімна ў часопісе «Беларуская культура». Савецкія спецслужбы выявілі аўтара верш і ён быў выкарыстаны для абвінавачвання паэта ва ўдзеле ў неіснуючым «Саюзе вызвалення Беларусі».

Арыштаваны ў 1930 годзе. Тройчы яго судзілі з абвінаваўчым прысудам. Па рэабілітацыі з 1958 году жыў у Маскве.

Памёр 20 сакавіка 1976 года.

1925 год. Адноўлена дзейнасць Беларускага камітэта ў Варшаве.

Грамадска-палітычная арганізацыя, створаная ў верасні 1919 года пад старшынствам ураджэнца Мсціслаўшчыны Лявона Дубейкаўскага для «культурна-асветнай працы і дабрачыннасці на карысць беларусаў, якія жылі ў Польшчы.

Адноўлены камітэт узначалілі Лявон Більдзюкевіч і Янка Пачопка.

Лявон Дубейкаўскі

1937 год.  Адчынены канцэнтрацыйны лагер Бухенвальд.

Афіцыйна створаны ў 1937 у наваколлях Веймара, аднак першыя зняволеныя з’явіліся тут яшчэ ў 1933, калі лагер называўся Этэрсберг. За 8 гадоў каля 250 000 чалавек будуць вязнямі Бухенвальда, з іх памруць або будуць забітыя больш за 56 000 чалавек.

Спачатку нямецкія антыфашысты, а потым, у гады Другой сусветнай вайны, прадстаўнікі многіх іншых нацыянальнасцей утрымліваліся тут. Асабліва шмат зняволеных загінула ў філіяле Бухенвальда “Дора”, дзе ў падземных цэхах вырабляліся самалёты-снарады “Фаў”.

Лагер вызвалены 10 красавіка 1945 года амерыканскімі войскамі.

Надпіс на браме лагера Бухенвальд “Jedem das Seine” – “Кожнаму сваё”.

1938 год. У Гомелі адкрыўся Дзяржаўны тэатр лялек Беларусі.

У 1950 годзе калектыў пераехаў у Мінск.

У 2008 годзе тэатру прысвоена званне «Заслужаны калектыў Рэспублікі Беларусь».

Ставяцца спектаклі для дзяцей, вячэрнія спектаклі для дарослых.

Тэатр гастраляваў у шматлікіх еўрапейскіх краінах.

1940 год. Памёр самы высокі мужчына ў свеце.

Роберт Першінг Уодлоу нарадзіўся ў 1918 годзе ў Олтане, штат Ілінойс.

Калі 27 чэрвеня 1940 года яму ў апошні раз вымяралі рост, ён быў роўны 2,72 м пры размаху рук 2,88 м. Яго максімальная вага дасягала 222,7 кг. Да апошняга дня ён працягваў расці, і да дня смерці яго рост цалкам мог дасягнуць 2,74 м.

1949 год. Нарадзіўся Леанід Лісоўскі.

Географ, краязнавец, байкапісец.

Выхаванец геаграфічнага факультэта Магілёўскага педагагічнага інстытута. Дацэнт Мазырскага педагагічнага ўніверсітэта.

Даследчык прыроды Палесся, яго экалагічных праблем. Аўтар больш за 300 навуковых прац.

Аўтар баек для «Вожыка».

У магілёўскай калоніі палітвязня Івашына кінулі ў ШІЗА, мяркуе яго сям’я

Навіна ад

Сваякі журналіста Дзяніса Івашына, асуджанага да 13-гадовага зняволення, ужо тры тыдні не атрымліваюць ад яго лістоў з магілёўскай ПК №15.

Сям’я палітвязня і журналіста Дзяніса Івашына асцерагаецца, што адміністрацыя калоніі зноў адправіла яго ў штрафны ізалятар. Падставай для такіх меркаванняў стала поўнае спыненне ліставання.

У ПК №15 Івашына этапавалі 18 чэрвеня 2026 года пасля трох гадоў, праведзеных у жодзінскай турме №8. Менавіта гэтым днём датаваны яго першы ліст да маці пасля пераводу. Яшчэ адзін, ад 21 чэрвеня, атрымала жонка журналіста Вольга Івашына. З таго часу ніякай карэспандэнцыі ад яго больш не паступала.

Як паведаміла Беларускай асацыяцыі журналістаў Вольга Івашына, маўчанне ўжо працягваецца больш за тры тыдні і вельмі нагадвае сітуацыю, якая ўжо здаралася падчас адбывання пакарання ў Жодзіна. Тады, калі журналіста змяшчалі ў штрафны ізалятар, лісты таксама пераставалі даходзіць на некалькі тыдняў.

Асцярогі сям’і ўзмацняе і папярэдні досвед знаходжання Дзяніса Івашына ў магілёўскай калоніі. Менавіта ў ПК №15, куды яго першапачаткова накіравалі пасля прысуду, журналіст, паводле сведчанняў родных, падвяргаўся збіццю, пакаранням штрафным ізалятарам, пераследу за беларускую мову, а таксама быў пазбаўлены тэлефонных званкоў, перадач і сустрэч з бацькамі. Праз некалькі месяцаў пасля гэтага суд, пра які не паведамілі нават адвакату, перавёў яго на больш жорсткі турэмны рэжым у Жодзіна.

Разам з паведамленнем аб этапаванні маці журналіста атрымала і стандартны ліст адміністрацыі ПК №15 з указаннем магчымых тэрмінаў змякчэння пакарання. Паводле яго, пасля 9 студзеня 2029 года Івашын тэарэтычна можа прэтэндаваць на замену пакарання больш мяккім, а пасля 13 лютага 2030 года – на ўмоўна-датэрміновае вызваленне. Абавязковай умовай з’яўляецца прызнанне адміністрацыяй таго, што вязень «цвёрда стаў на шлях выпраўлення».

Аднак, улічваючы папярэдні досвед пераследу ў гэтай жа калоніі, сям’я журналіста не мае ілюзій адносна таго, што адміністрацыя ПК №15 будзе гатовая прызнаць выкананне гэтай умовы.

Справа Дзяніса Івашына

Дзяніс Івашын – журналіст газеты «Новы Час» і рэдактар-валанцёр беларускай версіі міжнароднай расследавальніцкай супольнасці InformNapalm. Ён вядомы расследаваннямі пра ўплыў «рускага міру» ў Беларусі, дзейнасць былых украінскіх сілавікоў у беларускім АМАПе і забудову ў мемарыяльным урочышчы Курапаты.

Супрацоўнікі КДБ затрымалі журналіста 12 сакавіка 2021 года. Спачатку яму выставілі абвінавачанне ва ўмяшанні ў дзейнасць супрацоўнікаў органаў унутраных спраў, пазней дадалі абвінавачанне ў «здрадзе дзяржаве». Паводле папярэдніх ацэнак, прычынай пераследу магло стаць расследаванне пра былых украінскіх сілавікоў, якія служылі ў беларускім АМАПе.

14 верасня 2022 года Гродзенскі абласны суд у закрытым рэжыме прызнаў Івашына вінаватым і асудзіў яго да 13 гадоў і аднаго месяца пазбаўлення волі ў калоніі ўзмоцненага рэжыму, а таксама прызначыў штраф і абавязаў выплаціць кампенсацыю дзевяці сілавікам.

Фотаздымак з адкрытых крыніц

Будаўнічая фірма падманула магілёўскую школу на 71 тысячу рублёў

Навіна ад

Капітальны рамонт школы №4 Магілёва аказаўся невыкананым, нягледзячы на пералічэнне авансу мінскай будаўнічай фірме.

Як паведамляюць супрацоўнікі аддзела па барацьбе з эканамічнымі злачынствамі Ленінскага РУУС Магілёва, 36-гадовы кіраўнік кампаніі заключыў дамову на капітальны рамонт навучальнай установы. Пасля гэтага на рахунак яго арганізацыі быў пералічаны аванс у памеры 71 тыс. рублёў.

Аднак, як сцвярджаюць праваахоўнікі, выконваць узятыя на сябе абавязацельствы ён не збіраўся. Цягам трох месяцаў на аб’екце вяліся толькі нязначныя работы, якія павінны былі стварыць уражанне, што рамонт працягваецца. Асноўная ж частка атрыманых сродкаў была выкарыстана на асабістыя патрэбы кіраўніка фірмы.

Такім чынам, школа засталася без абяцанага капітальнага рамонту, а бюджэтныя грошы – без належнага выкарыстання.

У дачыненні да дырэктара прыватнай арганізацыі распачатая крымінальная справа па факце махлярства.

Фотаздымак: ТГ “Міліцыя Магілёўшчыны”

На Дняпры і Рудэі купацца нельга, на Святым, Пячэрскім азёрах – можна

Навіна ад

У вадасховішчы Рудэя каля вёскі Гарадня Магілёўскага раёна вада не адпавядае санітарным нормам.

Як паведамляе Магілёўскі занальны цэнтр гігіены і эпідэміялогіі, вада ў гэтым вадасховішчы не такая, як таго патрабуюць мікрабіялагічныя паказчыкі бяспекі. 

Таксама працягваюць дзейнічаць патрабаванне аб абмежаванні купання дзяцей на гарадскім пляжы на Дняпры ў Магілёве, Фацінскім заліве, на Дняпры каля вёскі Палыкавічы Магілёўскага раёна і ў сажалцы ў вёсцы Вільчыцы пад Магілёвам.

У той жа час бяспечным лічацца купанне ў Пячэрскім вадасховішчы, Святым возеры, сажалцы ў пасёлку Брады, возеры Гусінае аграгарадка Кадзіна.

Фотаздымак: МагілёўАнлайн

Магілёвец патрапіў пад крыміналку, разбіўшы шкло на прыпынку

Навіна ад

Жыхар Магілёва, будучы ў няцвярозым стане, разбіў нагой шкло прыпыначнага павільёна.

Здарэнне адбылося надоечы ў Магілёве. Мясцовы жыхар у моцна выпіўшым стане стаяў на прыпынку і размаўляў са знаёмым. У нейкі момант мужчына вырашыў прайсці скрозь прыпыначны павільён, пры гэтым выбіўшы ў ім шкло і тым самым ашаламіўшы сваім учынкам нават прыяцеля. Пасля чаго проста пайшоў дадому.

Парушальніка знайшлі хутка, бо яго дзеянні трапілі на камеры назірання. У дачыненні да магілёўца распачатая крымінальная справа за хуліганства. 

Скрыншот: ТГ “ОС Exclusive”

13 ліпеня ў гісторыі. 12 апосталаў. Бітва пад Оршай. Надпіс Hollywood. Сіманаў на Буйніцкім полі. Першае “Басовішча”

Навіна ад

Сабор дванаццаці апосталаў.

Свята прысвечана апосталам Пятру, Андрэю, Якаву Зевядзееву, Іаану Багаслову, Філіпу, Варфаламею, Фаме, Левію Матфею, Якаву Алфееву, Іудзе Тадэю, Сімону Кананіту, а таксама апосталу Матфею, абранаму замест Іуды Іскарыёта.

У гэты дзень прынята наведваць храмы і маліцца за сябе і сваю сям’ю, чытаць малітву 12 апосталам дома, прасіць адно ў аднаго прабачэння, мірыцца і забываць усе крыўды.

1508 год. Адбылася бітва пад Оршай.

Бітва войска ВКЛ і Каралеўства Польскага супраць войска Маскоўскага княства ў ходзе пятай літоўска-маскоўскай вайны (1507-1508).

Атрымаўшы звесткі пра падыход літоўскага войска, князь маскоўскі Васіль III зняў аблогу Смаленска і рушыў на Оршу. Калі высветлілася, што К. Астрожскі набліжаецца да маскоўскіх пазіцый, Васіль III пастанавіў адступіць за Дняпро, каб ударыць у момант пераправы літвінаў праз раку.

Астрожскі накіраваў вялікі аддзел праз неахоўваны брод на Дняпры з заданнем нападу на абоз маскалёў, а галоўнымі сіламі выканаў адцягвальны манеўр. Выдзелены аддзел, пераправіўшыся праз раку, быў аточаны пераважаючымі маскоўскімі сіламі, аднак здолеў з цяжкасцямі прабіцца на правы бераг. Бітву перарваў надыход цемры. Астрожскі намерваўся атакаваць адразу пасля ўзыходу сонца, аднак маскоўскае войска ноччу адышло з занятых пазіцый на ўсход.

1868 год. Памёр Канстанцін Тышкевіч (1806-1868).

Беларускі гісторык, краязнавец, адзін з заснавальнікаў беларускай археалогіі.

На аснове ўласных калекцый разам з бацькам і братам стварыў Лагойскі музей старажытнасцей. Член навуковых таварыстваў Вільні, Кракава, Масквы, Прагі, Парыжа, Лондана.

Адзін з заснавальнікаў Віленскага музея старажытнасцей, член Віленскай археалагічнай камісіі.

Даследаваў каля 200 курганоў, гарадзішчаў і замчышчаў.

У памяць аб вучоным з 2007 года праводзіцца водная экспедыцыя «Шляхам Тышкевіча» па Віліі.

1897 год. Нарадзіўся Міхась Міцкевіч (1897-1991).

Беларускі грамадскі і культурны дзеяч, брат Якуба Коласа.

Удзельнік нацыянальнага руху, дэлегат 1-га Усебеларускага кангрэсу, выкладчык Мінскай беларускай гімназіі.

З 1944 года на эміграцыі. Актыўны дзеяч Беларускай аўтакефальнай праваслаўнай царквы ў ЗША, член рэдакцыі часопіса «Беларус», рэдактар часопіса «Голас Царквы». Пахаваны на беларускіх могілках у Іст-Брансуіку ў штаце Нью-Джэрсі.

У яго гонар Якуб Колас назваў свайго малодшага сына Міхася (1926-2020).

1923 год. На схіле гары Маунт-Лі над каліфарнійскімі ўзгоркамі з’явіўся надпіс Hollywood.

Першапачаткова яна была напісана як Hollywoodland, не мела ніякага дачынення да кіно і азначала рэкламу новага жыллёвага раёна, але адразу ж стала прывабліваць да сябе турыстаў.

Устаноўка надпісу абышлася яе заказчыку, выдаўцу “Лос-Анджэлес таймс” Гары Чандлеру ў 21 000 долараў. Слова “Hollywoodland” уначы падсвятлялася электрычнымі лямпачкамі, днём жа белыя літары былі бачныя за  40 км. Вышыня іх была 13 м, шырыня – 9. Па перыметры кожнай літары віселі рознакаляровыя лямпачкі, якія падсвятлялі надпіс у цемры. Аднак усе 4 000 лямпачак былі расцягнуты мясцовымі жыхарамі менш чым за год. Па дамове рэклама была разлічана на 1,5 гады, але аж да 1949 года жадаючых дэмантаваць надпіс не знаходзілася.

У 1949 годзе надпіс адрамантавалі і выдалілі 4 апошнія літары. Да таго часу Hollywood ужо ператварыўся ў сімвал Лос-Анджэлеса і ўсёй індустрыі забаў. Клопат аб надпісе ўзяла на сябе Гандлёвая палата Галівуду.

У 1973 годзе надпіс абвясцілі нацыянальным гістарычным помнікам.

Да канца 1970-х надпіс здрахлеў, і ў 1978 годзе літары былі дэмантаваныя. У тым жа годзе дабрачынны фонд, узначалены Х’ю Хэфнерам, заснавальнікам часопіса “Playboy”, сабраў сродкі на капітальны рамонт славутасці.

Цяперашні надпіс, складзены з белых літар 15-метровай вышыні і 12-метровай шырыні, з’явіўся ў лістападзе 1978 года. На выраб кожнай літары спатрэбілася 27 500 долараў. З таго часу ўсе рэстаўрацыйныя работы выконваліся пры дапамозе прыватных ахвяраванняў.

1930 год. Першы ў гісторыі Чэмпіянат свету па футболе.

Выбар Уругвая ў якасці месца правядзення спартыўнага спаборніцтва не быў выпадковым. Зборная гэтай краіны перамагла на VIII Алімпійскіх гульнях 1924 года ў Парыжы і IX Алімпійскіх гульнях 1928 года ў Амстэрдаме.

Спецыяльна да гэтых спаборніцтваў у Монтавідэа пабудавалі новы стадыён, які ў гонар юбілею незалежнасці назвалі “Сентэнарыё” – “стагоддзе”.

У турніры прынялі ўдзел 13 каманд з Францыі, Югаславіі, Румыніі, Бельгіі, Перу, ЗША, Аргенціны, Бразіліі, Балівіі, Чылі, Мексікі, Парагвая і Уругвая.

У першых паядынках сышліся зборныя Францыі і Мексікі, а таксама каманды Бельгіі і ЗША. Першы ў гісторыі чэмпіянатаў свету гол забіў француз Л. Ларан. Аднак перамогу ў першынстве свету 30 ліпеня атрымала зборная Уругвая, якая перамагла ў фінальным матчы каманду Аргенціны з лікам 4:2.

Урачыстасці з нагоды перамогі ў чэмпіянаце не спыняліся ў Монтавідэа некалькіх дзён.

1938 год. Нарадзіўся Юрый Марухін (1938-2001).

Беларускі кінарэжысёр, сцэнарыст, аператар. Заслужаны дзеяч мастацтваў.

Працаваў на «Беларусьфільм», старшыня праўлення Беларускага саюза кінематаграфістаў. Рэжысёр шэрагу фільмаў, у тым ліку “Маці Урагану”, аператар шматлікіх карцін, уключна “Магіла льва”, “Час выбраў нас”.

1941 год. Пачалася акупацыя Горацкага, Дрыбінскага і Слаўгарадскага раёнаў нямецка-фашысцкімі захопнікамі.

А 13-14 ліпеня на Буйніцкім полі пад Магілёвам сярод воінаў 172-й стралковай дывізіі знаходзіўся ваенкар газеты “Известия” – пісьменнік К. Сіманаў і фотакарэспандэнт той жа газеты П. Трошын. Першы раз Сіманаў патрапіў у Магілёў 28 чэрвеня.

К. Сіманаў пісаў: «Я не быў салдатам, быў усяго толькі карэспандэнтам, аднак у мяне ёсць кавалачак зямлі, які мне век не забыцца, – поле пад Магілёвам, дзе я ўпершыню ў ліпені 1941 года бачыў, як нашыя на працягу аднаго дня падбілі і спалілі 39 нямецкіх танкаў …».

Абароне Магілёва прысвечаны яркія старонкі трылогіі «Жывыя і мёртвыя» (палкоўнік Куцепаў стаў правобразам генерала Серпіліна), «Салдатамі не нараджаюцца», «Апошняе лета», дзённіка ўспамінаў «Розныя дні вайны».

1941 год. 63 стралковы корпус 21-й арміі Заходняга фронта пачаў контрудар (13 ліпеня-17 жніўня) на Рагачоўска-Жлобінскім напрамку.

У выніку гэтага былі вызвалены Жлобін і Рагачоў.

1942 год. Нарадзіўся Харысан Форд.

Амерыканскі акцёр кіно і тэлебачання, прадзюсер.

Намінант на прэмію «Оскар», BAFTA, чатырохразовы намінант і ўладальнік спецыяльнай прэміі “Залаты глобус”, ганаровага «Сезара». Найбольш вядомы па ўдзеле ў серыі фільмаў «Зорныя войны», «Індыяна Джонс», «Самалёт прэзідэнта» і іншых.

Дзед і бабуля акцёра – ураджэнцы Мінска.

1952 год. Нарадзіўся Аляксандр Ціхановіч (1952-2017).

Беларускі эстрадны спявак. Народны артыст.

Саліст ВІА «Верасы», Дзяржаўнага аркестра сімфанічнай і эстраднай музыкі Беларусі, стваральнік і кіраўнік першага ў Беларусі Тэатра песні (і студыі пры ім; з 2003 г. – прадзюсерскі цэнтр «Прафіартвідыён»), музычны кіраўнік беларускага канала «Сталічнае тэлебачанне».

Аўтар папулярных эстрадных песень.

Памёр 28 студзеня 2017 года.

1970 год. Нарадзіўся Андрэй Цівончык.

Беларускі і нямецкі атлет (скакун з шастом), бронзавы прызёр Алімпійскіх гульняў 1996 года ў Атланце.

У 1995 годзе пабіў нямецкі нацыянальны рэкорд у скачках з шастом (скокнуў на 5,80 м). Трэнер па скачках з шастом зборнай Катара па лёгкай атлетыцы.

1990 год. На лясной паляне Борык каля мястэчка Грудак на Беласточчыне пачаўся І Фестываль музыкі маладой Беларусі «Басовішча».

Арганізаваны Беларускім аб’яднаннем студэнтаў і гмінным асяродкам культуры.

Мерапрыемства праводзілася 30 разоў (1990-2019) штогадова, на працягу двух дзён, як фестываль беларускай альтэрнатыўнай і рок-музыкі.

Арганізатары вырашылі, што 30-е па ліку «Басовішча» стане апошнім.

Традыцыйна на фестывалі ладзіўся конкурс маладых выканаўцаў, якія паспяхова прайшлі адбор. Штогод на фестываль прыязджала да 15 000 чалавек.

1990 год. Абшчыне магілёўскіх вернікаў-католікаў перададзены Касцёл Святога Станіслава.

А праз 6 гадоў, у гэты ж дзень, пачаў дзейнічаць зноў асвячоны, адрэстаўраваны касцёл. Удзел у рэстаўрацыі прымаў знакаміты мастак Алесь Пушкін (1965-2023).

2020 год. Афіцыйна адкрыты мост цераз раку Сож у Слаўгарадскім раёне.

З’явіўся на шашы Слаўгарад-Краснаполле, вядзе да Блакітнай крыніцы. Раней праз раку працаваў паром. Мост мае даўжыню 500 метраў.

Аўтамабільны рух па мосце быў адкрыты 2 снежня 2019 года.

Мінск – гэта не Магілёў: таймеры на светлафорах не адключаць

Навіна ад

Мінскія ДАІшнікі абверглі інфармацыю, што пойдуць шляхам магілёўскіх калег і пачнуць адключаць таймеры на светлафорах.

Нагадаем, што напачатку ліпеня ДАІ УУС Магілёўскага аблвыканкама распарадзілася адключыць таймеры зваротнага адліку на ўсіх святлафорах Магілёва. Мясцовыя ДАІшнікі тлумачылі гэта тым, што, маўляў, таймеры ствараюць «эфект апошняй секунды»: кіроўцы паскараюцца, каб паспець праехаць скрыжаванне напрыканцы зялёнага сігналу, а пешаходы выбягаюць на праязную частку за 2-3 секунды да ўключэння чырвонага. На думку ДАІ, гэта павышае рызыку аварый. Праўда, ніякага статыстычнага пацвярджэння такой высновы людзі ў пагонах не прывялі.

Інфармацыя аб адключэннях светлафораў пачала гуляць па інтэрнэце, пакрысе губляючы са зместу ўзгадванне пра Магілёў, а проста распавядаючы пра Беларусь. З-за гэтага людзі пачалі меркаваць, што адключэнне таймераў тычыцца і, у прыватнасці, Мінску. Аднак там нічога падобнага рабіць не збіраліся і досвед магілёўскіх ДАІшнікаў у сталіцы захаплення не выклікаў.

“У чытачоў можа ўзнікнуць ўражанне, што дадзеныя новаўвядзенні плануюцца да рэалізацыі на тэрыторыі сталіцы”, – напісалі мінскія супрацоўнікі ДАІ ў сваім тэлеграм-канале. Яны звярнулі ўвагу чытачоў, што гэтая інфармацыя атрымала сваё распаўсюджванне пасля выхаду ў эфіры тэлеканала «Беларусь 4 Магілёў» сюжэту, у якім пазначана, што дадзеныя таймеры былі прыбраныя са святлафораў у Магілёве.

“Сталічная Дзяржаўтаінспекцыя інфармуе: у Мінску адключэння святлафорных таймераў зваротнага адліку не плануюцца і рэалізоўвацца не будуць”, – катэгарычна заявілі сталічныя ДАІшнікі.

Магілёўскае адключэнне таймераў выклікала неадназначную рэакцыю. Многія карыстальнікі ў каментарах адзначалі, што яны, наадварот, дапамагалі лепш ацэньваць дарожную сітуацыю, піша “Мінская праўда”.

На думку некаторых аўтамабілістаў, зваротны адлік дазваляў загадзя зразумець, ці паспее машына праехаць скрыжаванне на дазваляльны сігнал, і адмовіцца ад лішняга паскарэння. Іншыя лічаць, што без секундамераў кіроўцам становіцца складаней арыентавацца, з-за чаго яны могуць прымаць больш рызыкоўныя рашэнні.

Таксама гучыць меркаванне, што так званы «эфект апошняй секунды» захаваецца і без таймераў, паколькі частка ўдзельнікаў руху па-ранейшаму будзе спрабаваць праскочыць на перарывісты зялёны сігнал.

Цікава, што ў Брэсце для вадзіцеляў таймеры зваротнага адліку прыбралі яшчэ ў 2019 годзе. У той жа час пакінулі таймеры на пешаходных пераходах, бо многія гараджане лічаць гэтыя лічбы зручным арыенцірам.

Фотаздымак з адкрытых крыніц

У Магілёве адкрылі памятны знак супрацоўнікам ДАІ, якія загінулі пры выкананні службовага абавязку

Навіна ад

У Магілёве прайшла цырымонія адкрыцця памятнага знака супрацоўнікам Дзяржаўтаінспекцыі, якія загінулі пры выкананні службовага абавязку. Мерапрыемства прымеркавана да 90-годдзя ДАІ. На помніку сем імёнаў – гэта магілёўскія ДАІшнікі, што загінулі з 1941 па 2002 гады. Можна заўважыць, што трое з іх аддалі сваё жыццё ў адзін дзень у 1975 годзе.

У цырымоніі ўзялі ўдзел міністр унутраных спраў Іван Кубракоў, начальнік УУС Магілёўскай вобласці Ігар Шчарбачэня, начальнік ГУ ДАІ МУС Віктар Ротчанкаў, дзейныя супрацоўнікі, ветэраны ведамства і родныя загінулых.

Кубракоў уручыў дзяржаўныя і ведамасныя ўзнагароды супрацоўнікам рэгіянальнай ДАІ, якія вызначыліся.

Фота тэлеграм-канала «Міліцыя Магілёўшчыны».