Магілёўскія фігуранты “справы артапедаў-траўматолагаў” – былы загадчык артапедычнага аддзялення Магілёўскай бальніцы №1 (Лаўсанаўскай) Алег Сарнацкі і былы загадчык траўматалагічнага аддзялення Магілёўскай абласной бальніцы Алег Абелевіч былі арыштаваныя разам з 35-цю іншымі медыкамі-траўматолагамі па ўсёй краіне ў 2022 годзе. Пазней яны былі вызвалены з-пад варты і накіраваны працаваць па спецыяльнасці шараговымі медработнікамі – паведамлялі mogilev.media.
Так, Алег Абелевіч быў накіраваны працаваць шараговым траўматолагам у Магілёўскую гарадскую бальніцу хуткай медыцынскай дапамогі, а Алег Сарнацкі – на аналагічную пасаду ў Магілёўскую абласную бальніцу.
27 верасня Генеральная пракуратура абвясціла пра прысуд аднаму з іх. Паводле інфармацыі беларускіх СМІ, размова ідзе пра Алега Сарнацкага (на фота), хоць імя абвінавачанага ў матэрыялах пракуратуры не ўказваецца.
Паводле пракуратуры, абвінавачаны з 2018 года да сакавіка 2022-га нібыта сістэматычна атрымліваў грашовыя сродкі ад прадстаўнікоў камерцыйных арганізацый, пастаўшчыкоў эндапратэзаў за кожную праведзеную аперацыю па татальным эндапратэзаванні тазасцегнавога або каленнага суставаў з матэрыялаў іх вытворчасці.
За ўвесь час былы загадчык аддзялення нібыта атрымаў узнагароджанне ў памеры 750 даляраў ЗША і звыш 15 тыс. еўра. Паведамляецца, што ў ходзе судовага следства абвінавачаны чыстасардэчна раскаяўся і кампенсаваў у поўным аб’ёме даход, атрыманы незаконным шляхам.
Суд Кастрычніцкага раёна Магілёва вынес абвінаваўчы прысуд, але ў калонію Алега Сарнацкага пакуль не адправяць. Яму прызначана пакаранне ў выглядзе пазбаўлення волі на тэрмін 4 гады з адтэрміноўкай яго выканання на 2 гады са штрафам у памеры 600 базавых велічынь (22,2 тыс. рублёў).
Фота: Адміністрацыя Кастрычніцкага раёна г. Магілёва
За інфармацыяй вакол продажу памяшканняў магілёўскага завода “Строммашына”, пра якую шмат пісалі рэгіянальныя СМІ, прыхаваўся адзін малазаўважны факт. Існуе верагоднасць, што рэканструкцыя і перафарматаванне памяшканняў завода-банкрута закране таксама лёс папулярных магілёўскіх барахолак – Быхаўскага і Мінскага рынкаў.
Так, у вялікім матэрыяле “Магілёўскіх ведамасцяў” пра далейшы лёс плошчаў “Строммашыны” гаворыцца паміж іншага наступнае:
“Як растлумачыў начальнік упраўлення архітэктуры і горадабудаўніцтва Магілёўскага гарвыканкама – галоўны архітэктар горада Дзмітрый Бабкуноў – будынак ліцейнага цэха знясуць, астатнія карпусы цэхаў і адміністрацыйных будынкаў прадпрыемства будуць выкарыстоўвацца для стварэння поліфункцыянальнай прасторы з аб’ектамі гандлю, абслугоўвання, культурна-забаўляльнага прызначэння.
З’явяцца магчымасці і для камфортнага пераносу Мінскага і Быхаўскага рынкаў (выдзелена намі – М.М.) з уладкаваннем вялікай аўтастаянкі. Ад падобнай рэканструкцыі выйграюць усе – і гараджане, і прадпрымальнікі. Але яна будзе весціся па спецыяльным праекце.”
Што Мінскі, што Быхаўскі рынкі – даўні галаўны боль, калі не мазоль для магілёўскага чынавенства. Хаатычнасць барахолкі цяжка ўкладваецца ў іх светаўспрыняцце. Ужо дзесяцігоддзямі можна назіраць, як спарадычна міліцыянты ганяюць бабулек з картонкамі каля Мінскага рынка. Альбо як іх спрабуюць выціснуць на вечна пустыя прылаўкі, абсталяваныя за цэнтральным уваходам, далей ад вуліцы Першамайскай.
Магчыма, і найбольш верагодна, што цэнтральнай задачай у плане пераноса Мінскага і Быхаўскага рынкаў з’яўляецца паляпшэнне гандлёвых умоваў для сур’ёзных прадпрымальнікаў і іх пакупнікоў. Аднак разам з гэтым могуць быць прынятыя і чарговыя кардынальныя меры, якія могуць пакінуць горад без гэтых унікальных рынкаў з іх разняволенай атмасферай дробнага вулічнага гандлю. А хацелася б нагадаць, што падобныя “блашыныя” кірмашы ва ўсім свеце – цэнтр турыстычнага прыцягнення, люднае месца, якое прыцягвае натоўпы цікаўных.
Па выніках аўкцыёна 70 000 квадратных метраў у цэнтры горада прадалі за 1,76 мільёны даляраў.
21 верасня адбыўся аўкцыён па продажы магілёўскага завода “Строммашына” – паведамляе realt.by. Першапачаткова маёмасць завода выставілі на таргі ў ліпені за 26,7 млн рублёў. Прычына – даўгі прадпрыемства. Але на некалькі таргоў не было заявак. У выніку цана знізілася на 80%. Лот выставілі за 8 млн рублёў з паніжэннем цаны да мінімальнай у 5,34 млн рублёў.
У аўкцыёне было два ўдзельнікі, але адзіную стаўку зрабіў удзельнік № 1 у 15.30 – гэта значыць за поўгадзіны да заканчэння таргоў. Ім аказалася кампанія «Тведас», якой маёмасць завода дасталася за 5 738 812 рублёў або каля 1,76 млн даляраў.
Фірма “Тведас” спецыялізуецца на тым, што здае ў арэнду свае памяшканні (ёй належыць, напрыклад, гандлёвы цэнтр на рагу Бульвара Непакораных і Астроўскага) альбо памяшканні, якія арандуе сама. Заснавальнікам і кіраўніком фірмы фігуруе Сяргей Лапін.
Кампаніі дасталіся аб’екты нерухомасці, энергетычнай інфраструктуры і добраўпарадкавання. Плошчы – больш за 70 тысяч квадратных метраў. Яно размяшчаецца на ўчастку ў 13,5 гектара ў цэнтры Магілёва.
Участак былой “Строммашыны” паводле заканадаўства можа забудоўвацца пад грамадзянскую, жылую, транспартную інфраструктуру.
У Магілёве праходзіць рэканструкцыя аднаго з самых ажыўленых праспектаў горада. З 21 па 26 верасня тут будзе праводзіцца ўкладка асфальтабетоннага пакрыцця. На бягучы момант чатыры паласы з шасці на праспекце перакрытыя дзеля правядзення дарожных работ. Астатніх дзвюх палос яўна бракуе для пропуску ўсяго транспарта. Пробкі ўтвараюцца адразу на выездзе на праспект з дзясяткаў аўтамашын.
Рэканструкцыя прадугледжвае стварэнне новых кішэняў для грамадскага транспарта. Таксама памяняецца схема мясцовых пераездаў – некаторыя ўжо закладзеныя бардзюрамі, а замест іх прабіваюцца новыя.
Нязручнасцяў хапае і карыстальнікам грамадскага транспарту. З-за немагчымасці спыняцца на прыпынках, аўтобусы высаджваюць пасажыраў проста на вільготнае дарожнае палатно, па якім катаюцца нетаропкі я асфальтаўкладчыкі.
Роўна тыдзень Магілёў жыве з перакрытай важнай транспартнай артэрыяй. Да канца верасня на рэканструкцыю зачынены мост каля Быхаўскага рынка – пісалі mogilev.media.
Мы праехаліся і паглядзелі, як кіроўцы спраўляюцца з вымушанымі зменамі ў сваіх маршрутах.
Нагрузку асноўных патокаў машын прынялі адразу тры транспартныя артэрыі. Гэта шлях праз вуліцы Касманаўтаў і Лазарэнкі да плошчы Арджанікідзэ, больш кароткі маршрут па вуліцы Раманава і тых жа Касманаўтаў і Лазарэнкі а таксама самая кароткая дарога – праз вуліцы Вароўскага, Правай Лубравенцы і Лазарэнкі.
На апошнім маршруце пробак практычна не назіралася, хоць да гэтага безумоўна падштурхоўвае вузкі і нагружаны транспартам каля Быхаўскага рынка праезд вуліцы Вароўскага.
Можна сказаць, што сур’ёзнага транспартнага калапсу перакрыццё вуліцы Чалюскінцаў не выклікала. Гэтаму паспрыяла разнастайнасць маршрутаў аб’езду. Некаторыя нязручнасці і доўгія чэргі з аўтамашын на святлафорах можна заўважыць толькі ў гадзіны пік.
Мяркуем, што гэтак жа спакойна горад перажыве астатнія два тыдні рамонтных работ на мосце каля Быхаўскага рынка.
Пачынаючы з 13 верасня і па 13 кастрычніка праходзіць арганізаванае Магілёўскім гарвыканкамам абмеркаванне перайменавання плошчы Арджанікідзэ ў абласным цэнтры. На прысуд грамадскасці вынесеныя наступныя варыянты: пакінуць назву “Плошча Арджанікідзэ”, памяняць назву на “Плошча Свяціцеля Георгія Каніскага” альбо можна прапанаваць іншы варыянт.
Mogilev.media папрасілі пракаментаваць сітуацыю магілёўскага гісторыка і краязнаўцу, які пажадаў застацця невядомым, што да гістарычнай назвы мясцовасці і абгрунтавання перайменавання плошчы.
“Для пачатку неабходна разабрацца з пытаннем, гістарычную назву якога аб’екта мы шукаем. – падзяліўся з выданнем сваімі думкамі суразмоўца – У працэдурах кадыфікацыі гістарычных і абгрунтаваных гарадскіх тапонімаў звычайна абапіраюцца на цэлы шэраг акалічнасцяў.
Па-першае, трэба адзначыць, якой была першапачатковая гістарычная назва аб’екта. Калі мы гаворым пра тэрыторыю, вынесеную на абмеркаванне, як пра мясцовасць, то самым старажытным і гістарычна апраўданым тапонімам з’яўляецца, безумоўна, “Касцерня”. Вуліца з такой назвай праіснавала ў Магілёве да пачатку ХХ стагоддзя.
Касцерня на плане Магіллёва 1918 года.
Паходжанне гэтай назвы доўгі час звязвалі з касцямі маскоўскіх стральцоў, пахаваных прыкладна ў гэтым месцы, на схіле гары за сценамі магілёўскіх гарадскіх умацаванняў. Але таксама ёсць гіпотэза, што назва “Касцерня” паходзіла ад слова Castrum, што адзначае ў перакладзе з латыні – “замак”, умацаванае месца. Гэттым словам, магчыма, называлі адзін з магілёўскіх бастыёнаў якраз у гэтай мясцовасці. Гара-”замак” у раёне сучаснай плошчы Арджанікідзэ, была занатаваная ў другой палове ХІХ стагоддзя вядомым расійскім мастаком Д. Струкавым. У подпісе гэтага аўтара сказана, што гэтая мясцовасць “ныне называется Костерней”.
Касцерня на малюнку Д. Струкава
Але, па-другое, неабходна ўлічваць таксама гістарычную назву самаго аб’екта, які мы абмяркоўваем. Калі мы з вамі паглядзім на тое, як выглядала мясцовасць, дзе зараз размяшчаецца плошча Арджанікідзэ, напрыклад, у зусім яшчэ нядаўнія, адразу пасляваенныя часы, то ніякай плошчы мы там не ўбачым. Наадварот, мы пабачым рэшткі гарадскога замкавага рва, які ішоў на тым месцы, дзе зараз пралягае вуліца Камсамольская.
На пярэднім плане – замкавы роў на месцы плошчы Арджанікідзэ
І толькі ў пасляваенныя часы праходзіла масштабная рэканструкцыя пуцепраходаў у Магілёве, падчас якой была здзейснена падсыпка дарогі, па якой зараз ідзе вуліца Чалюскінцаў і ўласна адбылося стварэнне плошчы, якой далі імя Арджанікідзэ.
Такім чынам, гістарычная назва мясцовасці – гэта адно, а сам інфраструктурны аб’ект – гэта другое. Гэта стварэнне савецкага перыяду, якое атрымала адпаведную савецкую назву. І гэтую назву цалкам слушна таксама лічыць гістарычнай.
Калі б размова вялася пра дэкамунізацыю тапоніма, то безумоўна, варта было б прыглядзецца ў першую чаргу да гістарычнай назвы мясцовасці. Але ж размова пра іншае – пра замену гістарычнай назвы на сучасную, нічым не апраўданую гістарычна.”
Варта адзначыць, што ідэя змяніць назву плошчы Арджанікідзэ на імя праваслаўнага архіепіскапа Георгія Каніскага пакуль не знаходзіць гарачага водгуку сярод магілёўцаў. Так, карыстальнікі двух самых папулярных гарадскіх тэлеграм-каналаў адназначна аддаюць перавагу захаванню сучаснай назвы.
Галасаванне ў дзяржаўным тэлеграм-канале “Магілёў-мой горад” дае на момант падрыхтоўкі артыкула такія дадзеныя па прыхільнасці.
79% з больш чым 2200 удзельнікаў галасавання аддаюць сваю перавагу сучаснай назве і ў тэлеграм-канале незалежнага рэсурса “Могилев Online”.
Вечарам 10 верасня быў перакрыты рух транспарта па вуліцы Чалюскінцаў у Магілёве. У сувязі з рамонтам пуцепаравода праз вуліцу Завадскую – маста каля Быхаўскага рынка – праезд па Чалюскінцаў спынены цалкам, да канца месяца – гаворыцца ў паведамленні аўтапарка №1.
Першапачаткова рух планавалася перакрыць яшчэ 9 верасня, але ранкам 10-га стала вядома, што перакрыццё пераносіцца на нявызначаны тэрмін, які скончыўся вечарам таго ж дня.
Як грамадскі транспарт будзе аб’яжджаць закрыты ўчастак, і як можна скараціць аб’езд легкавому транспарту – чытайце ў матэрыяле mogilev.media.
Рамонтныя работы на мосце каля Быхаўскага рынка, з-за якіх планавалася перакрыць вуліцу Чалюскінцаў у Магілёве, не пачаліся 9 верасня, як меркавалася. Іх перанеслі на нявызначаны тэрмін – паведамляе аўтобусны парк №1. Папярэдне, работы пачнуцца з 11 верасня, але ў гэты план могуць быць унесены новыя карэкціроўкі, заявілі ў ведамстве.
Аб’езд будзе ў чатыры з паловай кіламетры, але легкавым машынам яго можна будзе скараціць.
У сувязі з закрыццём вуліцы Завадской у Магілёве на рэканструкцыю, будзе цалкам перакрыты рух праз мост каля Быхаўскага рынка на вуліцы Чалюскінцаў – ад сённяшняга дня, 9 верасня, да канца месяца.
Тралейбус №2 на працягу рамонтных работ будзе курсіраваць з Восьмага мікрараёна толькі да плошчы Арджанікідзэ. Ад Зялёнага луга будзе хадзіць тралейбус №8 – праз вуліцу Гагарына на Касманаўтаў.
Усе маршрутныя таксі, што едуць праз плошчу Арджанікідзэ, будуць курсіраваць праз вуліцы Лазарэнкі, Касманаўтаў і Раманава. Аўтобусы амаль гэтаксама – але не праз вуліцу Раманава, а выяжджаць на Чалюскінцаў яны будуць у раёне Магілёўскага эканамічнага, прамыслова-тэхналагічнага каледжа, паведамляе аўтапарк №1 Магілёва. Гэта адносіцца да ўсіх рэйсаў з цэнтра горада на паўднёвую ўскраіну – як гарадскіх, так і прыгарадных. Адваротны рух будзе пралягаць праз тыя ж вуліцы.
Аб’езд праз вуліцу Касманаўтаў і Лазарэнкі дадасць да маршрута дадтковыя 4,5 кіламетры. Але ўласнікам легкавых аўто можна будзе больш чым удвая скараціць дарогу, да 2 км, выкарыстаўшы альтэрнатыўны маршрут. Едучы з цэнтра горада, трэба будзе павярнуць на вуліцу Лазарэнкі, потым скіраваць на Правую Дубравенку, і праз Вароўскага выехаць на Чалюскінцаў. Невялікі ўчастак гэтага маршрута мае аднабаковы рух, пагэтаму ў адваротным кірунку ехаць трэба будзе абмінаючы Барыса-Глебскую царкву.
Вечарам 7 верасня на вуліцы Пысіна ў Магілёве адбылося сутыкненне аўтамабіля з чалавекам на электрасамакаце – паведамляюць чытачы mogilev.media. Аварыя адбылася на праязной частцы, на павароце ў дваравую тэрыторыю. Кіроўца самакатам атрымаў медыцынскую дапамогу, але адразу пасля аварыі самастойна падняцца не мог – адзначаюць сведкі.
З’явіўся афіцыйны каментарый гэтага здарэння. Каля дома №31 па вуліцы А. Пысіна 40-гадовы кіроўца аўтамабіля Subaru здзейсніў наезд на 13-гадовага падлетка, які перасякаў дарогу па нерэгуляваным пешаходным пераходзе на электрасамакаце. У выніку ДТЗ юнак з траўмамі шпіталізаваны – паведамляе прэс-служба абласнога УУС.
