Category: Навіны Круглага

Няўдалы начны ўгон у Круглянскім раёне

Навіна ад

Жыхар Круглянскага раёна ўгнаў аўтамабіль аднавяскоўца, але ўехаў у слуп і спаліў машыну.

Для аднаго жыхара Круглянскага раёна раніца пачалася з непрыемнага сюрпрызу. Пакуль мужчына яшчэ спаў і не ведаў, што яго Peugeot 405 знік са двара, у суседняй вёсцы ратавальнікі ўжо тушылі гэты аўтамабіль, які пасля аварыі ператварыўся ў груду абгарэлага металу.

Як высветлілася пазней, начны «аўтапрабег» арганізаваў 38-гадовы аднавясковец гаспадара машыны. Паводле матэрыялаў следства, позна ўвечары мужчына, знаходзячыся ў стане алкагольнага ап’янення, вырашыў наведаць знаёмага ў суседняй вёсцы. Ісці пешшу не хацелася. Тады ён успомніў пра суседскі Peugeot, які стаяў каля дома.

Аўтамабіль аказаўся незамкнутым, а ключ заставаўся ў замку запальвання. Такую спакусу вясковец праігнараваць не змог. Аднак паездка доўжылася нядоўга. Прыкладна за чатыры кіламетры ад месца ўгону кіроўца не справіўся з кіраваннем і ўрэзаўся ў апору лініі электраперадачы. Ад удару машына загарэлася, а слуп паваліўся на яе.

Пажарныя, якія прыбылі на месца, агонь патушылі, але выратаваць аўтамабіль ужо не змаглі. Peugeot аднаўленню не падлягае.

Цікава, што ўгоншчык не атрымаў сур’ёзных траўм. Пакінуўшы разбітую і ахопленую полымем машыну, ён проста пайшоў дадому пешшу. Аднак доўга шукаць яго не давялося. Гаспадар аўтамабіля адразу западозрыў свайго аднавяскоўца. Версію пацвердзілі і сабраныя доказы. На месцы ўгону эксперты выявілі сляды абутку. Экспертыза паказала, што яны супадаюць з падэшвай красовак падазраванага.

Міліцыя затрымала ўгоншчыка па месцы яго жыхарства. Дарэчы, раней ён ужо трапляў у поле зроку праваахоўнікаў за ўгон чужога транспарту. Узбуджана крымінальная справа.

Фотаздымак: sudexpert.gov.by

З нагоды адкрыцця пляжа ў Круглым зладзілі масавае гулянне

Навіна ад

У Круглым закрылі грамадскую лазню, затое адкрылі пляж. Чыноўнікі рэкамендавалі карыстацца вадаёмамі – і забяспечылі жыхароў імі.

У Круглянскім раёне ўрачыста адкрылі пляж, але гэта – працяг гісторыі з мясцовай лазняй.

Аднойчы на выязны прыём да першага намесніка старшыні аблвыканкама прыйшоў усяго адзін чалавек. Ён паскардзіўся на адсутнасць грамадскай лазні.

Намеснік кіраўніка вобласці Сяргей Савіцкі выслухаў госця і даў вычарпальны адказ: карыстайцеся ваннамі і вадаёмамі.

Лазню ў Круглым сапраўды закрылі – хадзіла ў яе ад сілы пяць чалавек, стратна. Узамен пабудавалі новую, невялікую. Тая ж гісторыя. Закрылі і яе. Сацыяльны стандарт па памывачных месцах быў выключаны з дзяржаўных нарматываў яшчэ ў 2020 годзе, так што фармальна ўсё ў парадку.

Вадаём у раёне, дарэчы, цяпер маецца – Цяцерынскае вадасховішча, вёска Шупені. І ў мінулую суботу там урачыста адкрылі пляж «Водная жамчужына». Так што ўсё сыходзіцца: лазня закрыта, затое на прыродзе – мыйся, не хачу.

Цырымонія была больш чым урачыстай. Пяць раённых чыноўнікаў, чырвоная стужка, артысты Дома культуры.

Пляж на фотаздымках з цырымоніі ў кадр трапляў рэдка. У асноўным усе аб’ектывы былі нацэлены на масавае гулянне.

Ганаровае права перарэзаць чырвоную стужку на дарозе, якая вядзе да вадаёма, атрымалі адразу трое. Што-што, а святкаваць у Круглым умеюць.

Фота раённай газеты.

У Круглянскім раёне незаконна выкапалі 11 тыс. м3 пяску

Навіна ад

Пракуратура Круглянскага раёна выявіла сумарна 11 315,48 м3 незаконна здабытага пяску.

Незаконную распрацоўку нетраў пракуроры знайшлі на чатырох аб’ектах на Кругляншчыне. Так, у адной з сельскагаспадарчых арганізацый раёна пры здабычы пяску для ўнутрыгаспадарчых мэтаў было дапушчана перавышэнне глыбіні яго выпрацоўкі больш чым у два разы, што пацягнула незаконную здабычу пяску аб’ёмам 8 796,74 м3.

Цяпер Круглянская раённая інспекцыя прыродных рэсурсаў і аховы навакольнага асяроддзя павінна разлічыць шкоду, якая была нанесена ў выніку самавольнай здабычы карысных выкапняў, каб потым даць ацэнку дзеянням адпаведных службовых асобаў.

Акрамя таго, пракурорская праверка выявіла факты няякаснага правядзення рэкультывацыі ўчасткаў нетраў і неналежнай планіроўкі іх паверхняў. Было і непрыняццё мер па ахове нетраў і зямель ад засмечвання. 

Фотаздымак: Генеральная пракуратура

Замест вучобы ў Магілёве – збор камянёў на круглянскім полі

Навіна ад

Студэнтаў Беларускага дзяржуніверсітэта тэхналогій адправілі збіраць камяні на полі занядбалай гаспадаркі ААТ “Круглянская іскра”.

Пра тое, як “дапамагалі ў навядзенні парадку” студэнты тэхналагічнага і механічнага факультэтаў БДУТ, распавёў сайт універсітэта, выклаўшы адпаведнае відэа.

Такім чынам, замест лабараторных і лекцый маладыя людзі збіралі камяні, фактычна выконваючы задачы, якія звычайна не маюць нічога агульнага з універсітэцкай адукацыяй.

Варта алзначыць, што “Круглянская іскра” – гэта гаспадарка, якая ўжо не першы год знаходзіцца ў складаным фінансавым становішчы. Яшчэ некалькі гадоў таму прадпрыемства было ўключана ў спіс тых, што патрабуюць фінансавага аздараўлення. Падтрыманне яго дзейнасці стала магчымым дзякуючы дзяржаўным рашэнням, у тым ліку пераносу тэрмінаў разлікаў па крэдытах.

На гэтым фоне прыцягненне студэнтаў да палявых работ выглядае як спосаб закрыць праблемы, паўстаўшыя ў выніку бязглуздага гаспадарання, за кошт іх дармовай працы.

Фотаздымак: БДУТ

У Круглым забойца-рэцыдывіст спрабаваў задушыць незнаёмую дзяўчыну

Навіна ад

Магілёўскі аблсуд прысудзіў 20 гадоў мужчыне, які спрабаваў без прычыны задушыць 20-гадовую дзяўчыну на вуліцы.

Як устаноўлена на судзе, 44-гадовы жыхар Круглага ў верасні 2025 года ў грамадскім месцы каля скрыжавання вуліц Магілёўскай і Юбілейнай без усялякай прычыны напаў на незнаёмую яму 20-гадовую дзяўчыну. Мужчына схапіў яе, сцягнуў з тратуара ў яр, паваліў на зямлю і пачаў душыць.

Трагедыі ўдалося пазбегнуць дзякуючы выпадковым сведкам. Пара маладых людзей з немаўлём, якія праходзілі побач, пачулі крыкі аб дапамозе і ўбачылі напад. Яны ўмяшаліся, адцягнулі нападніка ад пацярпелай і выклікалі міліцыю.

Як высветлілася, гэта не першае цяжкае злачынства абвінавачанага. З 2006 па 2022 год ён адбываў пакаранне ў выглядзе пазбаўлення волі за забойства жанчыны. У дзень нападу ён зноў паспрабаваў здзейсніць аналагічнае злачынства.

На судзе мужчына сваю віну не прызнаў і катэгарычна адмаўляў датычнасць да здарэння. Аднак прадстаўленыя дзяржаўным абвінаваўцам доказы суд прызнаў дастатковымі.

Судовая калегія аблсуда вынесла абвінаваўчы прысуд: паводле крымінальнага заканадаўства Беларусі мужчыну прызначана 20 гадоў пазбаўлення волі з адбываннем пакарання ў папраўчай калоніі асаблівага рэжыму.

Акрамя таго, суд задаволіў грамадзянскі пазоў пацярпелай і прысудзіў ёй 30 тысяч рублёў кампенсацыі маральнай шкоды. Прысуд пакуль не ўступіў у законную сілу.

Фотаздымак з адкрытых крыніц

На Кругляншчыне памерла вёска Саладоўня

Навіна ад

Вёска Саладоўня ў Круглянскім раёне афіцыйна спыніла сваё існаванне.

Пра тое, што населенага пункту больш няма, паведамляе Дзяржаўны камітэт па маёмасці. 

“Такое рашэнне прымаецца не спантанна: звычайна статус населенага пункта здымаюць, калі ў ім не застаецца пастаянных жыхароў. Моладзь і працаздольнае насельніцтва паступова пераязджае ў гарады – туды, дзе больш магчымасцяў для працаўладкавання, развітая інфраструктура і звыклы ўзровень камфорту. У выніку маленькія паселішчы губляюць не толькі насельніцтва, але і гаспадарчую, сацыяльную значнасць” – гаворыцца ў паведамленні.

Афіцыйна вёска скасавана рашэннем Круглянскага райсавета 26 лютага 2026 года.

Паводле перапісаў насельніцтва, у 1999 годзе ў вёсцы пражывалі шасцёра чалавек, праз дзесяць гадоў – двое. А ў 2019-ым ужо нікога не было.

Фотаздымак: МогилевOnline

У Круглым мілітарызм прышчапляюць з дзіцячага садка

Навіна ад

У круглянскім дзіцячым садку №3 для пяцігадовых дзяцей арганізавалі так званую ваенна-патрыятычную групу.

Для новастворанай групы “Юны патрыёт” спецыялна закупілі форму колеру хакі і распрацавалі план працы па “ваенна-патрыятычным выхаванні”, якое, натуральна, будуецца на вайсковай тэматыцы. Пра гэта піша Mayday.

У межах падрыхтоўкі да 23 лютага ў садку правялі цэлы «тэматычны тыдзень», падчас якога маленькім выхаванцам распавядалі пра «ганаровы абавязак абараняць Радзіму» і знаёмілі іх з рознымі родамі войскаў. Такія заняткі фактычна ўводзяць дзяцей у вайсковы дыскурс яшчэ да школы.

План работы групы на год таксама цалкам прывязаны да дзяржаўных і ідэалагічных дат. Сярод запланаваных мерапрыемстваў – святкаванне Дня народнага адзінства, Дня Канстытуцыі, Дня дзяржаўных сімвалаў і Дня Перамогі. Праз гэтыя падзеі выхаванцам прапануюць успрымаць вайсковую тэматыку як важную частку грамадзянскай ідэнтычнасці.

Гэта не першы выпадак мілітарызацыі свядомасці дашкольнікаў. У траўні мінулага года там правялі «Зарніцу» – ваенізаваную гульню для дзяцей, прысвечаную Дню Перамогі. Тады ў ваенную форму апранулі нават выхавальніц.

У выніку ў садку фактычна з’явілася структура, падобная да ваенна-патрыятычнага клуба, але для дзяцей дашкольнага ўзросту. Такія практыкі выклікаюць крытыку праваабаронцаў, якія лічаць, што ранняе ўцягванне дзяцей у мілітарысцкую рыторыку можа ўплываць на фармаванне іх светаўспрымання.

Паводле міжнародных стандартаў у галіне правоў дзіцяці, у тым ліку Канвенцыі ААН аб правах дзіцяці, дзяржава павінна забяспечваць развіццё асобы і ідэнтычнасці дзіцяці без ідэалагічнага ціску. Асабліва адчувальнымі да такога ўздзеяння з’яўляюцца падлеткі ва ўзросце ад 11 да 17 гадоў, калі фармуецца асоба. Аднак у Круглым падобныя ідэалагічныя практыкі пачынаюць ужываць ужо да пяцігадовых дзяцей.

Фотаздымак: Mayday

У Круглым рыхтуюцца даць бой “беглым” у 2030 годзе

Навіна ад

У Круглым трывожна – улады пачалі рыхтаваць насельніцтва да “прэзідэнцкіх выбараў” 2030 года.

Да 2030 года, як сцвярджаюць мясцовыя эксперты, яшчэ прорва часу. Але ў Круглым ужо чуваць глухі гул трывожных барабанаў: “беглыя” пачалі падрыхтоўку да “прэзідэнцкіх выбараў” загадзя. Відаць, настолькі загадзя, што гэтую падрыхтоўку пакуль, акрамя былога “беглага” Рамана Пратасевіча, ніхто не бачыў, але ў Круглым яе адчуваюць. І настолькі моцна адчуваюць, што нават забыліся пра чарговую элегантную перамогу ў нядаўна прайшоўшым 2025 годзе. Магчыма таму, што падзеі 2020-га мацней запалі ў памяць, чым леташнія дурыбары.

Сілавы сцэнарый 2020-га, як нагадваюць у Круглым, не спрацаваў. Праўда, аднак, у тым, што якраз спрацаваў – пратэсты былі задушаныя сіламі “красаўцаў”, якіх натхняў той самы з сінімі пальцамі і аўтаматам без ражка. У гэтым, пэўна, і была сіла і воля “нашага Главы дзяржавы – Аляксандра Лукашэнкі”, як адзначаецца ў круглянскім тэксце. 

Расслабляцца круглянцам нельга, бо разлічваць, што “змагары” ціхенька прасядзяць пад плінтусамі аж да 2030-га, – гэта, як лічаць у Круглым, недапушчальная раскоша. 

Таму заклік просты і гучны: не далі разваліць краіну ў 2020-м – не дамо і ў 2030-м. А значыць, рыхтавацца не даць разваліць краіну трэба ўжо сёння, каб за чатыры гады паспець.

Фотаздымак: БелТА

Магілёўскіх студэнтаў адправілі чысціць кароўнікі ў снежні

Навіна ад

Магілёўскія тэндэнцыі: студэнты БРУ ўзялі шэфства над стратным калгасам Краснаполля, а студэнты дзяржаўнага ўніверсітэта харчавання чысцяць кароўнікі калгаса на Кругляншчыне.

Студэнтаў другога курса магілёўскага дзяржаўнага ўніверсітэта харчавання адправілі ў ААТ “Круглянская іскра” чысціць кароўнікі і выконваць іншыя, не менш карысныя функцыі.

У калгасе працаваць няма каму, таму традыцыйную паездку “на бульбу” ўлады  Магілёўшчыны замянілі падарожжам “на гной”, бо бульба зімой не расце.

На ведамасным сайце ўніверсітэта ці то жартам, ці то ўсур’ёз напісалі: “дзякуем студэнтам за адказнасць і старанне! Жадаем паспяховай здачы сесіі і новых перамог у вучобе і жыцці!”

Як чыстка гною можа спрыяць паспяховай здачы сесіі, ведае, напэўна, толькі сам “прадзюсар” усебеларускага калгаснага шоу. 

Бо за трыццаць гадоў кіравання Лукашэнкі працэс сцірання мяжы паміж разумовай і фізічнай працай запушчаны ў іншы бок.

Раскладаць малекулы на атамы недапушчальна, калі на палях краіны разлагаецца бульба, а каровы стаяць па калена ў гнаі.

Па сумных тварах студэнтаў відаць, што яны поўнасцю ўсведамляюць усю горкую іронію свайго становішча.

Фота сайта Беларускага дзяржаўнага ўніверсітэта харчавання.

У вёсцы на Кругляншчыне зачыненыя школа і крама, але ФАП пашкадавалі

Навіна ад

“Пытанне аб закрыцці ФАПа нават не стаяла” – чыноўнікі круглянскага райвыканкама праявілі высакароднасць.

У вёсцы Круча Круглянскага раёна ФАП давялося перанесці з будынка базавай сярэдняй школы – яе закрылі якраз на Дзень ведаў 1 верасня. Добра, што ў вёсцы месца хапае. Цяпер фельчарска-акушэрскі пункт будзе працаваць у пустуючых памяшканнях гандлёвага аб’екта магілёўскага райспажыўсаюза.

З школай і крамай у вёсцы разабраліся раз і назаўжды. На гэтым фоне вельмі цынічна гучыць фраза ў рэпартажы БелТА: “пытанне закрыцця ФАПа ў вёсцы, як адзначылі ў райвыканкаме, нават не разглядалася”.

Атрымліваецца, што людзі павінны яшчэ і падзякаваць чыноўнікам, якія маглі закрыць да халеры яшчэ і ФАП, але не зрабілі гэтага з гуманітарных меркаванняў?

Фота: БелТА.