Пенсіянер загінуў у Абідавічах на пажары

У Абідавічах Быхаўскага раёна 25 лістапада адбыўся пажар у прыватным доме. Трагедыя здарылася ў 13.16. Ратавальнікі выявілі цела пенсіянера 1959 года нараджэння – перадае БелТА са словаў прэс-службы абласнога МНС. Сам дом належыць іншай жыхарцы аграгарадка, жанчыне 1961 года нараджэння. Яна не пацярпела. Прычыны пажару высвятляюцца.

Фота ўзята з адкрытых крыніц і мае ілустрацыйны характар.

Два браты загінулі ў пажары на Шклоўшчыне

Пажар адбыўся а першай гадзіне ночы ў прыватным доме ў вёсцы Любінічы Шклоўскага раёна. Ратавальнікі зафіксавалі гібель двух чалавек, братоў 1963 і 1965 гадоў нараджэння. Паводле папярэдняй інфармацыі, прычынай пажару стала неасцярожнае курэнне – паведамляе прэс-служба МНС.

Фота мае ілюстрацыйны характар і ўзята з адкрытых крыніц.

Скасоўваецца Дэпартамент па ліквідацыі наступстваў катастрофы на ЧАЭС

Ва ўмовах радыёактыўнага забруджвання пражывае амаль кожны дзясяты жыхар Магілеўскай вобласці.

14 лістапада ў Беларусі быў падпісаны ўказ “Аб Міністэрстве па надзвычайных сітуацыях”. Паводле яго, Дэпартамент па ліквідацыі наступстваў катастрофы на Чарнобыльскай АЭС скасоўваецца, а яго задачы і функцыі структурных падраздзяленняў перадаюцца Дзяржатамнагляду Міністэрства па надзвычайных сітуацыях, Міністэрству прыродных рэсурсаў і аховы навакольнага асяроддзя, канцэрну “Беллегпрам”, Гомельскаму і Магілёўскаму аблвыканкамам.

Катастрофа на ЧАЭС ў красавіку 1986 года падзяліла гісторыю беларускага грамадста на да і пасля. Чарнобыльскім забруджваннем быў атручаны кожны пяты квадратны метр нашай зямлі. 

Пастановай Савета Міністраў Беларусі ад 11 верасня 1990 года № 227 “Аб Дзяржаўным камітэце БССР па праблемах наступстваў катастрофы на Чарнобыльскай АЭС” быў створаны асобны Камітэт з правамі міністэрства для каардынацыі намаганняў усіх зацікаўленых бакоў і кансалідацыі рэсурсаў па пераадоленню наступстваў Чарнобыльскай катастрофы.

У 1995 годзе Дзяржкамчарнобыля пераўтвораны ў Міністэрства па надзвычайных сітуацыях і абароне насельніцтва ад наступстваў катастрофы на Чарнобыльскай АЭС.

У 1998-2001 гадах працаваў Камітэт па праблемах наступстваў катастрофы на Чарнобыльскай АЭС пры МНС, які потым у 2001-2006 гадах быў перападпарадкаваны Савету Міністраў Беларусі.

З 2006 года Камітэт па праблемах наступстваў катастрофы на Чарнобыльскай АЭС быў пераўтвораны ў Дэпартамент пры МНС. Змяняўся статус структуры, змяняліся фінансаванне і адзнакі наступстваў аварыі на ЧАЭС.

Самай вострай, сярод комплексу сучасных экалагічных праблем Магілёўскага Падняпроўя, на працягу апошніх 30 гадоў застаецца праблема радыёактыўнага забруджвання тэрыторыі ў выніку аварыі. 

Магілёўская вобласць разам з Гомельскай, больш за іншыя рэгіёны краіны пацярпела ад радыеактыўнага забруджвання. У рознай ступені забруджана больш за 7 тыс. км² (27% тэрыторыі).

Галоўны радыёактыўны хімічны элемент, які вызначае 85% радыяцыйнага фону мясцовасці забруджаных раёнаў – цэзій-137. Некаторыя раёны Магілёўшчыны забруджаны таксама стронцыем-90 (Краснапольскі і Чэрыкаўскі раёны). Плямы радыёактыўнага забруджвання глеб са шчыльнасцю забруджвання больш за 1 Кu/км² зафіксаваны ў 14 з 21 раёна вобласці. 

У зоне забруджвання знаходзяцца больш за 700 населеных пунктаў 13 раёнаў, з іх 5 гарадоў – Быхаў, Слаўгарад, Чавусы, Чэрыкаў, Краснаполле. 

фота: rodniva.by

Мужчына загінуў на пажары ў Горацкім раёне

Пра пажар у вёсцы Казлы паведамілі суседзі, а таксама пра тое, што ў хаце павінен быў знаходзіцца чалавек. Па прыездзе выратавальнай каманды дом гарэў адкрытым полымем – паведамляе прэс-служба МНС. Цела 47-гадовага мужчыны было знойдзенае на падлозе ў жылым памяшканні дома. Ён пражываў у хаце сваёй маці, якой не стала ў мінулым годзе.

фота: МНС

У Хоцімску пры пажары абгарэў мужчына, яго выратавалі

Прыватны дом 69-гадовага пенсіянера палаў адкрытым полымем увечары 7 лістапада. Ратавальнікі заўважылі гаспадара сядзібы на падлозе ўнутры дома і вынеслі яго на свежае паветра – паведамляе БелТА. У мужчыны дыягнаставанае атручэнне прадуктамі гарэння і апёкі, ён шпіталізаваны.

Фота: БелТА

Дзядуля з унукам праваліліся ў калодзеж у Быхаве

лопчык з пераахалоджаннем дастаўлены ў бальніцу. 

Здарэнне адбылося ўвечары 31 кастрычніка. Дзядуля разам з бабуляй і двума ўнукамі адправіліся ў лес, каб нарэзаць яловых галінак і накрыць імі саджанцы – паведамляе прэс-служба МНС. У нейкі момант 9-гадовы ўнук праваліўся ў адчынены калодзеж з вадой. Дзядуля палез даставаць хлопчыка, але праваліўся ў калодзеж таксама. Бабуля выклікала ратавальнікаў, якім удалося выцягнуць ахвяр на паверхню. Хлопчык атрымаў агульнае пераахалоджанне і адправіўся ў лякарню, яго дзядуля не пацярпеў.

Рэкордныя 5 дзён правяла ў лесе 79-гадовая пенсіянерка Глускага раёна і выжыла дзякуючы кукурузе

Ратавальнікі з дапамогай валанцёраў 4 дні шукалі грыбніка-недарэку і знайшлі яе ў прытомнасці. Здарэнне адбылося паблізу вёскі Поблін Глускага раёна. 

Па інфармацыі Міністэрства па надзвычайных сітуацыях яшчэ 13 кастрычніка ў 22:30 ратавальнікам паступіла паведамленне аб жанчыне, якая пайшла ў лес у грыбы і не вярнулася.  Мабільнага тэлефона жанчына, парушыўшы шматлікія папярэджанні і правілы, не ўзяла з сабой.

Як аказалася, Юлія Давыдаўна, жыхарка вёскі Поблін, раніцай 13 кастрычніка пайшла ў лес у грыбы. Калі яна з надыходам змяркання не вярнулася дадому, то дачка пенсіянеркі патэлефанавала ў МНС. Каб у спадарыні Юліі быў мабільны, то лакалізаваць яе месцазнаходжанне было б адносна проста. Але яна не выявіла асцярожнасці і прадбачлівасці. 

Наступнай раніцай ратавальнікі, работнікі міліцыі, лясгаса, валанцёры, мясцовыя жыхары пачалі пошукі, але яны напачатку былі безвыніковымі. З кожным днём надзея на выратаванне раставала. Тым часам  жанчына 4 ночы вымушана была праводзіць у лесе. 

Толькі 17 верасня раніцай ратавальнік Сяргей Анцюшэня знайшоў Юлію Давыдаўну ў полі паміж вёскамі Поблін і Разлевічы. Ёй пашчасціла натрапіць на кукурузнае поле. Менавіта збожжа кукурузы стала ежай і дапамагло выжыць.

Жанчына была ў прытомнасці, але яна зусім знясілела і толькі прасіла піць. Ратавальнікі неадкладна перадалі пацярпелую медыкам. Пенсіянерка шпіталізавана.


Парады: Вопытныя грыбнікі і спецыялісты па выжыванню раяць збіраючыся ў грыбы браць з сабой не толькі нож і кошык для грыбоў, але і заплечнік для паклажы, гумовыя боты і порхаўку (дажджавік), мабільны тэлефон і паўэрбанк, компас, сродкі ад насякомых, бінт і антысептык, ліхтарык, свісток, а яшчэ хаця б невялічкую бутэлечку з вадой і крыху ежы. 

І самае галоўнае – апранацца ярка.

фота: МЧС

Гарэў палац культуры сельгасакадэміі ў Горках, у будынку былі людзі

Пацярпелых няма – усе супрацоўнікі своечасова пакінулі памяшканні. Трохпавярховы будынак палаца культуры горацкай акадэміі загарэўся 10 кастрычніка каля 11 гадзін раніцы, паведамляе прэс-служба абласнога МНС. 

Пажар адбыўся на першым паверсе ў дапаможным памяшканні танцавальнага класа. Заняткі ў гэтым класе на момант здарэння не праводзіліся. У выніку пажару ў дапаможным памяшканні пашкоджана маёмасць, абгарэлі сцены і столя.

Мужчыне заціснула нагу мотакультыватарам, прыйшлося выклікаць ратавальнікаў

У вёсцы Сідараўка  Краснапольскага раёна гаспадар працаваў на сядзібе, пераворваючы палеткі. Падчас працы фраза мотакультыватара зачапіла штаніну мужчыны і зацягнула нагу – паведамляе прэс-служба міністэрства па надзвычайных сітуацыях.

Выкліканыя на месца здарэння работнікі МНС дэблакавалі заціснутую нагу і перадалі пацярпелага медыкам. З траўма і ён шпіталізаваны.

Тры чалавекі загінулі на Магілёўшчыне за суткі – пажары і іншыя надзвычайныя здарэнні

У Магілёве на праспекце Шмідта ў сваёй кватэры загінуў шасцідзесяцігадовы мужчына. Пажар адбыўся ў памяшканні на чацвёртым паверсе пяціпавярховага жылога дома. 

У Круглым пасля апёкаў, атрыманых на пажары ў неэксплуатаваным аднапавярховым жалезабетонным будынку памёр яшчэ адзін жыхар вобласці – паведамляе прэс-служба МНС. 

Гібель яшчэ аднаго чалавека зафіксавана ў Быхаўскім раёне. Падрабязнасці трагедыі не паведамляюцца.

Фота носіць ілюстрацыйны характар