Тавары, пратэрмінаваныя больш чым на два месяцы, знайшлі ў адной з крам Кіраўска

Камітэтам дзяржкантролю Магілёўскай вобласці за найгрубейшыя парушэнні заканадаўства прыпынена праца гандлёвага аб’екта індывідуальнага прадпрымальніка ў Кіраўску.

Праверка крамы высветліла, што ў продажы знаходзіліся 12 найменняў каўбасных вырабаў і мясных паўфабрыкатаў са скончанымі тэрмінамі прыдатнасці да 71 сутак. Пры гэтым 19 найменняў – кандытарскія вырабы, рыба – без неабходнай маркіроўкі, а таксама без дакументаў аб іх набыцці і якасці.

На мяса птушкі гандлёвая надбаўка была завышана на 5%. На большчым дваццаці відах тавараў, якія прапаноўваліся пакупнікам, адсутнічалі цэннікі. Цяпер праца крамы прыпыненая.

Фота: КДК

На Кіраўшчыне адкрыўся дом сямейнага тыпу – і гэта значная падзея

Новыя сямейныя дамы не часта адкрываюцца ў нашай вобласці ў апошнія гады. Таму галоўнай падзеяй мінулага тыдня ў Кіраўску стала адкрыццё ў камфортным і вялікім доме прытулку сямейнага тыпу Алы і Зміцера Перавознікавых. 

Найперш дзякуючы нямецкім партнёрам, якія ў 1990-2000-я гады біліся ў сцяну неразумення беларускіх чыноўнікаў даказваючы, што ніхто не змог прыдумаць лепшую форму выхавання маладога пакалення, чым сям’я. Немцы будавалі першыя сямейныя дамы ў нашай краіне і ў апошняе дзесяцігоддзе адбыўся пералом. Паступова ў краіне перашлі ад дагляду дзяцей-сірот у вялікіх дамах інтэрнатах да іх выхавання ў дамах сямейнага тыпу.  

Вось і на вуліцы Кірава ў Кіраўску ў новым і прыгожым доме бацькі-выхавацелі будуць жыць з чатырма дзецьмі, двое з якіх з’яўляюцца прыёмнымі. 

Званне “бацькі-выхавацелі” з’яўляецца афіцыйнай пасадай Алы і Зміцера. Яны, як і іншыя бацькі-выхавацелі праходзяць спецыяльнае навучанне, шматлікія курсы, атрымоўваюць пасведчанне на прафесійную прыдатнасць. 

Значнай падзеяй ўвядзенне такога шэраговага па інвестыцыях аб’екта стала толькі таму, што  ў 2022 годзе ў Магілеўскім рэгіёне было пабудавана ўсяго два такія дамы – у  Глускім і Кіраўскім раёне.

У Кіраўску сёння пройдзе парад Дзедаў Марозаў і Снягурак

На плошчы імя Кірава таксама адбудзецца ўрачыстая цырымонія запальвання галоўнай ёлкі раёна.

Навагодняя прыгажуня заняла сваё традыцыйнае месца яшчэ ў пачатку снежня, але падрыхтоўка да сустрэчы зімовых святаў зацягнулася. І вось нарэшце ўсё гатова да адкрыцця. Пачатак 21 снежня ў 17.30. 

А ў кіраўскім магазіне “Універмаг” ужо размешчана прыгажуня-ёлка, якая здольная здзейсніць жаданне дзетак – выхаванцаў прыёмных сямей і дзіцячых дамоў сямейнага тыпу. Кожны можа выбраць пісьмо з ёлкі, якое напісана хлопчыкамі і дзяўчынкамі, набыць у магазіне падарунак і пакінуць яго дзіцяці-аўтару ў чароўным куфэрку Дзеда Мароза. Пры жаданні ўзамен можна ўзяць сувенір, які вырабілі дзіцячымі рукамі.

Аслеп ад сонца і пратараніў машыну на ўзбочыне – ДТЗ ў Кіраўскім раёне

19 снежня ў 15:45 у Кіраўскім раёне на трасе Магілёў-Бабруйск 22-гадовы жыхар Асіповічаў, кіруючы аўтамабілем Renault, пры асляпленні сонцам не знізіў хуткасць і сутыкнуўся з аўтамабілем Niva, які спыніўся на ўзбочыне – піша Тэлеграм-канал абласнога УУС.

У выніку 20-гадовы пасажыр “Нівы” атрымаў траўмы і быў шпіталізаваны.

Фота: Прэс-служба Магілёўскага абласнога УУС

Свет пабачыла кніга ўнучкі Якуба Коласа пра сядзібу Качэрычы – сучасны Кіраўск

Гэта выданне – шмадгатовае даследаванне аўтаркі, дзе праз гісторыю двух дваранскіх
родаў адлюстроўваецца мінулае мястэчка і сённяшняга раённага цэнтра Кіраўска.

Кніга даследчыцы Веры Міцкевіч пад назвай “Сядзіба Качэрычы: шляхамі
Ланеўскіх-Ваўкоў, фон Гоераў і іх нашчадкаў” выйшла невялікім накладам у сто
асобнікаў на беларускай і рускай мовах і з’яўляецца незвычайным падарожжам, дзе
змешчана ўсяго патроху – гісторыя, літаратура, шмат асоб і адкрыццяў пра іх.

Асобная ўвага ў выданні акцэнтуецца на асобе Надзеі Тэфі – вядомай расійскай
пісьменніцы-гумарысткі (1872-1952), якая па матчынай лініі паходзіла з двух дваранскіх
родаў, што валодалі Качэрычамі.

Выданне вартае ўвагі, асабліва для тых хто цікавіцца гісторыяй мястэчак
Магілёўшчыны і лёсамі шляхецкіх родаў, а таксама тым, каму неабыякавая гісторыя
ўласнай малой радзімы. Не варта забываць, што Вера Міцкевіч не проста даследчыца,
а яшчэ і ўнучка народнага паэта Беларусі Якуба Коласа.

Дарэчы, ад былой сядзібы Качэрычы нічога не захавалася, аднак застаўся маляўнічы
парк, па якім гуляюць жыхары ўжо сучаснага Кіраўска.

“Смачная” пляцёнка стане канкурэнтам знакамітай кіраўскай смажанкі?

Хлебабулачны выраб – пляцёнка “Смачная” стала лаўрэатам “Прадэкспа-2022”.  

Кіраўскія кааператары ўзнагароджаны сярэбраным медалём і цяпер ганарацца не толькі сваімі смажанкамі.

Як паведаміла газета “Кiравец”, райспажыўтаварыства ўпершыню прыняло ўдзел у 28-м міжнародным дэгустацыйным конкурсе якасці харчовай прадукцыі «Прадэкспа-2022». Яны былі адзінымі прадстаўнікамі Магілёўшчыны, а іх пляцёнка “Смачная” уразіла вельмі патрабавальнае журы. 

Начальнік вытворчага аддзела райспажыўтаварыства Святлана Васільева адзначыла, што пляцёнку “Смачную” выпякаюць ужо на працягу некалькіх гадоў. Штомесяц яе робяць больш за 7 тон. Не толькі кіраўчане, але і пакупнікі Бабруйска і Бабруйскага раёна, а таксама Гомельскай вобласці,  ацанілі па заслугах смакавыя якасці гэтага вырабу.  

Кіраўск ужо стаў сталіцай беларускай смажанкі, пра што пісалі Магілёў.media.

Магчыма, з часам пляцёнка будзе не менш вядомай і стане канкурэнтам знакамітых кіраўскіх смажанак.  

Фота: газета “Кіравец”

Кіраўск сановіцца сталіцай смажанкі – яе прадаюць тут тысячамі ў дзень

Райвыканкам задумаў стварыць скульптуру смажанкі.

Райцэнтр вядомы падарожнікам па трасе Бабруйск – Магілёў найперш сваёй смажанкай. Аўтобусы, якія рухаюцца па самай доўгай у Еўропе прамой трасе, робяць спецыяльныя прыпынкі ля кафэ з сімвалічнай назвай “Смажанка”, каб людзі маглі закупіццца гэтай смакатой. 

Прыдарожнае кафэ за дзень рэалізуе ад 2 да 4 тысяч смажанак, а ў летні час продажы вырастаюць да 5-6 тысяч штук – паведамяе газета “Магілёўскія ведамасці”. 

Як адзначаюць у Кіраўскім райспажыўтаварыстве, сярэднямесячны тавараабарот спажывецкага таварыства складае 330 тысяч рублёў, прычым паkову – 170 тысяч з іх прыносіць рэалізацыя смажанак.

 mogilev.media


У 1934 годзе побач з вёскай Старцы на месцы былых хутароў і вёскі Качэрычы быў арганізаваны пасёлак Кіраўск. Пасёлак быў названы ў гонар Сяргея Кірава, сакратара Ленінградскага абкама ВКП(б) пасля яго забойства ў 1934 году. У 1955 годзе пасёлак Кіраўск і вёскі Кірава і Стараселле былі аб’яднаны ў адно паселішча – пасёлак пад назвай Кіраўск, які ў 1959 годзе атрымаў статус пасёлка гарадскога тыпу. У 2001 годзе Кіраўск атрымаў статус горада.


Папулярнасць кіраўскіх смажанак настолькі вялікая, што кіраўчане прапануюць увекавечыць свой брэнд ў скульптуры. Слава аб кіраўскім кулінарным шэдэўры так далёка выйшла за межы раёна, што многія жыхары вобласці, і не толькі яе, імкнуцца патрапіць у раённы цэнтр, каб самім пераканацца ў яго ўнікальных смакавых якасцях – заяўляюць жыхары горада. 

Брыгадзіра ў Кіраўскім раёне падазраюць у крадзяжы 79 галоў ската

Бабруйская міліцыя выявіла партыю буйнога рагатага ската, якую перавозілі на прыватнай аўтамашыне па трасе Бабруйск-Мозыр, паведамляе Тэлеграм-канал прэс-службы абласнога УУС. Шсць бычкоў, якіх спрабавалі вывезці з Магілёўскай вобласці, мелі біркі аднаго з сельгаспрадпрыемстваў Кіраўскага раёна. 

У ходзе следчых мерапрыемстваў было ўстаноўлена, што брыгадзір  аграпрамысловага комплекса разам з саўдзельнікамі на працягу некалькіх месяцаў выкрадаў жывёл гаспадаркі. Патэнцыйныя пакупнікі прыязджалі па начах на ферму і забіралі жывёлу, за якую разлічваліся наяўнымі грашыма па заніжаным кошце. Толькі адзін 28-гадовы прадпрымальнік з Магілёва з верасня па лістапад купіў такім чынам 54 асобіны буйной рагатай жывёлы.

Усяго ў гаспадарцы выяўлены недахоп у 79 галоў ската на агульную суму больш за 160 000 рублёў. Заведзена крымінальная справа.

Спатрэбіліся санкцыі, каб аграрыі і гандляры пачалі шукаць адзін аднаго

“Як увайсці ў гандлёвыя сеткі?” – на прыкладзе калгаса “Рассвет” аграрыі ўсёй краіны вучыліся працаваць з гіпермаркетамі

На базе ААТ «Рассвет імя К.П. Арлоўскага» на Кіраўшчыне прайшоў рэспубліканскі навучальны семінар, на якім прадстаўнікі гандлёвых сетак і сельгасвытворцаў вучыліся супрацоўнічаць – піша газета “Кіравец”. Аказалася, што не ўсё так безнадзейна, як падаецца. У семінары прынялі ўдзел высокія чыноўнікі і простыя аграрыі з усёй Беларусі, на якіх трымаецца краіна. 

Месцам правядзення невыпадкова стала ААТ «Рассвет ім. К.П. Арлоўскага». Гаспадары паказалі сховішча для агародніны. Дырэктар сельгасарганізацыі Аляксандр Багель распавёў аб вытворчасці бульбы, агародніннай і садавіннай прадукцыі і аб тым, як наладжаны іх захоўванне, збыт, а таксама партнёрства з гандлем. Яму было што паказаць і чым пахваліцца. 

З боку гандлёвых сетак на семінары выступілі прадстаўнікі найбуйнейшай беларускай прыватнай сеткі харчовых магазінаў “Еўроопт”. Яны ў сваю чаргу прадэманстравалі праверку якасці сельскагаспадарчай прадукцыі, звярнулі ўвагу на патрабаванні да яе. Гандляры распавялі, што трэба зрабіць вытворцам, каб прадукцыя мела збыт – то бок, каб гандлёвыя сеткі з ахввотай бралі яе на рэалізацыю.

Як прызналіся ўдзельнікі семінара, праблемы супрацоўніцтва паміж вытворцамі і прадаўцамі актуалізаваліся ва ўмовах санкцый. Выглядае, што галоўнай прычынай нізкага ўзроўню супрацоўніцтва выявілася недастатковая падрыхтаванасць сельгасарганізацый краіны да пастаўкі якаснай, канкурэнтнай і таннай прадукцыі.

Брутальныя кіраўскія мужыкі і дзяўчаты ў бел-чырвона-белых уборах – як прайшлі “Дажынкі” на Чыгірынцы

Кантрастна выглядала маляўнічая вёска на беразе Чыгірынскага вадасховішча ў гэтыя выхадныя. Мясцовы люд у нацыянальных чырвона-белых строях і касцюмах чыноўнікаў бавілі час на раённых дажынках. Чыгірынскія запомняць гэты дзень на ўсё жыццё. 

Як распавядае раённая газета Кіравец, з самай раніцы ў цэнтральнай частцы Чыгірынкі была арганізавана работа гандлёвых шэрагаў харчовых і нехарчовых тавараў “Гандлёвае мястэчка”. Сельскагаспадарчыя падворкі аб’ядналі слоганам “Якія мы гаспадары, такія нашы і двары”. Традыцыйна на выставе сельскагаспадарчай тэхнікі былі прадстаўлены самыя разнастайныя ўзоры сельгасмашын. А раённы аддзел па надзвычайных сітуацыях прадставіў імправізаваную зону бяспекі “МНС ЛЭНД”. 

Галоўнымі героямі і дзеючымі асобамі “Дажынак” сталі, вядома ж, хлебаробы, якія падчас уборачнай кампаніі гэтага сезону “з гонарам прайшлі нялёгкі шлях да Хлеба”. Героі жніва-2022 прайшлі ў калоне на святочным шэсці “Гонар і шчодрасць зямлі Кіраўскай”. Брутальнасць вясковых мужыкоў у касцюмах чыноўнікаў адцянялі дзяўчаты і кабеты ў нацыянальных строях. Традыцыйныя бел-чырвона-белыя касцюмы сталі самымі яркімі фарбамі свята. 

А яшчэ было шмат тэматычных выставак: “Будзе хлеб – будзе і песня”, “Свята садавіны і агародніны”, “Сядзіба рыбака”, “Мая гістарычная спадчына”, “Кветкі восені”, “Бульбашы ў Чыгірынцы на кірмашы”, “Тэрыторыя творчасці”, “Рамёствы маёй Радзімы”. 

Таксама ўвагу гасцей свята прыцягнула брутальная мужчынская рубка. Гэта на базе Чыгірынскага лясніцтва прайшла “Бітва лесарубаў”.  

Завершылі свята канцэртная праграма, вячэрняя дыскатэка і святочны феерверк. Куды ж без іх. А на памяць пра свята дзецям засталася і спецыяльная дзіцячая спартовая пляцоўка.