Tag: пенсія

У Касцюковічах былы пажарны стварыў хатні музей

Навіна ад

Супрацоўнік МНС з Касцюковічаў выйшаў на пенсію і ператварыў вясковую хату у вёсцы Вязовец ў сапраўдны казачны куточак.

Сяргей Радчанка, былы ратавальнік з Касцюковічаў, стварыў у вясковай глушы свой уласны рай на зямлі.

Ён – дасведчаны пчаляр, удалы паляўнічы і захоплены рыбак. А яшчэ – майстар на ўсе рукі. Балота каля дома ператварыў у возера, куды запусціў малькоў, вывеў гатункавую маліну, развёў апенькі, а з вулляў зрабіў казачныя хаткі.

вёска Вязовец

У ягоным доме-музеі кожная рэч мае сваё месца.

Сяргей валодае ўнікальным талентам бачыць асаблівасць у самых звычайных рэчах, а ў шэрай рэчаіснасці – рысы казачнага свету.

дом музей

Большасць з нас страцілі гэты дар яшчэ ў дзяцінстве, а Радчанку ўдалося яго зберагчы і развіць.

У сённяшняй Беларусі цяжка знайсці нешта па-сапраўднаму пазітыўнае. Але нават Лукашэнка са сваёй паталагічнай прыхільнасцю да татальнага добраўпарадкавання не здольны вытравіць з беларусаў жаданне марыць і фантазіраваць.

костюковичи

Фота раённай газеты “Голас Касцюкоўшчыны”.

Даярка з Бабруйска адстаяла сваё права на пенсію праз суд

Навіна ад

У Бабруйску жанчына, якая прапрацавала многія гады даяркай, здолела ў судзе даказаць сваё права на пенсію па працы з асаблівымі ўмовамі.

Адмова камісіі і зварот у суд

Як паведамляецца на сайце Вярхоўнага суда, камісія па прызначэнні пенсій пры Бабруйскім райвыканкаме адмовіла заяўніцы ў выплаце пенсіі, спаслаўшыся на недастатковы стаж. Замест патрэбных 20 гадоў камісія прызнала толькі 15 гадоў 6 месяцаў і 4 дні, выключыўшы некалькі перыядаў працы. Падставай сталі згубленыя дакументы і адсутнасць даных у ведамасцях па ўліку працоўнага часу.

Жанчына пайшла ў суд. Яна настойвала, што прадстаўленыя сельгаспрадпрыемствам дакументы былі разгледжаны не ў поўным аб’ёме. У якасці доказаў яна прад’явіла даведкі, дадзеныя аб заработнай плаце і прэміях, а таксама заручылася падтрымкай калег і кіраўнікоў, якія выступілі ў якасці сведак.

Рашэнне суда першай інстанцыі

Суд Бабруйскага раёна і горада Бабруйска прыйшоў да высновы, што заяўніца сапраўды выконвала працу ў спрэчныя перыяды ў поўным аб’ёме. Ён прызнаў адмову камісіі неправамернай і абавязаў пераглядзець пытанне аб прызначэнні пенсіі.

Акрамя таго, на карысць жанчыны былі спагнаныя судовыя выдаткі ў памеры 2 268 рублёў.

Апеляцыя не дапамагла

Камісія па прызначэнні пенсій не пагадзілася з такім судовым рашэннем і абскардзіла яго ў Магілёўскім абласным судзе. Аднак, судовая калегія па грамадзянскіх справах пакінула ўсё без зменаў. Апеляцыя была адхіленая, а стаж працы даяркі прызнаны дастатковым для прызначэння пенсіі. Рашэнне суда ўступіла ў законную сілу.

Фотаздымак ілюстрацыйны, з адкрытых крыніц

Лукашэнка стварае «беларускае NASA», пакуль пенсіянеры лічаць капейкі

Навіна ад

Пакуль беларускія пенсіянеры атрымліваюць надбаўку ў 1,33 рубля, Лукашэнка абвяшчае пра стварэнне нацыянальнага касмічнага агенцтва.

Нядаўна я дапамагаў бабулі разабрацца з яе новай пенсіяй. Яна з радасцю паведаміла, што атрымала надбаўку — 1,33 рубля. Мы пасмяяліся, але смех быў з тых, што крыху горка аддаецца.

І ў гэты ж час Лукашэнка абвяшчае: патрэбна стварыць «беларускае NASA». У краіне ўжо ёсць карпарацыя «Белкосмас», але, паводле яго слоў, яна «дрэнная або недастатковая».

Гэтая заява прагучала на фоне нядаўняга павелічэння пенсій: з 1 лютага 2025 года працоўныя пенсіі павялічыліся ў сярэднім на 10%, а з 1 мая мінімальная пенсія па ўзросце — на 3,74 рублі.

З 1 лютага 2025 года ў Беларусі павысіліся ўсе віды працоўных пенсій: па ўзросце, за выслугу гадоў, па інваліднасці і ў выпадку страты карміцеля. У выніку пераразліку памер пенсіі вырас у сярэднім на 10%.

З 1 мая таксама перагледзелі ў бок павелічэння памеры дапамог сем’ям, што выхоўваюць дзяцей, а таксама некаторыя віды пенсій, сацыяльныя пенсіі і надбаўкі пенсіянерам старэйшым за 75 гадоў.

Аднак, нягледзячы на гэтыя павелічэнні, сярэдняя пенсія па ўзросце непрацуючага беларуса ў маі склала 933,57 рубля, узросшы толькі на 1,33 рубля.

На гэтым фоне заява пра стварэнне «беларускага NASA» гучыць як іронія лёсу. У краіне, дзе пенсіянеры атрымліваюць мізэрныя надбаўкі, а сацыяльныя выплаты застаюцца на нізкім узроўні, гаварыць пра касмічныя амбіцыі — гэта, мякка кажучы, не зусім дарэчы.

Безумоўна, развіццё навукі і тэхналогій важнае для любой краіны. Але калі базавыя патрэбы грамадзян не забяспечваюцца, прыярытэты павінны быць расстаўлены па-іншаму.

Можа, варта спачатку забяспечыць годнае жыццё тым, хто ўсё жыццё працаваў, а ўжо потым марыць пра зоркі? Бо сапраўдная вышыня дзяржавы вымяраецца не колькасцю спадарожнікаў на арбіце, а якасцю жыцця яе грамадзян.

Якуб Ясінскі

Фота: NASA