Tag: магілеў

На Буйніцкім полі пабілі верталёт

Навіна ад

На пляцоўцы ваеннага музея на Буйніцкім полі невядомыя раскурочылі адзін з экспанатаў – верталёт МІ, прыгнаны сюды магілёўскім ДОСААФ. На відэароліку, выкладзеным у сацсетках, бачна, што вандалы разбілі частку насавой абшыўкі і выламалі дзверы.

Выпадкі вандалізма на Буйніцкім полі – не рэдкасць. Мясцовыя жыхары расказваюць, што рэгулярным нападам тут падвяргаюцца і іншыя аб’екты – дзверы бытоўкі “Зелянбуда”, напрыклад, разбіваюцца рэгулярна.

Інфармацыя пра напад на верталёт падсвяціла таксама яшчэ адну тэму – а што там наогул робіць экзэмпляр грамадзянскай авіяцыі, гэтаксама як і самалёт ТУ, што ўсталяваны побач і заўважны на роліку? У якую кашу ператвараецца поле памяці пра подзвіг абаронцаў Магілёва летам 1941-га?

Гродна ці Магілёў — дзе сапраўдная другая сталіца Беларусі?

Навіна ад

Ці можа ў Беларусі быць другая сталіца, акрамя Мінска? Новы краязнаўчы падкаст прапануе незвычайны погляд на гэтую тэму праз параўнанне двух гарадоў — Магілёва і Гродна.

Падкаст пра гарады з амбіцыямі

Краязнаўцы Аляксей Бацюкоў з Магілёва і Аляксей Шота з Гродна запусцілі серыю падкастаў, у якіх параўноўваюць два буйныя рэгіянальныя цэнтры Беларусі. Першы выпуск прысвечаны сталічным амбіцыям гэтых гарадоў і іх гістарычным прэтэнзіям на асаблівы статус.

Паслухаць падкаст можна на ўсіх асноўных стрымінгавых платформах — спасылкі можна знайсці вось тут — а таксама на Youtube.

гродна магілёў
Што робіць горад сталічным?

У падкасце краязнаўцы разважаюць, што азначае “быць сталіцай” у беларускім кантэксце. Ці дастаткова багатай гісторыі і культурнай значнасці, каб прэтэндаваць на такі статус?

Гродна, напрыклад, называюць трэцяй сталіцай Рэчы Паспалітай, а таксама — другой сталіцай БНР. У сваю чаргу Магілёў у розныя часы разглядаўся як патэнцыйная сталіца БССР. Такія гістарычныя факты надаюць сучасным гарадам дадатковую сімвалічную вагу.

дзве сталіцы

Суперніцтва ці партнёрства?

Аляксей Шота і Аляксей Бацюкоў абмяркоўваюць, як рэгіянальныя цэнтры могуць развівацца самастойна, не імкнучыся абавязкова супернічаць з Мінскам. Яны прапануюць зірнуць на Гродна і Магілёў як на самадастатковыя культурныя і інтэлектуальныя цэнтры, кожны са сваім унікальным тварам.

Гэты падкаст — не толькі пра гісторыю, але і пра сучаснасць: як улада, культура і супольнасці ўплываюць на тое, як мы ўспрымаем нашы гарады.

 

Магілёўскіх зняволеных журналістаў Сабалеўскага і Глушкова ўзгадалі на выставе ў Варшаве

Навіна ад

У Варшаве адкрылася выстава, прысвечаная беларускім палітвязням. Сярод іх — магілёўскія журналісты Алесь Сабалеўскі і Яўген Глушкоў.

Выстава “#67” у Музеі Вольнай Беларусі

У цэнтры Варшавы сёння адкрылася выстава “#67”, арганізаваная Беларускай асацыяцыяй палітвязняў “Да Волі”. Яна праходзіць у двары Музея Вольнай Беларусі і прымеркаваная да прававой ініцыятывы “Тыдзень супраць катаванняў”, што праходзіць штогадова напрыканцы чэрвеня. Назва выставы адсылае да колькасці турмаў і іншых пенітэнцыярных устаноў у Беларусі. Сярод партрэтаў палітвязняў, прадстаўленых на выставе, ёсць фота магілёўскіх палітзняволеных і журналістаў Алеся Сабалеўскага і Яўгена Глушкова.

Яўген Глушкоў

Прысуд і статус вязняў сумлення

Нагадаем, што Алесь Сабалеўскі быў асуджаны ў 2024 годзе да 4 гадоў турмы. Яўген Глушкоў – да трох. Абодва яны прызнаныя праваабарончымі арганізацыямі вязнямі сумлення.

выстава палітвязняў

Фота: mogilev.media

БРУ плануе дапамагаць Расіі весці вайну супраць Украіны

Навіна ад

Магілёўскі Беларуска-Расійскі ўніверсітэт (БРУ) падпісаў мемарандум аб супрацоўніцтве з расійскай кампаніяй, якая пастаўляе абсталяванне для падрыхтоўкі вайскоўцаў.

Гаворка ідзе пра ТАА «Віртуальныя трэнажорныя сістэмы ЭРА» з Таганрога, якое ўваходзіць у групу ПСБ — ключавога банка, што абслугоўвае дзяржаўны абаронны заказ Расіі, піша Mayday.

Расійская фірма спецыялізуецца на вытворчасці трэнажораў для навучання салдат кіраванню беспілотнікамі. Такія віртуальныя комплексы дазваляюць рыхтаваць аператараў без выкарыстання дарагога абсталявання і вялікіх палігонаў. Як падкрэслівае кампанія, трэнажоры можна ўсталёўваць проста ў казармах.

Акрамя падрыхтоўкі аператараў дронаў, фірма распрацоўвае 3D-трэнажоры для навучання рамонту і абслугоўванню бранятэхнікі — па заказу Галоўнага аўтабранятанкавага ўпраўлення Міністэрства абароны РФ. Паводле слоў ІТ-дырэктара кампаніі Вячаслава Цімашова, такія трэнажоры ўжо выкарыстоўваюцца ў вучэбных падраздзяленнях Паветрана-дэсантных войскаў, ваенных акадэміях і на акупаваных тэрыторыях, у тым ліку ў Данецку, для падрыхтоўкі байцоў да так званай «спецыяльнай ваеннай аперацыі».

Цяпер «ЭРА» і БРУ плануюць разам рыхтаваць спецыялістаў па беспілотных лятальных апаратах, абменьвацца вопытам у распрацоўцы вайсковых сімулятараў, а таксама запускаць сумесныя навукова-тэхнічныя праекты. У дамове асобна прадугледжана стварэнне сумесных лабараторый і стажыроўкі студэнтаў БРУ на базе расійскага прадпрыемства.

Такое супрацоўніцтва фактычна ўцягвае магілёўскую ВНУ ў інфраструктуру расійскай ваеннай машыны і падрыхтоўку кадраў, якія могуць выкарыстоўвацца для вайны супраць Украіны. Пакуль адміністрацыя БРУ афіцыйна не каментавала новы мемарандум.

Фота: bru.by 

 

У Магілёве адкрылі помнік ахвярам генацыду, які ніяк і нікім не даказаны

Навіна ад

Помнік-сведчанне гістарычнай і юрыдычнай хлуслівасці цяперашняй беларускай улады з’явіўся ў Магілёве.

“Памятны знак, прысвечаны ахвярам генацыду беларускага народа ў гады Вялікай айчыннай вайны” — так афіцыйна называецца помнік, які быў адкрыты 21 чэрвеня па вуліцы Раўчакова.

Сёння ў Беларусі адмаўленне т.зв. генацыду беларускага народа пераследуецца Крымінальным кодэксам. За такое “злачынства” прадугледжана пакаранне ў выглядзе пяці гадоў пазбаўленнен волі. І гэта пры тым, што факт менавіта “генацыду беларускага народу” ніяк і нікім не даказаны.

Паводле Канвенцыі ААН 1948 года і Міжнароднага крымінальнага суда, генацыд — гэта дзеянні, скіраваныя на поўнае або частковае знішчэнне пэўнай нацыянальнай, этнічнай, расавай або рэлігійнай групы як такой. Галоўнае тут — наяўнасць умыснага намеру знішчыць групу менавіта як этнас або нацыю.

Падчас Другой сусветнай вайны Беларусь была арэнай масавых забойстваў, спаленых вёсак і карных аперацый. Але галоўная мэта нацыстаў была — каланізацыя і эксплуатацыя тэрыторый, а не поўнае знішчэнне беларусаў. План «Ост» прадугледжваў рэзкае скарачэнне мясцовага насельніцтва праз гвалт, галодную смерць і высяленне, але юрыдычна гэта часцей трактуецца як злачынствы супраць чалавечнасці і ваенныя злачынствы, а не як генацыд у чыстым выглядзе.

Падчас вайны на тэрыторыі Беларусі адбылося масавае вынішчэнне яўрэяў — гэта прызнана сусветнай супольнасцю як Халакост, то бок генацыд яўрэйскага народа. Таксама быў генацыд цыганскага народу — Параймос, і гэта таксама задакументавана і прызнана міжнароднымі структурамі. Для беларусаў не было дакументаванага асобнага плана, які б дакладна апісваў іх знішчэнне менавіта як этнічнай групы.

Для юрыдычнага прызнання патрэбен судовы працэс: ці Міжнародны крымінальны суд, ці спецыяльны трыбунал. У выпадку Беларусі ніколі не праводзіўся міжнародны суд, які б прызнаў факт генацыду беларускага народа на аснове расследавання з дакументамі, сведчаннямі і вывадамі.

Ніхто не спрачаецца, што беларусы панеслі страшэнныя страты і пацярпелі ад жорсткіх і сістэмных злачынстваў нацыстаў. Але па строгіх юрыдычных крытэрах генацыд — гэта дакументальна зафіксаваная спроба знішчыць народ як этнас. Такіх прамых дакументаў і міжнароднага прысуду па «генацыдзе беларускага народу» няма. Таму гісторыкі і юрысты ўжываюць тэрміны «злачынствы супраць чалавечнасці», «ваенныя злачынствы», «масавыя рэпрэсіі», але не «генацыд» у прававым сэнсе. Але ці мае гістарыная праўда якое-небудзь значэнне для сённяшняй улады ў Беларусі, калі яе скажэнне ва ўгоду ідэалогіі ёсць значна важнейшым?

Фотаздымак: тэлеграм-канал “Исаченко ОНЛАЙН”

Камітэт прыродных рэсурсаў выступіў супраць будаўніцтва царквы ў Пячэрскім лесе

Навіна ад

На месцы магчымага будаўніцтва царквы Дабравешчання Найсвяцейшай Багародзіцы ў Пячэрскім лесапарку ў Магілёве, камітэт прыродных рэсурсаў выявіў дрэвы, высякаць якія забаронена.

Магілёўскі актывіст Дзмітрый Яўстратаў апублікаваў на старонцы “Магілёў і магілёўцы” ў Facebook адказ, атрыманы ад Магілёўскага абласнога камітэта прыродных рэсурсаў. На запыт Дзмітрыя Яўстратава праверыць законнасць вырубкі дрэваў у Пячэрскім лесапарку пад будаўніцтва новай царквы, у камітэце адказалі наступнае.

“Па выніках абследавання выяўлены факт наяўнасці такіх дрэваў, як дуба чарэшчатага, клёна востралістнага, ясеня звычайнага, ліпы, якія забаронены да выдалення ў межах ахоўнай зоны заказніка мясцовага значэння “Пячэрскі”.

пячэрск

У сувязі з гэтым, абласны камітэт прыродных рэсурсаў і аховы навакольнага асяроддзя накіраваў у Магілёўскі гарвыканкам і аблвыканкам прапановы разглядзець іншае месца пад будаўніцтва царквы.

Храм Дабравешчання Найсвяцейшай Багародзіцы ў Пячэрскім лесапарку плануецца будаваць у межах ахоўнай зоны Пячэрскага лесапарку – пісалі mogilev.media. Гэта выклікала неаднзначную рэакцыю сярод жыхароў навакольных дамоў, збор подпісаў супраць будаўніцтва, якія, аднак, былі праігнараваныя горадабудаўнічым саветам пры Магілёўскім гарвыканкаме.

царква ў пячэрску

Пенсіянер з Крычава папрасіў у старшыні аблвыканкама лядовы палац

Навіна ад

Казка пра рыбака і рыбку па-крычаўску:  Анатоль Ісачанка выканаў ролю рыбкі.

Анатоль Ісачанка правёў прыём грамадзян ў Крычаве. Мясцовыя ідэолагі, якія рыхтавалі сустрэчу, занадта перастараліся, дэманструючы адсутнасць праблем – да “губернатара” звярнуўся толькі адзін жыхар раёна.

Пажылы крычаўлянін (на здымку) выказаў старшыні аблвыканкама падзяку за новую паліклініку, падкрэсліў яе важнасць для пенсіянераў і ўсіх жыхароў рэгіёна.

Таксама ён падзякаваў начальству за рамонт дарогі Магілёў – Чавусы. 

Анатоль Ісачанка на ўсялікі выпадак сціпла заўважыў, што за ўсё гэта дзякаваць патрэбна Лукашэнку, які здароўя свайго не шкадуе дзеля развіцця сацыяльнай інфраструктуры ў Беларусі, а ўжо за раёны, пацярпелыя ад аварыі на Чарнобыльскай АЭС, гатовы і жыццё аддаць.

Пасля падзяк партыі і ўраду пенсіянер заявіў, што для поўнага шчасця яму ў прыватнасці, і Крычаву ў цэлым, тэрмінова неабходны лядовы палац. 

“Губернатар” згадзіўся з тым, што без палаца Крычаў не будзе выглядаць Крычавам, але, па-чалавечы кажучы, нагадаў аб неабходнасці жыць па сродках.

Камедыйны прыём, які нагадвае казку пра рыбака і рыбку, скончыўся абяцаннем таго, што пытанне будаўніцтва палацаў і зносу хацін у Крычаве вывучаць і адкажуць просьбіту ў пісьмовым выглядзе.

Ну, а стары, як водзіцца, пайшоў да сваёй старой…

Фота раённай газеты “Крычаўскае жыццё”.

Супрацоўнікі крымінальнага вышуку Магілёўшчыны спаборнічалі ў аратарскім майстэрстве

Навіна ад

У Магілёве выбралі лепшых аператыўнікаў  вобласці. Спаборніцтвы прайшлі ў некалькі этапаў адзін з якіх – здольнасці прамоўцы.

Другі этап рэспубліканскага агляду-конкурсу прафесійнага майстэрства прайшоў у Магілёве. Яго мэта – вызначыць лепшых супрацоўнікаў крымінальнага вышуку вобласці.

Міліцыянты дэманстравалі агнявую падрыхтоўку, мадэлявалі працу на месцы злачынства, збіралі рэчавыя доказы і нават спрабавалі ясна і пераканаўча выкладаць свае думкі.

Невядома, хто з аператыўнікаў стаў лепшым спадчыннікам Цыцэрона, але больш за ўсё ачкоў набраў супрацоўнік крымінальнага вышуку з Чэрыкава. 

Другое і трэцяе месцы – ў сышчыкаў з Бялыніч і Кіраўска.

Фота: “Магілёўскія ведамасці”.

Магілёвец абяцаў адрамантаваць аўто, але прагуляў грошы

Навіна ад

Пад выглядам аўтаслесара магілёвец падмануў пяцярых гараджан на суму каля 8 тыс. рублёў.

У дзяжурную частку Ленінскага РАУС амаль адначасова звярнуліся пяць пацярпелых, піша «Міліцыя Магілёўшчыны». Усе яны паведамілі, што перадалі свае аўтамабілі і грошы 35-гадоваму мужчыне, які раней сапраўды займаўся рамонтам машын.

Як высветлілася, магілёвец сапраўды арандаваў памяшканне пад аўтасэрвіс, але перастаў аплачваць арэнду, у выніку чаго дамова была скасавана. Тым не менш, ён працягваў браць замовы на рамонт, хоць насамрэч не меў ні абсталявання, ні ўмоў для выканання работ.

Кожнаму з кліентаў мужчына абяцаў якасны і своечасовы рамонт. Аднак замест працы над аўтамабілямі ён проста пакідаў іх на стаянках, а атрыманыя перадаплаты траціў на асабістыя патрэбы — арэнду жылля і вячэрнія забавы ў клубах.

У некаторых выпадках, пасля доўгага чакання ён паведамляў уладальнікам, што рамонт завершаны і машыну можна забіраць. Насамрэч аўтамабіль нават не пачыналі рамантаваць. Больш за тое, некалькі чалавек далі яму грошы ў доўг, але так і не змаглі вярнуць іх назад.

У дачыненні да махляра распачата крымінальная справа па факце махлярства.

У траўні стала вядома пра падобны выпадак махлярства з рамонтам аўтамабіляў. Праваахоўнікі высветлілі, што яшчэ адзін 35-гадовы жыхар Магілёва з лютага 2023 года па кастрычнік 2024 года размяшчаў на розных сайтах аб’явы пра рамонт аўтамабіляў. На іх адгукнуліся 14 грамадзян. Пагадзіўшыся на аб’ём работ, мужчына пераконваў уладальнікаў аўто перадаць яму грошы ў якасці перадаплаты. Ён тлумачыў гэта неабходнасцю набыцця запчастак і матэрыялаў для рамонту. Усяго за названы перыяд ён махлярскім шляхам атрымаў больш за 16,5 тысячы рублёў.

Каб стварыць бачнасць рамонту, абвінавачваны перыядычна дасылаў пацярпелым фатаграфіі аўтазапчастак, нібыта набытых для аднаўленчых работ, а таксама часткова разабраных машын. Аднак на самой справе рамонт не праводзіўся, і ён пастаянна прыдумляў новыя прычыны, каб адкласці вяртанне аўтамабіляў. Перададзенымі аўтамабілямі ён карыстаўся ў асабістых мэтах.

Фота: ілюстрацыйнае, mogilev.media

Магілёўскі актывіст Яўген Бойка атрымаў пяць гадоў узмоцненага рэжыму

Навіна ад

Стала вядома пра прысуд тром людзям, абвінавачаным у салідарнасці з палітвязнямі. 12 чэрвеня Мінскі гарадскі суд асудзіў іх на тэрміны ад 2 да 5 гадоў, піша Dissident.by. Найбольшы тэрмін і самы жорсткі прысуд – пяць гадоў пазбаўлення волі ва ўмовах узмоцненага рэжыму – атрымаў магілёвец Яўген Бойка.

Яўген Бойка добра вядомы ў Магілёве як удзельнік творчых актыўнасцяў у сферы нацыянальнага адраджэння – ён браў удзел у курсах “Мова Нанова”, у разнастайных спеўных ініцыятывах. У 2008 годзе ён быў адлічаны з трэцяга курса Магілёўскага дзяржаўнага універсітэта імя А. Куляшова, што было звязана з яго грамадскай дзейнасцю. Яўген тады імкнуўся забяспечыць адваката на сустрэчу супрацоўніка КДБ са студэнткай гэтага універсітэта, за што атрымаў вымову ад дэканата – пісала “Вясна”. Пазней Бойка атрымаў гістарычную адукацыю ва ўніверсітэце ў Познані, а таксама стаў ІТ-спецыялістам. 

Яўген Бойка быў затрыманы, прыблізна, у верасні 2024 г. – паведамляюць праваабаронцы. Яго абвінавачвалі паводле арт. 361-4 Крымінальнага кодэксу (садзейнічанне экстрэмісцкай дзейнасці). 

20 снежня 2024 года на праўладных медыя з’явілася відэа, у якім прапагандысты казалі пра затрыманых людзей па справе супрацы з Фондамі дапамогі. У выніку гэтай аперацыі на лаве падсудных апынуліся тры чалавекі, якіх затрымалі ў жніўні і верасні 2024 года. Справу супраць іх пачалі разглядаць 30 траўня ў Мінскім гарадскім судзе. 12 чэрвеня 2025 г. былі агучаны прысуды. Яўгену Бойку прысудзілі пяць гадоў пазбаўлення волі ва ўмовах узмоцненага рэжыму.

Фота з сацыяльных сетак Яўгена Бойкі