Tag: прымусовая праца

Магілёвец папаўся на фіктыўным працаўладкаванні 12 выпускнікоў каледжа

Навіна ад

Год “хатняй хіміі” і вялікі штраф прысудзілі дырэктару прыватнай арганізацыі за фіктыўнае працаўладкаванне ў цырульні 12 выпускнікоў каледжа.

У Беларусі дэкларуецца, што прымусовая праца забаронена. Аднак насамрэч гэта не так. Выпускнікі навучальных устаноў, якія вучацца за кошт дзяржаўнага бюджэту, які ў сваю чаргу фармуцца з падаткаў іх і іх бацькоў, мусяць адпрацаваць па так званым размеркаванні. 

Таму, хто не хоча прымусова працаваць, прыходзіцца дзейнічаць не зусім законнымі, з пункту гледжання дзяржавы, якая сама парушае закон, спосабамі. Так, у Магілёве 12 выпускнікоў каледжа і дырэктар прыватнай фірмы, якая аказвае цырульніцкія паслугі, дамовіліся, што яны будуць штомесяц пералічваць яму ад 160 да 200 рублёў. За гэта ён афармляліе фіктыўныя дакументы аб іх працаўладкаванні: загады аб прыёме, працоўныя дагаворы, пацвярджэнні аб прыбыцці да месца працы. Таксама мужчына  забяспечыў накіраванне недакладных звестак аб працаўладкаванні выпускнікоў у ФСАН, падатковыя органы і Белдзяржстрах. Усе гэта адбывалася з 2022 па 2025 год. 

Разгледзеўшы справу, суд Ленінскага раёна Магілёва прызнаў дырэктара вінаватым у службовым падлогу і пасобніцтве ў прычыненні маёмаснага ўрону без прызнакаў крадзяжу. Вырак суда – адзін год абмежавання волі без накіравання ў папраўчую калонію адкрытага тыпу, штраф у памеры 18 тысяч рублёў і забарона займаць кіруючыя пасады на пяць гадоў. Таксама з падсуднага спагнаны даход, які быў здабыты “злачынным шляхам”, у памеры 39 737,19 рубля. Мужчына сваю віну цалкам прызнаў, але прысуд у законную сілу пакуль не ўступіў.

Фотаздымак з адкрытых крыніц

Беспрацоўных у Касцюковічах зноў прымусілі бясплатна працаваць

Навіна ад

Ці то асоб, не занятых у эканоміцы, у Касцюковічах развялося больш чым дзе, ці то міліцыя там самая запатрабавальная, ці то мясцовай газеце падабаецца асвятляць гэтую тэму, але беспрацоўныя там зноў змагаліся са снегам.

На думку міліцыянераў, грамадскія работы фарміруюць у грамадзян такія якасці, як:

  • дысцыплінаванасць;
  • добрасумленнасць;
  • патрыятызм;
  • павага да чалавечай годнасці;
  • павага да чужой працы.

Акрамя таго, уборка снегу аказвае на беспрацоўных «дабратворны ўплыў і матывуе іх да афіцыйнага працаўладкавання, вядзення нармальнага здаровага ладу жыцця».

Варта нагадаць, што калі міліцэйскія справы ў краіне складаюцца ўсё лепш і лепш, то з эканомікай нешта не клеіцца. Хоць снегу ў Беларусі хапае на ўсіх, патрыятызм растае на вачах, а колькасць грамадзян, якія ігнаруюць удзел у эканоміцы, расце ўдарнымі тэмпамі.

Відавочна, прымусовыя работы дрэнна спалучаюцца з павагай да чалавечай годнасці, а «добраахвотная» уборка дваровых тэрыторый у Касцюковічах не спрыяе папулярызацыі здаровага ладу жыцця.

Цяпер статыстыка алкагалізацыі насельніцтва і ўзроўню самагубстваў засакрэчаная беларускімі ўладамі. А калі яна яшчэ была ў адкрытым доступе, Касцюковіцкі раён, які, дарэчы, даў свету міністра Кубракова, лічыўся лідарам зусім не здаровага ладу жыцця.

Фота раённай газеты.

Касцюковіцкіх беспрацоўных прымусілі расчышчаць снег пад дамамі сілавікоў

Навіна ад

Прымусовая праца становіцца нормай у Беларусі, таму беспрацоўных усё часцей прымушаюць працаваць бясплатна.

У Касцюковічах міліцыя прымусіла беспрацоўных мясцовых жыхароў займацца ўборкай снегу. Гэта адбылося пасля чарговага пасяджэння пастаянна дзеючай камісіі па садзейнічанні занятасці насельніцтва, якое прайшло ў раённым аддзеле ўнутраных спраў, піша Mayday.

На мерапрыемства выклікалі каля двух дзясяткаў чалавек, якіх улады адносяць да катэгорыі «не занятых у эканоміцы». У сценах РАУС чыноўнікі расказалі ім пра наяўныя ў раёне вакансіі, а таксама папярэдзілі пра магчымую адказнасць за так званыя антыграмадскія паводзіны.

Пасля афіцыйнай часткі супрацоўнікі міліцыі вырашылі «ўцягнуць падуліковых грамадзян у грамадска карысную працу». Каля пяці мужчын, якія стаяць на ўліку ў міліцыі, былі накіраваныя на ўборку снегу з тратуараў каля новабудоўляў у мікрараёне арэнднага жылля. У гэтых дамах пражываюць самі сілавікі, работнікі сістэмы аховы здароўя і маладыя спецыялісты.

Пры гэтым пра аплату працы або добраахвотны характар такой «дапамогі» гаворка не ішла.

Нагадаем, што ў снежні 2025 года магілёўскіх беспрацоўных прымусілі прыбіраць тэрыторыю дзіцячага садка.

Фотаздымак: Mayday

Суддзя Магілёўскага аблсуда распавяла студэнтам аб карысці прымусовай працы

Навіна ад

Аб абавязку працаваць прымусова распавяла на сустрэчы з навучэнцамі Сацыяльна-гуманітарнага каледжа суддзя Магілёўскага аблсуда Алена Манкевіч.

Сустрэча адбылася ў самім каледжы, і на ёй, калі паглядзець на апублікаваныя фотаздымкі, прысутнічалі адны дзяўчыны. Свой расповед суддзя пачала з таго, што па Канстутытуцыі Рэспубліка Беларусь гарантуе атрыманне адукацыі. Відаць, яна не ўдакладніла, што кажа пра спецыяльную адукацыю, а не сярэднюю ці базавую. 

Аднак тут жа Манкевіч заявіла, што выпускнікі за такую гарантыю таксама нешта павінны. А менавіта – гады прымусовай працы, бо дзяржава вызначыла такую меру, як адпрацоўку пасля заканчэння вну ці сярэдняй спецыяльнай установы.

“Суддзя адзначыла, што па завяршэнні навучання выпускнікі, якія атрымалі адукацыю за кошт бюджэтных сродкаў, абавязаны адпрацаваць абавязковы тэрмін пры накіраванні на працу. Калі ж абавязковы тэрмін не адпрацоўваецца без паважных прычын, у выпускніка ўзнікае абавязак пакрыць дзяржаве выдаткі, затрачаныя на яго падрыхтоўку. Суддзя прывяла прыклады з судовай практыкі, падкрэсліўшы, што такія справы разглядаюцца рэгулярна, што сведчыць аб актуальнасці тэмы” – распавядаецца ў тэлеграм-канале абласнога суда.

Такім чынам, аказваецца, даволі многа выпускнікоў сваімі дзеяннямі выказваюць нязгоду з тым, што на самой справе з’яўляецца парушэннем права на працу, бо права гэта не ёсць абавязак. І бюджэтныя грошы, за якія грамадзяне Беларусі атрымалі адукацыю, не з’яўляюцца грашамі беларускага ўрада ці Палаты прадстаўнікоў. “Няма ніякіх дзяржаўных грошай, ёсць толькі грошы падаткаплацельшчыкаў” – казала калісьці брытанскі прэм’ер-міністр Маргарэт Тэтчэр. І была яна абсалютна права ў адрозненні ад суддзі Манкевіч і тых, хто прымушае выпускнікоў да абавязковай працы. Грошы падаткаплацельшчыкаў – гэта грошы ў тым ліку і бацькоў тых дзяўчат, якіх сагналі ў актавую залу слухаць проціпраўныя адносна правоў чалавека аповяды прадстаўніцы Магілёўскага аблсуда.

Паколькі суддзі, нават магілёўскія, павінны быць больш-менш дасведчанымі ў праве, то яны выдатна ведаюць, што прызнакамі прымусовай працы з’яўляецца наяўнасць пакарання за адмову ад яе і адсутнасць добраахвотнасці. Якраз пра пакаранне за адмову проста з-за нежадання працаваць на непрывабнай працы і казала Манкевіч, спрабуючы паказаць справядлівасць прымусовай працы па ўказцы дзяржавы, якая існуе толькі за кошт падаткаплацельшчыкаў.

Мала таго, што міжнароднае права не дапускае абмежаванняў свабоды працы праз эканамічныя санкцыі, калі сама праца не з’яўляецца добраахвотнай, так і яшчэ артыкул 41 Канстытуцыі Беларусі сцвярджае, што кожны мае права на працу, выбар роду дзейнасці і прафесіі. Але дзе ж будзеш мець выбар роду дзейнасці, калі мусіш спачатку прымусова адпрацаваць некалькі год? Ці гаварыла пра гэты парадокс суддзя? Слаба верыцца.

Фотаздымак: ТГ Магілёўскага аблсуда

Былую навучэнку каледжа ў Бабруйску прымусілі аплаціць “бясплатнае” навучанне

Навіна ад

У Бабруйску правялі паказны суд над былой навучэнкай каледжа імя Ларына за тое, што яна не адпрацавала “бясплатнае” навучанне. Дзяўчыну, насуперак Канстутуцыі і правам чалавека, прымусілі заплаціць за яго.

Як паведамляе суд Бабруйскага раёна і горада Бабруйска, дзяўчына навучалася ў Бабруйскім дзяржаўным каледжы імя Ларына і скончыла яго з атрыманнем прафесійна-тэхнічнай адукацыі па спецыяльнасці “Мастацка-афарміцельскія работы і дызайн інтэр’ераў. Дэкаратыўна-прыкладное мастацтва”.

“Атрымаўшы дыплом, адказчыца была размеркавана ў ААТ «Белмастацкераміка». Адпрацаваўшы паўтара месяца, была звольнена за прагулы без уважлівых прычын. Затрачаную дзяржавай суму на падрыхтоўку спецыяліста адказчыца ў добраахвотным парадку не пакрыла”, — гаворыцца ў паведамленні.

У выніку суд спагнаў з дзяўчыны 13 140 рублёў, а таксама пошліну ў памеры 657 рублёў.

Суд дзейнічаў па беларускіх законах, але вынесенае ім пакаранне ёсць парушэннем правоў чалавека і Канстытуцыі РБ. Справа ў тым, што студэнты ў Беларусі не падпісваюць асобны дагавор аб абавязковай адпрацоўцы бесплатна атрыманага навучання — яна навязваецца праз асобныя законы. Паколькі адсутнічае элемент добраахвотнасці, абавязковая адпрацоўка з’яўляецца прымусовай працай.

Згодна артыкулу 41 Канстытуцыі РБ, “прымусовая праца забараняецца, акрамя працы або службы на падставе судовага пастановы альбо ў адпаведнасці з законамі аб надзвычайным і ваенным становішчах”.

Фота:  суд Бабруйскага раёна і горада Бабруйска