У міліцыю звярнуўся прадстаўнік Магілёўскай гарадской бальніцы хуткай дапамогі і паведаміў аб крадзяжы інваліднага вазка коштам каля 1000 рублёў.
Паводле высветленых абставінаў, 56-гадовы беспрацоўны мужчына, якога даставілі ў бальніцу, скарыстаў момант і вынес інвалідны вазок з прыёмнага пакоя. Ён правёў ноч у медыцынскай установе, а раніцай, прайшоўшы праз шлагбаум, незаўважна пакінуў тэрыторыю разам з вазком.
На допыце мужчына не змог растлумачыць прычыну сваіх дзеянняў, заявіўшы, што знаходзіўся ў стане моцнага алкагольнага ап’янення і не памятае, як адбыўся інцыдэнт.
Па факце крадзяжу распачата крымінальная справа.
Дарэчы, падобны выпадак меў месца ў 2018 годзе ў Баранавічах Берасцейскай вобласці. Там злодзей здзейсніў крадзеж упадабанага інваліднага вазка ў хірургічным аддзяленні першай гарадской бальніцы. З заявай у праваахоўныя органы звярнуўся галоўны ўрач медыцынскай установы.
Два магілёўца асуджаныя вінаватымі ў згвалтаванні, забойстве і разбойным нападзе, якія адбыліся ў чэрвені 2000 года.
Як паведамляе Дзяржкамітэт судовых экспертыз, два мясцовыя жыхары прызнаны вінаватымі ў згвалтаванні, забойстве і разбойным нападзе, якія адбыліся ў чэрвені 2000 года. Тады ў горадзе было знойдзена цела дзяўчыны з прыкметамі гвалтоўнай смерці.
Доўгі час справа заставалася не раскрытай, але ў 2024 годзе, дзякуючы сучасным метадам генетычнай экспертызы, удалося выявіць асобу аднаго з злачынцаў. У выніку абодвум абвінавачаным прысуджана пакаранне ў выглядзе 25 гадоў пазбаўлення волі: першыя пяць гадоў яны правядуць у турме, а астатнія — у папраўчай калоніі строгага рэжыму.
Нагадаем, што ў верасні 2024 года жыхару Слаўгарадскага раёна прысудзілі 22 гады калоніі за забойства айчыма і згвалтаванне заведама непаўналетняй аднавяскоўкі.
У Магілёве грамадства ўсхвалявалася: ў Пячэрскім лесапарку хочуць высекчы частку ахоўнай тэрыторыі дзеля будаўніцтва новага царкоўнага комплексу. Праект ужо вынесены на грамадскае абмеркаванне, і выклікае спрэчкі паміж уладамі, жыхарамі і экалагічнымі актывістамі.
Што плануюць пабудаваць
На ахоўнай тэрыторыі Пячэрскага лесапарку плануюць узвесці храм Дабравешчання Найсвяцейшай Багародзіцы, дом кліру, гаспадарчыя будынкі, дзіцячую пляцоўку і паркоўку. Паводле праекта, тэрыторыя вакол будзе ўпарадкаваная, што, на думку распрацоўшчыкаў, павінна прыцягнуць турыстаў і палепшыць інфраструктуру.
Рэакцыя грамадскасці
Жыхары горада і экалагічныя актывісты негатыўна ўспрынялі навіну. Асноўная прэтэнзія – знішчэнне часткі ахоўнай зялёнай зоны, якая важная для экалогіі і адпачынку гараджан. Улічваючы агульнае скарачэнне зялёных тэрыторый у Магілёве, праект выклікаў хвалю абурэння.
Вось, напрыклад, як адрэагавалі ўдзельнікі самага папулярнага гарадскога пабліка на Facebook – суполкі “Магілёў – горад, які быў…”:
“А вот и ещё одна плохая новость для Могилёва. Всё не знали как подойти к Печерску, но по итогу придумали! За счёт РПЦ! Начнут с “края” Печерска (да, это место ещё не полноценный Печерский лесопарк, а берёзовая рощица, но сути не меняет, ведь это шикарные природные места).”
“Парк должен быть парком. Для строительства храма можно найти другое место. В Могилеве уже не осталось настоящих скверов и парков. НА Подниколье настоящий парк будет еще не скоро, да, и добраться к нему сложно.”
Месца меркаванага будаўніцтва царквы. Крыніца: Yandex.maps
“Вырубают все ,что только можно,везде. При этом сами селятся за городом,чтобы и птички,и бабочки,и деревья. Подниколье превратили в пустырь,выложенный плиткой-и всех уверяют,что стало необыкновенно красиво. Вы ещё вместо деревьев понаставьте пластиковые,в лампочках-и будет ЩАСТЕ,вот уж правда! Могилев-единственный город,где упорно и,надо заметить,успешно борются с парками. Ведь нет ни одного.”
Сярод заўваг ад грамадскасці гучыць таксама вельмі простае пытанне: навошта будаваць храм менавіта тут, калі недалёка ўжо знаходзіцца адна праваслаўная царква – Серафімаўская?
Афіцыйная пазіцыя
Улады заяўляюць, што новая забудова прынясе “сацыяльную і культурную каштоўнасць”, а страты прыроднага асяроддзя будуць мінімізаваныя. У рамках грамадскага абмеркавання кожны жадаючы можа выказаць свае заўвагі і прапановы.
Што гаворыць заканадаўства
Тэрыторыя, якая адводзіцца пад будаўніцтва, уваходзіць у ахоўную зону Пячэрскага лесапарка. Паводле заканадаўства, на ахоўных тэрыторыях будаўніцтва дазволенае, але забароненая вырубка дрэваў. Выглядае, што прадстаўнікі гарвыканкама, якія прымалі падобны праект да разгляду, сціпла замоўчваюць той факт, што запланаванае будаўніцтва можа прывесці да парушэння прыродаахоўнага заканадаўства.
Што далей
Грамадскае абмеркаванне працягнецца да 9 мая. Канчатковае рашэнне будзе прынята пасля разгляду ўсіх заўваг.
З канцэпцыяй новай пабудовы можна пазнаёміцца тут.
Пачынаючы з 25 красавіка на тэрыторыю нашай краіны пачнуць пранікаць прахалодныя паветраныя масы са Скандынавіі, пачнецца паступовае паніжэнне сутачных тэмператур – паведамляе Белгідрамет. У выхадныя дні, у суботу і нядзелю тэмпература днём на Магілёўшчыне чакаецца каля +7°С +8°С. Начная тэмпература, магчыма, будзе мінусавой – да -3°С, прагназуе рэсурс Gismeteo.
У Магілёве арганізоўваецца анлайн-пляцоўка для працаўладкавання моладзі: віртуальны кірмаш вакансій дазволіць маладым спецыялістам наладзіць кантакт з працадаўцамі, не выходзячы з дому.
Калі і дзе
24 красавіка ў Магілёве адбудзецца віртуальны маладзёжны кірмаш вакансій, мэтай якога з’яўляецца садзейнічанне працаўладкаванню маладых людзей.
Паводле інфармацыі БелТА са спасылкай на ўпраўленне па працы, занятасці і сацыяльнай абароне Магілёўскага гарвыканкама, мерапрыемства пройдзе на платформе e-vacancy.by. Электронны фармат мерапрыемства забяспечыць прамы і зручны канал камунікацыі паміж патэнцыяльнымі супрацоўнікамі і працадаўцамі.
Хто ўдзельнічае і як гэта працуе
У кірмашы прымуць удзел вядучыя арганізацыі і прадпрыемствы Магілёва. Яны прадставяць актуальныя вакансіі і падрабязную інфармацыю пра ўмовы працы. Доступ да гэтых звестак будзе захаваны і пасля афіцыйнага завяршэння мерапрыемства.
Анлайн-кірмаш будзе дзейнічаць з 10:00 да 12:00.
Самыя запатрабаваныя вакансіі для моладзі
Згодна з данымі папулярных сайтаў па працаўладкаванні, у Магілёве моладзі часта прапануюць вакансіі ў наступных сферах:
гандаль (прадаўцы, касіры);
абслугоўванне (спецыялісты па рабоце з кліентамі);
вытворчасць (аператары станкоў).
Такі фармат анлайн-кірмашу робіць пошук працы значна прасцейшым і даступным, асабліва для тых, хто толькі пачынае свой прафесійны шлях.
У Магілёўскай вобласці абвешчаны аранжавы ўзровень небяспекі, а па Брэсцкай і Гомельскай абласцях – чырвоны. Днём 6 жніўня максімальная тэмпература паветра складзе +31+36°С – паведамляе МНС.
На першыя дні жніўня ў Магілёўскай вобласці сіноптыкі прагназуюць цёплае, але воблачнае з дажджамі і навальніцай надвор’е.
Працягласць дня скарачаецца па 3 хвіліны на суткі. 1 жніўня сонца ўзыйдзе а 5:13, зойдзе а 20:58, працягласць дня складзе 15:46.
У аўторак прагназуецца пераважна воблачнае надвор’е. Месцамі па вобласці чакаецца дождж, навальніца. Тэмпература ўноч да +15°С, удзень +25°С, увечары +20°С.
Вецер на працягу сутак паўднёвы, паўднёва-заходні, хуткасць 3-5 м/с. Поўня. Геамагнітнае поле спакойнае.
2 жніўня, у сераду, на большай частцы тэрыторыі вобласці на працягу сутак прагназуюцца дажджы, месцамі дажджы моцныя. Уранні +15°С, днём слупок тэрмометра падымецца да +23°С. На працягу сутак будуць паступаць паветраныя масы паўднёвых напрамкаў, к вечару – з захаду, хуткасць вятроў да 6, месцамі пры парывах да 10 м/с. Магнітнае поле неўстойлівае.
У чацвер і пятніцу чакаецца воблачнае з праясненнямі надвор’е. Месцамі пройдзе дождж. Днём да +25°С. Ранні сход.
У суботу, 5 жніўня, прагназуецца воблачнае надвор’е, на большай частцы вобласці чакаюцца дажджы. Удзень паветра прагрэецца да +27°С. Усходнія і паўднёва-усходнія вятры хуткасцю да 4 м/с.
У нядзелю прагназуецца пераважна сонечнае спякотнае надвор’е да +32°С.
Магілёўскі гісторык Яўген Балбераў атрымаў афіцыйны адказ з Інстытута гісторыі Акадэміі навук Беларусі наконт земляных прац у Магілёве. “Зафіксавана грубае парушэнне заканадаўства Рэспублікі Беларусь у сферы аховы гісторыка-культурных каштоўнасцяў” – гаворыцца ў дакуменце.
Як паведамлялі mogilev.media, на месцы касцёла Ксаверыя ў цэнтры Магілёва камунальнікі праводзілі земляныя работы ў 20-х чыслах красавіка, прычым археолагі пры гэтым заўважаныя не былі. Таксама мы пісалі, што падчас рамонту дарожнага палатна на вуліцы Камсамольскай у Магілёве была выяўлена магчыма дарэвалюцыйная брукаванка, якая потым канчаткова знікла.
З пытаннем пра законнасць падобных дзеянняў магілёўскі гісторык Яўген Балбераў звярнуўся ў Інстытут гісторыі Акадэміі навук Беларусі – пра што ён напісаў у сваім Facebook. Земляныя работы па вуліцы Камсамольскай, а таксама на падмурках былога езуіцкага касцёла Святога Францыска Ксаверыя ў г. Магілёве праводзіліся незаконна, без апавяшчэння і ўзгаднення з Інстытутам гісторыі НАН Беларусі – адказалі Балбераву.
Профільны інстытут даведаўся пра правядзенне гэтых работ з публікацый у інтэрнэце. Быў неадкладна праведзены агляд, але на яго момант брук па Камсамольскай вуліцы ўжо не выяўлены, яго лёс не вядомы. Інстытутам зафіксавана грубае парушэнне заканадаўства Рэспублікі Беларусь у сферы аховы гісторыка-культурных каштоўнасцей. Земляныя работы, праведзеныя з выкарыстаннем цяжкай тэхнікай, знішчаюць верхнія напластаванні культурнага пласта Шклоўскага пасада. Дадзены ўчастак знаходзіцца на тэрыторыі матэрыяльнай гісторыка-культурнай каштоўнасці «Гістарычны цэнтр г. Магілёва: будынкі і збудаванні, планіровачная структура, ландшафт і культурны пласт».
Нядаўна ў вольным доступе для даследчыкаў паявіўся малюнак Магілёва і некалькіх гарадоў колішняй Магілёўскай губерніі 1830-х гадоў на сімвалічнай мапе губерніі. Аўтарам малюнка з’яўляўся магілёўскі губернскі землямер калежскі саветнік і кавалер Ігнаці Фёдаравіч Лада-Кладніцкі.
Гэтая рукапісная карта вядомая ў адзіным асобніку, які захоўваецца ў фондах Расійскай дзяржаўнай бібліятэкі. Некалькі спробаў магілёўскіх аматараў старажытнай гісторыі атрымаць ад расійскай бібліятэкі скан выявы ў высокай якасці не давалі плёну. Цяпер жа намаганнямі колішняга намесніка дырэктара Нацыянальнай бібліятэкі Беларусі Алеся Сушы выява ў высокім пашырэнні трапіла да беларускіх краязнаўцаў. Найбольшую цікавасць на ёй выклікае выява экзэрцыргаўза. Гэты манеж для трэніровак вайскоўцаў размяшчаўся ў раёне сучаснага кінатэатра “Чырвоная зорка” і згарэў яшчэ ў 1860-х гадах. Выява ўнікальная тым, што гэта адзінае адлюстраванне магілёўскага экзэрцыргаўза.
Выява прадстаўлена магілёўскім краязнаўцам і калекцыянерам Алегам Давідам Лісоўскім.
