Tag: чыноўнікі

Прызначаны новыя старшыні Асіповіцкага, Хоцімскага і Краснапольскага раёнаў

Навіна ад

Усе яны маюць прамое дачыненне да ранейшых правалаў.

Усе новыя кіраўнікі трох раёнаў Магілёўшчыны – выпускнікі сельскагаспадарчай акадэміі. У іх шмат дыпломаў аб «вышэйшай адукацыі» і не менш правалаў на ранейшых месцах працы.

Дыплом за дыпломам

Краснапольскі раён узначаліў ураджэнец Чавусаў Аляксандр Яфімчыкаў. На ягоным прыкладзе зразумела, адкуль у беларускіх кіраўнікоў бяруцца па тры дыпломы. Сельскагаспадарчую акадэмію ён скончыў у 2006 годзе, а ўжо ў 2007 атрымаў другі дыплом. Само сабой, у набор уваходзіць і акадэмія кіравання.

Яфімчыкаў працаваў галоўным аграномам, старшынёй двух сельгаспрадпрыемстваў, першым намеснікам старшыні Касцюковіцкага райвыканкама і нават два гады ўзначальваў Чавускі райвыканкам. А пасля – раптоўна пайшоў у фермерства.

Яфімчыкаў

Хоцімскі старшыня стаў Асіповіцкім

Для Геворга Мелканяна прызначэнне старшынём Асіповіцкага райвыканкама – крок уверх, бо Хоцімскі раён не самы прэстыжны ў вобласці. 

Мелканян працаваў інжынерам-гідратэхнікам у Чачэрску, узначальваў сельскагаспадарчае прадпрыемства «Батвінава» і нават Чачэрскі фізкультурна-спартыўны клуб «Ураджай».

Пазней ён пераехаў у Бабруйскі раён, дзе з 2016 года працаваў намеснікам дырэктара і дырэктарам ПМК-84. 

У ліпені 2021 года яго прызначылі старшынём Бабруйскага раённага савета «дэпутатаў», а потым – кіраўніком Хоцімшчыны.

МелканянУ Хоцімску – Дзівакоў

Ураджэнцу Слаўгарада Аляксандру Дзівакову – 50 гадоў. Сельскагаспадарчую акадэмію ён скончыў у 1997 годзе і пачаў кар’еру чыноўніка інспектарам па ахове працы ў райсельгасхарчы Лёзненскага райвыканкама. 

Пасля працаваў у аблсельгасхарчы і быў першым намеснікам старшыні Шклоўскага райвыканкама.

Хоцімшчына далёка не самы «перадавы» раён вобласці, аднак цяпер Дзівакоў атрымаў даволі самастойную пасаду.

Дзівакоў

На першы погляд замена Лукашэнкам адразу трох кіраўнікоў раёнаў – сур’ёзны кадравы крок. Аднак біяграфіі Яфімчыкава, Мелканяна і Дзівакова сведчаць: вялікіх прарываў ні ў Асіповічах, ні на Краснапольшчыне, ні на Хоцімшчыне чакаць не даводзіцца.

Урэшце, Лукашэнка, мяняючы шыла на мыла, гэтага і не чакае. Пры прызначэнні ён не выпадкова заўважыў: усе прызначаныя кіраўнікі маюць прамое дачыненне да раней дапушчаных правалаў.

Фота: mogilev.in.

Не гавары «гоп». Магілёўскія чыноўнікі заявілі, што гатовыя сустрэць зіму

Навіна ад

Снег зімой на Магілёўшчыне заўсёды выпадае нечакана, але чыноўнікі гатовыя не толькі прыбіраць снег, але і знаходзіць апраўданні, калі гэтага не атрымліваецца.

Чыноўнікі Магілёва заявілі пра тое, што гатовыя сустрэць зіму цалкам узброенымі.

Пра тое, каб снег не стаў сур’ёзнай праблемай, камунальныя службы і работнікі дарожна-моставага прадпрыемства паклапаціліся загадзя.

Закуплена каля 7 тысяч тон супрацьгалалёдных матэрыялаў, падрыхтавана спецыяльная тэхніка, і гэта дазволіць хутка і эфектыўна спраўляцца з непагаддзю.

Аднак, снег зімой у Магілёўскай вобласці вельмі часта выпадае нечакана. Так здаралася не раз, і тады тыя, хто ў лістападзе абвяшчаў снегу вайну на знішчэнне, пачыналі апраўдвацца.

Калі абласныя цэнтры і раёны завальвала снегам або скоўвала лёдам – не хапала ні тэхнікі, ні пяску.

Тады чыноўнікі скардзіліся на цыклоны, якія, як заўсёды, наляталі на Беларусь, быццам санкцыі, з Захаду, і заклікалі грамадзян дапамагчы ў прыборцы снегу.

Хутчэй за ўсё, так будзе і ў гэтым годзе. Які ж сэнс рапартаваць пра перамогу ў бітве, якая яшчэ не пачалася? Адказ просты: звычка.

Улады так прывыклі балбатаць пра тое, што ў іх усё пад кантролем ужо трыццаць гадоў, што часова змаўкаюць толькі пасля таго, як іх тыкаюць носам у разбітае карыта.

Фота: скрыншот відэа тэлеканала «Беларусь-4».

Клімавіцкая раёнка абяцае абнародаваць сенсацыйны рэйтынг

Навіна ад

Хто ўсё-ж такі з жыхароў Клімавіч знаходзіцца на сваёй пасадзе трыццаць гадоў?

Займальны анонс зрабіла Клімавіцкая раённая газета “Родная ніва”. У адным з бліжэйшых нумароў журналісты абяцаюць распавесці пра тое, «кто из климовчан вот уже тридцать лет в одной должности».

Улічваючы непадробную цікавасць беларусаў да індывідуумаў, якіх трыццаць гадоў немагчыма адцягнуць ад адной пасады, верагодна, варта чакаць сенсацыі.

Галоўнае, каб “Родная ніва” не падманула надзеяў чытачоў аповедамі пра свінарак і пастухоў.

Бо ў раённых цэнтрах да халеры чыноўнікаў, якія не проста сядзяць у сваіх крэслах па тры дзясяткі гадоў, але і ўсе гэтыя гады абяцаюць засыпаць ямы на дарогах, якія маюць такі ж узрост, як стаж дзяржаўных служачых.

Праўда, з улікам сітуацыі, магчыма, праўладным СМІ даручана папулярызаваць гэтую з’яву, каб пераканаць суграмадзян у яе нармальнасці. Бо мудрасць, як і маразм, прыходзіць з гадамі.

Фота: скрыншот газеты “Родная ніва”.

Студнеў прыехаў у родныя мясціны і правёў бой з ценем у Бабруйску

Навіна ад

Менавіта ў Бабруйску Студнеў стаў вядомы як бязлітасны змагар з «чырвона-белай чумой», а цяпер змагаецца з ценямі ў агародзе.

Міністр архітэктуры Студнеў правёў прыём грамадзян у Бабруйску, адкуль пачаўся яго кар’ерны ўзлёт.

Будучы «мэрам» Бабруйска, чыноўнік вызначыўся актыўнасцю ў сацыяльных сетках.

Асабліва гучнай была адна заява. Яна вартая таго, каб прывесці тэкст даслоўна:

“лично я считаю необходимым всех работников органов государственного управления, принимавших участие в борьбе с красно-белой чумой (начиная с лета 2020 года), прировнять к ветеранам Великой Отечественной. Без ложной скромности заявляю, что я и мои коллеги совершили не меньший подвиг, чем наши деды и прадеды в борьбе с немецко-польским геноцидом нашего народа!”.

Ветэранам Вялікай Айчыннай вайны Студнеў пакуль не стаў. Затое яго нахабнае і зневажальнае да высокага звання салдат Вялікай Айчыннай вайны выказванне пачулі «воіны святла» ў атачэнні Лукашэнкі.

Аляксандра Студнева паднялі да ўзроўню абласнога цэнтра, а потым – і да міністэрскага. Нягледзячы, нават, на тое, што чыноўніку тэрмінова патрэбная трэцяя вышэйшая адукацыя: пасля двух першых ён піша слова «приравнять» з граматычнай памылкай.

У Бабруйску, «прировненный» да міністра, Аляксандр Студнеў хутка разабраўся з падтапленнем падвала жылога дома і ценямі ад будынкаў у агародзе.

Падвал, як і чакалася, адрамантуюць праз год, а цені пакуль застануцца на ранейшых месцах.

Фота “Магілёўскія ведамасці”.

У Клімавічах чыноўнік выявіў ямку на дарозе

Навіна ад

Намеснік старшыні Клімавіцкага райвыканкама Шапкін, апрануты ў кепку, спрацаваў наперад і знайшоў яму на асфальце.

Паколькі сацыяльныя сеткі проста завалены скаргамі насельніцтва на стан дарог у абласным цэнтры і раёнах Магілёўшчыны, чыноўнікі, якія не ў стане навесці парадак ні ў год добраўпарадкавання, ні пазней, пачалі працаваць наперад і вырашылі самі інфармаваць грамадскасць пра колькасць ям і выбоін.

Такая “праца”, на іх думку, дазволіць знізіць колькасць скаргаў, якія немагчыма кантраляваць. У выпадку чаго, будзе адгаворка: шукаем, выяўляем, але ж не ўсё адразу.

Адзін з першых гэты метад апрабіраваў намеснік старшыні Клімавіцкага райвыканкама Аляксандр Шапкін. 

Ён сфатаграфаваўся побач з ямай на скрыжаванні вуліц Зялёная і Камсамольская ў Клімавічах, і заявіў, што гэта “чарговы маніторынг гарадскіх тэрыторый” з “выяўленнем дэфектаў дарожнага пакрыцця, што ўскладняюць праезд да гандлёвых аб’ектаў” і паабяцаў, што з ямай разбярэцца жылкамгас.

Добра, калі ў Клімавічах усяго адна яма, але выглядае на тое, што штаб добраўпарадкавання крыху прыхарошыў рэальны стан спраў.

Фота клімавіцкай раённай газеты.

У Клічаўскім раёне чыноўнікі эканомілі на дзецях-сіротах

Навіна ад

Клічаўскаму раённаму сацыяльна-педагагічнаму цэнтру на аднаго дзіцёнка мясцовыя ўлады выдаткоўвалі ў 16 разоў менш грошай, чым патрабаваў закон.

Як піша каманда беларускіх журналістаў-расследавальнікаў «Бюро медыя», пра тое, як дзяржава павінна была забяспечваць выхаванцаў дзіцячых інтэрнатных устаноў, прапісана ў пастанове Саўміна № 840 ад 2006 года. Дакумент устанаўліваў нормы харчавання, адзення, абутку і мяккага інвентару.

Так, дзецям на той час належала пяць пар майткаў, дзесяць пар шкарпэтак, дзве пары штаноў і два швэдры на год. І не больш. З рэчамі асабістай гігіены – нават яшчэ больш строга. На месяц: адзін рулон туалетнай паперы, 50 мілілітраў зубной пасты і 200 грамаў мыла. Адзін дэзадарант на паўгода.

На адно дзіця павінна было вылучацца 320-330 рублёў у год у залежнасці ад узросту. Прычым гэта грошы толькі на адзенне, абутак і мяккі інвентар (коўдры, падушкі, матрацы, пасцельная бялізна, пакрывалы, ручнікі, дываны, сурвэткі, шторы і гэтак далей).

Аднак нават такія сціплыя нормы чыноўнікі не заўсёды выконвалі. Пра гэта раней стала вядома выданню «Зеркало» з ліста Генпракуратуры ў Савет міністраў якое журналісты атрымалі з дапамогай BELPOL. Горш за ўсё аказалася сітуацыя ў Клічаўскім раёне.

Так, у 2022 годзе клічаўскія чыноўнікі залічылі раённаму сацыяльна-педагагічнаму цэнтру 637 рублёў. Прадугледжвалася, што на гэтыя грошы можна набыць рэчы першай неабходнасці і гігіены, навучальныя прылады, адзенне і абутак для 26 чалавек. То бок на гадавыя патрэбы аднаго дзіцяці выдаткавалі ўсяго 24 рублі. Паводле закона, які дзейнічаў на той час, трэба было амаль у 16 разоў болей сродкаў. Толькі на куплю ўсяго для вучобы дзецям павінны былі вылучыць 2426 рублёў, і яшчэ 7522 – на адзенне і абутак.

На што пайшлі грошы, якія не атрымалі сіроты, у лісце не было згадана.

Фотаздымак: http://spc.klichev.edu.by/

Пад Быхавым паставілі помнік скраблу неандэртальца

Навіна ад

У лесе непадалёк ад Быхава ва ўрачыстай атмасферы чыноўнікі адкрылі помнік зробленай 65 гадоў таму знаходцы – скраблу першабытнага чалавека.

Калісьці, у 2019 годзе магілёўскі праўладны гісторык з вялікай прагай да ўлады Ігар Марзалюк, будучы так званым дэпутатам “палаткі”, пераразаў чырвоную стужку на адкрыцці парэнчаў у спальным раёне Магілёва.

Быхаўскія чыноўнікі яўна яго пераплюнулі. Яны адкрылі цэлы помнік у лесе, ва ўрочышчы Красная Горка, які ўвекавечыў знаходку – крамянёвае скрабло, якім неандэртальцы скраблі шкуры забітых жывёл. Знайшоў яе ў 1960 годзе археолаг Леанід Побаль.

На адкрыцці помніка былі не толькі мясцовыя чыноўнікі на чале са старшынёй райсавета Вячаславам Сідарэнка, але да іх яшчэ прыехаў т.зв. дэпутат з той самай “палаткі”. Праўда, не Марзалюк, што здавалася б лагічным, а Аляксандра Міхеенка, якая, мякка кажучы, на гісторыі не спецыялізуецца, а большую частку свайго жыцця займае розныя пасады ва ўладных кабінетах.

Не выключана, паветра ў тых мясцінах настолькі чыстае, што можа лёгка ўскружыць галаву, якая прызвычаілася дыхать пылам ад папер і дакументаў, але Міхеенка на поўным сур’ёзе заявіла, што гэты помнік з’яўляецца “для Быхаўскага края таксама дадатковай магчымасцю развіцця турызма”. З гэтага можна зрабіць выснову, што чыноўніца аднолькава дасведчана як у гісторыі, так і ў турызме.

Дарэчы, каб паглядзець на гэтае скрабло, трэба ехаць не ў лес пад Быхаў, а ў Мінск, у Нацыянальны гістарычны музей. Там турысты і даведаюцца, дзе знайшлі яго, а таксама іншыя археалагічныя каштоўнасці.

Фота: bykhov.by

Чэрыкаў накрыла чарговая хваля мілітарысцкага ўгару

Навіна ад

У Чэрыкаўскім райвыканкаме сабралі чыноўнікаў і вайскоўцаў з усёй Магілёўшчыны для чарговых вучэбна-метадычных заняткаў па пытаннях грамадзянскай абароны.

У мерапрыемстве ўдзельнічаюць старшыні гарадскіх і раённых выканкамаў, сілавікі і ваенныя камісары. У праграме — «арганізацыя і каардынацыя дзеянняў органаў кіравання і сіл тэрытарыяльнай падсістэмы дзяржаўнай сістэмы папярэджання і ліквідацыі надзвычайных сітуацый», а прасцей кажучы — сцэнары таго, як кіраваць насельніцтвам у выпадку вайны ці іншых надзвычайных абставінаў.

“Сёння мы адпрацоўваем на практыцы парадак дзеянняў тэрытарыяльнай абароны ва ўмовах ваеннага становішча. З кожным годам расце і маштаб такіх мерапрыемстваў, і ўзровень падрыхтоўкі службовых асоб. Нам яшчэ трэба вырашыць шэраг праблемных пытанняў, але галоўная задача застаецца нязменнай — абарона суверэнітэту і тэрытарыяльнай цэласнасці Беларусі”, — заявіў ваенны камісар Магілёўскай вобласці Віталь Ядзевіч.

Асабліва ён засяродзіў увагу на гатоўнасці органаў мясцовай улады ў выпадку абвастрэння знешнепалітычнай абстаноўкі. Паводле Ядзевіча, такія вучэнні патрэбныя таму, што «ўзмацняецца ваенная актыўнасць у суседніх рэгіёнах, працягваецца канфлікт ва Украіне», а Захад нібыта «вядзе гібрыдную вайну супраць Беларусі». Праўда, у паведамленні аб вучэннях у тэлеграм-канале Mogilevnews няма ні слова пра ўдзел Беларусі ў агрэсіі супраць Украіны і выкарыстанне мігрантаў для стварэння напружанасці на мяжы з Еўразвязам.

“Аперацыі КДБ па спыненні дзейнасці замежных агентаў пацвярджаюць, што супраць нас працягваецца эканамічны і псіхалагічны ціск. Расслабляцца нельга”, — палохаў ваенкам і без таго напалоханых чыноўнікаў.

На першы погляд, гучыць лагічна: краіна павінна ўмець абараняцца ў выпадку пагрозы. Але за гэтай «трывожнай рыторыкай» гадамі хаваецца іншая рэальнасць: замест паўнавартаснага развіцця сістэмы грамадзянскай абароны, сховішчаў, запасаў лекаў і прадуктаў — акцэнт робіцца на «ворагаў звонку» і «замежных агентаў».

Пры пастаянным паўторы наратыву «асаджанай крэпасці» на фоне вайны ва Украіне падобныя зборы мясцовых чыноўнікаў — чарговы штрышок жыцця ў мілітарысцкім ўгары, які ўслед за Расіяй накрыў Беларусь.

Фота: Mogilevnews

Новая намесніца старшыні Магілёўскага аблвыканкама па эканоміцы – што пра яе вядома?

Навіна ад

Алена Пруднікава-Кірпічонак – эканамістка з Полаччыны, яна аднойчы ўваходзіла ў топ самых прыгожых чыноўніц Беларусі. А таксама, выказвалася, што “людзі павінны разумець, на што трацяцца іх сродкі, якія мы адлічаем як падаткаплацельшчыкі”.

Нядаўна Аляксандр Лукашэнка прызначыў на пасаду намесніка старшыні Магілёўскага аблвыканкама па пытаннях эканомікі Алену Пруднікаву-Кірпічонак. Яна замяніла на гэтай пасадзе Руслана Страхара, кар’ерны ліфт якога спусціўся на ўзровень ніжэй.

Пра Алену Пруднікаву-Кірпічонак вядома, што яна пачала сваю працоўную кар’еру як эканаміст “Полацкага камбіната хлебапрадуктаў” у 1998 годзе. Вышэйшую адукацыю атрымала ў недзяржаўным ВНУ – у Беларускім камерцыйным універсітэце кіравання. У 2011 годзе яна скончыла магістратуру Полацкага дзяржаўнага універсітэта па спецыяльнасці “Эканоміка і кіраванне народнай гаспадаркай”, а ў 2017 годзе прайшла перападрыхтоўку ў тым жа Полацкім універсітэце па спецыяльнасці “Фінансы”. З 2013 года яна пачала працаваць у Міністэрстве эканомікі Рэспублікі Беларусь.

У сваю бытнасць супрацоўніцай міністэрства яна часта наведвала Полаччыну, і падчас адной з такіх паездак, у 2015 годзе, выступаючы перад студэнтамі Полацкага дзяржаўнага ўніверсітэта, выказалася наступным чынам, :

– Людзі павінны разумець, на што марнуюцца іх сродкі, якія мы адлічаем як падаткаплацельшчыкі, наколькі эфектыўна яны выдаткоўваюцца, хто нясе адказнасць за наш неэфектыўна выдаткаваны рубель.

кірпічонак
Алена Пруднікава-Кірпічонак у Полацкім універсітэце, 2015 год. Фота: psu.by

З 2017 года Алена Пруднікава-Кірпічонак працавала на пасадзе начальніка галоўнага ўпраўлення метадалогіі і каардынацыі дзяржаўных праграм міністэрства эканомікі. У 2019 годзе незалежнае выданне UDF.by нават уключыла прывабную эканамістку ў Топ-13 самых прыгожых беларускіх чыноўніц.

Фота з адкрытых крыніц.