У Магілёве адкрылі рух па Шмідтаўскім мосце, але ён яшчэ рамантуецца

Рух па мосце па праспекце Шмідта ў Магілёве адкрыты пачынаючы з сённяшняга дня – паведамляе прэс-служба абласнога УУС. Пры гэтым рамонтныя работы на пэўных участках маста працягваюцца. ДАІ таксама звяртае ўвагу аўтамабілістаў, што на мосце Яшына, на перасячэнні праспекта Пушкіна з вуліцай Чалюскінцаў вернуты ранейшы рэжым праезду – павярнуць налева цяпер можна толькі з крайняй левай паласы.

Фота: УУС

Адмяняюцца некаторыя цягнікі на Мінскім і Салігорскім кірунках

У сувязі з правядзеннем рамонта чыгуначнага маста паміж станцыямі Друць і Вендрыж, на працягу некалькіх дзён на наступным тыдні і ў канцы лістапада будуць адмяняцца цягнікі – паведамляе mycity.by. Так, 24, 25 кастрычніка і 28, 29 лістапада адмяняюцца цягнікі Мінск – Магілёў з адпраўленнем з Мінска ў 6.55, з Магілёва – у 15.33. Таксама цягнікі Магілёў – Салігорск адпраўленнем з Магілёва 6:18, з Салігорска – у 17:21. Некаторыя цягнікі з Мінска і ў Мінск будуць хадзіць праз Воршу і памяняюць расклад руху.

Таксама ў гэтыя дні некаторыя цягнікі на ўчастку Асіповічы – Магілёў будуць курсіраваць са змененым раскладам і маршрутам.

Фота з адкрытых крыніц

Вуліцу Чалюскінцаў у Магілёве адкрыюць з наступнага панядзелка

У Магілёўскім гарвыканкаме паведамілі, што рамонт маста каля Быхаўскага рынка фактычна завершаны, і 23 кастрычніка, у наступны панядзелак будзе адкрыты праезд па вуліцы Чалюскінцаў.

Нагадаем, што вуліцу перакрылі 9 верасня на адзін месяц, а 28 верасня тэрмін рамонту маста павялічылі да канца кастрычніка.

Фота: mogilev.media

Што не так з рэканструкцыяй дома насупраць ЦУМа ў Магілёве – экспертны каментарый

Дом па вуліцы Першамайскай, 32 у Магілёве памяняў свой знешні выгляд. Mogilev.media пісалі пра гэта, дэманструючы шмат фота і відэа. А днямі на тэлеграм-канале “Спадчына” з’явіўся экспертны каментарый пра хібы, дапушчаныя магілёўскімі будаўнікамі на рэканструкцыі гэтага аб’екта.

Аўтар канала звяртае ўвагу на дробныя, амаль незаўважныя з абывацельскага пункта гледжання нюансы, якія, аднак, ствараюць агульную карціну ўсяго будынка. А будынак з нядаўняга часу ўваходзіць у спіс дамоў “каштоўнай забудовы”, на якіх забараняецца мяняць характар архітэктуры фасадаў.

Такім чынам, хібы, якія можна назіраць ужо зараз. Па-першае, парапетная сценка балкона стала роўнай, у той час як папярэдне яна мела раскрапоўку – прамавугольныя выступы на плоскасці.

Па-другое, памяняўся знешні выгляд балясін – ажурнага шэрагу калон у праёмах парапетнай сценкі. Цяпер яны не ідуць на адным узроўні з плоскасцю сценкі, а заглыбленыя.

Таксама змяніліся самі балясы – слупочкі парэнчаў. Раней гэта былі роўныя калоны цыліндрычнай формы з карынфскай капітэллю. Цяпер жа гэта фігурныя кеглепадобныя калоны з дарычнай капітэллю.

Па-трэцяе, адсутнічае кесаніраванне ніжняй плоскасці балкона. Кесон – гэта прамавугольнае заглыбленне. У ранейшым выглядзе балкон нібыта абапіраўся бэлькай на фігурныя кранштэйны з раслінным арнаментам. Зараз ён стаіць на прамавугольных выступах.

Таксама адсутнічаюць прафіляваныя паяскі, адзначае аўтар канала “Спадчына”, агаворваючыся, што іх яшчэ могуць дадаць. Але тыя, што зроблены – не адпавядаюць тым, што былі да рамонту.


“Магчыма, што пры аднаўленні паяскоў кіраваліся прафілямі з гістарычных чарцяжоў будынка – адзначае эксперт – але іншыя вышэй пералічаныя хібы кажуць пра тое, што чарцяжы тут наўрад ці адыгрывалі нейкую ролю. Больш менш праўдападобна аднавілі хіба што самі кранштэйны – і гэта ўжо вялікі прагрэс для горада.”


Фота: Тэлеграм-канал “Спадчына”, mogilev.media

Новы колер і новыя балконы. Як ідзе рамонт будынка насупраць ЦУМа ў Магілёве – фота, відэа

У Магілёве вядзецца рамонт дома па вуліцы Першамайскай, 32. Ідзе замена балконаў, даху і вадасцёчнай сістэмы. Акрамя таго, дом рэзка памяняў свой колер. Вось такім, светла-пясочным ён быў раней.

Цяпер жа дом наблізіўся па сваёй колеравай гаме да суседняга дома, у якім размяшчаецца гарадскі Цэнтр культуры.

 

Посмотреть эту публикацию в Instagram

 

Публикация от Навіны Магілёўскага рэгіёну (@mogilev.media)

На будынку актыўна мяняюцца канструкцыі балконаў. Прычым як з галоўнага, так і з задняга фасадаў.

Фота, відэа: mogilev.media

Працягваецца высечка магілёўскіх бульвараў. Замест дрэваў – стаянкі для аўтамабіляў

Чытачы mogilev media дзеляцца сваімі сумнымі назіраннямі. Падчас рэканструкцыі праспекта Дзімітрава заўважна паменела дрэваў – іх прыбралі, а на іх месцы ладкуюць аўтамабільную стаянку.

Мы працягнем сачыць за рамонтнымі работамі на праспекце, і нагадваем, што яны закранулі таксама месца памяці – крыж каля кальца мясакамбіната, усталяваны на месцы масавых расстрэлаў у сталінскія часы.

Фота: чытачы mogilev.media

Перакрыццё вуліцы Чалюскінцаў у Магілёве працягнулі яшчэ на адзін месяц

Рух транспарту па пуцеправодзе праз вуліцу Завадскую і па вуліцы Чалюскінцаў будзе перакрыты да 30 кастрычніка. Гэта звязана з правядзеннем рэканструкцыі пуцеправода, паведамілі рэсурсу mycity.by ў Магілёўскім гарвыканкаме.

Нагадаем, што рух па вуліцы Чалюскінцаў перакрылі 10 верасня. Меркавалася, што рамонтныя работы будуць завершаныя да канца месяца.

Фота: mogilev.media

Як Магілёў перажывае перакрыццё вуліцы Чалюскінцаў – фотарэпартаж

Роўна тыдзень Магілёў жыве з перакрытай важнай транспартнай артэрыяй. Да канца верасня на рэканструкцыю зачынены мост каля Быхаўскага рынка – пісалі mogilev.media.

Мы праехаліся і паглядзелі, як кіроўцы спраўляюцца з вымушанымі зменамі ў сваіх маршрутах. 

Нагрузку асноўных патокаў машын прынялі адразу тры транспартныя артэрыі. Гэта шлях праз вуліцы Касманаўтаў і Лазарэнкі да плошчы Арджанікідзэ, больш кароткі маршрут па вуліцы Раманава і тых жа Касманаўтаў і Лазарэнкі а таксама самая кароткая дарога – праз вуліцы Вароўскага, Правай Лубравенцы і Лазарэнкі.

На апошнім маршруце пробак практычна не назіралася, хоць да гэтага безумоўна падштурхоўвае вузкі і нагружаны транспартам каля Быхаўскага рынка праезд вуліцы Вароўскага.

Можна сказаць, што сур’ёзнага транспартнага калапсу перакрыццё вуліцы Чалюскінцаў не выклікала. Гэтаму паспрыяла разнастайнасць маршрутаў аб’езду. Некаторыя нязручнасці і доўгія чэргі з аўтамашын на святлафорах можна заўважыць толькі ў гадзіны пік.

Мяркуем, што гэтак жа спакойна горад перажыве астатнія два тыдні рамонтных работ на мосце каля Быхаўскага рынка.

Фота: mogilev.media

Вуліцу Чалюскінцаў у Магілёве ўсё ж перакрылі

Вечарам 10 верасня быў перакрыты рух транспарта па вуліцы Чалюскінцаў у Магілёве. У сувязі з рамонтам пуцепаравода праз вуліцу Завадскую – маста каля Быхаўскага рынка – праезд па Чалюскінцаў спынены цалкам, да канца месяца – гаворыцца ў паведамленні аўтапарка №1. 

Першапачаткова рух планавалася перакрыць яшчэ 9 верасня, але ранкам 10-га стала вядома, што перакрыццё пераносіцца на нявызначаны тэрмін, які скончыўся вечарам таго ж дня.

Як грамадскі транспарт будзе аб’яжджаць закрыты ўчастак, і як можна скараціць аб’езд легкавому транспарту – чытайце ў матэрыяле mogilev.media.

Фота: mogilev.in

Перакрыццё вуліцы Чалюскінцаў у Магілёве перанеслі на нявызначаны тэрмін

Рамонтныя работы на мосце каля Быхаўскага рынка, з-за якіх планавалася перакрыць вуліцу Чалюскінцаў у Магілёве, не пачаліся 9 верасня, як меркавалася. Іх перанеслі на нявызначаны тэрмін – паведамляе аўтобусны парк №1. Папярэдне, работы пачнуцца з 11 верасня, але ў гэты план могуць быць унесены новыя карэкціроўкі, заявілі ў ведамстве.

Фота: masheka.by