Следчыя раскрылі карупцыйную схему на “Магатэксе” і аддзелачнай фабрыцы

За восем месяцаў на прадпрыемствах скралі каля 34 тысяч рублёў.

Злачынную схему выкарыстоўвалі 59-гадовая дырэктар па вытворчасці “Магатэкса” і 51-гадовы дырэктар аддзелачнай фабрыкі. Яны рахтавалі справаздачныя дакументы з фіктыўнымі звесткамі аб завышэнні паказчыка аб здачы гатовай прадукцыі з фабрыкі на склад “Магатэкса” – паведамляе прэс-служба Следчака камітэта Беларусі.

Падробная дакументацыя дазваляла зламыснікам налічваць супрацоўнікам фабрыкі павышаныя прэміі, і атрымліваць прэміі самім. Гэта прывяло да прычынення шкоды на агульную суму больш за 32 тысячы рублёў. 

Абвінавачаныя цалкам кампенсавалі ўрон, але віну прызналі толькі часткова. Ім прад’яўлены абвінавачанні па ч.3 арт.426 (перавышэнне ўлады або службовых паўнамоцтваў, што прывяло да цяжкіх наступстваў) і па ч.2 арт.427 (службовы падлог, учынены з мэтай скажэння даных дзяржаўнай статыстычнай справаздачнасці) Крымінальнага кодэкса. Да фігурантаў справы прыменена мера стрымання ў выглядзе асабістага паручальніцтва.

Карупцыянэр-аграрнік з Магілёўшчыны «нагрэў» гаспадарку на 90 тысяч рублёў і застаўся на волі

Дырэктар сельгаспрадпрыемства купіў нібыта для гаспадаркі два трактары, якіх у ёй не пабачылі. За тэхніку было заплачана больш за 90 тысяч рублёў з бюджэту сельгаспрадпрыемства. Працэс над абвінавачаным у карупцыйным злачынстве зрабілі паказным.

Справу аграрніка з Дрыбініскага раёну разглядалі на выязным судовым пасяджэнні, на якое склікалі кіраўнікоў іншых сельгаспрадпрыемстваў.

59-гадовы кіраўнік гаспадаркі, імя якога не называецца, у канцы жніўня 2020 года «у парушэнні патрабаванняў статуту прадпрыемства, без узгаднення з назіральным саветам, не пераканаўшыся ў фінансавых магчымасцях прыватнай камерцыйнай арганізацыі», заключыў з ёй дамову на набыццё двух трактароў МТЗ, паведамляе  прэс-служба пракуратура.

Аграрнік віну прызнаў часткова, але аплаціў нанесеную сваім злачынствам шкоду.

Яго асудзілі на тры гады пазбаўлення волі з адтэрміноўкай. Ён мае сплаціць штраф у 9600 рублёў. Яму забаронена займаць кіроўныя пасады цягам 5 гадоў.

У абвінавачанага застаецца шанец абскардзіць вырак.

Фота з адкрытых у інтэрнэце крыніцаў

У Зімбабвэ жыхары на закупы пойдуць з золатам

У гэтай афрыканскай краіне вялізная інфляцыя. Гадавы яе памер сягае 192 працэнтаў. Улады наважыліся ўвесьці ў абарачэнне залатыя манеты.

Паводле рэсурсу Myfin, Цэнтрабанк краіны пачне прадаваць манеты з 25 ліпеня. Кожная будзе ўтрымліваць унцыю золата (31,1 грама).

Манеты стануць сродкам ашчаджання, то бок ліквідным актывам, які захоўваецца працяглы час без страты сваёй пакупной здольнасці да наступнага абмену на тавары, паслугі або іншыя актывы.

Паўднёваафрыканскай краінай Зімбабвэ 30 гадоў кіраваў Роберт Мугабэ, які здабыў сабе рэпутацыю дыктатара.

У 1980 годзе, калі краіна стала незалежнай, ён стаў прэм’ер-міністрам, а потым і прэзыдэнтам. Мугабэ абяцаў дэмакратыю і прымірэнне, а яго праўленне абярнулася вялізнай карупцыяй і эканамічнай катастрофай.

У лістападзе 2017 года ў выніку вайсковага перавароту Мугабэ адхілілі ад улады і арыштавалі. Пад ціскам войска ён быў змушаны падаць у адстаўку.

фота: plusworld.ru

У Чэрыкаве траіх кіраўнікоў падазраюць у карупцыі

Усе яны падпісалі акт выкананых работ на невыканання работы.

Кіраўнік будаўнічай арганізацыі, атрымаўшы замову па капітальным рамонце жыллёвага фонду, склаў справаздачу за працы, частка з якіх не была зроблена.

Гэтую справаздачу падпісалі, следам за ім, кіраўнік арганізацыі, якая павінна забяспечваць кантроль за якасцю работ, а таксама кіраўнік арганізацыі-заказчыка, паведамляе «Вестник Чериковщины».

Канкрэтныя імёны і арганізацыі не названыя. Распачатай крымінальнай справай займаецца Чэрыкаўскі раённы аддзел Следчага камітэту.

Будаўнічая арганізацыя, што павінна была ажыццяўляць рамонт жылога фонду ў Чэрыкаве, атрымала 31 455 рублёў бюджэтных сродкаў, і 9 865 рублёў з ліку грошай, што адлічваюцца на капітальны рамонт насельніцтвам.