Category: Навіны

Новы аўтацэнтр плануюць пабудаваць у Магілёве

Навіна ад

Магілёўскі гарвыканкам абвясціў аб грамадскім абмеркаванні што да будаўніцтва новага аўтасалона на праспекце Міру.

Новы будынак мусіць размясціцца паміж гандлёвымі цэнтрамі Sky Mall і «Калужскі». Яго агульная плошча будзе 2030 кв.м. Будынак прадугледжаны з панарамным шкленнем і будзе падзелены на дзве часткі – ў адной плануецца аўтасалон, а ў другой – СТА з мыйняй. 

Пабудаваць аўтацэнтр збіраюцца за паўгода – пачаць у траўні, а скончыць у лістападзе 2026 года.

Заказчык будаўніцтва новага аўтацэнтра ТАА “Аўтатраст”, якое здаўна мае аўтасалон на Пушкінскім праспекце ў Задняпроўі.

Грамадскае абмеркаванне, абвешчанае сёння, працягнецца да 19 лістапада 2025 года.

Фотаздымак: mogilev.gov.by

У крамах Магілёва і вобласці пратэрміноўка, а Лукашэнка лаецца матам

Навіна ад

У крамах Магілёўшчыны гандлююць пратэрміноўкай і парушаюць забарону на павышэнне цэн.

Камітэт дзяржаўнага кантролю Магілёўскай вобласці праверыў 13 крамаў ў Магілёве, Глускім, Крычаўскім, Касцюковіцкім і Хоцімскім раёнах.

Вось вынікі: 

  • у дзевяці крамах прадавалі тавары з пратэрмінаванымі тэрмінамі прыдатнасці;
  • у двух прыватных гандлёвых аб’ектах на рынку Магілёва завышалі цэны на садавіну і гародніну, а гандлёвыя надбаўкі на шэраг тавараў былі завышаныя ў 3,3 раза; 
  • выяўлены факт рэалізацыі больш як 360 адзінак адзення без цэннікаў і прадастаўлення пакупнікам неабходнай інфармацыі пра тавар;
  • у шасці правераных гандлёвых аб’ектах адсутнічалі пералікі тавараў, абавязковых да наяўнасці ў продажы.

Усё б нічога, але «завышэнне цэн» і «пералік тавараў, абавязковых да наяўнасці ў продажы» – гэта элементы сілавога кіравання эканомікай.

Менавіта гэты метад абраў Лукашэнка месяц таму, калі на нарадзе заявіў падначаленым: «Да похер твой макроуровень людям!»

Пытанне толькі ў тым, наколькі хутка выбар на карысць «спакою людзей» прывядзе да поўнага краху стратнай лукашэнкаўскай эканомікі.

Падкрэслім таксама, што выкарыстанне Лукашэнкам ненарматыўнай лексікі стала больш частым. 

Нядаўна ён хваліўся тым, што “паслаў нах” амерыканцаў.

Такая бескампрамісная блізкасць да народу можа сведчыць як пра ўзраставыя змены, так і пра набліжэнне фіналу кіравання Лукашэнкі.

Фота ілюстрацыйнага характару з адкрытых крыніц.

Пасля 25 гадоў у Германіі расіяне пераехалі ў Магілёў і пазногці ў іх адразу сталі крапчэй

Навіна ад

Пераезд сям’і з Германіі ў Магілёў адразу стаў нагодай для беларускіх прапагандыстаў асудзіць гнілы Захад і праславіць беларускую “стабільнасць”.

Гісторыя выглядае так: у 2000 годзе сям’я інжынераў Паспелавых з Омска пераехала на сталае месца жыхарства ў Германію і пражыла там чвэрць стагоддзя. Цяпер Паспелавы зноў вырашылі змяніць прапіску і пераехалі ў Магілёў.

Прычыны, з-за якіх было прынята такое рашэнне:

  • Паспелавы так і не сталі “сваімі” ў чужой краіне;
  • медыцынскае абслугоўванне: у Германіі бясплатны агляд давялося б чакаць месяцамі, у Беларусі – прайшлі за тыдзень;
  • высокая якасць прадуктаў: за тры месяцы беларускай дыеты пазногці сталі мацнейшымі;
  • хваляваліся за сваяка, які ваяваў у Чырвонай Арміі, трапіў у нямецкі палон і памёр у канцлагеры;
  • адмова аўстрыйскіх (не нямецкіх) уладаў у просьбе ўсталяваць фотаздымак сваяка на брацкай магіле: “сям’і адказалі катэгарычна і нават цынічна”.

Байкамі пра моцныя пазногці, перавагу беларускай медыцыны над нямецкай і высокую якасць беларускай прадукцыі ўжо нікога не здзівіш: яны прапісаны ў падлізлівай песні “Бацька”, разам з віламі і яжовымі рукавіцами.

А вось гісторыя з канцлагерам – іншы каленкор. Менавіта аўстрыйскія ўлады збераглі памяць пра сваяка Паспелавых, а ўсталяванне фотаздымка на брацкай магіле  гэта толькі жаданне, якое ідзе ўразрэз з аўстрыйскім разуменнем парадку на мемарыяльных комплексах. Незразумела таксама, ці ёсць на той магіле фотаздымкі іншых пахаваных.

Пасля гэтага ў Паспелавых узнік цэлы шквал прэтэнзій да Германіі, якая іх прыняла. Яны раптам зразумелі, што:

  • вайна не скончылася;
  • на Захадзе ствараюць грамадства спажыўцоў;
  • Германія стала актыўна прымаць мігрантаў пасля падзей ва Украіне;
  • прыезджыя (такія самыя, як яны)  лічаць сябе поўнапраўнымі гаспадарамі;
  • яны жылі ў пастаянным страху за сябе і сваіх блізкіх;
  • у Беларусі на вуліцах бяспечна, усё пад кантролем.

Зразумела, уся гэтая гісторыя старанна адрэдагаваная беларускімі ідэолагамі – і выразна бачная іх тапорная работа. 

Сапраўдную прычыну пераезду Паспелавых мы не даведаемся. 

Застаецца толькі статыстыка: з Германіі з’ехала адна сям’я, а жывуць там тысячы беларускіх сем’яў. Яшчэ дзясяткі тысяч мараць з’ехаць туды, нягледзячы на тое, што іх пазногці могуць згубіць беларускую трываласць.

Фота: “Беларусь Сегодня”.

Дзень у гісторыі. 5 лістапада. Першы беларускі лаўсан

Навіна ад

1842 год. У Быхаве было заснавана двухкласнае прыходскае вучылішча.

Яно адкрылася замест аднакласнага вучылішча, якое ўтрымліваў манастыр канонікаў рэгулярных.

1968 год. На доследнай устаноўцы Магілёўскага камбіната сінтэтычнага валакна атрыманы першы беларускі лаўсан.

Будаўніцтва новай хімічнай вытворчасці пачалося ў Магілёве ў 1965 годзе. Ініцыятыва належыла міністру хімічнай прамысловасці СССР Леаніду Кастандаву. Ён падлічыў, што на закупку імпартных хімічных валокан СССР мусіць траціць каля шостай часткі свайго бюджэту.

Першапачаткова планавалася размясціць новую вытворчасць у Краснаярску. Але пабудаваць яе без замежных спецыялістаў было немагчыма, што пагражала раскрыццю ваенных таямніц – пад Краснаярскам размяшчаліся сакрэтныя аб’екты савецкай абаронкі. Таму ў якасці альтэрнатывы быў абраны Магілёў. 

18 жніўня 1965 года буйнейшае ў Еўропе хімічнае прадпрыемства было закладзена на пустым полі каля пасёлка Грабянёва. Праз тры гады тут выпусцяць першы беларускі лаўсан.

лавсан

1996 год. Памёр ураджэнец Магілёва Віктар Тураў. 

Беларускі кінарэжысёр і сцэнарыст. Народны артыст Беларусі і СССР. Лаўрэат многіх прэмій СССР, Польшчы, кінафестываляў.

Найбольш вядомыя яго экранізацыі «Палескай хронікі» І. Мележа «Людзі на балоце», «Подых навальніцы», апавядання І. Тургенева «Жыццё і смерць двараніна Чартапханава».

Сярод ваеных і гістарычных фільмаў найбольш значныя:  «Я родам з дзяцінства», «Сыны ідуць у бой», «Пераправа», «Чорны бусел», «Шляхціц Завальня».

Здымаў фільмы з удзелам Ул. Высоцкага, з якім сябраваў.

Уключаны ЮНЕСКА ў лік 50 кінематаграфістаў свету, з якіх складаўся Ганаровы камітэт па святкаванню 100-годдзя кінематаграфіі.

Виктор Туров Могилев

2016 год. Памерла Тамара Шырко. 

Геабатанік, аграхімік, глебазнавец, педагог. Кандыдат сельскагаспадарчых навук

Працавала на кафедры фізічнай геаграфіі Магілёўскага педінстытута, вывучала геалогію і глебы Магілёўскай вобласці (1969-1975).

Старшы навуковы супрацоўнік БелНДІ садавіна-агодніцтва і бульбаводства. Аўтар  12 кніг, сярод якіх асаблівым попытам у насельніцтва да гэтага часу карыстаецца “Аптека в саду и огороде”.

Магілёўскія ліфты ў “Мінск-Свеце”: б’юць людзей і пастаянна ламаюцца

Навіна ад

Гісторыю пра тры ліфты магілёўскага “Ліфтмаша” і адну суцэльную пакуту жыхароў высоткі “Румба” ў “Мінск-Свеце” расказаў “Анлайнер”. Па словах жыхароў, усе тры ліфта там рэгулярна выходзяць з ладу і доўга прастойваюць на рамонце, а калі і пачынаюць зноў хадзіць, то з нюансамі: захрасаюць паміж паверхамі, едуць не туды і б’юць створкамі пасажыраў.

Дзверы, якія б’юць людзей

У доме №27 па вуліцы Брылёўскай праблемы з ліфтамі назіраюцца ўжо больш за год. Паводле жыхароў, ніводнага месяца не было без паломак. Асноўныя скаргі – пастаянныя збоі праграмнага забеспячэння і непрадказальныя паводзіны ліфтаў.

“Грузавы ліфт стаіць ужо некалькі тыдняў. Да гэтага больш за месяц не функцыянаваў панарамны. А той, што застаўся, малы, трасецца і выдае страшны скрыгат – здаецца, вось-вось спыніцца паміж паверхамі. Ва ўсіх прылад некарэктна працуе праграмнае забеспячэнне: папрацуюць некалькі гадзін і сыходзяць у аварыйны рэжым. Асабліва непрадказальна паводзіць сябе панарамны ліфт – даязджае да 15-га паверха і “завісае”, бо дзверы не зачыняюцца” – распавёў жыхар Дзяніс.

На сайце абслугоўваючай арганізацыі можна знайсці дзясяткі падобных скаргаў:

  • «У пасажырскім ліфце не працуе аптычны датчык перашкод. Дзвер б’е людзей».

  • «Грузавы ліфт не рэагуе на кнопкі. Дзіця ехала – спалохалася. Святло тухне, выклік дыспетчара не працуе».

  • «Просьба адрамантаваць тры ліфты – яны спыняюцца падчас руху, дзверы можна адкрыць рукамі».

  • «З 20:00 да 21:30 знаходзіўся ў ліфце, які зламаўся. Дыспетчар па экстранай кнопцы выкліку не адгукнуўся. Кнопка прымусовага адкрывання дзвярэй не спрацавала. Датэлефанаваўся да дыспетчара дзякуючы выпадкова пачуўшым мой стук суседзям. Тэлефона з сабой не аказалася. Быў у хатнім адзенні. Змёрз. Толькі цягам гадзіны да мяне прыйшлі на дапамогу».

Хто вінаваты?

Паводле жыхароў, кампанія “Хэпі Планет”, якая абслугоўвае мікрараён “Мінск-Свет”, тлумачыць праблемы тым, што запчасткі нібыта трэба замаўляць за мяжой. Але ліфты ж зроблены на магілёўскім “Ліфтмашы” – таму такі аргумент выглядае дзіўна.

Калі людзі звярталіся непасрэдна на “Ліфтмаш”, там адказалі, што віна — на абслугоўваючай арганізацыі. А прадстаўнікі “Хэпі Планет”, у сваю чаргу, абвінавачваюць саміх жыхароў, якія “пашкоджваюць” абсталяванне, перавозячы будаўнічыя матэрыялы.

У кампаніі таксама паведамілі, што за год атрымалі 176 заявак на рамонт і што адзін з ліфтаў стаіць з 2 верасня з-за рамонту платы кіравання.

“Пасля двух гадоў усё нармалізуецца”

Прадстаўнікі “Хэпі Планет” запэўніваюць, што сітуацыя часовая і звязаная з перыядам актыўнага засялення дамоў.

“Зыходзячы з аналізу працы ліфтаў у дамах комплексу “Мінск-Мір”, пасля заканчэння перавозак грузаў (прыкладна праз два гады пасля засялення) колькасць паломак зніжаецца да трох-пяці у месяц” – сцвярджаюць у кампаніі.

А пакуль жыхарам застаецца толькі чакаць, калі іх ліфты перастануць быць крыніцай страху і стрэсу.

Фота: з адкрытых крыніц

На Бобруйщине замдиректора сельхозпредприятия попалась на сокрытии падежа скота

Навіна ад

Три года колонии с отсрочкой в два года назначил суд бывшей замдиректора сельхозпредприятия в Бобруйском районе, которая через приписки скрывала падеж скота.

Скрывать истинное положение дел руководитель требовала от подчиненных. По ее указанию, они не отражали все факты падежа крупного рогатого скота в отчетах о движении скота и птицы, сообщается на сайте Верховного суда.

Из-за таких требований в отчетность за 2022 год были внесены ложные сведения и не отражены факты падежа не менее 34 голов и недостачи двух голов крупного рогатого скота.

Кроме того, в отчетности о падеже скота, по указанию руководителя, в документы вносились завышенные сведения о реализации животных и прилагались не соответствующие действительности первичные учетные документы. Одну из работниц руководитель вынудила фиктивно купить 25 кг мяса говядины, реально вычтя у нее из зарплаты 150 рублей. Ложные сведения по итогу поступали в статистическую отчетность, в том числе в Белстат.

Суд над приписчицей проходил в Кличеве. Своей вины женщина не признала. Суд учел, что обвиняемая ранее не была судима, является инвалидом 2 группы, и назначил ей три года лишения свободы с отсрочкой исполнения на два года. Приговор, оглашенный 29 октября 2025 года, пока в законную силу не вступил. 

Фотоснимок из открытых источников

Жыхары шматкватэрнага дома ў Горках пакутуюць ад затопленага сутарэння

Навіна ад

Жыхары дома №2 па праспекце Дзімітрава ў Горках ужо некалькі месяцаў жывуць з непрыемнай праблемай – каналізацыйныя сцёкі рэгулярна заліваюць іх сутарэнне. 

Нягледзячы на неаднаразовыя прамыўкі труб, у тым ліку ў чэрвені і верасні, вада зноў і зноў вяртаецца, піша Orsha.ue. На месца неаднаразова выязджала камісія з прадстаўнікоў розных камунальных службаў, але прычыны паўторных затапленняў так і не вызначылі. Як тлумачаць спецыялісты, сеткі вонкавай каналізацыі праходзяць пад зямлёй, таму праверыць, ці правільна яны былі зроблены пры будаўніцтве дома, амаль немагчыма.

Жыхары прапанавалі разабрацца з праблемай за кошт сродкаў, якія штомесяц адлічваюць на капітальны рамонт. Але ў адказ пачулі, што гэтыя грошы знаходзяцца на асобным рахунку, створаным «для акумулявання фінансаў на капрамонт па ўсім Горацкім раёне». Іншымі словамі, выкарыстаць іх на канкрэтны дом пакуль немагчыма.

Прадстаўнікі ўлад абяцаюць, што ў сутарэнні адновяць цеплаізаляцыю труб і прыбяруць наступствы затаплення. Калі ж праблема паўторыцца, яны зноў будуць шукаць яе крыніцу.

А пакуль на інфармацыйным стэндзе яны размясцілі “Правілы карыстання сістэмай каналізацыі”.

Фотаздымак ілюстратыўны з адкрытых крыніц

Праз запах і ДНК у Магілёве раскрылі серыю гаражных крадзяжоў

Навіна ад

Запахавы след і сліна на недакурку сталі доказамі датчнасці 37-гадовага магілёўца да трох крадзяжоў, якія былі здзейсненыя цягам месяца з гаражоў у горадзе.

Уладальнікі абрабаваных гаражоў паведамілі ў міліцыю пра знікненне электраінструментаў, акумулятарных батарэй, набораў інструментаў і іншай маёмасці на агульную суму каля чатырох тысяч рублёў.

Як высветлілася, у двух выпадках зламыснік пракраўся ў гаражы, праламваючы дах, а ў трэцім выпадку скарыстаў тое, што дах увогуле адсутнічаў.

Падчас агляду месцаў здарэння эксперты заўважылі недакурак і куртку, якія зламыснік, магчыма, выпадкова, пакінуў у адным з гаражоў. Праз ДНК са слядоў сліны, якая засталася на недакурку, і запаху курткі ўдалося выявіць, што яны належаць адной і той жа асобе – 37-гадоваму раней судзімаму магілёўцу.

У далейшым у яго сапраўды знайшлі частку скрадзеных рэчаў і вярнулі іх уладальнікам.

Фотаздымак: Дзяржаўны камітэт судовых экспертыз

Горацкіх камунальнікаў злавілі на растраце мільёна бюджэтных грошай

Навіна ад

КДК Магілёўскай вобласці праверыў горацкае УКПП «Камунальнік». Вынікі ўражваюць і шакуюць.

Незаконнае атрыманне больш за мільён рублёў бюджэтных сродкаў выяўлена Камітэтам дзяржаўнага кантролю Магілёўскай вобласці пры праверцы горацкага УКПП «Камунальнік». 

Устаноўлена, што горацкія камунальнікі:

  • неабгрунтавана завышалі планавыя выдаткі пры фарміраванні планавых разліковых цэн на паслугі па цеплазабеспячэнню;
  • уключалі ў акты выкананых работ па ўтрыманні вулічна-дарожнай сеткі лішнія сумы да аплаты;
  • парушалі правілы бухгалтарскага ўліку пры прыёме лому чорных і каляровых металаў; 
  • хімічылі са здаваемай у арэнду дзяржаўнай маёмасцю;
  • парушалі правілы праезду цяжкавагавых і буйнагабарытных транспартных сродкаў па аўтамабільных дарогах агульнага карыстання.

Вынік – мільён рублёў, незаконна атрыманы з бюджэту. Здаецца, няма такога правіла, якое б камунальнікі Горак не парушылі. Карацей кажучы, наш пастрэл усюды паспеў.

Вось толькі фармулёўка «вінаватыя ў парушэннях службовыя асобы і прадпрыемствы прыцягнуты да адміністрацыйнай адказнасці» наводзіць на думку, што растраты сродкаў падаткаплацельшчыкаў не спыняцца.

Фота ілюстратыўнага характара з адкрытых крыніц.

Клімавіцкія сацработнікі правядуць турнір па шахматах у гонар усяго на свеце

Навіна ад

Адразу некалькі святаў вырашылі аб’яднаць адным мерапрыемствам у клімавіцкім сацыяльным цэнтры.

У аддзяленні сацыяльнай рэабілітацыі, абілітацыі інвалідаў і дзённага знаходжання для грамадзян пажылога ўзросту ўстановы «Клімавіцкі раённы цэнтр сацыяльнага абслугоўвання насельніцтва» адбудзецца турнір па шахматах.

Сеанс адначасовай гульні на некалькіх дошках, паводле задумы сацыяльных работнікаў, стане адказам адразу на некалькі святаў і пастаўленых задач:

  • дзень кастрычніцкага перавароту;
  • год добраўпарадкавання;
  • “Актыўнае даўгалецце-2030”.

Міжпланетным гэты турнір, вядома, не назавеш, але ахоп у яго сапраўды шырокі.

Фота ілюстратыўнага характара з адкрытых крыніц.