Бабруйскі аўтапарк спісаў дзевяць старых аўтобусаў, атрымаў чатыры новых і зменшыў колькасць рэйсаў.
Дзевяць спісаных аўтобусаў выпрацавалі свой рэсурс. Ім на змену прыбылі чатыры новыя – дзве “гармошкі” МАЗ-216 і два кампактныя МАЗ-206, піша komkur.info.
Гэтае абнаўленнне стала трэцім з пачатку года. Усяго за гэты час горад атрымаў 16 новых аўтобусаў.
Абнаўленне рухомага складу аўтобуснага парку адбываецца на фоне скарачэння колькасці аўтобусаў на маршрутах. Паводле прадстаўніка прадпрыемства, выклікана гэта летнім зніжэннем пасажырапатоку і маючым адбыцца сезонам адпачынкаў вадзіцеляў аўтобусаў, асабліва тых, якія, як сцвярджаюць у аўтапарку, працуюць з перапрацоўкамі. З верасня, запэўнілі на прадпрыемстве, часова знятыя рэйсы вернуцца зноў.
І гэта, на жаль, не надзвычайнае здарэнне, а звычайная справа.
Паводле вынікаў 2025 года Магілёўшчына адсправаздачылася пра зніжэнне падзяжу БРЖ на 19,4 працэнта да ўзроўню 2024-га. Дынаміка станоўчая, але ў той жа зводцы пракуратура вобласці прызнае: у пяці раёнах падзеж за мінулы год не знізіўся, а вырас. Клімавічы сістэмна ўваходзяць у лік тэрыторый, дзе сітуацыя патрабуе пастаяннага кантролю.
У гаспадаркі Магілёўскай вобласці накіравалі мабільныя групы з ветурачоў і заатэхнікаў – разбірацца з прычынамі на месцах.
Спагнанне 7 тысяч рублёў з работнікаў трох гаспадарак – вяршыня айсберга. Сістэмная карціна па вобласці – 19,4 працэнта паляпшэння ў сярэднім, рост падзяжу адразу ў пяці раёнах і студзеньскі правал.
На адным з прадпрыемстваў Магілёўскай вобласці супрацоўніцы кампенсавалі запазычанасць па зарплаце, якая назапасілася больш як за два гады. Парушэнне выявілі юрысты галіновага прафсаюза.
Прычынай недаплаты стаў перавод жанчыны на вышэйшую пасаду. У новым кантракце ёй устанавілі аклад ніжэйшы за той, што быў прадугледжаны калектыўным дагаворам для гэтай прафесіі. Штомесячная розніца перавышала 300 рублёў і аўтаматычна змяншала ўсе вытворныя выплаты – прэміі, надбаўкі, адпускныя і бальнічныя.
Паводле слоў прававога інспектара працы абласной арганізацыі Беларускага прафсаюза работнікаў лесу і прыродакарыстання Дзмітрыя Мардачова, факт парушэння пацвердзіўся ўжо пры першай праверцы кантрактаў і разліковых лісткоў. Наймальнік з высновамі праверкі пагадзіўся.
З супрацоўніцай падпісалі дадатковае пагадненне, выправілі тарыфны разрад і пералічылі ўсе выплаты за перыяд недаплаты. Выніковая сума кампенсацыі перавысіла 9 тысяч рублёў.
У Асіповіцкім раёне ратавальнікі правялі тактыка-спецыяльныя вучэнні на аб’екце «Маяк». Паводле легенды вучэнняў, загарэўся рэзервуар з керасінам, які ўваходзіць у сістэму дзяржаўных матэрыяльных рэзерваў, пасля чаго адбыўся ўмоўны выбух: дах ёмістасці сарвала, стацыянарная сістэма пажаратушэння нібыта выйшла са строю, а агонь мог перакінуцца на суседнія рэзервуары.
Як паведамляе раённае выданне, у вучэннях удзельнічалі тры пажарныя аўтацыстэрны, аўталесвіца і падраздзяленні Асіповіцкага РАНС. Ратавальнікі адпрацоўвалі падачу пены, астуджэнне суседніх ёмістасцяў, працу пераносных лафетных ствалоў і ўстаноўкі «Пурга-30». У сцэнары таксама прадугледжвалася прыцягненне сіл з суседніх раёнаў, Бабруйска і абласнога ўпраўлення МНС.
Само па сабе адпрацоўванне пажару на небяспечным аб’екце — звычайная і неабходная справа. Але цяпер падобныя вучэнні ў Асіповічах успрымаюцца ў іншым кантэксце. У траўні ў раёне праходзілі расійска-беларускія трэніроўкі з удзелам падраздзяленняў, звязаных з ядзерным забеспячэннем.
Акрамя таго, Беларусь усё часцей згадваецца ў сувязі з рызыкай яе глыбейшага ўцягвання ў расійскую вайну супраць Украіны. На гэтым фоне асаблівае значэнне набываюць аб’екты захоўвання паліва і дзяржаўных рэзерваў: Украіна працягвае наносіць паспяховыя ўдары па расійскай нафтавай інфраструктуры, а ў чэрвені паведамлялася, у прыватнасці, пра атакі на Маскоўскі НПЗ.
Пакуль што ў Асіповічах гарэў толькі навучальны рэзервуар, а выбух існаваў выключна ў службовай легендзе. Аднак сама неабходнасць мадэляваць аварыйныя сцэнары на «стратэгічным» аб’екце паказвае: у цяперашняй ваеннай рэальнасці такія трэніроўкі ўжо не выглядаюць абстрактнай прафілактыкай.
Славяне – буйная моўная і культурная супольнасць народаў свету. На сёння славян у свеце пад 350 мільёнаў чалавек: заходнія (палякі, чэхі, славакі, кашубы і лужычане), паўднёвыя (балгары, сербы, харваты, баснійцы, македонцы, славенцы, чарнагорцы) і ўсходнія (беларусы, рускія, украінцы, русіны).
Афіцыйна свята адзначаецца з 1969 года, калі ў стыку межаў РСФСР, УССР і БССР прайшоў першы фестываль “Славянскае адзінства”. У 1975 годзе там жа ўзведзены манумент Сяброўства – “Тры сястры”.
Славянскія братэрскія адносіны разбураны падзеямі ў былой Югаславіі, вайной Расіі супраць Украіны.
У 2019 годзе беларускім бокам праведзена рэканструкцыя манумента Сяброўства. У маі 2022 года ў сувязі з ваеннай агрэсіяй Расіі Чарнігаўская абласная адміністрацыя распачала падрыхтоўку дакументаў па дэмантажу помніка.
31 мая 2023 года на дарозе каля манумента адбыўся выбух. Расійскія ваенныя паблікі ўдакладняюць, што дарога была ўзарвана, каб «не дапусціць мерапрыемствы ўкраінскіх дыверсійна-разведвальных груп у Бранскай вобласці Расіі».
Дзень памяці вялебнага Пятра Афонскага (праваслаўны каляндар).
Пётр у VII стагоддзі служыў ваяводам у імператарскіх войсках, жыў у Канстанцінопалі, а потым стаў манахам. Правёў у пустынных месцах, не бачачы нікога з людзей, 53 гады. Адзенне яго спарахнела, а валасы і барада адраслі і пакрылі цела замест адзення. Вялебны Пётр памёр у 734 годзе.
На Русі Пятра празвалі Сонцаваротам. Лічылася, што з гэтага дня сонца кароціць свой ход: дні становяцца ўсё карацейшымі і карацейшымі, а ночы – даўжэйшымі.
У гэты дзень нашы продкі асабліва славілі сонца: уздымаліся на вяршыню якога-небудзь пагорка, дзе маліліся і дзякавалі Пятру за цяпло і святло.
На Пятра Сонцавароту нельга было класціся спаць раней за паўночы: лічылася, што калі гэтага не зрабіць, то можна забыцца пра свае планы. Акрамя таго, не варта насіць чорныя ці занадта цёмныя рэчы – сонца можа пакрыўдзіцца і пойдзе дождж.
“З Пятра сонца на зіму, а лета на спякоту”.
У Пятроў дзень выпадаюць вялікія росы.
Дзень моладзі і студэнцтва Беларусі.
Свята творчасці і натхнення, энергіі і запалу, спазнання і самасцвярджэння, кахання і рамантыкі.
Сваю гісторыю ён вядзе з часоў існавання СССР, калі «Дзень савецкай моладзі» адзначаўся ў апошнюю нядзелю чэрвеня.
У Беларусі 1,6 мільёнаў жыхароў адносіцца да моладзі (кожны пяты). У 2023 годзе маладзевай сталіцай краіны абраны Наваполацк.
1178 год. Пяцёра кентэрберыйскіх манахаў назіралі нейкі выбух на Месяцы.
Мяркуюць, што гэта было сутыкненне метэора з Месяцам, у выніку якога ўтварыўся кратэр Джардана Бруна.
1652 год. Мястэчка Жыровіцы атрымала магдэбургскае права і герб.
Мястэчка – грэка-каталіцкі цэнтр Літвы. Зараз – аграгарадок з 2,5 тысячамі жыхароў, прадмесце Слоніма.
Цэнтр турызму нацыянальнага значэння, уваходзіць у турыстычныя маршруты «Мураваны летапіс Панямоння», «Мураваны летапіс Слоніма і Жыровіцаў».
Тут месціцца Свята-Успенскі манастыр (з 1587) з будынкамі і цэрквамі XVII-XVIII стагоддзяў.
У верасні 1730 года адбылася ўрачыстая каранацыя цудоўнага абраза Маці Божай.
1730 год. Польскі кароль і вялікі князь ВКЛ Аўгуст II Моцны арганізаваў самы вялікі ў сусветнай гісторыі банкет.
На ім было 30 000 гасцей – ледзь не ўдвая болей за армію краіны. Асаблівай прычыны для папойкі не было.
Пры Аўгусце пачалася крайняя ступень анархіі, з 18 сеймаў 11 былі сарваны (не без расійскіх грошай), армія была паменшана з 80 да 18 тысяч, праводзіліся палітычныя і рэлігійныя рэпрэсіі. Апошнімі словамі Аўгуста ІІ перад смерцю былі: «Усё маё жыццё было адзіным бесперапынным грахом».
1905 год. Нарадзіўся Пятрусь Броўка (1905-1980).
Беларускі грамадскі дзеяч, празаік, паэт і перакладчык. Народны паэт, Герой Сацыялістычнай працы, акадэмік АН БССР. Галоўны рэдактар часопіса “Полымя” і выдавецтва “Беларуская савецкая энцыклапедыя”.
Аўтар 3-х дзясяткаў кніг паэзіі, шматлікіх аповесцей, лібрэта опер, перакладаў.
Яго творы перакладзены на 27 моў, імя прысвоена выдавецтву “Беларуская энцыклапедыя”, вуліцам у Мінску, Віцебску, Полацку, Гомелі, Бешанковічах, Ушачах.
У Мінску працуе літаратурны музей Петруся Броўкі, у Пуцілкавічах Ушацкага раёна — хата-музей.
Нягледзячы на ўсе яго заслугі, вядомы такія крытычныя радкі Р. Барадуліна:
Пятрусь Броўка піша лоўка,
Піша лоўка і даўно,
Але ўсё, што ён напіша,
Альбо – дрэнь, альбо – …
1911 год. Нарадзіўся Арсень Булаўка (1911-1994).
Беларускі гідролаг, географ, доктар геаграфічных навук.
У 1939-1941 гадах – кіраўнік Магілёўскай гідралагічнай станцыі. Удзельнік абароны Магілёва.
Распрацоўшчык праблем гідралогіі Беларусі, тэорыі воднага балансу. Узначальваў Мінскую гідраметэаралагічную абсерваторыю.
Аўтар і суаўтар шматлікіх навуковых і навукова-папулярных прац, у тым ліку кнігі “Рака Бярэзіна”.
Рака Бярэзіна
1932 год. Нарадзіўся Часлаў Кудаба (1932-1993).
Беларускі і літоўскі географ-краязнавец, эколаг.
Лаўрэат Дзяржпрэміі Літвы. Барацьбіт за незалежнасць Літвы. Кіраўнік праекта па стварэнню геаграфічнага атласа Літвы, аўтар манаграфій, кніг, артыкулаў аб прыродзе, культуры, экалагічным стане Літвы, Беларусі, пра хараство Нарачанскага краю.
Кніга «Па Віліі: падарожныя запісы» прысвечана Беларусі і ўключае гісторыю, этнаграфію, краявіды, культуру, літаратурнае жыццё вёсак, мястэчак і гарадоў, якія мінае р. Вілія.
1946 год. Распачаў сваю дзейнасць Сусветны банк.
Заснаваны ў снежні 1945 года. Галоўнай мэтай яго стварэння была адбудова знішчанай у Другой Сусветнай вайне Еўропы і Японіі, а таксама дапамога ў развіцці краін Азіі, Лацінскай Амерыкі і Афрыкі. Цяпер ён працуе з 124 краінамі з 184 краін-членаў.
Беларусь стала членам Групы Сусветнага банка ў 1992 годзе. За перыяд супрацоўніцтва Сусветны банк інвеставаў у значныя для Беларусі праекты больш за 1,7 мільярдаў долараў, у тым ліку «Развіццё сістэм водазабеспячэння і водаадвядзення», «Павышэнне энергаэфектыўнасці ў Рэспубліцы Беларусь», «Абыходжанне з цвёрдымі бытавымі адходамі ў Рэспубліцы Беларусь», «Рэабілітацыя раёнаў, пацярпелых у выніку катастрофы на Чарнобыльскай АЭС», на рэканструкцыю аўтадарогі М6 Мінск-Гродна і іншыя.
1950 год. Армія Паўночнай Карэі напала на Паўднёвую Карэю.
Больш чым 60-тысячная армія Паўночнай Карэі узброеная савецкімі танкамі перайшла дэмаркацыйную лінію ўздоўж 38-й паралелі і ўторглася на тэрыторыю паўднёвай суседкі каб пачаць “нацыянальна-вызвольную вайну” і ашчасцлівіць братоў на камуністычны манер.
У вайне Паўночнай Карэі дапамагалі СССР, 1 мільён кітайцаў, а Паўднёвай – войскі ЗША, якія выступалі пад сцягам ААН.
Вайна завяршылася “ўнічыю” 27 ліпеня 1953 года: захавалася даваеннае тэрытарыяльнае размежаванне. Пры гэтым загінула 9 мільёнаў карэйцаў, 1 мільён кітайцаў, 54 000 амерыканцаў, колькасць савецкіх – невядома. Вядома толькі, што 22 савецкія летчыкі атрымалі званне Героя Савецкага Саюза.
1977 год. Падчас рыбнай лоўлі маланка стукнула рэйнджара нацыянальнага парка Шэнадоа Роя Саллівана і апякла яму грудзі і плечы.
Пацярпелага даставілі ў шпіталь. Гэта было ўжо сёмае пападанне маланкі ў Роя, за што ён трапіў у Кнігу рэкордаў Гінеса. Упершыню маланка ўразіла яго ў 1942 годзе, пазбавіўшы пазногця на вялікім пальцы нагі. 2-гі выпадак адбыўся ў ліпені 1969 – былі спалены бровы. 3-і ў ліпені 1970 – паранена левае плячо. 4-ы 16 красавіка 1972 – запаліліся валасы. 5-ы 7 жніўня 1973 – ізноў згарэлі адрослыя валасы і апякло ногі. 6-ы: 5 чэрвеня 1976 – пашкоджана шчыкалатка.
Смерць знайшла героя ў верасні 1983 года, калі ва ўзросце 71 года ён стрэліў сам у сябе. Кажуць, што “іскрысты рэйнджар” не змог жыць далей з-за непадзеленага кахання.
1992 год. У Беластоку афіцыйна зарэгістрана Праграмная рада тыднёвіка «Ніва».
Рада выдае тыднёвік польскіх беларусаў. Газета заснавана ў 1956 годзе Беларускім грамадска-культурным таварыствам. Беларускамоўны тыднёвік асвятляе жыццё беларусаў у Польшчы, дзейнасць грамадскіх арганізацый, друкуе матэрыялы па краязнаўстве, аб актуальных падзеях на Беларусі.
Выходзіць старонка для дзяцей «Зорка», перыядычна змяшчаюцца тэматычныя ўкладкі.
Газета імкнецца да яднання беларускага насельніцтва ў Польшчы.
1997 год. Памёр Жак-Іў Кусто (1910-1997).
Французскі акіянограф, контр-адмірал, фатограф, рэжысёр, вынаходнік, аўтар мноства кніг і фільмаў, акадэмік, дырэктар Акіянаграфічнага музея ў Манака.
Адзін з вынаходнікаў акваланга, падводных дамоў, апарата «ныраючы сподак».
Займаўся пытаннямі аховы падводнага асяроддзя.
Аўтар кніг і каля 90 дакументальных фільмаў, сярод якіх «Свет маўчання», «Залатая рыба» (прэмія «Оскар») і «Свет бяз сонца» («Оскар»), якія добра вядомы значнай частцы беларускіх гледачоў.
Існуюць звесткі, што знакаміты вучоны і падарожнік мае беларускія карані, што быццам ягоны бацька Даніель Кусто (1878-1969) эміграваў у Францыю з Лынтупаў сённяшняга Пастаўскага раёна, перарабіў свае беларускія імя і прозвішча Даніла Куст на францускі ўзор. Хаця верагодна гэта толькі прыгожая легенда, бо на інтэрактыўным генеалагічным дрэве сям’і Кусто бліжэйшыя продкі Жак Іва Кусто паходзяць выключна з Францыі.
2009 год. Памёр Майкл Джэксан (1958-2009).
Культавы амерыканскі спявак, танцор, аўтар песень.
Кумір соцень мільёнаў меламанаў 1970-х-2020-х гадоў. Дасягнуў міжнароднай вядомасці ва ўзросце 11 гадоў, «Кароль поп-музыкі», «Чалавек Тысячагоддзя», уладальнік 19 прэмій «Грэмі», двойчы занесены ў Залу славы рок-н-рола – у якасці сольнага выканаўцы і як удзельнік гурта “Jackson 5”. Найвялікім прызнаннем у свеце карыстаюцца ягоныя 3 альбомы з 10: «Off the Wall», «Thriller» і «Bad». «Thriller» занесены ў Кнігу рэкордаў Гінэса як дыск-лідар па продажу ў свеце (104 млн копій); ён узначальваў Billboard 200 на працягу 9 месяцаў і не пакідаў чарта больш за 2 гады.
2011 год. Памёр Раман Тармола-Мірскі (1936-2011).
Беларускі паэт, сцэнарыст.
Скончыў Мінскі педінстытут. Працаваў старшым рэдактарам, загадчыкам літаратурна-мастацкага аддзела, галоўным рэдактарам літаратурна-драматычных праграм, каментатарам па літаратуры і мастацтву Беларускага тэлебачання.
Аўтар 11 кніг паэзіі, двух кніг для дзяцей. Напісаў сцэнарыі да некалькіх дакументальных фільмаў, у тым ліку «Я не самотны… Максім Багдановіч», да тэлеспектакля «Зачараваны Валерка».
На вуліцы Індустрыяльнай запрацаваў новы спартыўны аб’ект, якога трэнеры і спартсмены чакалі некалькі гадоў: адкрыты скаладром вышынёй 17 метраў – рэкордны паказчык для падобных збудаванняў у краіне. Па вышыні канструкцыя супастаўная са звычайнай пяціпавярхоўкай.
Пляцоўка пабудавана на базе дзіцяча-юнацкай школы алімпійскага рэзерву «Вікторыя».
Скаладром мае дзве вертыкальныя дарожкі: адна прызначаная для адпрацоўкі хуткаснага пад’ёму, другая – для праходжання трас павышанай складанасці. Арганізатары падкрэсліваюць, што збудаванне адпавядае алімпійскім стандартам.
Паводле даных гарадскога аддзела спорту, скалалажаннем у Магілёве сёння займаюцца каля 300 дзяцей. Трэніроўкі ідуць як у профільным аддзяленні клуба «Вікторыя», адкрытым год таму, так і ў цэнтрах дадатковай адукацыі. Да гэтага часу ў горада не было ўласнай адкрытай пляцоўкі – заняткі праходзілі ў невялікіх залах.
У дзень адкрыцця на новай пляцоўцы прайшлі спаборніцтвы, прысвечаныя 759-годдзю Магілёва. За ўзнагароды змагаліся спартсмены Гомельскай, Мінскай і Магілёўскай абласцей.
Права паказальнага адкрыцця трасы атрымаў Ігнацій Максімаўцоў – самы хуткі скалалаз Беларусі.
Чэмпіён высока ацаніў узровень зачэпак, параўнаўшы іх з якаснымі расійскімі спаборніцтвамі, і адзначыў, што аб’ект падыдзе не толькі пачаткоўцам, але і дасведчаным атлетам. Паводле яго слоў, з’яўленне высокіх скаладромаў па-за межамі сталіцы непасрэдна ўплывае на канкурэнцыю: спартсмены з рэгіёнаў атрымліваюць магчымасць адпрацоўваць хуткасць, якая раней была даступная пераважна мінчукам.
Зараз скаладром працуе ў асноўным для прафесійных спартсменаў, але хутка яго змогуць выпрабаваць і аматары.
Падрыхтаваныя атлеты прыйдуць са сваім рыштункам, для пачаткоўцаў на месцы будуць працаваць інструктары. Прэйскурант на паслугі ў горадзе яшчэ прапрацоўваюць.
У міліцыю звярнулася 59-гадовая жыхарка Магілёва, якая паведаміла, што паводле ўказанняў махляроў прадала кватэру, узяла крэдыты і пазбавілася ўсіх грошай.
Аказваецца, спачатку жанчыне патэлефанаваў «прадстаўнік службы замены дамафонаў» і сабраў персанальныя даныя. Затым патэлефанаваў «супрацоўнік праваахоўных органаў» з легендай: на імя жанчыны афармляюць крэдыты, да кватэры падбіраюцца махляры, патрэбная дапамога следству.
Паводле яго ўказанняў магіляўчанка прадала кватэру, аформіла ў банках тры крэдыты, адвезла ў Мінск больш за 160 тысяч рублёў наяўнымі і перадала незнаёмаму чалавеку. Крэдытныя сродкі праз інфакіёск былі пераведзены на банкаўскі рахунак за межамі Беларусі.
Амаль 20 гадоў магілёвец у шафе аднаго з пакояў уласнай кватэры вырошчваў каноплі, робячы з іх для сябе марыхуану.
Суд Кастрычніцкага раёна Магілёва вынес прысуд 55-гадоваму жыхару абласнога цэнтра, якога абвінавацілі ў незаконным вырошчванні каноплі і захоўванні наркатычных сродкаў без мэты збыту.
Як высветлілася, мужчына ўжываў марыхуану на працягу доўгага часу. Для яе атрымання ён абсталяваў у шафе аднаго з пакояў сваёй кватэры невялікую аранжарэю.
Для вырошчвання каноплі магілёвец набыў лямпы, вентылятары, падаўжальнікі, угнаенні і насенне. Вырашчаныя расліны ён сушыў, здрабняў і выкарыстоўваў для асабістага ўжывання.
У сакавіку 2026 года праваахоўнікі знайшлі ў мужчыны канверт з марыхуанай. Падчас агляду кватэры ў шафе былі выяўлены дзесяць вазонаў з каноплямі, а таксама высушаныя лісты расліны і прыстасаванні для курэння.
У судзе магілёвец расказаў, што насенне набыў праз інтэрнэт яшчэ ў 2008 годзе. З таго часу ён вырошчваў каноплі дома. Паводле яго, пра гэта ведалі члены сям’і, але ён забараняў ім расказваць камусьці пра сваё захапленне.
Суд прызнаў мужчыну вінаватым і прызначыў яму пакаранне ў выглядзе двух гадоў і шасці месяцаў абмежавання волі без накіравання ў папраўчую ўстанову адкрытага тыпу. Прысуд уступіў у законную сілу.
На адзенні, куды выпадкова перакінуўся агонь, не змаглі пагасіць полымя, і гэта стала прычынай смерці жанчыны і мужчыны на Магілёўшчыне.
57-гадовая магіляўчанка, знаходзячыся ў сябе ў кватэры, паспрабавала прыкурыць цыгарэту ад агню газавай пліты, аднак на ёй загарэлася адзенне. З вялікімі тэрмічнымі апёкамі жанчыну шпіталізавалі, але лекарам не ўдалося выратаваць пацярпелую – праз два з паловай тыдні яна памерла. Медыцынская экспертыза выявіла, што ў памерлай былі тэрмічныя апёкі 2, 3 і 4 ступеняў, якія закранулі каля 48% цела
Такая ж прычына гібелі і 65-гадовага жыхара Быхаўскага раёна. Мужчына дапамагаў пажылой суседцы тушыць сухую траву, калі на ім загарэліся штаны. З прычыны хуткага распаўсюджвання агню ён не змог патушыць полымя самастойна. У выніку вясковец атрымаў тэрмічныя апёкі 2, 3 і 4 ступеняў на 31% цела і праз тыдзень памёр у бальніцы.
