Пуцін абвясціў у Расіі частковую мабілізацыю і прыгразіў атамнай зброяй

Пад прызыў трапляюць усе запаснікі. Шойгу ўдакладніў, што ў войска забяруць 300 тысяч чалавек.

Афіцыйны зварот прэзідэнта Расійскай Федэрацыі да сваіх грамадзян адбыўся ў 9.00 па беларускім часе. У ім Уладзімір Пуцін прачытаў кароткую лекцыю, у якой расказаў пра сваю версію міжнароднага ваенна-палітычнага становішча. Паводле яго перакананняў, агрэсарам на тэрыторыі Украіны ў бягучай вайне выступае ўкраінская ўлада.

Пуцін абвясціў, што падтрымлівае правядзенне рэферэндумаў на акупаваных тэрыторыях, у Херсонскай, Запарожскай, Данецкай і Луганскай абласцях Украіны аб далучэнні да Расійскай Федэрацыі. Таксама ён выказаў пагрозу прымяніць “усе сродкі паражэння, у тым ліку і ядзерныя” падчас далейшай эскалацыі канфлікта.

Частковая мабілізацыя адзначае, што прызыву на ваенную службу будуць падлягаць тыя грамадзяне РФ, якія знаходзяцца ў запасе.

– Толькі тыя грамадзяне, якія знаходзяцца ў запасе і, перш за ўсё, тыя, хто праходзіў службу ў шэрагах узброеных сіл, мае пэўныя ваенна-ўліковыя спецыяльнасці і адпаведны вопыт. – сказаў Уладзімір Пуцін – Прызваныя на ваенную службу перад адпраўкай у часці абавязкова будуць праходзіць дадатковую ваенную падрыхтоўку.

Мабілізацыя стартуе ўжо 21 верасня. Усе прызваныя ў войска будуць прыроўнівацца да кантрактнікаў, а за спробы ўхіліцца ад прызыву грамадзянам РФ пагражае крымінальны пераслед з магчымым тэрмінам пакарання да 10 гадоў. 

Пасля выступу Пуціна было апублікавана інтэрв’ю міністра абароны Расіі Сяргея Шойгу. Ён заявіў, што прызыву ў войска падлягаюць 300 000 чалавек. Пры гэтым колькасць страт расійскай арміі на вайне з Украінай была ацэненая ім у 5 937 чалавек.

Кампанія з Украіны «Метінвест» ліквідуе сваю структуру ў Беларусі

Горна-металургічная група «Метінвест» пасля пачатку поўнамаштабнай вайны Расіі ва Украіне прыняла рашэнне аб закрыцці сваіх падраздзяленняў у Расіі і Беларусі. Цяпер у гэтых краінах засталіся збытавыя структуры: беларуская «Метінвест Дыстрыбуцыя» і расійская «Метінвест Еўразія».

«Там засталіся аперацыйныя каманды, якім дадзены інструкцыі па ліквідацыі», – паведамляе генеральны дырэктар кампаніі Юрый Рыжанкоў, якога цытуе інфармацыйная кампанія «Інтерфакс-Україна».

ichef.bbci.co.uk

Па яго словах, у беларускай і расійскай структурах працавалі топ-менеджэры, менеджэры, спецыялісты, якія былі грамадзянамі Беларусі ці Расіі. Многія з іх адрабілі ў кампаніі больш за 10 гадоў. Пасля 24 лютага работнікі або былі звольненыя, або звольніліся самі. Цяпер засталіся адзінкі.

Галаўныя прадпрыемствы кампаніі месціліся ў цяпер акупаваным расійскімі войскамі Марыупалі. Заводы зазналі сур’ёзныя разбурэнні і ацэнка стратаў можа быць вызначаная па вызваленні гораду ад расіян.

У структурах «Метінвеста» у Марыупалі працавалі 35 тысяч чалавек. З іх прыкладна палова выйшлі на сувязь з кампаніяй, большая частка выехала на тэрыторыю, падкантрольную Украіне. Больш за тысячу ўладкаваныя на прадпрыемствы групы, яшчэ 2 тысячы праходзяць перападрыхтоўку – чакаецца, што яны далучацца да калектываў у Запарожжы, Каменскім і Крывым Рогу.

У Літве задумаліся, ці не абмежаваць услед за расіянамі ўезд турыстам з Беларусі

У краінах Балтыі і Польшчы набывала моц забарона на ўезд расійскіх турыстаў з шэнгенскімі візамі праз знешнія межы Еўрапейскага саюзу. У Літве загаварылі аб падобных захадах адносна беларусаў.

Забарона на ўезд грамадзян Расіі прадугледжаная ў прынятай парламентам Літвы пастанове аб аб’яўленні надзвычайнага становішча на мяжы з Расіяй і Беларуссю. Такі парадак уведзены ў сувязі з вайной ва Ўкраіне.

g2.dcdn.lt

Міністарка ўнутраных спраў Агне Білатайце кажа, што пакуль невядома, як доўга будзе трываць такі парадак, аднак расіяне, паводле яе слоў, ужо цяпер павінны ацаніць, ці варта ім ехаць у Літву, калі яны не трапляюць у спіс выключэнняў, піша інфармацыйнае агенцтва DELFI.

«Як вядома, ідзе жорсткая вайна, яе арганізавала Расія супраць Украіны. Мы бачым, што Расія як дзяржава непрагназаваная, агрэсіўная, 3/4 яе грамадзян падтрымліваюць такія дзеянні сваёй краіны. Непрымальна, каб расіяне, якія падтрымліваюць вайну, свабодна падарожнічалі па свеце, Літве, ЕС. Гэта аспекты, якія датычацца бяспекі, паколькі падтрымка вайны – пагроза для бяспекі нашай краіны і ЕС», – тлумачыць міністарка.

«Пакуль мы не бачым прыкмет заканчэння вайны, – адзначае яна. – Пакуль Расія дзейнічае агрэсіўна, мы, відаць, павінны будзем прымаць пэўныя рашэнні».

Паводле яе ў Літву будуць упускаць толькі тых расіян, якія адказваюць наступным крытэрам: асобы, якія прыязджаюць па гуманітарных прычынах, змагары з крамлёўскім рэжымам, дысідэнты, якія праязджаюць праз Літву транзітам, асобы, якія ажыццяўляюць міжнародныя перавозкі, асобы, у якіх ёсць візы з працяглым тэрмінам дзеяння або від на жыхарства.

Агне Білатайце заўважае, што цяпер вырашаюць пытанне, ці не прыняць падобнае рашэнне адносна беларусаў.

«Я ясна бачу, што беларускі рэжым таксама ўдзельнічае ў ваенных дзеяннях і арганізуе гібрыдныя атакі супраць Літвы, выкарыстоўваючы нелегальных мігрантаў. Я думаю, што гэта сурʼёзныя аргументы для вырашэння пытання беларусаў», – лічыць урадоўца.

Паводле Службы аховы дзяржаўнай мяжы Літвы, з паўночы да 9 гадзін у краіну не ўпусцілі 11 грамадзян Расіі.

«Большасць з іх спрабавалі трапіць у Літву праз КПП Кібартай. Астатнія спрабавалі праехаць праз беларуска-літоўскую мяжу», – паведамляе кіраўнік службы Рустам Любаеў.

Паводле яго, латышскія калегі раніцай сказалі, што ў іх пакуль не было ніводнага такога выпадку.

Навіны пабрацімаў. На Мікалаеўшчыне Расія параніла дваіх пенсіянераў і разбурыла жылыя дамы

У Ачакаве расійскія войскі абстралялі тры жылыя дамы. 73-гадовы мужчына і 59-гадовая жанчына атрымалі раненні.


Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці.


Мікалаеў расійскія войскі атакавалі 18 верасня ноччу. Разбурэнні зазналі гарадская больніца і гаражны кааператыў. Абышлося без пацярпелых.

niknews.mk.ua

Ачакаў абстрэльваўся 18 верасня двойчы. Першы раз гэта адбылося ноччу.

«У выніку цяжкія раненні атрымалі два чалавекі. Пашкоджаныя жылыя дамы. У некаторых раёнах гораду няма доступу да сеткі Інтэрнэт», – паведаміў у тэлеграм-канале кіраўнік абласной ваеннай адміністрацыі Віталій Кім.

Выданне «Миколаївськие новини» удакладняе, што раненні атрымалі 73-гадовы мужчына і 59-гадовая жанчына.

niknews.mk.ua

У дзень ракеты трапіла па адкрытых тэрыторыях Ачакава і абышлося без пацярпелых.

У Мікалаеўскай вобласці з пачатку поўнамаштабнага ўварвання Расіі загінулі 436 грамадзянскіх асоб, у тым ліку 11 дзяцей.


Пабрацімства Мікалаева з Магілёвам было замацаванае дамовай у 2009 годзе.

31 мая 2022 году мэр украінскага гораду заявіў, што Пагадненне аб пабрацімстве з Магілёвам скасаванае і выказаў спадзеў, што яно будзе адноўленае, калі Беларусь стане свабоднай.

Магілёў. media працягвае сачыць за жыццём Мікалаева, нягледзячы на спыненне партнёрскіх сувязяў з Магілёвам.

Мікалаеў месціцца за 65 кіламетраў ад Чорнага мора. Да вайны ў ім жыло 490 тысяч чалавек. Траціна з іх вымушана была пакінуць горад. Паводле Генштабу Узброеных сіл Украіны Мікалаеў адзін з асноўных кірункаў наступу расіян.

Яго рэгулярна абстрэльваюць, знішчаючы гарадскую інфраструктуру і змушаючы мясцовую ўладу капітуляваць. Прэзідэнт Украіны Уладзімер Зяленскі прысвоіў Мікалаеву ганаровае званне «Горад-герой».

Вайна ва Ўкраіне. У Харкаўскай вобласці атакаваная псіхіятрычная лякарня, а ў Краматорску – гасцініца

У Харкаўскай вобласці загінулі чацьверы супрацоўнікаў псыхіятрычнай лякарні, якія эвакуявалі пацыентаў. У Краматорску, горадзе ў Данецкай вобласьці, ракеты трапілі ў гасьцініцу. Там абышлося без ахвяраў.

Паводле кіраўніка Харкаўскай абласной ваеннай адміністрацыі Алега Сінягубава, расійскія ракеты пацэлілі ў псыхіятрычную лякарню, якая месціца ў сяле Стрылеча. У больніцы перабываюць звыш 600 пацыентаў.

“Паводле папярэдніх дадзеных, на жаль, загінулі 4 мэдычных работнікаў, 2 пацыенты параненыя”, – піша ў тэлеграм-канале Алег Сінягубаў.

 Па Краматорску расійскія войскі стралялі ноччу. Снарады пацэлілі ў гасцініцу. 

images.unian.net

“Паводле папярэдняй інфармацыі, пацярпелых на месцы выбуху не зафіксавана”, – паведамляе інфармацыйнае аценцтва “УНІАН”.

Выданне піша, што 17 верасня, паводле кіраўніка Данецкай абласной ваеннай адміністрацыі Паўла Кірыленкі, у выніку абстрэлу расіянамі паселішча Канстанцінаўка былі параненыя пяць чалавек, сярод іх дзіця.

Вайна ва Ўкраіне. У вызваленым ад расійскіх войск Ізюме эксгумуюць целы жыхароў з масавага пахавання (жудасныя фота)

Масавае пахаванне знойдзена ў лесе паблізу Ізюму. Мяркуюць, што ў ім закапана звыш 400 цел. Колькасць загінулых у Ізюме наагул можна сягаць пад тысячу.

Прэзідэнт Уладзімір Зяленскі абнародаваў фота з месца масавага пахавання ўкраінцаў, перадае інфармацыйнае агенцтва «УНІАН».

«Гэта павінен бачыць увесь свет. Свет, у якім не павінна быць жорсткасці і тэрарызму. І імя гэтаму – Расія. На месцы масавага пахавання ў Ізюме знойдзена больш за 400 цел. З прыкметамі катаванняў, якія загінулі ў выніку ракетных абстрэлаў, дзеці, вайскоўцы», – адзначае Зяленскі.

Дарадца міністра ўнутраных спраў Украіны Антон Герашчанка, што ў Ізюме колькасць загінулых за час акупацыі можа набліжацца да 1 тысячы чалавек. Паводле яго нямала загінулых застаецца пад заваламі дамоў.

Ізюм, горад у Харкаўскай вобласці, знаходзіўся пад расійскай акупацыяй з сакавіка. Вызвалілі яго 11 верасня і тады ж над цэнтрам гораду быў вывешаны ўкраінскі сцяг. 14 жніўня ва ўрачыстым уздыманні сцягу ўдзельнічаў і Ўладзімір Зяленскі.

Да поўнамаштабнага ўварвання Расіі ва Ўкраіну ў Ізюме жыло больш за 45 тысяч чалавек.

фота: images.unian.net

Навіны пабрацімаў. Як дзятва Днепрапятроўшчыны дапамагае ўкраінскаму войску

Дзеці-валанцёры прыфрантавога рэгіёну прадаюць самаробныя цукеркі, ладзяць вулічныя канцэрты, гуляюць з мінакамі ў шашкі.


Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці.


Пра дзяцей, якія дапамагаюць вайскоўцам перамагаць. зьбіраючы на іх патрэбы грошы, піша выданне Sobitie. Магілёў.media падае матэрыял калегаў з Украіны ў скароце.

7-гадовая Саламея з Дняпра.

Збірае грошы іграючы на жалейцы. У яе рэпертуары гімн Украіны, «Червона каліна» і іншыя ўкраінскія мелодыі. Дзяўчыне мінакі ахвяравалі больш за 150 тысяч грыўнаў. Гэтыя сродкі пайшлі на набыццё неабходнага для вайскоўцаў рыштунку: бронекамізэлек, шаломаў, цеплавізараў, аптэчак, насілак, тэрмакоўдраў.

Саламея з маці вырабляе і прадае патрыятычныя ўпрыгожванні. Выгаданыя сродкі адпраўляюцца таксама Ўзброеным Сілам.

10-гадовая Міраслава з Каменскага.

Зарабляе на патрэбы арміі гуляючы з мінакі ў шашкі. Дзяўчынка далучыла да валанцёрства двух сяброў. Разам, яны сабралі больш за 20 тысяч грыўнаў. Іх аддалі на рамонт ваеннага аўтамабіля, мацаванні шаломаў і набыццё дрону.

Міраслава – чэмпіёнка Украіны па шашках. Перамогу здабыла на турніры, які праходзіў у Херсоне. 23 лютага яна вярнулася дадому з узнагародай, а на наступны дзень пачалася поўнамаштабная вайна.

8-гадовага Ігара з Дняпра.

Хлопчык прадае мінакам ледзянцы. Іх ён гатуе разам з бацькам. Цукерак Ігар прадаў на больш чым 17 тысяч грыўнаў. Частка сабраных сродкаў перададзена «Арміі дронаў», астатняе – у дабрачынныя фонды.

Бацька хлопчыка кажа, што падчас вучобы сын пераймаўся, як ён будзе прадаваць прысмакі. Аднак, 1-2 гадзіны ў дзень ён вымяркоўвае для валанцёрства.

Школьнік Эрык збіраў грошы на паездку ў Егіпет. Замест пуцёўкі на курорт хлопчык ахвяраваў вайскоўцам 3000 грыўнаў.

8-гадовы Цімафей на сплеценых сваімі рукамі бранзалетах зарабіў для салдат больш за 25 тысяч грыўнаў.


Каменскае – горад у Днепрапятроўскай вобласці. Пабрацім Бабруйску ад 2000 году. Горад абласнога падпарадкавання ў Днепрапятроўскай вобласці. Насельніцтва 250 тысяч чалавек. Да вайны культурны абмен між гарадамі пабрацімамі бабруйскія чыноўнікі лічылі актыўным.


фота: sobitie.com.ua

Вайна ва Ўкраіне. За час расійскай акупацыі Ізюму загінула блізу 1 тысячы жыхароў

У вызваленым ад расійскіх войск горадзе адшуканае масавае пахаванне людзей. У лесе паблізу Ізюму закапана больш за 400 цел, лічаць праваахоўныя органы.

“Трэба кожнае цела эксгумаваць, як гэта было ў Бучы. У нас ёсць, на жаль, такі негатыўны трагічны досвед, і будзем устанаўліваць акалічнасці скону кожнага з тых больш за 400 людзей, якія закапаныя на могілках побач з Ізюмам”, – кажа дарадца міністра ўнутраных спраў Украіны Антон Герашчанка, словы якога падае інфармацыйнае агенцтва “УНІАН”.

Паводле яго, пад руінамі дамоў застаюцца таксама загінулыя. З-пад завалаў толькі аднаго з іх дасталі целы 47 чалавек. Гэта трохпавярховы дом, два пад’езды якога абрынуліся ад расійскай авіяцыйнай бомбы.

Як мяркуе Герашчанка колькасць загінулых у Ізюме за час акупацыі можа набліжацца да 1 тысячы чалавек.

«І гэта будзе больш, чым у Бучы, у два разы. Вядома, будзем усё правяраць«, – падкрэслівае ён.

Прэзыдэнт Украіны Ўладзімір Зяленскі адзначае, што працэсуальныя дзеянні, звязаныя з масавым пахаваннем людзей у Ізюме ўжо пачаліся.

«Мы хочам, каб свет ведаў, што рэальна адбываецца і да чаго прывяла расійская акупацыя. Буча, Марыупаль, цяпер, на жаль, Ізюм… Расія паўсюль пакідае па сабе смерць. І павінна за гэта адказваць. Свет павінен прыцягнуць Расію да рэальнай адказнасці за гэтую вайну. Зробім усё для гэтага», – заяўляе Ўладзімір Зяленскі.

Ізюм, горад у Харкаўскай вобласці, знаходзіўся пад расійскай акупацыяй з сакавіка. Вызвалілі яго 11 верасня і тады ж над цэнтрам гораду быў вывешаны ўкраінскі сцяг. 14 жніўня ва ўрачыстым уздыманні сцягу ўдзельнічаў і Ўладзімір Зяленскі.

Да поўнамаштабнага ўварвання Расіі ва Ўкраіну ў Ізюме жыло больш за 45 тысяч чалавек.

“УНІАН” нагадвае, што Ўладзімір Зяленскі 14 верасня заявіў, што на Харкаўшчыне вызваленыя ад расіян амаль 400 населеных пунктаў, у якіх у акупацыі больш за пяць месяцаў жылі каля 150 тысяч украінцаў.

Паводле Харкаўскай абласной ваеннай адміністрацыі, 16 верасня ўвесь рэгіён вызвалены ад расійскіх войск.

«Гэта было беспрэцэдэнтнае рушэнне нашых вайскоўцаў. Украінцам зноў удалося зрабіць тое, што многія лічылі немагчымым», – адзначаецца ў тэлеграм-канале адміністрацыі.

Паведамляецца, што «расійская армія знаходзілася на Харкаўшчыне больш за пяць месяцаў. І за гэты час яны нават не намагаліся зрабіць нешта для людзей, а толькі знішчалі, забіралі, вывозілі. Пакінулі па сабе спустошаныя сёлы, і ў некаторых з іх няма ніякага ацалелага дому. Расія не можа прынесці нічога іншага, акрамя генацыду».

Вайна ва Ўкраіне. У Крывым Рогу расійскія войскі атакавалі гідратэхнічныя збудаванні і транспартную інфраструктуру

Горад у Днепрапятроўскай вобласці абстралялі 7 ракетамі.

Паводле кіраўніка абласной ваеннай адміністрацыі Валянціна Разнічэнкі, ракеты пацэлілі па аб’ектах крытычнай і транспартнай інфраструктуры. Сурʼёзныя пашкоджанні зазналі гідратэхнічныя збудаванні.

«Папярэдне абышлося без пацярпелых. Некалькі раёнаў Крывога Рога засталіся без вады. Працуюць МНС і ратавальнікі, якія ліквідаваць наступствы разбурэнняў», – піша Валянцін Разнічэнка.

Начальнік ваеннай адміністрацыі гораду Аляксандр Вілкул паведамляе, што ў Крывым Рогу ўжо пачалі падаваць ваду  насельніцтву. Ён заклікае гараджанаў захоўваць спакой і запэўнівае, што сітуацыя кантралюецца.

Паводле яго, расійскія войскі ўдарылі па адным з абʼектаў гідратэхнічнай інфраструктуры гораду.

«Мы разумеем, што рабіць. Падача вады насельніцтву ўжо пачалася. Калі да вас вада не дайшла, то дойдзе бліжэйшым часам», – адзначае ён.

Інфармацыйная агенцтва «УНІАН» паведамляе, што па Крывым Рогу ракетны ўдар быў нанесены а 17 гадзіне. Выданне, спасылаючыся на тэлеграм-каналы, піша, што ракеты  пашкодзілі дамбу Карачуноўскага вадасховішча. У выніку, у рацэ Інгулец рэзка павысіўся ўзровень вады.

 

Вайна ва Ўкраіне. У вызвалены ад расійскіх войск Ізюм наведаўся прэзідэнт Уладзімір Зяленскі

Ізюм, горад у Харкаўскай вобласці, знаходзіўся пад расійскай акупацыяй з сакавіка. Вызвалілі яго 11 верасня і тады ж над цэнтрам гораду быў вывешаны украінскі сцяг.

14 верасня прэзідэнт Зяленскі ўзяў удзел ва ўрачыстым узняцці сцягу ў вызваленым украінскімі дэсантнікамі Ізюме. Разам з Зяленскім горад наведалі прадстаўнікі Міністэрства абароны, паведамляе інфармацыйнае агенцтва «УНІАН».

Паводле выдання ў Харкаўскай вобласці вызваленыя больш за 40 паселішчаў.

Міністэрства абароны Расіі прызнала, што расійскія войскі адступаюць з рэгіёну.