Tag: рынак

На прывакзальным рынку ў Магілёве бардак, а міліцыя вучыцца разганяць пратэсты

Навіна ад

Гандаль з зямлі ў Беларусі забаронены, і штраф за яго даюць немалы – 2250 рублёў. Аднак гандлярам на рынку каля чыгуначнага вакзала ў Магілёве ўсе гэтыя забароны, здаецца, па барабане.

Стыхійны бізнес даўно выплюхнуўся за межы рынку – прадпрымальнікі ўжо перашкаджаюць грамадскаму транспарту і не даюць праходу пасажырам, якія спяшаюцца на вакзал.

Мала таго, што яны ствараюць аварыйныя сітуацыі, дык яшчэ і пагражаюць тым, хто спрабуе іх фатаграфаваць.

Ну, а магілёўскай міліцыі не да бардака на гэтым рынку. Будуць чарговыя “выбары” дзеда, і “слабавікі” старанна ўдасканальваюць свае навыкі разгону мірных дэманстрацый.

Яно і зразумела – ад прадпрымальнікаў можна атрымаць прачуханца, а лоўля ворагаў у сацыяльных сетках і больш прыбытковая, з пункту гледжання штрафаў, і бяспечнейшая для здароўя.

Фота “Могилев Онлайн”.

Завышэнне коштаў выяўлена ў глыбінцы і ў Магілёве

Навіна ад

КДК праверыў крамы Краснапольшчыны і абласны рынак – парушэнні паўсюль.

У прыватнай краме Краснапольшчыны кантралёры абласнога КДК устанавілі завышэнне гандлёвых надбавак на непрадуктовыя тавары ў 1,2 раза.

Прадпрымальнікі ў Краснаполлі не толькі завышалі ў 3,8 раза надбаўкі на гародніну і садавіну, але і гандлявалі антыабледзяняльнікам, не маючы на яго дазвольных дакументаў.

Гандляры на рынку ў абласным цэнтры завышалі надбаўкі на:

імпартныя памідоры – 37 і 44 працэнты замест дазволеных 15 працэнтаў;

айчынныя агуркі – 38 працэнтаў замест дазволеных 30 працэнтаў.

Цэны прыведзены ў адпаведнасць з заканадаўствам.

Фота ілюстрацыйнага характару з адкрытых крыніц.

Вераснёўскія цэны на ягады: што прадаюць на рынку ў Магілёве

Навіна ад

У Магілёве розніца ў цэнах на ягады паміж рынкам і супермаркетам дасягае дзясяткаў рублёў.

На прылаўках Мінскага рынку пакупнікоў сустракае духмяная клубніца, распавядае «Магілёў.анлайн». Хаця многія лічаць яе летняй ягадай, восенню яна радуе не толькі смакам, але і больш даступным коштам па 25 рублёў за кілаграм. 

Гаючыя і карысныя дурніцы прадаюцца па 16,90-19,90 рублёў за кілаграм у залежнасці ад памеру ягад, а ажыну прапануюць у латочках па 0,5 кг за 10 рублёў. Маліну можна купіць як на вагу па 30 рублёў за кілаграм, так і на аб’ём па 10 рублёў за літр. Для аматараў лясных ягад ёсць і брусніца: кілаграм каштуе 11,97 рубля.

Паводле прадаўцоў, клубніцу і маліну можна будзе набываць аж да самых халадоў. Восень багатая не толькі на ягады, але і на грыбы: на рынку ўжо ёсць лісічкі, апенькі, зонцікі, шампіньёны, а таксама рэдкі лячэбны грыб вясёлка. Тым, хто плануе зімовыя нарыхтоўкі, рынак прапануе слоікі і накрыўкі розных памераў.

Цэны ў крамах прыкметна адрозніваюцца ад рынкавых. У гіпермаркеце Green на вуліцы Астроўскага кілаграм дурніц каштуе амаль 40 рублёў, а за маліну прыйдзецца аддаць больш за 74 рублі за кілаграм. Для многіх пакупнікоў гэтыя лічбы выглядаюць «касмічнымі», асабліва ў параўнанні з рынкам.

Таму вераснёўскія рынкі ў Магілёве гэта не толькі выгадная альтэрнатыва магазінам, але і магчымасць акунуцца ў атмасферу восені.

Фотаздымак: “Магілёў.анлайн”

Магілёвец наладзіў бізнес на продажы ўласнаручна скрадзеных тавараў

Навіна ад

Магілёвец краў у крамах тавары, а потым прадаваў іх на базары. На гэтым і зарабляў.

Магілёўскія міліцыянты злавілі 50-гадовага гараджаніна, які наладзіў просты, але вельмі прыбытковы бізнес. Мужчына хадзіў ў краму за пакупкамі, але аплочваў іх не ўсе. Частку, якую хаваў па кішэнях, выносіў проста так, нават не за “дзякуй”.

Такія паводзіны прыцягнулі ўвагу супрацоўнікаў крамы, якія і звярнуліся ў міліцыю. Тая выясніла, што скарадзеныя тавары мужчына забіраў нават не для ўласнага карыстання, а прадаваў на адным з рынкаў горада. Прычым, колькі б ні каштаваў прадаваны тавар, для кемлівага гандляра рэнтабельнасць яго бізнеса была 100%. 

Праўда, пасля таго, як ўсё высветлілася і была ўзбуджана крымінальная справа, “прадпрымальніку” прыйдзецца ўсё ж такі падзяліцца чымсьці з дзяржавай і абвараванай крамай, якая недалічылася тавару прыкладана на 1000 рублёў. Але гэта будзе ўжо зусім іншая гісторыя.

Фотаздымак з адкрытых крыніц