Warning: "continue" targeting switch is equivalent to "break". Did you mean to use "continue 2"? in /var/www/mogilev_medi_usr/data/www/mogilev.media/wp-content/plugins/telegram-for-wp/inc/Notifcaster.class.php on line 318
Новости по тегу "статыстыка" - Page 2 of 3 - Магілёў.media

Tag: статыстыка

На Магілёўшчыне менш за ўсё аўтамабіляў у Беларусі

Навіна ад

Магілёўшчына на апошнім месцы ў краіне ў абсалютных лічбах па колькасці зарэгістраваных асабістых транспартных сродкаў.

На Магілёўскую вобласць прыпадае 334 800 аўтамабіляў. Гэта найменшы паказчык у параўнанні з усімі іншымі рэгіёнамі Беларусі. Пра гэта са спасылкай на Белстат піша “Камсамольская праўда”. На першым месцы – сталіца. У Мінску зарэгістравана больш чым 640 тыс. асабістых аўтамабілей. У Мінскай вобласці – 543 700, у Брэсцкай – 493 100, у Гомельскай – 417 500, у Гродзенскай – 405 000, а ў Віцебскай – 356 000. Гэта ўсё лічбы на канец 2025 года.

Аднак, калі пералічыць па колькасці асабістых аўтамабіляў на 1000 насельніцтва, то Магілёўшчына ўжо не на апошнім месцы, а ў сярэдзіне. На 1000 жыхароў нашай вобласці прыходзіцца 348 машын. Гэта нават больш, чым у сярэднім па краіне, дзе гэты паказчык складае 339 аўтамабіляў.

Увогуле па гэтым паказчыку ў краіне на першыі месцы Гродзенская вобласць, дзе на тысячу насельніцтва 415 аўтамабілей. Далей ідуць Брэсцкая вобласць (382), Мінская (374), Магілёўская (348), Віцебская (336), Мінск (321) і Гомельская (317).

Фота: mogilev.media

Дрыбінскі раён згубіў 2 000 галоў ската за паўтары гады

Навіна ад

Дрыбінскі раён губляе статак: мінус 2 034 галоў буйной рагатай жывёлы і ў тым ліку мінус 645 кароў за паўтары гады, а чыноўнікі сцвярджаюць: усё ідзе па плане.

Пакуль Лукашэнка абяцае «адрадзіць Дрыбіншчыну» з дапамогай кароў, афіцыйныя лічбы малююць іншую карціну: за паўтары гады раён страціў амаль дзве тысячы галоў буйной рагатай жывёлы. Супаставіць дадзеныя ўдалося выпадкова – дзякуючы таму, што старонка райвыканкама па сельскай гаспадарцы не абнаўлялася з 2024 года. Гэтае разгільдзяйства чыноўнікаў абярнулася рэдкай магчымасцю для параўнання.

Дзве крыніцы – адна карціна

Параўнанне стала магчымым дзякуючы двум афіцыйна апублікаваным наборам даных. На старонцы Дрыбінскага райвыканкама ў раздзеле «Сельская гаспадарка» ёсць паказчыкі за студзень – снежань 2024 года і пагалоўе на 1 студзеня 2025-га. Даныя не абнаўляліся – у гэтым увесь Дрыбін.

Ну, а раённая газета «Савецкая вёска» ў асобе галоўнага спецыяліста вытворчага аддзела ўпраўлення па сельскай гаспадарцы і харчаванні Ганны Гуськовай (на фота) апублікавала свежыя даныя на 1 красавіка 2026 года.

каровы

Менавіта таму, што чыноўнікі забыліся абнавіць сайт, гэтыя крыніцы можна параўноўваць напрамую. Параўнанне забойнае.

Што было ў 2024 годзе

Паводле даных райвыканкама:

  • на 1 кастрычніка 2024 года – 12 300 галоў БРЖ у сельгасарганізацыях раёна;
  • з іх 5 000 кароў;
  • на 1 студзеня 2025 года – 11 172 галавы БРЖ;
  • за 2024 год выраблена 13 967,3 тоны малака;
  • рэалізавана 12 203 тоны;
  • таварнасць малака – 87,6%.

Што засталося да красавіка 2026-га

Паводле даных раённай газеты на 1 красавіка 2026 года:

  • 10 266 галоў буйной рагатай жывёлы – увесь статак;
  • 4 355 галоў дойнага статка.

За першы квартал 2026 года:

  • выраблена 4 132,6 тоны малака – на 274,3 тоны больш, чым годам раней;
  • рэалізавана 3 716,5 тоны;
  • таварнасць – 89,9 працэнта;
  • ААТ «Трылесіна-агра» нарошчыла вытворчасць на 232 тоны, агульны аб’ём – 2 670,5 тоны;
  • ААТ «Дрыбінрайаграпрамтэхзабеспячэнне» – 117,5% да мінулага года;
  • толькі «Трылесіна-агра» рэалізуе малако на 100% гатункам «Экстра».

Катастрофа ў лічбах

Калі параўноўваць напрамую, то атрымліваецца што:

  • кароў было 5 000 (кастрычнік 2024) – стала 4 355 (красавік 2026): мінус 645 галоў;
  • усяго БРЖ было 12 300 – стала 10 266: мінус амаль 2 034 галавы;
  • нават ад студзеньскай кропкі 2025 года (11 172) да красавіка 2026-га: мінус 906 галоў.

Гэта не проста «скарачэнне». Гэта планамернае знішчэнне жывёлагадоўчай базы дэпрэсіўнага раёна, у якога няма іншай эканомікі.

Адкуль бярэцца малако?

Звярніце ўвагу на дзіўныя лічбы – пагалоўя дойнага статка стала менш, а вытворчасць малака толькі вырасла. Што гэта, як не прыпіскі? Улічваючы хранічныя праблемы з забеспячэннем кароў самым неабходным па ўсёй Магілёўшчыне, наўрадці дрыбінская скаціна атрымала нейкія спецыфічныя, элітарныя ўмовы пражывання з палепшаным харчаваннем. 

Рост таварнасці з 87,6 да 89,9 працэнта – таксама не дасягненне, а знак бяды: гаспадаркі вымушаны прадаваць усё да апошняй тоны, не пакідаючы рэзерваў.

Гаварыць пра «развіццё» жывёлагадоўлі ў раёне, дзе статак скараціўся амаль на 2 000 галоў – значыць хлусіць.

Лукашэнка абяцаў падвоіць і атрымаў у падарунак карову

13 сакавіка 2026 года Лукашэнка асабіста прыехаў у Дрыбінскі раён. Ён пабываў на племзаводзе па развядзенні БРЖ герэфордскай пароды і абвясціў пра планы: павялічыць пагалоўе племянной жывёлы з цяперашніх каля 5 тысяч галоў да 10 тысяч да 2030 года, гэта значыць падвоіць за пяцігодку.

Супаставім з рэальнасцю:

  • у раёне 9 190 жыхароў – і іх становіцца менш. Атрымліваецца, што ў перспектыве на Дрыбіншчыне кароў будзе больш за людзей;
  • раённы цэнтр – гарадскі пасёлак на тры тысячы чалавек, самы маленькі райцэнтр у краіне;

На развітанне Лукашэнку падарылі жывую карову, але нават з улікам такога кранальнага падарунка называць дрыбінскія справы «развіццём» нельга. Гэта катастрофа.

Фота раённай газеты.

Галоўны ідэолаг Магілёўшчыны занепакоена, што нага яе калег не ступала на прыватныя прадпрыемствы

Навіна ад

Ідэолагі Магілёўскай вобласці вырашылі не навязваць свае думкі людзям, а пераконваць народ. Гэта будзе проста – у вобласці засталося 15 працэнтаў тых, каго яшчэ не “пераканалі”.

Выступаючы з дакладам перад буйнымі прапагандыстамі і раённай ідэалагічнай чэляддзю начальнік галоўнага ўпраўлення ідэалагічнай работы і па справах моладзі аблвыканкама Кацярына Музычэнка заявіла, што ў мінулым годзе яе калегі дасягнулі ўсяго, чаго хацелі.

Выглядае гэта так:

  • праведзена больш за 27 тысяч сустрэч у працоўных калектывах;
  • 85% жыхароў задаволены якасцю жыцця;
  • 61% станоўча ацэньваюць эканамічную сітуацыю;
  • падпісны тыраж на друкаваныя выданні павялічыўся на 26 працэнтаў;
  • колькасць унікальных наведвальнікаў сайтаў вырасла на 40 працэнтаў;
  • рост колькасці крытычных матэрыялаў у СМІ вырас на 12 працэнтаў – іх апублікавалі 1567 штук.

Увогуле, махавік хлусні раскручаны ў Магілёўскай вобласці так, што не спыніш. Занепакоена Музычэнка толькі прыватнымі прадпрыемствамі, да якіх шчупальцы прапаганды яшчэ не дацягнуліся.

Ну і, канешне, тыя самыя пятнаццаць працэнтаў жыхароў Магілёўшчыны, якія не згодны з лухтой, якую нясе Музычэнка і яе падначаленые, таксама выклікаюць у ўладаў смутнае занепакоенне.

Фота: “Могилевские ведомости“

Усё больш замежных турыстаў імкнецца да Трафімавай крыніцы

Навіна ад

Улады Магілёўскай вобласці разлічваюць амаль удвая павялічыць экспарт турыстычных паслуг. Аднак у цяперашніх умовах відавочна, што асноўную дынаміку забяспечваюць самі беларусы і замежнікі-расіяне.

Перад Магілёўшчынай у бягучай пяцігодцы пастаўлена задача развіваць турыстычную інфраструктуру і павышаць якасць сэрвісу. Пра гэта заявіў старшыня аблвыканкама Анатоль Ісачанка.

Паводле яго слоў, у вобласці плануюць рэалізаваць дзясяткі праектаў, звязаных з будаўніцтвам новых аб’ектаў і развіццём ужо існуючых пляцовак.

Сярод ключавых турыстычных кропак рэгіёна Ісачанка назваў:

  • Падміколле і драмтэатр у Магілёве;
  • Бабруйскую крэпасць і сінагогу ў Бабруйску;
  • Блакітную крыніцу ў Слаўгарадзе;
  • Замкавую гару ў Мсціслаўлі;
  • Трафімаву крыніцу ў Шклове;
  • Музей Славы Магілёўшчыны;
  • палацава-паркавы ансамбль у Жылічах.

Быхаўскі замак і касцёл у Княжыцах ужо выпалі з кола інтарэсаў “губернатара”. Гэта цалкам зразумела. Першы ўсё часцей фігуруе як сімвал зацягнутай гісторыі з аднаўленнем і разбурэннем спадчыны, другі як аб’ект, на кансервацыю якога ўжо збіраюць сродкі ўсім светам і, як паказвае досвед, ніколі не збяруць.

Ісачанка аперуе статыстыкай, якая дэманструе рост тургаліны за пяцігодку:

  • валютная выручка ад замежных турыстаў вырасла ў 2,7 разы;
  • загрузка гасцініц павялічылася на 10 працэнтных пунктаў;
  • колькасць арганізаваных турыстаў вырасла ў 2,5 разы;
  • сярэдняя працягласць знаходжання павялічылася амаль удвая;
  • экспарт турыстычных паслуг у 2025 годзе склаў каля 7,5 мільёнаў долараў.

Аднак на фоне санкцый і абмежаванай знешняй мабільнасці лагічна меркаваць, што значную частку гэтага росту забяспечваюць унутраныя паездкі, арганізаваныя ўладамі, і “замежнікі” з Расіі.

Асаблівае замілаванне выклікае згадка Анатоля Ісачанкі пра Трафімаву крыніцу ў Шклоўскім раёне як пра турыстычны аб’ект і параўнанне яе з буйнымі гісторыка-архітэктурнымі аб’ектамі кшталту замкаў ці касцёлаў.

Магчыма, што пасля наведвання Лукашэнкам у Пхеньяне Кымсусанскага палаца Сонца так і будзе. Памяць продкаў – рэч сур’ёзная.

Фота з адкрытых крыніц.

Магілёў у топ-5: як змянілася насельніцтва найбуйнейшых гарадоў Беларусі

Навіна ад

Магілёў застаецца ў ліку нямногіх буйных гарадоў, дзе няма прыкметнага скарачэння колькасці насельніцтва.

На 1 студзеня 2026 года Магілёў, паводле статыстычнага бюлетэня Белстата аб колькасці насельніцтва на 1 студзеня 2026 года, застаецца адным з найбуйнейшых гарадоў Беларусі і займае 5-е месца па колькасці насельніцтва. У горадзе пражывае 352 891 чалавек – гэта практычна столькі ж, колькі і год таму.

Калі параўноўваць з іншымі буйнымі гарадамі, Магілёў выглядае стабільна. За год насельніцтва амаль не змянілася (у 2025 годзе – 352 896 чалавек, то бок мінус пяць гараджан за год).

Для параўнання:

  • Мінск страціў больш за 1,6 тысячы жыхароў;
  • Гомель – каля 1,3 тысячы;
  • Віцебск – больш за 1 тысячу.

На гэтым фоне наш горад паказвае адну з самых устойлівых дэмаграфічных сітуацый сярод абласных цэнтраў.

Перад Магілёвам у рэйтынгу знаходзяцца:

  • Мінск – 1 995 091 чалавек;
  • Гомель – 499 853 чалавек;
  • Гродна – 364 902 чалавек;
  • Віцебск – 357 899 чалавек.

Як бачна, разрыў паміж Магілёвам і Віцебскам застаецца невялікім – каля 5 тысяч чалавек. Гэта азначае, што пазіцыі ў рэйтынгу могуць змяняцца пры захаванні бягучых тэндэнцый.

У Магілёўскай вобласці ў спіс найбуйнейшых гарадоў традыцыйна ўваходзіць Бабруйск. На 1 студзеня 2026 года тут жыве 204 103 чалавек.

Аднак, у адрозненне ад абласнога цэнтра, Бабруйск губляе насельніцтва – за год мінус каля 1,4 тысячы жыхароў.

Такім чынам, Магілёў застаецца ў ліку нямногіх буйных гарадоў, дзе няма прыкметнага скарачэння колькасці насельніцтва.

Фота “Магілёўскія ведамасці”.

На Магілёўшчыне самы нізкі сярэдні заробак у Беларусі

Навіна ад

Па выніках студзеня 2026 года ў Магілёўскай вобласці быў самы меншы сярэдні заробак, сведчаць даныя Белстату.

Паводле дзяржаўных статыстаў, сярэдні заробак ў Беларусі за першы месяц 2026 года дасягнуў узроўню 2 757,1 руб. Найбольш у сярэднім зараблялі ў Мінску – на тысячу больш, чым па краіне – 3 747,8 руб. 

Рэгіёнам з найменшым сярэднім заробкам з’яўляецца Магілёўская вобласць. Тут гэты паказчык значна ніжэйшы за сярэднерэспубліканскі – 2 271,9 руб. 

У межах Магілёўшчыны больш за ўсё ў сярэднім зарабляюць у Магілёўскім раёне ( 2 621,3 руб.), Магілёве (2 472,1 руб.) і Асіповіцкім раёне (2 285,1 руб.).

А самая нізкая сярэдняя зарплата ў Мсціслаўскім раёне (1 861,5 руб.), Краснапольскім (1 898,1 руб.) і Слаўгарадскім (1 917 руб.).

Фотаздымак з адкрытых крыніц

Злачыннасць у Магілёўскім раёне амаль удвая вышэй чым па вобласці

Навіна ад

Нягледзячы на зніжэнне злачыннасці ў Магілёўскі раёне, яна застаецца амаль удвая вышэйшая чым ў сярэднім па Магілёўскай вобласці.

 

У распараджэнні арганізацыі былых сілавікоў BELPOL аказаўся ўнутраны дакумент МУС, які адлюстроўвае рэальную крымінальную сітуацыю ў Магілёўскім раёне. Афіцыйная статыстыка дэманструе пэўнае зніжэнне агульных паказчыкаў, аднак дэталёвы аналіз сведчыць пра наяўнасць устойлівых і трывожных тэндэнцый.

Менш злачынстваў, але не менш рызык

 

Паводле справаздачы, у 2025 годзе ў раёне зарэгістравана 473 злачынствы супраць 530 у 2024-м (-10,8%). Зменшылася і колькасць злачынстваў у грамадскіх месцах – з 61 да 48 (-21,3%). Не зафіксавана забойстваў (годам раней іх было тры), істотна скарацілася і колькасць кіберзлачынстваў – з 85 да 59 (-30,6%).

 

Аднак агульнае зніжэнне не змяняе галоўнага: узровень злачыннасці ў разліку на 10 тысяч насельніцтва складае 120,2 выпадка, што амаль удвая больш за сярэдні па Магілёўскай вобласці (72,9).

Рост цяжкіх злачынстваў і рэцыдыву

 

На фоне агульнага змяншэння колькасці злачынстваў павялічылася доля цяжкіх і асабліва цяжкіх – з 68 да 73 (+7,4%). Адначасова вырасла і рэцыдыўная злачыннасць: колькасць злачынстваў, учыненых раней судзімымі асобамі, павялічылася з 142 да 156 (+9,9%).

 

Асобна адзначаецца рэзкі рост групавых злачынстваў – з 23 да 46. Фактычна іх колькасць падвоілася, што можа сведчыць пра пагаршэнне сацыяльнага асяроддзя і слабасць прафілактычнай працы.

Хатні гвалт і алкаголь

 

Адной з найбольш трывожных тэндэнцый стаў рост злачынстваў, звязаных з хатнім гвалтам – з 17 да 24 (+41,2%). Пераважная большасць з іх (21 з 24) учынена ў стане алкагольнага ап’янення.

 

У справаздачы таксама адзначаецца павелічэнне колькасці злачынстваў гэтай катэгорыі, учыненых жанчынамі, а таксама з’яўленне фактаў гвалту ў дачыненні да пажылых людзей.

 

У якасці «прафілактычнай меры» працягваецца накіраванне грамадзян у лячэбна-працоўныя прафілакторыі. У 2025 годзе ў ЛПП ізалявана 55 чалавек (52 — у 2024-м). Пры гэтым аналіз доўгатэрміновай эфектыўнасці такой практыкі ў дакуменце адсутнічае.

Крадзяжы: змяненне структуры

 

Агульная колькасць крадзяжоў знізілася са 148 да 138 (-6,8%). Аднак колькасць крадзяжоў з жылля, наадварот, вырасла — з 68 да 79 (+16,2%). Усё часцей аб’ектамі становяцца кватэры і прыватныя дамы, што непасрэдна ўплывае на адчуванне бяспекі жыхароў.

Праблемы ў аграрным сектары

 

Справаздача закранае і сітуацыю ў сельскай гаспадарцы. У 2025 годзе ў раёне загінула 1 447 галоў буйной рагатай жывёлы супраць 1 157 годам раней. Асноўнымі прычынамі названы парушэнні тэхналогій кармлення і ўтрымання, а таксама недастатковая прафілактыка захворванняў.

 

Больш за палову страт (53,3%) прыпадае на цялят ва ўзросце да шасці месяцаў, што сведчыць пра сістэмныя праблемы ў кіраванні галінай.

 

Як лічаць у BELPOL, справаздача па Магілёўскім раёне дэманструе характэрную для сучаснай Беларусі сітуацыю: фармальнае зніжэнне агульнай колькасці злачынстваў суправаджаецца ростам цяжкіх, рэцыдыўных і сацыяльна небяспечных правапарушэнняў. На гэтым фоне ўзровень злачыннасці застаецца амаль удвая вышэйшым за сярэднеабласны, што ставіць пад сумнеў аптымістычныя ацэнкі афіцыйнай статыстыкі.

 

Выява: BELPOL

Улады Чэрыкава павялічылі аб’ём вытворчасці сельгаспрадукцыі. На паперы

Навіна ад

Перамяшаўшы статыстычныя дадзеныя, «моцныя гаспадарнікі» Чэрыкаўшчыны зрабілі выгадныя для сябе высновы.

У Чэрыкаўскім раёне аб’ём вытворчасці сельскагаспадарчай прадукцыі ў 2025 годзе павялічыўся ў параўнанні з 2024 годам у супастаўных цэнах амаль на дванаццаць працэнтаў.

Пераможная статыстыка выглядае так:

  • збожжа ў 2025 годзе выраблена 26,1 тысячы тон або на 32,5 працэнта больш, чым у 2024 годзе;
  • яго ўраджайнасць склала 22 цэнтнеры з аднаго гектара, у 2024 годзе – 16,6 цэнтнера;
  • у 2025 годзе рэалізавана жывёлы і птушкі на забой 3,1 тысячы тон або на 21,8 працэнта больш, чым у 2024 годзе.

Пагадзіцеся – паўсюль відавочны рост. А цяпер малако:

  • яго выраблена 10,5 тысячы тон,
  • рэалізавана па ўсіх каналах збыту 9,3 тысячы тон.
  • удзельная вага рэалізаванага малака ў агульным аб’ёме яго вытворчасці склала 89 працэнтаў.

Праблема толькі ў тым, што ў выпадку з малаком параўнанне з мінулым годам знікае.

Няма параўнальных паказчыкаў і па скаціне. Проста паведамляецца, што колькасць буйной рагатай жывёлы ў сельскагаспадарчых арганізацыях раёна на 1 студзеня 2026 года склала 7,8 тысячы галоў, у тым ліку кароў – 3,1 тысячы галоў.

Пра тое, колькі галоў было ў мінулым годзе, улады далікатна маўчаць і паведамляюць толькі пра тое, колькі рагуль у іх выжыла на пачатак года.

Узнікае пытанне: калі малака, мяса і хлеба ў крамах пакуль хапае, навошта хітраваць і выкручвацца?

Тут усё проста. Дэманстрацыя няўхільнага росту для беларускай эканамічнай мадэлі важнейшая, чым сам рост.

А што ў рэчаіснасці?  Пра яе найлепш распавяла пракуратура, якая ўсяго пару дзён таму выявіла шматлікія парушэнні ва ўтрыманні БРЖ на ферме ў Чэрыкаўскім раёне.

У якую са справаздач унесці гэты бардак?

Фота: БелТА.

Магілёўскія дактары добра зарабляюць

Навіна ад

Дактары – ў шакаладзе, заробак медыкаў Магілёўшчыны – самы высокі ў краіне.

Паводле звестак Myfin.by, урачы Магілёўскай вобласці абагналі па ўзроўні сярэдніх заробкаў нават сталіцу.

У хвасце ж зарплатнага рэйтынгу чамусьці цягнуцца медыкі самых, здавалася б, дабрабытных абласцей краіны – Гродзенскай і Брэсцкай.

Статыстыка выглядае так:

  • Магілёўская вобласць – 4129 рублёў;
  • Мінская вобласць – 4029,4 рубля;
  • Віцебская вобласць – 3909,1 рубля;
  • Гомельская вобласць – 3865 рублёў;
  • Гродзенская вобласць – 3618,8 рубля;
  • Брэсцкая вобласць – 3603,4 рубля.

Праўда, прыведзеныя лічбы адлюстроўваюць заробак да выліку падаткаў і ўзносаў. Таксама трэба ўлічваць, што сярэдні заробак адлюстроўвае хутчэй звышдаходы кіраўніцтва, чым агульны дабрабыт.

Фота ілюстрацыйнага характару з адкрытых крыніц.

За год у Шклоўскім раёне скралі больш за тры тоны паліва

Навіна ад

Шклоўскі раён выйшаў на першае месца па крадзяжах паліва ў статыстыцы, якую вядуць незалежныя журналісты з Оршы.

Цягам 2025 года супрацоўнікі выдання Orsha.eu збіралі розныя даныя з прылеглых да Оршы раёнаў. У прыватнасці, фіксавалі выпадкі крадзяжоў паліва. Падвёўшы вынікі за год, незалежныя журналісты сцвярджаюць, што з больш чым шасці тон паліва, якое скралі ў аналізуемых раёнах, амаль палова (3070 літраў) была скрадзена на Шклоўшчыне.

На другім месцы Горацкі раён, дзе злілі 1310 літраў. Далей ідуць Аршанскі і прылеглыя да яго раёны. Прычым паведамленні аб падобных крадзяжах не паступалі з Сенненскага раёна Віцебшчыны і Круглянскага раёна Магілёўшчыны.

Як падкрэсліывюць незалежныя журналісты, усе даныя сабраныя з адкрытых крыніц, таму ў рэальнасці аб’ёмы крадзяжоў могуць быць большыя.

Ілюстрацыя Orsha.eu