Tag: музычэнка

Галоўны ідэолаг Магілёўшчыны занепакоена, што нага яе калег не ступала на прыватныя прадпрыемствы

Навіна ад

Ідэолагі Магілёўскай вобласці вырашылі не навязваць свае думкі людзям, а пераконваць народ. Гэта будзе проста – у вобласці засталося 15 працэнтаў тых, каго яшчэ не “пераканалі”.

Выступаючы з дакладам перад буйнымі прапагандыстамі і раённай ідэалагічнай чэляддзю начальнік галоўнага ўпраўлення ідэалагічнай работы і па справах моладзі аблвыканкама Кацярына Музычэнка заявіла, што ў мінулым годзе яе калегі дасягнулі ўсяго, чаго хацелі.

Выглядае гэта так:

  • праведзена больш за 27 тысяч сустрэч у працоўных калектывах;
  • 85% жыхароў задаволены якасцю жыцця;
  • 61% станоўча ацэньваюць эканамічную сітуацыю;
  • падпісны тыраж на друкаваныя выданні павялічыўся на 26 працэнтаў;
  • колькасць унікальных наведвальнікаў сайтаў вырасла на 40 працэнтаў;
  • рост колькасці крытычных матэрыялаў у СМІ вырас на 12 працэнтаў – іх апублікавалі 1567 штук.

Увогуле, махавік хлусні раскручаны ў Магілёўскай вобласці так, што не спыніш. Занепакоена Музычэнка толькі прыватнымі прадпрыемствамі, да якіх шчупальцы прапаганды яшчэ не дацягнуліся.

Ну і, канешне, тыя самыя пятнаццаць працэнтаў жыхароў Магілёўшчыны, якія не згодны з лухтой, якую нясе Музычэнка і яе падначаленые, таксама выклікаюць у ўладаў смутнае занепакоенне.

Фота: “Могилевские ведомости“

Падлічаны патрыёты Магілёўскай вобласці і тыя, хто сумняваецца

Навіна ад

Ідэолаг Музычэнка паведаміла пра колькасную перавагу патрыётаў у Магілёўскай вобласці і расказала пра гэта студэнтам архітэктурнага каледжа.

На адзіны дзень інфармавання ў архітэктурна-будаўнічы каледж БРУ прыехала начальніца галоўнага ўпраўлення ідэалагічнай работы і па справах моладзі аблвыканкама Кацярына Музычэнка.

Яна распавяла педагогам і навучэнцам пра ўзброеныя сілы, а таксама паведаміла, што “ў нашай Магілёўскай вобласці патрыётаў значна больш, чым тых, хто сумняваецца ва ўласнай дзяржаве”.

Дакладных суадносін лічбаў ідэолаг не назвала, але, мяркуючы па тварах студэнтаў, яны не падзялілі аптымізму прапагандысткі і відавочна засумняваліся ў аргументах Музычэнкі.

Напрыканцы Кацярына Анатольеўна заявіла, што яе ведамства працуе з “велізарнай колькасцю” блогераў, якія асвятляюць дзяржаўную павестку.

Калі ж усё-такі не верыць псеўдапатрыятычным заявам Музычэнкі, а зазірнуць у “Тык-Ток”, то колькасць тых, хто “топіць” за ўладу, не такая ўжо і вялікая. Тыя, хто сумняваецца і спачувае, таксама ёсць, а вось тых, хто не жадае мець з рэжымам Лукашэнкі нічога агульнага, – пераважная большасць.

 

Фота “Магілёўскія ведамасці”.

Як аграном Музычэнка стала галоўным ідэолагам Магілёўшчыны – знаёмімся

Навіна ад

Галоўны ідэолаг Магілёўскай вобласці, аграном па адукацыі, Кацярына Музычэнка вучыць членаў інфармацыйна-прапагандысцкіх груп сеяць разумнае, добрае, вечнае.

Начальнік галоўнага ўпраўлення ідэалагічнай работы і па справах моладзі Магілёўскага аблвыканкама Кацярына Музычэнка праводзіць інструктыўна-метадычныя семінары і не стамляецца нагадваць іх удзельнікам самыя трапныя выказванні Лукашэнкі.

Напрыклад, на апошнім семінары Кацярына Анатольеўна акцэнтавала ўвагу ідэолагаў на аўтарскай фразе, якая «пайшла ў народ» – «Час выбраў нас», а мы паспрабуем разабрацца, дзе, калі і як час выбраў яе.

Музычэнка пяцьдзясят гадоў. Нарадзілася яна ў пасёлку Дрыбін. У 2000 годзе скончыла сельскагаспадарчую акадэмію па спецыяльнасці «аграномія» і адразу ж адправілася жаць ураджай на палетках… аддзела па справах моладзі Дрыбінскага райвыканкама.

З 2005 па 2012 год працавала начальнікам аддзела ідэалагічнай работы, а ў 2012 годзе стала намеснікам старшыні Клімавіцкага райвыканкама.

У 2015 годзе Кацярына Анатольеўна ўмацавала свае веды ў акадэміі кіравання Лукашэнкі, а ў 2017 годзе атрымала пасаду, на якой працуе і па сённяшні дзень.

Афіцыйную біяграфію Кацярыны Музычэнка ўдалося адшукаць толькі на састарэлай версіі сайта Нацыянальнай бібліятэкі Беларусі, дзе яна названа дзяржаўным дзеячам.

Дзеячы такога кшталту ў Беларусі звычайна не распаўсюджваюцца пра свае жыццёвыя шляхі-дарогі, каб у народных мас не ўзнікала няёмкіх пытанняў. А між тым, Музычэнка няма чаго хаваць – не кожнаму аграному ўдаецца пасеяць у аблвыканкаме столькі разумнага, добрага і вечнага.

Фота афіцыйнага сайта Магілёўскага аблвыканкама.

Магілёўскіх ідэолагаў сабралі і паказалі ўсіх разам

Навіна ад

На інструктыўна-метадычным семінары, які прайшоў у Магілёўскім аблвыканкаме, можна было ўбачыць ідэалагічную вярхушку вобласці. Раённыя байцы нябачнага фронту далучыліся да мерапрыемства па Zoom.

Народу выпаў шанец убачыць ідэолагаў вобласці, якія ледзь змясціліся за вялікімі сталамі ў адной з залаў аблвыканкама. І гэта яшчэ не ўсе з шматлікай кампаніі тых, хто клапоціцца, каб думкі жыхароў Магілёўшчыны плылі ў правільным кірунку – раённыя «плеяды» ідэолагаў прысутнічалі на семінары анлайн.

Гэтыя людзі атрымліваюць прыстойную зарплату, пастаянна на нарадах і раз’ездах, як пілігрымы, вандруюць па прадпрыемствах і арганізацыях, каб несці ўсім заблукалым святло ісціны.

Кіраўніца абласной ідэалогіі Кацярына Музычэнка, як заўжды, трапіла у яблычак, прадэманстраваўшы найвышэйшы ўзровень інфармацыйнай пісьменнасці.

Яна данесла свае ідэі да прысутных вельмі ёмкімі, а галоўнае – свежымі метадычнымі фразамі, зрабіўшы асаблівы акцэнт на дзяцей і старых, якія «не знаёмыя з інфармацыйнай пісьменнасцю».

Аднак найбольшае захапленне выклікае не словаблуддзе Музычэнкі, а віртуознае ўменне слухачоў семінара ўладкавацца ў жыцці так, каб увогуле нічога не рабіць.

Фота “Магілёўскія ведамасці”.