Дзень у гісторыі. 2 снежня. Выхадцам з Магілёўшчыны адліта Цар-гармата. Утварэнне Бізоніі. Нарадзіліся гетман Януш Радзівіл, філосаф Анёл Доўгірд

Дзень у гісторыі. 2 снежня. Выхадцам з Магілёўшчыны адліта Цар-гармата. Утварэнне Бізоніі. Нарадзіліся гетман Януш Радзівіл, філосаф Анёл Доўгірд

Міжнародны дзень барацьбы за адмену рабства (International Day for the Abolition of Slavery).  

У гэты дзень у 1949 годзе ААН прыняла «Канвенцыю аб барацьбе з гандлем людзьмі і эксплуатацыяй прастытуцыі трэцімі асобамі”.

На жаль, на сенняшні дзень праблема застаецца актуальнай, а пытанні гандлю людзьмі паўстаюць у самых розных, нават добра забяспечаных краінах.

Паводле ацэнак ААН, ахвярамі сучаснага рабства сталі больш за 40 мільёнаў чалавек. Напрыклад, у Індыі на сёння самая вялікая колькасць рабоў у свеце – тут больш за 18 мільёнаў чалавек усё яшчэ знаходзяцца ў кайданах рабства.

Акрамя таго, гэты дзень таксама важны для спынення эксплуатацыі жанчын, якія сталі ахвярамі сексуальнага гвалту ў імя працы. Для таго, каб даць простае жыццё жанчынам і дзецям, неабходна прыкладаць пастаянныя намаганні, каб спыніць гэта.

«Чым большай свабодай мы карыстаемся, тым большую адказнасць мы нясем як перад іншымі, так і перад самімі сабой» (Оскар Арыяс Санчэс).

 

1586 год. Майстар Андрэй Чохаў скончыў адліўку Цар-гарматы.

Вялікая верагоднасць, што майстар паходзіць з Літвы, з Магілёўшчыны. Сваё навучанне ліцейнай прафесіі ён пачаў падлеткам у гарматнага майстра Кашпіра Ганусава ў Быхаўскай людвісарні.

За 60 гадоў працы Чохаў стварыў больш за 20 цяжкіх гармат.

Цар-гармата – спецзаказ цара Фёдара (сын Івана Жахлівага) і стваралася на маскоўскім Гарматным двары па задумцы Барыса Гадунова.

Даўжыня гарматы больш за 5 м, дыяметр ствала – 1,20 м. Вага 40 тон. Калібр снарада дасягаў 890 мм, тэарэтычна прылада магла страляць ядрамі дыяметрам амаль 1 м. 

Гармату з Гарматнага двара на Красную плошчу цягнулі 200 коней. 

Гармата павінна была сімвалізаваць ваенную моц рускай дзяржавы, ахоўваць Пакроўскі сабор і Спаскія вароты, садзейнічаць папулярнасці Барыса Гадунова. 

Адзіны раз яе прывялі ў баявую гатоўнасць у 1591 годзе, калі да Масквы наблізіліся войскі Казы-Гірэя.

З гарматы ні разу не стралялі, бо яе не дарабілі: унутраная частка ствала не была зачышчана пасля адліўкі, і ў ім меліся наплывы да 20 мм.

Цар-гармата Чохава занесена ў Кнігу рэкордаў Гінеса.

1612 год. Нарадзіўся Януш Крыштаф Радзівіл

Дзяржаўны і ваенны дзеяч Вялікага Княства Літоўскага. Гетман вялікі літоўскі, ваявода віленскі. Князь Свяшчэннай Рымскай Імперыі.

Меў багатыя маёнткі, трымаў староствы, у тым ліку Мсціслаўскае.

Абаронца кальвінізму.

Удзельнік Смаленскай вайны, кампаній супраць казакаў. Пад Лоевым у 1649 і 1651 гадах разбіў казакаў Крэчаўскага і Нябабы. 

Атрымаў перамогу над рускімі войскамі ў бітве пад Шкловам 12 жніўня 1654 і паражэнне ў бітве пад Шапялевічамі 24 жніўня 1654. Паранены, ледзь пазбег палону: мясцовы жыхар правёў яго праз балоты да Барысава. У студзені 1655 года спрабаваў адбіць Магілёў.

Прыхільнік незалежнасці ВКЛ. Неяк у прысутнасці манарха кінуў польскім сенатарам: «Прыйдзе час, паны-палякі да дзвярэй не патрапяць – праз вокны іх выкідваць будзем».

Стаўшы ў 1654 годзе вялікім гетманам, засяродзіў у сваіх руках практычна ўсю ўладу ў Вялікім Княстве.

Пасля заняцця маскоўскімі захопнікамі ўлетку 1655 года большай часткі тэрыторыі сучаснай Беларусі, а таксама Вільні і Коўны, ініцыяваў складанне уніі з шведскім каралём Карлам Густавам, якая была падпісаная 17 жніўня 1655 года ў Кейданах. Аднак акт Кейданскай уніі не быў ажыцёўлены. Супраць Я. Радзівіла ўзбунтаваліся харугвы ўласнага войска. З рэштай верных сіл ён зачыніўся ў Тыкоцінскім замку, абложаны войскам Паўла Сапегі, адданым каралю. Неўзабаве памёр. Паводле некаторых звестак, быў атручаны, бо на целе выступілі плямы.

 

1776 год. У Мсціслаўскім павеце нарадзіўся Анёл Доўгірд

Беларуска-польскі філосаф, логік, псіхолаг, педагог. Доктар тэалогіі. Член-карэспандэнт Варшаўскай акадэміі навук.

Вучыўся ў езуіцкіх школах у Мсціславе, Магілёве, піярскіх навучальных установах, Віленскай акадэміі. Святар-піяр.

Выкладчык геаграфіі, матэматыкі, фізікі, французскай мовы, паэтыкі і рыторыкі ў розных піярскіх навучальных установах, прафесар Віленскага ўніверсітэта і духоўнай акадэміі.

Мецэнат. У 1812 годзе апекваў параненых і хворых салдат.

Сваю вялізную бібліятэку ахвяраваў Духоўнай акадэміі.

Паводле сведчання студэнтаў і прафесараў дэманстраваў вялікую дасведчанасць у навуках, асабліва ў філасофіі. Сярод яго студэнтаў быў і Адам Міцкевіч.

Аўтар даследаванняў па філасофіі Канта, логіцы, псіхалогіі. Пісаў вершы, цікавіўся эстэтыкай і крытыкай.

Памёр у 1835 годзе.

 

1879 год. нарадзіўся Фелікс Стацкевіч

Беларускі грамадскі і культурны дзеяч.

Скончыў Пецярбургскі універсітэт.  Быў сасланы за рэвалюцыйную дзейнасць. 

Працаваў у прафсаюзных арганізацыях, у Наркамасветы ЛітБелССР,  дырэктарам Радашковіцкай беларускай гімназіі імя Ф. Скарыны, старшынёй Галоўнай управы Таварыства беларускай школы,  рэдактарам часопіса «Беларускі летапіс». Арыштоўваўся польскімі ўладамі.

У 1939-1941 гадах настаўнік у Вілейцы і Клецкім раёне. У Другую сусветную вайну працаваў суддзёй у г. Смаргонь, у 1944-1949 – у музеі Пушкіна ў Мяркучай пад Вільняй.

У 1949 арыштаваны і зняволены. Пасля вызвалення ў 1950-я гады  жыў у Вільні.

Актывіст руху эсперантыстаў. Склаў «Эсперанта-беларускі слоўнік». Пераклаў на мову эсперанта кнігу Л. Петражыцкага «Тэорыя права і маральнасць».

Аўтар успамінаў пра ўдзел у рэвалюцыйным руху.

Памёр 21 чэрвеня 1967 года. Пахаваны на Віленскіх Свята-Еўфрасіннеўскіх могілках.

 

1887 год. Нарадзіўся Уладзімір Пракулевіч.  

Беларускі грамадскі і палітычны дзеяч, публіцыст, журналіст, юрыст.

Працаваў суддзёй у Слуцку. Адзін з кіраўнікоў Слуцкага збройнага чыну 1920 года.

Жыў у Вільне, Коўна, уваходзіў у склад Віленскага Белнацкама. Са жніўня 1923 года –  дзяржаўны сакратар Урада БНР.

З канца 1923 года працаваў у Празе у нацыянальных арганізацыях беларускай эміграцыі. Удзельнік 2-й Берлінскай беларускай палітычнай канферэнцыі.

У маі 1926 года вярнуўся ў Беларусь. Працаваў у Дзяржаўнай бібліятэцы БССР.

У 1930 годзе арыштаваны ДПУ, у 1932 годзе асуджаны на 5 гадоў ссылкі. Паўторна арыштаваны НКУС у 1938 годзе. Расстраляны 20 жніўня 1938 года пад Свярдлоўскам (цяпер Екацярынбург).

 

1902 год. Нарадзіўся Анатоль Вольны (Ажгірэй). 

Беларускі паэт, празаік, кінадраматург, журналіст. Заслужаны дзеяч мастацтваў.

Пасля дэмабілізацыі з Чырвонай Арміі ў 1921 годзе працаваў у ЦК ЛКСМБ, газеце «Малады араты». Член літаб’яднанняў «Маладняк», «Полымя».

Адзін з пачынальнікаў прыгодніцкага жанру ў беларускай прозе.

Аўтар зборнікаў паэзіі, раманаў, аповесцей, кнігі гумарэсак і фельетонаў, п’ес, драматызаваных агітжартаў, камедый.

Па яго сцэнарыях пастаўлены фільмы «Хвоі гамоняць», «Гатэль „Савой“», «У агні народжаная», «Сонечны паход», «Новая радзіма» і іншыя.

Арыштаваны ДПУ ў 1936 годзе, расстраляны 29 кастрычніка 1937 года

Фота: Анатоль Вольны і Міхась Чарот, 1925.

 

1943 год. Паводле аператыўнай зводкі Саўінфармбюро, на працягу 2 снежня паміж рэкамі Сож і Дняпро, на паўночны захад ад Гомеля, савецкія войскі “занялі больш за 80 населеных пунктаў. Сярод іх буйныя населеныя пункты Канава, Званец, Стары Доўск, Кляцішча, Петравічы, Хізава, Бераставец, Меркулавічы, Галавачы, Лазоў, Негаўка, Бронніца, Забаб’е, Губічы, Дзядоў Курган, Несоеў, Мікалаеў… Знішчана да 1500 нямецкіх салдат і афіцэраў, падбіта і спалена 26 танкаў і 2 бронемашыны. У раёне ніжняй плыні ракі Прыпяць войскі занялі Ніжні Млынок, Завойць, Смалегаў, Буда, Будкі, Галоўчыцы, Грушаўку, Антонаў…  знішчылі да батальёна гітлераўцаў, падбілі 5 танкаў і 3 бронемашыны”.

 

1946 год. Утварэнне Бізоніі. Дамова аб аб’яднанні акупацыйных зон Германіі, якую падпісалі Вялікабрытанія і ЗША ў Нью-Ёрку.

У 1946 годзе СССР прыпыніў дастаўку сельскагаспадарчых прадуктаў са сваёй зоны ў заходнія рэгіёны Нямеччыны. Амерыканская ваенная адміністрацыя спыніла транзітныя перавозкі і дастаўку абсталявання з фабрык і заводаў Рурскай вобласці ў савецкую зону. У выніку пачаў развівацца сур’ёзны крызіс кіравання.

Амерыканская і брытанская зоны акупацыі былі аб’яднаны пад назвай “Бізонія” (Бі – два). Пасля таго, як ЗША і Вялікабрытанія пачалі ствараць дэмакратычныя органы ўлады ў сваёй аб’яднанай зоне акупацыі, Францыя 8 красавіка 1949 года далучыла да яе сваю зону. Амерыкана-англійская Бізонія ператварылася ў Трызонію, з якой 7 верасня 1949 года ўтварылася Федэратыўная Рэспубліка Германія. У адказ 7 кастрычніка 1949 года з савецкай зоны акупацыі ўтварылася Германская Дэмакратычная Рэспубліка.

1953 год. Нарадзіўся Аляксандр Фінскі

Беларускі скульптар. Аўтар твораў у манументальнай і станковай скульптуры, пластыцы малых форм, медальерным мастацтве. Прафесар кафедры скульптуры Беларускай дзяржаўнай акадэміі мастацтваў. Заслужаны дзеяч мастацтваў.

Творы знаходзяцца ў Нацыянальным мастацкім музеі Беларусі, Магілёўскім абласным мастацкім музеі імя П. Масленікава, Траццякоўскай галерэі ў Маскве, Полацкім гісторыка-культурным запаведніку, мастацкай галерэі Пухавіцкага краязнаўчага музея.

Вядомы, галоўным чынам, па творах: рэльеф «Максім Багдановіч» для бібліятэкі імя М. Багдановіча, “Калыска” ў парку імя Янкі Купалы, мемарыялы «Чырвоны Бераг»,  «Яма. Мінскае гета», помнікі Сімяону Полацкаму ў Полацку, А. Міцкевічу ў Мінску, Максіму Танку ў Мядзеле, скульптурныя кампазіцыі для Нацыянальнага тэатра оперы і балета, кампазіцыі «Беларускія святы» у Дортмундзе, «Анёл-ахоўнік» у парку Нясвіжа.

 

1953 год. Нарадзіўся Мікола Рыжы

Беларускі мастак, ілюстратар

Афарміцель больш за 60 кніг, сярод якіх «Блікі сонца» Максіма Танка, «Рэпартаж з пятлей на шыі» Ю. Фучыка, «Маўглі» Кіплінга, «Вужовы кароль» Ул. Ягоўдзіка, «Вялікія і славутыя людзі беларускай зямлі» Ул. Бутрамеева, казак, дзіцячых падручнікаў.

Працаваў у галіне кніжнай і станковай графікі, нацюрморта, малых форм і экслібрыса. Мастак падараваў мінскаму Музею сучаснага выяўленчага мастацтва 40 сваіх экслібрысаў.

Сапраўдны майстар паштовай мініяцюры. Распрацаваў больш за 200 арыгінал-макетаў паштовых марак, мастацкіх капэрт і картак.

Аўтар серый марак, якія прысвечаны паўстанню 1794 года, 480-годдзю Беларускага друку, 120-ці і 125-годдзю з дня нараджэння Янкi Купалы i Якуба Коласа.

Намаляваў графічную серыю партрэтаў землякоў-адраджэнцаў 1920-1930-х гадоў: К. Езавітаў, А. Бярозка, А. Калубовіч, А. Смоліч, В. Захарка, В. Ластоўскі, Р. Астроўскі, Я. Кіпель.

Памёр 30 сакавіка 2017 года.

 

1959 год. Нарадзіўся Міхал Андрасюк

Беларускі пісьменнік, журналіст, актыўны дзеяч беларускай меншасці ў Польшчы.

Працаваў настаўнікам, у беластоцкай рэдакцыі Радыё «Рацыя», вядучым тэлеканала «Белсат».

Аўтар вершаў, зборнікаў апавяданняў, кніг прозы, аповесцей.

Лаўрэат літаратурнай прэміі прэзідэнта  Беластока імя Веслава Казанецкага, прэміі імя Ежы Гедройца, літаратурнай прэміі «Гліняны Вялес».

 

1987 год. Памёр ураджэнец Мінска Якаў Зяльдовіч

Савецкі фізік, фізіка-хімік. Акадэмік АН СССР. Тройчы Герой Сацыялістычнай Працы. Доктар фізіка-матэматычных навук.

Адзін са стваральнікаў атамнай (1949) і вадароднай (1953) бомб у СССР.

Аўтар прац па дэтанацыі, апісанню працэсаў гарэння, ядзернай фізіцы, астрафізіцы, гравітацыі.

Зяльдовіч і Солпітэр у 1964 годзе першымі і незалежна адзін ад аднаго выказалі здагадку, што крыніцамі энергіі квазараў служаць акрэцыйныя дыскі вакол масіўных чорных дзір.

У працах па касмалогіі асноўнае месца займала праблема ўтварэння буйнамасштабнай структуры Сусвету. Даследаваў пачатковыя стадыі пашырэння Сусвету.

Пабудаваў тэорыю ўзаемадзеяння гарачай плазмы пашыраемага Сусвету і выпраменьвання, стварыў тэорыю росту ўзмучэнняў у «гарачым» Сусвеце ў ходзе касмалагічную пашырэння, разгледзеў некаторыя пытанні, звязаныя з узнікненнем галактык у выніку гравітацыйнай няўстойлівасці гэтых узмучэнняў, паказаў, што ўзнікаюць утварэнні высокай шчыльнасці, якія з’яўляюцца, верагодна, протаскопішчамі галактык, маюць плоскую форму.

Недалёкае замежжа. У Латвіі настаўнікі пагрозаю правядзення забастоўкі дамагліся падвышэння заробкаў і паляпшэння ўмоваў працы

Урад пайшоў на кампраміс з настаўніцкім прафсаюзам, каб пазбегнуць забастоўкі. У ёй збіраліся ўдзельнічаць больш за 23 тысячы настаўнікаў.

Кабінет міністраў і Латвійскі прафсаюз работнікаў адукацыі і навукі дамовіліся аб кампрамісе па паляпшэнні ўмоваў працы педагогаў, таму запланаваная на 19 верасня забастоўка не адбудзецца, піша Press.

pbs.twimg.com

Міністэрства адукацыі і навукі прапанавала прафсаюзу альтэрнатыўнае вырашэнне пытання аб заробках настаўнікаў – дадатковае фінансаванне ў памеры 56,5 млн еўра з дзяржбюджэту, якое прапаноўвалася і раней, а таксама яшчэ 12 млн еўра са сродкаў самакіраванняў.

Латвійскі прафсаюз работнікаў адукацыі і навукі пасля бясплённых перамоваў аб павышэнні заробкаў педагогам яшчэ ў чэрвені прыгразіў, што закліча школьных настаўнікаў з верасня пачаць бестэрміновую забастоўку. Уладу прафсаюз папярэдзіў, што з-за недахопу педагогаў у новым навучальным годзе настаўнікі будуць перагружаныя, і гэта можа кепска адбіцца і на якасці адукацыі, і на даступнасці кадраў.

12 верасня прафсаюз педагогаў афіцыйна падаў заяўку на правядзенне забастоўкі і аб’явіў, што ў ёй гатовы прыняць удзел 23,4 тысячы настаўнікаў. Толькі пасля гэтага міністр адукацыі абвясціла, што настаўнікам будзе прапанавана падняць памер найменшай стаўкі з 900 да 1200 еўра – за 40-гадзінную стаўку.

фота: bb.lv

Латвія беларусам да 2023 году не збіраецца выдаваць паўторныя віды на жыхарства

Урад краіны падтрымаў папраўкі ў закон аб іміграцыі, якія прадугледжваюць ускладненне ўмоваў выдачы пасведчання на права пражывання ў Латвіі грамадзянам Расіі і Беларусі.

Да 30 чэрвеня 2023 года будзе спынена выдача паўторных ВНЖ грамадзянам Расіі і Беларусі, за выключэннем асоб, якія знаходзяцца ў Латвіі працяглы час. Выключэнне складаюць былыя грамадзяне Латвіі або не грамадзяне, якія не маюць права на атрыманне пастаяннага дазволу на пражыванне або статусу пастаяннага жыхара Еўрапейскага Саюзу з-за недастатковага ведання дзяржаўнай мовы, піша выданне «Наша газета».

Нормы, прадугледжаныя прававым актам, не закранаюць правы асобаў, якія шукаюць міжнароднай абароны.

Папраўкі мае зацвердзіць Сойм.

Тым часам, краіны Балтыі дамовіліся істотна абмежаваць перасячэнне межаў грамадзянамі Расіі, у тым ліку тых, у каго ёсць шэнгенскія візы, напісаў у Twitter міністр замежных справаў Латвіі Эдгар Рынкевіч.

Паводле яго, рашэнні будуць прыняты ўрадамі краін Балтыі згодна з працэдурамі нацыянальнага заканадаўства, і набудуць моц адначасова.

фота: bbci.co.uk

Бюджэтнікам падвышаюць аклад на 0,5 працэнты

Урад Беларусі зацвердзіў павышэнне базавай стаўкі да канца года. Яе ўздымуць двойчы: з 1 верасня і з 1 лістапада. Вераснёўскае падвышэнне базавай стаўкі прывядзе да росту акладу бюджэтнікам на 0,5 працэнты.


Базавая стаўка ў Беларусі – гэта аснова для налічэння заробкаў работнікам бюджэтнай сферы. Іх аклад наўпрост залежыць ад базавай стаўкі і разлічваецца па формуле: Базавая стаўка х каэфіцыент разраду.


Прэм’ер-міністр Раман Галоўчанка падпісаў пастанову аб павышэнні базавай стаўкі. З 1 верасня яна вырасце да 211 беларускіх рублёў, з 1 лістапада – да 212 рублёў, піша рэсурс Myfin.

Такім чынам, павышэнне базавай стаўкі ў верасні павялічыць аклад (пры тым жа каэфіцыенце разраду) усяго на 0,5 працэнта.

Выданне нагадвае: раней базавую стаўку для бюджэтнікаў падвышалі ў 2022 годзе планава ўжо тры разы – у сакавіку, красавіку і маі. Да 1 верасня яна складала 210 беларускіх рублёў.

фота: intex-press.by

“Памерці, але вытрымаць” – у дні канферэнцыі “Новай Беларусі”, у Мінску прайшло пасяджэнне Савета Міністраў

«Памерці, але вытрымаць» – у дні канферэнцыі «Новай Беларусі», у Мінску прайшло пасяджэнне Савету Міністраў

Пасяджэнне Савету Міністраў  было прымеркаванае да тэмы функцыянавання дзяржавы ва ўмовах санкцый і прысвячалася захадам па пераадоленню іх наступстваў – паведамляе БелТА.

Аляксандр Лукашэнка, які старшыняваў на пасяджэнні, выказаў упэўненасць, што па выніках года эканоміка мае шанцы паказаць такі самы вынік, як і летась.

Пры гэтым асабліва адзначалася, што вялікая ўвага надаецца магчымасці працягваць гандаль з Еўразвязам.

«Нам ні ў якім разе нельга сыходзіць з Еўрасаюзу. Гэта наш бліжэйшы сусед. Мы палавіну там, на маю думку, працавалі па экспарту, – сказаў Лукашэнка.

Прэм’ер-міністр Раман Галоўчанка так ахарактарызаваў актуальную сітуацыю ў эканоміцы: знешнія ўмовы для работы эканомікі істотна пагоршыліся, таму што ўведзеныя санкцыі адносна Беларусі з боку шэрагу краін датычацца ўсіх этапаў экспарту ад дастаўкі тавару да атрымання выручкі. Каб замясціць прыбыткі, якія выпалі з-за санкцый, быў прыняты комплекс мер для нарошчвання вытворчасці і экспарту ў іншых галінах.

«Штомесяц расце экспарт тавараў, і ў чэрвені ён практычна дасягнуў узроўню мінулага года, а ў Расію – дасягнуў гістарычнага максімуму $2 млрд за месяц» – паведаміў Галоўчанка.

Прэм’ер-міністр Брытаніі Барыс Джонсан сышоў у адстаўку

Аб такім рашэнні ён афіцыйна заявіў на прэс-канферэнцыі, якая адбылася 7 ліпеня. Пра гэта паведамляюць брытанскія мэдыі.

Палітык працягне выконваць абавязкі кіраўніка ўраду, пакуль не абяруць у кастрычніку новага.

Барыс Джонсан сыходзіць пасля таго, як яго адстаўкі запатрабавалі больш за 50 міністраў і высокапастаўленых чыноўнікаў. Урад пакінула каля паловы яго складу.

Гэта стала вынікам серыі рэзанансных скандалаў, у якіх быў замешаны прэм’ер-міністр.

Барыс Джонсан збіраецца пакінуць і пасаду старшыні кіроўнай Кансерватыўнай партыі.

Барыс Джонсан ад пачатку поўнамаштабнага ўварвання Расіі актыўна падтрымліваў Ўкраіну. Выступаў за аказанне ёй ваеннай і фінансавай дапамогі. Ён двойчы быў у Кіеве і сустракаўся з прэзідэнтам Уладзімерам Зяленскім.

фота: bbci.co.uk

Урад аднавіў забарону на вываз пшанічнай мукі і грэчкі

Забарона будзе трываць тры месяцы для абароны ўнутранага рынку.

Адпаведную пастанову падпісаў прэм’ер-міністар, гаворыцца ў тэлеграм-канале “Урад Беларусі”.

У адзначаецца: забаронена вывозіць з Беларусі муку з пшаніцы, круп грубага памолу з грэчкі, грэчкавага збожжа абрушанага, гатовых харчовых прадуктаў з грэчкі.

Падобную пастанову ўрад выдаваў у сакавіку. Тады таксама забаранялася вывозіць  пшанічную муку і грэчку. Абмежаваньні трывалі тры месяцы да 16 чэрвеня.

фота з адкрытых крыніц

Улады абяцаюць стабілізаваць цэны. Што збіраюцца рабіць?

Урад і Камітэт дзяржкантролю зацвердзілі праграму стабілізацыі коштаў. Ёю прагледжваецца насычэнне ўнутранага рынку таварамі, а таксама ўвядзенне новых правілаў у эканамічным і адміністрацыйным рэгуляванні.

У Саўміне, настойваюць: «большасць мерапрыемстваў знаходзіцца ў высокай стадыі прапрацоўкі, асобныя ўжо рэалізуюцца», піша рэсурс «Смартпресс».

Неабходнасць такіх захадаў тлумачыцца праблемамі ў эканоміцы. 

Сёлета ў траўні спажывецкія кошты ў параўнанні з красавіком выраслі на 0,7%, а з пачатку года інфляцыя склала 11,9%. Гадавая інфляцыя дасягнула 17%.

Цэны на харчовыя тавары за год выраслі на 19,3 працэнта, нехарчовыя – на 18,7 працэнта, кошт платных паслуг павялічыўся на 10,8 працэнта.

Сярод першачарговых мераў, урадоўцы абяцаюць легалізаваць паралельны імпарт. 

Гэта значыць, у краіну будуць увозіцца тавары без згоды праваўладальніка гандлёвага знаку.

Ва ўрадзе тлумачаць, што такая часовая мера скіраваная на недапушчэнне дэфіцыту тавараў імпартнай вытворчасці на насычэнне спажывецкага рынку.

Неабходнасць яе выкарыстання выкліканая, тым, што краіна пад санкцыямі і ўладальнікі вядомых брэндаў пазбягаюць увозіць у Беларусь свае тавары.

Разлічвацца за энергарэсурсы збіраюцца расійскімі рублямі. 

Сёлета ў красавіка паведамлялася, што Міністэрства Беларусі і «Газпром» падпісалі адпаведныя дакументы.

Заяўлялася, што гэта створыць «камфортныя і празрыстыя» умовы разлікаў для Беларусі.

У чэрвені ж незалежным медыям стала вядома, што беларускія ўлады сталі затрымліваць аплату, бо, на іх думку, Расія штучна завышае курс расійскага рубля і цана выходзіла завялікай».

 

фота belmarket.by

Чатыром прадпрыемствам з Магілёўшчыны забаронена прадаваць акцыі. Улады вызначылі, што іх інвестары з «недружалюбных краін»

На нацыянальным прававым інтэрнэт-партале апублікаваная пастанова ўраду, у якой пазначаныя кампаніі, якім забаронена прадаваць акцыі без дазволу ўлады.

“Дзеля прадухилення выводу капиталу”

У ёй гаворыцца, што іх інвестарамі, ці ўладальнікамі з’яўляюцца юрыдычныя асобы з замежных дзяржаваў, дзеянні якіх недружалюбныя ў адносінах да Беларусі.

«Для абароны інтарэсаў Рэспублікі Беларусь акцыі блакуюцца на рахунках »дэпо» іх уладальнікаў згодна са спісам на падставе прадпісання Міністэрства фінансаў аб накладанні абмежаванняў у выкарыстанні каштоўнымі паперамі », – адзначана ў пастанове ўраду.

Яна прынятая ў рамках сакавіцкага ўказа «Аб дадатковых мерах па забеспячэнні стабільнага функцыянавання эканомікі» з «мэтай прадухілення вываду капіталу з краіны».

У спісе 190 прадпрыемстваў. Чатыры – з Магілёўскай вобласці

– Акцыянерам Магілёўскага металургічнага камбінату зʼяўляцца кампанія «Caraglen Investments Limited» з Гібралтару.

– У Бабруйскі мясакамбінат уклаў сродкі грамадзянін Латвіі Леанід Абраменка.

– Інвестарам горацкага камбінату «Малочныя горкі» зʼяўляецца латвійская кампанія «Экспанента».

– «Крычаўскі завод жалезабетонных вырабаў», мае інвестара з Чэхіі. У прадпрыемства ўклала сродкі кампанія KASI.

Наступствы санкцыяў

Супраць Беларусі за падтрымку расійскай агрэсіі ва Ўкраіне і пераслед удзельнікаў пратэстаў 2020 году краінамі Еўрапейскага Саюзу, ЗША і іншымі ўведзеныя санкцыі. Паводле першага віцэ-прэмʼера краіны Мікалая Снапкова, яны «закранулі каля 20% беларускай эканомікі і прывялі да зніжэння ВУП Беларусі ў студзені – красавіку на 2,1%»: з-за іх толькі сёлета эканоміка Беларусі рызыкуе недаатрымаць $14 млрд экспартнай выручкі.