Category: Спорт і здароўе

Хопіць TikTokа – медыцынскія чыноўнікі Магілёўскай вобласці самі адрэагуюць на скаргі

Навіна ад

Не трэба скардзіцца ў TikTok на чыноўнікаў Магілёўшчыны. Лепш тэлефануйце ім самім па суботах.

Галоўнае ўпраўленне па ахове здароўя Магілёўскага аблвыканкама апублікавала графік правядзення суботніх прамых ліній на люты. Там, нібыта, можна задаць пытанне пра меддапамогу наўпрост, што называецца, у лоб.

Мы ж пакуль задамося іншым пытаннем: наколькі эфектыўныя прамыя лініі такога кшталту?

І прымем як дадзенасць, што лекары ў Магілёўскай вобласці – зусім не поўныя невукі, якія купілі дыплом за грошы. 

Дзякўй Богу, медінстытуты ў Беларусі пакуль не сельгасакадэмія, у якой можна вывучыцца завочна за пару парасят, каб потым абдзіраць калгасы як ліпкі.

І не акадэмія кіравання імя Лукашэнкі, якая толькі пагаршае ўжо наяўныя праблемы з граматыкай.

Калі і ёсць на Магілёўшчыне прэтэнзіі да медабслугоўвання, то тычацца яны не лекараў, а арганізацыі іх працы. 

У чэргах, дэфіцыце кадраў, бясконцых рамонтах, як у Быхаўскай ЦРБ, адсутнасці сучаснага абсталявання і іншых недарэчнасцях беларускай медыцыны вінаватыя перш за ўсё профільныя чыноўнікі.

І, патэлефанаваўшы на гарачую лінію, вы аўтаматычна паскардзіцеся тым, на каго скардзіцеся.

Па сутнасці, графік, пра які ідзе гаворка – спіс прозвішчаў чыноўнікаў, вінаватых у бардаку. А ўсе іх гарачыя і халодныя лініі – спосаб перанакіраваць скаргу ў патрэбнае ўладам рэчышча.

Вось і выходзіць, што TikTok значна больш эфектыўны за суботнюю балбатню з чыноўнікамі. 

У сацыяльнай сетцы ў вашай скаргі з’яўляюцца шанцы быць пачутай тымі, хто можа даць чыноўнікам па шапцы. Вось такая дзіўная логіка працы са зваротамі грамадзян і грамадзянак.

На палігоне БДСГА пройдзе трактарны біятлон

Навіна ад

У Горках арганізуюць трактарны біятлон. Хуткасць, трапнасць і бездарожжа – усё, як любяць «моцныя гаспадарнікі».

Спаборніцтвы па трактарным біятлоне пройдуць 21 лютага на вучэбным палігоне Беларускай дзяржаўнай сельскагаспадарчай акадэміі. Яны прымеркаваныя да Дня абаронцы Айчыны, а «ў барацьбу за прызавыя месцы ўвяжуцца не толькі будучыя аграрыі, студэнты профільных ВНУ, але і вопытныя механізатары».

У праграме – хуткасныя заезды на трактарах і проста катанне, салдацкая каша, юшка і нават фірмовы плоў ад дэкана факультэта механізацыі сельскай гаспадаркі акадэміі.

Самі ж спаборніцтвы выглядаюць як гонкі на трактарах па перасечанай мясцовасці з праходжаннем устаноўленых этапаў і стральбой з пнеўматычнай вінтоўкі.

Спаборніцтвы, паводле задумы арганізатараў, павінны прадэманстраваць магутнасць і манеўранасць айчыннай сельгастэхнікі.

Даўно пара. «TikTok» забіты ролікамі, у якіх паказана, як звышмагутныя і суперманеўраныя «Беларусы» яшчэ і ламаюцца з неверагоднай хуткасцю.

Калі з чым праблем не ўзнікае, дык толькі з бездарожжам. 

Карацей кажучы, ударым біяятлонам па бездарожжы і разгільдзяйстве!

Фота “Беларусь Сегодня”.

У Магілёве адкрыты кабінет дзіцячай нейракарэкцыі – за грошы бацькоў

Навіна ад

У 3-й паліклініцы Магілёва адкрыты кабінет нейракарэкцыі, у якім дзецям дапамагаюць аднаўляць і развіваць памяць, увагу і мысленне, а таксама карэктуюць парушэнні маўлення і каардынацыі.

Спецыяльна навучаная медсястра пры неабходнасці робіць самым маленькім магілёўцам масаж.

Акрамя таго, там малых вучаць правільна вымаўляць гукі і будаваць сказы.

Кабінет нейракарэкцыі запатрабаваны ў магілёўцаў. Пра гэта сведчыць той факт, што яго стварэнне спансіравалі самі бацькі.

Фота – скрыншот відэа youtube-канала «Магілёўскія ведамасці».

Быхаўчан прарвала – людзі не ацанілі гумару з кавамашынай у бальніцы

Навіна ад

Бравурны артыкул пра ўзлёт медыцыны ў Быхаве выклікаў шквал негатыўных эмоцый у быхаўчан.
Казка пра новы ўзровень камфорту і тэхналогій у бальніцы, якую тапорна сачынілі журналісты быхаўскай раённай газеты, не прайшла экспертную ацэнку ў быхаўчан. Людзі не ўбачылі ніякіх зменаў у сваім медыцынскім абслугоўванні. Яно, на іх думку, як было, так і засталося ў ў катастрафічным стане. 

Быхаў ЦРБ

Пералічэнне медыцынскага абсталявання з мала зразумелымі назвамі, акцэнт на рамонт асфальтавага пакрыцця бальнічнага двара і нейкія «пераробкі недаробкаў аздаблення» былі ацэненыя так, як і належала іх ацаніць – праўладнае СМІ ў чарговы раз зманіла.

ЦРБ Быхаў

Ніякая кавамашына каля рэгістратуры не выправіць сітуацыю з вострым дэфіцытам урачоў, які Быхаўская ЦРБ адчувае не першы год.
І Быхаў у гэтым сэнсе, на жаль, не выключэнне. Узровень медыцынскага абслугоўвання, пра бясплатнасць якога пастаянна паўтараюць беларускія ўлады, не проста імкліва падае, а ўжо дасягнуў свайго дна.

ЦРБ Быхов

Быхаўшчына ж, калі чым і адрозніваецца ад іншых рэгіёнаў вобласці, дык толькі ўменнем мясцовых уладаў беспардонна хлусіць.

Фота – скрыншот акаўнта «Тік-ток» партала «Магілёў-медыя»

Магілёўскі “дэпутат” выступіў за паляпшэнне дэмаграфіі – з яўным спазненнем

Навіна ад

Валерый Малашка прыдумаў, як палепшыць дэмаграфічную сітуацыю ў краіне. Чыноўнікам у яго гэта не атрымлівалася – цяпер для гэтага яму спатрэбілася праграма, прынятая на УНС.

На сустрэчы з медграмадскасцю ў БДМУ Валерый Малашка назваў тры фактары, якія ўплываюць на паляпшэнне дэмаграфічнай сітуацыі ў краіне. Прычым усе яны звязаныя з праграмай сацыяльна-эканамічнага развіцця Беларусі на 2026-2030 гады, прынятай на VII Усебеларускім народным сходзе:

  • матэрыяльны дабрабыт сям’і;
  • уключэнне перыяду догляду за дзіцем у агульны працоўны стаж жанчын;
  • медыцынскія і адукацыйныя ўмовы, якія ўплываюць на рэпрадуктыўнае здароўе.

Варта адзначыць, што азарэнне зышло на Валерыя Анатольевіча з вялікім спазненнем. Медык па прафесіі, Малашка доўгі час быў намеснікам старшыні Магілёўскага аблвыканкама і валодаў усімі магчымымі рэсурсамі для паляпшэння дэмаграфічнай сітуацыі ў вобласці, аднак нічога толковага не дасягнуў. 

Менавіта пры ім сітуацыя не проста выйшла з-пад кантролю, а стала катастрафічнай. Будучы чыноўнікам, Валерый Малашка вызначаўся толькі шматслоўнымі разважаннямі на агульныя тэмы і быў накіраваны ў “дэпутаты” ў перадпенсійным узросце.

Зразумела, што смяротнасць па ўсёй Беларусі даўно перавышае нараджальнасць і прамой віны Валерыя Малашкі ў гэтым няма, а тое, што адбываецца, з’яўляецца вынікам трыццацігадовай дзейнасці Лукашэнкі. Менавіта ён давярае будучыню краіны такім, як Малашка. А ўжо тыя, адчуваючы поўную беспакаранасць, маюць яшчэ і нахабства разважаць пра здароўе нацыі.

Фота “Беларусь Сегодня”.

Магілёўскія дактары добра зарабляюць

Навіна ад

Дактары – ў шакаладзе, заробак медыкаў Магілёўшчыны – самы высокі ў краіне.

Паводле звестак Myfin.by, урачы Магілёўскай вобласці абагналі па ўзроўні сярэдніх заробкаў нават сталіцу.

У хвасце ж зарплатнага рэйтынгу чамусьці цягнуцца медыкі самых, здавалася б, дабрабытных абласцей краіны – Гродзенскай і Брэсцкай.

Статыстыка выглядае так:

  • Магілёўская вобласць – 4129 рублёў;
  • Мінская вобласць – 4029,4 рубля;
  • Віцебская вобласць – 3909,1 рубля;
  • Гомельская вобласць – 3865 рублёў;
  • Гродзенская вобласць – 3618,8 рубля;
  • Брэсцкая вобласць – 3603,4 рубля.

Праўда, прыведзеныя лічбы адлюстроўваюць заробак да выліку падаткаў і ўзносаў. Таксама трэба ўлічваць, што сярэдні заробак адлюстроўвае хутчэй звышдаходы кіраўніцтва, чым агульны дабрабыт.

Фота ілюстрацыйнага характару з адкрытых крыніц.

“I said YES” – Крысціна Ціманоўская выходзіць замуж

Навіна ад

Ураджэнка Клімавічаў, сусветна вядомая спартсменка Крысціна Ціманоўская паведаміла аб згодзе выйсці замуж пасля болеснага растання з былым мужам.

Ціманоўская, якая цяпер выступае за Польшчу, апублікавала ў сваім Інстаграме фота з заручальным пярсцёнкам. Яе жаніх – Аляксандр Салонскі, з якім спартсменка пачала сустракацца пасля разводу.

Прапанову рукі і сэрца Крысціна атрымала ў Цэнтральным парку Нью-Йорка. Мяркуючы па фота лёгкаатлеткі, Аляксандр Салонскі падарыў ёй пярсцёнак з дыяментам ад вядомага брэнда Tiffany, мяркуе “Зеркало”.

“I said YES” – напісала Крысціна пад фота.

Пасля скандалу на Алімпіядзе ў Токіа ў 2021 годзе, калі беларускую спартсменку спрабавалі гвалтоўна вывезці з Японіі, Ціманоўская пераехала ў Польшчу. Туды ж перабраўся і яе муж – трэнер па фітнесу Арсень Зданевіч. Але праз пару гадоў пара рассталася. Пра рашэнне развесціся з мужам Ціманоўская абвясціла ў верасні 2023 года. Праз паўгода развод адбыўся і Крысціна назвала гэты дзень лепшым у сваім жыцці.

У траўні 2025 года Ціманоўская заявіла, што яе былы муж Арсень Зданевіч супрацоўнічае з КДБ. Паводле спартсменкі, калісьці яна сама хадайнічала перад польскім прэзідэнтам аб прадастаўленні грамадзянства не толькі сабе, але і свайму мужу. Па яе словах, тады ён быў для яе важнай эмацыйнай і маральнай апорай.

Потым сітуацыя змянілася кардынальна. Былы муж спартсменкі, які з’ехаў у Беларусь, адмаўляецца ад польскага грамадзянства, заяўляючы, што яно яму «ніколі не было патрэбнае». 

Пасля таго як Зданевіч апынуўся ў Беларусі, Ціманоўская хацела, каб лукашысты схапілі яго за фатаграфаванне з бел-чырвона-белым сцягам.

Восенню 2024 года лёгкаатлетка пераехала ў ЗША. На той момант яна ўжо сустракалася з Аляксандрам Салонскім.

Фотаздымак: Інстаграм Крысціны Ціманоўскай

У Касцюковічах спрабуюць вырашыць праблему са стаматалогіяй

Навіна ад

Жарсці вакол стаматалагічнага абслугоўвання насельніцтва ў Касцюковічах улегліся ці чакаць новага вітка абурэння? У горадзе, дзе стаматалагічная паліклініка прымала запісы на прыём усімі магчымымі і немагчымымі спосабамі, але выдавала ўсяго 12 талонаў у дзень на ўвесь раён, нешта, здаецца, змянілася.

Прынамсі, так лічыць раённая газета, якая паведаміла, што з 1 студзеня:

  • запіс на тэрапеўтычны прыём «сёння на заўтра» ажыццяўляцца не будзе;
  • выдача талонаў да ўрача-стаматолага-тэрапеўта, зубнога фельчара будзе адбывацца па папярэднім запісе пры непасрэдным звароце ў рэгістратуру і па тэлефоне на працягу ўсяго працоўнага дня з 8.00 да 20.00. Запіс адкрыты на 3 месяцы наперад;
  • ёсць магчымасць запісацца праз інтэрнэт у медыцынскай інфармацыйнай сістэме «Лекар»;
  • хірургічны прыём стаматалагічных пацыентаў ажыццяўляе зубны фельчар, талоны выдаюцца «сёння на заўтра» ў 17.00 па тэлефоне;
  • пацыенты з вострым болем прымаюцца ў дзень звароту.

Пра тое, што прынцып «сёння на заўтра» трэба тэрмінова адмяняць, ўжо казала намеснік старшыні райвыканкама па сацыяльных пытаннях Валянціна Манушэнка.

І вось мары замстаршыні спраўдзіліся. Толькі вось як гэта палепшыць сітуацыю ў паліклініцы, якая выдае 12 талонаў у дзень, незразумела. Праблема “дванаццаці”, звязаная перш за ўсё з недахопам кадраў, нікуды не знікне.

Падаецца, што аналітычныя здольнасці Манушэнкі даюць збой, і даводзіцца пераходзіць да больш простых прыкладаў. Накшталт таго, што са скуры аднаго зайца можна пашыць і сем шапак, але зусім маленькіх.

Фота раённай газеты.

У Крычаве з’явілася выданне пра гісторыю мясцовай футбольнай каманды

Навіна ад

Спартыўны краязнавец з Крычава Сяргей Пятроў падрыхтаваў і выдаў брашуру, прысвечаную выступленню мясцовай каманды «Сож» ў чэмпіянаце Рэспублікі Беларусь па футболе ў другой лізе.

 “У ёй сабраныя не толькі статыстычныя даныя пра выступленне каманды “Сож”, але і падрабязныя агляды матчаў, падрыхтаваныя журналістамі раённых газет тых мясцін, дзе праходзілі гульні «Сажа». Чытачы змогуць акунуцца ў атмасферу кожнага матчу, а таксама даведацца пра найлепшыя моманты, якія запомніліся гледачам і заўзятарам” – распавядае пра новае выданне раённая газета “Крычаўскае жыццё”.

Адзначым, што для Беларусі гэта адметная падзея, бо рэгіянальным спортам ў нашай краіне займаецца вельмі малая колькасць людзей, а тым больш рыхтуе спецыялізаваныя выданні. У сваю чаргу Сяргей Пятроў вядомы спартыўным краязнаўцам і гісторыкам беларускага футбола як аўтар выданняў “Страницы футбольной истории Кричева” і “Четыре памятных сезона”, якія прысвечаны гісторыі футбола ў Крычаве.

Крысціна Ціманоўская вярнулася спаборнічаць у Японію

Навіна ад

Ураджэнка Клімавічаў Крысціна Ціманоўская зноў прымае ўдзел у забегу ў Японіі, толькі цяпер пад польскім сцягам.

Забег у чатыры гады

13 верасня 2025 года ў Токіа стартаваў Чэмпіянат свету па лёгкай атлетыцы. Крысціна Ціманоўская прымае ў ім удзел – яна выступіць у жаночай эстафеце 4×100 м. Разам з ёй у каманднай заяўцы ад Польшчы фігуруюць Эва Свабода, Магдалена Нямчук, Аляксандра Піятроўская, Магдалена Стэфановіч, Марлена Гранашэўская (з іх на дарожку выйдуць толькі чацвёра, калі не здарыцца якога форс-мажора), піша выданне «Трыбуна».

Папярэднія забегі пройдуць 20 верасня, фінал жа прызначаны на 21-е.

Спартсменка прыехала на другі чэмпіянат свету разам са зборнай Польшчы (у 2023-м быў Будапешт). Увогуле ж гэта трэці турнір такога рангу у кар’еры Ціманоўскай агулам (Доха-2019 прайшла пад чырвона-зялёным сцягам).

На сёння ўраджэнка Клімавічаў з’яўляецца дзейнай чэмпіёнкай Польшчы на дыстанцыі 100 метраў (11,38). Тытул яна ўзяла ў жніўні пры адсутнасці траўмаванай зоркі польскага спрынту Эвы Свабоды. 11,38 сек дазволілі ўзяць тытул, але не дазволілі адабрацца на Чэмпіянат свету ў індывідуальную праграму.

Нагадаем, чатыры гады таму Крысціна Ціманоўская пакідала Токіа пад прыкрыццём дыпламатаў. У жніўні 2021-га, падчас Алімпійскіх гульняў у Японіі, лукашэнкаўская дэлегацыя спрабавала прымусам вывезці спрынтарку пасля таго, як яна публічна паскардзілася на тое, што яе без згоды ўнеслі ў склад няпрофільнай эстафеты 4 па 400 метраў. У аэрапорце Ціманоўская адмовілася сядаць у самалёт, папрасіла абароны ў японскай паліцыі і атрымала гуманітарную візу ў амбасадзе Польшчы. У гэтай краіне яна паспяхова працягнула сваю спартыўную кар’еру.

Што робіць Ціманоўская ў Токіа па-за спортам?

«Я другі раз у Японіі, але гэты найлепшы» – напісала спартсменка ў Instagram неўзабаве пасля прылёту ў Токіа.

Яна як заўжды актыўнічае ў сацсетках. Атлетка паказвае «закуліссе» чэмпіянату. Вельмі радавалася гасціннасці японцаў, якія трымаюць бясплатныя парасоны ля выхадаў з гатэля і мацоўні. Таксама адзначае імкненне мясцовых да чысціні, таму «ў залю мы ходзім у тапачках».

Сюрпрызам для бягухі сталі нізкія ўмывальні, разлічаныя пад не вельмі высокіх у параўнанні з еўрапейкамі японак.

У адным з апошніх ролікаў Ціманоўская паказала «распакаванне» падарункаў ад арганізатараў – на топ-турнірах прынята адорваць удзельнікаў. 

Акрамя таго, Ціманоўская катаецца на метро, каштуе мясцовую кухню. 

Скрыншот: Instagram Ціманоўскай