Tag: Магілёўская вобласць

У Магілёўскай вобласці сілавікі пужаюць студэнтаў рэпрэсіямі

Навіна ад

ВНУ Магілёўшчыны ператвараюцца ў пляцоўкі для ідэалагічнай апрацоўкі, пагроз за “экстрэмісцкія” падпіскі і ўдзел у пратэстах.

 

У Горацкай дзяржаўнай сельскагаспадарчай акадэміі 19 лютага прафесарска-выкладчыцкі склад сабралі ў актавай зале на сустрэчу з пракурорам раёна Аляксандрам Тарасюком. Тэма яго выступу гучала як «правапарушэнні экстрэмісцкай накіраванасці і адказнасць за іх здзяйсненне», аднак фактычна гаворка ішла пра папярэджанні і запалохванне.

 

Мерапрыемства прайшло ў фармаце так званага тлумачальна-інфармацыйнага сходу. Выкладчыкам фактычна даручылі праводзіць «прафілактычную працу» са студэнтамі, каб не дапусціць «радыкалізацыі і прапаганды экстрэмісцкіх ідэй». У беларускіх рэаліях пад «радыкалізацыяй» улады разумеюць любую праяву палітычнай нелаяльнасці. Пракурор прыводзіў прыклады канкрэтных прысудаў па палітычна матываваных справах як папярэджанне пра наступствы для тых, хто не падзяляе афіцыйную пазіцыю.

 

Ужо на наступны дзень падобная сустрэча адбылася ў Магілёве, у Беларуска-расійскім універсітэце (БРУ), дзе стартавала штогадовая прававая дэкада «Мы і закон». Перад студэнтамі выступіў старшы інспектар па асаблівых даручэннях упраўлення аховы правапарадку і прафілактыкі УУС Магілёўскага аблвыканкама падпалкоўнік міліцыі Аляксандр Волкаў.

 

Ён папярэджваў пра крымінальную і адміністрацыйную адказнасць за «экстрэмісцкую дзейнасць», удзел у несанкцыянаваных мерапрыемствах і нават за распаўсюджванне матэрыялаў, уключаных у спіс «экстрэмісцкіх». На практыцы ў Беларусі да такіх матэрыялаў адносяць незалежныя медыя і тэлеграм-каналы, а падставай для пераследу становяцца нават падпіскі ў сацыяльных сетках.

 

Аляксандр Волкаў раней неаднаразова фігураваў у кантэксце палітычна матываваных рэпрэсіўных дзеянняў супраць жыхароў Магілёва. Яго выступ у ВНУ выглядаў як працяг агульнанацыянальнай кампаніі запалохвання, калі замест прававой асветы студэнтам дэманструюць прыклады пакарання за іншадумства.

 

Такім чынам, замест дыскусіі пра закон і правы чалавека студэнтам прапануюць урокі лаяльнасці. Універсітэты, якія павінны быць прасторай свабоднай думкі, усё больш становяцца часткай сістэмы кантролю і прафілактыкі «няправільных» поглядаў.

 

Фотаздымак: Mayday

Пракурор Магілёўскай вобласці абмежаваў доступ да двух інтэрнэт-рэсурсаў

Навіна ад

Ох, ужо гэтыя палякі! Доступ да двух інтэрнэт-рэсурсаў абмежаваны пастановай пракурора Магілёўскай вобласці.

Пракурор Магілёўскай вобласці прымяніў людажэрскі закон «Аб супрацьдзеянні экстрэмізму» да інтэрнэт-рэсурсаў terra-group.pl і ssl-production.pl

Уладальнікі рэсурсаў раней прызнаныя экстрэмісцкім фарміраваннем.

Функцыянаванне гэтых інтэрнэт-рэсурсаў, нібыта, супярэчыла інтарэсам дзяржавы, як гэта вызначана ў Канцэпцыі нацыянальнай бяспекі Рэспублікі Беларусь, іх дзейнасць была звязаная з пасягальніцтвам на асновы суверэнітэту і непахіснасць канстытуцыйнага ладу краіны.

Нагадваем, што з-за інтарэсаў “нацыянальнай бяспекі” ў Беларусі з 2020 года актыўна выкарыстоўваецца такі юрыдычны нонсэнс, як зваротная сіла закона, суддзяў прызначае Лукашэнка, які перапісвае Канстытуцыю краіны ў выгоду асабістым патрэбам.

 

Фота ілюстрацыйнага характару з адкрытых крыніц.

У кіраўніка магілёўскіх “дэпутатаў” Гарошкіна 48 гектараў аптымізму

Навіна ад

У Магілёўскай вобласці зноў усё расце. Прынамсі ў дакладах. Пракуратура прытрымліваецца іншага меркавання.

На чарговай, аж дваццаць першай сесіі магілёўскага абласнога “савета дэпутатаў” ужо дваццаць дзявятага склікання старшыня Аляксандр Гарошкін надаў асаблівае месца ў сваім справаздачным выступленні вынікам года добраўпарадкавання. Лічбы прагучалі ўражліва.

У вобласці высаджана:

  • 65 тысяч дрэў;
  • 86 тысяч кустоў;
  • 3,7 мільёна кветак;
  • амаль 48 гектараў новых газонаў.

Слухаючы гэта, хочацца не правяраць, а верыць. Бо 48 гектараў – гэта ўжо не клумба ля пад’езда, гэта амаль батанічны прарыў. Амаль невялікі нацыянальны парк.

Але па лукашэнкаўскай традыцыі пасля натхняльных лічбаў звычайна ідзе другі акт – проза жыцця.

Нагадаем, чым скончылася хваля зялёнага энтузіязму-2025 у абласным цэнтры паводле меркавання пракуратуры.

На кальцы вуліц Каштанавай і Крупскай па дакументах павінна была расці густая жывая агароджа з бірючыны – больш за 200 кустоў. Пракуратура разам са спецыялістамі абышла ўсё кальцо. Ніводнага куста. Калі камунальнікаў папрасілі паказаць, дзе менавіта гэта агароджа, паказваць аказалася няма чаго. Бірючына існавала выключна ў справаздачнасці.

На праспекце Шміта за два гады «высадзілі» 600 дрэў. У гэтай пасадцы ўдзельнічала паплечніца Гарашкіна – сенатар і галоўны рэдактар інфармагенцтва “Магілёўскія ведамасці” Ірына Пятрусевіч. Яна там пазіравала з лапатай. Пракурорская ж праверка паказала: калі што і вырасла, то толькі пустазелле вышэй чалавечага росту. Дрэвы – не.

Ля дома № 8 па вуліцы Крывуліна нібыта пасадзілі 79 туй. Знайшлі дзесяць. Астатнія, верагодна, пайшлі ў тую ж зялёную зону, што і бірючына.

Усё гэта прыпіскі толькі «Магілёўзелянбуду». А колькі іх было ў вобласці?

Адказ просты: гектары хлусні і цэнтнеры прыпісак.

 

Фота “Магілёскія ведамасці”.

На Магілёўшчыне на чыгунцы значна ўзрасла колькасць смяротных выпадкаў

Навіна ад

Стала вядомая статыстыка нясчасных выпадкаў на БЧ за 2025 год. У Магілёўскім аддзяленні адзначаецца найвялікшы ўзровень траўматызма.

 

Згодна інфармацыі “Супольнасці чыгуначнікаў Беларусі”, усяго ў краіне летась загінулі тры работнікі чыгункі. Два з іх працавалі ў Магілёўскім аддзяленні. У 2024 годзе на Магілёўшчыне смяротных выпадкаў траўміравання не было. Акрамя таго, у Магілёўскім аддзяленні меў месца нясчасны выпадак з цяжкім зыходам. Пазалетась такіх выпадкаў было тры. 

 

Як адзначаецца ў прыведзеным “Супольнасцю” аналізе стану аховы працы, прамысловай бяспекі, аховы здароўя работнікаў на Беларускай чыгунцы за 2025 год, найбольш высокі ўзровень траўматызма (53% ад усіх нясчасных выпадкаў) адзначаецца ў Брэсцкім і Магілёўскім аддзяленнях.

 

Акрамя таго, у гаспадарцы электрыфікацыі і электразабеспячэння адбылося два нясчасныя выпадкі са смяротным зыходам з работнікамі Брэсцкай і Магілёўскай дыстанцый электразабеспячэння.

 

Да таго ж у сельскагаспадарчым дачынным прадпрыемстве “Авангард” Магілёўскага аддзялення меў месца нясчасны выпадак са смяротным зыходам з кіроўцай аўтамабіля.

 

У аналізе адзначаецца, што ў Брэсцкім і Магілёўскім аддзяленнях незадавальняючая арганізацыя работы па сістэме кіравання аховай працы і фармальны падыход у шэрагу структурных падраздзяленняў, дзе назіраецца наўпроставая прычынна-выніковыя сувязі паміж невыкананнем патрабаванняў аховы працы і ростам траўматызма.

 

У якасці прыкладу прыводзіцца тое, што ў Магілёўскай дыстанцыі грамадзянскіх збудаванняў нізкі ўзровень арганізацыі работы па забеспячэнні бяспечных умоў працы (у гаражах пры працуючых машынах не адчыняюцца дзверы, у бляшаным цэху складзіраваны лісты бляхі на праходзе і г.д.). У той жа час у Крычаўскай дыстанцыі пуці не абсталявана працоўнае месца па наплаўцы рэек. 

 

Сярод іншых праблем, якія выявіліся ў Магілёўскім аддзяленні, гэта незадавальняючая праца камісій структурных падраздзяленняў па кантролю якасці выдаваемых працаўнікам сродкаў індывідуальнай аховы. Таксама маюцца недахопы ў санітарна-бытавым забеспячэнні.

 

Што ж тычыцца прамысловай бяспекі, то і тут Магілёўскае аддзяленне сярод праблемных.  Напрыклад, у 2025 годзе зацверджаныя спісы небяспечных аб’ектаў, якія трэба было абследаваць, выконваліся не ў поўным аб’ёме. 

 

У сувязі з ростам траўматызму ў гаспадарцы электрыфікацыі і электразабеспячэння БЧ быў праведзены шэраг адпаведных мерапрыемстваў, аднак у Магілёўскай дыстанцыі электразабеспячэння чамусьці не набылі манекен-трэнажор для адпрацоўкі навыкаў аказання сардэчна-сасудзістай рэанімацыі. Адзначаецца і недахоп кадраў, так Магілёўскай дыстанцыі электразабеспячэння з кастрычніка 2025 года вакантна пасада спецыяліста па ахове працы.

 

За ўвесь 2025 года на БЧ адбылося 105 выпадкаў пагаршэння здароўя работнікаў на працоўных месца (у 2024 годзе – 94). Пры гэтым у Магілёўскім аддзяленні – 19. Больш толькі ў Баранавіцкім – 29. 

 

Як падагульняе “Супольнасць чыгуначнікаў Беларусі”, у цэлым становішча з забеспячэннем норм і ўмоў аховы працы на БЧ не змянілася. Па-ранейшаму назіраецца перапіска дзеля перапіскі і стварэнне віду бурлівай дзейнасці замест распрацоўкі і ўкаранення сапраўды неабходных і эфектыўных, у тым ліку тэхнічных, мер, накіраваных на папярэджанне і выключэнне вытворчага траўматызму.

 

Фотаздымак: “Супольнасць чыгуначнікаў Беларусі”

Два прадпрыемствы Магілёўскай вобласці выкрыты ў ўхіленні ад падаткаабкладання

Навіна ад

Магілёўскія падаткавікі выявілі схемы ўхілення ад падаткаў і вярнулі грошы ў бюджэт.

Магілёўская прыватная ўстанова, якая аказвае медыцынскія паслугі, фінансавала набыццё абсталявання на індывідуальнага прадпрымальніка.

Затым арандавала яго ў яго ж – па цэнах, якія шматкроць перавышаюць кошт самога абсталявання. Так кампанія штучна завышала выдаткі і заніжала падатак на прыбытак.

За 3,5 года сума фіктыўных выдаткаў склала 593,5 тысячы рублёў. 

Парушэнне выявілі супрацоўнікі інспекцыі МПЗ па Ленінскім раёне Магілёва.

Установа добраахвотна пералічыла ў бюджэт недастаючыя 118,7 тысячы рублёў.

Другі выпадак выяўлены ў Касцюковіцкім раёне пры праверцы ў сувязі з ліквідацыяй таварыства з абмежаванай адказнасцю, якое займалася апрацоўкай драўніны. Прадпрыемства выплачвала зарплату «ў канвертах» работнікам, з якімі не былі аформлены працоўныя адносіны, і не адлюстроўвала гэтыя выплаты ва ўліку. Мэта – пазбегнуць выплаты падаходнага падатку. Па выніках праверкі падатковая база скарэкціравана, даналічаныя падаткі і пені спагнаны ў бюджэт.

 

Фота ілюстрацыйнага характару з адкрытых крыніц.

На Магілёўшчыне ўдарылі па падзяжы жывёлы рабочымі групамі

Навіна ад

Змянілі падыходы і персанал. Апублікаваны пакрокавы план выратавання кароў у Магілёўскай вобласці – на фермы прыедуць чыноўнікі.

У Магілёўскай вобласці фіксуецца істотны рост падзяжу падзеж буйной рагатай жывёлы у студзені ў параўнанні з мінулым годам. 

У адказ на гэта аблвыканкам стварыў мабільныя рабочыя групы, якія выязджаюць у гаспадаркі і кансультуюць спецыялістаў па пытаннях утрымання, кармлення і вакцынацыі жывёлы.

І вось асобныя гаспадаркі ўжо справаздачацца пра паляпшэнні – у «АСБ-Агра Цяцерына» падзеж цялят скараціўся з 14 да 3 галоў у месяц у параўнанні са студзенем мінулага года. 

Пасля рэканструкцыі памяшканняў і змены моцна п’ючага персаналу на ўмерана п’ючы персанал у іншых комплексах арганізаваны кругласутачныя дзяжурствы, закуплены цеплавыя гарматы, павялічана кратнасць выпойвання. 

Ужыта іншыя хітрыкі.

Але вось пытанне: для каго напісаны гэты справаздачны тэкст? Сэнсавую нагрузку ён нясе толькі для начальства. Гэта – чыноўніцкая страхоўка на выпадак, калі падзеж не спыніцца. 

Паглядзіце, мы не сядзелі склаўшы рукі – стваралі групы, выязджалі, кансультавалі, аналізавалі, распрацоўвалі праграмы.

Калі заўтра жывёла працягне дохнуць, у аблвыканкама будзе гатовы адказ для Лукашэнкі: меры прымаліся, пратаколы складаліся, рэкамендацыі даваліся.

Зноў не атрымалася. Нічога, у наступны раз зайдзем з іншага боку! І так трыццаць гадоў.

І пакуль рабочыя групы ствараюць бачнасць бурнай дзейнасці, пракуратура паказвае, што на фермах нічога не мяняецца.

 

Фота ілюстрацыйнага характару з адкрытых крыніц.

Пракуратура знайшла шматлікія парушэнні ў лясной гаспадарцы Магілёўшчыны

Навіна ад

На Магілёўшчыне дзевяць дырэктараў лясгасаў прыцягнуты да адказнасці за парушэнні парадку ўліку драўніны.

 

Сярод парушальнікаў – два лясніцтвы Клімавіцкага лясхоза. Там пракуроры выявілі водпуск прадукцыі па 11 ордэрам на нарыхтоўку драўніны агульным аб’ёмам звыш 417 куб.м, якія не былі ўнесены ў адзіную сістэму ўліку.

 

У сваю чаргу Бабруйскі лясгас заключыў з прыватным прадпрыемствам дамову куплі-продажу, якой была прадугледжана 100%-ая перадаплата лесапрадукцыі, аднак цалкам аплана не была здзейснена і гэта пацягнула запазычанасць перад лясгасам.

 

А Касцюковіцкі лясгас цягам шасці гадоў не прымаў ніякіх мер па спагнанні праз суд з сялянскай фермерскай гаспадаркі запазычанасці за пастаўленую драўніну. Акрамя таго, пры недастатковым росце і колькасці дрэў неабгрунтавана пераводзіліся землі ў катэгорыю пакрытых лесам.

 

Па гэтых і іншых парушэннях генеральнаму дырэктару Магілёўскага дзяржаўнага вытворчага лесагаспадарчага аб’яднання ўнесена прадстаўленне, па выніках разгляду якога шэраг службовых асоб, у тым ліку дзевяць дырэктараў лясгасаў, прыцягнуты да матэрыяльнай і дысцыплінарнай адказнасці.

 

Фотаздымак: Генеральная пракуратура

Дырэктар прадпрыемства, якое дапамагае калгасам Магілёўшчыны бяднець, атрымаў падзяку

Навіна ад

Кіраўнік адміністрацыі Лукашэнкі падзякаваў спецыялісту па абдзіранні калгасаў Магілёўскай вобласці “за шматгадовую добрасумленную працу, высокі прафесіяналізм, актыўную грамадскую дзейнасць”.

Дырэктар ААТ «Задняпроўскі міжрайаграсэрвіс» Алег Грудаў атрымаў падзяку кіраўніка адміністрацыі Лукашэнкі за верную службу.

У адказ Грудаў паведаміў, што ў мінулым годзе намалаціў шмат кукурузы і амаль падрыхтаваў усю тэхніку вобласці да сяўбы. Гатоўнасць жа чатырох механізаваных атрадаў, па словах дырэктара, дасягнула 99 працэнтаў.

Прадпрыемства Грудава вядома тым, што ўжо не проста купляе, рамантуе і перапрадае тэхніку аграрыям, а паступова выключае калгасы з харчовага ланцужка, наўпрост засяваючы і ўбіраючы іх палі.

Нагадваем, што ААТ «Задняпроўскі міжрайаграсэрвіс» манапаліст паставак запасных частак да сельгастэхнікі магілёўскага АПК.

Калі калгас не ў стане аплаціць паслугі сэрвісу, “памочнік” гатовы прыняць у аплату будучы ўраджай або купіць няспраўны камбайн, каб пасля рамонту прадаць яго прадпрыемству па іншай цане.

Гэтая схема абдзірання калгасаў настолькі простая і элегантная, што яе наадрэз адмовіліся прымяняць у перадавых абласцях краіны.

Пераймаць вопыт Грудава згодна толькі Віцебская вобласць, якая, як вядома, згодна ўжо на ўсё.

А на Магілёўшчыне сэрвіс бярэ новыя вышыні – у будучым годзе на палях Быхаўшчыны Грудаў збіраецца засеяць кукурузай дзве тысячы гектараў і павялічыць плошчы пасеваў азімага рапсу з 270 да 500 га.

Пільная ўвага Алега Грудава да Быхава тлумачыцца тым, што там ён пачынаў сваю кар’еру ў якасці старшыні калгаса “Ямнае”.

Дырэктару ААТ «Задняпроўскі міжрайаграсэрвіс» добра вядомыя мясцовыя звычаі. Настолькі, што незаконна ўсталяваны ў двары шматкватэрнага дома парковачны вузел давялося дэмантаваць з дапамогай аблвыканкама. 

Феадальную паркоўку ўсталявала баявая сяброўка Грудава, якая заявіла суседзям, што яе сувязі дазваляюць ёй рабіць усё, што ўздумаецца.

Як мы бачым, аўтарытэт Алега Аляксандравіча працягвае ўмацоўвацца. Магчыма, што вельмі хутка панскія замашкі яго сяброўкі не зможа спыніць і “губернатар” Ісачанка.

 

Фота “Магілёўскія ведамасці”.

Падлічаны патрыёты Магілёўскай вобласці і тыя, хто сумняваецца

Навіна ад

Ідэолаг Музычэнка паведаміла пра колькасную перавагу патрыётаў у Магілёўскай вобласці і расказала пра гэта студэнтам архітэктурнага каледжа.

На адзіны дзень інфармавання ў архітэктурна-будаўнічы каледж БРУ прыехала начальніца галоўнага ўпраўлення ідэалагічнай работы і па справах моладзі аблвыканкама Кацярына Музычэнка.

Яна распавяла педагогам і навучэнцам пра ўзброеныя сілы, а таксама паведаміла, што “ў нашай Магілёўскай вобласці патрыётаў значна больш, чым тых, хто сумняваецца ва ўласнай дзяржаве”.

Дакладных суадносін лічбаў ідэолаг не назвала, але, мяркуючы па тварах студэнтаў, яны не падзялілі аптымізму прапагандысткі і відавочна засумняваліся ў аргументах Музычэнкі.

Напрыканцы Кацярына Анатольеўна заявіла, што яе ведамства працуе з “велізарнай колькасцю” блогераў, якія асвятляюць дзяржаўную павестку.

Калі ж усё-такі не верыць псеўдапатрыятычным заявам Музычэнкі, а зазірнуць у “Тык-Ток”, то колькасць тых, хто “топіць” за ўладу, не такая ўжо і вялікая. Тыя, хто сумняваецца і спачувае, таксама ёсць, а вось тых, хто не жадае мець з рэжымам Лукашэнкі нічога агульнага, – пераважная большасць.

 

Фота “Магілёўскія ведамасці”.

Сярэдні заробак настаўнікаў Магілёўшчыны склаў 2,5 тысячы рублёў?

Навіна ад

Зарплата настаўнікаў Магілёўскай вобласці вырасла на чвэрць за год, сцвярджае чыноўніца, якая курыруе сферу адукацыі.
Цуды, калі ўжо пачынаюцца, іх ужо не спыніш. Спачатку Лукашэнка аглушыў грамадзян паведамленнем аб існаванні Беларусі, у якой сярэдняя зарплата дасягнула 886 долараў, а цяпер па прыкладу галоўнага фантазера краіны ідуць чыноўнікі на месцах. Яны таксама збалансавалі патокі хлусні.
На сумесным пасяджэнні калегіі галоўнага ўпраўлення па адукацыі і камісіі па справах непаўналетніх Магілёўскага аблвыканкама начальнік галоўнага ўпраўлення па адукацыі Людміла Здорыкава, паведаміла, што:

  • настаўнікі атрымліваюць у сярэднім 2,5 тысячы рублёў – рост 126,8% да мінулага года;
  • выхавальнікі дашкольных устаноў атрымліваюць 1,7 тысячы рублёў – рост 125,9% да мінулага года.

Дзе працуюць шчасліўчыкі з такой зарплатай, Здорыкава не ўдакладніла, але, падобна, шукаць гэтых педагогаў трэба ў тых жа месцах, дзе жывуць беларусы з зарплатай у 900 долараў.
Значна больш рэалістычнымі прагучалі іншыя лічбы са справаздачы Людмілы Здорыкавай.
У 2025 годзе было закрыта дзевяць дзіцячых садоў і сем школ, яшчэ два сады далучаны да школ, а тры ўстановы дадатковай адукацыі рэарганізаваны. Настаўнікі настаўнікамі, але чыноўнікі сферы адукацыі, здаецца, сваю справу ведаюць туга.

Фота “Магілёўскія ведамасці”.