Tag: Магілёўская вобласць

На 23 прадпрыемствах Магілёўшчыны затрымлівалі зарплату, на дзесяці была няпоўная занятасць

Навіна ад

Справаздача магілёўскіх прафсаюзаў павінна была паказаць іх добрую працу, але замест гэтага прадэманстравала жаласны стан эканомікі вобласці.

У Магілёве на пасяджэнні Савета прэзідыума абласнога аб’яднання прафсаюзаў прагучалі статыстычныя даныя, якія чыноўнікі звычайна замоўчваюць.

Дваццаць тры прадпрыемствы вобласці дапускалі парушэнні па зарплаце, а 10 працавалі ў рэжыме няпоўнай занятасці.

Не навіна, што найбольшая колькасць выпадкаў затрымак зарплаты і няпоўнай занятасці была зафіксавана ў арганізацыях АПК, але “асобныя эпізоды” парушэнняў адзначаліся і на прамысловых прадпрыемствах.

Апраўданне затрымак зарплаты – складанае фінансавае становішча або арышт рахункаў. А няпоўная занятасць звязана з:

  • санкцыйнымі абмежаваннямі;
  • скарачэннем заказаў;
  • пошукам новых рынкаў збыту;
  • аптымізацыяй вытворчасці.

Атрымліваецца, што насуперак бадзёрым заявам уладаў санкцыі не ўзмацнілі нашу эканоміку, заказы, нягледзячы на цеснае сяброўства з Расіяй, скараціліся, а славутая афрыканская дуга служыць толькі для таго, каб эканамічная “эліта” пагрэлася на сонейку.

Зрэшты, панікаваць не варта. Бо напрыканцы нарады прафсаюзныя дзеячы асцярожна адзначылі: у шэрагу выпадкаў сітуацыю ўдалося стабілізаваць. Праўда, лічбавага апісання гэтага шэрагу ніхто не даў.

Фота: “Магілёўскія ведамасці”.

На Магілёўшчыне вызначаюць “Дні цвярозасці” 2026 года

Навіна ад

У Магілёўскай вобласці першымі ў краіне мясцовыя ўлады пачалі вызначаць даты правядзенне ў раёнах “Дзён цвярозасці”.

Своеасаблівае спаборніцтва паміж раёнамі вобласці разгарнулася па вызначэнні сёлетніх “Дзен цвярозасці”. Першым паспеў стаць Круглянскі раён. Там продаж спіртных напояў абмежаваны на працягу сутак 7 лютага (ужо прайшло) і 1 верасня, таксама 13 чэрвеня, калі ў школьнікаў будуць праводзіцца выпускныя вечары.

У Бабруйску антыалкагольныя акцыі пройдуць 26 сакавіка, 12 чэрвеня, 27 жніўня і 26 лістапада з 00:00 да 24:00.

Больш за ўсё пакуль “Дзён цвярозасці” на Шклоўшчыне. У гэтым раёне такімі днямі вызначаны ажно пяць – 7 красавіка, 25 і 29 траўня, 1 верасня і 12 чэрвеня, калі ў школьнікаў пройдзе “першы званок” і выпускныя вечары. У гэтыя дні продаж алкаголю будзе абмежаваны на працягу сутак.

А вось мсціслаўскія ўлады лічаць, што хопіць і двух “Дзён цвярозасці” ў год. Сёлета там такімі будуць 25 траўня і 1 верасня, то бок канец і пачатак навучальнага года.

Іншыя раёныы пакуль вызначаюцца, калі ў гэтым годзе абмежаваць продаж алкаголю ў гандлёвых кропках. Прычым гэтыя абмежаванні таксама не будуць распаўсюджвацца на продаж алкагольных напояў на разліў у аб’ектах грамадскага харчавання, а таксама рознічнымі гандлёвымі аб’ектамі для правядзення рытуальных абрадаў і вясельных урачыстасцяў.

Фотаздымак з адкрытых крыніц

У ЖКГ Магілёўшчыны значна вырас траўматызм

Навіна ад

З 14 да 24 выпадкаў вытворчага траўматызма стала больш у 2025 годзе ў параўнанні з 2024-м у сферы ЖКГ Магілёўскай вобласці.

Калі ў 2024 годзе было зафіксавана 14 няшчасных выпадкаў, аформленых актамі формы Н-1, то ў 2025 годзе іх колькасць павялічылася да 24. Пры гэтым на прадпрыемствах галіны адбылося два смяротныя выпадкі і шэсць інцыдэнтаў, кваліфікаваных як цяжкія. Пра гэта заявіла ў Магілёве на пасяджэнні прэзідыума абласной арганізацыі прафсаюза работнікаў ЖКГ і сферы абслугоўвання тэхнічны інспектар працы Юлія Дайнэка.

“Па выніках расследаванняў мы бачым, што каля 59% няшчасных выпадкаў звязаны з нізкай вытворчай дысцыплінай саміх пацярпелых і іх асабістай неасцярожнасцю. – канстатавала Дайнэка – Яшчэ 23% здарэнняў адбываюцца з-за невыканання кіраўнікамі сваіх абавязкаў па стварэнні бяспечных умоў, уключаючы допуск супрацоўнікаў да працы без службовага навучання і кантролю”.

Высвятлена, што найбольш уразлівай да траўм катэгорыяй сталі супрацоўнікі старэйшыя за 40 гадоў, на долю якіх прыйшлося больш за 79% усіх няшчасных выпадкаў з цялеснымі пашкоджаннямі. Таксама пераважная большасць пацярпелых – мужчыны (83%).

Выява з адкрытых крыніц

На Магілёўшчыне больш чым удвая вырасла шкода ад незаконнага палявання

Навіна ад

Браканьеры Магілёўскай вобласці бяруць не колькасцю, а “якасцю” здабычы, а следчыя папярэджваюць – можаце страціць і аўтамабіль, і свабоду.

У Магілёўскай вобласці шкода ад браканьерства за 2024-2025 гады вырасла больш чым удвая: з 59 120 да 126 960 рублёў. І гэта пры амаль нязменнай колькасці крымінальных спраў: 14 і 13 адпаведна.

Прычына – пераход да палявання на ахоўныя віды: напрыклад, занесены ў Чырвоную кнігу барсук абышоўся парушальніку ў 12,6 тысячы рублёў, незаконна здабыты лось – у 12 тысяч.

Двое магілёўцаў, якія перавозілі тушкі казуль на асабістым аўто, нарваліся на крымінальны пераслед і пазбавіліся аўтамабіля – ён быў прызнаны прыладай злачынства. 

Следчыя папярэджваюць: нават знойдзеную ў лесе тушку чапаць нельга – трэба паведаміць у інспекцыю па ахове навакольнага асяроддзя або ў міліцыю.

Фота: “Магілёўскія ведамасці”.

“Белшына”, “Ольса”, “Тэхналіт” – з’явіўся спіс прадпрыемстваў Магілёўшчыны, якія дапамагаюць расійскай агрэсіі

Навіна ад

Сем прадпрыемстваў з Магілёўскай вобласці, якія дапамагаюць расійскай ваеннай машыне знішчаць украінцаў, сталі вядомыя пасля расследавання, праведзенага арганізацыяй Belpol.

Ініцыятыва былых сілавікоў Belpol упершыню сістэматызавала інфармацыю пра тое, якія беларускія прадпрыемствы дапамагаюць расейскай агрэсіі супраць Украіны і якія канкрэтна выконваюць заказы расейскага ваенпрама.

Матэрыял адкрыў першую частку пераліку беларускіх кампаній, якія прама ці ўскосна спрыяюць прадаўжэнню расійска-ўкраінскай вайны.

З апублікаванай табліцы “Магілёў.Media” абраў прадпрыемствы, якія знаходзяцца на тэрыторыі Магілёўскай вобласці. Гэта толькі першая частка спісу – у ім няма некаторых кампаній, аб удзеле якіх у выкананні расійскіх заказаў было вядома раней. Спіс будзе дапоўняцца.

  1. ТАА “Дазатар-Плюс» (Магілёў). Вытворчасць дэталяў прыцэла Сасна-У для расійскіх танкаў Т-72Б3 і Т-80У.
  2. УПНВП “Тэхналіт” (Магілёў). Вытворчасць дэталяў для рамонта рухавікоў баявых машын. 
  3. ІК-9 (Горкі). Вытворчасць дэталяў прыцэла Сасна-У для расійскіх танкаў Т-72Б3 і Т-80У.
  4. ІК-2 (Бабруйск). Абмундзіраванне. Скрыні для артылерыйскіх снарадаў калібру 152 мм.
  5. ОАО «Беларусьразінатэхніка» (Бабруйск). Дэталі для капітальнага рамонта бронетранспарцёраў БТР-82А і БТР-82АМ.
  6. ААТ «Белшына» (Бабруйск). Аўтамабільныя шыны: 19 000 штук по вераснёўскімкантрактам 2022 года; 8 586 штук па кантракце ад 29 сакавіка 2023 года; 21 600 штук па кантракце ад 22 чэрвеня 2023 года.
  7. ААТ «Ольса». Пастаўка камплектуючых для рэактыўных снарадаў калібру 122 мм.

“Гэтай публікацыяй мы адкрываем першую частку пераліку беларускіх кампаній, якія прама ці ўскосна спрыяюць прадаўжэнню расейскай агрэсіі супраць Украіны. У спіс уключаны прадпрыемствы і структуры, па якіх завершаны збор доказаў. Уся сабраная інфармацыя ўжо перададзена партнёрам у Еўрапейскім Звязе, ЗША, Канадзе, Вялікабрытаніі і Украіне – для ініцыявання санкцыйных працэдур і прыняцця абмежавальных мер”, – адзначаюць аўтары расследавання.

Яны падкрэсліваюць, што зняцце санкцый з кампаній і банкаў, якія падтрымліваюць пастаўкі ўзбраенняў у Расею, фактычна азначае садзейнічанне агрэсару. “Гэта не нейтральнае эканамічнае рашэнне, а прамы ўклад у працяг вайны і новых ахвяр”, – падагульняюць у Belpol.

Выява: belpol.pro

Іван Кубракоў з’ездзіў у родныя мясціны

Навіна ад

Кіраўнік МУС з рабочай паездкай наведаў Краснапольскі і Касцюковіцкі раёны.

Міністр унутраных спраў Іван Кубракоў у ходзе рабочай паездкі наведаў Магілёўскую вобласць, дзе правёў нараду ў Краснапольскім РАУС і прыняў удзел ва ўрачыстым мерапрыемстве ў Касцюковічах.

Высветлілася, што ў Краснаполлі падраздзяленні па грамадзянстве і міграцыі і дзяржаўтаінспекцыя размяшчаюцца ў арандаваным будынку, які не адпавядае сучасным патрабаванням.

Міністр разгледзеў варыянты рэканструкцыі будынкаў, даў даручэнні па іх дапрацоўцы і прыняў супрацоўнікаў райаддзела.

У Касцюковічах было значна весялей. Там Кубракоў удзельнічаў ва ўрачыстым падвядзенні вынікаў штогадовага спаборніцтва перадавікоў і адстаючых.

Будучы ўраджэнцам, а цяпер ужо і ганаровым грамадзянінам Касцюковіцкага раёна, Іван Уладзіміравіч змог пераканацца ў тым, што з часоў яго дзяцінства ў вёсцы Малінаўка сур’ёзных зменаў у раёне не адбылося.

Самыя адсталыя рэгіёны, хоць і далі краіне цэлага міністра, у плане прагрэсу засталіся на тым жа ўзроўні, што і ў ліхія 70-я.

Магчыма, таму Кубракоў прыняў рашэнне дапамагчы калгасу «Сялецкае», размешчанаму ў двух дзясятках кіламетраў ад роднай Малінаўкі. 

Падначаленыя міністра акажуць аграрыям фінансавую і матэрыяльна-тэхнічную дапамогу, а заадно паглядзяць, ці ўсё добра ў калгасе з арганізацыйнымі напрамкамі.

Фота «Магілёўскія ведамасці».

У Чэрыкаве дрэнна ўтрымліваюць землі і не ўлічваюць пустыя дамы

Навіна ад

Магілёўскі КДК знайшоў парушэнні ва ўтрыманні зямель і аб’ектаў Чэрыкаўскага раёна.

Камітэт дзяржаўнага кантролю Магілёўскай вобласці ў Чэрыкаўскім раёне выявіў шэраг недахопаў, якія датычацца навядзення парадку на зямлі.

Кантралёры знайшлі больш за 50 гектараў незадзейнічаных у гаспадарчым абароце зямель, 20 аварыйных аб’ектаў, звалкі бытавога і будаўнічага смецця, 43 пустыя дамы, не ўнесеныя ў рэестр.

Акрамя таго, кантралёрамі «ўстаноўлены недахопы ў рабоце з дзяржаўнай маёмасцю, арэндным жылым фондам, пры разглядзе зваротаў грамадзян і іншае».

Калі ўжо нават з «іншым» чыноўнікі Чэрыкава справіцца не змаглі, то чакаць ад іх перамог над «гэтым», відаць, не варта.

Фота ілюстрацыйнага характару з адкрытых крыніц.

Магілёўшчына сярод лідараў па зборы адыходаў шкла

Навіна ад

Магілёўская вобласць аказалася на трэцім месцы ў Беларусі па зборы адыходаў шкла ў 2025 годзе.

У пераліку аб’ёмаў збору на душу насельніцтва, на Магілёўшчыне гэты паказчык складае 31 кг. Наперадзе толькі Гомельшчына (33 кг на чалавека) і Гродзеншчына (34,3 кг на чалавека). Пра гэта піша тэлеграм-канал “Аператара другасных матэрыяльных рэсурсаў”.

Больш за ўсё здалі на перапрацоўку шкла ў Гомельскай вобласці – 43,79 тыс. тон. А ў цэлым у жыхары Беларусі ў 2025 годзе сабралі 221,8 тыс. тон адыходаў шкла. Пазалетась гэты паказчык быў роўны 196,07 тыс. тон.

Выява: ТГ “Цель 99”

На Магілёўшчыне рэалізавалі 25 праектаў, але старыя выдавалі за новыя

Навіна ад

У Магілёве Дзмітрый Круты прызнаўся, што ў рэгіёнах мухлююць з ініцыятывай «Адзін раён – адзін праект».

Расказваючы пра пераможнае шэсце па Магілёўскай вобласці ініцыятывы «Адзін раён – адзін праект», Дзмітрый Круты агучваў ужо парадкам надакучылыя ўсім лічбы пра тое, як мудрая ідэя Лукашэнкі падымае народную гаспадарку і як старыя і маладыя радуюцца рэалізацыі розных праектаў.

Адзінай свежай навіной і, магчыма, нечаканым прызнаннем Крутога стала тое, што ў раёнах «старыя праекты спрабуюць выдаць за новыя, частка аб’ектаў пераходзіла на наступны пяцігадовы цыкл праз затрымкі з будаўнікамі і набыццём абсталявання».

Што да паўднёва-ўсходняга рэгіёна Магілёўскай вобласці, то сем раёнаў удзельнічалі ў падпраграме паводле індывідуальнага ўказа змагара з асвятленнем.

Хоць фармальны тэрмін яе дзеяння завяршыўся ў 2025 годзе, Лукашэнку будзе прапанавана працягнуць падатковыя і іншыя «цыклы» да 2030 года.

А калі абысціся без цыклічнай хлусні, то ўсё проста: прымусам мілым не станеш, і праект не рэалізуеш.

Фота: БелТА.

Рэйд прафсаюзаў у Краснаполлі: геаграфія бардаку – ўся вобласць, уся краіна

Навіна ад

Тэхнічныя інспектары прафсаюзаў праверылі ахову працы на Краснапольшчыне. Вынікі – ні ў казцы сказаць, ні пяром апісаць.

Прафсаюзная рэйдавая група Магілёўскага абласнога аб’яднання прафсаюзаў пабывала ў Краснапольскім раёне і праверыла ахову працы ў дзесяці арганізацыях.

Вось пералік «недахопаў»:

  • інструкцыі састарэлі і часам не пераглядаліся па годзе, а то і па пяць гадоў;
  • прафесія ў журнале адна, а насамрэч супрацоўнік працуе па іншай;
  • у асабістых картках асобных радкоў проста няма.

Такія дробязі, як сродкі індывідуальнай абароны або зімовы абутак – паняцці і зусім абстрактныя.

Рэйдавая група зрабіла з убачанага дзіўныя высновы: грошай на ліквідацыю хібаў з аховай працы не патрабуецца, проста старшыням прафкамаў, інжынерам па ахове працы і грамадскім інспектарам трэба лепш працаваць.

Напрыканцы правяраючыя прыгразілі: выезды будуць працягнутыя, геаграфія – ўся вобласць.

Насамрэч гаворка ідзе не пра асобныя недахопы і нават не пра раён і не пра вобласць. Ахова працы – гэта татальны, усеагульны беларускі бардак.

Калі на буйных прадпрыемствах да інжынераў па ахове працы яшчэ прад’яўляюцца нейкія патрабаванні і супрацоўнікі гэтага звяна маюць камп’ютар і ўсталяваную на ім нятанную праграму АРМ інжынера па ахове працы, то ў занядбаных калгасах усе інструктажы зводзяцца да формулы: не сунь свой нос туды, куды сабака хвост не суе.

На пасады інжынераў прызначаюць або сваякоў, або першага, хто трапіцца пад руку, каб у выпадку, калі кагосьці раздрабніць у драбілцы, знайшоўся б казёл адпушчэння.

На такое элементарнае патрабаванне да гэтай катэгорыі спецыялістаў, як вышэйшая тэхнічная адукацыя, даўно наплявалі з самай высокай званніцы.

Уся надзея толькі на грамадскіх інспектараў, гэта значыць на грамадзян з актыўнай жыццёвай пазіцыяй, пажадана

патрыётаў, а па магчымасці – членаў «Белай Русі».