Суды Магілёўшчыны: кожная дзясятая крымінальная справа ў 2025 годзе была разгледжана на выязным пасяджэнні.
Кожная дзясятая крымінальная справа ў мінулым годзе разглядалася ў выязных судовых пасяджэннях. Працоўным і навучальным калектывам рэгіёна пашанцавала прысутнічаць на больш як 370 крымінальных працэсах, паведамляе пракуратура Магілёўскай вобласці.
Усё гэта робіцца для прафілактыкі злачынстваў і недапушчэння правапарушэнняў сярод насельніцтва – кажуць яны.
Пры гэтым службовым злачынствам у аграпрамысловым комплексе надаецца асаблівая ўвага – разгледжана 50 спраў у дачыненні да 53 чалавек.
На думку беларускіх юрыстаў, так народ лепш засвойвае інфармацыю пра наступствы супрацьпраўных дзеянняў і прынцып непазбежнасці пакарання.
А яшчэ выязныя пасяджэнні, нібыта, спрыяюць павышэнню даверу грамадзян да правасуддзя.
Нагадаем, што ў Беларусі парушаны базавы юрыдычны прынцып – адмаўленне зваротнай сілы закона. Акрамя таго, суддзі аднаасобна прызначаюцца чалавекам, які ўпэўнены ў тым, што «часам не да законаў».
Таму, казаць пра тое, што публічнае вынясенне прысуду павысіць давер народа да правасуддзя, не проста смешна. З такім жа поспехам можна сцвярджаць, што вышэйшай формай правасуддзя былі «тройкі» НКУС. Застаецца спадзявацца толькі на тое, што памылковасць гэтай тэорыі яе прыхільнікам даходліва растлумачаць у Гаагскім трыбунале.
Знойдзеныя ў зефіры кавалачкі дрэва бабруйскія вытворцы патлумачылі тэхналогіяй.
Жанчына ласавалася бабруйскім зефірам і выявіла ў ім трэскі. Пра сваю знаходку яна расказала ў Threads. Высветлілася, што і іншыя карыстальнікі сацыяльнай сеткі сутыкаліся з падобнай праблемай і ведаюць прычыну з’яўлення трэскаў у зефіры.
Уся справа – ў тэхналогіі, якая разлічана на тое, каб захаваць натуральны смак і водар зефіру. Яго на «Красном пищевике» вытрымліваюць на сасновых дошках, і іх часцінкі могуць трапляць у прадукт. Пластык і метал не выкарыстоўваюцца.
Гэта ж пацвердзілі і вытворцы, якія аператыўна папрасілі прабачэння за дапушчаны пракол.
У Магілёўскім аддзяленні Беларускай чыгункі сваіх пасад могуць пазбавіцца два начальнікі.
Згодна з пратаколам пасяджэння ў начальніка Беларускай чыгункі Валерыя Вярэніча, якое адбылося 16 снежня 2025 года, начальніку Магілёўскага аддзялення Беларускай чыгункі Аляксандру Маісееву ўказана, каб па выніках вясенняга камісійнага агляду ў 2026 годзе ён разгледзіў адпаведнасць займаемым пасадам начальнікаў Магілёўскай дыстанцыі пуці Віталя Баравіка і Магілёўскай дыстанцыі ахоўных лесанасаджэнняў Аляксандра Войтава. Пратакол пасяджэння, які быў састаўлены 30 снежня 2025 года, апублікавала на сваім сайце “Супольнасць чыгуначнікаў Беларусі”.
З-за чаго непасрэдна над Баравіком і Войтавым навісла пагроза звальнення, у пратаколе не пазначана.
Разам з тым, згодна таму ж дакументу, у Магілёўскім аддзяленні зменшылася колькасць парушэнняў бяспекі руху за 11 месяцаў 2025 года. Іх за гэты час было толькі чатыры ў параўнанні дзявяццю, якія былі зафіксаваны за той жа перыяд 2024 года.
У лясгасах трох раёнаў Магілёўскай вобласці пракуроры выявілі шэраг парушэнняў заканадаўства.
Паводле Генеральнай пракуратуры, у Касцюковіцкім лясгасе ў ходзе праверкі лесапрамысловых складоў знайшлася драўніна, якая захоўвалася без адлюстравання ў адпаведнай дзяржаўнай аўтатамызаванай інфармацыйнай сістэме.
У сваю чаргу ў Бялыніцкім і Чавускім лясгасах, як выявіла пракуратура, супрацоўнікі Дзяржаўнай лясной аховы не заўсёды прыцягвалі вінаватых у розных парушэннях да адказнасці, бо не фіксавалі гэтыя парушэннні.
Па выніках праверак на Магілёўшчыне і ў іншых рэгіёнах Беларусі ў адрас міністра лясной гаспадаркі ўнесена адпаведнае прадстаўленне.
Падчас цяперашніх марозаў зняволеным у Магілёўскай турме №4 выжываць цяжка, сведчыць палітвязень Аляксандр Ярашук.
“Калі мае думкі вяртаюцца да турэмнага зняволення ў Магілёўскай турме, то першае, што адразу прыходзіць да галавы, гэта пачуццё холада. Яно цябе суправаджае практычна ўвесь год. Пабудаваны ў 50-я гады мінулага стагоддзя з сілікатнай цэглы як псіхіятрычная лякарня і перапрафіляваны пазней у турму будынак ад пачатку нёс ўсе заганы савецкай будоўлі” – піша ў Фэйсбуку экс-палітвязень.
Ён сцвярджае, што менш за ўсё аўтары праекта будынку былі зацікаўлены ў стварэнні больш-менш нармальных умоў для тых, хто будзе там знаходзіцца. “Немагчыма сагрэцца ў турме ні вясной, ні восенню, у час міжсезоння, ні тым больш зімой. Спаць прыходзіцца, нацягнуўшы на сябе ўсе халодныя і цёплыя рэчы і зверху яшчэ накрыўшыся целагрэйкай” – успамінае Ярашук.
Паводле яго, проста немагчыма ўявіць, у якім становішчы сёння знаходзяцца там асуджаныя, як цяжка ім выжываць падчас такіх маразоў. “І інакш чым катаванне холадам, такое ўтрыманне асуджаных назваць нельга. Паміж тым, такія ўмовы з’яўляюцца для сістэмы адбывання пакаранняў нормай. Калі гэта норма, то што тады здзек?” – рытарычна запытваецца былы палітычны зняволены.
Другі былы палітвязень Сяргей Гунь адзначае, што ў Магілёўскай турме яшчэ і “лекар – садыст са стажам”. “І шмат чаго яшчэ там зроблена для здзекаў. Трэба аб гэтам казаць! І не толькі беларусам. На сусвет” – напісаў ён у каментары да посту Ярашука.
Нагадаем, што 11 верасня 2025 года Аляксандр Ярашук у складзе паўсотні зняволеных быў дэпартаваны з Беларусі ў Літву.
У распараджэнні нашай рэдакцыі апынулася фатаграфія замеру тэмпературы на касцюковіцкім філіяле ААТ «Булачна-кандытарская кампанія „Дамачай“. Тэмпература паветра ў працоўным памяшканні, як сведчыць датчык вымярэння ціску (зверху) і тэмпературы (знізу), склала +6,9 °C.
Прычым фота было зроблена яшчэ да наступлення вадохрышчанскіх халадоў – 13 студзеня. Што робіцца на прадпрыемстве зараз – вядома толькі Богу.
Характэрная асаблівасць такіх заводаў, размешчаных у магілёўскай глыбінцы і якія выкарыстоўваюць тэхналогіі яшчэ савецкага ўзору ў тым, што ўлетку там па-вар’яцку горача, а ўзімку дзіка холадна. Гэта значыць, тэмпература ў цэхах мала чым адрозніваецца ад вулічнай.
Аднак, менавіта касцюковіцкае прадпрыемства, калі верыць водгукам супрацоўнікаў, лідар па стварэнні малапрыдатных для чалавечага арганізма ўмоў працы.
А як жа ахова працы, тэхніка бяспекі? З гэтым, як высвятляецца, усё ў ажуры.
Літаральна днямі галоўны тэхнічны інспектар працы абласной арганізацыі галіновага прафсаюза Наталля Войтава заявіла, што на прадпрыемствах вобласці праходзяць маніторынгі тэмпературнага рэжыму ва ўмовах паніжаных тэмператур і «праведзена тлумачальная работа па павышэнні асабістай адказнасці працуючых за захаванне працоўнай і выканаўчай дысцыпліны».
Выходзіць, усё гэта – проста прыгожыя словы.
Сітуацыя ў Касцюковічах паказвае, што ўладам глыбока напляваць і на тэмпературныя рэжымы, і на забеспячэнне бяспекі працы. Прычым цягнецца ўсё гэта гадамі і дзесяцігоддзямі.
Новая старшыня райвыканкама Наталля Асмалоўская наўрад ці паспела дабрацца да завода, размешчанага ў кіламетры ад адміністрацыйнага будынка райвыканкама.
Судзячы з досведу яе папярэднікаў – і не дабярэцца.
Пра гэты завод можна даведацца толькі з публікацый раённай газеты, якая ў апошні раз удзяляла ўвагу заводу гадоў дзесяць таму і распавядала пра вафлі «Хрусцішка».
Насамрэч сітуацыя выглядае так: філіял даўно не з’яўляецца юрыдычнай асобай, ледзь зводзіць канцы з канцамі, і да людзей, якія там працуюць, нікому няма справы.
Што да інспектара Войтавай і яе аднадумцаў, то яны нешта накшталт іншапланецян: дзесьці існуюць, але навуцы асяроддзе іх пражывання дакладна невядома.
Пры гэтым, загадкавыя істоты праводзяць маніторынгі і нават, калі верыць расповедам відавочцаў, тлумачальную работу. Відавочнае, як кажуць, неверагоднае.
Вадохрышча, або Багаяўленне. Апошняе свята каляднага цыкла (з 7 па 19 студзеня).
“Святое Хрышчэнне – Калядам прашчэнне”. У гэты дзень, які гістарычна звязваюць з хрэсьбінамі Ісуса Хрыста, людзі асвячалі ваду.
Адно з самых старажытных святаў хрысціянскай Царквы, адносіцца да часоў апосталаў. Старажытная назва свята – “Епіфанія” – з’ява, або “Тэафанія” – Багаяўленне, таксама яго называлі “свята Свету”. Бо Бог прыходзіць у свет у гэты дзень, каб явіць свету Святло.
Само слова “хрысціць” на мове арыгінала азначае “апускаць” (грэц. βάπτιση – “апусканне ў ваду”).
У памяць аб тым, што Хрыстос сваім Вадохрышчам асвяціў ваду, напярэдадні свята вада асвячаецца ў храмах, у само свята Богаяўлення – у рэках або іншых месцах, дзе бяруць ваду. Для подступу да вады напярэдадні свята мужчыны выразаюць у лёдзе вялікую палонку ў выглядзе крыжа – Іардань, а сам ледзяны крыж усталёўваюць побач. Над ракой каля крыжа адбываецца абрад Іарданскага водаасвячэння. Вакол палонкі, святары і мясцовыя жыхары здзяйсняюць хрэсны ход, служаць малебен і, тым самым, асвячаюць ваду. Асвечаная вада лічыцца гаючай.
Лічыцца, што Вадохрышчанская вада змывае ўсе грахі, таму на Вадохрышча людзі тры разы з галавой апускаюцца ў ваду. Гэтак жа лічыцца, што ў вадохрышчанскую ноч вада прыходзіць у рух, як бы, у памяць аб Хрышчэнні Ісуса Хрыста. І сіла вады становіцца цудадзейнай. З боскай дапамогай вады – вылечваліся хворыя, ваду давалі піць дзецям. У старажытнасці народ верыў, што на Богаяўленне свеціць сонца, а ў вадохрышчанскую ноч адкрываецца неба, што сімвалізуе адкрытыя зносіны з Богам.
Дзень ратавальніка Беларусі (з 2000 года).
Палажэнне аб Міністэрстве па надзвычайных сітуацыях (МНС) было зацвероджана ў гэты дзень у 1999 годзе.
МНС створана ў 1994 годзе на базе атрада службы выратавання – Рэспубліканскага спецатрада па правядзенні першачарговых аварыйна-выратавальных работ, які бярэ пачатак з 1991 года.
МНС выконвае шырокі спектр работ – гэта ліквідацыя пажараў, наступстваў стыхійных бедстваў, аварый на сістэмах жызнезабеспячэння, ратаванне людзей на вадзе і іншае.
Беларуская служба выратавання сёння – гэта каля 1 000 баявых падраздзяленняў, на ўзбраенні якіх знаходзіцца больш за 6 000 адзінак тэхнікі.
Сёння ў структуры МНС функцыянуюць 17 спецыяльных службаў, у тым ліку службы пажаратушэння і аварыйна-выратавальных работ, хімічнай і радыяцыйнай бяспекі, інжынерных работ, вадалазная, медыцынская, выбухатэхнічная, авіяцыйная, пошукава-выратавальная, парашутна-дэсантная, пантонная і іншыя.
Дзень Магілёўскага географа.
У 1934 годзе адчынены кафедра фізічнай геаграфіі і геаграфічны факультэт Магілёўскага педінстытута.
Першым дэканам і загадчыкам кафедры стаў Даніла Васілеўскі.
На геаграфічным факультэце працавалі дактары навук, прафесары, знакамітыя ў свеце і Еўропе географы, падарожнікі Г. Шэнберг, П. Бардакоў, М. Баднарскі, М. Мікалаеў, М. Самбікін, А. Мядзведзеў, А. Гожаў, Б. Бажэнаў, І. Сілініч, Б. Нешатаеў, С. Сідор, Р. Дулаева, М. Звераў, М. Клюкін, Ю. Шчарбакоў, Б. Крубіч-Лебедзеў, М. Плоткін, планавалася і праца ў даваенны час Аркадзя Смоліча.
Праз 25 гадоў, у гэты ж дзень у 1959 годзе зарэгістраваны першы ў Беларусі абласны аддзел Беларускага геаграфічнага таварыства. Першым старшынёй стаў Мікалай Нешатаеў, вучоным сакратаром – Пятро Лярскі.
1630 год. Памёр Яўстах Валовіч.
Дзяржаўны і рэлігійны дзеяч Вялікага Княства Літоўскага, мецэнат і бібліяфіл. Вялікі пісар, падканцлер вялікі літоўскі, біскуп віленскі. Удзельнік пасольства Рэчы Паспалітай да Папы рымскага і іншых пасольстваў.
У час яго біскупства пабудавана 26 касцёлаў, галоўным чынам на тэрыторыі сучаснай Заходняй Беларусі.
Шчодры мецэнат. Спрыяў утварэнню ў складзе Віленскай акадэміі факультэтаў права і медыцыны. Заснаваў на ўласныя сродкі лякарню Святых Нікадзіма і Язафата ў Вільні.
Уладальнік каштоўнай асабістай бібліятэкі. Асобныя кнігі з яго збору захоўваюцца ў бібліятэках Віленскага ўніверсітэту, Акадэміі навук Літвы і іншых бібліятэках.
1656 год. Памёр Казімір Леў Сапега.
Вялікалітоўскі дзяржаўны і грамадскі дзеяч. Каралеўскі сакратар і пісар вялікі літоўскі, маршалак дворны літоўскі, падканцлер літоўскі, адміністратар Берасцейскай эканоміі.
Займаўся ўпарадкаваннем архіву Кароны. Удзельнічаў у заключэнні выгаднага для Рэчы Паспалітай Палянаўскага мірнага дагавора (1634).
Браў удзел у вайне з казакамі ва Украіне (1648-1653), заключэнні Збораўскага пагаднення, бітве пад Берастэчкам.
У вайну Расіі з Рэччу Паспалітай (1654-1667) выставіў уласны полк. Восенню 1655 года пад Берасцем каардынаваў баявыя дзеянні супраць маскоўскіх і шведскіх войскаў.
Дамогся ад караля прывілеяў на магдэбургскае права і кірмашы для сваіх мястэчак, у тым ліку для Бялынічаў.
1802 год. Нарадзіўся Міхал Урончанка.
Геадэзіст, картограф, усходазнаўца, кадравы разведчык, генерал-маёр, генерал-губернатар Тыфліса, першы падарожнік па Малой Азіі, аўтар паняцця меандраванне, літаратар, паліглот, першы перакладчык на рускую мову Т. Мура, У. Шэкспіра, Дж. Байрана, А Міцкевіча і іншых.
Адзін з 17 заснавальнікаў Рускага геаграфічнага таварыства. Старшыня Камітэта па адукацыі яўрэяў.
Яго імя значыцца на мемарыяльнай дошцы ў гонар найлепшых выпускнікоў Магілёўскай гімназіі.
Сябар А.Пушкіна, Н. Языкава, А. Міцкевіча.
Правёў топагеадэзічныя здымкі ў Бесарабіі, на Балканах, у Беларусі, Малой Азіі, на Каўказе, у Прычарнамор’і, Цэнтральнай Расіі, у Наварасійскім краі і Паволжы.
Памёр 26 лістапада 1855 г. у Харкаве.
Яго імя ўшанавана ў Балгарыі, Турцыі, Расіі, Беларусі (у Магілёве – толькі на дошцы гімназіі; пры гэтым няма ні бюста, ні помніка, ні вуліцы яго імя).
1862 год. Памёр Міхаіл Без-Карніловіч.
Беларускі тапограф і статыстык, гісторык, этнограф, краязнавец, генерал-маёр. Брат дзекабрыста Аляксандра Карніловіча.
Карніловіч стаў Без-Карніловічам у выніку бюракратычнай памылкі.
Праводзіў тапаграфічнае і ваенна-статыстычнае вывучэнне Мінскай, Віцебскай і іншых губерняў, Беластоцкай акругі. Збіраў звесткі аб беларускіх старажытнасцях.
Аўтар ваенна-статыстычнага агляду Віцебскай губерніі, кнігі «Гістарычныя звесткі пра выдатныя мясціны на Беларусі…» (1855).
Тэрыторыю Беларусі абмяжоўваў Віцебскай i Магілёўскай губернямі, астатнія землі называў Літвой. Беларусамі лічыў нашчадкаў крывічоў, гаварыў пра беларусаў як пра асобны народ.
Імкнуўся вывучаць гісторыю асобных гарадоў або мясцовасцей у непарыўнай сувязі з агульнадзяржаўнай і агульнаеўрапейскай гісторыяй.
1931 год. Нарадзілася Наталля Паплаўская.
Беларуская мастачка. Скончыла Беларускі тэатральна-мастацкі інстытут.
Працавала ў станковай, кніжнай графіцы, у тэхніцы акварэлі (цыкл «Помнікі гісторыі і культуры Беларусі»), літаграфіі (серыі «Палессе», «Героі беларускіх казак»), афорта, лінагравюры. Шмат працуе над афармленнем дзіцячай кнігі, школьных падручнікаў.
Яе работы знаходзяцца ў Нацыянальным мастацкім музеі, Нацыянальнай бібліятэцы Беларусі, фондах Саюза Мастакоў, Міністэрства культуры Расіі, аб’яднанні «Цэнтральны дом мастака» у Маскве, мастацкім музеі г. Магілёва, галерэях Аполе і Варшавы, прыватных калекцыях Беларусі, Расіі і Еўропы.
1944 год. Загінуў Мікола Чарнецкі.
Беларускі публіцыст, педагог, палітычны дзеяч. Доктар філасофіі.
Актывіст Грамады беларускай моладзі ў Гродне, студэнцкіх арганізацый у Празе, Пражскім універсітэце, Беларускага (Крывіцкага) культурнага таварыства імя Ф. Скарыны, член пражскага бюро Беларускай партыі сацыялістаў-рэвалюцыянераў.
У 1929-1944 гадах працаваў у Заходняй Беларусі: выкладчык беларускіх гімназій у Радашковічах і Клецку, сурэдактар віленскага часопіса «Золак», дырэктар школы ў в. Крынкі, кіраўніком асветы Крынкаўскага раёна пры Саветах.
Арыштаваны НКУС, уцёк з-пад арышту. Падчас вайны працаваў у Беларускім нацыянальным камітэце ў Беластоку.
Па-зверску забіты польскімі тэрарыстамі. Пахаваны на Праваслаўных могілках у Беластоку.
Настаўнікі Клецкай гімназіі. Другі злева – Мікалай Чарнецкі
1970 год. Пуск першага тралейбуса ў Магілёве.
Першыя тралейбусы паехалі па маршруце чыгуначны вакзал – завод імя Куйбышава.
Зараз у Магілёве працягласць тралейбусных ліній складае каля 81 км.
Плануецца будаўніцтва новых ліній, у тым ліку да мікрараёна “Спадарожнік”, у жылы раён “Казіміраўка”.
1972 год. Нарадзіўся Сяргей Міхалок.
Беларускі спявак, аўтар музыкі і тэкстаў, акцёр. У 1990-2014 гадах вакаліст і галоўны ідэолаг гурта “Ляпіс Трубяцкі”, з 2014 года — вакаліст гурта “Brutto”.
Супрацоўнічаў з тэатрам «Бамбукі», гуртом «Крамбамбуля», працаваў арт-дырэктарам ў клубе «Аддис-Абеба», разам з Аляксеем «Хацонам» Хацкевічам удзельнічаў у комік-дуэце «Саша і Сірожа», сузаснавальнік творчага аб’яднання «Дети солнца».
У 2011 годзе за смелыя выказванні ў адрас уладаў, за асуджэнне за разгон акцыі пратэсту 19 снежня 2010 года, «Ляпіс Трубяцкі» трапіў у «чорны спіс» творчых калектываў.
Жыве ва Украіне з 2014 года. Заслужаны артыст Украіны (2020).
На фоне ўварвання Расіі ва Украіну ў 2022 годзе, аднавіў дзейнасць у групе “Ляпіс Трубяцкі” і запусціў тур па Еўропе і Паўночнай Амерыцы ў падтрымку ўкраінскага боку.
1978 год. У Германіі выпушчаны апошні аўтамабмль “фольксваген-жук”, Volkswagen Käfer.
Ён выпускаўся з 1938 года. Гэта самы масавы аўтамабіль у гісторыі. Усяго было выраблена 21 529 464 аўтамабіля. На зборачным канвееры аўтамабіль быў заменены мадэллю “Гольф”.
Зараз “Жукі” выпускаюць у Мексіцы і Бразіліі.
У 2021 годзе дызайн “Жука” без адпаведнага дазволу быў скапіяваны кітайскай кампаніяй “Great Wall” і прадстаўлены ў якасці ўласнага канцэпта кампактнага хэтчбэка.
Службовыя асобы сельгаспрадпрыемства на Чавушчыне папаліся на ўтойванніі падзяжу жывёлы і крадзяжы фуражу, і атрымалі мяккае пакаранне.
Начальнік участка аднаго з сельгаспрадпрыемстваў мусіў адказваць за захаванасць буйной рагатай жывёлы і ўсё яе змяншэнне і павелічэнне адлюстроўваць у справаздачы. Аднак, калі са студзеня па красавік 2025 года памерла 75 кароў ён вырашыў гэта схаваць. У далейшым правяраючыя выявілі нястачу 16 галоў жывёлы і паведамілі аб гэтым праваахоўнікам. Каб захаваць у таямніцы адсутнасць яшчэ 59 кароў, мужчына звярнуўся да кіраўніка іншага сельгаспрадпрыемства. Той пазычыў яму недастаючую скаціну.
Акрамя гэтых хітрыкаў, у ліпені мінулага года начальнік участка згаварыўся з калегай аб крадзяжы зернесумясі. Гэтае фуражнае зерне на той момант яшчэ не прайшло бухгалтарскі ўлік. Калега знайшла пакупніка на скрадзенае, і на гэты фураж была складзены фіктыўная дакументацыя аб нібыта унутраным перамяшчэнні 6700 кг зернесумесі. Вывезеныя кармы перахапілі аператыўнікі, прычым пры ўзважванні маса скрадзенага склала 7500 кг. Злачынцам налічылі крадзеж на амаль 3000 рублёў.
На працэсе ў судзе Чавускага раёна былы ўжо начальнік участка сваю віну прызнаў і раскаяўся, а падзельніца карупцыянера сваю віну адмаўляла. Абодва атрымалі па два гады “хатняй хіміі”. Толькі яго аштрафавалі на 4500 рублёў, а яе – на 2250. Прысуд пакуль не ўступіў у сілу.
Прадпрыемства “Белаквабай” з вёскі Вялікая Бароўка пад Магілёвам стала сёмым вытворцам энэргетыкаў у Беларусі. І, магчыма, першым, які дапусціў памылку ў апісанні складнікаў.
Тое, што “Белаквабай”пачаў выпускаць энэргетычныя напоі, заўважыла інтэрнэт-выданне blizko.by. Раней прадпрыемства было вядома вытворчасцю кваса і газаваных напояў. Пакуль у каталогу прадукцыі два гатункі энэргетыкаў – «Nosorog original (Насарог арыгінальны)» і «Nosorog berry charge (Насарог ягадны зарад)». Аб’ём бутэлькі складае 0,5 л. У магазінах-партнёрах вытворцы, а гэта, у прыватнасці, «Санта», «Перекресток», Green, кошт напояў па 2,49 руб.
Як адзначае выданне, магілёўскі энэргетык не можа пахваліцца рэкорднымі паказчыкамі танізавальных кампанентаў. Асноўны – кафеін – змяшчаецца ў аб’ёме 30 мг/100 мл. Гэта тыповы паказчык для многіх энэргетычных напояў. Па Тэхрэгламенце Мытнага саюза ўтрыманне кафеіну не можа перавышаць 40 мг/100 мл.
Асаблівасцю магілёўскіх “Насарогаў” выглядае відавочная памылка на этыкетцы. Так, на бутэльцы значыцца, што ўтрыманне вітаміна В12 – 0,17 мг/100 мл. Між тым змест В12 звычайна вызначаецца не ў міліграмах (мг), а ў мікраграмах (мкг). Так, у папулярнага энергетыка Burn вітаміна В12 – 0,28 мкг/100 мл, у Hell – 0,2 мкг/100 мл, у Dynami:t – 0,17 мкг/100 мл. Заяўленыя 0,17 мг/100 мл у “Насарога” – гэта ў 1000 разоў больш.
Атрымліваецца, што ў магілёўскага энергетыка альбо грубая памылка на ўпакоўцы, альбо ў рэцэптуры, прычым у апошнім выпадку яня патэнцыйна можа стаць прычынай перадазіровак вітамінам В12.
Вечар напярэдадні Вадохрышча. У гэты дзень успамінаецца хрышчэнне Ісуса Хрыста Іаанам Прадцечам (Хрысціцелем) у рацэ Іардан.
Па традыцыі ўся сям’я збіраецца за святочным сталом. Пачынаць трапезу можна толькі калі ў небе з’явіцца першая зорка. Спачатку чытаюць малітву, а затым спрабуюць святочныя посныя пачастункі. Пасля ўрачыстай трапезы хрысціяне адпраўляюцца ў храмы. Апоўначы, з надыходам свята Вадохрышча, праводзіцца вялікае асвячэнне вады. Звычайна людзі прыносяць крыху святой вады дадому, каб акрапіць ёю жыллё.
Вадохрышча таксама называецца і Богаяўленнем, бо ў гэты дзень Бог явіў Сябе свету ў трох асобах Свайго Бажаства: Бог Сын – Ісус Хрыстос прымаў хрышчэнне ў Іардане, Дух Святы сышоў на Яго ў выглядзе голуба, Бог Айцец засведчыў Ісуса Хрыста голасам з неба.
Вадохрышчанскі вечар з’яўляецца завяршэннем Калядных свят. Заканчваюць гадаць, варажыць, калядаваць.
1401 год. У Вільні вялікі князь Вітаўт выдаў першыя акты Віленска-Радамскай уніі.
Заключана ў Вільні і ратыфікавана Кароннай Радай у Радаме. Па ўмовах уніі ВКЛ заставалася самастойнай дзяржавай у саюзе з Польшчай. Пажыццёва перадавалася кіраўніцтва ВКЛ вялікаму князю Вітаўту з захаваннем вярхоўнай улады Ягайлы. Пасля смерці Вітаўта ўлада пераходзіла да Ягайлы ці яго законных нашчадкаў.
Бакі дамовіліся пра супольны саюз для ўзаемнай абароны, што дазволіла Вітаўту зладзіць наступ супраць крыжакоў. У канчатковым выніку супольныя дзеянні літоўска-польскага хаўрусу дазволілі атрымаць вырашальную перамогу над Тэўтонскім Ордэнам у Грунвальдскай бітве.
1892 год. Нарадзіўся Іосіф Лангбард.
Беларускі савецкі архітэктар. Заслужаны дзеяч мастацтваў і архітэктуры БССР. Доктар архітэктуры, прафесар.
Адзін з выдатных архітэктараў Еўропы ХХ стагоддзя, чыя мастацкая спадчына аказвае значны ўплыў на развіццё сучаснай архітэктуры. Яго архітэктурныя шэдэўры ў вялізнай ступені паўплывалі на фарміраванне аблічча Мінска, Магілёва і з’яўляюцца пярлінамі беларускага дойлідства.
Яго асноўныя працы ў Беларусі: Мінскія Дзяржаўны тэатр оперы і балета, Дом урада БССР, Дом афіцэраў, галоўны корпус акадэміі навук, у Магілёве – Дом Саветаў. Акрамя гэтага – будынкі ў Кіеве, Ленінградзе, Маскве, Кастраме.
Адзін з аўтараў схемы генплана паваеннага Гомеля і эскіза планіроўкі Мінска.
У 1938 годзе меркавалася па яго планах пабудаваць хмарчос на магілёўскай плошчы Славы (тады Савецкай): старыя храмы знеслі, а гмах не пабудавалі. Засталіся ў эскізах і лангбардаўскі Драматычны тэатр і яго ж манументальны новы будынак ЦК КПБ(б) для Магілёва.
Прафесар Акадэміі мастацтваў у Ленінградзе.
Памёр 3 студзеня 1951 года.
1895 год. Нарадзіўся Лявон (Леонт) Більдзюкевіч.
Беларускі педагог, матэматык, грамадскі дзеяч.
Скончыў Мінскую гімназію, Кіеўскія ўніверсітэт і камерцыйны інстытут.
Друкаваў апавяданні ў газеце «Наша ніва», уваходзіў у кіеўскі беларускі культурна-асветны гурток «Зорка».
Загадваў Мінскай школай сляпых, дзе ў 1919 годзе перавёў навучанне на беларускую мову. Член Часовага Беларускага нацыянальнага камітэта, Беларускай школьнай рады Міншчыны.
Выкладаў у Мінскай беларускай гімназіі, Бабруйскім, Рагачоўскім педтэхнікумах, у Беларускім політэхнічным інстытуце, БДУ, працаваў у Інстытуце торфу БССР.
Член Тэрміналагічнай камісіі Інбелкульта, удзельнічаў у апрацоўцы беларускай навуковай тэрміналогіі па матэматыцы, касмаграфіі і фізіцы. Пераклаў на беларускую мову шэраг падручнікаў па матэматыцы.
У 1938 годзе арыштаваны ДПУ, высланы ў лагер на Калыму, дзе і загінуў 18 жніўня 1942 года.
1903 год. Нарадзіўся Аляксандр Фурсенка.
Беларускі навуковец-палеантолаг. Член-карэспандэнт Акадэміі навук, доктар геолага-мінералагічных навук, прафесар.
Працаваў ва Усесаюзным геолагаразведачным інстытуце, загадчыкам лабараторый Інстытута геалагічных навук АН БССР, Інстытута геалогіі і геафізікі Сібірскага аддзялення АН СССР, прафесарам, загадчыкам кафедры БДУ.
Аўтар прац па мікрапалеанталогіі і стратыграфіі.
Правёў палеанталагічныя вывучэнні даантрапагенавых парод у Беларусі, удзельнічаў у складанні геалагічных карт тэрыторыі рэспублікі.
Памёр 30 верасня 1975 года.
1912 год. Нарадзіўся Пётр Сыч.
Беларускі пісьменнік, журналіст «Радыё Свабода», мемуарыст, герой Монтэ-Касіна.
Трапіў у савецкі палон як польскі жаўнер, вязень турмаў НКУС, лагера ў Комі. У 1942 г. патрапіў у армію генерала У. Андэрса. Паручнікам прымаў удзел у шматлікіх баях, у тым ліку пад Монтэ-Касіна.
Актыўны дзеяч эмігранцкіх арганізацый Вялікабрытаніі, ФРГ, супрацоўнік часопіса «Беларус на чужыне», радыё «Свабода», член Рады БНР. Аўтар мемуараў пра Монтэ-Касіна.
Памёр 20 чэрвеня 1963 года ў Мюнхене.
1936 год. Нарадзіўся Васіль Сёмуха.
Вядомы беларускі перакладчык з еўрапейскіх моў.
Працаваў рэдактарам у дзяржаўным выдавецтве, выкладчыкам нямецкай мовы ў школе, БДУ, у газэце «Літаратура і мастацтва», у выдавецтва «Мастацкая літаратура», у гуманітарным ліцэі.
У 1967 годзе напісаў запыт міністру замежных справаў Гурыновічу, спытаўшы, ці можа ён патрабаваць ад ураду Германіі кампенсацыі за страчаную маёмасць, каб выдаць пераклад «Фаўста». Выключаны з Саюзу пісьменьнікаў БССР з фармулёўкай: «…за зносіны з замежнымі пасольствамі і спробу выдаць „Фаўста“ ў Мюнхене». Супраць выключэння галасаваў толькі Васіль Вітка.
Акрамя перакладаў класікаў, рабіў пераклады для драматычных тэатраў і да музычных твораў. Супрацоўнічаў з кіраўніком «Беларускай капэлы» Віктарам Скарабагатавым. Пераклаў лібрэта да опер Радзівіла «Фаўст», «Маргер» Горскага, «Страшны двор» Манюшкі.
Пераклаў на беларускую мову «Найвышэйшую песню Саламонаву», «Новы Запавет. Псалтыр». Яго пераклад «Бібліі» выкарыстоўваецца ў набажэнствах розных беларускіх хрысціянскіх цэркваў.
Памёр 3 лютага 2019 года.
1984 год. Памёр Панцеляймон Панамарэнка.
Беларускі і савецкі партыйны і дзяржаўны дзеяч, генерал-лейтэнант. Старшыня Савета Міністраў БССР (1944-1948), начальнік Цэнтральнага штаба партызанскага руху (1942-1944).
Як Першы сакратар ЦК КПБ (1938-1947) даваў згоду на арышт і асуджэнне дзяржаўных і партыйных работнікаў, з 15 верасня па 15 лістапада 1938 года ў якасці ўдзельніка «тройкі» НКУС вынес 4650 расстрэльных выракаў.
Ён у справаздачы І. Сталіну 1938 года «О Белорусском языке, литературе и писателях» абражаў культуру і мову, фактычна падпісваў смяротны прысуд літаратурным дзеячам, абвінаваціўшы іх у «контррэвалюцыйнай нацыяналістычнай працы, ідэйна кіраваных заўсёды дзясяткам прафашысцкіх пісьменнікаў, у тым ліку Янкам Купалам і Якубам Коласам.
Член Ваеннага савета Беларускай ваеннай акругі, сукіраўнік войск, што ўвайшлі на тэрыторыю Заходняй Беларусі. Пераканаў Сталіна ў далучэнні Палесся з Брэстам і Пінскам да БССР.
Пасля вызвалення БССР Сталін прапанаваў перадаць РСФСР Полацкую вобласць, але яе адстаяў Панамарэнка.
Пасля ад’езду з Беларусі працаваў міністрам нарыхтовак, культуры СССР, быў членам Палітбюро ЦК КПСС, першы сакратаром ЦК Кампартыі Казахстана, амбасадарам у Польшчы, Індыі і Непале, Нідэрландах.
2005 год. Упершыню афіцыйна паказаны публіцы аэробус A380.
Найбуйнешы авіялайнер у гісторыі.
У паказе ў французскай Тулузе, дзе вядзецца зборка самалёта, узяла ўдзел больш за 5 000 чалавек, кіраўнікі Вялікабрытаніі, Францыі, Германіі і Іспаніі.
Максімальная колькасць пасажыраў – 840, максімальная далёкасць палёту 15 000 км. Кошт аднаго самалёта складае да 500 мільёнаў долараў.
Беларусь не мае ніводнага такога самалёта.
2008 год. Памерла Яўгенія Мальчэўская.
Беларуская паэтэса.
Скончыла Бабруйскі тэхнікум гумавай прамысловасці, філалагічны факультэт БДУ. Працавала рабочай на Бабруйскім заводзе гумавых вырабаў, у бабруйскай газеце «Камуніст», чашніцкай «Чырвоны прамень», у абласных выданнях «Віцебскі рабочы», «Выбар», у газеце «Белорусская нива», настаўнічала у Чэрвеньскім раёне, Талачыне, Віцебску.
Яе першыя вершы з’явіліся ў 1969 годзе ў газеце «Магілёўская праўда». Суаўтар паэтычных зборнікаў, аўтар паэтычнага цыкла «Святло асенняе зярнят», зборнікаў, кніг, апавяданняў.
