Уладальнікі магазіна “Нарасхват” вырашылі пазбавіцца ад магазіна ў Бабруйску, супраць начнога гандлю алкаголем у якім выступілі мясцовыя жыхары.
Абвестка аб продажы магазіна на вуліцы Бахарава 317 з’явілася на электроннай гандлёвай пляцоўцы “ІПМ-таргі”. За будынак плошчай 622,5 м2 просяць 599 тыс. рублёў. Першы аўкцыён па ім прайшоў акурат сёння, 17 красавіка 2026 года, але пераможца ў таргах не вызначыўся. Магчыма, цана будзе зніжана альбо ўладальнік магазіна – магілёўскае ТДА “Тібер” – зможа знайсці арандатара на ўсю яго плошчу.
Гісторыя магазіна адметна тым, што, адкрыўшы яго ў 2020 годзе, праз чатыры гады “Тібер” спрабаваў перавесці гандлёвую кропку ў фармат “24/7” з кругласутачным продажам алкагольных вырабаў. Аднак мясцовыя жыхары былі катэгарычна супраць такіх планаў. Справа нават дайшла да Эканамічнага суда, які стаў на антыалкагольную пазіцыю жыхароў. Апеляцыя ад “Тібера” ў Вярхоўным судзе таксама была разгледжана на карысць яго апанентаў.
Праработаўшы да пачатку бягучага года, магазін “Нарасхват” на вуліцы Бахарава ў Бабруйску закрыўся. “Тібер” мае яшчэ адзін магазін у раённым цэнтры каля чыгуначнага вакзала.
Даносіць на тых, хто чытае і распаўсюджвае так званыя “экстрэмісцкія” матэрыялы, заклікалі студэнтаў ў шэрагу каледжаў Магілёўскай вобласці.
У навучальных установах Магілёўшчыны з 8 па 15 красавіка прайшла серыя лекцый, прысвечаных тэме “Прафілактыкі ўцягвання моладзі ў экстрэмісцкую дзейнасць”. Аднак, як адзначаюць удзельнікі, гэтыя мерапрыемствы насілі выразна ідэалагічны і палітычны характар.
Нягледзячы на розных выступоўцаў, змест сустрэч быў падобны. Напрыклад, у Горацкай сельскагаспадарчай акадэміі занятак правёў прарэктар па бяспецы і кадрах Генадзь Лукашкоў. Пры гэтым аўдыторыяй сталі не студэнты, а намеснікі дэканаў па ідэалагічнай рабоце, куратары і выкладчыкі.
У каледжах жа асноўнымі слухачамі былі самі навучэнцы. Лектарамі часта выступалі прадстаўнікі БРСМ, якія, паводле сведчанняў, заклікалі моладзь паведамляць пра людзей, што дасылаюць ім у інтэрнэце спасылкі на “забароненыя” матэрыялы. Пачынаючы з агульных тлумачэнняў паняцця “экстрэмізм” і агляду правых радыкальных груп у Еўропе, выступоўцы хутка пераходзілі да беларускіх спісаў “экстрэмісцкіх” рэсурсаў і кантэнту.
У якасці прыкладу распаўсюджваліся друкаваныя матэрыялы. Так, у Бабруйскім гандлёва-эканамічным каледжы навучэнцам раздалі памяткі, дзе пасля агляду замежных неанацысцкіх структур падрабязна тлумачыліся нормы беларускага заканадаўства. Асобная ўвага надавалася артыкулу 19.11 Кодэкса аб адміністрацыйных правапарушэннях, які прадугледжвае адказнасць за распаўсюд матэрыялаў, прызнаных экстрэмісцкімі.
Навучэнцам распавядалі пра Рэспубліканскі спіс экстрэмісцкіх матэрыялаў, а таксама пра магчымыя наступствы – ад штрафаў і грамадскіх работ да адміністрацыйнага арышту з канфіскацыяй тэхнікі. Акрамя таго, прысутных знаёмілі з нормамі артыкула 361 Крымінальнага кодэкса, які ахоплівае розныя формы ўдзелу ў экстрэмісцкай дзейнасці.
У Магілёве лекцыі ў машынабудаўнічым і гандлёва-эканамічным каледжах правёў першы сакратар Ленінскага раённага камітэта БРСМ Данііл Васільеў. У сваіх выступах ён сцвярджаў, што “дэструктыўныя сілы” спрабуюць уплываць на моладзь праз інтэрнэт, і папярэджваў пра сур’ёзную адказнасць за распаўсюд апазіцыйных поглядаў і заклікаў да супрацьпраўных дзеянняў.
Чатыры смерці ў выніку атручвання алкаголем мелі месца ў Магілёўскай вобласці ад пачатку 2026 года.
Ва ўсіх выпадках у крыві памёрлых канцэнтрацыя этылавага спірту перавышала пяць праміле. Так, 45-гадовага жыхара Магілёва без прыкмет жыцця ў яго кватэры знайшоў бацька. Паводле заключэння судова-медыцынскай экспертызы, прычынай смерці стала вострае атручэнне этанолам: у крыві зафіксавана крытычная канцэнтрацыя – 5,3 праміле.
У Асіповічах на чыгуначным вакзале падчас агляду пасажырскага цягніка, які прыбыў з Магілёва, супрацоўнікі выявілі ў вагоне мужчыну 52 гадоў, што ляжаў на падлозе без прыкмет жыцця. Эксперт устанавіў, што і ў гэтым выпадку трагедыя звязаная з празмерным ужываннем алкаголю. Утрыманне этанолу ў крыві склала 5,1 праміле.
У Горках жанчына знайшла ў сваім доме мёртвай 46-гадовую сястру. Экспертыза паказала, што прычына смерці аналагічная – вострае алкагольнае атручэнне (5,2 праміле). Праз два тыдні падобны лёс напаткаў і 38-гадовага мясцовага жыхара: паводле вынікаў медыка-хімічнага даследавання, узровень этанолу ў яго крыві дасягнуў 5,9 праміле.
Алкаголь ва ўсім свеце займае першы радок у спісе прычын смяротных атручванняў, сцвярджаюць у Дзяржкамітэце судовых экспертыз. Для большасці людзей смяротны зыход можа наступіць ад ужывання 200-300 мілілітраў чыстага этанолу, прынятага адначасова або за кароткі прамежак часу. У пераліку на алкагольныя напоі крэпасцю 40% – гэта прыкладна 600-760 мілілітраў, а канцэнтрацыя 5 праміле ў крыві адпавядае прыкладна 1 літру прынятага ўнутр 40%-га алкаголю.
У раённай газеце «Асіповіцкі край» выйшаў кранальны рэпартаж пра дзве вёскі Асіповіцкага раёна – Бродзішча і Засялечча.
Журналісты асіповіцкай “раёнкі” расказалі пра шэсць жыхароў Бродзішча і трох – Засялечча. Пра тое, што аўтобусныя зносіны з райцэнтрам адсутнічаюць, і да чыгуначнай станцыі старым даводзіцца дабірацца самім. Пра тое, што адзіны мужчына на ўсю акругу развозіць суседзяў у недалёкую Татарку на мотаблоку.
Пра 95-гадовую жыхарку, якая перажыла акупацыю і ўсё жыццё пражыла на роднай зямлі. Пра закінуты дом з таблічкай «Маёмасць застрахавана. Галоўнае ўпраўленне дзяржаўнага страхавання СССР» – краіна знікла, а бляшаны ромбік застаўся.
Усё напісана з цеплынёй і павагай да герояў. Але за настальгічнай інтанацыяй прыкметна іншае: гэтыя вёскі выміраюць не таму, што «ў кожнага населенага пункта свой лёс». Яны выміраюць таму, што палітыка «адраджэння вёскі», якая абышлася беларускім падаткаплацельшчыкам у дзясяткі трыльёнаў, аказалася дэкарацыяй.
Праграма на 70 трыльёнаў і 1,3 мільёна зніклых сяльчан
У 2005 годзе Аляксандр Лукашэнка падпісаў Указ № 150 «Аб Дзяржаўнай праграме адраджэння і развіцця вёскі на 2005-2010 гады». На яе рэалізацыю, згодна з праграмай, планавалася ўкласці каля 70 трыльёнаў рублёў. Затым рушылі Дзяржаўная праграма ўстойлівага развіцця вёскі на 2011-2015 гады, Дзяржаўная праграма развіцця аграрнага бізнесу на 2016-2020 гады. і «Аграрны бізнес» на 2021-2025 гады
Афіцыйныя вынікі ў падачы дзяржаўных СМІ выглядаюць уражліва. Па стане на лістапад 2025 года ў краіне створана 1 426 аграгарадкоў.
У 2024 годзе ў сельскай мясцовасці пражывала 1,942 мільёна беларусаў. За апошнія дзесяць гадоў вёскі страцілі 270 тысяч жыхароў, а за 30 гадоў – 1 мільён 300 тысяч чалавек: у 1996 годзе колькасць сельскіх жыхароў яшчэ дасягала 3,2 мільёна.
Карціна яшчэ больш жорсткая, калі глядзець па раёнах. Незалежнае выданне «Люстэрка» адзначае горкую рэч: «менавіта эканамічныя, дэмаграфічныя і сацыяльныя працэсы, што адбываюцца ў Беларусі ў апошнія дзесяцігоддзі, змаглі зрабіць тое, чаго не здолелі нацысцкія акупанты».
Бродзішча і Засялечча – не выключэнне, а правіла. Гэта і ёсць вынік «адраджэння», на якое пайшлі дзясяткі трыльёнаў рублёў падаткаплацельшчыкаў.
Чарнобыль як рытуал: прапагандысты супраць рэальнасці
Інфармацыйна-прапагандысцкія групы выступаюць у школах, каледжах, на прадпрыемствах, у ЖКГ і ветстанцыях. У метадычках – стандартныя тэзісы: амаль чвэрць тэрыторыі Беларусі, на якой пражывала пятая частка насельніцтва краіны, апынулася забруджанай радыенуклідамі; спынілі існаванне 479 населеных пунктаў (у Магілёўскай вобласці – 173). І далей – пра гераічнае пераадоленне і шэсць дзяржаўных праграм.
Пра што прапагандысты не гавораць? Пакуль яны расказваюць працоўным калектывам пра «ўстойлівае развіццё» пацярпелых рэгіёнаў, у гэтых самых рэгіёнах вёскі працягваюць выміраць – проста ўжо не ад радыяцыі, а ад дэмаграфічнай катастрофы, якую ўлада не змагла спыніць. І што паралельна ў краіне разгортваецца новы, ужо «мірны» ядзерны сцэнарый.
Адна АЭС, другая на падыходзе, могільнік у працэсе выбару
БелАЭС у Астраўцы ўведзена ў эксплуатацыю. Але гэтага мала. 25 верасня 2025 года Лукашэнка заявіў пра планы дамовіцца з Пуціным аб будаўніцтве ў Беларусі другой АЭС. 26 верасня ў Крамлі ён наўпрост сказаў: «Калі будзе рашэнне, мы адразу пачнём новы энергаблок або новую станцыю ставіць, калі будзе патрэба на захадзе Расіі і ў вызваленых рэгіёнах» – маючы на ўвазе акупаваныя ўкраінскія тэрыторыі.
Паводле даных РБК, Лукашэнка прапанаваў узвесці атамную станцыю на ўсходзе краіны, яна магла б забяспечваць энергіяй у тым ліку захад Расіі і тыя самыя «новыя рэгіёны». Дзеючая АЭС знаходзіцца на захадзе краіны, каля мяжы з Літвой.
Лагічна задаць пытанне: навошта краіне, якая губляе насельніцтва (і не толькі сельскае), пры дзеючай БелАЭС, якая пакрывае па афіцыйных даных каля 40 працэнтаў унутраных патрэб у электраэнергіі, другая атамная станцыя? Адказ, мяркуючы па словах самога Лукашэнкі, утылітарны: каб прадаваць электраэнергію Расіі і яе «новым рэгіёнам».
А паралельна вырашаецца пытанне, якое традыцыйна замоўчваецца ў «адзіных днях інфармавання»: дзе хаваць радыеактыўныя адходы.
Паводле даных BELPOL, у сярэдзіне жніўня 2025 года прынята канчатковае рашэнне: сховішча размесцяць каля Астравецкай АЭС, усяго ў 22 кіламетрах ад мяжы з Літвой. На праект плануюць вылучыць 941 мільён беларускіх рублёў, увод у эксплуатацыю намечаны на 2030 год. Рэалізацыяй зоймецца дзяржаўнае прадпрыемства «БелРАА».
Але разглядаюцца і іншыя варыянты. Для будаўніцтва ядзернага могільніка выбіраюць пляцоўку з трох варыянтаў. Магілёўская вобласць разглядаецца як адна з пляцовак для захавання ядзерных адыходаў.
Кола замкнулася
Атрымліваецца паказальная карціна. Дзяржава сорак гадоў расказвае пра ахвяры Чарнобыля і свае намаганні па «адраджэнні» пацярпелых тэрыторый.
На праграмы «адраджэння вёскі» патрачаны дзясяткі трыльёнаў. Аграгарадкоў пабудавана амаль паўтары тысячы. А паралельна – сельскае насельніцтва за 30 гадоў скарацілася на 1,3 мільёны чалавек.
Вёскі Бродзішча і Засялечча ў Асіповіцкім раёне – шэсць і тры жыхары адпаведна, без аўтобусных зносін.
Пабудавана адна АЭС, абмяркоўваецца другая – на ўсходзе, для экспарту электраэнергіі ў Расію і на акупаваныя ёю тэрыторыі.
Выбіраецца месца для захавання радыеактыўных адыходаў – сярод варыянтаў Магілёўская вобласць. А раз на месяц па ўсёй краіне збіраюць людзей паслухаць пра «Чарнобыль: ад адраджэння да ўстойлівага развіцця».
Вернемся да лёсу вёскі. Няма ніякага лёсу. Гэта вынік злачыннай палітыкі – цалкам канкрэтнай, з указамі, лічбамі бюджэтных выдаткаў і мільёнамі зніклых жыхароў.
Старая жанчына, якой 95 гадоў, і якая перажыла акупацыю, тыф, пасляваенны голад, працу санітаркай у бальніцы, заслугоўвае не рэпартажу пра яе дажыванне ў спусцелай вёсцы. Яна заслугоўвае, каб яе зямля жыла. Але пакуль дзясяткі трыльёнаў укладваліся ў прыгожыя шыльды аграгарадкоў і паказныя справаздачы, Бродзішча, Засялечча і тысячы падобных ім вёсак Магілёўшчыны ціха зніклі з карты.
А на гэтай карце вось-вось з’явіцца новая кропка – пункт захавання радыеактыўных адходаў. Магчыма, якраз у Магілёўскай вобласці.
У Клімавіцкім раёне будуецца свінагадоўчы комплекс, які пераверне ўяўленні магілёўцаў пра прагрэс. Усё аўтаматызавана, усё ў анлайне. І свіней у раёне стане ў два разы больш.
Лічбавізацыя прыйшла ў вёску дзякуючы прэферэнцыям указа Лукашэнкі «Аб мерах па развіцці паўднёва-ўсходняга рэгіёна Магілёўскай вобласці».
Тры гады таму ў Клімавіцкім раёне ўжо запрацаваў рэпрадуктар на 3,6 тысячы свінаматак. Цяпер дабудоўваюць другую чаргу – комплекс па адкорме на 51 тысячу галоў у год.
Гатоўнасць 85 працэнтаў, увядзенне – чэрвень бягучага года. Калі пагалоўе свіней у раёне падвоіцца, вытворчасць свініны павялічыцца ў чатыры разы.
Праўда, усё гэта толькі планы. Калі абапірацца на факты, можна канстатаваць, што з кожным годам на Магілёўшчыне кратна павялічваюцца зусім не пагалоўі кароў і свіней, а абяцанні ўладаў.
У Мінску затрымана злачынная група, якая займалася тэлефонным махлярствам. Паводле інфармацыі МУС, на чале банды стаяў 44-гадовы ўраджэнец Асіповічаў – крымінальны аўтарытэт.
Затрыманне правялі супрацоўнікі ГУБАЗіК пры сілавой падтрымцы спецыяльнага атрада хуткага рэагавання. Акрамя асіповічаніна, за кратамі апынуліся двое яго падзельнікаў – раней судзімыя жыхары Мінска.
Тэлефонныя аферысты тэлефанавалі пажылым людзям, запалохвалі іх і выманьвалі грошы. Адна з ахвяр – 77-гадовая пенсіянерка, у якой злачынцы забралі больш за 40 тысяч рублёў.
Падчас ператрусаў у затрыманых знайшлі больш за 10 тысяч долараў наяўнымі і 12,5 тысячы пачкаў замежных цыгарэт без беларускіх акцызных марак. Гэта значыць, паралельна з махлярствам група, відаць, зарабляла і на кантрабандзе тытуню.
Сусветны дзень гемафіліі (World Hemophilia Day, з 1989 года).
Праводзіцца па ініцыятыве Сусветнай федэрацыі гемафіліі.
Мэта – прыцягнуць увагу грамадскасці да праблем дадзенага захворвання. Гемафілія – спадчыннае “мужчынскае”, “царскае” захворванне, звязанае з парушэннем працэсу згортвання крыві. Яно выяўляецца кровазліццямі ў суставы, мышцы і ўнутраныя органы.
Дата была абрана ў гонар дня нараджэння Фрэнка Шнайбеля – стваральніка Сусветнай федэрацыі гемафіліі.
1924 года. Аб’ядналіся кінастудыі Metro Pictures, Goldwyn Pictures і кампанія Маера з ўтварэннем Metro-Goldwyn-Mayer.
Заснавальнік студыі, кінапрэміі “Оскар”, сузаснавальнік амерыканскай Акадэміі кінематаграфіі – Луис Маер (1884–1957). Ён нарадзіўся ў Мінску.
Стварыў цэлую імперыю забаў, яго называюць творцам плеяды кіназорак Metro-Goldwyn-Mayer яе залатых гадоў, пра якіх казалі, што “іх больш, чым зорак на небе”.
Маер удастоены ганаровага “Оскара” і зоркі на Галівудскай алеі славы. Часопіс “Time” абраў яго ў якасці аднаго са 100 самых уплывовых людзей XX стагоддзя. Маер мае зорку і на канадскай Алеі славы.
У яго гонар названы Тэатр Універсітэта Санта-Клары ў Каліфорніі.
Луіс Майер быў шмат разоў адлюстраваны ў мастацкім кіно (у асноўным сатырычна) – у больш чым 30 кінастужках.
1925 год.Нарадзіўся Мікалай Падшываленка (1925-2015).
Заслужаны трэнер БССР, сакратар Магілёўскай абласной федэрацыі футбола, стваральнік ветэранскай арганізацыі Магілёўскага абласнога ўпраўленя МУС.
Кіраўнік праекта стварэння помніка байцам батальёна міліцыі капітана К. Уладзімірава ў в. Гаі Магілёўскага раёна.
Удзельнік Вялікай Айчыннай вайны. Палкоўнік. Быў сябрам Таварыства беларускай мовы імя Ф. Скарыны.
1932 год.Рашэннем Савета Народных Камісараў БССР заснаваны Цэнтральны батанічны сад у Мінску.
Будаўніцтва саду вялося пад кіраўніцтвам члена-карэспандэнта АН БССР прафесара С. Мельніка на тэрыторыі ў 106 гектараў, якая раней належала Усебеларускай сельскагаспадарчай і прамысловай выстаўцы.
Зараз Цэнтральны батані́чны сад Нацыянальнай акадэміі навук Беларусі – адзін з буйнейшых батанічных садоў Еўропы, як па сваёй плошчы – 153 га, так і па складу сваёй калекцыі – каля 10 000 назваў. Батанічны – помнік прыроды рэспубліканскага значэння.
Буйны твор садова-паркавага мастацтва. Спалучае рысы пейзажнай i рэгулярнай планiроўкi. З’яўляецца не толькі цэнтрам навуковых даследаванняў, але і традыцыйным месцам адпачынку жыхароў і гасцей сталіцы.
Размешчаны ў паўночна-ўсходняй частцы Мінска, непадалёку ад праспекта Незалежнасці, каля парка Чалюскінцаў.
1936 год. Нарадзіўся Міхась Рудкоўскі.
Беларускі паэт і перакладчык. Скончыў Пінскае педагагічнае вучылішча, Брэсцкі педінстытут.
Настаўнічаў, працаваў у ганцавіцкай раённай газеце «Сялянская праўда»,на Брэсцкай студыі тэлебачання.
Аўтар 9 зборнікаў вершаў. Перакладаў з украінскай, рускай і польскай моў.
Імя паэта прысвоена Астроўскай сярэдняй школе Ганцавіцкага раёна.
Памёр 7 ліпеня 1991 года.
1957 год. У в. Цяхцін Бялыніцкага раёна нарадзіўся Рыгор Кастусёў.
Палітычны і грамадзкі дзеяч, старшыня Магілёўскай абласной Кааліцыі дэмакратычных сілаў, старшыня Партыі БНФ.
Скончыў Беларускую сельскагаспадарчую акадэмію. Працаваў ў саўгасе «Друць», дырэктарам саўгаса «Іскра» Бялыніцкага раёна, дырэктарам Шклоўскага райаб’яднання жыллёва-камунальнай гаспадаркі і магілёўскага сумеснага беларуска-ўкраінскага прадпрыемства «Гідрасіла – Белая Русь», у пецярбургскай ТАА «СтройАрком», намеснікам гендырэктара ТАА «Асвейская будаўнічая кампанія».
З 1996 года сябра Сойма БНФ, старшыня Магілёўскай абласной арганізацыі БНФ (2002–2009), намеснік старшыні Партыі БНФ. 30 верасня 2017 года абраны старшынёй Партыі БНФ.
У час прэзідэнцкіх выбараў 2006 года быў даверанай асобай А. Мілінкевіча. На выбарах 2010 года быў кандыдатам у прэзідэнты. На прэзідэнцкіх выбарах 2015 года ўвайшоў у ініцыятыўную групу Т. Караткевіч.
12 красавіка 2021 года быў затрыманы супрацоўнікамі КДБ. Яго абвінавацілі ў спробе перавароту ў Беларусі.
5 верасня 2022 года судом Мінскага раёна прысуджаны да 10 гадоў пазбаўлення волі. 3 ліпеня 2024 году выйшаў на волю.
1963 год. У Кіеве памёр ураджэнец маёнтка Скубейкава (зараз у складзе в. Дварэц Глускага раёна) Сцяпан Шутаў (1902–1963).
Танкіст, камбрыг, палкоўнік. Двойчы Герой Савецкага Саюза – адзін з 7 беларусаў і адзін з 3-х ураджэнцаў Магілеўшчыны разам з І. Якубоўскім і І. Гусакоўскім. Удзельнік грамадзянскай і Другой Сусветнай войнаў.
Некаторыя крыніцы памылкова ўказваць месца нараджэння – п. Глуша Бабруйскага раёна.
На службе ў войску з 1924 года. Да вайны камандаваў танкавым батальёнам.
Ваяваў на Заходнім, Волхаўскім, Варонежскім, 1-м і 2-м Украінскіх франтах, удзельнічаў у бітве пад Масквой, на Курскай Дузе, фарсіраваў Дняпро, вызваляў Кіеў, герой Яска-Кішынёўскай аперацыі. Службу скончыў намеснікам камандзіра 9-га гвардзейскага механізаванага корпуса пасля цяжкага ранення ў Трансільванскіх Альпах і ампутацыі рукі ў верасні 1944 года.
Бронзавы бюст усталяваны ў 1949 годзе на радзіме – в. Дварэц Глускага раёна, у 1970-х са згоды сям’і бюст перанесены ў цэнтральны парк Глуска, ягоным імем названы вуліцы ў Маскве, Кіеве, Асіповічах, Бабруйску, Глуску, Магілёве (Бароўка), в. Сіманавічы Бабруйскага раёна, школа ў Глускім раёне.
1976 год. Нарадзіўся Уладзімір Самсонаў.
Беларускі гулец у настольны тэніс. Першы ў свеце гулец, які выйграваў турніры сусветнай серыі на ўсіх пяці кантынентах: у Афрыцы, Амерыцы, Азіі, Еўропе і Аўстраліі.
Трохразовы пераможца Кубка свету (1999, 2001, 2009), 6-разовы чэмпіён Еўропы ў розных разрадах, 4-разовы пераможца «Еўра-Топ12», 9-разовы пераможца еўрапейскай Лігі чэмпіёнаў. Станавіўся першай ракеткай свету.
Удзельнік шасці Алімпіяд.
У 2021 годзе абвясціў пра завяршэнне сваёй прафесійнай кар’еры.
1988 год. Нарадзіўся Андрэй Арамнаў.
Беларускі цяжкаатлет. Алімпійскі чэмпіён.
На Летніх Алімпійскіх гульнях-2008 у Пекіне атрымаў залаты медаль у вагавай катэгорыі 105 кг, устанавіўшы тры сусветныя рэкорды: у рыўку (200 кг), штуршку (236 кг) і суме дваябор’я (436 кг).
Пераможца нацыянальнага адкрытага публічнага конкурсу «Трыумф. Героям спорту 2008» у Беларусі ў намінацыі «Спартсмен года».
У 2016 годзе зышоў са спорту, але ў 2018 аднавіў спартыўную кар’еру. Стаў срэбраным прызёрам Чэмпіянату Еўропы-2019 у вагавай катэгорыі да 109 кг і рэкардсменам Беларусі. Стаў адным з галоўных герояў планетарнага першынства ў Патаі (Тайланд), выйграўшы срэбра ў шматбор’і, а таксама малыя сярэбраны і бронзавы медалі ў асобных практыкаваннях. Прызнаны найлепшым спартсменам 2019 года ў Беларусі.
2016 год. Памёр Вітаўт Мартыненка (1959–2016).
Беларускі музычны крытык, журналіст, пісьменнік, паэт.
Працаваў у розных СМІ, на «Радыё Свабода». Арганізаваў і праводзіў першы беларускі музычны хіт-парад.
Сустваральнік першага ў Беларусі рок-клуб «Няміга» (1985). Удзельнік арганізацыі фэстаў «Тры колеры», «Басовішча».
Аўтар музыказнаўчых кніг, шматлікіх публікацый на тэмы нацыянальнай музыкі, літаратуры, грамадска-палітычнага жыцця.
Купальны сезон стартуе 1 мая і яго цэнтральнай кропкай прыцягнення застаецца зона адпачынку на Грабянёўскім вадасховішчы або Святым возеры.
За апошнія два гады тэрыторыя тут сур’ёзна змянілася: у ходзе рэканструкцыі ачысцілі дно, прыбралі востраў, пашырылі берагавую лінію, завезлі новы пясок, прыбралі лішнюю расліннасць.
Да пачатку сезона на пляжы ўсталююць парасоны і ляжаки. Для зручнасці наведвальнікаў абсталююць пітныя фантанчыкі і душавыя. Ужо гатовы чатыры дзіцячыя пляцоўкі з гульнявымі комплексамі і трэнажорамі.
Паралельна працягваецца абнаўленне выратавальнай станцыі таварыства выратавання на водах. На станцыі з’яўляюцца новыя катэры, сучаснае выратавальнае абсталяванне, аквалангі, а таксама праводзіцца рамонт памяшканняў.
Пасля чарговага абнаўлення пляж стаў адным з найбуйнейшых і найбольш абсталяваных у вобласці. Па ўзроўні добраўпарадкавання ён прыкметна пераўзыходзіць аналагічныя зоны адпачынку ў рэгіёне і можа служыць арыенцірам для іншых гарадоў.
Пастаянна на станцыі задзейнічаны 18 чалавек, яшчэ пяць будуць працаваць на сезонным пасту. Такім чынам, за бяспекай адпачывальнікаў будуць сачыць 23 спецыялісты.
Чакаецца рост наведвальнасці. Калі раней у самыя загружаныя дні на пляжы адначасова знаходзіліся да трох з паловай тысяч чалавек, то гэтым летам прагназуецца забяспечыць адпачынак шасці тысячам магілёўцаў.
Дзіўны заклік аб дбанні аб чысціні ў лесе размешчаны каля пітомніка раслін “Зялёны рай”, што пад Магілёвам.
“Грамадзянін! Вязеш бабу рухаць у лес – не пакідай там кандомы і іншае смецце…” – заклікае надпіс каля Чавускай шашы пад шыльдай аб тым, што яна вядома як Чавускі гасцінец з XV стагоддзя.
Відэазапіс у ТікТоку размясіціла жыхарка Віцебска Лена, якая прыехала ў пітомнік набыць патрэбныя ёй расліны.
У каментарах пад відэа некаторыя карыстальнік выказвалі неразуменне словам “рухаць”, якое ў беларускай мове значыць – “нешта перамяшчаць”. Справа ў тым, што гэтае слова ў сучаснай размоўнай польскай мове якраз і азначае працэс, пры якім выкарыстоўваюцца кандомы, хаця раней сэнс слова быў аднолькавы з беларускім. Гэты паланізм, імаверна, прыўнёс гаспадар “Зялёнага раю” Уладзімр Пухоўскі, які мае дзелавыя сувязі з польскімі контрагентамі.
Кулічы, ёгурты, кандытарскія вырабы і мяса спрабавала вынесці з адной з бабруйскіх школ яе загадчыца гаспадаркі.
Падазрона сябе паводзячую маладую жанчыну заўважылі падчас праверкі супрацоўнікі Бабруйскага аддзела аховы. Яна відавочна нервавалася, азіралася па баках і з цяжкасцю несла два аб’ёмныя пакеты.
Пры аглядзе рэчаў, у пакетах былі выяўленыя прадукты харчавання: кулічы, ёгурты, кандытарскія вырабы і мяса. Як высветлілася, загадчыца гаспадаркай вырашыла такім чынам разнастаіць свой рацыён за кошт школьнай каморы. Агульны кошт канфіскаванага харчавання склаў больш за 80 рублёў. У дачыненні да бабруйчанкі складзены адміністрацыйны пратакол па факце дробнага крадзяжу.
