Tag: Магілёўская вобласць

У Магілёўскай вобласці маса людзей кантактавала з адной шаленай жывёлінай

Навіна ад

У Магілёўскай і Гарадзенскай абласцях за апошнія дні 16 чалавек кантактавалі з жывёламі, хворымі на шаленства.

Як паведамляе прэс-служба Міністэрства аховы здароўя, у ходзе эпідэміялагічнага расследавання ўстаноўлена, што ў адным выпадку гэта быў бяздомны кот, у другім – авечка.

Для прадухілення захворвання на шаленства пацыенты атрымліваюць цяпер антырабічнае лячэнне па поўным курсе.

Як піша “Позірк”, выпадкі кантакту з жывёламі, хворымі на шаленства, у Беларусі адбываюцца штогод. Так, за першую палову 2024 года па антырабічную дапамогу звярнуліся 166 чалавек, якія кантактавалі з жывёламі, хворымі на шаленства.

Фота з адкрытых крыніц

Жыхары Магілёўшчыны цяпер могуць падавацца на польскую візу ў Віцебску

Навіна ад

Ад 2 ліпеня 2025 года жыхары Магілёўшчыны маюць магчымасць падаваць заявы на атрыманне польскай візы ў Віцебску.

“2 ліпеня 2025 г. візавы цэнтр VFS Global У г. Віцебску, размешчаны па адрасе вул. Янкі Купалы д. 2/1, пачне прыём заяў на Шэнгенскія і нацыянальныя візы ў Рэспубліку Польшча. Візавы цэнтр у Віцебску адносіцца да Мінскай консульскай юрысдыкцыі і будзе прымаць заяўнікаў, зарэгістраваных па месцы жыхарства ў Мінскай, Магілёўскай, Гомельскай і Віцебскай абласцях”, – гаворыцца ў паведамленні на сайце кампаніі VFS Global, якая мае права абслугоўваць тых, хто звяртаецца за візай для прыезда ў Польшчу.

Да сённяшняга дня жыхары Магілёўшчыны маглі падавацца на польскую візу толькі ў Магілёве, Гомелі і Мінску.

Фотаздымак з адкрытых крыніц

Браканьеры ў Касцюковічах добраахвотна выдалі рыбнагляду сто метраў сетак

Навіна ад

Касцюковіцкая міжраённая інспекцыя аховы жывёльнага і расліннага свету падвяла вынікі аперацыі “Нераст”.

Касцюковіцкай міжраённай інспекцыяй аховы жывёльнага і расліннага свету выяўлена 19 фактаў парушэнняў правілаў аматарскага рыбалоўства.

Выяўлена 114 забароненых прылад рыбалоўства, з якіх 84 рыбалоўныя сеткі агульнай даўжынёй больш за паўтара кіламетра.

Сем браканьераў раскаяліся, сталі на шлях выпраўлення і добраахвотна выдалі рыбнагляду 15 забароненых снасцей, у тым ліку шэсць рыбалоўных сетак агульнай даўжынёй больш за 100 метраў.

Фота ілюстрацыйнага характару з адкрытых крыніц.

Як на Магілёўшчыне ўспаміналі пра калектыўныя дамовы

Навіна ад

Магілёўскія праўладныя прафсаюзы пахвалілася тым, што дапамаглі работнікам атрымаць выплаты, прадэманстраваўшы адначасова, што самі гэтыя работнікі нічога не ведаюць пра калектыўныя дамовы, якія заключаюцца пастаянна.

«Забытыя ільготы: як прафсаюзны маніторынг дапамог работнікам атрымаць тое, што ім належыць». Матэрыял з такім загалоўкам з’явіўся 16 чэрвеня 2025 года на сайце Магілёўскага абласнога аб’яднання прафсаюзаў.

«У адным з выпадкаў калектыўная дамова прадпрыемства прадугледжвала штогадовую матэрыяльную дапамогу ў памеры 30 базавых велічынь для адзінокіх бацькоў, якія выхоўваюць двух і больш непаўналетніх дзяцей. Аднак работнікі альбо не ведалі пра сваё права, альбо не падавалі адпаведных заяў. Падчас праверкі мы звярнулі ўвагу на гэты пункт і дапамаглі супрацоўнікам атрымаць належныя выплаты — у агульнай суме больш за 7 тысяч рублёў, па 1260 рублёў кожнаму», — перадае сайт словы галоўнага прававога інспектара працы Магілёўскай абласной арганізацыі прафсаюза работнікаў лесу і прыродакарыстання Дзмітрыя Мардачова.

Другі прыклад, як гаворыцца ў артыкуле, тычыўся работнікаў, якія вярнуліся на ранейшае месца працы пасля праходжання тэрміновай вайсковай службы і якім, згодна з калектыўнай дамовай, належала аднаразовая матэрыяльная дапамога.

«Нашы праверкі паказалі, што двое работнікаў не атрымалі гэтых выплат. Пасля нашага ўмяшання кожны з іх атрымаў па 630 рублёў», — хваліцца прававы інспектар.

І як бы за кадрам застаецца тое, што калектыўныя дамовы на гэтых прадпрыемствах былі заключаныя, як гэта прынята, паміж адміністрацыяй і прафсаюзамі. І гэтым прафсаюзам звычайныя іх члены плацяць грошы. Прававы інспектар чамусьці не задаў пытанне: чаму шараговыя члены прафсаюза нічога не ведаюць пра свае «дадатковыя гарантыі»? І не спытаў пра гэта ў прафсаюзных начальнікаў на прадпрыемствах.

Хаця адказ і так вядомы: ніхто не пытаўся ў шараговых членаў прафсаюзаў, што яны хочуць бачыць у калектыўнай дамове, і потым не тлумачыў ім, на што яны маюць права. Таму што насамрэч гэтыя калектыўныя дамовы — пустая фармальнасць як для адміністрацыі прадпрыемства, так і для ФПБ, якая ўжо даўно з’яўляецца прывадным рамянём гэтай самай адміністрацыі.

Але вось ад самаго Дзмітрыя Мардачова нейкая карысць людзям усё ж такі ёсць. Тут нічога не скажаш.

Фотаздымак: mogilev.1prof.by

У Мсціславе па адбітках пальцаў устанавілі асобу падазраванага

Навіна ад

Судовыя эксперты вызначылі асобу меркаванага злачынцы, які скраў грошы ў жыхара Мсціслава.

Да праваахоўнікаў звярнуўся жыхар Мсціслава, які паведаміў аб крадзяжы 11 000 расійскіх рублёў. Паводле яго слоў, ён пазнаёміўся з мужчынам на вуліцы і запрасіў яго дапамагчы з працай на прысядзібным участку. Пасля працы гаспадар паклікаў новага знаёмага за стол, дзе яны разам выпівалі, паведамляе газета «Святло Кастрычніка».

Раніцай наступнага дня гаспадар не знайшоў у хаце ні госця, ні грошай, што ляжалі ў кішэні курткі. Падчас агляду месца здарэння эксперты знайшлі адбіткі пальцаў на бутэльцы з-пад спіртнога, якія належылі раней судзімаму жыхару Віцебска. Там злодзея і затрымалі.

Фота ілюстрацыйнага характару з адкрытых крыніц.

Пад Чавусамі з помпай адкрылі ачышчальныя збудаванні

Навіна ад

У вёсцы Гарбавічы Чавускага раёна ўрачыста адкрылі новыя ачышчальныя збудаванні. Іх будаўніцтва і запуск – вынік супольных намаганняў мясцовых уладаў, дзяржаўных праграм і міжнародных грантаў на развіццё інфраструктуры, паведамляюць “Магілёўскія ведамасці”. Але, мяркуем, што гэты спіс датычных чытаць трэба ззаду наперад – міжнародныя арганізацыі далі грошы пад дзяржаўныя праграмы, каб на гэтым прапіярыліся чыноўнікі.

– Новыя тэхналогіі ачышчэння – гэта крок да чыстай прыроды, паляпшэння якасці жыцця і экалагічнай бяспекі рэгіёна, – сцвярджае старшыня Магілёўскага абласнога камітэта прыродных рэсурсаў і аховы навакольнага асяроддзя Канстанцін Цеплякоў.

А старшыня Чаускага райвыканкама Дзмітрый Акуліч паведаміў, што кошт аб’екта склаў 760 тысяч беларускіх рублёў, а будаўніцтва было завершана за два з паловай месяцы.

Генеральны дырэктар унітарнага прадпрыемства «Магілёўаблвадаканал» Мікалай Краўцоў адзначыў, што новыя збудаванні будуць мець доўгатэрміновы станоўчы ўплыў на экалагічны стан рэгіёна.

Мясцовыя жыхары, калі верыць газеце “Магілёскія ведамасці”, выказалі падзяку за праведзеную працу і надзею, што падобныя ініцыятывы будуць працягвацца і ў іншых населеных пунктах раёна.

Чыноўнікі любяць атрымліваць падзякі і рэзаць чырвоныя стужачкі. Пры гэтым, не варта забываць, што будаўніцтва ачышчальных збудаванняў не подзвіг. Вядома ж, доля гераізму тут прысутнічае – трэба ж неяк налаўчыцца і не адрэзаць сабе палец –  але перш за ўсё гэта проста службовы абавязак.

Фота: “Магілёўскія ведамасці”

Хоцімск мяняецца на вачах – па вуліцах стала можна спакойна ездзіць на ровары

Навіна ад

У горадзе з’явіліся роўныя дарогі, а пасля “Дажынак”, як сцвярджае мясцовы дэпутат, змянілася мысленне людзей. 

У Хоцімску пачалося будаўніцтва сучаснага комплексу па вырошчванні фарэлі — адной з самых каштоўных парод рыбы. Як паведамляе тэлеканал «Магілёў-4», магутнасць новага аб’екта складзе да тысячы тон прадукцыі штогод.

Праект рэалізуецца ў межах дзяржаўнай праграмы «Адзін раён — адзін праект». Развіваюцца не толькі прамысловыя аб’екты, але і сацыяльная сфера. У раённай бальніцы з’явіўся дзіцячы пакой, а матэрыяльна-тэхнічная база мясцовага аддзялення МНС была значна ўмацавана. 

Паводле слоў аднаго з мясцовых жыхароў, удзячнага ўладам, цяпер па вуліцах можна спакойна ездзіць нават на ровары — настолькі якасным стала дарожнае пакрыццё.

Як адзначае старшыня раённага савета “дэпутатаў” Яўген Мікалаенка, штуршком да ўсіх гэтых змен сталі праведзеныя ў Хоцімску абласныя «Дажынкі». Пасля гэтага ў раёне пачалося новае жыццё: з’явіліся ініцыятывы і змянілася мысленне людзей.

Страшна нават падумаць, што здарылася б з “жамчужынай” усходу Магілёўшчыны, калі б не “Дажынкі”.

Фота з адкрытых крыніц.

У Слаўгарадскім раёне з’явіліся два новыя помнікі прыроды

Навіна ад

Дзве крыніцы ў Магілёўскай вобласці атрымалі статус гідралагічных помнікаў прыроды мясцовага значэння. 

Рашэннем Слаўгарадскага райвыканкама ўведзены меры аховы, забаронены дзеянні, якія пагражаюць унікальным прыродным тэрыторыіям.

Гаворка ідзе пра два гідралагічныя аб’екты — «Крыніца Шведава крыніца» і «Крыніца Дальнія Сажэлкі» — яны абвешчаны помнікамі прыроды мясцовага значэння, паведамляе БелТА. Абедзьве яны зняходзяцца каля вёскі Любаны.

  • плошча «Крыніцы “Шведава крыніца» — 0,7536 гектара;
  • плошча «Крыніцы “Дальнія Сажэлкі» — 1,5072 гектара;

Ёсць у Слаўгарадскім раёне яшчэ і «Блакітная крыніца», якая лічыцца найбуйнейшай крыніцай ва Усходняй Еўропе і таксама з’яўляецца гідралагічным помнікам прыроды, але рэспубліканскага значэння. Усяго ў Слаўгарадскім раёне налічваецца 24 крыніцы.

Фота ілюстрацыйнага характару з адкрытых крыніц.

Вандруй. Адчуй. Натхняйся: на Магілёўшчыне ўдзел у акцыі прымуць 190 турыстычных аб’ектаў

Навіна ад

У межах рэспубліканскай акцыі «Вандруй. Адчуй. Натхняйся» жыхары і госці рэгіёна могуць бясплатна наведаць музеі, аграсядзібы, прыняць удзел у квэстах і майстар-класах, а таксама адчуць смак беларускай кухні.

Што такое «Вандруй. Адчуй. Натхняйся»?

Гэта штогадовая ініцыятыва Міністэрства спорту і турызму і Нацыянальнага агенцтва па турызме, якая праходзіць у Беларусі з 2022 года. Мэта — папулярызацыя ўнутранага турызму і знаёмства з турыстычнымі магчымасцямі краіны. Колькасць удзельнікаў расце штогод: калі ў 2022 годзе было 516 аб’ектаў, то ў 2023 — ужо 924, а ў 2024 годзе — больш за 1200. На Магілёўшчыне год таму ў акцыі бралі ўдзел 130 аб’ектаў турыстычнай сферы, пісалі mogilev.media, сёлета – 190. 

Праўда, збольшага, гэта ўдзел чыста фармальны – пераважная большасць арганізацый пазначылі свой удзел вельмі проста: “наведванне аб’екта, азнаямленне з паслугамі”.

Магілёўшчына: што чакае турыстаў?

Тым не менш, з 2 па 8 чэрвеня 2025 года Магілёўская вобласць прапануе некаторую праграму:

  • Бясплатныя экскурсіі ў музеях, мастацкіх галерэях і гістарычных аб’ектах.
  • Квэсты і майстар-класы для дзяцей і дарослых у культурных установах і аграсядзібах.
  • Дні адкрытых дзвярэй ў санаторыях, аграсядзібах, турыстычных комплексах і нават на прамысловых прадпрыемствах.
  • Дэгустацыі страв беларускай кухні ў мясцовых кавярнях і рэстаранах.
  • Экалагічныя сцежкі і прагулкі па заказніках для аматараў прыроды. 

Удзел у акцыі прымаюць розныя аб’екты: ад аграсядзіб і санаторыяў да музеяў і вытворчых прадпрыемстваў. Дакладны пералік усіх удзельнікаў і іх прапановы можна знайсці тут.

Фота: mogilev.media

Зборы тэрытарыяльных войскаў пачаліся ў Магілёўскай вобласці

Навіна ад

27 траўня ў Чэрыкаўскім і Краснапольскім раёнах Магілёўскай вобласці праходзяць зборы ваеннаабавязаных тэрытарыяльных войскаў.

Як заяўляе Міністэрства абароны Беларусі, мэта збораў — павышэнне гатоўнасці мясцовых выканаўчых органаў да дзеянняў ва ўмовах пагроз. Аднак эксперты звяртаюць увагу на ўсё большую мілітарызацыю грамадзянскай сферы і спробы рэжыму Лукашэнкі ўтрымліваць кантроль над грамадствам ва ўмовах геапалітычнай нестабільнасці.

Па словах ведамства, падчас збораў будзе адпрацоўвацца «комплекс мерапрыемстваў, накіраваных на павышэнне навыкаў службовых асоб выканаўчых камітэтаў у пытаннях фарміравання і падрыхтоўкі тэрытарыяльных войскаў да выканання задач». На практыцы гаворка ідзе пра ўзаемадзеянне паміж сілавымі структурамі, органамі мясцовай улады і ваеннымі фарміраваннямі ў выпадку ўзнікнення надзвычайных або крызісных сітуацый.

Асобая ўвага, як адзначае ведамства, надаецца каардынацыі разнастайных сілаў — акрамя саміх тэрытарыяльных войскаў, у трэніроўках задзейнічаны органы ўнутраных спраў, а таксама падраздзяленні ўнутраных войскаў.

Воінскія зборы і вучэнні ў Беларусі сталі звычайнай з’явай на фоне працяглай вайны Расіі супраць Украіны, у якой афіцыйны Менск фактычна падтрымлівае дзеянні Крамля.

«Тэрытарыяльныя войскі — гэта не толькі інструмент абароны, як гэта падаецца афіцыйна. Гэта таксама структура, прызначаная для ўзмацнення ўнутранага кантролю ва ўмовах мабілізацыйнай эканомікі і магчымых масавых хваляванняў», — кажа ваенны аналітык Павел Лузін. Падрабязней яго меркаванне можна прачытаць у артыкуле на Riddle Russia.

«Для Лукашэнкі важна трымаць рэгіёны пад пастаянным назіраннем, асабліва паблізу ўсходняй мяжы. Магілёўская вобласць, з яе блізкасцю да расійскай мяжы, мае стратэгічнае значэнне. Актывізацыя збораў там — гэта частка агульнай стратэгіі прэвентыўнага кантролю», — дадае беларускі палітолаг Валерый Карбалевіч. Яго аналіз сітуацыі прадстаўлены ў інтэрв’ю для Euronews.

У Магілёўскай вобласці, як і па ўсёй краіне, тэрытарыяльныя войскі фарміруюцца на базе раённых ваенкаматаў. У іх склад уваходзяць грамадзяне, якія знаходзяцца ў запасе і пражываюць у адпаведных раёнах. Афіцыйна яны прыцягваюцца для аховы аб’ектаў, забеспячэння правапарадку і рэагавання ў выпадку надзвычайных сітуацый.

Аднак, як падкрэсліваюць назіральнікі, тэрытарыяльныя войскі — гэта таксама дублюючы механізм сілавога рэагавання, здольны дзейнічаць у абыход рэгулярных воінскіх частак і міліцыі, асабліва ў выпадку масавых пратэстаў або нестабільнасці.

Фота ілюстрацыйнае