Category: Навіны

У Магілёўскай вобласці сілавікі пужаюць студэнтаў рэпрэсіямі

Навіна ад

ВНУ Магілёўшчыны ператвараюцца ў пляцоўкі для ідэалагічнай апрацоўкі, пагроз за “экстрэмісцкія” падпіскі і ўдзел у пратэстах.

 

У Горацкай дзяржаўнай сельскагаспадарчай акадэміі 19 лютага прафесарска-выкладчыцкі склад сабралі ў актавай зале на сустрэчу з пракурорам раёна Аляксандрам Тарасюком. Тэма яго выступу гучала як «правапарушэнні экстрэмісцкай накіраванасці і адказнасць за іх здзяйсненне», аднак фактычна гаворка ішла пра папярэджанні і запалохванне.

 

Мерапрыемства прайшло ў фармаце так званага тлумачальна-інфармацыйнага сходу. Выкладчыкам фактычна даручылі праводзіць «прафілактычную працу» са студэнтамі, каб не дапусціць «радыкалізацыі і прапаганды экстрэмісцкіх ідэй». У беларускіх рэаліях пад «радыкалізацыяй» улады разумеюць любую праяву палітычнай нелаяльнасці. Пракурор прыводзіў прыклады канкрэтных прысудаў па палітычна матываваных справах як папярэджанне пра наступствы для тых, хто не падзяляе афіцыйную пазіцыю.

 

Ужо на наступны дзень падобная сустрэча адбылася ў Магілёве, у Беларуска-расійскім універсітэце (БРУ), дзе стартавала штогадовая прававая дэкада «Мы і закон». Перад студэнтамі выступіў старшы інспектар па асаблівых даручэннях упраўлення аховы правапарадку і прафілактыкі УУС Магілёўскага аблвыканкама падпалкоўнік міліцыі Аляксандр Волкаў.

 

Ён папярэджваў пра крымінальную і адміністрацыйную адказнасць за «экстрэмісцкую дзейнасць», удзел у несанкцыянаваных мерапрыемствах і нават за распаўсюджванне матэрыялаў, уключаных у спіс «экстрэмісцкіх». На практыцы ў Беларусі да такіх матэрыялаў адносяць незалежныя медыя і тэлеграм-каналы, а падставай для пераследу становяцца нават падпіскі ў сацыяльных сетках.

 

Аляксандр Волкаў раней неаднаразова фігураваў у кантэксце палітычна матываваных рэпрэсіўных дзеянняў супраць жыхароў Магілёва. Яго выступ у ВНУ выглядаў як працяг агульнанацыянальнай кампаніі запалохвання, калі замест прававой асветы студэнтам дэманструюць прыклады пакарання за іншадумства.

 

Такім чынам, замест дыскусіі пра закон і правы чалавека студэнтам прапануюць урокі лаяльнасці. Універсітэты, якія павінны быць прасторай свабоднай думкі, усё больш становяцца часткай сістэмы кантролю і прафілактыкі «няправільных» поглядаў.

 

Фотаздымак: Mayday

Пракурор Магілёўскай вобласці абмежаваў доступ да двух інтэрнэт-рэсурсаў

Навіна ад

Ох, ужо гэтыя палякі! Доступ да двух інтэрнэт-рэсурсаў абмежаваны пастановай пракурора Магілёўскай вобласці.

Пракурор Магілёўскай вобласці прымяніў людажэрскі закон «Аб супрацьдзеянні экстрэмізму» да інтэрнэт-рэсурсаў terra-group.pl і ssl-production.pl

Уладальнікі рэсурсаў раней прызнаныя экстрэмісцкім фарміраваннем.

Функцыянаванне гэтых інтэрнэт-рэсурсаў, нібыта, супярэчыла інтарэсам дзяржавы, як гэта вызначана ў Канцэпцыі нацыянальнай бяспекі Рэспублікі Беларусь, іх дзейнасць была звязаная з пасягальніцтвам на асновы суверэнітэту і непахіснасць канстытуцыйнага ладу краіны.

Нагадваем, што з-за інтарэсаў “нацыянальнай бяспекі” ў Беларусі з 2020 года актыўна выкарыстоўваецца такі юрыдычны нонсэнс, як зваротная сіла закона, суддзяў прызначае Лукашэнка, які перапісвае Канстытуцыю краіны ў выгоду асабістым патрэбам.

 

Фота ілюстрацыйнага характару з адкрытых крыніц.

Магілёвец падмяняў Apple iPhone муляжамі

Навіна ад

Спрыт рук і ніякага махлярства. Магілёвец падмяняў дарагія гаджэты муляжамі.

Жыхар Магілёва падмяніў муляжом арыгінальны смартфон у адным з ламбардаў горада. Праз некалькі дзён у краме канфіскаваных тавараў у Мінску ён аналагічным спосабам падмяніў яшчэ тры тэлефоны – пры гэтым паспеў пераклейваць цэннікі і налепкі з кодамі.

Падмена была выяўлена, супрацоўнікі міліцыі ўстанавілі дачыненне да яе 21-гадовага мужчыны, аднак тэлефонаў пры ім ужо не аказалася – яны былі прададзены.

Узбуджана крымінальная справа за махлярства. Судовая экспертыза ўстанавіла, што канфіскаваныя муляжы – гэта проста набор карпусных кампанентаў.

У ходзе расследавання ўстаноўлена, што малады чалавек падмяніў арыгінальныя смарт-гадзіннікі і навушнікі AirPods на муляжы, у тым ліку пры продажы праз інтэрнэт-пляцоўку. Крымінальная справа накіравана ў суд.

 

Фота ведамаснага сайта Дзяржаўнага камітэта судовых экспертыз.

У кіраўніка магілёўскіх “дэпутатаў” Гарошкіна 48 гектараў аптымізму

Навіна ад

У Магілёўскай вобласці зноў усё расце. Прынамсі ў дакладах. Пракуратура прытрымліваецца іншага меркавання.

На чарговай, аж дваццаць першай сесіі магілёўскага абласнога “савета дэпутатаў” ужо дваццаць дзявятага склікання старшыня Аляксандр Гарошкін надаў асаблівае месца ў сваім справаздачным выступленні вынікам года добраўпарадкавання. Лічбы прагучалі ўражліва.

У вобласці высаджана:

  • 65 тысяч дрэў;
  • 86 тысяч кустоў;
  • 3,7 мільёна кветак;
  • амаль 48 гектараў новых газонаў.

Слухаючы гэта, хочацца не правяраць, а верыць. Бо 48 гектараў – гэта ўжо не клумба ля пад’езда, гэта амаль батанічны прарыў. Амаль невялікі нацыянальны парк.

Але па лукашэнкаўскай традыцыі пасля натхняльных лічбаў звычайна ідзе другі акт – проза жыцця.

Нагадаем, чым скончылася хваля зялёнага энтузіязму-2025 у абласным цэнтры паводле меркавання пракуратуры.

На кальцы вуліц Каштанавай і Крупскай па дакументах павінна была расці густая жывая агароджа з бірючыны – больш за 200 кустоў. Пракуратура разам са спецыялістамі абышла ўсё кальцо. Ніводнага куста. Калі камунальнікаў папрасілі паказаць, дзе менавіта гэта агароджа, паказваць аказалася няма чаго. Бірючына існавала выключна ў справаздачнасці.

На праспекце Шміта за два гады «высадзілі» 600 дрэў. У гэтай пасадцы ўдзельнічала паплечніца Гарашкіна – сенатар і галоўны рэдактар інфармагенцтва “Магілёўскія ведамасці” Ірына Пятрусевіч. Яна там пазіравала з лапатай. Пракурорская ж праверка паказала: калі што і вырасла, то толькі пустазелле вышэй чалавечага росту. Дрэвы – не.

Ля дома № 8 па вуліцы Крывуліна нібыта пасадзілі 79 туй. Знайшлі дзесяць. Астатнія, верагодна, пайшлі ў тую ж зялёную зону, што і бірючына.

Усё гэта прыпіскі толькі «Магілёўзелянбуду». А колькі іх было ў вобласці?

Адказ просты: гектары хлусні і цэнтнеры прыпісак.

 

Фота “Магілёскія ведамасці”.

У Магілеве гарэлі адразу тры аўтамабілі

Навіна ад

Адзін аўтамабіль цалкам знішчаны, а два атрымалі пашкоджанні ў выніку ўзгарання электраправодкі.

 

У ноч на 24 лютага ратавальнікам паступіла паведамленне аб узгаранні машын на вуліцы Алтайскай. У двары шматпавярховага дома гарэлі два легкавыя аўтамабілі, агонь таксама перакінуўся на трэці. Менавіта гэта ўбачылі супрацоўнікі МНС, калі прыехалі на выклік.

 

У выніку пажару знішчаны аўтамабіль “Кіа Рыа”, у аўтамабіля “Лада Веста” пашкоджана лакафарбавае пакрыццё злева і ўнутраная ашалёўка салона, у “Субару імпрэза” пашкоджана лакафарбавае пакрыццё справа, аплаўлены пярэдні бампер.

 

Меркаваная прычына пажару – парушэнне правілаў эксплуатацыі электрасетак і электраабсталявання (кароткае замыканне электраправодкі).

 

Скрыншот: mogilev.mchs.gov.by

Бабруйчанін нападпітку папрасіў Лукашэнку разабрацца з даішнікамі

Навіна ад

«Бл**дзь, дапамажыце мне нах**, Аляксандр Рыгоравіч!». З такімі словамі бабруйчанін запісаў зварот да Лукашэнкі.

 

Рознарабочы Алег Буднік з Бабруйска, яўна ў нецвярозым стане і не стрымліваючыся ў выразах у TikTok пераконвае Лукашэнку, што хаця ён і «бухаў і гуляў», але «машына не яго» і за стырном ён таксама не сядзеў. Зварот заўважыла “Наша Ніва”. Усю гісторыю Буднік не пераказвае, але яе сэнс можна зразумець з кантэксту. Дапамога Лукашэнкі патрабуецца для ўзмацнення перамоўнай пазіцыі ў канфлікце з мясцовымі даішнікамі.

 

Падчас звароту можна заўважыць жанчыну, якая з абыякавым выглядам праходзіць за спінай Будніка. «Звяртаюся да прэзідэнта Рэспублікі Беларусь Аляксандра Рыгоравіча Лукашэнкі. Мне далі штраф… Я п’яны за стырном не сядзеў! Не мая машына! Выбачайце мяне, калі ласка, нах**. А вось… з якога перапуду, нах**, я павінен плаціць 9 тысяч штрафу, нах**? Мне далі 9 тысяч штрафу… Я звяртаюся да прэзідэнта!»

 

Далейшы маналог выглядае так: “Ці гэта нельга? Так і так, я бухаў, так, я гуляў. Але за стырном я не сядзеў. Я яшчэ раз звярнуся да вас, Аляксандр Рыгоравіч. Дапамажыце. Таму што марна даказваць. Не дапамагае. Не дапамагае нічога.

 

Дапамажыце! Аляксандр Рыгоравіч, калі ў вас ёсць чалавечае стаўленне да закону, калі вы любіце свой народ… Давайце… давайце і гэта… Так… Ну я не сядзеў за гэтым рулём. Я гатовы ісці на паліграф… Ну дэтэктар хлусні гэта не доказ. Ну як… як так?

 

Ну як так, ну даішнікі не разбіраюцца. Не хочуць… не хочуць зразумець, што я за рулём не сядзеў. Калі шчыра, можна мне… Ой… Я не ведаю, як сказаць. Я проста чалавек. Просты. Просты чалавек.

 

Звяртаюся да прэзідэнта Рэспублікі Беларусь. Памажыце. Ці не… ці не дапамажыце… Ці законаў у нас у краіне няма. Ну я думаю, што няма. Я думаю, што няма законаў у нас у краіне.

 

Звяртаюся да прэзідэнта. Калі ён мяне пачуе, спадзяюся. Ці закону няма. Ці, як вы кажаце, карупцыя. Дык вось, карупцыя была. Падкупілі. Не ведаю, што там зрабілі. Ё-маё. Вось. Звяртаюся».

 

Пасля першага звароту Буднік апублікаваў і другі, карацейшы і такога ж зместу, але выявілася важная дэталь.

 

На апошняй секундзе, разварочваючыся да сваёй сужыцельніцы, Алег у сэрцах выдае фразу: «Бл**дзь… Усё? Задаволеная?». З чаго становіцца зразумела, хто настаяў на такім спосабе выратавання сямейнага бюджэту. 

 

Што цяпер з аўтарам і яго сужыцелькай — невядома. Запісы зніклі з TikTok.

 

Фотаздымак: “Наша Ніва”

Чорная магія з наступным выкрыццём. У Магілёве пенсіянерка перавяла буйную суму аферыстам.

Навіна ад

У Магілёве 61-гадовая жанчына стала ахвярай інтэрнэт-аферстаў, паверыўшы ў абяцанні «нетрадыцыйнага аздараўлення». Сума шкоды перавысіла 46 тысяч рублёў.

Паводле інфармацыі Кастрычніцкага РАУС  Магілёва, адна жанчына адгукнулася ў сацыяльнай сетцы на аб’яву пра альтэрнатыўныя спосабы аднаўлення самаадчування. У перапісцы невядомая прадставілася памочніцай экстрасэнса і прапанавала доступ да закрытага фармату «абрадаў». Для ўдзелу, а таксама набыцця неабходных атрыбутаў патрабавалася аплата.

Спачатку магілёўчанка перавяла больш за 38 тысяч рублёў з асабістых зберажэнняў. Калі грошы скончыліся, яна пачала пазычаць сродкі ў сваякоў і знаёмых. У выніку агульная сума пераведзеных сродкаў перавысіла 46 тысяч рублёў.

Западазрыўшы падман, 40-гадовы сын жанчыны звярнуўся ў праваахоўныя органы. Следчыя ўзбудзілі крымінальную справу па факце махлярства.

 

Фота ілюстрацыйнага характару з адкрытых крыніц.

“Жаночыя рукі” могуць з’явіцца ў Бабруйску

Навіна ад

Лізавета Бублей стала пераможцай бабруйскага агляду-конкурсу моладзевых ініцыятыў са сваім праектам малых архітэктурных форм “Жаночыя рукі”.

 

Як піша выданне “Беларускі час”, на конкурс было прадстаўлена 54 заяўкі, але да фіналу дайшлі толькі 24. Праект “Жаночыя рукі” інжынера садова-паркавай гаспадаркі КУП «ДЭП Бабруйска» Лізаветы Бублей больш за ўсё спадабаўся журы. 

 

Пераможца прадумала не толькі мастацкую канцэпцыю, але і тэхнічныя рашэнні. Скульптуры плануецца вырабіць са шклапластыку — трывалага, устойлівага да вандалізму матэрыялу, які не патрабуе складанага догляду. Паводле слоў Лізаветы, яна даўно цікавілася магчымасцямі гэтага матэрыялу і звяртала ўвагу на працы мінскіх майстроў.

 

Паводле задумы аўтара, вуліцы Бабруйска могуць ператварыцца ў своеасаблівую галерэю пад адкрытым небам, дзе галоўнымі вобразамі будуць пяшчота і стваральная энергія.

 

Канкрэтныя месцы для ўсталявання новых арт-аб’ектаў пакуль не вызначаны. Лізавета прызнаецца, што хоць і прыехала ў Бабруйск з Гродзенскай вобласці, горад паспела добра вывучыць. Сярод магчымых лакацый яна называе знакавыя месцы: кампазіцыя «Рукі-калыска» магла б з’явіцца каля радзільнага дома — там, дзе пачынаецца жыццё, а скульптура, прысвечаная ведам, — побач са школамі ці каледжамі, падкрэсліваючы сувязь сучаснасці з павагай да каранёў.

 

Такім чынам, «Жаночыя рукі» могуць стаць новым сімвалічным акцэнтам у гарадской прасторы Бабруйска.

 

Фотаздымак: “Беларускі час”

Украінскі палітвязень сядзіць у магілёўскай турме без перадач і спатканняў

Навіна ад

Украінец Павел Кабарчук, які асуджаны на 20 гадоў зняволення, утрымліваецца ў турме №4 у Магілёве без перадач, пасылак, грашовых пераводаў і спатканняў.

 

Пра цяжкую долю ўкраінскага палітзняволенага Праваабарончаму цэнтру “Вясна” распавёў праваабаронца Уладзь Лабковіч, які таксама знаходзіўся ў магілёўскай турме разам з Кабарчуком, і быў прымусова вывезены ва Украіну ў снежні 2025 года.

 

Паводле Лабковіча, з-за тое, што ўкраінец увесь час без перадач і спатканняў, гэта значна ўскладняе ўмовы ўтрымання для палітвязня. “У мяне была адна базавая і былі пераводы ад родных, таму я стараўся набываць яму самае неабходнае. Важна, каб ён таксама меў нейкую падтрымку, бо ён знаходзіцца ў цяжкіх умовах. Апроч таго, што яму будуць дапамагаць іншыя зняволеныя, іншай магчымасці трымацца ў яго няма. Павел пісаў заявы на тое, каб яму выдалі гаспадарчае мыла. Бо яму трэба і самому мыцца, і рэчы праць. Можа з пятай ці шостай спробы адміністрацыя турмы злітавалася над ім і ў верасні (заявы пісаў з траўня) выдала яму кавалачак гаспадарчага і лазневага мыла. Іх, канешне, хапае толькі на тыдзень. Калі мяне пераводзілі з турмы ў СІЗА КДБ, то я пакінуў частку сваіх рэчаў Паўлу, хоць і сам не ведаў, куды мяне забіраюць і вязуць”, – распавёў Лабковіч.

 

Як ўзгадвае Лабковіч, Павел знаходзіцца ў магілёўскай турме ад траўня 2025 года. Да гэтага ён быў у калоніі №1 Наваполацка. “Павел кепска гаворыць па-расейску – ён цалкам украінскамоўны. Калі яшчэ неяк размаўляе па-расейску на простыя словы, то пісаць яму цяжка. Расейскую мову ён пачаў вучыць толькі ў Беларусі пасля затрымання. Але ніякіх перакладчыкаў ніколі ў яго не было”, – кажа праваабаронца. 

 

Ён характарызуе ўкраінца як вельмі адукаванага хлопца, які любіць літаратуру. “Ён шмат чытае ў зняволенні. Я яму дапамагаў з рэчамі, якія яму незразумелы. Яму дазволілі консула. Ён прывёз Паўлу некалькі лістоў ад жонкі і маці, але яму іх так і не аддалі. Лісты ад родных ён не атрымлівае да гэтага часу, дазвалюяць толькі званок раз на месяц да жонкі”, – сцвярджае Лабковіч.

 

Да затрымання Павел працаваў кіроўцам — вазіў людзей на працу з Украіны ў Польшчу. Уладзь апісвае ўкраінскага палітвязня як вельмі моцнага, цікавага і шчырага чалавека. 

 

“Ён вельмі гаспадарлівы, кампанейскі і пазітыўны хлопец. Павел увесь час казаў мне, што нельга маркоціцца і хутка ўсё скончыцца. Маральны стан у яго быў у норме, ён трымаецца. Вельмі спадзяецца, што яго хутка абмяняюць ці проста аддадуць Украіне. Калі Павел быў ужо за кратамі, у яго нарадзіўся сын Ян. Ён вельмі сумуе па жонцы, якую вельмі кахае, і сыну, якога яшчэ не бачыў і нават не ўяўляе, як ён выглядае. Але падчас званка з жонкай Павел чуў голас свайго сына, якому амаль два гады. Павел хвалюецца за бацьку, за яго стан здароўя”, – ўзгадвае Уладзь Лабковіч. Бацька Паўла Сяргей Кабарчук, таксама палітзняволены, знаходзіцца ў аршанскай калоніі №8.

 

Лабковіч распавёў, што аднойчы ў Паўла здарыўся прыступ, і ён ледзь не згубіў прытомнасць. “Па нашым патрабаванні яму аказалі медыцынскую дапамогу. Бо так яго ігнаравалі і казалі: “Зрабіце яму гарбаты”, – кажа палітвязень.

 

Праваабаронца распавядае, што 16 чэрвеня 2025 года сукамернікі адзначылі Дзень народзінаў Паўла — ён акурат выйшаў з ШІЗА.

 

“Ён зрабіў цудоўны стол. Дзесьці дастаў апошнюю згушчонку. У нас не было магчымасці паесці чагосьці салодкага. Павел зрабіў смачную аўсяную кашу са згушчонкай. Для нас гэта была адна з самых смачных страваў, якія я пакаштаваў за ўвесь гэты перыяд. Каштоўнасць гэтага была найвялікшая. Павел вельмі шчыры чалавек — ён кожнаму ішоў на дапамогу”, – узгадвае Уладзь Лабковіч. 

 

Сына і бацьку з Украіны Паўла і Сяргея Кабарчукоў затрымалі ў лютым 2024 года. Тады ў Лельчыцкім раёне быў абʼяўлены рэжым “контртэрарыстычнай аперацыі”. Пазней КДБ адсправаздачыўся пра затрыманне “тэрарыстаў”. На апублікаваных прапагандыстамі здымках Павел выглядаў збітым. Вядома, што ў СІЗА КДБ затрыманых даставіў верталёт.

 

Кабарчукі паходзяць з маленькай вёскі ў Валынскай вобласці, дзе іх чакае сям’я. Паводле чатырох артыкулаў Крымінальнага кодэкса іх асудзілі як “дыверсантаў СБУ” да 20 гадоў няволі. Іх тэрміны мусяць скончыцца толькі ў 2043 годзе. Як нядаўна стала вядома праваабаронцам, яшчэ ў СІЗА 63-гадоваму Сяргею Кабарчуку дыягнаставалі анкалогію. Які стан яго здароўя цяпер ці атрымлівае ён неабходную медыцынскую дапамогу – невядома.

 

Беларускія праваабаронцы ў кастрычніку 2024 года прызналі абодвух Кабарчукоў палітзняволенымі.

 

Фотаздымак: Праваабарончы цэнтр “Вясна”

На Магілёўшчыне на чыгунцы значна ўзрасла колькасць смяротных выпадкаў

Навіна ад

Стала вядомая статыстыка нясчасных выпадкаў на БЧ за 2025 год. У Магілёўскім аддзяленні адзначаецца найвялікшы ўзровень траўматызма.

 

Згодна інфармацыі “Супольнасці чыгуначнікаў Беларусі”, усяго ў краіне летась загінулі тры работнікі чыгункі. Два з іх працавалі ў Магілёўскім аддзяленні. У 2024 годзе на Магілёўшчыне смяротных выпадкаў траўміравання не было. Акрамя таго, у Магілёўскім аддзяленні меў месца нясчасны выпадак з цяжкім зыходам. Пазалетась такіх выпадкаў было тры. 

 

Як адзначаецца ў прыведзеным “Супольнасцю” аналізе стану аховы працы, прамысловай бяспекі, аховы здароўя работнікаў на Беларускай чыгунцы за 2025 год, найбольш высокі ўзровень траўматызма (53% ад усіх нясчасных выпадкаў) адзначаецца ў Брэсцкім і Магілёўскім аддзяленнях.

 

Акрамя таго, у гаспадарцы электрыфікацыі і электразабеспячэння адбылося два нясчасныя выпадкі са смяротным зыходам з работнікамі Брэсцкай і Магілёўскай дыстанцый электразабеспячэння.

 

Да таго ж у сельскагаспадарчым дачынным прадпрыемстве “Авангард” Магілёўскага аддзялення меў месца нясчасны выпадак са смяротным зыходам з кіроўцай аўтамабіля.

 

У аналізе адзначаецца, што ў Брэсцкім і Магілёўскім аддзяленнях незадавальняючая арганізацыя работы па сістэме кіравання аховай працы і фармальны падыход у шэрагу структурных падраздзяленняў, дзе назіраецца наўпроставая прычынна-выніковыя сувязі паміж невыкананнем патрабаванняў аховы працы і ростам траўматызма.

 

У якасці прыкладу прыводзіцца тое, што ў Магілёўскай дыстанцыі грамадзянскіх збудаванняў нізкі ўзровень арганізацыі работы па забеспячэнні бяспечных умоў працы (у гаражах пры працуючых машынах не адчыняюцца дзверы, у бляшаным цэху складзіраваны лісты бляхі на праходзе і г.д.). У той жа час у Крычаўскай дыстанцыі пуці не абсталявана працоўнае месца па наплаўцы рэек. 

 

Сярод іншых праблем, якія выявіліся ў Магілёўскім аддзяленні, гэта незадавальняючая праца камісій структурных падраздзяленняў па кантролю якасці выдаваемых працаўнікам сродкаў індывідуальнай аховы. Таксама маюцца недахопы ў санітарна-бытавым забеспячэнні.

 

Што ж тычыцца прамысловай бяспекі, то і тут Магілёўскае аддзяленне сярод праблемных.  Напрыклад, у 2025 годзе зацверджаныя спісы небяспечных аб’ектаў, якія трэба было абследаваць, выконваліся не ў поўным аб’ёме. 

 

У сувязі з ростам траўматызму ў гаспадарцы электрыфікацыі і электразабеспячэння БЧ быў праведзены шэраг адпаведных мерапрыемстваў, аднак у Магілёўскай дыстанцыі электразабеспячэння чамусьці не набылі манекен-трэнажор для адпрацоўкі навыкаў аказання сардэчна-сасудзістай рэанімацыі. Адзначаецца і недахоп кадраў, так Магілёўскай дыстанцыі электразабеспячэння з кастрычніка 2025 года вакантна пасада спецыяліста па ахове працы.

 

За ўвесь 2025 года на БЧ адбылося 105 выпадкаў пагаршэння здароўя работнікаў на працоўных месца (у 2024 годзе – 94). Пры гэтым у Магілёўскім аддзяленні – 19. Больш толькі ў Баранавіцкім – 29. 

 

Як падагульняе “Супольнасць чыгуначнікаў Беларусі”, у цэлым становішча з забеспячэннем норм і ўмоў аховы працы на БЧ не змянілася. Па-ранейшаму назіраецца перапіска дзеля перапіскі і стварэнне віду бурлівай дзейнасці замест распрацоўкі і ўкаранення сапраўды неабходных і эфектыўных, у тым ліку тэхнічных, мер, накіраваных на папярэджанне і выключэнне вытворчага траўматызму.

 

Фотаздымак: “Супольнасць чыгуначнікаў Беларусі”