Tag: Следчы камітэт

У Магілёве галоўны следчы краіны ўспомніў справу “Ліфцёра”, да якой дачынення не мае

Навіна ад

На нарадзе ў Магілёве былы спікер КДБ Канстанцін Бычак успомніў пра старое злачынства. Але якія справы мінулых гадоў сёння важнейшыя для сістэмы?

На нарадзе ў Магілёве старшыня Следчага камітэта Канстанцін Бычак гаварыў пра раскрыццё злачынстваў мінулых гадоў.

У якасці самага моцнага прыкладу ў гэтай тэме непазбежна ўспамінаецца справа магілёўскага маньяка-ліфцёра, 53-гадовага мужчыны, якога следства звязвае з серыяй нападаў на дзяўчат і дзяўчынак у 1990-я гады.

Гэта сапраўды той выпадак, дзе словы пра справядлівасць не выглядаюць пустымі. Злачынствы адбываліся ў Магілёўскай, Віцебскай і Мінскай абласцях, а падазраванага знайшлі толькі праз дзесяцігоддзі.

Але ў цяперашняга гучнага аповеду Бычака ёсць цікавы нюанс. Да фактычнага раскрыцця гэтай справы цяперашні старшыня Следчага камітэта дачынення мець не мог: на пасаду кіраўніка СК яго прызначылі 23 снежня 2025 года, а да гэтага Бычэк быў спікерам КДБ па палітычных тэмах.

Напрыклад, у лістападзе 2024 года Бычак “раскрываў” справу тэрарыстычных ячэек “беглых”.

І вось тут размова пра злачынствы мінулых гадоў становіцца значна шырэйшай. Калі гаворка ідзе пра старыя забойствы, згвалтаванні і знікненні людзей – такая праца патрэбная. Але калі пад справы мінулых гадоў пачынаюць падводзіць старыя падпіскі, рэпосты, каментары і ўдзел у медыя, якім статус ‘экстрэмісцкіх’ прысвоілі заднім чыслом, гэта ўжо не пра справядлівасць. Гэта пра палітычны кантроль у цэлым і пра Канстанціна Бычака ў прыватнасці.

Пакуль ён адзначыўся толькі як публічны кадэбіст, які ніколі не займаўся раскрыццём старых забойстваў, а спецыялізаваўся на рыторыцы барацьбы з палітычнымі праціўнікамі і паслужліва прасоўваў тэму “справядлівасці” вайны супраць Украіны.

Фота БелТА.

Рыбакі загінулі на Вілейскім вадасховішчы. Адзін з іх – жыхар Асіповічаў

Навіна ад

Мінчанін і жыхар Асіповічаў загінулі падчас рыбалкі на Вілейскім вадасховішчы.

На Вілейскім вадасховішчы, паблізу вёскі Чыжэвічы, у намёце, усталяваным на лёдзе, былі знойдзены целы двух рыбакоў. 

Папярэдняя прычына гібелі 53-гадовага мінчаніна і 51-гадовага жыхара Асіповічаў – атручэнне чадным газам.

Як паведамляюць следчыя УДКСЭ, у замкнёнай прасторы намёта пры працы ацяпляльных прыбораў назапасіўся чадны газ, што і прывяло да трагічных наступстваў.

Фото ведамаснага сайта Следчага камітэта Рэспублікі Беларусь.

У Быхаве пайшлі на зайца, а падстрэлілі казулю

Навіна ад

Быхаўскі браканьер падстрэліў казулю і закапаў яе ў снезе.

Трох паляўнічых затрымалі супрацоўнікі Быхаўскай міжраённай інспекцыі аховы жывёльнага і расліннага свету. Мужчыны палявалі на зайца, але адзін з іх, паддаўшыся спакусе, стрэліў у казулю, хоць ведаў, што цяпер дзейнічае забарона на здабычу гэтага віду парнакапытных.
Да таго ж у быхаўчаніна не было адпаведнага дазволу. Браканьер разрабіў тушу і закапаў яе ў снезе.
Пасля затрымання мужчына прызнаўся ў тым, што “менавіта ён незаконна здабыў казулю, пакуль сябры спрабавалі адшукаць зайца, і таемна ад іх разрабіў тушу забітай жывёлы”.
Памер шкоды, нанесенай дзяржаве, ацэнены ў 16 200 рублёў або 360 базавых велічынь. Узбуджана крымінальная справа.

Фота ведамаснага сайта Следчага камітэта Рэспублікі Беларусь.

Бабруйчанін хацеў бачыць раку. Вось як адрэагаваў пракурор

Навіна ад

І вярба ломкая, і вольха чорная. Усё пусціў пад сякеру бабруйчанін, які купіў участак у Светлагорскім раёне.

Светлагорскаму раённаму аддзелу Следчага камітэта давялося займацца абставінамі незаконнай высечкі дрэў у вёсцы Васілеўка на тэрыторыі, што прымыкае да прыватнага домаўладання.

Гэты ўчастак набыў бабруйчанін, які доўгі час жыў і працаваў у Расіі і падышоў да добраўпарадкавання сваіх уладанняў з нядрэннай дзелавой хваткай і чыста расійскім самаўпраўствам.

Ён наняў брыгаду для зносу старых пабудоў і ўзвядзення новых, а таксама вырашыў добраўпарадкаваць тэрыторыю за межамі свайго ўчастка – зрабіць газон, пляж і прычал.

Васілеўка яшчэ не бачыла такіх гаспадарчых падыходаў і феадальных замашак.

Новы ўласнік аддаў загад спілаваць усе дрэвы ад плота дома да берага ракі, хаця гэта тэрыторыя адносіцца да зямель агульнага карыстання і СУП «Міхайлаўскае-агра». У выніку было знішчана 186 дрэў розных парод (вярба ломкая, вольха чорная, клён ясенелістны, груша, дуб). Шкода, нанесеная навакольнаму асяроддзю, склала 12 975 рублёў.

Улічваючы, што гэта першае злачынства 45-гадовага бабруйчаніна, якое не нясе вялікай грамадскай небяспекі, а таксама добраахвотнае кампенсаванне шкоды і шчырае раскаянне, пракурор дазволіў спыніць крымінальную справу і прыцягнуць вінаватага толькі да адміністрацыйнай адказнасці – штрафу.

Фота ведамаснага сайта Следчага камітэта.

У Горках дзяўчынка зламала хрыбетнік на батутах

Навіна ад

Закрытыя компрэсійныя пераломы трох грудных пазванкоў 1-й ступені дыягнаставалі ў 10-гадовай дзяўчынкі з Горак пасля таго як яна пабавілася ў дзіцячым забаўляльным цэнтры.

Дзіцёнак скакануў з вышыні каля 1,5 метра ў яму з паралонавымі кубікамі. Дзяўчынка прызямлілася на паралонавыя матрасы, агульная таўшчыня якіх 20 см, а пад імі – бетоннае пакрыццё. Школьніца адчула боль у спіне, які працягваў турбаваць яе і дома. У выніку бацькі выклікалі хуткую дапамогу, паведамляюць са спасылкай на Дзяржаўны камітэт судовых экспертыз “Магілёўскія ведамасці”.

З раённай бальніцы яе накіравалі ў Магілёўскую абласную дзіцячую бальніцу. Там дзіцёнка з дыягназам “закрытыя компрэсійныя пераломы трох грудных пазванкоў 1-й ступені” лячылі больш за тры тыдні. 

Цяпер Горацкі раённы аддзел СК па факце прычынення менш цяжкіх цялесных пашкоджанняў праводзіць праверку, ці адпавядаюць паслугі дзіцячага цэнтра патрабаванням па бяспецы.

Фотаздымак з адкрытых крыніц

На Асіповіцкім водасховішчы цюбінг адарваўся ад скутэра, двух чалавек шпіталізавалі

Навіна ад

На водасховішчы пад Асіповічамі, каля вёскі Цяплухі адбылася аварыя на вадзе. Мясцовы жыхар катаў на цюбінгу мужчыну і жанчыну, кіруючы гіраскутэрам. Падчас рэзкага заходу на паварот, вяроўка паміж гэтымі плаўсродкамі абарвалася, і цюбінг урэзаўся ў рыбацкі мосцік. Яго пасажыры, мужчына 1980 года нараджэння і жанчына 1986-га зваліліся ў ваду, атрымаўшы траўмы. На шчасце, абодва яны былі ў ратавальных жылетах. Пацярпелых выцягнулі з вады відавочцы і выклікалі хуткую – паведамляе bobrlife.by. Абставіны справы цяпер будзе вывучаць Следчы камітэт.

Фота: bobrlife.by

Бабруйчанку затрымалі за відэа трохгадовай даўніны з расійскай вайсковай тэхнікай

Навіна ад

39-гадовую спецыялістку па перманентным макіяжы з Бабруйска затрымалі за адпраўку відэа з расійскай вайсковай тэхнікай «экстрэмісцкаму рэсурсу».

Жанчына стала фігуранткай крымінальная справа па артыкуле аб «садзейнічанні экстрэмісцкай дзейнасці» (арт. 361-4 КК), піша прэс-служба Следчага камітэта.

Паводле ведамства, бабруйчанка ў сакавіку 2022 года ехала на аўтамабілі са Светлагорска ў Мінск і Бабруйск. Па дарозе яна зняла на відэа калону тэхнікі, якая ехала ў Гомельскую вобласць, і адправіла запіс «экстрэмісцкаму каналу».

Сілавікі сцвярджаюць, што жанчына на допыце прызнала сваю віну і раскаялася. Акрамя таго, па іх сведчаннях, яна планавала пакінуць краіну і актыўна цікавілася гэтым пытаннем у інтэрнэце. З санкцыі пракурора да яе прыменена мера стрымання ў выглядзе заключэння пад варту.

Муж бабруйчанкі адбывае тэрмін па пратэсным крымінальным артыкуле, як піша СК, яго асудзілі за «ўдзел у масавых беспарадках» у верасні 2020 года.

Фота: Qafqaz.media

Вырвала кабіну – у Шклове загінуў кіроўца аўтакрана “Машэка”

Навіна ад

Раніцай 10 ліпеня ў Шклове на папяровай фабрыцы загінуў 61-гадовы кіроўца аўтакрана. Як паведамляе прэс-служба Следчага камітэта, падчас пагрузкі яшчыка, кабіну кіравання маніпулятарам вырвала з платформы. Вадзіцеля выкінула з кабіны і ў выніку ўдару аб асфальт яго траўмы аказаліся несумяшчальнымі з жыццём. Мужчына працаваў на аўтапагрузчыку “Машэка”, вытворцы MAZ. Следчы камітэт праводзіць праверку па абставінах трагедыі. 

Фота: Следчы камітэт

Падчас стыхіі ў Магілёве загінула жанчына

Навіна ад

Пакуль вядома толькі пра адну ахвяру начнога ўрагану, што абрынуўся на Магілёў. 

Што здарылася

Трагедыя адбылася каля 2-й гадзіны ночы ў раёне рачнога порта на Дняпры. Паводле папярэдніх звестак, 32-гадовая жанчына разам з мужам прыехалі на бераг ракі на рыбалку. Калі пачалася непагадзь, пара паспрабавала схавацца пад дрэвам.

Аднак моцны парывісты вецер паваліў дрэва проста на плед, дзе ляжалі муж і жонка. На месца здарэння хутка прыбылі ратавальнікі і даставалі пацярпелую з-пад дрэва ўжо без прытомнасці.

Медыкі канстатавалі смерць

Лекары, якія прыбылі на месца, правялі рэанімацыйныя мерапрыемствы, але, на жаль, выратаваць жанчыну не ўдалося — смерць была канстатаваная на месцы.

Ідзе праверка

На месцы працавала следча-аператыўная група. У цяперашні момант праводзіцца праверка. Следчы камітэт высвятляе ўсе абставіны трагедыі, у тым ліку прычыны і ўмовы, што маглі спрыяць гібелі жанчыны.

Фота: Следчы камітэт

Трагедыя ў Краснапольскім раёне: рабочы загінуў падчас высечкі лесу

Навіна ад

У Краснапольскім раёне Магілёўскай вобласці падчас лесанарыхтовак загінуў 35-гадовы рабочы. Следчы камітэт распачаў праверку па факце няшчаснага выпадку.

Паводле інфармацыі Следчага камітэта Рэспублікі Беларусь, трагедыя адбылася падчас выканання работ па высечцы лесу. 35-гадовы мужчына, які працаваў у складзе брыгады лесарубаў, атрымаў смяротныя траўмы ў выніку падзення дрэва. Як паведамляюць у ведамстве, іншы 30-гадовы работнік валіў дрэва. Падчас выканання работ яно ўпала на другоедрэва, якім і прыціснула яго калегу – 35-гадовага жыхара Краснаполля. Атрыманыя траўмы аказаліся несумяшчальнымі з жыццём.

На месцы здарэння працуе следча-аператыўная група. Праводзяцца неабходныя следчыя дзеянні, у тым ліку агляд месца здарэння, апытанне сведкаў і іншыя працэдуры для ўстанаўлення ўсіх абставін інцыдэнту.

Фота: Следчы камітэт