Tag: экалогія

Грамадзяне Асіповіч трапіліся ў фотапасткі

Навіна ад

Барацьба з тымі, хто стварае несанкцыянаваныя звалкі ў Асіповічах, дасягнула апагея.

Высокія тэхналогіі прыйшлі на дапамогу асіповіцкаму УКП ЖКГ у бітве з нізіннымі страсцямі тых, хто арганізоўвае ў горадзе несанкцыянаваныя сметнікі.

Прыборы фотафіксацыі, ўстаноўленыя ў месцах, дзе здзяйсненне правапарушэнняў найбольш верагоднае, спрацавалі дакладна, паказаўшы, што:

  • на кантэйнерную пляцоўку каля яўрэйскіх могілак грамадзянін вывез бой шыфера;
  • у ваколіцах пасёлка Ялізава мясцовы жыхар вывез асабістае смецце;
  • на кантэйнерную пляцоўку па вуліцы Чкалава жыхар шматкватэрнага дома вывез адыходы са свайго агарода.

Першы грамадзянін ужо аштрафаваны на 420 рублёў, а справы двух другіх жыхароў пакуль яшчэ разглядаюцца, але, падаецца, нічога добрага іх таксама не чакае.

Застаецца толькі дадаць, што высокія тэхналогіі, якія дабраліся-такі да Асіповіч і пасеялі паніку сярод парушальнікаў, у цывілізаваных краінах выкарыстоўваюцца дзесьці з сярэдзіны мінулага стагоддзя.

Фота раённай газеты “Асіповіцкі край”.

Эра беспакаранасці ў Слаўгарадзе прайшла – на Мар’іным Уцёсе ўсталявалі фотапасткі

Навіна ад

Жыхарам Слаўгарада больш не дазволяць смеціць у зоне адпачынку, а звярам і птушкам – расцягваць смецце.

За людзей і звяроў вырашыў узяцца старшыня Слаўгарадскага райвыканкама Андрэй Кажамякін на чарговым пасяджэнні штаба па добраўпарадкаванню.

Ён быў да глыбіні душы абураны тым, што банер «Захаваем родны лес», усталяваны ў месцы адпачынку з паэтычнай назвай Мар’ін Уцёс, ігнаруецца і двухногімі адпачывальнікамі, і ляснымі братамі меншымі.

Райвыканкам зайшоў з козыраў – на кантэйнеры ўсталявалі накрыўкі, каб птушкі і звяры не маглі расцягваць смецце па лесе.

Адпачывальнікам таксама цяпер не атрымаецца схавацца ад усевідушчага вока штаба па добраўпарадкаванню – на Мар’іным Уцёсе ўсталявалі відэаназіранне і фотапасткі.

Раённая газета дакладна абазначыла сітуацыю ўсяго трыма словамі – эпоха беспакаранасці прайшла. Якая там ужо эпоха… Калі гаворка пра Слаўгарад, дык гэта была цэлая эра. Цяпер – усё з чыстага аркуша.

Як кажуць, любіце прыроду, маць вашу!

Фота газеты “Прысожскі край”.

З’явілася петыцыя за азеляненне Магілёва – горад задыхаецца без дрэваў

Навіна ад

У Магілёве шмат асфальта, бетона, тратуарнай пліткі, будынкаў, якія назапашваюць цеплыню днём і аддаюць яе ноччу. У выніку ўвечары замест палёгкі і прахалоды жыхары горада адчуваюць душнае гарачае паветра, якое замінае сну і аднаўленню сіл. Працяглыя хвалі спякоты ў такіх умовах могуць прывесці да перагрэву арганізма, абязводжванню ці абвастрэнню сардэчна-сасудзістых захворванняў. 

Гэта радкі са зварота, які размясціў у сваім Тэлеграм-канале “Блог гарадскога актывіста з Магілёва” яго аўтар, жыхар абласнога цэнтра, якога завуць Мікіта. Мікіта падрыхтаваў петыцыю ў праектную ўстанову “Магілёўграмадзянпраект”. За прыклад ён прапанаваў узяць вопыт еўрапейскіх гарадоў, якія ўлічваюць змены клімата ў апошнія гады і перайшлі на новы падыход да арганізацыі магістральных шляхоў. Калі раней яны праектаваліся ў першую чаргу так, каб забяспечыць вялікі транспартны трафік, то цяпер усё больш увагі надаецца наяўнасці на вуліцах зялёных пасадак. Вось некаторыя прыклады з Варшавы, якія прыводзіць аўтар блога.

Варшава азеляненне

Варшава озеленение

А вось як выглядаў Магілёў яшчэ зусім нядаўна – у сярэдзіне ХХ стагоддзя. Як жа ён выглядае цяпер – вы і самі бачыце, сумна іранізуе аўтар.

Могилев зелень

Запыт Мікіты, аўтара “Блога гарадскога актывіста з Магілёва” ў “Магілёўграмадзянпраект” канцэнтруецца на агульных праблемах прекціроўкі будучых гарадскіх вуліц, таму што тое, што назіраецца ў горадзе зараз, відавочна ігнаруе як сусветныя тэндэнцыі, так і змену клімату. Застаецца спадзявацца, што адказ магілёўскаму актывісту не акажацца чарговай адпіскай.

Фотакалаж: mogilev.media 

Пад Чавусамі з помпай адкрылі ачышчальныя збудаванні

Навіна ад

У вёсцы Гарбавічы Чавускага раёна ўрачыста адкрылі новыя ачышчальныя збудаванні. Іх будаўніцтва і запуск – вынік супольных намаганняў мясцовых уладаў, дзяржаўных праграм і міжнародных грантаў на развіццё інфраструктуры, паведамляюць “Магілёўскія ведамасці”. Але, мяркуем, што гэты спіс датычных чытаць трэба ззаду наперад – міжнародныя арганізацыі далі грошы пад дзяржаўныя праграмы, каб на гэтым прапіярыліся чыноўнікі.

– Новыя тэхналогіі ачышчэння – гэта крок да чыстай прыроды, паляпшэння якасці жыцця і экалагічнай бяспекі рэгіёна, – сцвярджае старшыня Магілёўскага абласнога камітэта прыродных рэсурсаў і аховы навакольнага асяроддзя Канстанцін Цеплякоў.

А старшыня Чаускага райвыканкама Дзмітрый Акуліч паведаміў, што кошт аб’екта склаў 760 тысяч беларускіх рублёў, а будаўніцтва было завершана за два з паловай месяцы.

Генеральны дырэктар унітарнага прадпрыемства «Магілёўаблвадаканал» Мікалай Краўцоў адзначыў, што новыя збудаванні будуць мець доўгатэрміновы станоўчы ўплыў на экалагічны стан рэгіёна.

Мясцовыя жыхары, калі верыць газеце “Магілёскія ведамасці”, выказалі падзяку за праведзеную працу і надзею, што падобныя ініцыятывы будуць працягвацца і ў іншых населеных пунктах раёна.

Чыноўнікі любяць атрымліваць падзякі і рэзаць чырвоныя стужачкі. Пры гэтым, не варта забываць, што будаўніцтва ачышчальных збудаванняў не подзвіг. Вядома ж, доля гераізму тут прысутнічае – трэба ж неяк налаўчыцца і не адрэзаць сабе палец –  але перш за ўсё гэта проста службовы абавязак.

Фота: “Магілёўскія ведамасці”

У Слаўгарадскім раёне з’явіліся два новыя помнікі прыроды

Навіна ад

Дзве крыніцы ў Магілёўскай вобласці атрымалі статус гідралагічных помнікаў прыроды мясцовага значэння. 

Рашэннем Слаўгарадскага райвыканкама ўведзены меры аховы, забаронены дзеянні, якія пагражаюць унікальным прыродным тэрыторыіям.

Гаворка ідзе пра два гідралагічныя аб’екты — «Крыніца Шведава крыніца» і «Крыніца Дальнія Сажэлкі» — яны абвешчаны помнікамі прыроды мясцовага значэння, паведамляе БелТА. Абедзьве яны зняходзяцца каля вёскі Любаны.

  • плошча «Крыніцы “Шведава крыніца» — 0,7536 гектара;
  • плошча «Крыніцы “Дальнія Сажэлкі» — 1,5072 гектара;

Ёсць у Слаўгарадскім раёне яшчэ і «Блакітная крыніца», якая лічыцца найбуйнейшай крыніцай ва Усходняй Еўропе і таксама з’яўляецца гідралагічным помнікам прыроды, але рэспубліканскага значэння. Усяго ў Слаўгарадскім раёне налічваецца 24 крыніцы.

Фота ілюстрацыйнага характару з адкрытых крыніц.

Электрацяпло ў Дрыбіне: выгадна, але не ўсім і не ўсюды

Навіна ад

Жыхары Дрыбінскага раёна актыўна пераходзяць на электраацяпленне — зручна, экалагічна, эканамічна. Але ёсць істотныя нюансы і іх мноства.

Пераход на электраацяпленне — дзяржаўны прыярытэт. У апошнія гады Беларусь актыўна развівае сваю энергетычную інфраструктуру, асабліва пасля запуску БелАЭС. Сёння дастаткова падключанай сістэмы і стабільнага электразабеспячэння — і сучасныя канвектары ці «цёплыя падлогі» можна кантраляваць нават праз смартфон, сцвярджае дрыбінская раённая газета “Савецкая вёска” і рэкламуе электраацяпленне, акцэнтуючы ўвагу на яго перавагах:

  • не трэба купляць дровы ці вугаль;
  • не трэба сачыць за катлом;
  • няма неабходнасці падводзіць газ.

Да гэтага дадаюцца і іншыя плюсы: бяспека, экалагічнасць, таннасць. Але не ўсё так проста: на прыкладзе Дрыбінскага раёна відавочна, што не кожны ахвотны зможа перайсці на электраацяпленне. Прычына — недахоп магутнасці на лініях і… наяўнасць магчымасці газіфікацыі.

Тым, чые дамы стаяць у зонах, дзе праходзіць, альбо можна пракласці газаправод, пераход на электраацяпленне можа абысціся значна даражэй. Такія спажыўцы не маюць права карыстацца льготнымі тарыфамі на электраэнергію і мусяць аплачваць яе па агульных, завоблачных тарыфах.

Да таго ж, не ўсюды хапае магутнасцей ліній электраперадачы для такога пераходу.

Вось як гэта выглядае ў Дрыбінскім раёне:

  • 127 абанентаў атрымалі тэхнічныя ўмовы для падключэння электраацяплення;
  • 121 дом ужо падключаны;
  • 5 жыхарам адмоўлена — з-за недастатковай магутнасці электрасеткі.

Яшчэ адна лыжка дзёгцю ў бочцы мёду электраацяплення: спецыялісты РЭС не займаюцца ўнутраным мантажом — толькі праектаванне і падключэнне да знешніх сетак. Усё астатняе — праблема самога гаспадара.

Фота: “Савецкая вёска”.