Пасля катастрофы на Кахоўскай ГЭС пад вадой апынуўся дом Паліны Райко ў горадзе Алёшкі. Гэта важны помнік наіўнага мастацтва.
Райко – мастачка-самавучка. Яна пачала распісваць сцены і столі свайго дома ў 69 гадоў.
Адзін з самых пранізлівых вобразаў – крумкач над печкай, які раздзірае белую птушачку.
Суседка Райко расказала, што крумкач «скраў у яе [Паліны] дзіця» – яе дачка загінула ў ДТЗ у 1994-м. Праз чатыры гады жанчына пачала маляваць.
У 2004 годзе Паліна памерла, яе дом выкупілі, адкрылі там музей і заснавалі фонд яе імя.
У Херсоне афармленне аднаго з супермаркетаў «Сiльпо» прысвяцілі яе творчасці. Аўтары праекта – харкаўскія архітэктары O.S.A., распавядае Тэлеграм-канал “домікі”.
Яго вывяржэнне 40 000 гадоў таму – адна з магчымых прычын вымірання неандэртальцаў у Еўропе.
Міжнародны калектыў геолагаў высветліў, што магматычная камера пад супервулканам Флегрэйскія палі каля італьянскага Неапаля, нядаўна пашыралася да такой ступені, што яе горныя пароды блізкія да прарыву. Гэта аргумент на карысць магчымага хуткага вывяржэння вулкана, паведаміла прэс-служба брытанскага ўніверсітэцкага каледжа Лондана.
– Частка сцен магматычнай камеры вулкана значна саслабла і яны могуць у хуткім часе абрынуцца, хаця ціск, які аказваецца на іх, некалькі ніжэй, чым падчас апошняга частковага абуджэння Флегрэйскіх палёў каля 40 000 гадоў назад. – заявіў супрацоўнік Нацыянальнага інстытута геафізікі і вулканалогіі ў Неапалі Нікола Піна.
Панарама Неапаля і Флегрэйскіх палёў.
Вучоныя распрацавалі дакладную мадэль вулкана і актыўна назіраюць за ім з 2017 года. У апошнія некалькі месяцаў ціск у нетрах Флегрэйскіх палёў значна вырас, што звязана з назапашваннем вулканічных газаў і рухам струменяў магмы на глыбіні ў 3 кіламетры.
Гэтыя працэсы ўжо выклікалі 600 сейсмічных штуршкоў у красавіку 2023 года, прывялі да паслаблення мяжы трываласці “накрыўкі” магматычнай камеры на 60% у параўнанні з 1984 годам.
Усё гэта, як лічаць даследчыкі, кажа аб магчымым хуткім пачатку вывяржэння Флегрэйскіх палёў, аднак пры гэтым геолагі падкрэсліваюць, што верагоднасць гэтага не з’яўляецца стопрацэнтнай. Тым не менш, уладам Італіі і іншых сумежных рэгіёнаў свету неабходна быць гатовым да гэтай сітуацыі, падсумавалі Піно і яго калегі.
Фота раёна супервулкана са спадарожніка НАСА.
Флегрэйскія палі – жарало буйнога супервулкана дыяметрам каля 12-14 км. Ён размешчаны недалёка ад сучаснага Неапаля. Вывяржэнне гэтага супервулкана каля 40 000 гадоў таму магло выклікаць выміранне неандэртальцаў у Еўропе.
У наступную суботу, 17 чэрвеня, у Парку культуры і адпачынку Бабруйска будзе праходзіць адкрыты конкурс “Пой, гітарная струна”. Выступленні будуць запланаваны ў наступных катэгорыях: класічная гітара – сола, класічная гітара – дуэты і электрагітара – сола.
Заяўкі на ўдзел прымаюцца ў адміністрацыі парка. Выступленні пачнуцца ў 12.00 на малой сцэне парка – паведамляе “Камерцыйны кур’ер”.
На працягу новага рабочага тыдня ў Магілёўскай вобласці сіноптыкі прагназуюць у асноўным воблачнае з дажджамі, цёплае надвор’е. Будуць пераважаць вятры паўночна-усходнія і паўночныя.
Удзень чакаецца да +15, +24°С, начныя тэмпературы падрастуць да +11 +16°С. Працягласць дня з панядзелка да пятніцы падрасце і дасягне 17 гадзін і 7 хвілін – не хапае ўсяго 2 хвілін да макісмальнай велічыны дня. Ужо ў канцы працоўнага тыдня сонца ўзыдзе ў 4:27, зойдзе ў 21:34.
Сінаптычны прагноз на панядзелак, 12 чэрвеня.
У ноч з нядзелі на панядзелак да +11°С, раніцай +14°С, увечары да +16°С. У дзённыя гадзіны паветра прагрэецца месцамі да +20°С. На працягу сутак будзе воблачна, пераважна без ападкаў. Вятры на працягу сутак паўночна-усходнія, хуткасцю да 4 м/с, пры парывах да 9 м/с. Геамагнітнае поле няўстойлівае. Убываючы Месяц.
У аўторак, 13 чэрвеня будзе воблачна, без ападкаў.
Будуць панаваць паўночна-ўсходнія вятры хуткасцю да 4-6 м/с. Уноч і раніцай ад +12°С да +14°С, днём тэмпература падрасце да +18°С, месцамі і да +20°С. Да вечара слупок тэрмометра ўтрымаецца на рысцы не ніжэй за +17°С. Геамагнітнае поле спакойнае. Убываючы Месяц.
Серада – воблачная
У сярэдзіне рабочага тыдня, 14 чэрвеня, прагназуецца воблачнае надвор’е, пераважна з дажджамі. Начныя і ранішнія тэмпературы да +16°С, у другой палове дня да +22°С. На працягу сутак прагназуюцца паўночна-усходнія вятры хуткасцю 3-5 м/с. Геамагнітнае поле спакойнае. Убываючы Месяц.
Чацвер – дажджы
У чацвер, 15 чэрвеня, сіноптыкі прагназуюць воблачнае з дажджамі надвор’е. Вецер паўночны, хуткасцю 4-5 м/с. Ноччу і ўранні да +15°С, у абед і на працягу другой паловы дня +15° +17°С. Месяц убывае.
Пятніца, 16 чэрвеня
У апошні дзень працоўнага тыдня, 16 чэрвеня, па папярэдняму прагнозу будзем чакаць у асноўным воблачнае, з ападкамі ноччу і ў першай палове дня надвор’е з панаваннем заходніх вятроў хуткасцю да 3 м/с. У другой палове дня воблачна, без істотных ападкаў, з паўночнымі вятрамі 3-4 м/с. Уноч і ў ранішнія гадзіны да +13°С, удзень і ўвечары да +24°С. Маладзік.
“Ніякага сэксу на пляжы, калі ласка” – звярнуліся ўлады горада Верэ да аматараў нудызму на пляжы Араньезон.
У горадзе Верэ на поўдні Нідэрландаў пачалася кампанія па адгаворванні наведвальнікаў нудысцкіх пляжаў ад сэксу на пляжы і ў дзюнах.
Муніцыпалітэт Верэ выставіў восем новых таблічак на пляжы, дзе гасцей папярэджваюць аб тым, што публічны сэкс забаронены і існуе «ўзмоцнены маніторынг» для барацьбы з «дзейнасцю ў месцы сэксуальных сустрэч у дзюнах, запаведніку і на пляжы».
«Праект Oranjezon» — аранжавае сонца — быў натхнёны патокам скаргаў у муніцыпалітэт, упраўленне водазабеспячэння і мясцовую прыродаахоўную арганізацыю наконт «сэксуальных актаў, якія здзяйсняюцца аголенымі аматарамі адпачынку» – гаворыцца ў заяве муніцыпалітэта.
– Дзюны вельмі важныя для мясцовай супольнасці і павінны быць абаронены ад непажаданых паводзін, якія наносяць шкоду прыроднаму асяроддзю і могуць турбаваць іншых адпачывальнікаў – перадае Guardian словы мэра горада Верэ Фрэдэрыка Шоўвенаара.
Мясцовая арганізацыя натурыстаў таксама лічыць важным дыстанцыяваць аголеныя сонечныя ванны ад сэксуальнай актыўнасці. Карліен Ладэвійк, прэс-сакратар асацыяцыі аголенага адпачынку NFN Open en Bloot (адкрыта і гола), сказала: «Сэкс на свежым паветры не з’яўляецца аголеным адпачынкам, і людзі, якія прыходзяць загараць, лічаць гэта такой жа непрыемнасцю, як і іншыя людзі. Аголены адпачынак… дае адчуванне сапраўднай свабоды, і гэта вельмі карысна – бачыць сапраўдныя аголеныя целы без фоташопу.”
Але ёсць і крытыкі гэтага рашэння муніцыпалітэта. Так, Марка Віхерт, уладальнік рэстарана Aloha Beach, які знаходзіцца ў цэнтры пляжа, разважае наступным чынам: “Калі некаторыя людзі сустракаюцца ў дзюнах – ну, гэта адбываецца ад пачатку свету. Некаторыя людзі аддаюць перавагу рабіць гэта на вуліцы, чым у спальні. І іншыя могуць прыйсці, каб гэта зрабіць, таму што гэта забаронена”.
«У Нідэрландах і іншых краінах стала некаторай тэндэнцыяй, што з-за кансерватыўнага руху людзі, якія менш задаволены сэксуальнасцю і аголенасцю, гучаць больш гучна» – пракаментаваў новаўвядзенне Юрый Олрыкс, сэксолаг і старэйшы кансультант Rutgers, Нідэрландскага цэнтра сэксуальнасці.
На самім нудысцкім пляжы Араньезон некаторыя турысты былі здзіўлены, некаторыя выступілі з ухвалай.
– Цяпер ёсць агароджа, таму вы не можаце зайсці ў дзюны. – сказала 74-гадовая Элс дэн Дулк з Эйндховена – Гэта заўсёды было трохі пагрозліва, і вы не адчувалі сябе ні шчаслівым, ні камфортным.
Яе муж, 75-гадовы Рон дэн Дулк, згодна кіўнуў. Спрабуючы ставіць сваю ахову ад моцнага ветру з Паўночнага мора, ён дадаў: «Яны таксама павінны забараніць вецер».
У Мсціславе раніцай мясцовы жыхар убачыў на ўскраіне горада перавернуты аўтамабіль і выклікаў міліцыю.
Высветлілася, што машыну ноччу ўгналі з двара аднаго з дамоў. 22-гадовы жыхар адной з вёсак Мсціслаўскага раёна ў п’яным выглядзе хадзіў па двары і тузаў за ручкі прыпаркаваных аўто.
Такім спосабам ён змог пранікнуць ў пяць з іх. У салоне красовера Volkswagen ён знайшоў амаль 20 тысяч рублёў, якія забраў з сабой, а ў бардачку легкавога Peugeot знайшоў ключ ад машыны і вырашыў пакатацца. Але далёка з’ехаць не змог – неўзабаве не справіўся з кіраваннем, з’ехаў у кювет і перакуліўся. Юнак сам выбраўся з салона і пайшоў дахаты.
Зараз яму прад’яўлена абвінавачванне ва ўгоне і крадзяжы – паведамляе прэс-служба абласнога УУС.
978 год. Уладзімір Святаславіч (960-1015) абвешчаны вялікім князем кіеўскім.
У 980-я гады ён абраў хрысціянства дзяржаўнай рэлігіяй Кіеўскай дзяржавы. Вядомы ў гісторыі як Уладзімір Святы, Уладзімір Вялікі, Уладзімір Хрысціцель, у былінах – як Уладзімір Краснае Сонейка.
Уладзімір захапіў у 977 (978) годзе Полацк, забіў полацкага князя Рагвалода і яго сям’ю, акрамя дачкі Рагнеды, якую гвалтам узяў яшчэ адной жонкай.
Ад 7 жонак меў 13 сыноў і не менш за 10 дачок, у тым ліку ад Рагнеды меў Ізяслава (князь полацкі, родапачынальнік полацкай галіны Рурыкавічаў), Мсціслава, Яраслава (князя растоўскага, наўгародскага, кіеўскага), Усевалада (князя Уладзіміра-Валынскага), Прадславы, Праміславы (жонка венгерскага прынцаЛасла Лысага), Мсціславы.
Ласенка А. Уладзімір і Рагнеда, 1770 год.
1910 год. Нарадзіўся Жак-Іў Кусто (1910-1997).
Французскі акіянограф, контр-адмірал, фатограф, рэжысёр, вынаходнік, аўтар мноства кніг і фільмаў, акадэмік, дырэктар Акіянаграфічнага музея ў Манака.
Адзін з вынаходнікаў акваланга, падводных дамоў, апарата «ныраючы сподак».
Займаўся пытаннямі аховы падводнага асяроддзя.
Аўтар кніг і каля 90 дакументальных фільмаў, сярод якіх «Свет маўчання», «Залатая рыба» (прэмія «Оскар») і «Свет без сонца» («Оскар»).
Існуюць звесткі, што знакаміты вучоны і падарожнік мае беларускія карані, што быццам ягоны бацька Даніель Кусто (1878-1969) эміграваў у Францыю з Лынтупаў сённяшняга Пастаўскага раёна, перарабіў свае беларускія імя і прозвішча Даніла Куст на французскі ўзор. Хаця, верагодна, гэта толькі прыгожая легенда, бо на інтэрактыўным генеалагічным дрэве сям’і Кусто бліжэйшыя продкі Жак Іва Кусто паходзяць выключна з Францыі.
1911 год. Нарадзіўся Пётр Савачкін (1911-1975).
Беларускі гісторык, дэкан гістарычнага факультэта БДУ (1955-1973), кандыдат гістарычных навук, дацэнт.
Даследаваў гісторыю Заходняй Беларусі 1920-х гадоў, устанаўлення савецкай улады ў заходніх абласцях Беларусі.
Працаваў загадчыкам кафедры, намеснікам дырэктара Мінскай школы прафруху ВЦСПС (1950-1955), загадчыкам кафедры гісторыі СССР.
Памёр 11 лістапада 1975 года.
1917 год. У Магілёве выйшаў першы нумар газеты “Молат”.
З 10 студзеня 1918 года выходзіла як “Весткі Магілёўскага савета рабочых і салдацкіх дэпутатаў”, у лютым 1919 – маі 1925 – «Саха і молат», да 1929 – «Магілёўскі селянін», з лістапада 1929 да 1941 года – «Камунар Магілёўшчыны».
У час Вялікай Айчыннай вайны – орган Магілёўскага падпольнага абкама КП(б)Б. Назва падчас вайны і ў 1945-1956 гадах – «За Радзіму». З 12 жніўня 1956 года выходзіць пад назвай «Магілёўская праўда».
Выдавалася на рускай, з 10 кастрычніка 1924 года на беларускай мове.
1923 год. Выйшла ў свет паэма Якуба Коласа «Новая зямля».
Першы беларускі буйны эпічны твор. «Энцыклапедыя жыцця беларускага сялянства канца XIX – пачатку XX стагоддзя».
Напісана ў 1911-1923 гадах. Пачала стварацца, калі Якуб Колас сядзеў у мінскім астрозе: было напісана гумарыстычнае вершаванае апавяданне «Як дзядзька ездзіў у Вільню і што ён там бачыў».
Пазней на аснове апавядання былі створаны раздзелы «Па дарозе ў Вільню», «Дзядзька ў Вільні», «На Замкавай гары». Дзевяць апошніх раздзелаў (з 29) былі напісаны ў 1921 годзе. Паэма была завершана 5 студзеня 1923 год.
1931 год. Нарадзіўся Уладзімір Мацюхін (1931-2020).
Беларускі фізіёлаг і біяфізік, акадэмік НАНБ, Акадэміі медыцынскіх навук СССР, Расійскай акадэміі медыцынскіх навук, доктар медыцынскіх навук, прафесар, Кавалер Ордэна Ф. Скарыны.
Ажыццявіў комплексныя даследаванні па эколага-фізіялагічных і эколага-радыяцыйных праблемах чалавека пасля Чарнобыльскай катастрофы.
Распрацоўваў сістэмы жыццезабеспячэння пасля буйных радыяцыйных катастроф.
Аўтар больш за 240 навуковых прац, у тым ліку 7 манаграфій.
Пад яго кіраўніцтвам абаронены 17 кандыдацкіх і 5 доктарскіх дысертацый.
Памёр 13 лютага 2020 года.
1942 год. Нарадзіўся Яраслаў Пятроў.
Беларускі спявак (бас). Народны артыст БССР, саліст Нацыянальнага акадэмічнага тэатра оперы Беларусі.
Выпускнік Беларускай дзяржаўнай кансерваторыі. З 1973 года – саліст Нацыянальнага акадэмічнага тэатра оперы Беларусі.
Валодае моцным голасам прыемнага тэмбру, шырокага дыяпазону, сцэнічнай абаяльнасцю. Творчасці ўласцівы тэмперамент і шчырасць у перадачы пачуццяў, глыбокае пранікненне ў вобраз, гранічная выразнасць кожнага характару.
У рэпертуары – практычна ўсе галоўныя басовыя партыі, у тым ліку ў пастаноўках «Сівая легенда» Дз. Смольскага, «Дзікае паляванне караля Стаха» У. Солтана, «Хаваншчына» М. Мусаргскага, «Русалка» А. Даргамыжскага, «Іван Сусанін» М. Глінкі, «Князь Ігар» А. Барадзіна.
Удзельнічаў у гастролях у Іспаніі, ПКнязь Ігарартугаліі, Аргенціне. Выконваў партыю Барыса Гадунова на сцэнах оперных тэатраў Варшавы, Уроцлава, Любляны, Сафіі, Буэнас-Айрэса.
1965 год. Англійская каралева Лізавета ўзнагародзіла ордэнам Брытанскай імперыі музыкантаў гурта “The Beatles”.
Першыя ўганараваныя ордэнам музыкі: да гэтага ордэнам узнагароджваліся пераважна вайскоўцы і палітыкі. Ордэны былі ўручаны 26 кастрычніка 1965 года.
Пасля каралеўскага рашэння з усіх бакоў пасыпаліся лісты з пратэстамі. Палата лордаў таксама была супраць, бо па іх словах нельга ўзнагароджваць “хлопцаў, якія адбіліся ад рук”.
Бітлы таксама былі вельмі здзіўлены такім паварот падзей. Яны нават мелі намер адмовіцца ад узнагароды, але ўсё ж вырашыліся прыняць яе – для таго, каб правучыць старэйшае пакаленне.
На самой цырымоніі ўручэння ў Букінгемскім палацы “The Beatles” паводзілі сябе адпаведна з ўласным іміджам – увесь час смяяліся і паводзілі сябе эпатажна.
1982 год. Памёр Рыгор Семашкевіч (1945-1982).
Беларускі пісьменнік і літаратуразнавец, дацэнт кафедры беларускай літаратуры БДУ, кандыдат філалагічных навук.
Аўтар зборнікаў вершаў, аповесцей, эсэ, верша “Апошняя ноч Каліноўскага”, аўтар прац “Браніслаў Эпімах-Шыпіла”, “Беларускі літаратурна-грамадскі рух у Пецярбургу”.
Даследаваў гісторыю трупы Ігната Буйніцкага.
1985 год. Нарадзіўся Дзмітрый Калдун.
Беларускі папулярны спявак.
Пераможца праекту «Фабрыка Зорак-6», на конкурсе Еўрабачанне 2007 заняў 6-е месца – самае высокае за ўсю гісторыю ўдзелу Беларусі ў конкурсе.
Прыгадаем, што толькі раз на конкурсе “Еўрабачанне” перамог этнічны беларус – Алесь Рыбак у 2009 годзе, у якасці прадстаўніка Нарвегіі.
1993 год. Памёр Віталь Цвірка (1913-1993).
Беларускі жывапісец, педагог, Народны мастак БССР, рэктар Беларускага тэатральна-мастацкага інстытута.
Займаўся пейзажам і «тэматычным жывапісам», нацюрмортам, пад час шматлікіх падарожжаў па Беларусі пісаў краявіды.
Большасць твораў захоўваецца ў Нацыянальным мастацкім музеі.
2020 год. Памерла Рыма Дулаева (1934–2020).
Эканоміка–географ, першы доктар геаграфічных навук сярод асецін, прафесар.
У 1968–1972 гадах выкладала на кафедры эканамічнай геаграфіі Магілёўскага педінстытута, стварыла з ліку студэнтак геаграфічнага факультэта фальклорны ансамбль «ОСА» і аб’ехала з канцэртамі амаль усе райцэнтры Магілёўшчыны.
У 1972–1982 гадах працавала ў НДІ эканомікі Дзяржплана БССР, вывучала пытанні геаграфіі прамысловых вузлоў. Аўтар першай у свеце манаграфіі аб татарах свету.
Жанчыны з фальклорнага калектыва “Астранка” правялі абрад заклікання дажджу ў вёсцы Стары Дзедзін Клімавіцкага раёна.
Узяўшы з сабой саху і пугу, жанчыны сабраліся ля ракі Асцёр. Спачатку прачыталі малітву «Ойча Наш», перахрысціліся і згодна з абрадам вымавілі такія словы: «Дай, Госпадзі, дапамажы, Госпадзі, прынясі вятры, прынясі нам хмары, арашы зямельку, напаі травы, поле, лясы, дай жыцця нашай зямельцы, каб благадатна ўрадзіла, і ўсіх напаіла…».
Затым у святочных кашулях жанчыны зайшлі ў ваду і сталі цягнуць па беразе ракі плуг – “аралі ваду”. Прычым дзве цягнулі плуг, трэцяя ішла за ім, а яшчэ адна пугай паганяла, а астатнія спявалі абрадавую песню. Рухаліся ўдзельніцы ансамбля ўздоўж берага, старанна аралі раку – паведамляе клімавіцкая раённая газета “Родная ніва”.
Дарэчы, вынікам абраду сапраўды стаўся дожджык, хоць увесь дзень у Старым Дзедзіне свяціла сонца. Але трэба адзначыць, што і дождж намячаўся, паводле сіноптыкаў.
Абрад “Зазыванне дажджу” ў 2016 годзе быў унесены ў Дзяржаўны спіс гісторыка-культурных каштоўнасцей Рэспублікі Беларусь. Традыцыя мае яркую лакальную спецыфіку і з’яўляецца часткай традыцыйнай культуры вескі Стары Дзедзін, хоць характэрны звычай для ўсяго Магілёўскага Пасожжа.
Абрад не мае пэўнай даты правядзення, бо праводзіцца аказіянальна – толькі тады, калі няма больш тыдня дажджу і гіне ўраджай збожжавых на палях і на гародах вяскоўцаў. У аснове магічных дзеянняў, песень, пераворвання дна рэчкі знаходзіцца ахоўная магія ад засухі, каб выкліканы дождж садзейнічаў росту збожжавых і іншых культур не толькі на палетках і агародах вяскоўцаў, але і на палетках сядзіб.
Дадзены абрад з’яўляецца адным з тых нямногіх, якія захаваліся ў жывым бытаванні са старажытных часоў, і існуюць ў рэальнай традыцыі.
У магілёўскім музеі імя В.К. Бялыніцкага-Бірулі адкрылася выстава “V Трыенале дэкаратыўнага мастацтва Беларускага саюза мастакоў “ДЭКАРТ-22. Выбранае”.
Для Беларускага саюза мастакоў стала ўжо традыцыйным раз на тры гады напрыканцы года ў лістападзе праводзіць буйны мастацкі праект, прысвечаны сучаснаму дэкаратыўна-прыкладному мастацтву.
Цяпер творы Трыенале выстаўлены ў магілёўскім філіяле Нацыянальнага мастацкага музея – музеі імя В.К. Бялыніцкага-Бірулі.
У выставе ўдзельнічаюць не толькі сябры секцый дэкаратыўнага мастацтва і тэкстылю“Беларускага саюза мастакоў”, але і творчая моладзь, студэнты, мастакі з усіх рэгіёнаў Беларусі. Прадстаўлены формы як класічнага, традыцыйнага мастацтва, так і новыя эксперыментальныя інтэрпрэтацыі.
У экспазіцыі можна ўбачыць сучасны тэкстыль, кераміку, шкло, батык, метал.
Хочуць школьнікі, ці не хочуць, але адміністрацыі гімназій і школ прымушаюць іх пайсці на канцэрт прапуцінскіх спевакоў – Вольгі Бузавай, гурта “Прапаганда” і іншых.
Сёлета ў Магілёве выпускны вечар ператворыцца ў афіцыйнае мерапрыемства з афіцыёзнай праграмай. Звычайнага развітання са школай у адзінаццацікласнікаў практычна не будзе – выступленні чыноўнікаў і канцэрт прапагандыстаў зоймуць увесь вечар, каля пяці гадзін, з 18:00 да 23:00. Мерапрыемства будзе праходзіць перад “Атрыумам”. Бацькі і дзеці выпускнікоў, што цэлы год рыхтаваліся да аднаго з самых запамінальных вечароў у жыцці, проста пастаўленыя перад фактам.
– Спачатку пагражалі, што напішуць дрэнную характарыстыку, а атэстат не выдадуць 10-га, тыпу яго падправяць. – расказаў беларускім журналістам адзін з магілёўскіх выпускнікоў – Пасля абурэння бацькоў “слёзна” прасілі прыйсці. Цяпер ужо проста «настойліва рэкамендавалі». Тлумачаць, што павінна быць максімальная яўка, казалі, што самі ўсё разумеюць, але зрабіць нічога не могуць, бо пры адсутнасці людзей на канцэрце пытацца будуць з адміністрацыі школы.
Пра новы фармат правядзення выпускнога вечара ў 2023 годзе школьнікі і іх бацькі даведаліся ў пачатку траўня. Цяпер усе раней запланаваныя мерапрыемствы на вечар прыходзіцца адмяняць альбо істотна скарачаць – па сваёй праграме юнакі і дзяўчаты змогуць адсвяткаваць толькі бліжэй да апоўначы.
Культурную праграму для выпускнога вечара ў Магілёве падрыхтавала упраўленне культуры гарвыканкама. У спісе – расійскія спевакі, што адзначыліся актыўнай падтрымкай вайны супраць Украіны.
Хэдлайнер канцэрта Вольга Бузава – актыўная прыхільніца Пуціна, у кастрычніку 2022 года яна ездзіла ў самаабвешчаную ДНР з гуманітарнай дапамогай. У канцы 2022 года яна выпусціла адмысловую песню з крытыкай тых расіян, якія паехалі за мяжу на фоне масавай мабілізацыі.
Вакалісткі гурта “Стрэлкі” ездзілі ў Данецк яшчэ ў 2017 годзе, да поўнамаштабнай вайны і анэксіі Расіяй новых тэрыторый Украіны. А «Прапаганда» адзначылася тым, што павіншавала расейскіх мужчын з 23 лютага фатаграфіяй (на загалоўным фота) з літарай Z, якая стала сімвалам уварвання, а ў лістападзе 2022-га выступала ў расейскай вайсковай частцы, пажадаўшы байцам «вярнуцца з перамогай жывымі і цэлымі!».
У канцэрце таксама возьмуць удзел магілёўскія артысты. Дзмітрый Азаранка выканаў сумна вядомую песню “Беларуская жонка”. Таксама будзе спяваць Ганна Трубяцкая, якая раней выступала на украінскім шоў “Х-фактар”.
