Category: Навіны

Хроніка прыхаванай рэальнасці. Суды, зняволенні, вызваленні

Навіна ад

Звесткі пра пераслед паводле праваабаронцаў, медыяў і родзічаў тых, хто зазнае яго.

Ілля Давыдзенка, Марына Маркевіч, Ганна Кісялёва, Віктар Хімарод, Максім Мацулевіч

Асуджаныя.

Давыдзенка – 3 гады калоніі;

Маркевіч – 2,5 гады;

Кісялёва – 1,5 гады;

Хімарод – 1,5 гады;

Мацулевіч – 1,5 гады.

Паводле праваабаронцаў, суддзя Сяргей Кацар абвінаваціў іх у «абразе Лукашэнкі», а Іллю Давыдзенка і Марыну Маркевіч яшчэ і ў «арганізацыі і падрыхтоўцы дзеянняў, што груба парушаюць грамадскі парадак, альбо актыўны ўдзел у іх».

Усе асуджаныя праваабарончай супольнасцю прызнаныя палітзняволенымі. На абвяшчэнні прысуду яны былі ў кайданках і іх суправаджалі шасцёра канваіраў.

Нагодаю для пераследу стала спаленне пудзіла і ўдзел у пратэстах.

Павел Наздра

Асуджаны да 2 гадоў калоніі агульнага рэжыму.

Паводле праваабаронцаў, яго абвінавацілі ў садзейнічанні экстрэмісцкай дзейнасці. Нагодаю для пераследу стала перасыланне аднаму з тэлеграм-каналаў інфармацыі аб перасоўванні расійскіх войскаў у Мазыры.

Справу на Наздру разглядаў Гомельскі абласны суд. На працэсе старшынявала суддзя Людміла Грынько.

Праваабаронцы пішуць, што Павел Наздра – экалагічны актывіст з Мазыру, быў затрыманы 11 мая і ўтрымліваўся да суду пад вартаю.

Міхаіл Макараў, Вікторыя Гулькова

Асуджаныя на 15 дзён адміністрацыйнага арышту.

Праваабаронцы пішуць, што сілавікі апублікавалі «пакаянае відэа» з адвакатам Макаравым. У ім ён кажа, што «зліваў дадзеныя экстрэмісцкаму фармаванню» і ўступіў у «план »Перамога«.

Пазней на праўладным канале з’явіўся запіс з затрыманымі адвакатамі Вікторыяй Гульковай і Настай Сагановіч.

Дзмітрый Семчанка

Затрыманы.

Паводле праваабаронцаў, пра зняволенне былога тэлевядоўцы і экс-кіраўніка прэзідэнцкага пула на АНТ стала вядома ад яго жонкі.

Семчаенка ў верасні 2020 года адседзеў 15 дзён адміністрацыйнага арышту.

Вайна ва Ўкраіне. Крывы Рог цягам дня двойчы зазнаў абстрэл

Навіна ад

Ракеты пацэлілі ў адно з мясцовых прадпрыемстваў, а таксама ў гідратэхнічныя збудаванні гораду. Пра пацярпелых звестак няма.

15 верасня паветраную трывогу абвясцілі ў Крывым Рогу па 13 гадзіне. Начальнік ваеннай адміністрацыі гораду Аляксандр Вілкул паведаміў, як небяспека мінула, што атакаванае было прамысловае прадпрыемства.

«Разбурэнні сур’ёзныя, падрабязныя наступствы ўдакладняюцца. Папярэдне – без ахвяр«, – адзначыў ён у тэлеграм-канале.

focus.ua

Другі раз горад быў атакаваны пасля 17 гадзіны. Аляксандр Вілкул заклікаў гараджан заставацца ў бамбасховішчах і не выкладаць у сацыяльныя сеткі здымкі.

Паводле Вілкула, у раён гідратэхнічнай запруды паляцелі дзве ракеты.

Па гідратэхнічных збудаваннях расійскія войскі стралялі 14 верасня. Па словах кіраўніка Днепрапятроўскай абласной ваеннай адміністрацыі Валянціна Разнічэнкі, яны атрымалі сурʼёзныя пашкоджанні. Таксама, ракеты пацэлілі ў абʼекты крытычнай і транспартнай інфраструктуры гораду.

Для абстрэлу расійскія войскі выкарысталі самалёты стратэгічнай авіяцыі, якія атакавалі горад сям’ю крылатымі ракетамі Х-22.

ua-informator

Ракеты пашкодзілі дамбу Карачуноўскага вадасховішча. У выніку, у рацэ Інгулец рэзка павысіўся ўзровень вады.

15 верасня стала вядома, што падтопленымі аказаліся 116 прыватных жылых дамоў і прысядзібных участкаў. Былі эвакуяваныя жыхары двух раёнах з-за пагрозы падтапленняў у сувязі з узняццем узроўню вады, пісала «УНІАН».

Дамбу ўдалося адрамантаваць. Пасля чаго, абʼём уцечкі вады зменшыўся і яе ўзровень пачаў падаць.

Міністэрства абароны паведаміла пра смерць вайскоўца

Навіна ад

Прычынамі здарэння называецца «парушэнне правілаў эксплуатацыі тэхнікі».

«Падчас правядзення планавых заняткаў у 72-м гвардзейскім аб’яднаным навучальным цэнтры падрыхтоўкі прапаршчыкаў і малодшых спецыялістаў у выніку парушэння правілаў эксплуатацыі тэхнікі вайсковец, інструктар ваджэння, атрымаў траўму, несумяшчальную з жыццём», – гаворыцца ў паведамленні прэс-службы Міністэрства абароны.

Адзначаецца, што камісіяй Міністэрства абароны ва ўзаемадзеянні з прадстаўнікамі праваахоўных органаў праводзіцца праверка па высмятленні прычын і ўмоваў здарэння.

У глыбінцы абнаўляюць базы «дармаедаў». Як праходзяць пасяджэнні камісіяў паказваюць фотаздымкі

Навіна ад

На такіх камісіях людзі вымушаныя тлумачыць з чаго жывуць, каб не плаціць 100 працэнтаў камуналкі. Іх чыноўнікі настойліва заклікаюць афіцыйна працаўладкавацца.

У Мсціславе камісія па каардынацыі працы ў садзейнічанні занятасці насельніцтва пачала аналізаваць базу дадзеных працаздольных грамадзян, не занятых у эканоміцы, за трэці квартал 2022 года.

«Набліжаецца ацяпляльны перыяд. Жыхары раёну, не занятыя ў эканоміцы, будуць абавязаны аплачваць паслугі з кампенсацыяй затрат на гарачае водазабеспячэнне, цеплазабеспячэнне, газазабеспячэнне ў поўным аб’ёме. У сярэднім плата за гарачую ваду, ацяпленне, газ, вырасце прыкладна ў пяць разоў, – тлумачыць мясцоваму інтэрнэт-рэсурс Mstlife старшыня Мсціслаўскага райсавету і кіраўніца камісіі Алена Клеянкова.

Як вынікае з публікацыі раёнкі, камісія займаецца спраўджаннем спісаў, каб пазбегнуць памылак у неабгрунтаваным уключэнні жыхароў раёну ў базу дадзеных незанятага ў эканоміцы насельніцтва. Адзначаецца, што беспрацоўным прапанаваныя варыянты працы і яны накіраваны да наймальнікаў.

У Мсціслаўскім раёне няма буйных прадпрыемстваў. Мясцовая эканоміка трымаецца на працы сельгаспрадпрыемстваў, камунальных арганізацыяў ды прыватным бізнесе. Людзі радуюцца заробку ў 700 рублёў на рукі. Многія выязджаюць зарабляць у суседнюю Расію.

Дэкрэт «Аб папярэджанні сацыяльнага ўтрыманства» нормы якога вызначалі, хто працаўладкаваны, а хто не, быў прыняты ў 2015 годзе. Лукашэнка запатрабаваў ад ураду «неадкладна паставіць на ўлік дармаедаў і прымусіць іх працаваць». У 2017 годзе «дэкрэт аб дармаедах» выклікаў масавыя пратэсты. Закон падправілі і змянілі назву: «Аб садзейнічанні занятасці насельніцтва». Цяпер замест штрафаў прапануецца працаўладкаванне, а калі гэта не спрацоўвае, то «беспрацоўнага» страшаць 100 працэнтнай аплатай камунальных паслугаў.

Ад 9 да 11 працэнтаў зменшыўся заробак у Хоцімскім, Магілёўскім і Касцюковіцкім раёнах

Навіна ад

Зніжэнне рэальных заробкаў у Беларусі назіраецца з сёлетняга сакавіка. Пры гэтым у краіне ёсць раёны, дзе гэта зніжэнне найбольш дынамічнае, піша рэсурс Banki24.by.

Паводле яго, у Магілёўскай вобласці рэальны заробак у ліпені найбольш упаў у Хоцімскім, Магілёўскім і Касцюковіцкім раёнах. У Хоцімскім раёне ён знізіўся да аналагічнага перыяду 2021 году на 11,7%, у Магілёўскім – на 10,3%, у Касцюковіцкім – на 9,1%.

Падобная дынаміка назіраецца ў суседняй Віцебскай вобласці. Тут рэальны заробак у ліпені больш за ўсё ўпаў у Расонскім, Талачынскім і Докшыцкім раёнах. У Расонскім раёне ён знізіўся на 10,2%, у Талачынскім – на 9,3%, у Докшыцкім – на 8,5%.

Banki24.by адзначае, што рэальная зарплата за сакавік па краіне ўпала да супастаўнага месяца 2021 году на 0, 7%, за красавік – на 4, 5%, за май – на 5, 7%, за чэрвень – на 4, 2%, за ліпень – на 5,9 працэнта.

Такім чынам, канстатуе выданне, працэс зніжэння рэальных заробкаў у Беларусі доўжыцца ўжо 5 месяцаў. За гэты час рэальныя заробкі не раслі да аналагічнага леташняга перыяду ні ў адной вобласці. Таксама змяншэнне рэальнага заробку паказваў і Мінск.

Рэальная заработная плата – гэта колькасць тавараў і паслуг, якую можна набыць на намінальную заработную плату; па сутнасці гэта пакупніцкая здольнасць намінальнай заработнай платы.

Намінальная зарплата – гэта канкрэтная грашовая сума, якую атрымлівае работнік.

 

Латвія адгароджваецца. На мяжы з Беларуссю пракладзеныя першыя кіламетры агароджы

Навіна ад

Так, Балтыйская краіна ратуецца ад наплыву мігрантаў з Беларусі. Акрамя таго, агароджа прызначаныя для стрымлівання незаконнага пранікнення мігрантаў у Еўрасаюз.

У Латвіі наплыў мігрантаў лічаць гібрыднай вайной і настойваць, што гэта праблема не знікла. Яе затуліла ўварванне Расіі ва Ўкраіну. Мяжу ж з Беларуссю па-ранейшаму спрабуюць перайсці нелегальныя імігранты, піша выданне з Даўгаўпілсу «Наша газета».

Паводле Пагранічнай службы, у жніўні 300 чалавек спрабавалі незаконна перасекчы дзяржаўную мяжу. За прамінулыя дні верасня іх ужо было 150 чалавек.

Плот вышынёй амаль чатыры метры не стане панацэяй для адпужвання бежанцаў, але ім будзе цяжка пераадолець яго самастойна, лічаць латвійскія пагранічнікі.

Пакуль не было зафіксавана ніводнай спробы перабрацца праз узведзеную агароджу, але большая частка мяжы ўсё яшчэ застаецца не агароджанай, таму патэнцыйныя парушальнікі могуць проста абысці яго.

«Наша газета» адзначае, што было зафіксавана пашкоджанне часовай агароджы: памежнікі мяркуюць, што гэта справа рук іх беларускіх калегаў, якія могуць быць уцягнутыя ў незаконную міграцыю.

Падчас узвядзення плоту ўзнікаюць праблемы, звязаныя з рэльефам мясцовасці. Даводзіцца высякаць дрэвы і праводзіць канструкцыі па рэках і канавам.

Будаўніцтва плоту на мяжы з Беларуссю вядзецца ў тры этап, поўнасцю завяршыць яго плануюць у 2024 годзе. У суседняй Літве і Польшчы такі плот ужо пабудаваны.

фота: pic2.la.lv

Платныя паркоўкі ў цэнтры Магілёва – ўсё?

Навіна ад

Тэставы рэжым імкнецца да бясконцасці, SMS адпраўляць ужо нікуды не трэба. Выглядае, што эксперымент праваліўся.

Пілотны праект па стварэнні платных парковак на самых загружаных артэрыях горада стартаваў яшчэ ў верасні 2021 года. Магілёў павінен быў стаць першым горадам у краіне пасля Мінска, дзе планавалася ўкараніць гэтую практыку. Пад праект трапілі самыя “балявыя кропкі” транспартнай інфраструктуры – вуліца Міронава і бульвар Леніна. 

Першапачаткова меркавалася даць магілёўскім аўтамабілістам тэрмін да канца студзеня 2022 года, каб яны прызвычаіліся да практыкі адпраўкі SMS на кароткі нумар 2046. Пасля гэтага тэставага перыяду – і па яго выніках – планавалася ўвесці аплату за стаянку. 

У красавіку бягучага года тэрмін тэставага перыяду быў працягнены да ліпеня. Сістэма працавала наладжана, у адказ на адпраўленыя SMS спраўна прыходзілі паведамленні аб тым часе, колькі аўтамабіль можа заставацца на месцы стаянкі. Таксама быў запушчаны адмысловы сайт праекта. 

Але пасля наступлення ліпеня ніякіх змен у правілах паркоўкі не адбылося. Больш за тое, на інфармацыйных стэндах ужо знік і кароткі нумар 2046, на які трэба было адпраўляць SMS – яго заклеілі.

У Магілёўскім камунальным дарожна-маставым прадпрыемстве, што “тэставы рэжым працягваецца”. 

Але як доўга ён яшчэ будзе працягвацца, і ці скончыцца калі-небудзь наогул, нам паведаміць не змаглі. Таксама запэўнілі, што ўжо больш не трэба адпраўляць SMS альбо USSD-запыты. 

Атрымліваецца, сама сутнасць тэставага рэжыма пацярпела няўдачу. Кіроўцам больш не трэба вучыцца дысцыпліне правільнай паркоўкі ў вызначаных гарвыканкамам месцах. А калі так, то і пра ўвядзенне платнага рэжыму можна ўжо забыць.

 

Картэж прэзідэнта Ўкраіны трапіў у аварыю. У Зяленскага нязначныя траўмы

Навіна ад

Картэж Зяленскага трапіў у аварыю ноччу. Адна з машын картэжу, у якой знаходзіўся Зяленскі, сутыкнулася ў Кіеве з легкавіком.

«Прэзідэнта агледзеў лекар, сур’ёзных пашкоджанняў не выяўлена», – піша прэс-сакратар Зяленскага Сяргей Нікіфараў.

Паводле яго, кіроўцу легкавога аўтамабілі аказалі першую дапамогу медыкі, якія суправаджалі Зяленскага.

Інфармацыйнае агенцтва «УНІАН» паведамляе, што ў сеціве зʼявіліся першыя кадры з месца аварыі з удзелам прэзідэнта Уладзіміра Зяленскага. На знятых відавочцамі кадрах бачная вялікая колькасць машын паліцэйскіх, пажарных і хуткай дапамогі на адной са сталічных вуліц.

Аварыя, як мяркуецца, адбылася 15 верасня апоўначы.

14 верасня Зяленскі наведваў украінскіх байцоў у вызваленым ад расійскіх войск Ізюме Харкаўскай вобласці.

Дзень у гісторыі: 15 верасня. Нарадзіўся вайсковец, удзельнік беларускага руху Канстанцін Аляксееўскі. Памёр паэт, публіцыст Уладзіслаў Сыракомля. Расстраляны партыйны, дзяржаўны дзеяч савецкай Беларусі Аляксандр Адамовіч. Міжнародны дзень дэмакратыі і Дзень бібліятэк Беларусі

Навіна ад

Міжнародны дзень дэмакратыі.

Адзначаецца ад 2007 году і заснаваны Генеральнай асамблеяй ААН для пашырэння і падтрымкі прынцыпаў дэмакратыі.

Дэмакратыя належыць да ўніверсальных і фундаментальных чалавечых каштоўнасцяў і прынцыпаў Арганізацыі Аб’яднаных Нацыяў. Дэмакратыі маюць агульныя рысы, але адзінай мадэлі ў свеце няма.

Дзень бібліятэк Беларусі.

Адзначаецца ад 2001 году, а нагодаю стала гадавіна заснавання Нацыянальнай бібліятэкі ў 1922 годзе.

У Нацыянальнай бібліятэцы даступна больш за 9 мільёнаў кніг і 3 мільёны перыядычных друкаваных выданняў.У бібліятэцы захоўваецца каля 70 тысяч рэдкіх старадрукаў, а таксама рукапісаў.

1855 год. Нарадзіўся Канстанцін Аляксееўскі.

Вайсковы дзеяч.

Удзельнік беларускага нацыянальнага руху пачатку XX стагоддзя.

У 1917 годзе ў Выбаргу далучыўся да арганізацыі матросаў-беларусаў Балтыйскага флоту.

Выбраны ў склад Савету старэйшын на Першым Усебеларускім з’ездзе, на якім заклікаў «адрадзіць беларускую дзяржаву», выступіў у абарону бел-чырвона-белага сцяга.

У 1918 годзе запрошаны Радай БНР у Менск для фармавання беларускай нацыянальнай арміі. Далейшы лёс невядомы.

1862 год. Памёр Уладзіслаў Сыракомля (Людвік Кандратовіч).

Паэт, публіцыст этнограф.

Падарожнік па Беларусі, Літве, Польшчы.

Творчасць Сыракомлі адметная палымяным патрыятызмам, глыбокім веданнем гісторыі Бацькаўшчыны, асаблівасцяў нацыянальнай псіхалогіі беларусаў.

Яго імем названа вуліцы ў Нясвіжы, Мінску, Варшаве.

1898 год. Нарадзіўся Мікалай Кавязін.

Рэжысёр, педагог, мастак, тэатральны дзеяч.

Арганізатар і мастацкі кіраўнік тэатру юнага гледача, мастацкі кіраўнік абласных драматычных тэатраў: Палескага імя Янкі Купалы (Мазыр), Бабруйскага, Гродзенскага.

Николай Ковязин фотография

1929 год. Нарадзіўся Арлен Кашкурэвіч.

Беларускі мастак у галіне станковай і кніжнай графікі. Народны мастак Беларусі. Заслужаны дзеяч мастацтваў.

Аўтар дзясятка серый ілюстрацыяў да кніг.

1937 год. Расстраляны Аляксандр Адамовіч.

Партыйны і дзяржаўны дзеяч.

Намеснік народнага камісара земляробства БССР.

Працаваў на дзяржаўных і партыйных пасадах, у тым ліку ў Бабруйску, Клімавічах.

Загадваў аддзелам друку ЦК КП(б)Б, быў намеснікам рэдактара газеты «Беларуская вёска».

Арыштаваны ў 1930 года па сфабрыкаванай справе «Саюзу вызвалення Беларусі» і асуджаны да 10 гадоў папраўча-працоўных работ. Пакаранне адбываў спачатку ў Салавецкім, затым у Беламорска-Балтыйскім лагерах.

У 1935 годзе, быўшы зняволеным, зноў арыштаваны і асуджаны да 7 гадоў папраўча-працоўных работ.

У 1937 года прыгавораны за «антысавецкую агітацыю» да расстрэлу.

Рэабілітаваны ў 1988 годзе.

1971 год. Створана арганізацыі «Грынпіс» («Greenpeace»).

Найвядомейшая незалежная некамерцыйная міжнародная грамадская экалагічная арганізацыя.

Паўстала ў канадскім Ванкуверы для вырашэння глабальных экалагічных праблем.

Грынпіс дзеіць на ахвяраванні прыхільнікаў і прынцыпова не прымае фінансавую дапамогу ад дзяржаўных структур, палітычных партый або бізнесу.

Грынпіс вядомы сваімі акцыямі, нацэленымі на прыцягненне ўвагі СМІ да экалагічных праблем.

Імкнецца пабываць на месцы экалагічных здарэнняў і даць незалежную інфармацыю.

Офісы прадстаўніцтваў «Грынпіс» працуюць у большасці еўрапейскіх краін. У Беларусі прадстаўніцтва няма.

 

У публікацыі выкарыстаныя звесткі з рэсурсу «Вікіпедыя» і іншых адкрытых у інтэрнэце крыніцаў

 

Вайна ва Ўкраіне. У Крывым Рогу расійскія войскі атакавалі гідратэхнічныя збудаванні і транспартную інфраструктуру

Навіна ад

Горад у Днепрапятроўскай вобласці абстралялі 7 ракетамі.

Паводле кіраўніка абласной ваеннай адміністрацыі Валянціна Разнічэнкі, ракеты пацэлілі па аб’ектах крытычнай і транспартнай інфраструктуры. Сурʼёзныя пашкоджанні зазналі гідратэхнічныя збудаванні.

«Папярэдне абышлося без пацярпелых. Некалькі раёнаў Крывога Рога засталіся без вады. Працуюць МНС і ратавальнікі, якія ліквідаваць наступствы разбурэнняў», – піша Валянцін Разнічэнка.

Начальнік ваеннай адміністрацыі гораду Аляксандр Вілкул паведамляе, што ў Крывым Рогу ўжо пачалі падаваць ваду  насельніцтву. Ён заклікае гараджанаў захоўваць спакой і запэўнівае, што сітуацыя кантралюецца.

Паводле яго, расійскія войскі ўдарылі па адным з абʼектаў гідратэхнічнай інфраструктуры гораду.

«Мы разумеем, што рабіць. Падача вады насельніцтву ўжо пачалася. Калі да вас вада не дайшла, то дойдзе бліжэйшым часам», – адзначае ён.

Інфармацыйная агенцтва «УНІАН» паведамляе, што па Крывым Рогу ракетны ўдар быў нанесены а 17 гадзіне. Выданне, спасылаючыся на тэлеграм-каналы, піша, што ракеты  пашкодзілі дамбу Карачуноўскага вадасховішча. У выніку, у рацэ Інгулец рэзка павысіўся ўзровень вады.