Традыцыйныя рэспубліканскія спаборніцтвы па лёгкай атлетыцы памяці заслужанага трэнера БССР Васіля Яроміна стартуюць сёння ў Магілёве.
Спаборніцтвы будуць праходзіць у спарткомплексе “Алімпіец” на працягу двух дзён.
У праграме 13 дысцыплін: бег на 60, 200, 400, 800, 1500 і 3000 м, бег з бар’ерамі на 60 м, спартыўная хада на 3000 м, змешаная эстафета 4х200 м, скачкі ў даўжыню і вышыню.
Як падкрэслілі арганізатары, у рэспубліканскіх спаборніцтвах будуць браць удзел таксама спартсмены з Расіі.
Урачыстае адкрыццё пройдзе сёння ў 12.45 – паведамляе БелТА.
1564 год. Загадам Івана Жахлівага і дабраславеннем мітрапаліта Макарыя ў Маскве надрукавана першая руская кніга “Апостал”.
Надрукавалі яе выхадцы з Беларусі Іван Фёдараў (мяркуемае месца нараджэння – сённяшні Вілейскі раён) і Пётр Мсціславец.
Выбар для першага выдання кнігі быў невыпадковы: “Апостал” выкарыстоўваўся на богаслужэннях, пры падрыхтоўцы святароў і для навучання грамаце ў царкоўна-прыходскіх школах.
Праца над “Апосталам” вялася з красавіка 1563 па сакавік 1564 года.
1710 год. Выйшаў у свет першы друкаваны падручнік па геаграфіі на рускай мове – “Геаграфія ці кароткае зямнога свету апісанне”.
Хто з’яўляўся аўтарам першага рускага падручніка па геаграфіі, да гэтага часу загадка. Гісторыкі мяркуюць, што кніга была перакладзена з галандскай мовы.
Дакладна невядомы і перакладчык. Але ім можа быць ураджэнец Мсціслаўшчыны Ілля Капіеўскі (Капіевіч, 1651–1714). Асветнік, першы настаўнік Пятра І ў Галандыі, выдавец, перакладчык шматлікіх кніг, паэт, пісьменнік, распрацоўшчык грамадзянскага шрыфту, аўтар сучасных рускіх назваў 12 сузор’яў, папулярызатар тэрмінаў “мапа”, “карта”, “глёбус” у рускай мове. Імя І. Капіевіча носіць адна з вуліц Мінска.
У падручніку геаграфіі 1710 года апісаны “зямныя кругі” – роўналежнік, тропікі, канцавоссі. Давалася ў ім і паняцце аб градусах шырыні і даўжыні, пералічваліся асноўныя крыніцы карысных выкапняў Еўропы, пазначаны тыпы палітычнага ладу ў розных еўрапейскіх краінах, апісаны некаторыя краіны і народы Азіі, Амерыкі, Аўстраліі і Афрыкі.
1781 год. Памёр Міхал Карыцкі (1714–1781).
Беларускі паэт-лацініст эпохі Асветніцтва, манах-езуіт, педагог, доктар філасофіі.
Скончыў Віленскую акадэмію. Выкладаў у Мінскім езуіцкім калегіуме, Віленскай акадэміі, Слуцкай семінарыі, у Варшаве, Драгічыне, Нясвіжы, Полацку, Бабруйску.
Падзяляў ідэі Асветніцтва, імкнуўся палепшыць сістэму адукацыі, надаць ёй больш свецкі характар.
Пачынальнік класіцызму як творчага метаду, паўплываў на паэзію Рэчы Паспалітай. Пісаў вершы, казкі, элегіі, пасланні, паэмы, элегіі, пародыі лацінскай мовай.
Пасля скасавання (1773) Папам ордэна езуітаў Адукацыйная камісія прызначыла яго на пасаду прэфекта Мінскага калегіума.
Cваю маёмасць ахвяраваў на патрэбы Мінскай школы, дзе выкладаў у апошнія гады.
У некаторых творах выказваў свае пачуцці замілавання родным краем, ганарыўся яго прыгажосцю і багатай гісторыяй, праслаўляў адвечную славянскую раку Дзвіну і старажытны Полацк, куды раіў Кацярыне ІІ перанесці сваю сталіцу.
1861 год. На наступны дзень пасля дня нараджэння памёр Тарас Шаўчэнка (1814–1861).
Вядомы ўкраінскі мастак і літаратар.
Беларусь наведваў у 1829 годзе, у час прыезду свайго ўладніка П. Энгельгарта ў Вільню. У 1843 годзе, здабыўшы волю, Шаўчэнка па дарозе з Пецярбурга да Украіны наведаў Віцебск, Магілёў, Гомель. Гэтым жа шляхам вяртаўся ў Пецярбург у 1847 годзе. Падрымліваў сувязі са многімі беларускімі літаратарамі, удзельнікамі вызваленчага руху.
У яго гонар у Беларусі усталяваны помнікі ў Брэсце, Слуцку, Гомелі, Мінску, Магілёве (2005). У 2015 годзе помнік у Магілёве быў пашкоджаны вандаламі.
Выява Шаўчэнкі разам з Гогалем і Пушкіным размешчана на мемарыяльнай дошцы на будынку па Ленінскай, 33.
У Беларусі вуліцы Шаўчэнкі ёсць у шматлікіх гарадах, у тым ліку Бабруйску, Магілёве.
1939 год. У Мінску прэм’ерай оперы «Міхась Падгорны» Яўгена Цікоцкага адкрыўся будынак Дзяpжаўнага тэатра опеpы і балета Белаpyсi.
Адзін з двух музычных тэатраў краіны разам з Музычным тэатрам. Размешчаны ў Траецкім прадмесці. Будынак оперы – помнік міжнароднага значэння, узор савецкага канструктывізму з элементамі ар-дэко. Існуе легенда, што Янка Купала, убачыўшы праект, выклікнуў: «А летуценны хлопец гэты Лангбард!».
Пастаноўкі большасці спектакляў у тэатры ідуць на мове арыгінала, а таксама на беларускай і рускай.
У тэатры працавала 8 Народных артыстаў СССР і 11 – БССР.
Пасля масавых фальсіфікацый на прэзідэнцкіх выбарах 2020 года, жорсткага разгону акцый пратэстаў, збіцця і катаванняў затрыманых пратэстоўцаў, калектыў тэатра выходзіў на акцыі пратэсту. Больш за 300 артыстаў і супрацоўнікаў падпісалася пад зваротам у падтрымку купалаўцаў.
27 кастрычніка артысты правялі акцыю салідарнасці з беларускім народам, звярнуўшыся перад пачаткам спектакля «Царская нявеста» да прысутных: «У гэты пераломны момант, калі ў нашай краіне адбываецца беззаконне і несправядлівасць, мы не можам маўчаць…». Пасля звароту яны выканалі песню «Магутны Божа», гледачы падтрымалі артыстаў авацыямі.
Пасля гэтага пачаліся звальненні, а спектаклі былі адменены «у сувязі са складанай эпідэміялагічнай сітуацыяй».
1940 год. У в. Папоўшчына (цяпер Карпаўскі Чэрыкаўскага раёна) нарадзіўся Аляксей Марачкін.
Беларускі мастак і грамадскі дзеяч, педагог.
Працаваў галоўным мастаком Мастацкага фонду, у Беларускай акадэміі мастацтваў, загадваў кафедрай жывапісу. Член БНФ. Адзін з заснавальнікаў і першы старшыня мастацкай суполкі «Пагоня».
Працуе пераважна ў станкавым жывапісе ў жанрах партрэта, тэматычнай карціны, пейзажа і нацюрморта. Тэматыка яго твораў прысвечана гістарычным падзеям мінулага і сучаснасці, раскрывае багацце духоўнай культуры беларускага народа.
Стварыў партрэты шматлікіх выдатных дзеячаў беларускай гісторыі і культуры, у тым ліку «Цётка», «Пачатак. Францыск Скарына», «М. Гусоўскі», «Вераніка і Максім», «Рагнеда», «Кірыла Тураўскі», «Канцлер Вялікага Княства Літоўскага Леў Сапега», «Мікола Ермаловіч», серыю партрэтаў «Мае сучаснікі», цыкл твораў «Народныя легенды і паданні», розных тэматычных кампазіцый, у тым ліку з Чарнобыльскай тэмай.
Яго працы захоўваюцца ў Нацыянальным мастацкім музеі, у Мастацкай галереі Нацыянальнага Полацкага гісторыка-культурнага музея-запаведніка, у музеях і прыватных галерэях Беларусі, Польшчы, Германіі, ЗША.
Узнагароджаны медалём Францыска Скарыны, медалём 100 гадоў БНР Рады Беларускай Народнай Рэспублікі.
Двойчы адмовіўся ад ганаровага дзяржаўнага звання «Ганаровы мастак», пратэстуючы супраць сістэмы дзяржаўнага патранату і кантролю за мастацтвам, супраць палітыкі А. Лукашэнкі.
А. Марачкін і Г. Бураўкін.
1942 год. У Мсціславе нарадзіўся Міхась Ткачоў.
Беларускі гісторык, археолаг, грамадскі дзеяч. Доктар гістарычных навук, прафесар.
Загадчык рэдакцыі гісторыі, галоўны рэдактар выдавецтва «Беларуская Энцыклапедыя» імя Петруся Броўкі. Ініцыятар стварэння энцыклапедыі «Археалогія і нумізматыка Беларусі», «Энцыклапедыі гісторыі Беларусі».
Вывучаў ваенна-абарончае дойлідства, матэрыяльную культуру і архітэктуру гарадоў Беларусі XI-XVIII стагоддзяў.
Адзін з аўтараў кніг «Нарысы па археалогіі Беларусі», «Гісторыя беларускага мастацтва».
Першым прасачыў генезіс, эвалюцыю і этапы развіцця замкаў і абарончых сістэм населеных пунктаў, а таксама арганізацыю абароны беларускіх гарадоў.
Памёр 31 кастрычніка 1992 года.
У яго памяць у Гродна і Мсціславе ўсталяваны мемарыяльныя шыльды.
1946 год. Нарадзіўся Уладзімір Гасцюхін.
Савецкі і беларускі акцёр тэатра і кіно, Заслужаны артыст РСФСР, Народны артыст Беларусі.
Здымаўся ў больш чым 120 кінафільмах, у тым ліку “Хаджэнне па пакутах”, “Час выбраў нас”, “Магістраль”, “У пошуках капітана Гранта”, “Знак бяды”, “Шляхціц Завальня”, “Дальнабойнікі”, “Ціхі Дон”, “Смерць шпіёнам. Крым”, “Снайпер: Апошні стрэл”.
У 2017 годзе зняўся ў прапагандысцкім фільме тэлеканала Беларусь 1 «Белы легіён чорных душ. Журналісцкае расследаванне».
Прадстаўнік “рускага свету”. Прытрымліваецца антыамерыканскіх і антыўкраінскіх поглядаў. «Персона Нон Грата» на тэрыторыі Украіны.
Заснавальнік Рэспубліканскай партыі працы і справядлівасці.
Сярод многіх узнагарод, медаль і Ордэн Ф. Скарыны.
1969 год. У Магілёве нарадзіўся Андрэй Вараб’ёў.
Беларускі скульптар.
Скончыў Мінскае мастацкае вучылішча, Беларускую акадэмію мастацтваў. Выкладаў мастацкія дысцыпліны ў МДУ імя А. Куляшова.
З 1995 года актыўна выстаўляецца, у тым ліку і за мяжой, арганізуе ўласныя праекты. Мае ўласную галерэю. З’яўляўся кіраўніком абласной арганізацыі Саюза мастакоў Беларусі.
Аўтар шматлікіх гарадскіх скульптур, якія вядомы большасці магілёўцаў, шклаўчан, быхаўчан і іншых. Сярод яго скульптур – Шклоўскі агурок, закаханая пара, гімнастка, львы на мосце імя Яшына праз Дняпро ў Магілёве, Маленькі прынц, вобраз Магіслава на Ратушы, мемарыяльныя шыльды славутым ураджэнцам і іншыя.
1972 год. Адбыўся выбух на Мінскім радыёзаводзе.
Загінула ад 103 да 143 чалавек, больш за 100 пацярпела.
Выбух у цэху па вырабе тэлевізыйных футляраў Мінскага радыёзавода – гэта катастрофа стала адной з найбольш масавых у Беларусі паводле колькасці ахвяр. Ад выбуху абрынуліся жалезабетонныя перакрыцці, пакінуўшы ад будынка толькі слупы, на якіх трымаўся дах.
Прычынай выбуху быў названы дробнадысперсны пыл ад шліфавання драўняных пліт і фанеры. За шматлікія гады працы ён асядаў у вентыляцыі, якая не спраўлялася з адкідамі вытворчасці такога памеру. Адной іскры было дастаткова, каб пыл выбухнуў.
Праекціроўшчыкі і дырэктар завода апынуліся за кратамі.
Мінск з космасу. Месца выбуху (завулак С. Кавалеўскай) адзначана чырвоным кружком.
2000 год. Памёр ураджэнец в. Батвінаўка (зараз Крычаўскі раён) Уладзімір Труханоўскі (1914-2000).
Савецкі і расійскі гісторык, пісьменнік і дыпламат. Доктар гістарычных навук. Акадэмік РАН.
Скончыў Ленінградскі педінстытут, Вышэйшую дыпламатычную школу. Служыў у войску, у наркамаце замежных спраў, генеральным консулам у Іране, загадчыкам аддзела ААН. Браў удзел у Сан-Францыскай і Патсдамскай канферэнцыях.
Выкладаў, кіраваў кафедрай у Маскоўскім інстытуце міжнародных зносін, працаваў у Інстытуце гісторыі АН СССР, галоўным рэдактарам часопіса «Пытанні гісторыі», віцэ-прэзідэнтам Савецкай Асацыяцыі Садзейнічання ААН, прэзідэнтам Асацыяцыі брытанскіх даследаванняў.
2011 год. Памёр Янка Сіпакоў (1936-2011).
Беларускі пісьменнік, перакладчык. Заслужаны дзеяч культуры. Лаўрэат Дзяржаўнай прэміі БССР.
Працаваў у шклоўскай раённай газеце «Чырвоны барацьбіт», часопісах «Вожык», «Маладосць», «Беларусь», у выдавецтве «Беларуская Энцыклапедыя».
Аўтар вершаў, паэтычных зборнікаў, кніг паэзіі, паэм у прозе, нарысаў, кніг прозы, кнігі прытчаў, фантастычна-прыгодніцкай аповесці, цыклаў мініяцюр, гістарычных апавяданняў, зборнікаў гумарэсак.
Пераклаў на беларускую мову класікаў сусветнай і рускай літаратуры.
Памёр 10 сакавіка 2011 года ў Мінску.
На Першамайскай дэманстрацыі. Я. Сіпакоў, І. Навуменка, Н. Маеўская, Б. Сачанка, Ю. Свірка. 1958 год.
2013 год. Памёр Барыс Аракчэеў (1926-2013).
Беларускі мастак, педагог. Заслужаны дзеяч мастацтваў.
Працаваў у станковым жывапісе, у жанрах пейзажа, нацюрморта, тэматычных карцін і батальных сцэн.
Пад час вайны служыў у Бабруйску, Мінску.
Скончыў Мінскае мастацкае вучылішча, Тэатральна-мастацкі інстытут (першы выпуск, разам з будучымі народнымі мастакамі А. Анікейчыкам, В. Грамыкам, А. Кашкурэвічам i Л. Шчамялёвым).
Сярод яго твораў – пейзажы, нацюрморты, серыя партрэтаў сучаснікаў і знакамітых людзей. З’яўляўся адным з чатырох стваральнікаў дыярамы «Мінскі кацёл» у Музеі гісторыі Вялікай Айчыннай вайны.
Выкладаў у Мінскім мастацкім вучылішчы, Акадэміі мастацтваў, з’яўляўся настаўнікам многіх вядомых беларускіх мастакоў, сярод якіх У. Кожух, А. Кузьміч, В. Рускевіч, Ф. Янушкевіч, В. Ясюк.
Творы мастака знаходзяцца ў Нацыянальным мастацкім музеі, Фондзе Саюза Мастакоў, Магілёўскім мастацкім музеі і іншых, галерэях Гомеля, Светлагорска, Полацка, Крупак, Баранавічаў, у прыватных калекцыях замежных краін.
Па ёй можна прасачыць, як змянялася Зямля за апошнія 100 мільёнаў год.
Навукоўцы аўстралійскага ўніверсітэта Сіднэя склалі самую падрабязную мадэль геалагічных змен Зямлі пад назвай “Перспектыва Элерса” – паведамляе часопіс Science.
На відэа вучоныя паказалі, як ландшафт Зямлі мяняўся за апошнія 100 мільёнаў гадоў: ад змены ўзроўню Сусветнага акіяна да руху тэктанічных пліт.
На мадэлі ўлічаны такія фактары, як змена клімату і розныя прыродныя з’явы, у тым ліку, вывяржэнне вулканаў, землятрусы.
На двух прадстаўленых відэа бачна, як перасоўваюцца кантыненты, мяняюцца рэчышчы, перамяшчаюцца тэктанічныя пліты.
Створаная мадэль у далейшым можа дапамагчы зразумець, як паверхня Зямлі будзе рэагаваць на змяненне клімату і тэктанічныя сілы, і вылічыць яшчэ толькі маючыя адбыцца змены планеты.
У Чавускім раёне, на затоне ракі Проня Мціслаўскай міжраённай інспекцыяй затрыманы грамадзянін Н., які лавіў рыбу забароненым спосабам. Ён незаконна здабыў тры плоткі і аднаго галаўля, агульнай вагой 0,3 кілаграма з дапамогай 9 экран-тэлевізараў, якія ўсталёўваў пад лёд – паведамляе газета “Іскра”.
Грамадзянін таксама меў пры сабе забароненую прыладу рыбалоўства: стаўную лескавую сетку даўжынёй 15 метраў, але выкарыстаць яе не паспеў.
У выніку незаконнай здабычы рыбы навакольнаму асяроддзю была нанесена шкода ў памеры 12 базавых велічынь, што складае 444 рублі. Кошт незаконна здабытай рыбы склаў 9,25 рублёў.
Супрацоўнікі міжраённай інспекцыі правялі таксама агляд дома затрыманага грамадзяніна. Знойдзены забароненыя прылады рыбалоўства: тры стаўныя лескавыя сеткі, агульнай даўжынёй 54,8 метра. Складзены два пратаколы аб адміністрацыйных правапарушэннях за незаконны лоў і за валоданне і захоўванне забароненых прылад.
У абласным спаборніцтве “Лепшая аптэка года” каманда кіраўскай цэнтральнай раённай аптэкі заняла першае месца.
Калектыў перамог у намінацыі “Лепшая цэнтральная аптэка раёна (сярод цэнтральных раённых аптэк з насельніцтвам раёна звыш 15 тысяч чалавек)”, паведамляе газета “Кіравец”.
Загадчыца аптэкі Зоя Цмыг патлумачыла, што штогод пры падвядзенні вынікаў працы ўлічваецца мноства паказчыкаў і крытэрыяў фінансавай, эканамічнай, вытворчай і фармацэўтычнай дзейнасці. Напрыклад, улічваецца прыбытак ад продажу прадукцыі, тавараў, паслугі, рэнтабельнасць продажаў, асартымент прадукцыі, удзел каманды ў грамадскім жыцці і г.д.
“Наша маленькая, але добразычлівая каманда кіраўскіх фармацэўтаў у колькасці 11 чалавек, тры з якіх у цяперашні час знаходзяцца ў адпачынку па догляду за дзецьмі да трох гадоў, імкнецца працаваць якасна і эфектыўна на працягу многіх гадоў. Калі вынік такой працы высока ацэнены кіраўніцтвам, з’яўляецца стымул працаваць яшчэ лепш ” – кажа Зоя Валянцінаўна.
Касцяк супрацоўнікаў аптэкі складаецца з вопытных фармацэўтаў, за плячамі якіх – дзясяткі гадоў працы. Для большасці з іх аптэка Кірава стала першым і сталым працоўным месцам. Сама пані Зоя ўпершыню перайшла парог гэтай аптэкі 44 гады таму.
А гісторыя аптэчнай справы Кіраўскага раёна, з яе словаў, пачалася ў 1936 годзе, калі аднапавярховы драўляны будынак быў набыты ў прыватнай асобы для Цэнтральнай аптэкі на вуліцы Кірава, на месцы цяперашняй пракуратуры. Каманда была вялікай, каля 40 чалавек, 6 філіялаў працавалі ў сельскай мясцовасці. Будаўніцтва новага аптэчнага будынка праводзілася на працягу пяці гадоў, перш чым у 1985 годзе аптэка пераехала ў цяперашні будынак.
Жыхары раёна добра знаёмыя з уважлівымі да кожнага наведвальніка фармацэўтамі-рэцэптарамі лепшай аптэкі вобласці і давяраюць іх парадам.
Еўрапейскія вытворцы аўтамабіляў у масавым парадку здымаюць з выпуску мадэлі з малалітражнымі рухавікамі ўнутранага згарання з-за ўзмацнення экалагічных патрабаванняў – паведамляе point.md са спасылкай на Automotive News Europe.
За 5 гадоў скарачэнне вытворчасці ўдвая.
У 2022 годзе сегмент кампактных малалітражак быў амаль удвая скарочаны ў параўнанні з максімальным узроўнем продаж у 2017 годзе, калі ў Еўропе было рэалізавана 1,2 мільёна мікракараў.
Гэта адбылося ў сувязі са зняццем з вытворчасці кампактных мадэляў Citroen C1, Peugeot 108 і Smart Forfour, якія пакінулі рынак пасля Opel Karl і Adam, Skoda Citigo, Ford KA, Seat Mii і Suzuki Selenio.
Кампаніі пазбаўляюцца ад малалітражак з рухавікамі ўнутранага згарання, спрабуючы абмежаваць павелічэнне выдаткаў і знізіць узровень выкідаў вуглякіслага газу
Пакінуць толькі вытворчасць “кампактаў”-электракараў.
Зніжэннем мадэльнага спектру гарадскіх “кампактаў” аўтавытворцы імкнуцца знізіць выдаткі на развіццё новых пакаленняў у сувязі з хуткім увядзеннем экалагічнага стандарту Euro-7. Аўтамабільныя вытворцы маюць намер пакінуць ў гэтым сегменце. толькі электрычныя “кампакты”.
На выходныя ў Магілёўскай вобласці сіноптыкі прагназуюць сярэднесутачныя тэмпературы блізкія да 0°С, з ваганнямі ноччу ад -5 -8°С да +3°С, днём – ад -3°С да +5°С.
Будзе пераважаць пахмурнае неба. Пройдзе невялікі снег, пральецца невялікі дождж. З пятніцы па нядзелю працягласць дня вырасце на 8 хвілін з 11 гадзін і 24 хвілін 10 сакавіка да 11 гадзін 32 хвілін 12 сакавіка. У нядзелю сонца ўзыйдзе а 7:22, зойдзе а 18:54.
Сінаптычны прагноз на апошні рабочы дзень тыдня, 10 сакавіка: раніцай каля -5 -8°С, удзень да -2 -4°С, уноч да 0 -3°С. Раніцой неба з праясненнямі, удзень у асноўным будзе пахмурным, у першай палове дня без ападкаў, у другой палове – невялікі снег. Вецер на працягу сутак усходні і усходне-заходні, хуткасцю да 4-7 м/с.
Суботняе, 11 сакавіка, надвор’е абяцае быць пахмурным. Удзень невялікі снег да вечара трансфармуецца ў невялікі доджд. Раніцой тэмпература каля +1 +3°С, днём да +4 +5°С, ноччу ад +1 +3°С да -2°С. Прагназуецца рэкая змена вятроў з паўднёва-усходняга напрамку на заходні. Хуткасць ветру вырасце да 5-9 м/с, месцамі пры парывах – да 10 м/с і вышэй. На асобных участках дарог захаваецца галаледзіца.
Народныя прыкметы.
Калі птушкі ўюць гнёзды на сонечным баку дамоў і дрэў, значыць, лета будзе халоднае.
Калі пералётныя птушкі да гэтага дня вярнуліся з цёплых краёў, значыць быць багатаму ўраджаю хлябоў.
Пачынаюць ускрывацца буйныя рэкі.
Вярба суцэльная – да добрага ўраджаю.
У нядзелю, 12 сакавіка, раніцай тэрмометры пакажуць да -2°С, удзень 0 -1°С, да ночы слупок тэрмометра панізіцца да -2 -3°С. На працягу сутак вызначаць надвор’е будуць заходнія вятры хуткасцю да 5-8 м/с. Пахмурна, з рання магчымы невялікі снег. На асобных участках дарог захаваецца галаледзіца.
Пракоп (народны каляндар). Прыкметы.
На Пракопа каляіна пад капытамі каня праступаецца і санны шлях разбураецца.
Калі вярба распускаецца спачатку на верхавіне, то пасеў будзе добры і пачаць сеяць лепш крыху раней. А калі вярба на верхавіне распускацца не спяшаецца, то добрым будзе другі пасеў.
Пачынае стала капаць з дахаў. Час збору хваёвых нырак. Галінка хвоі чысціць у хаце застаялы за зіму паветра.
Ранак панядзелка 13 сакавіка пачнецца ў невялікага мароза -3 -4°С, з пахмурнасці. Трэба не забыць узяць парасоны – удзень прагназуецца невялікі дождж. На асобных участках дарог захаваецца галаледзіца.
Пра змены раскладу руху магілёўскіх аўтобусаў інфармуе Аўтобусны парк № 1.
Расклад руху аўтобуснага маршруту № 43 зменіцца з 15 сакавіка ў сувязі з перакрыццем руху па вуліцы Камсамольскай і арганізацыяй аб’езду маршрутам вуліца Піянерская – праспект Міра. У зваротным напрамку шлях ляжа па вул. Лазарэнка, вул. Болдзіна.
З 18 сакавіка зменіцца расклад руху і аўтобуснага маршруту № 41 з той жа прычыны.
Расія адправіла ў Беларусь новыя падраздзяленні сваіх войскаў, эшалоны з тэхнікай. Верагодна, Расія праводзіць ратацыю сваіх войск – паведамляе news.pn.
Так, 7 сакавіка на чыгуначны вакзал Асіповічы-1 прыбылі два эшалоны з тэхнікай і жывой сілай з Расіі. Першы быў адпраўлены 6 сакавіка са станцыі Бекасава-Сартавальная Маскоўскай вобласці. У ім знаходзілася 47 вагонаў, у тым ліку: 5 пасажырскіх вагонаў з асабовым складам каля 250 чалавек, 3 крытых вагона з рыштункам, 39 вагонаў-платформ з ваеннай тэхнікай. У Асіповічы прыбылі 18 адзінак 152-мм гаўбіц “Мста-Б”.
У Магілёве супрацоўнікі Дзяржаўтаінспекцыі выявілі тыповыя парушэнні правіл дарожнага руху кіроўцамі маршрутных таксі – паведамляе прэс-служба Магілёўскага абласнога ўпраўлення ўнутраных спраў.
Маршрутчыкі часта перавозяць пасажыраў звыш дапушчальнай колькасці, не саступаюць дарогу пешаходам і іншаму транспарту, ездзяць не прышпіленымі.
На працягу некалькіх дзён падчас рэалізацыі прафілактычных мерапрыемстваў, накіраваных на папярэджанне парушэнняў правіл дарожнага руху з боку маршрутчыкаў, супрацоўнікамі ДАІ былі праведзены рэйды, правераны дзясяткі адзінак транспартных сродкаў.
Названыя тыповыя парушэнні кіроўцаў маршрутак не з’яўляецца нейкім адкрыццем – такія парушэнні вядомы з моманту масавага з’яўлення маршрутных таксі на вуліцах беларускіх гарадоў.
