Tag: Беларусь

У Дрыбіне праходзіць фестываль, які фінансава падтрымліваў Еўрасаюз

Навіна ад

Тое было ў 2015 годзе, калі ў Беларусі трываў чарговы перыяд лібералізацыі.

Улада атрымлівала грантавую падтрымку ад еўрапейцаў 

Тады рэгіянальны фестываль народнай творчасці, промыслаў і рамёстваў «Дрыбiнскія таржкi» стаў пераможцам у конкурсе садзейнічання развіццю мясцовых ініцыятываў. Ён рэалізоўваўся Праграмай развіцця ААН (ПРААН) пры фінансавай падтрымцы Еўрасаюзу. Бюджэт праекту не агалошваўся, але паводле ўмоваў грантадаўцы, мог сягаць 25 тысяч еўра.

Разам з дрыбінскім праектам былі падтрыманыя яшчэ 17 ініцыятываў з Магілёўскай вобласці.

У 2018-ым Дрыбін адведала кіраўніца прадстаўніцтва ААН у Беларусі Іаана Казана-Вішнявецкая. Яе сустракаў старшыня райвыканкаму. Замежніцу цікавіла, як ажыццяўляецца праект “Стварэнне «Дрыбінскай школы шапавалаў»”, пад які было выдзелена фінансаванне па той жа ААН-аўскай праграме. Бюджэт праекту складаў 12 438 еўра.

Іаана Казана-Вішнявецкая паўдзельнічала ў майстар-класе вырабу сувенірнай прадукцыі. На памяць аб знаходжанні ў Дрыбіне ёй падарылі сувенірныя валёнкі, каралі і эмблему фестывалю «Дрыбінскія таржкі».

Пра супрацоўніцтва з Еўропай у Дрыбіне не згадваюць

У сёлетніх анонсах «Дрыбiнскіх таржккоў» згадкі пра супрацоўніцтва мясцовай улады з еўрапейскай структурай няма. Увага акцэнтуецца на тым, што фестываль праходзіць у 11 раз і на ім будзе весела.

Сёлета ён пачаўся 19 жніўня і завершыцца 20-га. У праграме канцэрты, шоу, майстар-класы, кірмаш. Наведнікам пакажуць рэтрамабілі і для іх спяе Алена Ланская. А потым будзе феерверк. Для жыхароў аддаленага ад буйных людных мясцінаў райцэнтра фестываль – аддушына ў сумным аднастайным жыцці.

«Сёлета ўсе нашы крамніцы і падворкі будуць здзіўляць гасцей рознымі стравамі з цёртай бульбы. І гэта невыпадкова, бо традыцыйныя беларускія дранікі і стравы з цёртай бульбы ўключаны ў дзяржаўны спіс гісторыка-культурных каштоўнасцяў краіны. Аднак гэта не адзіная наша неспадзеўка. Упэўнена, свята пройдзе на высокім узроўні і надоўга запомніцца ўсім гасцям і ўдзельнікам» – абяцала напярэдадні адкрыцця галоўны ідэолаг райвыканкаму Ганна Падворная.

Пра Дрыбін, сьцісла

Дрыбін – найменшы райцэнтр Беларусі. Да Магілёва, абласнога цэнтру, 60 кіламетраў. Да беларуска-расейскай мяжы два дзясяткі напрасткі. Вытворчых прадпрыемстваў у раёне няма. Мясцовая эканоміка трымаецца на «калгасах», камунальных арганізацыях, дзяржаўных установах і прадпрымальніцкай актыўнасці.

Раён стварылі пасля аварыі на Чарнобыльскай АЭС. Тут багата набудавана пасёлкаў для перасяленцаў з забруджаных радыяцыяй мясцін Магілёўшчыны. Многія дамы пустуюць.

Мястэчка славутае тутэйшай школай шапавальства. У даўнія часы мясцовыя шапавалы выдумалі сваю мову – «катрушніцкі лемезень».

Насельніцтва Дрыбіна – меней за 3 тысячы чалавек. Упершыню ў гісторыі пра яго згадалі ў XVI стагоддзі, як шляхецкае ўладанне ў Мсціслаўскім ваяводстве. У XVII стагоддзі існаваў Новы Дрыбін. Канцлер Леў Сапега ў сваім тастаменце 1633 году ўпамянуў «вёску і пушчу Дрыбінскую».

фота з рэсурсаў dribin.by, horki.info

«Могілкі кіёскаў». Як выглядае вытворчая база збанкрутаванага «Магілёўсаюздруку» (відэа)

Навіна ад

Акцыянернае таварыства «Магілёўсаюздрук» само звярнулася ў Эканамічны суд Магілёўскай вобласці, каб яго прызналі банкрутам. Цяпер суд пачаў працэс конкурснай вытворчасці – працэдуры, якую выкарыстоўваюць у справе аб банкруцтве для задавальнення патрабаванняў крэдытораў.

Манапаліст продажу газетаў і іншай прадукцыі вінаваты крэдыторам 5 160 864,45 рублёў і супраць яго распачата 130 працэсаў прымусовага спагнання даўгоў,піша Магілёў.media.

Кошт маёмасці даўжніка паводле бухгалтарскага ўліку – 5 544 580,33 рублёў.

28,89% акцыяў прадпрыемства валодае дзяржава. Яны перададзены ва ўпраўленне. 65,96% акцыяў належаць 4 юрыдычным асобам. 58 асоб фізічных маюць 5,15%.

Праблемы ў арганізацыі з’явіліся некалькі гадоў таму праз нястачу грашовых сродкаў. Фінансаў не хапала, каб разлічыцца з насельніцтвам за прададзеную прадукцыю і нават аплаціць працу работнікаў. З ім спынілі супрацоўніцтва дзяржаўныя прадпрыемствы.

«Магілёўсаюздрук»спыніў продаж газетаў і іншай прадукцыі праз фінансавыя праблемы і стаў прадаваць свае кіёскі ў рэгіёне.

Спёка не сыходзіць. Купацца ў магілёўскі вадаёмах забаронена

Навіна ад

Спецыялісты санітарна-эпідэміялагічнай службы выявілі, што вада ў магілёўскіх вадаёмах, на якіх размешчаныя папулярныя ў гараджанаў пляжы, не адпавядае гігіенічным нарматывам па мікрабіялагічным і санітарна-хімічным паказчыкам.

Рэспубліканскі цэнтр гігіены, эпідэміялогіі і грамадскага здароўя піша, што мясцовай уладзе рэкамендавана забараніць купанне дзяцей, дарослых, а таксама заняткі воднымі відамі спорту ў магілёўскіх асяродках адпачынку:

– на гарадскім пляжы на Дняпры;

– на пляжы на Дняпры ля пасёлку Палыкавічы;

– на пляжы Пячэрскага вадасховішча;

– на пляжы Грабянеўскага вадасховішча.

Падобная, як у Магілёве сітуацыя ў некаторых іншых мясцінах вобласці.

– У Бабруйску на гарадскім пляжы на Бярэзіне;

– У Бабруйску на пляжы «Санаторый імя Леніна» на Бярэзіне;

– У Шклове на гарадскім пляжы, размешчаным паблізу “Лядовай арэны”;

– У Чавусах на пляжы на рацэ Бася, што на вуліцы Верхнеялаўскай;

– У Кіраўску на возеры “Селішча”.

Рэспубліканскі цэнтр гігіены, эпідэміялогіі і грамадскага здароўя інфармуе  аб змяненні сітуацыі  з вадаёмамі на сваёй інтэрактыўнай карце.

Прастытуцыя крочыць у глыбінку. У Бялыніцкім раёне злавілі на секс-паслугах двух дзяўчын

Навіна ад

Абедзве толькі адзначылі паўналецце. Супраць іх распачатыя адміністрацыйныя працэсы «за заняцце прастытуцыяй».

Адна з дзеўчын рэкламавала свае сэкс-паслугі, выкарыстоўваючы магчымасці інтэрнэту, а другая аб сваім сервісе паведамляла праз знаёмых. Кліент за паслугу меўся заплаціць 50 рублёў.

Паводле мясцовай міліцыі за 8 месяцаў выкрытыя дзве работніцы сэкс-індустрыі, піша бялыніцкага раёнка «Зара на Друццю».

У выпадку, калі іх заспелі за такім заняткам упершыню, ім пагражае ад максімальнага штрафу ў 640 рублёў да адміністрацыйнага арышту. Другі раз штраф паболей – да 960 рублёў. Пагроза адміністрацыйнага арышту таксама застаецца.

За тыя ж 8 месяцаў у раёне ўзбуджана адна крымінальная справа за ўступленне ў палавыя зносіны паўналетняга з асобай, якая не дасягнула 16-гадовага ўзросту.

Пакаранне за гэтае злачынства больш жорсткае – ад 4 да 10 гадоў пазбаўлення волі.

Асоба, якая трапіла за такое супрацьпраўнае дзеянне пад крымінальны пераслед вызваляецца ад яго, калі пагодзіцца ўступіць у шлюб з пацярпелай, ці пацярпелым. У такім выпадку злачынства перастае быць грамадска небяспечным.

фота з адкрытых крыніц 

«Тона на дваіх». Разам з фарбаванай саляркай на сяле масава крадуць камбікорм

Навіна ад

У Хоцімскім раёне двое працаўнікоў сельгаспрадпрыемства накралі больш за 1 тону камбікорму. Цягалі яго на свае падворкі  некалькі месяцаў.

Выкрылі жыхароў вёскі Бярозкі падчас міліцэйскага рэйду. 53-гадовая яе жыхарка ў хляўку назапасіла дзяржаўнага камбікорму амаль 760 кілаграмаў. Супраць вяскоўкі распачатая крымінальная справа.

Яе 35-гадовы зямляк не змог утаіць ад міліцыі 300 кілаграмаў камбікорму. Распачатая праверка, па выніках якой ўчынку вяскоўца дадуць прававую ацэнку.

Скрадзенае, піша тэлеграм-канал «Милиция Могилевщины» вернутае гаспадарцы.

Цяпер найбольш, калі сыходзіць са звестак міліцыі, крадуць на вёсках фарбаваную салярку, прызначаную для запраўкі сельгастэхнікі.

Днямі 840 літраў такога паліва выявіў міліцэйскі рэйд у жыхаркі Магілёўскага раёну. Магілёў.media падлічыў, што літраж нацяганай вяскоўкай саляркі складае 64% ад усяго аб’ёму накрадзенага паліва з пачатку месяца ў рэгіёне.

Праваахоўнікі высвятляе, дзе жанчына набрала столькі фарбаванага паліва.

З дапамогаю афарбоўкі паліва змагаюцца з махінацыямі і крадзяжамі не толькі ў Беларусі, пісаў раней Магілёў.media.

У Бельгіі, напрыклад, паліва, прызначанае для фермерскіх гаспадарак, каштуе ў чатыры разы танней, чым звычайнае на запраўках. Такое паліва фарбуецца ў чырвоны колер (у нас – у зялёны), а для праверкі выкарыстоўваюцца адмысловыя рэактывы, якія паліцыя падносіць да выхлапной трубы. Штраф за выкарыстанне чырвонага паліва чакае нават самаго фермера, калі ён заправіць такой саляркай свой асабісты аўтамабіль.

Рэальныя даходы на Магілёўшчыне ўпалі на 4,5% – найгоршы паказчык па краіне

Навіна ад

У параўнанні са студзенем-чэрвенем 2021 года даходы жыхароў Магілёўскай вобласці ўпалі на 4,5 працэнты – гэта найгоршы паказчык сярод рэгіёнаў Беларусі. У Віцебскай вобласці падзенне склала 3,9%, у Мінскай – 3,1, а ў Гомельскай – 2,1.

Пра тое сведчыць афіцыйная статыстыка аб узроўні рэальных грашовых даходаў беларусаў у першай палавіне 2022 году, апублікаваная Белстатам.

 

Рэальныя даходы – гэта сродкі, якія застаюцца ў работніка па сплаце ўсіх падаткаў і збораў, скарэктаваныя на індэкс спажывецкіх цэн.

Адначасна, у Магілёўскай вобласці самая нізкая сярэдняя зарплата на чэрвень 2022 года. Яна складае 1 327 рублёў у параўнанні з 1 626-цю рублямі ў цэлым па краіне, канстатуюць звесткі Белстата.

Другі радок знізу займае Віцебшчына з 1 376 рублямі. Найбольшы заробак маюць работнікі Мінску. Яны маюць у сярэднім – 2 264 рублі.

Агульная структура даходаў насельніцтва Магілёўшчыны характарызуецца гэтак:

– Аплата працы займае 60,9% ад усіх відаў даходаў (па краіне – 65%).

– Даходы ад прадпрымальніцкай і іншай дзейнасці, якая прыносіць даход, – 8,3% (па Беларусі – 8,1).

– Трансферты насельніцтву (пенсіі, дапамогі, стыпендыі і іншыя выплаты) – 27,6% пры 22,1 працэнтах па краіне.

– Даходы ад уласнасці і іншыя даходы – 3,2 працэнта, тады як у сярэднім па Беларусі – 4,8%.

 

Дзень у гісторыі: 19 жніўня. Путчысты адхілілі ад улады Гарбачова, у Мінску БНФ вывеў на пратэст беларусаў. Па захопе Беларусі расійская ўлада эксперыментуе з дзяленнем краю. У Вільні пабачыла свет беларускамоўная газета «Жыцьцё Беларуса». Нарадзіўся Барыс Мікуліч, пісьменнік, які зведаў гулагаўскае жыццё і сканаў у высылцы

Навіна ад

19 жніўня – Другі, або Яблычны Спас.

Старажытнае земляробчае свята, звязанае з выспяваннем пладоў. Ад гэтага дня можна спажываць яблыкі.

Гэты спас лічылі днём, калі ў вырай збіраліся адлятаць буслы.

1562 год. Беларусы разбілі пад Невелем маскоўскае войска на чале з Андрэем Курбскім.

Войскам Вялікага Княства Літоўскага камандаваў гетман Мікалай Радзівіл «Руды».

Вынікі перамогі, аднак, трывалі не доўга. Маскоўцы зноў захапілі горад пасля аблогі.

У 1580 годзе кароль і вялікі князь Стэфан Баторы вызваліў Невель, аднак паводле Ям-Запольскага міру яго мусілі аддаць Маскоўскаму княству.

У 1926 году кіраўніцтва савецкай Беларусі прасіла вярнуць горад беларусам, але Масква не пагадзілася таго зрабіць.

1823 год. Утворанае Віцебскае генерал-губернатарства.

Афіцыйна яно называлася ў 1823–1831 гадах як «Віцебскае, Магілёўскае, Смаленскае і Калужскае генерал-губернатарства».

Па захопе земляў Рэчы Паспалітай расійская ўлада пачала ствараць на новых тэрыторыях адміністрацыйныя адзінкі і гэта былі генерал-губернатарствы. Гэтак, беларускія землі штучна дзялілі на расійскі капыл.

Спачатку ўтварылі Беларускае генерал-губернатарства з цэнтрам у Магілёве. Яно праіснавала ад 1772 да 1796 гадоў.

У 1801–1823 гадах цэнтрам Беларускага ваеннага губернатарства стаў Віцебск. Яно складалася з Беларуска-Магілёўскай і Беларуска-Віцебскай губерні.

А затым ужо было ўтворанае Віцебскае генерал-губернатарства.

1831 год. Нарадзіўся Зыгмунт Чаховіч.

Бібліяфіл.

Адзін з кіраўнікоў паўстання 1863 – 1864 году.

За ўдзел у ім прыгавораны да расстрэлу, які заменены 12 гадамі катаргі ў Нерчынскіх рудніках.

У ягоным маёнтку Малыя Бясяды Янка Купала ўпершыню прачытаў нелегальную літаратуру, даведаўся пра паўстанне, карыстаючыся бібліятэкай.

Зыгмунт Чаховіч паўплываў на фармаванне светапогляду Купалы. Вобраз Чаховіча перададзены ў п’есе Уладзімера Караткевіча «Калыска чатырох чараўніц».

1893 год. Нарадзіўся Баляслаў Слосканс.

Каталіцкі святар, рэлігійны і грамадскі дзеяч беларускага замежжа.

Апостальскі адміністратар Мінскі і Магілеўскі, пераследаваўся савецкімі ўладамі. Двойчы арыштоўваўся, знаходзіўся ў канцлагерах на Салаўках, сібірскай ссылцы.

З 1944 г. – у эміграцыі, апостальскі візітатар для беларусаў-католікаў у Заходняй Еўропе. Прымаў удзел у культурным і нацыянальна-рэлігійным жыцці беларускага замежжа.

1912 год. Нарадзіўся Барыс Мікуліч.

Пісьменнік, крытык.

Чалец суполкі «Маладняка», працаваў у Дзяржаўным выдавецтве, адказным сакратаром газеты «Літаратура і мастацтва».

Аўтар зборнікаў апавяданняў, аповесцяў. Адзін з твораў прысвяціў Максіму Багдановічу.

У жанры дзённікавых запісаў падаваў успаміны аб беларускіх пісьменніках, літаратурным і тэатральным жыцці Беларусі, сваім жыцці ў лагерах і турмах.

У 1936 годзе арыштаваны савецкімі органамі і асуджаны як «член контррэвалюцыйнай нацыянал-фашысцкай арганізацыі» і за «антысавецкую дзейнасць» да 10 гадоў калоніяў. Паўторна арыштавалі ў 1949-ым і выслалі ў Сібір на вечнае пасяленне.

Рэабілітаваны 29 снежня 1954, праз тры месяцы пасля смерці.

1925 год. Пабачыла свет беларускамоўная газета «Жыцьцё Беларуса».

Выдавалася ў Вільні і выходзіла 3 разы на тыдзень. Апошні нумар быў памножаны 12 лістапада 1925 году.

Агулам паспелі выдаць 20 нумароў, з іх 5 канфіскавалі.

Выпуск газеты згарнулі праз ціск польскіх уладаў.

Рэдагавалі выданне Язэп Туркевіч, Уладзімір Варава.

Пісала пра жыццё беларусаў, бараніла іх правы і права на родную мову.

1946 год. Нарадзіўся Віктар Гардзей.

Паэт, празаік, перакладчык.

Працаваў у часопісах «Беларусь», «Родная прырода», «Маладосць», «Полымя» і «Вожык», газеце «Літаратура і мастацтва».

Аўтар 6 зборнікаў паэзіі, шэрагу кніг вершаў для дзяцей, кніг прозы. Перакладчык на беларускую мову твораў Густава Флабера, Робэрта Стывенсана, Эрнста Гофмана, казак народаў Еўропы.

1977 год. Памёр Аркадзь Маўзон (Арон Маўшэнзон).

Драматург.

Працаваў акторам драматычнага тэатру ў Віцебску, на кінастудыі «Беларусьфільм», у Міністэрстве культуры савецкай Беларусі. Аўтар пʼес, зборнікаў драматургічных твораў.

Паводле яго сцэнарыяў пастаўлены кінафільмы «Канстанцін Заслонаў», «Зялёныя агні», «Наперадзе – круты паварот».

1991 год. Адхілены ад улады прэзідэнт СССР Міхаіл Гарбачоў.

У Савецкім Саюзе ўладу спрабаваў захапіць «Дзяржаўны камітэт па надзвычайным становішчы», вядомы, як «ГКЧП», а падзеі 18-21 жніўня ўвайшлі ў гісторыю як Жнівеньскі путч. Мэта путчыстастаў палягала ў вяртанні да парадкаў, якія існавалі ў СССР да перабудовы.

Адхіленне Міхаіла Гарбачова ад улады тлумачылася яго немагчымасцю выконваць абавязкі ў сувязі са станам здароўя. ГКЧП паскорыў развал Савецкага Саюзу і абвяшчэнне савецкімі рэспублікамі незалежнасці. У Маскве людзі выступілі супраць путчыстаў, а войскі не сталі выконваць загад страляць па пратэстоўцам. Путч праваліўся.

Камуністычнае кіраўніцтва Беларусі на чале з Аркадзем Малафеевым і сакратарамі партыйных арганізацый на месцах, сустрэлі путч з энтузіязмам.

Беларускі Народны Фронт абвясціў путчыстаў крымінальнымі злачынцамі. 19-21 жніўня з ініцыятывы апазіцыйнай фракцыі ў Вярхоўным савеце перад Домам ураду адбыліся акцыі пратэсту.

У ноч на 20 жніўня было абвешчана пра стварэнне Беларускага згуртавання вайскоўцаў на чале з Мікалаем Статкевічам. Путч праваліўся.

 

У публікацыі выкарыстаныя звесткі з рэсурсу «Вікіпедыя» і іншых адкрытых у інтэрнэце крыніцаў

Расіян, прагных да модных брэндаў, паболее. Для іх арганізуюць рэгулярныя туры і правядуць інструктаж, як шукаць недаступныя на радзіме тавары

Навіна ад

Па ўварванні ва Ўкраіну Расіі з яе рынку сышло багата заходніх кампаніяў, якія прадавалі свае брэндаваныя тавары. У Беларусі яны ў свабодным продажы і сюды кінуліся на закупы расіяне.

Расійскія турфірмы фіксуюць рост заявак на паездкі ў Беларусь і павышаны попыт на туры выхаднога дня, у якія выпраўляецца моладзь. Гэтую катэгорыю пакупнікоў мясцовыя кампаніі пачалі запрашаць у арганізаваныя паездкі ў нашу краіну па модныя брэнды.

Пакуль прапрацаваны шоп-тур у Мінск мае толькі адзін расійскі тураператар, які прапануе рэгулярныя рэйсы ў сталіцу Беларусі. Заезды з Масквы ён плануе пачаць з 25 жніўня і рабіць іх шточацвер, а з закупаў будзе вывозіць кліентаў у нядзелі, піша рэсурс Myfin.

Расіянаў у Беларусі падрыхтуюць да «палявання» на брэнды, а побыт зробяць камфортным. Жыць будуць у чатырохзоркавым гатэлі з магчымасцю замаўлення экскурсію па Мінску. Яны пройдуць «інструктаж» па пошуку ў горадзе брэндаваных тавараў ад кампаніяў NIKE, ZARA і падобных ім.

Паводле Myfin, без уліку кошту пералёту, шоп-тур з Масквы ў Мінск на дваіх абыдзецца ў 33,5 тыс. расійскіх рублёў (больш за 1,4 тыс. беларускіх рублёў), а з уключанай у цану дарогай – больш за 57,8 тыс. расійскіх рублёў (2,45 тыс. беларускіх рублёў) на дваіх.

На Магілёўшчыне ўжо каторы раз ратуюць буслоў

Навіна ад

Буслы перыядычна становяцца закладнікамі блізкага пражывання з аб’ектамі чалавечай інфраструктуры. Паведамленні пра трапіўшых у пастку птушак штогод паяўляюцца ў розных рэгіёнах Беларусі.

Два такіх выпадках адбыліся ў Магілёўскай вобласці.

Бусла, які заблытаўся і захрас на воданапорнай вежы, заўважылі жыхары аграгарадка Скрыпліца Кіраўскага раёну. Выратавальнікам давялося падымацца да буслінага гнязда з дапамогай вышкі. Выявілася, што адна з лап улюблёнай беларусамі птушкі заблыталася ў вяроўцы, – паведамляе абласное Упраўленне МНС.

Днём раней бусла ратавалі ў Клімавіцкім раёне. Птушку заўважылі на электрычным слупе ў аграгарадку Малашковічы. Супрацоўніку МНС хапіла трохкаленнай лесвіцы, каб дабрацца да бусла і вызваліць, піша газета «Родная ніва».

 

У мінскім рэстаране затрыманы магілёўскі прамыслоўца з 300 рублямі хабару, хваліцца міліцыя

Навіна ад

Кіраўнік магілёўскага прадпрыемства з дапамогай хабару спрабаваў дамовіцца з бізнесоўцам аб пастаўцы заводу металаканструкцыяў. Месцам сустрэчы «кампаньёны» абралі сталічны рэстаран.

Паводле тэлеграм-канала «Милиция Минска» агульная сума хабару склала 900 рублёў (350 долараў ЗША, ММ). Першая яе частка была перададзеная кіраўніку магілёўскага заводу раней, а падчас сустрэчы ў рэстаране яго затрымалі з 300 рублямі (117 долараў ЗША, ММ).

Паведамляецца, што 59-гадовага мужчыну зняволіла мінскае ўпраўленне па барацьбе з эканамічнымі злачынствамі сумесна з супрацоўнікамі Кастрычніцкага РАУС сталіцы з сілавой падтрымкац АМАП.