Tag: водоемы

Кішачнай палачкі стала зашмат у магілёўскіх вадаёмах

Навіна ад

У шэрагу вадаёмаў у Магілёве і наваколлях эпідэміёлагі выявілі перавышэнне дапушчальнага ўзроўню кішачнай палачкі і забаранілі купанне.

Як паведамляе Магілёўскі занальны цэнтр гігіены і эпідэміялогіі, забаронена купацца і займацца воднымі відамі спорту ў зоне рэкрэацыі гарадскога пляжу ракі Днепр, на Дняпры ў раёне вуліцы Фаціна, у Пячэрскім вадасховішчы, на Дняпры ў вёсцы Палыкавічы, у вадаёме вёскі Вільчыцы.

Акрамя таго, абмежавана купанне дзяцей у зоне рэкрэацыі на ўчастку прыбярэжнай зоны сажалкі Брады ў Магілёве, на возеры Гусіным у вёсцы Кадзіна Магілёўскага раёна.

Пробы вады з гэтых вадаёмаў не адпавядаюць гігіенічным нарматывам па мікрабіялагічных паказчыках: у адной з проб вады, адабранай у дадзенай зоне рэкрэацыі, індыкатарны паказчык кішачнай палачкі Е.соli перавышае дапушчальны гігіенічны нарматыў.

Фотаздымак з адкрытых крыніц

Калі рыба – маўчыць, а Міністэрства – плануе

Навіна ад

У краіне, дзе нават у тралейбусе можна пачуць пра кліматычныя нормы, апошнім інфармацыйным выбухам стала цішыня вакол вады. Міністэрства прыродных рэсурсаў без лішняга шуму апублікавала пастанову, якой забараняе аматарскую рыбалку ў дзясятках участкаў па ўсёй Беларусі. Дакумент з’явіўся на Нацыянальным прававым інтэрнэт-партале – і так ціха, як быццам бы гаворка ішла не пра масавае абмежаванне вольнага адпачынку, а пра нейкую дробную тэхнічную карэкціроўку. А між тым – вуду прыйдзецца скласці. Можа, і надоўга.

Па ўсёй Беларусі ўведзены масавыя абмежаванні на аматарскую рыбалку. Цэлыя ўчасткі рэк і каналаў, раней даступныя для спакойнага адпачынку з вудай, цяпер трапілі пад забарону. Аргументы – ахова водных рэсурсаў і бяспека. Аднак з практычнага боку гэтыя меры выглядаюць як чарговая лабірынтная схема, з якой павінны разбірацца тыя, хто хацеў проста палавіць карася ў выхадны.

Я часта казаў, што рыбалка – гэта не спорт, а філасофія. У мяне нават ёсць сябра Валодзя, які на лаўцы каля Дняпра сядзіць з вудай. Ён называе гэта «дзіцячым спакоем», а я – «ўцёкамі ад навін». Але вось і навіны дагналі нават Валодзю: рыбачыць цяпер нельга. Прынамсі, не там і не так, як раней.

Гэта адчуваецца, як калі б у бібліятэцы забаранілі чытаць уголас – тэхнічна правільна, але штосьці ламаецца ў сэнсе.

Забаранілі рыбачыць на Дняпры ад завода “Кірава” ў Магілёве і да самага вусця Дзебры. Але, з улікам таго, што завод апошнім часам больш дыміць, чым вырабляе, можна меркаваць, што рыба адтуль і так ужо эмігравала. Але забарона – гэта ж пра прынцып.

Праўда, прынцып незразумелы. Тое, што ў нас нельга – зразумела, а вось чаму – ужо не. Пагатоў, што спіс забароненых участкаў выглядае як маршруты квесту: знайдзі вусце безымяннага ручая, вымерай 1700 метраў уніз, пасварыся з GPS – і вуаля, не рыбачыць. Падобна да гульні, дзе галоўны прыз – штраф ад інспектара з пранізлівым позіркам.

Асабліва мне падабаецца, што ў Полацку забарона дзейнічае круглы год — з 9 чэрвеня па 8 чэрвеня. Гэта нават не цырк, гэта літаратурны прыём! Паэтычны кругазварот забароны.

А вось у Аўгустоўскім канале рыбачыць можна толькі між шлюзам і бетонным прычалам «Дмісевічы» ў перыяд з 15 кастрычніка па 15 красавіка. Гэта не даты — гэта нейкі каляндар для сакральнага рыбацтва. Я ўжо ўяўляю, як у Instagram з’яўляюцца пасты: «Сёння адкрыўся сезон, 50 метраў ад шлюза — поспеху мне і маім чатыром вусатым трафеям!»

Што з усяго гэтага вынікае? Ды тое, што дзяржава вырашыла абараніць прыроду ад нас, хоць часам здаецца, што гэта прырода мусіла б абараняцца ад самога дзяржаўнага клопату. Як той сом, што жыве дзесьці ў Келбаскай затоцы, і цяпер, напэўна, думае, што людзі зніклі. А людзі – проста вымушаныя сядзець на беразе без вуды. Глядзець у ваду. Слухаць сябе.

Можа, гэта і ёсць сапраўдны эка-курс. Толькі вось рыба ўжо маўчыць, а я ўжо не магу.

Якуб Ясінскі

Фота ілюстрацыйнае

Магілёўскія пляжы на Фацінскай затоцы і кар’еры ў Брадах адкрыюць для купання

Навіна ад

Да сёлятняга сезона купання ў Магілеве будуць адкрыты 5 афіцыйных пляжаў. Летась іх было 3.

У гэтым годзе купацца будзе дазволена на пляжы Пячэрскага вадасховішча, на Святым возеры, на гарадскім пляжы ракі Днепр, а таксама на пляжы вадаёма ў вёсцы Брады і на Фацінскай затоцы Дняпра. 

Купанне ў апошніх двух месцах у мінулыя гады было забаронена, што не спыняла жыхароў Магілёва, і яны станавіліся масавымі парушальнікамі закону. Людзі цягнуліся ў спякоту да гэтых вадаёмаў, часам на гэтай глебе здараліся канфлікты з праваахоўнікамі, пра што пісалі mogilev.media. 

Найперш, трэба павіншаваць гараджан з легалізацыяй пляжа на Фацінскай затоцы. Яно лагічнае, бо вакол заліва ўжо праведзена добраўпарадкаванне: створана вулічная мэбля для адпачынку, створана ўтульная пляжная зона і месцы для паркоўкі транспарту. 

Пляж у Брадах яшчэ патрабуе навядзення парадку. 

Дапусцімая таўшчыня лёду – на стаячых вадаёмах Магілёўшчыны, а рэкі яшчэ небяспечныя для рыбакоў

Навіна ад

Зіма набірае свою моц, што адлюстроўваецца на ледзяных покрывах вадаёмаў Магілеўшчыны. Цяпер аматары зімняй рыбалкі могуць бяспечна пачувацца на Пячэрскім вадасховішчы і Святым возеры ў раёне Грабянёва, дзе ледзяное покрыва трывалае і складае больш за 10 сантыметраў таўшчынёй. Дапусцімая норма і на  Асіповіцкім вадасховішчы, дзе таўшчыня лёду складае 7-8 сантыметраў. 

Што да рэк, то бяспечным з’яўляецца толькі правы бераг Сожа ў Крычаве, дзе таўшчыня ледзянога покрыва складае да 10 сантыметраў. Левы бераг і сярэдзіна воднай артэрыі небяспечныя, бо там зафіксаваны прамоіны.  

На Бярэзіне ў Бабруйску сітуацыя на розных участках ракі адрозніваецца: дзе-нідзе лёд зусім адсутнічае, а на некаторых участках воднай артэрыі вар’іруецца ад трох да дзесяці сантыметраў.

Зусім небяспечная сітуацыя на Дняпры ў Шклове і Магілёве, дзе няма дапусцімай нормы таўшчыні лёду, а на рэчцы часта сустракаюцца прамоіны, невялікая па таўшчыні ледзяная корка або наогул вада яшчэ не замёрзла.    

Нагадваем, што таўшчыню ледзянога покрыва на водных аб’ектах у раёне дзеяння выратавальных станцый АСВОД па ўсёй рэспубліцы можна маніторыць на сайце арганізацыі. Таксама з гэтым пытаннем  можна звярнуцца ў выратавальныя станцыі па тэлефоне.

Фота ілюстрацыйнае, з адкрытых крыніц 

Таўшчыня ў два-чатыры сантыметры – лёд на Магілёўшчыне яшчэ небяспечны для рыбакоў

Навіна ад

Расказваем, дзе можна маніторыць стан ледзянога покрыва на вадаёмах.

Па ўсёй Магілёўшчыне трывалае ледзяное покрыва  ёсць толькі на двух водных аб’ектах – Пячэрскім і Асіповіцкім вадасховішчах. Аднак нават на гэтых аб’ектах таўшчыня лёду не дасягае 7 сантыметраў, што аўтаматычна робіць  гэтыя вадасховішчы небяспечнымі для наведвання. 

У адпаведнасці з Правіламі аховы жыцця людзей на водах Рэспублікі Беларусь, якія зацверджаны Пастановай Савета Міністраў 11.12.2009 г. №1623, выхад на вадаёмы забараняецца падчас ледаставу, пакуль таўшчыня лёду не дасягне 7 сантыметраў. 

На рэках Дняпро, Бярэзіна і Сож у Магілёве, Бабруйску і Крычаве, уздоўж берагоў гэтых водных артэрыяў, утварыліся палоскі тонкага лёду шырынёй 2-4 метра і таўшчынёй 2-4 сантыметра. Адпаведна, хадзіць па такім тонкім ледзяным покрыве вельмі небяспечна для жыцця. 

Таўшчыню ледзянога покрыва на водных аб’ектах у раёне дзеяння выратавальных станцый АСВОД па ўсёй рэспубліцы можна маніторыць на сайце http://osvod.www.by/ арганізацыі. Таксама з гэтым пытаннем  можна звярнуцца ў выратавальныя станцыі па тэлефоне.

Варта звярнуць увагу рыбакоў, што камізэлькі і іншае ратавальнае абсталяванне можна ўзяць на бліжэйшай ратавальнай станцыі ці прафілактычным пасту АСВОДа, калі ўласнае забылі дома. Прычым камізэлькі выдаюцца абсалютна бясплатна

Спёка не сыходзіць. Купацца ў магілёўскі вадаёмах забаронена

Навіна ад

Спецыялісты санітарна-эпідэміялагічнай службы выявілі, што вада ў магілёўскіх вадаёмах, на якіх размешчаныя папулярныя ў гараджанаў пляжы, не адпавядае гігіенічным нарматывам па мікрабіялагічным і санітарна-хімічным паказчыкам.

Рэспубліканскі цэнтр гігіены, эпідэміялогіі і грамадскага здароўя піша, што мясцовай уладзе рэкамендавана забараніць купанне дзяцей, дарослых, а таксама заняткі воднымі відамі спорту ў магілёўскіх асяродках адпачынку:

– на гарадскім пляжы на Дняпры;

– на пляжы на Дняпры ля пасёлку Палыкавічы;

– на пляжы Пячэрскага вадасховішча;

– на пляжы Грабянеўскага вадасховішча.

Падобная, як у Магілёве сітуацыя ў некаторых іншых мясцінах вобласці.

– У Бабруйску на гарадскім пляжы на Бярэзіне;

– У Бабруйску на пляжы «Санаторый імя Леніна» на Бярэзіне;

– У Шклове на гарадскім пляжы, размешчаным паблізу “Лядовай арэны”;

– У Чавусах на пляжы на рацэ Бася, што на вуліцы Верхнеялаўскай;

– У Кіраўску на возеры “Селішча”.

Рэспубліканскі цэнтр гігіены, эпідэміялогіі і грамадскага здароўя інфармуе  аб змяненні сітуацыі  з вадаёмамі на сваёй інтэрактыўнай карце.

У Магілёве на выхадныя сіноптыкі прагназуюць спёку. А што з пляжамі?

Навіна ад

Для аматараў акунуцца ў мясцовыя вадаёмы навіны безнадзейныя. Санэпідэмстанцыя не рэкамендуе гэтага рабіць.

Абласны цэнтр гігіены, эпідэміялогіі і грамадскага здароўя паведамляе, што паводле вынікаў лабараторнага кантролю вынесены прапановы аб абмежаванні або забароне купання дзяцей і дарослых на ўсіх пляжах абласнога цэнтру. Не раяць эпідэміёлагі займацца на магілёўскіх вадаёмах і воднымі відамі спорту.

Вада не адпавядае гігіенічным нарматывам на Дняпры – гарадскі пляж і пляж у пасёлку Палыкавічы а таксама Пячэрскім, Грабянёўскім і Вільчыцкім вадасховішчах, піша быхаўская раёнка “Маяк Прыдняпроўя”

У гараджанаў застаецца магчымасць акунацца ў вадаёмы паблізу сваіх лецішчаў, ці кінуць усё і паехаць на курорты.

Тым часам, сіноптыкі з Белгідрамету  прагназуюць 6 жніўня на большай частцы краіны спёку да 32 градусаў. Захаваецца жоўты ўзровень небяспекі.

У Магілёве скварыць будзе меней. Паветра прагрэецца да 29 градусаў. Увечары ў нядзелю магчымы дождж. Беражыце сябе.

 

Спёка вярнулася, але купацца ў магілёўскіх вадаёмах спецыялісты не раяць – кепская вада

Навіна ад

Вада не адпавядае гігіенічным і санітарна-хімічным патрабаванням на:

– Грабянеўскім і Пячэрскага вадасховішчах;

– Дняпры на гарадскім пляжы ў Магілёве, а таксама вёсцы Палыкавічы;

– Вадаёме ля вёскі Вільчыцы Магілёўскага раёну.

Занальны цэнтр гігіены і эпідэміялогіі адправіў у Магілёўскі гарадскі і раёны выканаўчыя камітэты хадайніцтвы аб неабходнасці ўвядзення забароны на купанне дзяцей, дарослых і заняткі відамі воднага спорту на згаданых вадаёмах.

 

Абмяленне Дняпра і Бярэзіны перашкаджае суднаходству

Навіна ад

Абмяленне Дняпра ў Магілёве, хоць і крытычнае, але да рэкорднага не дацягвае. Разам з тым, за апошні дзень глыбіня ракі стала меней на 7 сантыметраў.

Да канца тыдня спад вады ў рэках Беларусі будзе працягвацца з інтэнсіўнасцю ад 1 да 22 сантыметраў за суткі.

Паводле Рэспубліканскага цэнтру па гідраметэаралогіі, радыеактыўнага забруджвання і маніторынгу навакольнага асяроддзя Мінпрыроды на Дзвіне ў Віцебску, Нёмне ў Гродна, Дняпры ў Магілёве і Бярэзіне ў Бабруйску назіраюцца неспрыяльныя ўмовы для працы рачнога транспарту, піша інфармацыйнае агенцтва Белта.

Аб праблемах на Дняпры для суднаходства Белгідрамет яшчэ месяц таму. Тады гараджане заўважылі, што прагулачнае судна, якое курсуе па рацэ, вымушанае было скарэктаваць маршрут.

Паводле рэсурсу Allrivers  Дняпро змялеў на 32 сантыметры. За апошнія суткі на сем.

Абсалютны мінімум абмялення фіксаваўся ў 2015 годзе. Тады Дняпро «скінуў» 46 сантыметраў глыбіні.

Забаранілі купацца ў Шклове і Клімавічах

Навіна ад

Па выніках лабараторнага аналізу проб вады спецыялістамі Цэнтру гігіены і эпідэміялогіі забаронена купацца яшчэ ў двух вадаёмах на Магілёўшчыне.

Як паведамляе газета «Родная ніва» у сувязі з тым, што вада не адпавядае санітарным і эпідэміялагічным паказчыкам забарона накладзеная на купанне ў сажалцы, што ў Клімавічах і на раце Асцёр, каля дзіцячага аздараўленчага лагера «Арлёнак» у Клімавіцкім раёне.

Не даступным для акунання стаў і пляж у Шклове. Гаворка пра той, што на правым беразе Дняпра ля лядовай арэны.

Тым часам, Магілёўскі занальны цэнтр гігіены і эпідэміялогіі адправіў у Магілёўскі гарвыканкам і райвыканкам хадайніцтвы аб забароне купання дзяцей, дарослых і займацца воднымі відамі спорту на ўсіх мясцовых пляжах.

Сярод іх гарадскі на Дняпры, а таксама ў вёсцы Палыкавічы. Акрамя таго на Пячэрскім, Грабянеўскім вадасховішчах і на возеры ў вёсцы Вільчыцы.

Санэпідстанцыя адзначае, што гарадская і раённая ўлады не прынялі рашэння аб забароне купання на гарадскім пляжы і пляжы ў вёсцы Палыкавічы па рэкамендацыі службы тыднёвай даўніны.