У крыві 62-гадовага жыхара Горацкага раёна пасля яго смерці было выяўлена 7,2 праміле этылавага спірту. Гэта адпавядае прыкладна двум-тром бутэлькам гарэлкі, выпітым за кароткі прамежак часу – паведамляюць у Камітэце судовых экспертыз. Гэты выпадак стаў антырэкордам у 2023 годзе на Магілёўшчыне. 7% алкаголю ў крыві эксперты выявілі ў целе 61-гадовага мужчыны з Асіповіцкага раёна, 6,4% – у 42-гадовага жыхара Краснаполля. Самая ж высокая канцэнтрацыя спірту ў крыві была зафіксаваная ў 2022 годзе – крыху больш за 10%.
Усяго на Магілёўшчыне за 2023 год спіртным атруціліся 165 чалавек. Абсалютная большасць з іх выпівалі алкаголь на аснове этылавага спірту, гэта значыць, што прычынай іх смерці стала не якасць, а колькасць выпітага. У мінулыя гады статыстыка па Магілёўскім рэгіёне была яшчэ больш бязрадаснай – 182 смяротных выпадкі ў 2022 годзе і 214 у 2021.
Паводле інфармацыі Следчага камітэта, 6 снежня ў бальніцу ў непрытомным стане дастаўлена 12-гадовая дзяўчынка з прыкметамі атручэння алкаголем.
Устаноўлена, што напярэдадні вечарам яе маці разам з сужыцелем і знаёмым сям’і распівалі спіртное. Перыядычна кампанія дарослых выходзіла на балкон пакурыць. Дзеці, якіх у сям’і пяцёра, заставаліся ў кватэры. Толькі раніцай наступнага дня мужчына звярнуў увагу, што старэйшая падчарыца знаходзіцца ў несвядомым стане і неадкладна выклікаў хуткую, – паведамляе СК.
Дзяўчынка знаходзіцца ў рэанімацыі, яе стан ацэньваецца як цяжкі.
Атрымана інфармацыя, што сям’я знаходзіцца ў сацыяльна-небяспечным становішчы, зараз вырашаецца пытанне аб адабранні дзяцей.
Дзяржаўная крама ў Крычаве, дзе барыжаць алкаголем, называецца вельмі паказальна — “Родны хмель”. Знаходзіцца яна недалёка ад аўтастанцыі і мясцовага рынку ў раёне так званай “Маскоўскай”, на досыць бойкім месцу.
На мясцовым узроўні не проста не робяць з тым, каб людзі сталі менш піць, а наадварот — каб піткоў пабольшала. Хмель мусіць стаць родным, каб такую “цёплую” назву ўспрынялі крычаўляне і пачалі актыўна набываць розныя алкагольныя напоі, папаўняючы мясцовы бюджэт.
Але для паказухі варта правесці два-тры дні ў год “дзень цвярозасці”, пагэтаму паведамленне пра гэтыя мерапрыемствы вешаецца на дзверы і пішацца вялікімі літарамі, каб бачылі як мясцовае чынавенства нібыта турбуецца за людзей.
Але да такога наймення крамы мала дзе дадумаліся, але ў Крычаве яна мала ў каго выклікае дысананс, а тым больш у “клапатлівых” дзяржаўных служачых мясцовага райвыканкама. Атрымліваецца, што родны кут ніяк не можа абыйсціся без роднага хмеля, бо іначай і не пражывеш у цяперашняй суворай беларускай рэчаіснасці.
У Магілёве ў адной з прадуктовых крамаў быў выкрадзены дарагі алкаголь на буйную суму – паведамляе МУС.
Сышчыкі высветлілі, што да крадзяжу маюць дачыненне два прыяцелі 22 і 20 гадоў. Маладыя людзі загадзя дамовіліся, што прыйдуць у краму па спіртное, але плаціць не стануць.
Яны зайшлі ўнутр гандлёвага памяшкання, у прадуктовы кошык паклалі бутэлькі, а пасля адышлі далей ад касы, каб перакласці алкаголь у заплечнікі. Калі маніпуляцыі былі завершаны, хлопцы пакінулі краму, не заплаціўшы. Пазней алкаголь яны перапрадалі.
У Ленінскі РУУС г. Магілёва звярнуўся 51-гадовы мясцовы жыхар, які распавёў, што ў яго з раней выкрадзенай банкаўскай карты былі зняты грашовыя сродкі – паведамляе прэс-служба. Праваахоўнікі высветлілі, што карту скраў знаёмы заяўніка – 43-гадовы магілёвец, раней неаднаразова судзімы, у тым ліку і за крадзяжы.
Магілёўцы распівалі спіртныя напоі на кватэры ў заяўніка, а калі гаспадар жылля сышоў спаць у іншы пакой, госць скраў яго банкаўскую карту і пайшоў па крамах набываць спіртное. Калі грошы на плацежным сродку скончыліся, ён выкінуў карту і пайшоў дадому. У дачыненні да фігуранта ўзбуджана крымінальная справа.
У жыхаркі Мсціслава сужыцель забраў 185 рублёў, а крычаўлянін скраў карту сабутэльніка і разгуляўся на поўную.
Два здарэнні, звязаныя з грашыма, адбыліся ў Мсціславе. У першым выпадку жыхарка горада паведаміла аб тым, што сужыцель забраў у яе 185 рублёў і купіў на іх спірт.
Другі не менш занятны. Мсціслаўчанка давала грошы брату мужа на лячэнне. Аднак ён іх не вяртаў. Больш за тое, у сацсетцы апублікаваў паведамленне аб тым, што менавіта яна вінна яму грошы.
Адбыўся таксама крадзёж на вуліцы Кірава, дзе ў мужчыны з аўтамабіля выцягнулі дакументы, а ў краме “Дабраном” жанчына скрала бутэльку гарэлкі – паведамляе раённая газета “Святло кастрычніка”.
Нетрывіяльны выпадак здарыўся і ў Крычаве. Два таварышы выпівалі разам. У працэсе адзін выкраў у другога банкаўскую карту, палічыўшы гэта лёгкай здабычай. Спачатку “закляты сябар” закупіўся прадуктамі і спіртым, а пасля вырашыў яшчэ прагуляцца па крамах Крычава. Агулам разгуляўся на суму ў 258 рублёў – паведамляе газета “Крычаўскае жыццё”.
На возеры ў Клімавіцкім раёне патануў 41-гадовы мужчына, які спрабаваў дагнаць лодку. Яго цела з дна вадаёма паднялі работнікі асвода.
Сталі вядомымі падрабязнасці трагедыі, пра якую пісалі mogilev.media. Загінулы з’яўляўся жыхаром г. Касцюковічаў, і разам з 64-гадовым знаёмым яны прыехалі на возера паблізу вёскі Якімовічы Клімавіцкага раёна каб парыбачыць. Паралельна з лоўляй рыбы мужчыны ўжывалі спіртное.
Увечары 41-гадовы касцюкаўчанін вырашыў праверыць закінутыя прыстасаванні для лоўлі шчупака, для чаго адштурхнуў маторную лодку ад берага, каб маторам не закрануць дно. Лодку стала адносіць ад берага, і мужчына паплыў даганяць яе. Дагнаў, але забрацца ў лодку не змог і стаў тануць. Яго напарнік паспяшаўся на дапамогу, але з-за таго што не ўмеў плаваць, не змог дабрацца да лодкі, якая знаходзілася на глыбіні – паведамляераённая газета “Родная ніва”.
Супрацоўнікаў міліцыі і ратавальнікаў пасля здарэння выклікалі ўжо відавочцы драматычнай падзеі. Цела патанулага са дна паднялі супрацоўнікі клімавіцкага асвода, а яго лодку даставілі на бераг.
25-гадовы жыхар аграгарадка Чырвоная Буда ў п’яным стане пасварыўся з жонкай і паспрабаваў падпаліць дом. Ён асуджаны за пагрозу забойствам.
Мужчына са сваёй жонкай і двума малалетнімі дзецьмі быў дома ў той вечар у стане алкагольнага ап’янення. Апоўначы ў іх з жонкай узнікла сварка, і хлопец стаў пагражаць жонцы, што заб’е яе і падпаліць дом. У пацвярджэнне сваіх слоў ён выйшаў у веранду, сарваў са сцяны шпалеры і падпаліў іх. Пасля гэтага малады мужчына плюхнуў на падпаленыя шпалеры бензін з каністры. Уваходныя дзверы загарэліся і ў дом, дзе знаходзілася яго жонка і дзеці, паваліў чорны дым – паведамляепра злачынства раённая газета “Крычаўскае жыццё”.
Жанчына замкнулася знутры на металічны кручок, а каб упусціць паветра ў дом, разбіла вокны ў пакоі. Потым мужчына пабаяўся, што спаліць дом і затушыў пажар. Пасля гэтага сышоў з дому. Пра здзейснены ўчынак ў міліцыю паведаміла сястра пацярпелай, таму хлопца хутка затрымалі. Мужчына прызнаў сваю віну і раскаяўся аб сваім учынку, што стала змякчальнай акалічнасцю на судзе.
Была заведзена крымінальная справа, згодна якой маладога мужчыну пакаралі пазбаўленнем волі на 1 год 6 месяцаў. Пры гэтым прызначэнае пакаранне не будзе прыведзена ў выкананне, калі на працягу года мужчына не здзейсніць новае злачынства, а таксама будзе пастаянна апавяшчаць аддзел міліцыі аб сваім месцазнаходжанні.
Судовыя эксперты падвялі сумныя вынікі алкагольных смерцяў за 2022 года на Магілёўшчыне.
У Бабруйску было знойдзена цела 72-гадовага мужчыны, у крыві якога канцэнтрацыя алаколя склала рэкордныя 10,3 праміле. Для падобнага паказніка мужчына павінен быў выпіць каля 2 літраў гарэлкі за кароткі прамежак часу.
8,6 праміле выявілі ў крыві 65-гадовай жанчыны, што памерла ў Магілёўскім раёне ў 2022 годзе. Гэта антырэкорд сярод жанчын.
Наогул для чалавека ў сярэднім смяротнай лічыцца доза алкаголю, якая паказвае больш за 5 праміле. Але здараюцца і нечаканыя выпадкі. Так, самым вядомым зафіксаваным выпадкам з’яўляецца паказчык у 13,74 праміле – такі вынік паказаў тэст у мужчыны, якога патрульныя знайшлі на абочыне ў польскім горадзе Тарноўска Воля ў ліпені 2013 года. Да шчасця, гэты чалавек не быў за рулём, і ён выжыў.
Папярэдні рэкорд выжывальнасці паказаў 67-гадовы жыхар баўгарскага горада Плоўдзіў. Тэст паказаў вынік у 9,14 праміле. Прычым пажылы аматар спіртнога апынуўся на бальнічным ложку выпадкова. Туды ён патрапіў не з-за алкагольнага атручвання, а пасля таго як яго збіў аўтамабіль. Зрабіўшы аналізы, медыкі не паверылі сваім вачам і паўтарылі даследаванне 5 разоў.
Даследаванне кампаніі CIVITTA і аналітычнай платформы OpenBusiness паказала змены ў спажывецкіх паводзінах беларусаў у пераднавагодні перыяд. Але гэтыя паводзіны адлюстроўваюць і фінансавы стан грамадзян у цэлым.
У залежнасці ад індустрыі, спажыўцы ідуць двума асноўнымі патэрнамі (сцэнарамі) паводзін: пераход на больш танныя тавары – у гэты трэнд упісалася купля тэхнікі, ювелірных вырабаў, касметыкі і алкаголю і скарачэнне спажывання (на адзенне, грамадскае харчаванне, спортклубы, салоны прыгажосці і іншыя “другарадныя” катэгорыі).
У 2022 годзе беларусы эканомілі на алкаголі, часцей хадзілі ў харчовыя крамы і святкавалі дома.
Сярэдні чэк у крамах алкагольнай прадукцыі ў параўнанні з 2021 годам упаў на 6%, але колькасць транзакцый вырасла, з чаго вынікае, што набываліся больш танныя напоі.
Вырасла і наведванне звычайных супермаркетаў. Магчыма, таму, што больш беларусаў вырашылі сустракаць 2023 год за навагоднім сталом замест святкавання па-за домам, а падарункі вырашылі купіць больш танныя.
Улічваючы, што колькасць транзакцый і абарот у дыскаўнтэрах у параўнанні з супермаркетамі выраслі, можна зрабіць выснову, што людзі шукалі прадукты танней.
Нашы грамадзяне скарацілі таксама выдаткі на грамадскае харчаванне. Наведваць кавярні, заказваць піцы і сушы беларусы сталі значна радзей, чым у аналагічны перыяд 2021 года. Прычым ад сушы сталі адмаўляцца нашмат часцей з-за больш высокага іх кошту.
Зніжэнне транзакцый у сектары фастфуду ў асноўным тлумачыцца сыходам McDonald’s.
У сегменце рэстаранаў выручка вырасла – з-за росту наведвальнікаў пасля спаду ўзроўню напружанасці па COVID-19.
Беларусы больш сталі закупляцца на маркетплэйсах і зменшылі фэшн-расходы.
Маркетплэйсы павялічылі свае продажы. Асноўны гулец, які задаў дынаміку індустрыі, – Wildberries. Адток кліентаў назіраецца з пляцоўкі Lamoda – верагодна, з-за росту кошту тавараў.
Сталі драматычна менш набываць адзення.
Гэта можна растлумачыць тым, што пры росце коштаў на іншыя, «першачарговыя» катэгорыі (падарункі, прадукты для навагодняга стала), у насельніцтва проста не засталося грошай.
Менш спорту і больш эканоміі на б’юці-індустрыі. Абарот фітнес-цэнтраў упаў, што можа быць выклікана адмовай ад іх паслуг адчувальнай да цаны аўдыторыяй. Людзі з меншым прыбыткам сталі зразаць выдаткі на другарадныя запатрабаванні. Тыя, хто раней меў танны абанемент у спартзалу, адмовіліся ад яго падаўжэння. А тыя, хто раней наведваў салоны прыгажосці, – перасталі іх наведваць або сталі браць таннейшыя паслугі. Так, эстэтычныя запатрабаванні сышлі на другі план.
Індустрыя касметыкі і парфумерыі вырасла ў транзакцыях – спажыўцы цешаць сябе дробнымі пакупкамі, а аб росце сярэдняга чэка або абароту сегмента казаць не даводзіцца.
Беларусы не адмаўляюцца ад набыцця ўпрыгожванняў, але пераходзяць на больш танныя аналагі.
Такія паводзіны называюцца эфектам “губной памады”. З-за недахопу фінансаў спажыўцы менш выдаткоўваюць на буйныя пакупкі, а замяшчаюць тавары, якія сталі менш даступнымі, больш таннымі, каб працягваць атрымліваць радасць ад эмацыйных пакупак і падтрымліваць адчуванне ранейшага ладу жыцця. Менавіта таму назіраецца зусім малаважны рост у крамах тэхнікі або прасадка ў фэшн-сегменце.
Такія паводзіны пакупнікоў, абмежаванне грамадзян у сродках вядуць да банкруцтва, закрыцця гандлёвых сетак, асобных крам. А калі не рэалізуецца нейкая прадукцыя, то банкруцяцца яе вытворцы.
