“Дажынкі-2025” у Крычаве мелі не толькі сумны афіцыёз, але і багатае закуліссе: ад кірмаша з падворкамі і музычнай сцэны да адкрыцця паліклінікі і прадуктовых шэрагаў ды з’яўлення новага арт-аб’екта.
Падзеі на асноўнай пляцоўцы
Асноўныя падзеі “Дажынак” адбываліся на вялікім пляцы каля крычаўскага Дома саветаў. Менавіта там знаходзіліся падворкі, якія прадстаўлялі розныя раёны Магілёўскай вобласці. Магілёўскі падворак адзначыўся тым, што арганізаваў танцы з главой адміністрацыі Лукашэнкі Дзміртыем Крутым, які з задавальненнем пусціўся ў пляс.
Дарэчы, менавіта Круты быў адным з асноўных выступоўцаў, калі ва ўрачыстай абстаноўцы адчынялі дзверы новай паліклінікі ў Крычаве, а вакол луналі чырвона-зялёныя сцягі і балонікі, якія вялікі калектыў установы аховы здароўяі трымаў у руках, ствараючы адчуванне неверагоднага свята.
“Гэта вялікая падзея не толькі для Магілёўскай вобласці ці Крычаўскага раёна, але і для ўсёй сістэмы аховы здароўя нашай краіны. Такія аб’екты мы адкрываем штогод, дзякуючы чаму не толькі крычаўляне, але і жыхары суседніх раёнаў змогуць атрымліваць тут кваліфікаваную медыцынскую дапамогу” – цытуе словы Крутога на адкрыцці паліклінікі выданне “Крычаўскае жыццё”.
У гандлёвых шэрагах з мясной прадукцыяй зноўку адзначыліся прадстаўнікі Магілёва. Супрацоўнікі Магілёўскага мясакамбіната зрабілі сапраўны экслюзіў – рэкордны 200-кілаграмовы мясны хлеб, які быў прыгатаваны спецыяльна для «Дажынак» – інфармуе тэлеграм-канал “Могилев – мой город”.
На галоўнай сцэне прагучала шмат папулярнай музыкі, рознага гатунку псеўдафальклор, але адной з цэнтральных песен быў хіт гурта “Дразды” “Хата бацькоў”. Выкананы ён быў не самім гуртом, а мясцовым вакальна-інструментальным ансамблем. Нагадаем, што не так даўно “Дразды” зноўку атрымалі магчымасць выступаць, бо былі пад негалоснай забаронай, ды выканалі некалькі песен для “дажыначнай” аўдыторыі ў Ваўкавыску – заўважыла выданне Еўрарадыё.
“Дажыначная творчасць” у выглядзе арт-аб’екта
З нагоды правядзення абласнога фестываля-кірмаша «Дажынкі-2025» у Крычаве з’явіўся новы аб’ект пад назвай «Наша слаўная Магілёўшчына». Паўстаў ён па ініцыятыве Каардынацыйнага савета грамадскіх аб’яднанняў і палітычных партый Магілёўскай вобласці і быў размешчаны па вуліцы Савецкай.
“Гэтая ўнікальная ўстаноўка стане сапраўдным цэнтрам прыцягнення для ўсіх, хто хоча захаваць на памяць яскравыя моманты” – апісвае важнасць новай гарадской лакацыі раённая газета “Крычаўскае жыццё”.
Калі ж прыглядзецца да гэтай малой архітэктурнай формы, то выглядае яна дзіўнавата. Новы арт-аб’ект нагадвае браму з лаўкай пасярод праходу. У ніжняй частцы брамы знаходзяцца выявы беларускай касмічнай турысткі Марыны Васілеўскай, якая атрымала званне героя Беларусі, і класіка айчыннай літаратуры Янкі Купалы.
Каля Васілеўскай знаходзіцца надпіс “Беларусь – гэта мы!”, а каля Купалы “Беларусь – гэта мір!”. Выглядаюць гэтыя надпісы недарэчна, бо яны ніяк не звязваюцца з выяўленымі асобамі, і тым больш з надпісам зверху, які дэманструе, што гэтая пара рэпрэзентуе “Нашу слаўную Магілёўшчыну”.
Але як гэтыя асобы звязаныя з Магілёўшчынай і, у прыватнасці, з Крычавам? Янка Купала з Падняпроўскім рэгіёнам звязаны непасрэдна, бо напісаў знакамітую паэму “Магільва льва”, у аснову якой пакладзена легенда пра занаванне Магілёва. Дарэчы, здымкі фільма па гэтай паэме Купалы “Беларусфільмам” адбываліся ў значнай ступені ў Крычаве. У сваю чаргу, касмічная турыстка Васілеўская ніяк не звязана з Магілёўшчынай, а тым больш з Крычавам.
Фота: krichevlive.by
