Сем гадоў пяцёра службовых асоб праводзілі махінацыі з нібыта продажам запасных частак мясцовым сельгаспрадпрыемствам.
Паводле матэрыялаў справы, з 2015 па 2021 год супрацоўнікі камерцыйнай фірмы разам з прадстаўнікамі арганізацый-пакупнікоў афармлялі дакументы так, нібыта запчасткі былі пастаўленыя. Насамрэч тавар да заказчыкаў не даязджаў. Затое грошы за яго цалкам рэальна кудысцьці пералічваліся. Такім чынам дзяржаўныя арганізацыі страцілі больш за 350 тыс. рублёў.
Асобным эпізодам суд разглядаў супрацоўніцтва прадстаўнікоў прыватнай кампаніі з двума службовымі асобамі сельгаспрадпрыемства – загадчыкам гаража і інжынерам. Паводле абвінавачання, менавіта дзякуючы гэтай «дзелавой супрацы» маёмасць гаспадаркі схуднела яшчэ больш чым на 235 тыс. рублёў.
На гэтым апетыт удзельнікаў схемы не скончыўся. Следства прыйшло да высновы, што за тыя ж сем гадоў яны паспелі правесці аналагічныя махінацыі яшчэ з чатырнаццаццю прадпрыемствамі. Схема заставалася амаль нязменнай: падробленыя таварна-транспартныя накладныя сведчылі пра пастаўку запчастак, якіх у рэчаіснасці ніхто ніколі не атрымліваў. Такім спосабам, паводле матэрыялаў справы, было прысвоена яшчэ больш за 63 тыс. рублёў.
Адзін з абвінавачаных атрымаў яшчэ адно абвінавачанне. Яму інкрымінавалі крадзеж аўтамабільных запчастак і іншых тавараў на суму звыш 42 тыс. рублёў.
Сваю віну ўдзельнікі справы прызналі толькі часткова. Яны не пагадзіліся ні з ацэнкай сваіх дзеянняў, ні з памерам шкоды, які назвалі следчыя і пракуроры.
Аднак суд Шклоўскага раёна палічыў, што прадстаўленых доказаў дастаткова. Трое супрацоўнікаў прыватнай кампаніі атрымалі ад шасці з паловай да васьмі гадоў пазбаўлення волі ва ўмовах узмоцненага рэжыму, штрафы ад 300 да 600 базавых велічынь і пяцігадовую забарону займаць кіроўныя і матэрыяльна адказныя пасады.
Двум супрацоўнікам сельгаспрадпрыемства прысудзілі ад пяці з паловай да шасці гадоў калоніі ўзмоцненага рэжыму, штрафы па 300 базавых велічынь і такую ж забарону на працу на адказных пасадах.
Прысуд пакуль не ўступіў у законную сілу і яшчэ можа быць абскарджаны.
Фотаздымак з адкрытых крыніц