Праваабаронцы і СМІ паведамляюць, што ў Круглым пасля выпускнога была затрыманая Аліна Горава. 20-гадовая дзяўчына вучылася ў Барысаўскім політэхнічным каледжы, і 27 сакавіка, ў дзень атрымання дыплома яе проста на аўтобусным прыпынку пасля вяртання ў Круглае затрымала міліцыя.
Паведамляецца, што ў круглянскім ІЧУ, куды была адпраўлена Аліна, было вельмі халодна. Дзяўчыне не выдалі матрац, ёй давялося спаць на голых дошках, забаранілі накрывацца нават уласнымі рэчамі.
Праз тры дні Аліне стала дрэнна. У дзяўчыны паднялася тэмпература, а таксама абвастрылася хранічнае захворванне нырак і жаночых органаў. Ёй выклікалі хуткую, але забаранілі шпіталізацыю, матывуючы гэта тым, што ў турме № 4 у Магілёве, куды яе мусяць перавесці, ёсць лякарня.
Але, наколькі вядома, пасля этапу нічога не змянілася. Турэмны лекар, па словах праваабаронцаў, не прапісаў дзяўчыне антыбіётыкаў, нягледзячы на дрэнныя аналізы. На дзясятыя суткі, наколькі вядома, стан яе пагоршыўся, болі ўзмацніліся, запаленне прагрэсавала.
Следам за Stable Diffusion Online і DALL-E, якія па нашай просьбе малявалі альтэрнатыўны Магілёў, мы папрасілі новую нейрасетку Kandinsky 2.1 намаляваць наш горад. Але не простафантазійны, а такім, як яго маглі б выявіць славутыя мастакі.
Але спачатку спыталі штучны інтэлект, як бы ён выглядаў Магілёў у папулярных мастацкіх стылях. Напрыклад, кіберпанк.
Анімэ.
Поп-арт. Звярніце ўвагу, чым вянчаецца цэнтральная цыбуліна.
Наогул, звяртае на сябе ўвагу аднатыпнасць фантазіі нейрасеткі. Як бы мы ні фармулявалі пытанне, на цэнтральным месцы выявы амаль заўсёды знаходзіцца стылізаваная царква. А вось мастацкі почыркі знакамітых жывапісцаў амаль заўсёды Kandinsky улоўлівае трапна. Вось, напрыклад, пару варыянтаў ад “Босха”.
Кандзінскі.
Шагал.
А вось стыль Бялыніцкага-Бірулі, на наш погляд, зусім не ўгаданы. Відаць, нейрасетка брала за аснову не ўзорныя працы знакамітага ўраджэнца Магілёўшчыны, а нейкія выпадковыя выявы.
Казімір Малевіч так не расчараваў, хоць і не вельмі аказаўся падобным на сябе, хутчэй патрапіў пад моцны ўплыў Кандзінскага.
Таксама некуды не туды адбыўся зрух у стылістыцы Сая Твомблі, хоць у прынцыпе праца атрымалася прыемная, лаканічная.
Рэмбранд парадаваў.
Ну, і нарэшце, Сальвадор Далі.
Kandinsky 2.1 – гэта расійскі аналаг знакамітай нейрасеткі Midjourney, якую распрацавалі праграмісты “Сбербанка”.
10 красавіка ў Магілёве на вуліцы Завадской мужчына 1946 года нараджэння на сваім прысядзібным участку праваліўся ў калодзеж глыбінёй 2,5 метра. Даставаць яго давялося ратавальнікам – паведамляе прэс-служба МНС. З траўмамі ён шпіталізаваны.
Дзяржаўны камітэт судовых экспертыз апублікаваў даследаванне пра чарговае атручэнне мухаморамі жыхара Магілёва. Нагадаем, у снежні мінулага года пятнаццаці- і шаснаццацігадовыя падлеткі ў Магілёве труціліся гэтымі ж грыбамі і траплялі ў рэанімацыю – пісалі mogilev.media.
Гэтым разам – у сакавіку бягучага года ў Магілёўскую гарадскую бальніцу хуткай медыцынскай дапамогі з прыкметамі наркатычнага атручэння паступіў 31-гадовы магілёвец. Мужчына на вуліцы паводзіў сябе неадэкватна, відавочцы выклікалі “хуткую дапамогу” і міліцыю. У той жа дзень супрацоўнікі міліцыі правялі агляд у кватэры маладога чалавека, канфіскавалі два шкляныя слоікі з здробненым раслінным рэчывам.
Як выявілася, гэта здрабнёныя мухаморы, якія мужчына свабодна набыў праз інтэрнэт. Падчас апытання магілёвец растлумачыў супрацоўнікам міліцыі, што не першы раз ужываў у ежу расліннае рэчыва з сушаных мухамораў як харчовую дабаўку. У той дзень ён з’еў некалькі лыжак, затым пайшоў у краму і неўзабаве адчуў, што губляе сувязь з рэальнасцю, пачаў паводзіць сябе неадэкватна.
Наркатычных сродкаў, псіхатропных рэчываў у такіх мухаморах не ўтрымліваецца, што дазваляе іх свабодна прадаваць. Разам з тым, у чырвоным мухаморы змяшчаюцца рэчывы, якія ўплываюць на псіхіку – мусцымол і ібаценовая кіслата. Ад іх парушаецца ўспрыманне знешняга свету, з’яўляецца пачуццё нерэальнасці таго, што адбываецца вакол.
Міжнародны дзень вызвалення вязняў канцэнтрацыйных лагераў (International Day for the Liberation of Concentration Camp Prisoners).
Уведзены паводле рашэння ААН у памяць пра міжнароднае паўстанне вязняў канцэнтрацыйнага лагера “Бухенвальд”.
Падчас Другой сусветнай вайны на тэрыторыі Нямеччыны і акупаваных ёй краінах было больш за 14 000 канцлагераў. Праз іх прайшло звыш 20 мільёнаў чалавек.
На тэрыторыі Беларусі ў 1944 годзе налічвалася больш за 260 канцлагераў. Самыя вялікія знаходзіліся ў Мінску, Гомелі, Бабруйску і Полацку. У іх было знішчана звыш 1,5 мільёна чалавек.
Сусветны дзень барацьбы з хваробай Паркінсана (World Parkinson’s Day).
Устаноўлены Сусветнай арганізацыяй аховы здароўя.
Паркінсан – адно з самых жахлівых прозвішчаў, якое можна пачуць у кабінеце неўролага. Яго насіў ангельскі лекар, які падрабязна апісаў загадкавую хваробу. У дзень нараджэння Джэймса Паркінсана ўстаноўлены гэты Сусветны дзень.
Сусветным сімвалам хваробы стаў Чырвоны цюльпан. Справа ў тым, што ў 1980 годзе галандскі садоўнік Ван дэр Веральд, які пакутаваў на хваробу Паркінсана, вывеў новы эфектны гатунак цюльпана ў чырвона-белых танах і назваў яго «Цюльпан доктара Паркінсана».
Хвароба ўзнікае з-за парушэння выпрацоўкі дофаміна – аднаго з нейрамедыятараў (рэчываў, якія служаць для перадачы імпульсаў у галаўным мозгу). Гэта вядзе да парушэння функцый клетак у аддзелах мозгу, якія адказваюць за рухі чалавека. З-за гэтага парушаецца рэгуляцыя рухаў і тонус, што выяўляецца характэрным трэмарам (дрыготкай), агульнай скаванасцю і парушэннем паставы і рухаў.
1927 год. Прынята Канстытуцыя БССР – другая з чатырох.
Першая канстытуцыя БССР была прынята ў 1919 годзе, трэцяя і чацвёртая – у 1937 і 1978 гадах.
Канстытуцыя развіла агульныя палажэнні Канстытуцыі 1919 года, разам з гэтым яна ўтрымлівала шэраг нормаў простай дзейнасці. Было прызнана за ўсімі грамадзянамі права карыстання роднай мовай, нацыянальным меншасцям забяспечвалася рэальнае права адукацыі ў школе на роднай мове, усталёўвалася поўнае раўнапраўе беларускай, польскай, яўрэйскай (ідыш) і рускай моў.
На тэрыторыі ВКЛ Статуты 1529, 1566, 1588 гадоў фактычна з’яўляліся канстытуцыяй і на большай частцы Вялікага Княства Літоўскага Статут меў юрыдычную сілу да 1831 года, а ў Гродзенскай, Мінскай i Вiленскай губернях Расійскай імперыі – да 1840 года.
Акрамя таго, 3 мая 1791 года Вялікі сойм прыняў першую канстытуцыю ў Еўропе.
Ян Матэйка, Канстытуцыя 3 мая. 1891 год
1936 год. Нарадзілася Івонка Сурвіла (Шыманец).
Беларуская грамадска-палітычная дзеячка ў эміграцыі, мовазнавец, мастак, старшыня (з 1997) Рады Беларускай Народнай Рэспублікі.
На эміграцыі з 1944 года – Данія, Францыя, Іспанія, Канада.
Скончыла філалагічны факультэт Сарбоны. Працавала ў Беларускай рэдакцыі Іспанскага нацыянальнага радыё, выкладала французскую мову ў школах Іспаніі, была перакладчыцай у Канадскімфедэральным бюро перакладаў.
У Канадзе ўзначальвала Беларускі інстытут навукі і мастацтва, Каардынацыйны камітэт беларусаў Канады, уваходзіла ў склад праўлення Канадскай этнакультурнай рады, сузаснавальніца «Канадскага фонда дапамогі ахвярам Чарнобыля ў Беларусі».
Удзельнічала ў мастацкіх выстаўках як жывапісец.
1937 год. У магілёўскай псіхлячэбніцы загінуў Цішка Гартны (Зміцер Жылуновіч, 1887–1937).
Беларускі грамадскі і дзяржаўны дзеяч, кіраўнік ураду ССРБ (1919), пісьменнік, паэт, перакладчык, Акадэмік АН БССР.
Удзельнік рэвалюцыйных падзей 1905–1907 гадоў, культурна-выдавецкай суполкі «Знание» у Пецярбургу.
Быў сакратаром Беларускага нацыянальнага камісарыята (1918), рэдактарам бальшавіцкіх газет «Дзянніца»,«Савецкая Беларусь», аўтарам маніфеста аб утварэнні Савецкай Сацыялістычнай Рэспублікі Беларусь. Першы кіраўнік БССР (1 студзеня – 3 лютага 1919), удзельнік грамадзянскай вайны.
Узначальваў Дзяржвыдавецтва, выдавецтва «Адраджэнне», Цэнтральны архіў БССР, працаваў намеснікам наркама асветы і старшынёй Галоўмастацтва БССР, членам прэзідыума Інбелкульта, рэдактарам часопіса «Полымя», у Інстытуце гісторыі Акадэміі навук.
У 1922 годзе пры наведванні Берліна наладзіў там выданне беларускіх падручнікаў і мастацкіх кніг. Удзельнік Другой Усебеларускай канферэнцыі (1925 год, Берлін). У 1927 годзе разам з Купалам, Чаротам і Зарэцкім наведаў Польшчу і Чэхію, выступіў перад беларусамі Варшавы.
Выключаны з ВКП(б) у студзені 1931 года «за сувязь з <…> нацдэмаўскімі і фашысцкімі элементамі». Арыштаваны ў 1936 годзе, у красавіку 1937 пераведзены ў Магілёўскую псіхіятрычную лячэбніцу.
Пахаваны на ўскрайку Пячэрскага лесапарку ў Магілёве. Тут яму пастаўлены сціплы помнік (1989).
1951 год.Нарадзіўся архіепіскап Магілёўскі і Мсціслаўскі (з 2002 года) Сафроній (Юшчук).
Скончыў Ленінградскую духоўную акадэмію. У 1987 годзе пастрыжаны ў манахі ў Жыровіцкім манастыры.
Служыў пры Жыровіцкім, Лядзенскім манастырах.
У 2000 годзе стаў біскупам Брэсцкім і Кобрынскім, у 2002 годзе – біскупам Магілёўскім і Мсціслаўскім.
23 жніўня 2009 года на біскупа Сафронія быў учынены напад перад пачаткам літургіі ў кафедральным саборы ў імя Трох Свяціцеляў у Магілёве.
1 лютага 2018 года ўзведзены ў сан арцыбіскупа.
1963 год. Нарадзіўся Ігар Басінскі.
Беларускі спартсмен па стральбе з пісталета. Заслужаны майстар спорту СССР.
Уладальнік Кубка свету, шматразовы чэмпіён свету, чэмпіён і прызёр чэмпіянатаў Еўропы, СССР і Беларусі ў асабістым і камандным заліках, бронзавы прызёр у складзе зборнай СССР на Алімпіядзе-88 у Сеуле, сярэбраны прызёр алімпіяды-96 у Атланце, сярэбраны і бронзавы – алімпіяды 2000 года ў Сіднеі.
Лепшы спартсмен БССР 1986 і 1987, Беларусі ў 2000 годзе.
1968 год. У Магілёве нарадзіўся Андрэй Мельнікаў (1968–1988).
Герой Савецкага Саюза, гвардыі радавы 9-й парашутна-дэсантнай роты 345 палка. Загінуў у Афганістане ў баі на «вышыні 3234» у правінцыі Хост.
Да арміі працаваў трактарыстам у саўгасе “Дняпроўскі”.
Удзельнічаў у шасці баявых аперацыях у Афганістане.
У Магілёве яго імем названа вуліца, СШ №28, у музеі вайсковай часці экспануецца яго кулямёт. На магіле на Польскіх могілках усталяваны помнік з бронзавым бюстам.
Мельнікаў стаў прататыпам аднаго з герояў фільма “9-я рота”.
1986 год. Памёр Міхаіл Ганчарык (1899–1986).
Беларускі навуковец у галіне фізіялогіі раслін і фотасінтэзу, пісьменнік. Доктар біялагічных навук, прафесар, член-карэспандэнт АН БССР. Заслужаны дзеяч навукі.
Скончыў Горацкі сельскагаспадарчы інстытут (1924), дзе ўзначальваў Беларускую секцыю студэнтаў. Кіраўнік Аршанскага філіяла «Маладняка».
Працаваў у Беларускай сельскагаспадарчай акадэміі, намеснікам дырэктара Інстытута біялогіі, дырэктарам Ігарскай доследнай станцыі Інстытута сельскай гаспадаркі Крайняй Поўначы, Інстытута эксперыментальнай батанікі АН БССР.
Арыштоўваўся (1933, 1949). Вязень ГУЛАГ, ссыльны ў Сібіры.
Распрацоўваў навуковыя асновы палярнага земляробства. Устанавіў розную патрабавальнасць бульбы да вільготнасці глебы ў антагенезе, даследаваў фотасінтэз у бульбе, адток асімілятаў, уплыў іонаў хлору і хлорзмяшчальных калійных угнаенняў на фізіялагічныя працэсы раслін.
1995 год. Дэпутаты Апазыцыі БНФ у парламенце Беларусі абвясцілі галадоўку, пратэстуючы супраць ініцыянаванага А. Лукашэнкам рэферэндуму па змене дзяржаўнай сімволікі і статусу беларускай мовы.
У ноч з 11 на 12 красавіка людзі ў чорных масках – падраздзяленне КДБ «Альфа» – збілі 19 дэпутатаў ад фракцыі БНФ «Адраджэньне» і выцягнулі іх з будынка.
2011 год. У 17:56 адбыўся выбух у мінскім метрапалітэне на станцыі «Кастрычніцкая».
Падчас выбуху на станцыі знаходзілася каля 300 чалавек. Непасрэдна ў выніку выбуху загінула 11 чалавек, пазней ад атрыманых траўм яшчэ два чалавекі памерлі ў бальніцы. За медыцынскай дапамогай звярнуліся 204 чалавекі.
Выбух быў прызнаны тэрактам.
Акцыі шанавання ахвяр выбуху ў мінскім метро прайшлі ў шматлікіх беларускіх гарадах. У Магілёве такая акцыя адбылася 13 красавіка на пл. Леніна каля знака «нулявога кіламетра» і каля Вечнага агню на пл. Савецкай (зараз – Славы).
Рух водных аўтобусаў плануецца запусціць па рацэ Данге ў Клайпедзе ўжо 15 мая. Але шмат будзе залежаць і ад умоў надвор’я і інфраструктуры прыпынкаў – паведамляе atviraklaipeda.lt.
Плануецца, што два рачных аўтобуса будуць выконваць 10 штодзённых рэйсаў, якія будуць ажыццяўляцца з 15 мая да 15 кастрычніка.
Працягласць воднага маршруту па рацэ Данге складае 7,9 км. Мяркуецца, што яго можна будзе пераадолець за гадзіну. На маршруце абсталёўваецца 6 прыпынкаў: Стары горад, мост на Ліепу, Дангес вінгіс, жылы раён “Жаліну”, Батанічны сад і мост Таўралаўкіа.
Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці.
Гарадская рада Клайпеды вызначыла кошт электроннага аднаразовага квітка на водны аўтобус: агульны – 3 еўра, ільготны па Картцы клайпедчаніна – 2,4 еўра.
Дырэктар «Клайпедас аўтабусу паркас» Вайдас Раманаўскас і часовы кіраўнік прадпрыемства «Клайпедас келейвініс транспартас» Андрус Самуйлавас добра разумеюць, што «Недастаткова праплысці па рацэ, трэба недзе спыніцца. Месцы прыпынкаў яшчэ рыхтуюцца».
Кіраўніцтва Клайпеды разумее, што праект рачнога аўтобуса будзе стратным, таму яно гатова на адпаведныя кампенсацыі і сёлета выдзеліць каля 50 000 еўра каб зрабіць карысць гараджанам і гасцям горада.
Дамова аб Пабрацімстве Клайпеды і Магілёва была падпісана 8 сакавіка 1997.
27 лютага 2022 году, на трэці дзень уварвання расійскіх войск ва Ўкраіну, мэр Клайпеды заявіў аб спыненні пабрацімскіх сувязяў з расійскімі і беларускімі гарадамі. Паводле яго ён звярнуўся да кіраўніцтва гарадоў партнёраў, каб тыя супраціўляліся агрэсіі супраць Украіны, але рэакцыі не было. У афіцыйным спісе гарадоў пабрацімаў Клайпеды Магілёва няма.
Магілёў. media працягвае сачыць за жыццём Клайпеды, нягледзячы на спыненне партнёрскіх сувязяў з Магілёвам са спадзевам, што пабрацімства між гарадамі адновіцца.
Клайпеда месціцца на захадзе краіны і з’яўляецца портам на Балтыйскім моры. Насельніцтва 160 тысяч чалавек.
21-гадоваму жыхару Магілёва інкрымінавана набыццё, захоўванне і перавозка асабліва небяспечных псіхатропных рэчываў у буйным памеры ў складзе арганізаванай групы.
Як паведамляе генеральная пракуратура у кастрычніку 2022 года хлопец звязаўся з адміністратарамі інтэрнэт-крамы, якая займаецца распаўсюджваннем псіхатропных рэчываў. Па ўказанні куратараў, малады чалавек да 26 кастрычніка 2022 года выконваў функцыі «закладчыка»: размяшчаў схованкі з псіхатропнымі рэчывамі на тэрыторыі Магілёва.
За 10 дзён «працы» ён набыў у некалькі этапаў не менш за 24 грам сінтэтычнага наркотыка, больш за два грамы якога размясціў у тайніках.
Цяпер ён асуджаны на тэрмін у 11 гадоў з адбываннем у папраўчай калоніі узмоцненага рэжыму са штрафам у памеры 200 базавых велічыняў.
Кожны дзень на тэрыторыі магілёўскага лясгаса на вуліцы Крупскай арганізаваны продаж бярозавіка. Адзін літр соку каштуе 53 капейкі ў сваю тару. Продаж пачынаецца з 12.00 і звычайна збірае агромністыя чэргі – пераканаліся mogilev.media.
З Апавяшчэння аб грамадскіх абмеркаваннях аб’екта «Аўтамабільная дарога Р-122 Магілёў – Чэрыкаў – Касцюковічы», якое размешчана чавускай раённай газетай “Іскра”, сталі вядомымі тэрміны рэканструкцыі трасы.
Рэканструкцыі падлягае ўчастак трасы Р-122 ад 13,508 км да 81,480 км (амаль 68 км), які праходзіць па тэрыторыі Магілёўскага, Чавускага і Чэрыкаўскага раёнаў.
Уражваюць запланаваныя тэрміны ажыццяўлення дзейнасці: 1 этап – з 13-га па 44 кіламетры – з уводам у эксплуатацыю ў 2027 годзе, 2 этап – з 44-га кіламетра па 81-шы – з уводам у эксплуатацыю ў 2036 годзе. 3 этап – узвядзенне абходу г. Чавусы – з уводам у эксплуатацыю ў 2047 годзе. Атрымліваецца, што агулам будаўніцтва 68 кіламетраў трасы і аўтаабхода Чавус расцягнецца на 24 гады.
Неверагодна, але факт – на працягу 10-13 гадоў будаўнікі плануюць рамантаваць участак у 37 км (ад 44 да 81), або па 3 км на год.
Пакуль Р-122 будзе рэканструявацца, у свеце ўжо будуць іншыя транспартныя сродкі, іншыя транспартныя шляхі, інўшыя будаўнічыя тэхналогіі. І наогул невядома, колькі застанецца насельніцтва у Чавусах, Чэрыкаве да сярэдзіны ХХІ стагоддзя.
Фота з адкрытых крыніц, носіць ілюстрацыйны характар
10 красавіка 1942 года ў Магілёве адбылася незвычайная тэхнагенная катастрофа, аналагаў якой у гісторыі Белрусі больш не вядома. Патоп на невялічкай Дубравенцы забраў жыцці соцень магілёўцаў, вынішчыў дзясяткі дамоў у Магілёве.
Прычыны трагедыі на Дубравенцы і сама хада падзеяў зараз добра вядомыя даследчыкам, а сама катастрофа шырока асветленая ў СМІ. Зусім не так абстаялі справы яшчэ з пару дзясяткаў гадоў таму – пра “Магілёўскае цунамі” ведала толькі жменька спецыялістаў, а ў самім горадзе нічога не нагадвала пра патоп 1942 года і яго ахвяр.
У чэрвені 2022 года памяць пра “цунамі” ў Магілёве нарэшце была адзначаная ў гарадской прасторы – высілкамі магілёўскага актывіста Ігара Бадзькова, пры дапамозе гісторыкаў і краязнаўцаў Аляксея Бацюкова і Алега Лісоўскаага на месцы трагедыі была пастаўленая інфармацыйная таблічка.
“Магілёўскае цунамі” здарылася падчас Другой Сусветнай вайны. У чэрвені-ліпені 1941 года пры адступленні з Магілёва савецкія войскі падарвалі чыгуначны насып на Дубравенцы і ён прасеў, фактычна спыніўшы раку. Паводкавыя воды сабраліся за насыпам у агромністае возера, якое падчас адлігі 10 красавіка 1942 года прарвала насып.
Як выглядаў насып у 1942 годзе – фота з калекцыі Алега Давіда Лісоўскага
Люльку несла па плыні, а з яе даносіўся дзіцячы плач
“Першапачатковы вал вады з ільдзінамі дасягаў 15 метраў. – узгадваў катастрофу магілёвец Т. Крываносаў, відавочца падзей – Вада змятала ўсё на сваім шляху, над горадам падняўся страшэнны шум і грукат. Я пачуў яго дома (Ленінская, 27) і адразу накіраваўся за людзьмі, якія беглі, да Дубравенкі ў раён гарадскога парка. Адсюль адкрылася страшная карціна – мутная, карычневая вада заліла ўсю пойму Дубравенкі, у тым ліку і Быхаўскі рынак.”
Адразу пасля патопа ў гарадской прэсе паявілася нататка, у якой называлася прыблізная колькасць ахвяр у 2 000 чалавек. Сучасныя даследчыкі схіляюцца да ацэнкі ў некалькі соцень чалавек. Большасць з іх трапілі пад смяротны вал вады ў дамах, што стаялі абапал Дубравенкі і ў даліне ракі Струшні. Людзі гінулі, калі вада паглынала іх на вуліцы, затаплівала да самай столі іх дамы, калі лледзяныя глыбы разбівалі сцены. Сярод ахвяр апынулася шмат дзяцей – відавочцы распавядалі пра люльку з немаўляткам, якую несла па плыні, а з яе даносіўся дзіцячы плач.
Прычына трагедыі, як цяпер мяркуюць навукоўцы, палягала ў тым, што папсаваны падрывам чыгуначны насып увесь канец 1941-га года і ў пачатку 1942-га быў неабходны нямецкаму камандаванню для транспарціроўкі грузў па чыгунцы. Пагэтаму яны не дазвалялі гарадскому кіраўніцтву правесці своечасовыя рамонтныя работы.
Трэба адзначыць, што гарадскія ўлады папярэджвалі жыхароў дамоў на Дубравенцы пра небяспеку загадзя.
“Тапельцаў збіралі на берагах Дняпра і дастаўлялі іх у гандлёвы павільён на Быхаўскім рынку. – распавядаў іншы відавочца, Е. Кавалькоў – Тут былі жанчыны, мужчыны, малечы ў пялёнках. Даліна Дубравенкі непазнавальна памяняла свой выгляд – скразная пустыня сярод высокіх берагоў і глыбы блакітнага лёду, што таялі пад прамянямі веснавога сонца.
