Category: У Беларусі

Хроніка прыхаванай рэальнасці. Суды, зняволенні, вызваленні

Навіна ад

Звесткі пра пераслед паводле праваабаронцаў, мэдыяў і родзічаў тых, хто зазнае яго.

Мікалай Аўтуховіч

На 23-і дзень сухой галадоўкі Аўтуховіч выпіў чай. Пакуль невядома, ці будзе ён працягваць галадоўку.

59-гадовы палітвязень абвясціў сухую галадоўку 11 ліпеня, паведамляе незалежная прэса, спасылаючыся на адміністрацыю гродненскай турмы, дзе ўтрымліваюць Аўтуховіча.

Ён пратэстуе супраць таго, што яму не перадаюць лісты і газеты.

Чатыры дні запар Мікалай не наведваў судовыя паседжанні, бо не меў сілаў дайсці на іх, сёння таксама не быў на судзе. Учора яму паставілі кропельніцу.

Аўтуховіча вінавацяць ва ўчыненні «Акту тэрарызму». Нібыта за падпаламі дому міліцыянта ў Ваўкавыску і падрывам аўтамабіля супрацоўніка міліцыі ў Гродна стаіць групоўка, якой ён кіраваў.

Па «справе Аўтуховіча» судзяць 12 чалавек.

Іна Шырокая

Асуджаная тры гады «хатняй хіміі».

Маці пяці дзяцей прызнаная вінаватай у «арганізацыі і падрыхтоўцы дзеянняў, што груба парушаюць грамадскі парадак, або актыўны ўдзел у іх».

Паводле праваабаронцаў ёй інкрымінаўся ўдзел у акцыях пратэсту 2020 году. Да суду яе ўтрымлівалі ў СІЗА-1 145 дзён. Вырак Шырокай вынесла суддзя Анастасія Ачалава з суду Ленінскага раёну Мінску.

Іна Шырокая праваабарончай супольнасцю прызнаная палітзняволенай.

Аляксандр Касумаў

Асуджаны на 1,5 года «хатняй хіміі».

Паводле праваабаронцаў яго абвінавачвалі ў апаганьванні збудаванняў і пашкоджанні маёмасці.

Паводле версіі абвінавачвання, у ноч з 23 на 24 красавіка каля гарадской лазні ён напісаў надпіс «Нет войне!». Праз амаль тры тыдні – у ноч з 15 на 16 траўня – Аляксандр нібыта пакінуў на сцяне ўжо тры надпісы: «No war!», «Luka», «убийца!».

Доказы віны Касумава былі атрыманыя, калі ён сядзеў у ізалятары. Там да яго падсадзілі супрацоўніка міліцыі, які «разгаварыў» Касумава, і той прызнаўся, што двойчы балончыкам наносіў тыя надпісы.

Віталій Іванюковіч

Асуджаны на два гады калоніі агульнага рэжыму.

Паводле праваабаронцаў, Іванюковіч пакінуў каментар пад відэа перастрэлкі паміж супрацоўнікам КДБ Дзмітрыем Федасюком і супрацоўнікам кампаніі EPAM Systems Андрэем Зельцарам.

Яго прызналі вінаватым у «дыскрэдытацыі Беларусі», але спачатку інкрымінавалі абразу прадстаўніка ўлады і распальванне варожасці.

Інцыдэнт з Зельцарам адбыўся 28 верасня 2021 году. У КДБ тады паведамілі, што ў Мінску падчас рэйду быў смяротна паранены супрацоўнік ведамства. Сілавікі ў адказ адкрылі агонь і застрэлілі жыхара кватэры. Пазней стала вядома, што ім аказаўся Андрэй Зельцар, супрацоўнік кампаніі EPAM Systems. За каментары ў сацсетках у «справе Зельцэра» затрымалі ўжо каля 200 чалавек.

Амаль паўтонны цвёрдых камунальных адыходаў прыходзілася на аднаго беларуса

Навіна ад

Паводле Нацыянальнага статыстычнага камітэту летась кожны беларус пакінуў па сабе 425,7 кілаграмаў камунальнага смецця.

У параўнанні з 2017-ым, як падлічыў  Белстат, на адну душу насельніцтва Беларусі прыходзілася такога смецця менш – 401, 9 кілаграм.

Аб’ём жа адкідаў вытворчасці на аднаго беларуса вылічваецца ў тонах. У 2021 годзе іх было 6,7 тон. Чатырма гадамі раней – 5,9 тон.

фота: zviazda.by 

«Вялізная запазычанасць, нас высяляюць». Бабруйская арганізацыя дапамогі бяздомных жывёлам просіць аб дапамозе

Навіна ад

Грамадская суполка «Дабрачыннасць» – гэта прытулак для бадзяжных і кінутых жывёлаў. Яе заснавальнікі пішуць, што «рахункі пустыя, ежу купляць няма за што, аплачваць гаспадарчыя выдаткі мы не можам».

«Жывёлы асуджаныя! Мы молім, падтрымайце нас! Не дапусціце высялення 80 сабак з перабывання! Не дапусціце голаду ў прытулку» гаворыцца ў звароце арганізацыі на яе старонцы «Укантакце».

«Дабрачыннасць» – недзяржаўная ўстанова, паўсталая з ініцыятывы невялікай групы людзей. Арганізацыя юрыдычна зарэгістраваная.

Прытулак не мае дзяржаўнага фінансавання. Ён арандуе больш за 11 сотак зямельнай дзялянкі, на якой размешчаныя вальеры. Яго дзейнасць трымаецца на працы валанцёраў, якія не маюць заробкаў.

У прытулку стэрылізуюць як бадзяжных, так і свойскіх жывёлаў. Акрамя прыгляду за гадаванцамі валанцёры займаюцца асветніцкай і агітацыйнай дзейнасцю. Праводзяць урокі дабрачыннасці ў школах, акцыі, экскурсіі.

фота: vk.com/public_dobrodetel

У Магілёве адстаўныя дэсантнікі адзначылі сваё «прафесійнае» свята «сціпла і арганізавана». Згадалі вайну ва Ўкраіне

Навіна ад

Пра вайну ва Украіне былыя магілёўскія дэсантнікі казалі, што ва ўмовах сучасных ваенных тэхналогіяў без вайсковага спецназу не абысціся.

На дзіва, але ў разгар дня, сквер ля кінатэатру «Радзіма», дзе ў ранейшыя гады збіраліся дэсантнікі» заставаўся без хлопцаў у цяльняшках. Не было традыцыйнага маршу былых салдат і па пешаходнай вуліцы Ленінскай.

 

 

Адстаўная дэсантура сабралася ў парку імя Горкага. Гэтая мясціна, хоць і ў цэнтры гораду, але ў баку ад людных вуліц. Каля сотні дэсантнікаў віталіся, браталіся, абмяркоўвалі планы на святочны дзень пакуль не прагучала каманда шыхтавацца. Шыхт былых вайскоўцаў правялі да мемарыялу Змагарам за Савецкую ўладу.

Ля яго адбыўся непрацяглы мітынг. На ім не было, як у мінулыя гады, пафасных выступаў чыноўнікаў. У прамовах згадалі вайну ва Ўкраіне. Было падкрэслена, што ва ўмовах панавання сучасных ваенных тэхналогіяў дэсантнікі застаюцца незаменнымі.

Будзённа на мітынгу прагучалі віншаванні, былі ўручаныя памятныя медалі. Святар акрапіў вадой шыхт былых вайскоўцаў. Некаторыя адрэагавалі жартам: цяпер можна не лезці ў фантаны.

Па сканчэнні ўрачыстай часткі адстаўныя дэсантнікі разышліся. Хто выправіўся да сваіх фантанаў, хто ў кавярні, а нехта дадому.

У Касцюковічах абвешчаная амністыя. Тыя, хто самавольна падлучыўся да гарадскога водаправоду ці каналізацыі, не будуць пакараныя, калі прызнаюцца

Навіна ад

У філіяле «Касцюковіцкі водаканал» запэўніваюць: згодна з умовамі «Воднай амністыі» ўладальнікі жылых дамоў могуць узаконіць нелегальныя падлучэнні да цэнтральных водаправодных або каналізацыйных сетак. Ім не давядзецца плаціць штраф і яны пазбегнуць іншых санкцыяў.

Такая палёгка пачала дзеіць ад 1 жніўня. Паводле вадаправоднікаў, гаспадарам дамоў трэба толькі зарэгістраваць самавольныя «ўрэзкі».

У выпадку выяўлення кантралёрамі самавольнага далучэння прадугледжаны штраф да 1600 рублёў для шараговага жыхара, а для юрыдычнай асобы да 7 тысяч рублёў.

Да таго ж «самавольнікаў» абавязваюць адключыцца ад водаправоду або каналізацыі за свой кошт, нагадвае  інтэрнэт-рэсурс газеты «Голас Касцюкоўшчыны».

Хроніка прыхаванай рэальнасці. Суды, зняволенні, вызваленні

Навіна ад

Звесткі пра пераслед паводле праваабаронцаў, мэдыяў і родзічаў тых, хто зазнае яго.

________________________________________________________

Аляксандр Саўчанка

Паводле праваабаронцаў затрыманы па вяртанні з Польшчы. Прычына зняволення не вядомыя.

На «пакаяльным відэа» Саўчанка прызнаецца, што выходзіў на акцыі пратэсту ў 2020 годзе, аднак няма інфармацыі, за што яго затрымалі цяпер.

Праваабаронцы адзначаюць, што ў 2021 годзе ён адседзеў 10 дзён адміністрацыйнага арышту за фатаграфаванне адной з пратэсных акцыяў у горадзе. Пакаранне адбыў цалкам.

________________________________________________________

Віктар Хлябец

Асуджаны на 1,5 гады калоніі.

Паводле праваабаронцаў жыхара Бярозы асудзілі за тое, што ён у закрытым тэлеграм-чаце пад відэа з перастрэлкай паміж Зельцарам і супрацоўнікам КДБ пакінуў крытычны каментар.

На відэа была зафіксаваная спроба арышту Андрэя Зельцара, які пачаў страляць у сілавікоў, якія прыйшлі па яго. У выніку загінуў Зельцар і супрацоўнік КДБ.

________________________________________________________

Таццяна Мацвеева

Пасля трох дзён зняволення віцебская журналістка-фрылансер на волі. Але яе будуць па адміністрацыйнай справе.

Мацвеева больш за 20 гадоў працуе ў медыях, з 2013 да 2021 год была рэдактаркай TUT.by па Віцебскай вобласці.

________________________________________________________

Анджэй Пачобут

Паводле польскіх журналістаў іх беларускага калегу будуць судзіць за тое, што ён назваў напад СССР на Польшчу 17 верасня 1939 года савецкай агрэсіяй.

Журналіста, прызнанага праваабарончай супольнасцю палітзняволеным, арыштавалі 25 сакавіка 2021 года. Яму інкрымінуецца распальванне варожасці або варажнечы.

________________________________________________________

Андрэй Уткін

Асуджаны на два гады калоніі за перасыланне фотаздымка з расійскай ваеннай тэхнікаў аднаму з тэлеграм-каналаў.

Суддзя Руслан Царук прызнаў яго вінаватым у садзейнічанні экстрэмісцкай дзейнасці.

Апазіцыйны палітык Рыгор Кастусёў адпрэчыў абвінавачванні ў змове дзеля захопу ўлады

Навіна ад

65-гадовы палітык ад красавіка мінулага году ўтрымліваецца ў няволі. Яго арыштавалі ў Шклове і завезлі ў Мінск. У следчым ізалятары ў зняволенага выявілі анкалагічнае захворванне. Звароты аб змяненні меры стрымання пакінутыя без задавальнення.

Рыгору Кастусёву інкрымінавана «змова, учыненая з мэтаю захопу дзяржаўнай улады неканстытуцыйным шляхам». Па словах пракурора, абвінавачаны нібыта ўступіў у змову, арганізаваную яшчэ двума фігурантамі справы – Юрыем Зянковічам і Змітром Шчыгельскім.

1 жніўня на судовым працэсе старшыня партыі БНФ не прызнаў віну ні па адным з пунктаў выстаўленага яму абвінавачання. Пра гэта стала вядома з публікацыі расійскага выдання «Sputnik-Беларусь».

Інфармацыйнае агенцтва БелТА, якое першым 29 ліпеня паведаміла пра частковае прызнанне віны Аляксандрам Фядутам і 1 жніўня пра прызнанне  віны ў поўным аб’ёме Вольгай Галубовіч і Дзянісам Краўчуком, пра пазіцыю Кастусёва маўчыць.

У публікацыі, выстаўленай на сайт у 10.52, пазначана, што «у дадзены момант пракурор зачытвае абвінавачванне Рыгору Кастусёву».

Выданьне паведаміла пра пазыцыю Кастусёва ў 15.32. У ім адзначалася, што па словах пракурора, абвінавачаны ўдзельнічаў у зум-канферэнцыях па абмеркаванні плана захопу дзяржулады. Аднак сам Кастусёў віну не прызнае. Пасля абвяшчэння абвінавачання ён адзначыў, што ўдзельнічаў у зум-канферэнцыях як слухач.

“Я толькі прызнаю віну ў тым, што даў гэтым людзям уцягнуць мяне ў гэтыя размовы: аб сілавой змене ўлады, аб трох групах ваеннаслужачых, аб фінансаванні гэтага мерапрыемства”, – падкрэсліў Рыгор Кастусёў.

«Sputnik-Беларусь» піша: Кастусёў заявіў падчас допыту ў судзе, што з боку следства на яго аказваўся ціск.

«Калі тваю сям’ю рэпрэсуюць, напішаш што заўгодна», цытуе абвінавачанага выданне. Ён адзначыў: калі ўжо быў затрыманым, то знявольвалі яго дачку і зяця.

Справа разглядаецца ў Мінскім абласным судзе. Спачатку працэс быў абвешчаны закрытым, але нечакана яго зрабілі адкрытым.

Акрамя Кастусёва, Галубовіч, Краўчука і Фядуты падазраванымі па крымінальнай справе з’яўляюцца псіхіятр Дзмітрый Шчыгельскі, экс-супрацоўнік спецпадраздзялення МУС «Алмаз» Ігар Макар, а таксама Аляксандр Перапечка, Павел Кулажанка і Віталь Макаранка, якія пражываюць за мяжой.

Сёлетні ўмалот зерневых пусцяць на пракорм «калгаснай» жывёле

Навіна ад

Апошнія гады Беларусь не экспартавала збожжа, бо яго шмат патрабавала жывёлагадоўля. Сёлета чыноўнікі абязуюцца дасягнуць рэкордных вышыняў у вырабе сельскагаспадарчай прадукцыі.

Паводле міністра сельскай гаспадаркі і харчавання Ігара Брыло, плануецца значна павялічыць аб’ём вытворчасці малака і мяса.

«Для гэтага патрэбныя кармы, уключаючы камбікармы, – тлумачыць  кіраўнік ведамства ў інтэрв’ю дзяржаўнаму тэлеканалу ОНТ.

«Аснова – збожжавая група. Таму перш за ўсё – забеспячэнне сваёй жывёлагадоўлі, ну і, вядома, прадукты харчавання для нашых людзей» – кажа ён.

Урадовец адзначае, што сёлета трэба прадаць сельскагаспадарчай прадукцыі на 7,8 мільярдаў долараў ЗША, дадаўшы да ўзроўню мінулага году 1 мільярд рублёў.

«Гэта істотная лічба, – адзначае ён. – Таму для нас вельмі важна прадаць канчатковы прадукт у выглядзе малочнай прадукцыі, мясной прадукцыі».

Аўтарства фота: produkt.by

Трэнд уборачнай кампаніі – паліва сельгастэхнікі фарбуюць, а потым ловяць са скрадзеным

Навіна ад

Практыка афарбоўкі паліва для сельгастэхнікі не новая. Яе выкарыстоўвалі ў гаспадарках з сярэдзіны 2000-х, але сёлета рэйды па пошуку скрадзенага паліва праходзяць надзвычай часта.

За мінулыя выхадныя на Магілёўшчыне міліцыя сумарна канфіскавала 340 літраў фарбаванага паліва.

Найвялікшы аб’ём крадзенага паліва быў выяўлены ў кіроўцы грузавога аўтамабіля «МАЗ» з Круглага – 160 літраў. Жыхар райцэнтру прызнаўся, што набыў яго ў неўстаноўленай асобы і заліў у бак аўтамашыны, паведамляе  абласная міліцыя.

100 літраў фарбаванага дызпаліва было знойдзена на падворку ў жыхара Чавускага раёну, што працуе кіроўцам аднаго з сельгаспрадпрыемстваў.

У вёсцы Акунёўка Шклоўскага раёну ў 26-гадовага мясцовага жыхара праваахоўнікі канфіскавалі 80 літраў фарбаванай саляркі.

Ва ўсіх выяўленых выпадках грамадзян, у якіх было знойдзена падобнае дызельнае паліва, чакае штраф да 1600 рублёў (50 базавых велічынь).

З дапамогаю афарбоўкі паліва змагаюцца з махінацыямі не толькі ў Беларусі.

У Бельгіі, напрыклад, паліва, прызначанае для фермерскіх гаспадарак, каштуе ў чатыры разы танней, чым звычайнае на запраўках. Такое паліва фарбуецца ў чырвоны колер (у нас – у зялёны), а для праверкі выкарыстоўваюцца адмысловыя рэактывы, якія паліцыя падносіць да выхлапной трубы. Штраф за выкарыстанне чырвонага паліва чакае нават самаго фермера, калі ён заправіць такой саляркай свой асабісты аўтамабіль.

“Недаатрымаем да 1 мільярда рублёў”, міністр фінансаў пра бюджэт з дэфіцытам

Навіна ад

У студзені-ліпені выдаткі перавысілі прыбыткі на 1,9 мільярдаў рублёў (720 мільёнаў долараў ЗША).

«Па стане на 1 жніўня практычна ў нас па рэспубліканскім бюджэце склаўся пэўны дэфіцыт – выдаткі перавысілі прыбыткі дзесьці на 1,9 мільярдаў рублёў, пры тым што планава ў нас 2,8 (мільярда рублёў) па годзе дэфіцыт», – даводзіць міністр фінансаў Юрый Селіверстаў у эфіры тэлеканалу СТВ.

Па яго словах,  большая частка дэфіцыту звязана з недаатрыманнем экспартных пошлінаў ад падсанкцыйных нафтапрадуктаў і калійных угнаенняў.

«Экспарт калійных угнаенняў, нафтапрадуктаў з улікам санкцый, пэўных лагістычных цяжкасцяў – зразумела, што той аб’ём, які быў да канца першага квартала, цяпер замарудзіўся. Мы бачым, што мы дзесьці ў грашовым выражэнні недаатрымаем да 1 мільярда рублёў », – адзначае ўрадовец. 

Кіраўнік ведамства запэўнівае: з улікам кошту хлоркалію на сусветным рынку зніжэнне абʼёмаў яго экспарту не аказвае крытычнага ўплыву на бюджэт.

На пачатку ліпеня Міністэрства фінансаў выдаліла са свайго сайту дадзеныя аб выкананні бюджэту ў бягучым годзе і пакуль не паведамляе пра перыядычнасць і форму публікацый справаздачнасці ў перспектыве.

«Частку інфармацыі мы свядома не размяшчаем, таму што яна выкарыстоўваецца ў рамках разнастайнага роду інсінуацый», – тлумачыць Селіверстаў.

На 2022 год бюджэт зацверджаны з дэфіцытам на ўзроўні 2,8 мільярдаў рублёў – гэта 1,6 працэнты прагназаванага валавага ўнутранага прадукту з даходамі ў 28,13 мільярды рублёў і выдатках у 30,94 мільярды рублёў.