Category: Навіны

У прыфрантавой Мікалаеўскай вобласці прагназуюць сабраць удвая меншы ўраджай, чым летась. У Літве за чэрвень гадавы рост кошту харчоў сягне 30%. У Латвію з 24 лютага ўехала амаль 24 тысячы грамадзян Расіі

Навіна ад

Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці

Рух параднёных гарадоў паўстаў падчас Другой сусветнай вайны. Дзеля супрацоўніцтва ў інтарэсах міру і дабрабыту ў 1942 годзе сяброўскія адносіны наладзілі пацярпелыя ад наступстваў вайны Кавэнтры (Вялікая Брытанія) і Сталінград (СССР). У красавіку 1957 года была заснавана Сусветная федэрацыя параднёных гарадоў. Паводле яе статуту мэта руху гарадоў пабрацімаў – развіццё супрацоўніцтва паміж народамі незалежна ад іх расы, мовы, рэлігіі і палітычнай сістэмы. Параднёныя гарады абменьваюцца досведам у эканамічнай, культурнай, гуманітарных сферах, а таксама самакіраванні, чым умацоўваюць давер між грамадзянамі.

Мікалаеў, Украіна

Пабрацімства з Магілёвам замацаванае дамовай у 2009 годзе. 31 мая 2022 году мэр Мікалаева заявіў, што Пагадненне аб пабрацімстве з Магілёвам скасаванае і выказаў спадзеў, што яно будзе адноўленае, калі Беларусь стане свабоднай. Магілёў.media працягне сачыць за жыццём Мікалаева, нягледзячы на спыненне партнёрскіх сувязяў з Магілёвам.

Мікалаеў месціцца за 65 кіламетраў ад Чорнага мора. Да вайны ў ім жыло 490 тысяч чалавек. Траціна з іх вымушана была пакінуць горад. Паводле Генштабу Узброеных сіл Украіны Мікалаеў адзін з асноўных кірункаў наступу расіян. Яго рэгулярна абстрэльваюць, знішчаючы гарадскую інфраструктуру і змушаючы мясцовую ўладу капітуляваць. Прэзідэнт Украіны Уладзімер Зяленскі прысвоіў Мікалаеву ганаровае званне «Горад-герой».

7 шматпавярховых дамоў пашкоджана ракетным абстрэлам Мікалаева 5 ліпеня.

У многіх выбуховай хваляй і абломкамі выбіта больш за 200 вокнаў, у пад’ездах пашкоджаныя ўваходныя дзверы, у  кватэрах людзям давялося зрываць замкі, каб выбрацца з дому, адзначае выданне LB.ua.

21 чалавек пацярпеў 4 ліпеня ў выніку абстрэлу расійскімі войскамі Мікалаеўскай вобласці. 

Сярод іх няма дзяцей, піша выданне «Гордон».

gordonua.com

4 ліпеня ракетным абстрэлам разбураны Палац культуры. 

Абышлося без ахвяраў.

Палац культуры ў Карабельным мікрараёне гораду ўзвялі больш за паўсотню гадоў таму, паведамляе «Миколаївська правда».

static2.gazeta.ua

У Мікалаеўскай вобласці прагназуюць сабраць удвая меншы ўраджай зерневых, чым летась.

У мінулых годзе ў рэгіёне сабралі 3,9 мільёна тон збожжа, сёлета чакаецца больш за два мільёны.

«Асноўная прычына – неспрыяльныя для азімых умовы надворʼя. Збіраем ураджай нават там, дзе лётаюць снарады» – каментуе сітуацыю кіраўнік абласной ваеннай адміністрацыі Віталій Кім.

Па яго словах, «галоўная праблема для фермераў – нізкая цана і рызыкі знішчэння вырашчанага», піша «Корабелов.инфо».

«Буйныя кампаніі не жадаюць тут працаваць і несці страты, – тлумачыць урадовец. – Гэта значыць, няма каму плаціць фермерам і няма куды вывозіць. Ураджай людзі збяруць, а што далей?»

5 ліпеня падчас абстрэлу Мікалаеўскай вобласці выгарэла 4,9 гектараў поля з ячменем, паведаміла выданне «Ноколаевские новости».

Улацлавек, Польшча

Дамова аб сяброўскіх адносінах падпісаная з Магілёвам 8 снежня 1995 года. Горад у Куяўска-Паморскім ваяводстве (цэнтральная Польшча). Насельніцтва – 115 тысяч чалавек.

У Куяўска-Паморскім ваяводстве на прафілактыку алкагалізму і наркаманіі, а таксама рэалізацыю праектаў падтрымкі семʼяў залежных сёлета пойдзе 680 тысяч злотых (150 962 долараў).

Сродкі з бюджэту ваяводства будуць размеркаваныя на конкурснай аснове між няўрадавымі арганізацыямі.

У рамках конкурсу «Развязанне праблемаў, звязаных з алкаголем у Куяўска-Паморскім ваяводстве», фінансаванне выдзялялася на правядзенне розных відаў прафілактычных праграмаў, адукацыйных кампаній, лячэбных заняткаў і адкрыццё спецыялізаваных клінік.

На сайце гарадской управы Улацлавека напісана, што сёлета на розныя мэты размеркавана 7 мільёнаў злотых у 20 конкурсах.

Каменскае, Украіна

Пабрацім Бабруйску ад 2000 году. Горад абласнога падпарадкавання ў Днепрапятроўскай вобласці. Насельніцтва 250 тысяч чалавек. Паселішчы Днепрапятроўшчыны расейцы абстрэльваюць, але разбурэнняў такіх, як у прыфрантавых гарадах няма. Мясцовыя прадпрыемствы працуюць. Да вайны культурны абмен між гарадамі пабрацімамі бабруйскія чыноўнікі лічылі актыўным.

У Каменскім махляры ад імя мэра вымагаюць у прадпрымальнікаў дапамогу нібыта ўзброеным сілам Украіны.

dndz.tv

Кіраўнік гораду Андрэй Белавусаў просіць бізнесоўцаў паведамяць пра махляроў у праваахоўныя органы. Ён заклікае прадпрымальнікаў быць асцярожнымі, бо ў Каменскім дзейнічаюць злачынцы, піша выданне «Информатор».

«У выпадку неабходнасці аказання дапамогі – даводзіць Белавусаў – я асабіста сустракаюся з кіраўнікамі прадпрыемстваў. Будзьце пільныя! Чакаем ад праваахоўных органаў аператыўнага расследавання і спынення злачынных дзеянняў».

У парку Каменскага паставілі тапіярную фігуру быка.

gorod.dp.ua

Арт-абʼект «Бык» падарыла гораду студыя «ОМИ». Аб’ёмная фігура з металакаркасу, пакрытая штучным газонам, падобная на скульптуру быка, які «ахоўвае» выезд з Дняпра ў Каменскае. Той скульптуры больш за сорак гадоў, піша рэсурс Gorod.dp.ua.

Клайпеда, Літва

8 сакавіка 1997 году падпісаная дамова аб аднаўленні пабрацімскіх сувязяў літоўскага гораду з Магілёвам. Месціцца на захадзе краіны і з’яўляецца портам на Балтыйскім моры. Насельніцтва 160 тысяч чалавек.

У Літве за чэрвень гадавы рост кошту прадуктаў харчавання сягне 30%. На столькі ж павялічыцца і кошт кошыка самых танных прадуктаў.

Паводле дадзеных «Еўрастата», у еўразоне гадавы рост на прадукты і безалкагольныя напоі склаў 8,9 працэнтаў. У параўнанні з маем прадукты падаражэлі на 1,1 працэнт.

Эксперт выдання Delfi, прадстаўнік парталу Pricer.lt Пятрас Чапкаўскас кажа, што літоўцы могуць толькі марыць аб такіх паказчыках. Паводле яго гадавога росту ў 30 працэнтаў у Літве даўно не было.

Паводле дадзеных нацыянальнага Дэпартаменту статыстыкі, у студзені гадавы рост коштаў на прадукты і безалкагольныя напоі склаў 11, 8%, у лютым – 14, 7%, а ў сакавіку 17, 1%, у красавіку гэты паказчык перавысіў 20% і склаў 21, 7%, а ў траўні – 24, 8%.

Даўгаўпілс, Латвія

Горад пабрацім Бабруйску. У 2018 годзе ў Даўгаўпілсе жыло 90 399 жыхароў. У ім месціцца консульства Рэспублікі Беларусь. Дзеіць цэнтр беларускай культуры. Знаходзіцца ён у латвійскім рэгіёне Латгале, якая мяжуе з Беларуссю. Даўгаўпілс за 30 кіламетраў ад мяжы. Беларуская назва гораду Дзвінск.

Па ўварванні Расіі ва Украіну ў Латвіі не назіраецца ўзмоцненага перасячэння расійскімі грамадзянамі сухапутных пагранічных пунктаў.

Паводле прэс-сакратар Дзяржаўнай пагранічнай аховы Крысціны Петэрсонэ з 24 лютага па 3 ліпеня ў Латвію ўехалі 23 923 грамадзяніны Расіі, а выехалі 26 446 грамадзян суседняй краіны.

press.lv

Пагранахова выконвае свае абавязкі на знешняй мяжы краіны ва ўзмоцненым рэжыме, у тым ліку ацэньвае рызыкі бяспекі і ажыццяўляе пагранічны кантроль усіх асоб, якія перасякаюць дзяржаўную граніцу, піша выданне Рress. 

Па словах Петэрсонэ, некаторым людзям было адмоўлена ва ўездзе ў Латвію з меркаванняў бяспекі.

галоўнае фота: niknews.mk.ua

Сетка ядальняў KFC распрадае актывы і пакідае расійскі рынак

Навіна ад

Такія намеры агучаныя кампаніяй-уладальніцай сеткі рэстаранаў.

Пра тое паведамляе агенцтва Reuters. Паводле выдання Yum! Brands, амерыканская кампанія, якая працуе ў сферы грамадскага харчавання, абмяркоўвае продаж з мясцовым бізнесоўцам. Па завяршэнні ўгоды KFC сыдзе з расійскага рынку.

KFC – міжнародная сетка рэстаранаў грамадскага харчавання, якая спецыялізуецца на стравах з кураціны. Штаб-кватэры месціцца ў Луісвілле, штат Кентукі. На расійскім рынку працуе з 2005 году.

У сакавіку 2022 году Yum! Brands прыпыніў працу 70 мясцовых рэстаранаў KFC. Такое рашэнне было аргументавана жаданнем уладальніка перанакіраваць увесь прыбытак ад аперацыяў у Расіі на гуманітарныя мэты.

На той момант у Расіі сетка рэстаранаў налічвала больш за 1,1 тысячу ядальняў, у тым ліку 70 уласных.

У сакавіку стала вядома аб закрыцьці ўсіх 850 мясцовых рэстаранаў McDonald’s –  канкурэнта KFC.

фота: liga.net

На Магілёўшчыне за 6 месяцаў 5 дзяцей выпалі з акон

Навіна ад

За паўгода на Магілёўшчыне адбылося 5 няшчасных выпадкаў, звязаных з выпаданнем дзяцей з акон шматпавярховых дамоў.

Следчы камітэт ілюструе сітуацыю двума трагедыямі.

У Быхаве двухгадовае дзіця выпала з пятага паверху і загінула.

У Горках 1 ліпеня двухгадовае малое выпала з вакна першага паверху. Дзіця засталося жывым. Паводле следчых малое засталося без прыгляду, ускараскалася на крэсельца, якое стаяла на балконе і праз неасцярожнасць выпала з яго.

Следчыя заклікаюць бацькоў не пакідаць малалетніх дзяцей без прыгляду, нават на непрацяглы час. Усе вокны ў кватэры павінны быць абсталяваны адмысловымі замыкальнымі прыладамі.

Маскітныя сеткі ствараюць ілюзію зачыненага акна і не здольныя прадухіліць выпадзенне.

Не стаўце мэблю і цацкі поруч вокнаў – з іх дапамогай дзіця можа ўзлезці на падаконнік, заклікаюць сьледчыя.

Дзень у гісторыі. Каранацыя Міндоўга. Нарадзіўся Лучына, першы паэт, чые беларускія творы сталі друкаваць пасля рэпрэсіяў за паўстанне Каліноўскага. Нарадзіўся паэт Глебка, якому будучыня Беларусі ўяўлялася мройлівай і светлай

Навіна ад

6 ліпеня 1253 года – каранацыя Міндоўга.

Першы вялікі князь літоўскі, першы і апошні кароль літоўскі. Карону атрымаў ад Папы рымскага, прыняўшы каталіцкую веру.

Лічыцца, што Міндоўг запачаткаваў беларускую дзяржаву з назвай Літва. Пры ім узрасло палітычнае значэнне Наваградку, які стаў першай сталіцай дзяржавы. Дзякуючы МІндоўгу Літва-Беларусь займела міжнароднае прызнанне і ўлучылася ў еўрапейскі кантэкст.

Міндоўг адзін з першых убачыў перспектыву ў руху на захад, у Еўропу. Праводзіў палітыку аб’яднання беларускіх земляў і пашырэння тэрыторыі гаспадарства, імкнучыся ўзмацніць яго ўплыў на суседнія землі і дамагаючыся выхаду з-пад залежнасці ад галіцка-валынскіх князёў.

Паводле Васкрасенскага летапісу, ён паходзіць з роду полацкіх Ізяславічаў (Рагвалодавічаў).

У Наваградку ёсць гара Міндоўга. Паводле падання ў XIII стагоддзя пад ёй пахаваны заснавальнік Вялікага Княства Літоўскага – Міндоўг.

Паводле іншай версіі, такая назва магла ўзнікнуць ад таго, што на гэтай гары і вакол яе праходзіла ў 1253 годзе каранацыя Міндоўга, які прыняў ад Папы Рымскага Інакенція IV карону і тытул Караля Літвы.

wikimedia.org

6 ліпеня 1851 года нарадзіўся Янка Лучына (Іван Неслухоўскі).

Паэт, перакладчык.

Як беларускі паэт дэбютаваў у друку ў 1889 годзе, калі змясціў у газеце «Минский листок» верш «Вясновай парой», паклаўшы тым самым пачатак вяртанню беларускай літаратуры да друкаванага жыцця, перарванага паражэннем паўстання 1863 года і рэпрэсіямі расійскіх уладаў за яго.

Тэматычна паэзія Янкі Лучыны звязаная пераважна з жыццём беларускай вёскі. Ён па-мастацку асэнсаваў рэчаіснасць, сцвярджаў дэмакратычныя ідэалы.

wikimedia.org

6 ліпеня 1905 года нарадзіўся Пятро Глебка.

Грамадскі дзеяч, навуковец, паэт, драматург, перакладчык.

Друкаваўся з 1925 года. Першы яго зборнік – «Шыпшына» – красамоўны ўзор лірычнай паэзіі, сведчанне яго самабытнага таленту.

Рэчаіснасць бачылася маладому Глебку ў рамантычным святле, а будучыня Беларусі – мройліва і светла.

«Ён самы асвечаны і культурны з усіх сённяшніх жывых беларускіх пісьменнікаў і самы большы абладальнік яснай думкі. Вышэйшая асвета дала яму вялікую карысць. Яго талент узбагачаны думкаю, ясным розумам. Кафедра беларускага ўніверсітэту была ашчасліўлена такім прафесарам», – пісаў Кузьма Чорны пра Пятра Глебку.

wikimedia.org

6 ліпеня 1927 года нарадзіўся Кастусь Харашэвіч.

Мастак-жывапіцец.

Вучыўся ў Маладзечанскай гандлёвай школе падчас 2-й сусветнай вайны. Прымаў удзел у дзейнасці Саюзу беларускай моладзі.Сябра Беларускага саюзу мастакоў і мастацкай суполкі «Пагоня».

Сузаснавальнік студыі выяўленчага і дэкаратыўна-прыкладнога мастацтва ў Маладзечне.

Творчасць мастака-пэйзажыста прадстаўлена больш чым 500 карцінамі, якія адлюстроўваюць знакавыя падзеі ў гісторыі Павілля і ўсёй Беларусі.

Яго творы захоўваюцца ў Беларускай бібліятэцы імя Францыска Скарыны ў Лондане, Нацыянальным мастацкім музеі Беларусі, Музеі сучаснага выяўленчага мастацтва, Мінскім абласным краязнаўчым музеі ў Маладзечне, Скандынаўскім цэнтры ў Менску, а таксама ў прыватных зборах у Польшчы, Нямеччыне, ЗША, Канадзе і Ізраілю.

У 2011 годзе ў філіяле дзяржаўнага літаратурнага музею імя Янкі Купалы ў Яхімаўшчыне адкрылася персанальная галерэя твораў Кастуся Харашэвіча.

Памёр 12 ліпеня 2013 году ў Маладзечне.

molib.by

6 ліпеня 1977 года нарадзіўся Максім Мірны.

Беларускі тэнісіст. Экс-першая ракетка свету ў мужчынскім парным разрадзе, 10-разовы пераможца турніраў Вялікага шлема, Алімпійскі чэмпіён Летніх Алімпійскіх гульняў 2012 г. у парным разрадзе разам з Вікторыяй Азаранкай.

Максім Мірны – рэкардсменам па колькасці матчаў, згуляных у Кубку Дэвіса. У 2003 годзе, дзякуючы яго перамогам, зборная Беларусі трапіла ў Сусветную – найвышэйшую – групу ў Кубку Дэвіса.

wikimedia.org

6 ліпеня 1989 года адроджана Полацкая праваслаўная епархія, найстаражытнейшая ў Беларусі.

Полацкая епархія вядзе сваю гісторыю ад канца Х – пачатку XI стагоддзяў, калі тут была заснавана першая ў Беларусі епіскапская кафедра.

У X–XIII стагоддзі ў яе склад уваходзіла тэрыторыя з гарадамі Віцебск, Мінск, Ізяслаў, Лагойск, Слуцк, Друцк, Наваградак, Ворша, Лукомль.

З 1391 года кафедра атрымала статус архіепархіі.

Цяпер епархіі ўключае тэрыторыі Браслаўскага, Верхнядзвінскага, Глыбоцкага, Докшыцкага, Мёрскага, Полацкага, Пастаўскага, Расонскага, Ушацкага, Шаркаўшчынскага раёнаў.

Кафедральныя саборы – Багаяўленскі (Полацк), Сабор Раства Прасвятой Багародзіцы (Глыбокае).

gorod214.by

 

У публікацыі выкарыстаныя звесткі з рэсурсу «Вікіпедыя» і іншых адкрытых у інтэрнэце крыніцаў

 

Яўрэйскае агенцтва, якое займаецца пытаннямі рэпатрыяцыі, спрабуе абараніць сваю дзейнасць у Расіі

Навіна ад

Улады Расіі запатрабавалі ад Яўрэйскага агенцтва для Ізраілю «Сохнут» спыніць дзейнасць на тэрыторыі краіны. Пагрозы прагучалі на фоне напружання адносінаў між Расіяй і Ізраілем, выкліканага вайной ва Ўкраіне.

Паводле выдання The Jerusalem Post у агенцтве прызнаюць, што ліст з такімі патрабаваннямі атрымалі на пачатку тыдня. І цяпер працуюць над адказам, узгадняючы яго з уладамі Ізраілю.

Яўрэйскае агенцтва для Ізраілю – міжнародная арганізацыя, асноўнай задачай якой з’яўляецца дапамога ў рэпатрыяцыі яўрэяў з усяго свету ў Ізраіль. Таксама яно займаецца пытаннямі, звязанымі з глабальнай яўрэйскай супольнасцю.

«Мы павінны захаваць маштаб іх дзейнасці, як гэта было цягам апошніх многіх гадоў. Я звярнулася да прэм’ер-міністра з заклікам працаваць з адміністрацыяй Масквы над рашэннем праблемы», – каментуе сітуацыю міністр у пытаннях рэпатрыяцыі і інтэграцыі Пніна Тамена-Шэтэ.

The Jerusalem Post піша, што члены яўрэйскай абшчыны ў Расіі апасаюцца сваё жыццё.

Калі працу Сохнута забароняць у Расіі, гэта будзе першы выпадак за апошнія 30 гадоў, калі ў краіне забаронена дзейнасць па рэпатрыяцыі.

фота: pravda.com

У Зімбабвэ жыхары на закупы пойдуць з золатам

Навіна ад

У гэтай афрыканскай краіне вялізная інфляцыя. Гадавы яе памер сягае 192 працэнтаў. Улады наважыліся ўвесьці ў абарачэнне залатыя манеты.

Паводле рэсурсу Myfin, Цэнтрабанк краіны пачне прадаваць манеты з 25 ліпеня. Кожная будзе ўтрымліваць унцыю золата (31,1 грама).

Манеты стануць сродкам ашчаджання, то бок ліквідным актывам, які захоўваецца працяглы час без страты сваёй пакупной здольнасці да наступнага абмену на тавары, паслугі або іншыя актывы.

Паўднёваафрыканскай краінай Зімбабвэ 30 гадоў кіраваў Роберт Мугабэ, які здабыў сабе рэпутацыю дыктатара.

У 1980 годзе, калі краіна стала незалежнай, ён стаў прэм’ер-міністрам, а потым і прэзыдэнтам. Мугабэ абяцаў дэмакратыю і прымірэнне, а яго праўленне абярнулася вялізнай карупцыяй і эканамічнай катастрофай.

У лістападзе 2017 года ў выніку вайсковага перавароту Мугабэ адхілілі ад улады і арыштавалі. Пад ціскам войска ён быў змушаны падаць у адстаўку.

фота: plusworld.ru

Беларускім майстрам настольнага тэнісу забаранілі ўдзельнічаць у еўрапейскіх камандных спаборніцтвах

Навіна ад

Еўрапейскі саюз настольнага тэніса пастанавіў не запрашаць да ўдзелу ў еўрапейскіх клубных спаборніцтвах беларускіх спартоўцаў. Забарона тычыцца сезону 2022-2023 гадоў. Тое тычыцца і расійскіх тэнісістаў.

Рашэнне аргументавана неабходнасцю гарантаваць бяспеку ўдзельнікам і захаваць цэласнасць еўрапейскіх клубных спаборніцтваў, гаворыцца на сайце Саюзу.

У публікацыі адзначаецца, што паводле праведзенага апытання, большасць еўрапейскіх клубаў не хоча спаборнічаць у Беларусі і Расіі. А вялікая колькасць не жадае ўдзельнічаць у спаборніцтвах наступнага сезону разам з спартоўцамі гэтых краін.

фота з адкрытых крыніц

У прыгарадзе Магілёва будаўнікі пашкодзілі газавую трубу. Дзясяткі дамоў засталіся без газу

Навіна ад

Зранку прыпынена падача газу ў мікрараён шматпавярховых дамоў аграгарадка Палыкавічы. Цяпер ідуць аварыйныя работы.

Прычына аварыі: будаўнікі, якія пракладалі каналізацыйныя сеткі. У выніку пашкоджана магістральная труба. Аварыйная служба часова нават перакрывала дарогу да аграгарадка.

Газ адключаны ў 8 пяціпавярхоўках і некалькіх дзясятках катэджаў на вуліцах Сяргеева, Завадская, Прыгарадная і Першамайская.

«Адно будуюць, другое ламаюць, – пракаментуе здарэнне мясцовы жыхар. – Снайперы! Яны ж яшчэ ні разу не прамазалі. Кожным разам штосьці парвуць: не тэлефон так газавую трубу. У мяне ў машыне газавы балон і плітка, неяк перазімую».

Больш песімістычна настроена была бабуля: «Газу няма. Я пайшла за запалкамі ў ХІТ. А цяпер думаю, нашто мне яны, калі газу ж няма. І калі ж яго дадуць? Мне ж унука і дзеда карміць трэба!»

Газ абяцаюць уключыць пад вечар. Але трэба праверыць паветраныя пробкі. Апытаць жыхароў, ці няма ўцечкі.

Веры ў абяцанне газаўшчыкоў у тутэйшых няма. Так, саркастычна ацаніла сітуацыю яшчэ адна суразмоўніца: «Кажаце ўвечары будзе газ. А ўвечары гэтага месяца ці наступнага? Штосьці я сумняваюся. Рабочыя больш цыгарэты паляць чым працуюць. Вунь паглядзіце».

Сапраўды, работы ідуць няспешна, але ж ідуць.

 

На Магілёўшчыне мядзведзь выйшаў на дарогу

Навіна ад

Гэта адбылося ў Круглянскім раёне. 

Відэаролік з жывёлай запісаў аўтамабіліст на ўчастку дарогі паміж вёскамі Шапялевічы і Падар. Цяпер відэа разыходзіцца па сацыяльных сетках.

Як бачна на відэа, малады мядзведзь перасякае дарогу і, заўважыўшы аўтамабіль, хаваецца ў лесе. 

Мядзведзі на Магілёўшчыне не рэдкасць. Самая буйная іх папуляцыя жыве ў межах і навокал Бярэзінскага біясфернага запаведніка. Мясціна размяшчаецца на мяжы Віцебскай і Мінскай абласцей. 

З гэтай лакацыі мясцовыя мядзведзі часта разыходзяцца па лясах Кругляншчыны, Клічаўшчыны, Бялыніччыны.

Усяго на Беларусі пастаянна жыве менш за 100 мядзведзяў. Прычым колькасць папуляцыі мяняецца мала – каля 100 асобін мядзведзяў рэгістравалася ў БССР у 1927 годзе, у 1989-ым годзе – 107 па ўсёй краіне за выключэннем Бярэзінскага запаведніка (у ім – яшчэ каля 20). 

На сённяшні час дадзеныя пра папуляцыю мядзведзяў у Беларусі розняцца. Так, Нацыянальны статыстычны камітэт рэгістраваў у 2019 годзе ўсяго 19 мядзведзяў на ўсю Беларусь, у той час як біёлагі Бярэзінскага запаведніка налічвалі ў гэты ж самы час 84 асобіны на тэрыторыі аднаго толькі запаведніка і ў прылеглых мясцінах.

МУС заявіў пра выкрыццё 80 педафілаў

Навіна ад

Паводле Міністэрства ўнутраных спраў комплексны падыход у супрацьдзеянні педафіліі дазволіў выявіць 131 злачынства супраць палавой недатыкальнасці непаўналетніх і выкрыць 80 педафілаў.

Паведамленне ў тэлеграм-канале ведамства аб выніках такой працы праілюстраваныя гісторыяй сексуальнага гвалту ў Гродненскай вобласці.

Ахвярай педафіла, як адзначаецца, стала 10-гадовая дзяўчынка. На змену яе паводзінаў звярнулі ўвагу педагогі і паінфармавалі міліцыю. Падазраваны быў затрыманы і супраць яго ўзбуджана крымінальная справа.

Падкрэсліваецца, што выяўленне гэтага факту стала магчымым, дзякуючы «комплексу мерапрыемстваў па супрацьдзеянні злачынствам, звязаным з сексуальным гвалтам у адносінах дзяцей”.

Раней міліцыя паведамляла, што за першыя чатыры месяцы ў Беларусі выяўлена 390 злачынстваў супраць палавой недатыкальнасці, альбо свабоды непаўналетніх. Падазраванымі прызнаныя 214 чалавек.

Ад іх дзеянняў пацярпелі 358 дзяцей. На аднаго педафіла практычна прыходзіцца па дзве ахвяры, указвалі міліцыянты.

фота носіць ілюстрацыйны характар