Tag: цумарев

Бабруйск пазнаёміўся з новым мэрам, але нібыта і не прыдаў значэння змене старшыні гарвыканкама

Навіна ад

Дэпутатам пазачарговай сесіі Бабруйскага гарадскога Савета прадставілі новага галаву гарадской вертыкалі Ігара Кісяля. Але мясцовыя медыа, у адрозненні ад магілёўскіх, дзе таксама змянілася кіраўніцтва горада, не надалі надта ўвагі гэтай падзеі.

У Магілёве ўсе значныя рэсурсы напісалі пра сыход Уладзіміра Цумарава, аналізавалі ягоную спадчыну, падкрэслілі добрае і згадалі праблемнае. Пісалі пра дасягненні, пра характар былога мэра, збольшага жадалі яму поспехаў і дзякавалі. Пісалі пра Цумарава і Магілёў.media.

Змена гарадскога галавы павінна была ўзрушыць бабруйскія медыа і паблікі, але на сыход Аляксандра Студнева з Бабруйска і прыход Ігара Кісяля яны амаль не адрэагавалі, абмежаваўшыся афіцыйнымі паведамленнямі. Няўжо былога кіраўніка няма за што падзякаваць, а ад новага нічога добрага не чакаюць?

З чаго такая стрыманая рэакцыя на сыход Студнева была ў Бабруйску? 

Прагляд бабруйскіх сацыяльных груп і медыя здзіўляе няўвагай на інфармацыю пра сыход спадара Аляксандра Студнева. “Быў, і быў” – нібыта чытаецца паміж радкоў. 

Але ж былы мэр так настойліва імкнуўся піарыць сваю дзейнасць, што пра гэта хадзілі ў горадзе анекдоты. Адкрыццё самага нязначнага аб’екта не абыходзілася без яго прамовы. На любым культурным мерапрыемстве ён з сям’ёй быў наперадзе. Яго прамова была абавязкова першай што на гарадскім свяце выпускнікоў, што на адкрыцці навагодняй ёлкі. І вось ён сышоў, а горад у адказ нічога не сказаў. 

Пытанні, пытанні. Чаму бабруйчане аказаліся такімі няўдзячнымі? Ці наадварот яны ўспрымалі Студнева, як чужака, які спрабуе лезці навыперадкі і таму не прынялі ў лік сваіх? Адназначнага адказу як заўжды няма. Колькі людзей – столькі і думак. 

Праўда, падчас сесіі старшыня аблвыканкаама Анатоль Ісачэнка выказаў падзяку былому старшыні Бабруйскага гарвыканкама, і сцісла адзначыў, што ён «імкнуўся рабіць горад лепшым, і шмат у чым яму гэта ўдалося». Яшчэ Аляксандра Віктаравіча ўзнагародзілі Ганаровай граматай Бабруйскага гарадскога Савета дэпутатаў і пажадалі поспехаў на новай пасадзе старшыні Магілёўскага гарвыканкама. Дэпутаты нібыта сказалі: “Язджай ты, дзядзька, да сябе дамоў”. 

Новы старшыня Бабруйскага гарвыканкама Ігар Кісель.

Сесія гарадскога Савета дэпутатаў адзінагалосна зацвердзіла на пасадзе старшыні Бабруйскага гарадскога выканаўчага камітэта Ігара Мікалаевіча Кіселя. Ён нарадзіўся ў 1974 годзе ў вёсцы Лабанаўка Чэрыкаўскага раёна Магілёўскай вобласці. У 1996 годзе скончыў Беларускую дзяржаўную політэхнічную акадэмію па спецыяльнасці “Прамысловае і грамадзянскае будаўніцтва”, у 2012 годзе – Акадэмію кіравання пры Прэзідэнце Рэспублікі Беларусь па спецыяльнасці “Дзяржаўнае і мясцовае кіраванне”. Ігар Мікалаевіч мае досвед працы ў органах дзяржаўнага кіравання, працаваў першым намеснікам старшыні Бабруйскага гарвыканкама, што важна.

На сесіі адзначалася ягоная кампетэтнасць, любоў да горада і жаданне працаваць.

Пажадалі яму ўкладваць грошы ў дарогі, ахову здароўя, адукацыю, у стварэнне новых вытворчасцей і пашырэнне дзеючых, у мадэрнізацыю. 

“Тыя задачы, якія пастаўлены ўрадам краіны і кіраўніцтвам Магілёўскай вобласці, Бабруйск выканае. – заверыў Ігар Кісель – Планы па развіцці горада ёсць, яны будуць увасабляцца ў рэалізацыю. У Бабруйску ўжо шмат зроблена, але шмат яшчэ трэба зрабіць”.

Пажадаем і мы Ігару Кіселю плёну ў працы і таго, каб у час, калі ён будзе сыходзіць з пасады мэра, бабруйчанам было за што яго падзякаваць. 

фота: БелТа

«Няма спецыялістаў». Магілёўскія чыноўнікі дазналіся, што дамы гараджанаў з дзіравымі дахамі

Навіна ад

І такіх дамоў па горадзе не адна сотня, але ў камунальных арганізацыяў бракуе спецыялістаў, здольных рамантаваць дахі.

Сёлета ва Ўпраўленне камунальных прадпрыемстваў Магілёва паступіла 330 зваротаў з пытаннямі рамонту дахаў у жылых шматкватэрных дамах. У гарвыканкаме абяцаюць улучыць праблемныя шматпавярхоўкі ў графік рамонту і перагледзець фінансаванне.

«Ёсць рэзерв сродкаў, якія могуць быць накіраваны на рамонт дахавых пакрыццяў», – заяўляе намеснік старшыні гарвыканкаму Андрэй Кіблоў.

Тым часам, у камунальных прадпрыемствах наракаюць, што ў іх праблемы са спецыялістамі, здольнымі выконваць дахавыя працы. Паводле камунальнікаў гэта «дастаткова працаёмкі працэс, які патрабуе пэўных кампетэнцыяў», піша Белта. 

Пра тое, што гараджане абураныя дзіравымі дахамі і адсутнасцю іх рамонту паведаміў старшыня гарадской адміністрацыі Ўладзімір Цумараў. Па яго словах, падобныя скаргі ён чуў ад людзей і падчас «прамой тэлефоннай лініі».

«Большая частка такіх зваротаў паступіла падчас ліўневых дажджоў, якія прыпалі на чэрвень», – даводзіў падначаленым чыноўнік.

Каб пазбегнуць масавай незадаволенасці праблемай у будучыні, ён патрабуе, пакуль пагода, «нарасціць працу па рамонце дахаў» .

«Нельга расцягваць тэрміны, потым пойдуць дажджы – і зноў будзе шквал зваротаў”, – засцерагае Цумараў падначаленых і патрабуе звароты па дахах «закрыць».

«Трэба прымаць рашэнне». Кіраўнік Магілёўскага гарвыканкаму паабяцаў разабрацца з «начнікамі»

Навіна ад

На працу начных крамаў і «пастаянны шум ад кампаній у той час, калі нармальныя людзі павінны бачыць сны», паскардзілася Ўладзіміру Цумараву жыхарка абласнога цэнтру. Газета магілёўскага гарвыканкаму «Веснік Магілёва» назвала праблему «больш глабальнай», чым барацьба з прусакамі ў адным з дамоў аддаленага мікрараёну.

Кіраўнік гарадской вертыкалі на скаргу гараджанкі на «начнікі» адрэагаваў, што ведае, хто ходзіць у крамы ў начны час.

«Гуляе моладзевая кампанія, весяліцца, жадае працягваць. Ну, не малако і хлеб яны ў гэтых крамах купляюць. Шумяць, ствараюць праблемы для жыхароў суседніх дамоў. Лічу, даўно трэба прымаць рашэнне, што начнога гандлю менавіта ў магазінах не можа быць. Для гэтага ёсць прадпрыемствы грамадскага харчавання. Трэба наводзіць парадак з начным гандлем», – выказаўся чыноўнік, якога цытуе «Веснік Магілёва».

Як будзе вырашацца праблема «з начным гандлем», пакуль невядома. Выданне гарвыканкаму разам з тым у назве публікацыі аб гутарцы Цумарава з насельніцтвам па тэлефоне, перспектыву “начнікоў” абазначыла канкрэтна: «Начны гандаль у крамах трэба спыняць».

фота: novychas.online

У Магілёве паставілі помнік святару Каніскаму. Улада не раіліся з гараджанамі, ці патрэбны манумент неадназначнаму персанажу беларускай гісторыі

Навіна ад

У адкрыцці помніка ўдзельнічалі асобы апранутыя ў казацкае. На чорных майках было напісана, што яны нібыта прадстаўнікі «беларускага казацтва».

Помнік Каніскаму паставілі на глядзельнай пляцоўцы побач з лесвіцай, якая вядзе ў Падмікольскі парк. На адкрыцьцё прыйшлі кіраўнікі гораду і аблвыканкаму. Мітрапаліт Мінскі і Заслаўскі Веніямін ўзнагародзіў Уладзімера Цумарава і Анатолія Ісачанку мэдалямі “святителя Георгия Конисского”. 

На адкрыцьцё помніка сабралася вялікая грамада людзей, якія называлі сябе праваслаўнымі. Па іх словах Каніскі вялікі дзеяч і святы. Некаторыя адзначалі, што ён  “абараніў Белую Русь ад каталікоў”.

Урачыстасць праходзіла побач з плошчай Арджанікідзэ. Яе ў 2016 годзе ўлады з ініцыятывы праваслаўных актывістаў хацелі пераназваць у гонар Каніскага. Тады было абвешчана грамадскае абмеркаванне, якое разгарнула палеміку ў беларускім інтэрнэце. Яно і выявіла неадназначнае стаўленне да святара, як гістарычнай асобы.

На епіскапскае служэнне ў Беларусь Каніскага запрасілі з Украіны ў 1755 годзе. Магілёўскай епархіяй ён кіраваў на зломе эпохаў у другой палове 18 стагоддзя. Падзеі таго часу прывялі да знікнення з палітычнай карты Еўропы Рэчы Паспалітай.

Па ўмацаванні на беларускіх землях расійскай улады, з ініцыятывы Каніскага прымусова пачалі навяртаць у праваслаўе ўніятаў, каталікоў ды пратэстантаў. Методыку, апрабаваную на Магілёўшчыне і Мсціслаўшчыне, пазней пашырылі на ўсю Беларусь.

Паводле ўкраінскага гісторыка Яраслава Фошчана, Георгій Каніскі, трапіўшы ў Беларусь, аказаўся закладнікам часу і ўмоваў, у якіх яму давялося дзеіць. Ён прасіўся, каб яго адправілі з архіепіскапскага служэння ў Рэчы Паспалітай ва ўкраінскі манастыр. Навуковец прызнае, што цяпер у гістарыяграфіі стаўленне да дзейнасці Каніскага палярныя.

У 1992 годзе вал «Красной звезды» пераназвалі у архірэйскі вал Каніскага. Тады гэта не выклікала ў грамадстве напружання і расцэньвалася як аднаўленне гістарычнай праўды.

6 жніўня 1993 году архіепіскап Георгій Каніскі быў далучаны да ліку мясцовых святых. Ягоны вобраз намаляваны на некалькіх праваслаўных святынях Магілёва. На Архірэйскім вале стаіць крыж у яго памяць, а на будынку былога архірэйскага палацу ўсталяваная шыльда са звесткамі пра яго жыццё.

Цяперашняя ўлада Каніскага ставіць у адзін шэраг з Еўфрасінняй Полацкай і іншымі прызнанымі беларускімі дзеячамі і асветнікамі.

Сама ж Беларусь успрымаецца ў свеце, як саўдзельніца вайны, распачатай Расіяй супраць Украіны. Адбылося гвалтоўнае здушэнне грамадскага пратэсту 2020 году. А, канчатковае рашэнне аб помніку Каніскаму было прынята ў 2021-ым. Грамадскага абмеркавання, як у выпадку пераназваннем плошчы, не абвяшчалася. Летась на месцы, дзе паставілі помнік Каніскаму, паклалі капсулу з пасланнем нашчадкам.

 

Афіцыйны Дзень гораду праігнаравалі еўрапейскія гарады-пабрацімы Магілёва. Акрамя нямецкага Вітэнбергу

Навіна ад

Украінскі Мікалаеў скасаваў дамову аб пабрацімстве з Магілёвам праз падтрымку Беларусі расійскай агрэсіі ва Ўкраіне. Аб спыненні партнёрскіх сувязяў з Магілёвам паведамляла літоўская Клайпеда. Там збіраюцца пераназваць вуліцу Магілёўскую.

У кампаніі з расійскімі гарадамі нямецкі Вітэнбэрг 

Раней на ўрачыстасці да Дня гораду мясцовыя ўлады запрашалі прадстаўнікоў усіх магілёўскіх пабрацімаў. На будынку гарвыканкаму вывешваліся дзяржаўныя сцягі краін, у якіх былі параднёныя гарады.

Паводле газеты «Веснік Магілёва», на сёлетнім Дні народзінаў Магілёва сабралася вялікая кампанія прадстаўнікоў расійскіх гарадоў пабрацімаў і партнёраў. Была дэлегацыя з таджыкскай Худжанды. Сярод іх апынуліся прадстаўнікі нямецкага Вітэнбергу.

З ім пабрацімства было замацаванае дамовай у 2019 годзе. Вітэнбэрг стаў тады 20 параднёным горадам Магілёва.

Кітайская Чанша, расійскія Уладзівасток, Хабараўск, Омск – новыя пабрацімы Магілёва

За апошнія два гады партнёрскімі гарадамі Магілёва сталі кітайская Чанша ды расійскія Ўладзівасток з Хабараўскам, а ў межах святкавання сёлетняга Дня гораду і афіцыйнага Дня незалежнасці была падпісаная дамова аб пабрацімскіх сувязяў яшчэ і з Омскам.

На падпісанні старшыня гарвыканкаму Ўладзімер Цумараў заявіў, што Магілёў падтрымлівае гандлёвыя сувязі з 105 краінамі, а прадукцыю пастаўляе ў 82 краіны. Па ягоных словах больш 65 працэнтаў агульнага аб’ёму знешняга гандлю прыпадае на Расію. На гэтую акалічнасць чыноўнік асабліва зрабіў акцэнт.

фота: mogilev.online

Кіраўніка магілёўскай вертыкалі не задаволіла, як гараджане займаюцца фізкультурай. На дапамогу пазавуць інструктараў

Навіна ад

У працоўным калектыве больш за 1 тысячу чалавек з’явіцца інструктар па фізічнай культуры і спорту.

Старшыня Магілёўскага гарвыканкаму Уладзімер Цумараў даручыў увесці ў штат прадпрыемства адпаведную стаўку. Памер заробку для такога супрацоўніка застаецца невядомым.

Цумараў лічыць, што праводжанай у горадзе фізкультурна-аздараўленчай і спартова-масавай працы не дастаткова. Яго не задавальняе, што фізкультурай і спортам займаецца толькі крыху больш за чвэрць насельніцтва і толькі ў 14 арганізацыях ёсць інструктары па фізічнай культуры і спорту.

Як вынікае з публікацыі на сайце газеты «Веснік Магілёва» кіраўніка мясцовай уладнай вертыкалі не столькі клапоціць здароўе гараджан, колькі не загружанасць спартовых аб’ектаў.

«У нас у горадзе ўнікальная спартовая база, трэба выкарыстоўваць усе яе рэсурсы, – арыентуе ён падначаленых. – А з прадпрыемствамі трэба шчыльней працаваць, максімальна прыцягваць людзей да актыўнага ладу жыцця».

Чыноўнік даў распараджэнне ўвесці ў статны расклад стаўку інструктара па фізічнай культуры і спорту ўва ўсе працоўныя калектывы з колькасцю працаўнікоў больш за 1 тысячу.

На яго погляд інструктары далучыць працоўныя калектывы да фізкультуры і спорту.

 

«Удаецца супрацьстаяць». Старшыня Магілёўскага гарвыканкаму Цумараў пра санкцыі

Навіна ад

Уладзімер Цумараў прапануе свой шлях у пераадоленні наступстваў «санкцыйнага ціску».

Ён лічыць, што «санкцыі стымулююць да развіцця, нейтралізуючы ў некаторых сектарах эканомікі высокую канкурэнцыю і тым самым дазваляюць айчынным прадпрыемствам пашыраць межы дзейнасці».

Па ягоных словах галоўныя задачы пры санкцыйным ціску – «пераарыентацыя экспарту, імпартазамяшчэнне, падтрыманне стабільнасці на рынку працы, зніжэнне адміністрацыйнай нагрузкі, цэнаўтварэнне», падае меркаванне службоўцы газета «Веснік Магілёва».

У інтэрв’ю выданню ён кажа, што імпартазамяшчэнне патрабуе ад дзяржавы і бізнесу мабілізацыі рэсурсаў і пошуку нестандартных рашэнняў. Ён прызнаецца, што акцэнт робіцца на развіцці кааператыўных сувязяў з Расіяй.

Сярод краінаў партнёраў Цумараў называе Кітай, Індыю, Іран, Аб’яднаныя Арабскія Эміраты, Казахстан, Узбекістан, Таджыкістан. З імі выбудоўваюцца новыя транспартна-лагістычныя ланцужкі, адзначае ён.

«На мой погляд, нам удаецца супрацьстаяць санкцыйнаму ціску, – настойвае Уладзімер Цумараў. – Прадпрыемствы гораду працуюць, адгружаюць прадукцыю на экспарт, выконваюць сацыяльныя абавязкі. У крамах не прадбачыцца пустых паліц».