Category: Навіны Крычава

Вось як выглядае ўчастак дарогі каля дзіцячай паліклінікі ў Крычаве

Навіна ад

Участак дарогі на мікрараёне Камсамольскім у Крычаве пагражае падвескам аўто крычаўлян сваімі ямамі і выбоінамі. 

Раней mogilev.media ужо звярталі ўвагу чытачоў на кепскі стан дарог у розных частках Крычава. Аднак тое было ранняй вясной і сітуацыя павінна была ўжо даўно змяніцца. Але з таго часу, як паказвае практыка, мало што зрушылася ў лепшы бок. 

Яскравым прыкладам з’яўляецца ўчастак дарогі на шляху да дзіцячай паліклінікі – каля дома № 13 па вуліцы Мікрараён Камсамольскі. Па шырыні ўсяго асфальтавага палатна знаходзіцца шырокая выбоіна з ямкамі. Раніцай у гэтым месцы часта можна ўбачыць сітуацыю, калі вадзіцелі сустрэчных напрамкаў руху прапускаюць адзін аднаго, каб кожны мог пераадолець гэты ўчастак з мінімальнымі наступствамі для падвескі ўласнага аўто – паведамляе раённая газета “Крычаўскае жыццё”.  

Што цікава, гэты ўчастак дарогі бачаць мясцовыя камунальшчыкі, калі прыязджаюць, каб вывезці смецце, аднак не прадпрымаюць ніякіх дзеянняў па ўладкаванню асфальтнага пакрыцця.

Фота: “Крычаўскае жыццё”

У Крычаве згарэў гараж разам з машынай, пашкоджаны дом

Навіна ад

Пажар адбыўся на завулку Камарова ў старой частцы горада.

Па прыбыцці на месца здарэння ратавальнікаў, ішло гарэнне ўнутры і даху драўлянага гаража, стварылася шчыльнае задымленне.

У выніку пажару была знішчана палова гаража і аўтамабіль, які знаходзіўся ў ім. Другая пашкоджаная палова гаража не падлягае аднаўленню. Акрамя таго, пашкоджана аздабленне дома, што знаходзіўся побач з гаражом. На шчасце, пацярпелых няма. – паведамляе раённая газета “Крычаўскае жыццё”.

Меркаваная прычына пажару – неасцярожнае абыходжанне з агнём пры правядзенні агнявых работ.

Фота: “Крычаўскае жыццё”

Агароджа здоўж возера Маладзёжнага ў Крычаве аказалася небяспечнай

Навіна ад

Крычаўляне неаднаразова звярталі ўвагу на небяспечную і неналежную бакавую агароджу ўздоўж возера Маладзёжнае, асабліва на скрыжаванні вуліц Пугачова і Маладзёжнай. Справа ў тым, што агароджа досыць кволая і не зможа стрымаць аўтамабіль, які, не разлічыўшы, будзе ехаць на вялікай хуткасці. У такой сітуацыі ён патрапіць наўпрост у вадаём.

У сувязі з гэтым крычаўская аўтаінспекцыя на ўчастку дарогі каля былога кар’ера правяла праверку бакавой агароджы і высветліла, што яна не адпавядае тэхнічным патрабаванням арганізацыі дарожнага руху. Пытанне пра небяспечную бакавую агароджу на ўчастку дарогі ўздоўж возера Маладзёжнага на працягу года будзе вынесена на абмеркаванне ў раённай камісіі па бяспецы дарожнага руху, для прыняцця рашэння па ўсталяванню надзейнай бар’ернай агароджы згодна з ўсімі тэхнічнымі патрабаваннямі – паведамляе раённая газета “Крычаўскае жыццё”. 

Возера Маладзёжнае – былы кар’ер, які распрацоўвалі для патрэб мясцовага цэмзавода, а яго глыбыня сягае больш за 30 метраў.  

Фота: “Крычаўскае жыццё” і з адкрытых крыніц

Каля праблемнага доўгабуда ў Крычаве з’явіўся яшчэ і стыхійны сметнік

Навіна ад

Пра будаўніцтва новага чытарохпавярховіка з кучай парушэнняў тэхнікі бяспекі і правілаў аховы працы нядаўна пісалі mogilev.media. Працягам гэтай гісторыі стала стыхійная звалка побач, на якой валяецца будаўнічае смецце. Усё гэта ў двух-трох дзясятках метраў ад будаўнічай пляцоўкі будучага жылога дома №38, на месцы зліцця завулка Выганскі з часткай мікрараёна Камсамольскі.

Горкі пяску з’явіліся тут у выніку расчысткі пляцоўкі для будаўніцтва чатырохпавярховіка яшчэ год таму, але да гэтага часу яны так і не былі прыбраны. Больш за тое, з нядаўняга часу там з’явіўся стыхійны сметнік, куды жыхары вакольных дамоў пачалі скідваць розныя бытавыя адыходы і галлё. 

І гэты пры тым, што побач знаходзяцца шэраг кантэйнераў для смецця. Вось так неахайнае будаўніцтва стварыла дурны прыклад і прэцэдэнт для засмечвання прасторы мікрараёна. 

Пры гэтым горкі з пяску зусім неагароджаны і на іх часта ўзбіраюцца дзеці, што можа ўяўляць небяспеку для іх здароўя і жыцця – яшчэ восенню мінулага года пісалі mogilev.media. 

Фота: mogilev.media

У Крычаўскім раёне за мінулы год не было зроблена ніводнага хірургічнага аборту

Навіна ад

Па словах загадчыцы жаночай кансультацыі крычаўскай раённай бальніцы Марыі Патапенка хірургічных абортаў за мінулы год у Крычаўскім раёне не рабілі ніводнага. Былі толькі медыцынскія, так званыя вакуумы – малатраўматычная медыцынская маніпуляцыя па перапыненні цяжарнасці, якая робіцца на самых ранніх тэрмінах развіцця плода – паведамляе раённая газета “Крычаўскае жыццё”. 

Як адзначае Патапенка, перапыненне або захаванне цяжарнасці – гэта рашэнне сям’і, рашэнне самой мамы. Нават калі лекары ведаюць, што ёсць паталогія, калі генетыкі раяць перапыніць цяжарнасць, выбар застаецца за сям’ёй. 

Адсутнасць хірургічных абортаў за год у цэлым раёне – сведанне, што вырасла адказнасць у сферы інтымных адносін.

Фота ілюстрацыйнае

Ніводнай кнігарні ў горадзе – крычыўская рэальнасць

Навіна ад

Жыхары Крычава хацелі б мець кнігарню ў горадзе, але мясцовая ўлада так і не можа вырашыць праблему. 

У рэдакцыю мясцовай раённая газеты звяртаюцца жыхары горада з пытаннем пра адсутнасць кніжнай крамы ў Крычаве. Адзін з жыхароў наогул звярнуў увагу на прысутнасць «Табакерак» на кожным куце і пры гэтым недаступнасць часопісаў, газет і кніг для крычаўлянаў.  

Кіраўнік раёна неаднаразова падкрэсліваў неабходнасць заняць гэту нішу, здаўшы ў арэнду будынак “Магілёўсаюздруку” дастойнаму прадстаўніку, які зойме сегмент прэсы і канцэлярыі ў раёне, але, на жаль, работа ў гэтым накірунку пакуль ідзе павольна, і будынак толькі набывае неахайны выгляд – канстатуе раёнка “Крычаўскае жыццё”. 

Пра закрыццё адзінай кнігарні ў Крычаве mogilev.media пісалі яшчэ ў лютым і адзначалі, што на сённяшні дзень будынак былой крамы проста пустуе. А вось пра масавае з’яўленне “Табакерак” на фоне закрыцця шапікаў “Магілёўсаюздруку” mogilev.media паведамлялі яшчэ ў кастрычніку мінулага года.   

Фота: “Крычаўскае жыццё”

У Крычаве ўжо год ніяк не дабудуюць чатырохпавярховік, яшчэ і парушаюць правілы бяспекі

Навіна ад

Агароджы небяспечных зон адсутнічаюць, горкі з пяску і смецця на будоўлі ствараюць непрыгожы выгляд і небяспеку для дзяцей, а будаўнічы вагончык “1000 дробязей” смяшыць навакольных жыхароў. 

Восенню мінулага года mogilev.media ужо пісалі пра пабудову новага шматкватэрнага дома ў раёне пяціпавярховікаў № 8,9,30,34 па вул. Мікрараён Камсамольскі, які пачалі будаваць на месцы зручных дарожак, дзіцячай пляцоўкі і зялёнай прасторы паміж дамамі, што прынесла нязручнасці для мясцовых жыхароў. 

З пачатку будаўніцтва дома №38 прайшоў ужо цэлы год, але заканчэнне і не бачна. Асноўны корпус дома ўжо пабудавалі, аднак яшчэ шмат працы давядзецца рабіць па знешняй і ўнутранай апрацоўцы пабудовы. 

Між іншым, падчас маніторынгу аховы працы на розных будаўнічых аб’ектах менавіта на будаўніцтве дома №38 былі зафіксаваны шэраг парушэнняў: адсутнасць агароджы небяспечных зон, знакаў бяспекі і кантролю за выкананнем работнікамі патрабаванняў па ахове працы. Дахавыя работы выконваюцца без спецпропуска.

Таксама былі зафіксаваны парушэнні пры выкарыстанні сродкаў індывідуальнай аховы і пры выкарыстанні драўляных драбін і пад’ёмных механізмаў (аўтакрана) – пісала яшчэ ў красавіку раённая газета “Крычаўскае жыццё”.

Сапраўды, прылеглая тэрыторыя да будаўнічага аб’екта цяпер засмечана рознымі адыходамі, горы пяску і будаўнічага смецця ствараюць непрыгожы і сумны выгляд. Больш за тое, яны нясуць пэўную небяспеку не толькі дзецям, але і дарослым, бо ніякім чынам не агароджаны і не пазначаны. Фактычна знішчаны дзве невялікія дзіцячыя пляцоўкі каля вакольных дамоў, а горкі са смеццем і пяском не змяншаюцца, а з’яўляюцца новыя.  

Вішанькай на торце стаў будаўнічы вагончыў “1000 дробязей”, які выклікае ў мясцовых жыхароў смех і жарты. А магчыма ў вагончыку проста спрабуюць адкрыць крамку з продажам рознай гаспадарчай драбязы?

Фота: mogilev.media

Паглядзіце, што за фантан працуе ў цэнтры Крычава

Навіна ад

На тэрыторыі мікрараёна Камсамольскі ў Крычаве ў зоне адпачынку, дзе знаходзяцца лаўкі, альтанка і карусель для дзетак, ёсць таксама фантан. Але струмяні яго б’юць зусім крыва і пералівацца за межы фантана, утвараючы лужыны вакол яго. 

Падыйсці блізка да фантана не атрымаецца, бо ў такім выпадку вада абавязкова абалье чалавека. Да і глядзець там няма чаго, бо мясцовыя камунальныя службы горада не пераймаюцца з-за таго, што ў фантане плавае рознае смецце.

А вось як працаваў фантан летась

Фота: mogilev.media

Смецце не прыбралі, а таблічку павесілі – што з крыніцай у крычаўскім раёне Забялышан

Навіна ад

Поўгады таму mogilev.media ужо пісалі пра забруджанасць тэрыторыі вакол Забялышанскай крыніцы, што адрозніваецца добрай пітной вадой, і якой карыстаюцца мясцовыя жыхары.

На цяперашні момант сітуацыя амаль не змянілася, бо сметніцу каля крыніцы так і не прыбралі. Смецце не проста забруджвае вакольную тэрыторыю воднага аб’екта, але і стварае пах смуроду. Прычым службы не парупіліся прыбраць тэрыторыю вакол крыніцы, але таблічку з забаронай ствараць сметнік павесіць не забыліся.

Вакол крыніцы акрамя смецця знаходзяцца паваленыя дрэвы і развалены драўляны плот.

Нагадаем, што крыніца знаходзіцца ў раёне старой частцы Крычава пад назвай Забялышанскі пасад. Водны аб’ект блізка размешчаны да Забялышанскіх могілак і лакалізуецца ў некалькіх дзясятках метраў ад Сожа.

Фота: mogilev.media

Усюды бруд, няма пешходнай дарожкі – крычаўскія будаўнікі аблажаліся з упарадкаваннем дома на ўсю вобласць

Навіна ад

Нядаўна на пасяджэнні Крычаўскага райвыканкама яго старшыня Андрэй Седукоў прагаварыўся, што з рамонтам дома №3 у мікрараёне Камсамольскі мясцовыя будаўнікі і дарожнікі зганьбілі сябе на ўсё Магілёўскую вобласць. 

На пасяджэнні райвыканкама Седукоў канстатваў факты неўпарадкаванасці тэрыторыі вакол дома, а менавіта – бруд, непрыбраныя будаўнічыя вагончыкі, а побач з домам адсутнічае элементарная пешаходная дарожка, піша мясцовая газета “Крычаўскае жыццё”. 

Mogilev.media вырашылі праверыць ці сапраўды так усё кепска з упарадкаваннем тэрыторыі вакол дома пасля яго капітальнага рамонта. 

Адзначым, што рамонт пяціпавярховіка атрымаўся няблагім, бо былі адрамантавалі пад’езды і балконы і цяпер ён выглядае абноўленым. А вось з упарадкаваннем прылеглай тэрыторыі сапраўды ёсць праблемы. 

Па адзін бок дома збольшага усё прыбрана, але на прылеглай тэрыторыя да дома дагэтуль стаіць будаўнічы вагончык, а ў некаторых месцах сустракаецца смецце альбо пабітая плітка. 

А вось з іншага боку дома размешчана сетка крамаў і там карціна нашмат больш сумная. Нармальнай дарогі каб прайсці ў патрэбную краму для гараджанаў проста няма. Вакол сапраўды бруд, тэрыторыя непрыбраная і выглядае як пасля разрухі. 

Але ж дарожныя службы спрабуюць пакрысе гэты ўчастак давесці да ладу: насыпаюць пясок для таго, каб разраўняць дарожку і пакласці роўна плітку. Рамонтныя работы ідуць павольна, аднак упэўненымі крокамі.

Тым не менш, рамонтныя работы пакуль не выпраўляюць сітуацыю, а тэрыторыя побач з домам выглядае бруднай і зусім непрыстасаванай для перасоўвання крычаўлянаў. Побач з домам жыхары мікрараёна прайсці не могуць і вымушаны абыходзіць яго на адлегласці 7-10 метраў. Ці зменіцца ў далейшым ўпарадкаванасць тэрыторыі побач з домам № 3 мікрараёна Камсамольскі ў Крычаве пакажа будучыня. 

Фота: mogilev.media