Category: навіна дня

Колькасць хворых на COVID-19 у Беларусі, верагодна, сягнула за мільён

Навіна ад

Такую лічбу даюць матэматычныя мадэлі дынамікі захворвання ў краіне на каранавірус.

Хвароба нікуды не падзелася – штодня ў свеце рэгіструюцца дзясяткі тысяч новых хворых, сотні памерлых. Так, па стане на раніцу 7 лютага 2023 года у свеце колькасць захварэўшых склала 676 416 246 (за суткі +92 978). Памерлых 6 773 425 (+700 за суткі).

Нажаль, актуальнай статыстыкі па COVID-19 на Беларусі мы не ведаем. Яна не публікуецца. Недахоп інфармацыі заўсёды нараджае чуткі, плёткі і пэўны недавер да арганізацый, якія абавязаны даваць справаздачу перад выбаршчыкамі і жыхарамі краіны.

Апошняя статыстыка была абнародавана 5 ліпеня: 994 037 выпадкаў.  Гэтая ж лічба адлюстроўваецца і па стане на 8 лютага 2023 года. А 5 снежня 2022 года, міністр аховы здароўя Дз. Піневіч заявіў, што “колькасць хворых з COVID-19 не перавышае 3% ад пікавых лічбаў асенне-зімовага максімуму перыяду 2021-2022 года”. І больш ніякіх лічбаў, тым больш абсалютных.

Матэматычныя мадэлі з улікам 3% ад “пікавых лічбаў”, пра якія казаў Піневіч, даюць прырост хворых за перыяд з 5 ліпеня 2022 па 8 лютага 2023 года ад 8 720 да 17 794 хворых. Гэта азначае, што агульная лічба хворых можа скласці на сённышні момант ад 1 002 757 да 1 011 831 хворых.

Любая мадэль можа моцна адрознівацца ад рэальных лічбаў або ў адзін, або ў другі бок, тым больш пры недахопе ведаў пра апошнія трэнды.

Фотаздымак мае ілюстрацыйны характар

Новы землятрус у Турцыі

Навіна ад

У Турцыі 7 лютага адбыўся новы землятрус магнітудай 5,6 балаў. Пагроза цунамі на міжземнаморскім узбярэжжы пры гэтым адсутнічае.

Ахвярамі ўчорашняга стыхійнага бедства ў Турцыі сталі 3 381 чалавек, колькасць параненых 20 426, у Сірыі адпаведна загінула больш за 1300, паранена звыш 1 400. У Турцыі больш за 7 300 чалавек выратаваны з-пад завалаў у ходзе пошукава-выратавальных работ, якія працягваюцца ўжо больш за суткі – інфармуе БЕЛТА. Гэта не канчатковыя дадзеныя, паводле экспертаў канчатковая лічба ахвяр можа вырасці ў разы.

У сірыйскіх правінцыях Алепа, Ідліб, Латакія і Хама дзясяткі людзей пакуль застаюцца пад заваламі, бо выратавальным работам перашкаджае штармавое надвор’е і праліўны дождж. На поўначы краіны спынены чыгуначныя зносіны. Мясцовыя ўлады называюць сітуацыю, якая склалася ў краіне, гуманітарнай катастрофай.

Прэзідэнт Турцыі Рэджэп Таіп Эрдаган назваў учорашні землятрус найбуйнейшым стыхійным бедствам для краіны  з 1939 года. Тады землятрус забраў жыцці 17 500 чалавек. У Турцыі аб’яўлена агульнанацыянальная жалоба да 12 лютага.

На eBay прадаецца рэліквія, якую выдаюць за мошчы Еўфрасінні Полацкай з калекцыі магілёўскага біскупа

Навіна ад

У інтэрнэце прадаюцца нібыта мошчы Еўфрасінні Полацкай, хоць хутчэй за ўсё маецца на ўвазе Параскева Полацкая, і наогул гэта выглядае як падробка.

На інтэрнэт-пляцоўку eBay выстаўлены лот, падпісаны як “Сярэбраны рэлікварый, частка цела Прападобнай Ефрасінні Полацкай + дакумент”. Сенсацыйны продаж выклікаў інфармацыйную хвалю ў беларускім грамадстве, аднак спецыялісты звяртаюць увагу на тое, што ў самім дакуменце, і на парэштках, яія прадаюцца ў сярэбраным каўчэгу ўказана зусім не Еўфрасіння Полацкая, а “S. Praxedis Polotiensis”.

Выказваюцца меркаванні, што гэта могуць быць парэшткі іншай полацкай святой – Параскевы Полацкай. Гэтая святая таксама выклікае пэўныя пытанні ў спецыялістаў і лічыцца легендарнай. Існуюць меркаванні, што гэтай святой насамрэч не існавала, у яе рэальнасці сумняваўся яшчэ Мацей Стрыйкоўскі, а яе вобраз, верагодна, сфарміраваўся ў пазнейшы час пад уплывам Еўфрасінні Полацкай ці яе стрыечнай сястры Еўпраксіі. 

Культ Параскевы Полацкай, беатыфікаванай у 1273 годзе Папам Рымскім Рыгорам Х быў вельмі распаўсюджаны ў Полацку, найперш у XVI стагоддзі і гэта было звязана з намаганнямі езуітаў. Таксама яна шанавалася ўніятамі і праваслаўнымі.

У дакуменце, які суправаджае продаж рэліквіі на eBay, ёсць пячатка і подпіс нібыта каталіцкага біскупа Мінска-Магілёўскай дыяцэзіі Баляслава Слосканса. Баляслаў Слосканс (1893 – 1981) – апостальскі адміністратар Магілёва і Мінска, ён жа быў апостальскім візітатарам для беларускіх і рускіх каталікоў візантыйскага абраду ў эміграцыі.

Спецыялісты, аднак, дэманструючы арыгінальны подпіс Баляслава Слосканса і яго почырк, сцвярджаюць, што яны адрозніваюцца ад таго, што можна пабачыць у дакуменце, прыкладзеным да рэліквіі, што прадаецца на eBay.

Фота: eBay

Набыццё новых машын хуткай дапамогі паказала бядотны стан аўтапарка медыцынскіх устаноў Магілёўшчыны

Навіна ад

У пятніцу ў Магілёве ўрачыста перадалі ключы ад новых 44-ох аўтамабіляў установам аховы здароўя вобласці. Пампезная імпрэза паказала рэальны жахлівы стан машыннага парку сістэмы.

Кожны раён вобласці атрымаў па адной новай машыне хуткай дапамогі. І гэта выдатны паказчык, бо, як сведчаць афіцыйныя дзяржаўныя рэсурсы, у папярэднія гады закуплялася толькі па 18 аўтамабіляў на ўсю вобласць, а спісваць было неабходна 10% – а гэта 60 машын штогод.

У Магілёве застанецца 20 адзінак новых аўтамабіляў, якія і тут крайне неабходныя, бо працуюць для дапамогі не толькі жыхарам горада але і ўсёй вобласці. Машыны працуюць у тры змены і праз 5 гадоў эксплуатацыі ўжо маюць 100% знос.

Па словах галоўнага ўрача Абласной дзіцячай бальніцы Магілёва Ігара Каско, перадача двух рэанімабіляў ва ўстанову стала велізарнай падзеяй для лекараў:

– Гэтыя машыны дазволяць нам замяніць існуючыя. Сёння гэта надзвычай неабходна, важна і своечасова, таму што старое абсталяванне мае 700-800 тысяч кіламетраў прабегу.

Варта сказаць, што аўтапарк рэгіёна складае каля 600 аўтамабіляў, якія маюцца ў кожнай медыцынскай амбулаторнай клініцы. Паколькі транспарт пастаянна зношваецца (да 10% штогод), заўжды маецца вострая патрэба набыцця падобнай тэхнікі. Пры падобнай нагрузцы штогод павінна набывацца 60 аўтамашын, а ў сёлетнім рэкордным годзе плануецца набыць толькі 50. Гэта больш за леташнія 18, але ўсё роўна замала.

Кіраўнік галоўнага ўпраўлення аховы здароўя аблвыканкама Аляксандр Старавойтаў падзякаваў за тое, што ў 2023 будзе набыта больш за 50 адзінак транспарту, ключы ад першых 44-х з якіх былі перададзены сёння. З іх 38 аўтамабіляў медыцынскай дапамогі, 5 машын хуткай медыцынскай дапамогі (2 з іх рэанімабілі) і адзін мабільны медыцынскі комплекс.

Выступенні медыкаў на імперэзе перадачы новай тэхнікі былі поўныя падзяк абласному кіраўніцтву і прыхаваных просьбаў. Яны не крытыкавалі напрасткі, але апісвалі рэальныя патрэбы сістэмы хуткай дапамогі.

Так, медыкі з аднаго боку адзначылі, што ніколі не было такога вялікага абнаўлення аўтамабільнага парку ў рэгіёне, што нарэшце абласны выканаўчы камітэт пачаў вяртаць даўгі медыцыне. Але з іншага, яны ж паказвалі, што нават для простага аднаўлення аўтапарку медычных устаноў вобласці гэтага ўсё роўна недастаткова. З улікам недапаставак мінулых гадоў, машын павінна набывацца нават не па 60 у год, а яшчэ болей.

Фота з адкрытых крыніц

У Магілёве з аўкцыёна прададуць дзесяць пустых дамоў

Навіна ад

28 лютага пройдзе аўкцыённы продаж нежылых і нічыйных дамоў у Магілёве – паведамляецца на сайце гарвыканкама. Усяго на продаж выстаўлена дзесяць такіх хат. 

Ступень зносу амаль усіх дамоў, пераважна – больш за 60 %. За самы дарагі стартавы кошт складае 30 700 рублёў, за самы танны 9 900. Для ўдзелу ў аўкцыёне загадзя неабходна ўнесці задатак у 20% ад стартавай сумы. 

Як пісалі mogilev.media, у пачатку студзеня дзяржаўны камітэт Беларусі па маёмасці запусціў анлайн-платформу, на якой можна знайсці ўсе жылыя дамы, якія зараз пустуюць. На Магілёўшчыне такіх дамоў на дадзены момант налічваецца больш за тысячу. У Магілёве – некалькі дзясяткаў.

Аўкцыён адбудзецца 28 лютага 2023 года ў 15.00 па адрасе: г. Магілёў, зав. Камісарыяцкі, 5. Апошні дзень прыёму заяў і ўнясення задатку – 23 лютага 2023 года да 17.00 гадзін.

Фота: mogilev.media

У Магілёўскай вобласці – рэзкае змяншэнне даследчыкаў, дактароў і кандыдатаў навук

Навіна ад

Колькасць дактароў навук скарацілася ў два разы, кандыдатаў на 43%, і гэта яшчэ старыя дадзеныя, за 2021 год. Зараз лічбы яшчэ больш жахлівыя.

А мы ўсё святкуем

У хуткім часе ў Магілёў, пасля Гомеля, прыбудзе экспазіцыя «Беларусь інтэлектуальная», якая працавала ў мінскім Белэкспа напярэдадні Дня беларускай навукі –  анансуюць падзею дзяржаўныя СМІ. Але, давайце прааналізуем стан навуковых распрацовак на актуальны час у Магілёўскім рэгіёне.

Магілёўскае абласное упраўленне статыстыкі выпусціла да Дня навукі-2023 актуальны прэс-рэліз са статыстычнымі дадзенымі на 2021 год (засяроджваем увагу на год), паводле якіх у рэгіёне назіраецца прырост навукоўцаў і навуковых арганізацый.

Але параўнальны аналіз сведчыць пра істотнае зніжэнне колькасці даследчыкаў і рэзкае змяншэнне дактароў (напалову) і кандыдатаў навук (на 43%) у параўнанні з базавымі гадамі – 2010-2020.

У прадстаўленым дакуменце даецца лічба ў 25 устаноў, якія у 2021 годзе праводзілі навуковыя даследаванні. Сапраўды, тут назіраецца рост ледзь не на 1/5, бо на працягу 2010-2020 гадоў іх колькасць была нязменнай – 21.

Колькасць персанала  (катэгорыі: даследчыкі, тэхнікі, дапаможны персанал), які займаўся навуковымі даследаваннямі і распрацоўкамі ў 2010-2020 гадах складала 733-774 чалавек. Так што ў 2021 годзе сапраўды адбыўся прырост удзельнікаў распрацовак адразу на 114 чалавек (да 888, на 113%).

Але колькасны рост забяспечылі тэхнікі і дапаможны персанал, вага якіх у 2010-2020 гадах памяншалася і ў вобласці і па краіне (сусветны трэнд): у 2020 годзе іх вага ў вобласці была 33,85%, у 2021 годзе дасягнула паказчыка – 44,70%.

Непасрэдна даследчыкаў ва ўстановах Магілёўскай вобласці ў 2010-2020 гадах працавала 315-512 чалавек. Гэта азначае, што толькі за год 2020/2021 адбылося падзенне іх колькасці да 491 і вагі з 66,15% да 55,30% ад усёй колькасці супрацоўнікаў даследчых устаноў.

Эксперты тут не і спрабуюць выбудоўваць гіпотэзы, па якой прычыне гэта адбылося – ці то каранавірус, ці то масавыя звальненні даследчыкаў з вну.

Тры дактары навук на ўвесь рэгіён

З навуковымі ступенямі ў 2010-2020 гадах працавалі 41-42 даследчыкі, у тым ліку 5-6 дактароў навук, кандыдатаў – 35-37. Тут маюцца на ўвазе навукоўцы, якія займаліся менавіта даследаваннямі, і сюды не ўлічваюцца тыя, хто займаўся толькі выкладаннем.

А вось па стане на 2021 год навуковымі распрацоўкамі ў вобласці займаліся толькі 3 дактары навук (скарачэнне ў 2 разы) і 21 кандыдат (падзенне на 43,3%).

У Магілёўскай вобласці ў 2021 годзе больш за ўсё даследчыкаў працуе у галіне тэхнічных навук – 93,3% (па Беларусі – 59,1%), сельскагаспадарчых – 5,5 (5,3%, значны сектар займае Беларуская сельскагаспадарчая акадэмія ў Горках), сацыяльна-эканамічныя і грамадскія – 0,8 (6,5), прыродазнаўчыя – 0,2 (20,6), гуманітарныя – 0,2 (3,5). 

Эксперты выказваюць меркаванне наконт публікацыі дадзеных за 2021 год тымі абставінамі, што статыстычныя паказчыкі па навуцы ў вобласці на 2023 год будуць больш жахлівымі.

У Магілёве плануюць паставіць помнік губернатару Аляксандру Дэмбавецкаму

Навіна ад

У Магілёве абвясцілі збор сродкаў на ўсталяванне скульптурнага помніка самаму вядомаму і паспяховаму з магілёўскіх губернатараў – паведамляе Тэлеграм-канал “Могилев – мой город”.

Мяркуецца, што скульптура з’явіцца ў парку імя Горкага – тым самым парку, які да рэвалюцыі насіў імя самога Дэмбавецкага і які быў пры ім створаны.

Аляксандр Дэмбавецкі кіраваў Магілёўскай губерніяй у 1872 – 1893 гадах і пакінуў значны след у жыцці рэгіёна. Пры ім адсталая Магілёўская губернія пачала эканамічны і сацыяльны рост, былі рэалізаваныя масштабныя сацыяльныя праекты. У Магілёве былі ўзведзены манументальныя, глыбокія па архітэктурным змесце будынкі Аляксандраўскага рэальнага вучылішча, Магілёўскага жаночага духоўнага вучылішча, гарадскога драматычнага тэатра, Магілёўскай фельчарскай школы, Магілёўскай жаночай гімназіі, Губернскага дваранскага сходу, Гарадской управы. Дэмбавецкі – ініцыятар выдання і рэдактар фундаментальнай калектыўнай працы “Вопыт апісання Магілёўскай губерніі”.

Пра асабістае жыццё губернатара, аднак, вельмі мала звестак. Існуе легенда, што бацькам Аляксандра Дэмбавецкага з’яўляўся расійскі імператар Аляксандр ІІ. Гісторыкам не вядома амаль нічога пра паходжанне і раннія гады жыцця Дэмбавецкага. Застаецца таямніцай і дата яго смерці. Апошняя дакладна вядомая дата яго жыцця, зафіксаваная ў дакументах – 25 кастрычніка 1918 года. Вядома, што пасля рэвалюцыі ён прыняў літоўскае грамадзянства і знаходзіўся пад абаронай Германскай імперыі.

Фота: Wikipedia

Могилевчанин в шоке: что происходит с парком Горького?

Навіна ад

Можно с уверенностью сказать, что на тень в старейшем парке города могилевчане летом могут не рассчитывать – пишет житель города – Её не будет. 

Читатель mogilev.media обратил внимание на кощунственную обрезку деревьев в парке Горького в Могилеве.

– Понимаю, деревья надо подстригать… хотя нет, не понимаю. А чтобы ТАК и в ПАРКЕ, не понимаю категорически. Если зелёные зоны это лёгкие города, то это ампутированных лёгкие. Был в Кишинёве. Парк – буйство зелени, кроны деревьев закрывают небо, на улицах из кроны деревьев образуется туннель, потому что на высоте они смыкаются с противоположной стороной. Весь город утопает в зелени. И это красиво и даёт городу кислород. А что может дать городу оставшийся ствол, а если этих стволов целый парк, а если весь город? И вишенкой на торте, выбросы “Кроноспана”, когда центр Могилёва и не только (слышал запах и в Казимировке), утопает в запахе ”свежих опилок”. Теперь нас будут защищать от этих выбросов обрубки деревьев парка Горького? Спасибо. А дышать чем?

Фото предоставлено читателем mogilev.media

Двое п’яных – сталі вядомымі падрабязнасці, хто пабіў вокны ў магілёўскім касцёле

Навіна ад

Як стала вядома, атаку на касцёл святога Станіслава ў Магілёве здзейснілі двое маладзёзаў, якія былі моцна нападпітку – 17 і 18 гадоў.

Дзеянні вандалаў зафіксавалі камеры відэаназірання. Двое хлопцаў прабраліся на тэрыторыю касцёла, пераадолеўшы агароджу і старэйшы кінуў некалькі камянёў у вокны помніка архітэктуры. Малодшы разарыў батлейку, арганізаваную на ўваходзе ў касцёл – скраў фігурку осліка.

Ці былі ідэнтыфікаваныя гэтыя вандалы і ці затрыманыя – пакуль невядома. Нагадаем, акт нападу на касцёл у Магілёве быў здзейснены ў ноч з 19 на 20 студзеня – пісалі mogilev.media.

Фота: mogilev.media

На пажарах у Бабруйску загінулі трое, у Асіповічах цягнік збіў дзяўчыну – ранішняя зводка

Навіна ад

Два чалавекі загінулі на пажары ў прыватным доме па вуліцы Спартакаўскай у Бабруйску вечара 23 студзеня – паведамляе прэс-служба МНС. Прычыны ўзгарання высвятляюцца. Таксама ў Бабруйску ў гэты дзень гарэў дом па вуліцы Звязды. Гаспадар дома 1979 года нараджэння атрымаў апёкі і быў выратаваны, а яго сужыцельніца, жанчына 1981 года нараджэння, загінула.

Яшчэ адзін пажар у прыватным доме ў Бабруйску – на вуліцы Кірава – завяршыўся менш трагічна. Гаспадар дома 1958 года нараджэння спрабаваў самастойна загасіць полымя, атрымаў апёкі і быў шпіталізаваны.

Таксама гарэў дом у Чавусах па вуліцы Забалоцкай. Гаспадар дома 1951 года нараджэння выратаваўся, атрымаўшы атручэнне дымам, і быў шпіталізаваны.

У вёсцы Машавое Касцюковіцкага раёна ў сваім доме быў знойдзены мужчына 1969 года нараджэння, які атруціўся ўгарным газам – зарана закрыў дымаход у печы.

У Асіповічах на чыгунцы адбыўся наезд электрацягніка на чалавека. Пацярпела дзяўчына 1999 года нараджэння, якая з траўмамі рознай ступені цяжкасці была шпіталізаваная.

Фота ілюстрацыйнае.