Tag: Россия

Расія прагне “вярнуць” Клайпедскі край, хоць юрыдычныя падставы зразумелыя толькі Пуціну

Навіна ад

Яшчэ ў 2005 годзе Уладзімір Пуцін тлумачыў, што Клайпеда са старажытных часоў з’яўляецца спрадвечнай рускай зямлёй. Такая «дробязь» як тое, што Клайпеда (Мемель) 700 гадоў належала германцам, а да гэтага балтам, рускага дыктатара не бянтэжыць – піша atviraklaipeda.lt

Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці.

Расійскі правадыр сказаў недарэчнасць, але слова яго святое для рускіх прапагандыстаў. Таму гэтае глупства стала расійскай дактрынай. Беспрынцыповая расійская прапагандысцкая машына, якая атрымлівае на распаўсюджванне хлусні за мяжой каля 2 мільярдаў долараў ЗША ў год, нясе глупства аб тым, што ёсць магчымасць вярнуць Клайпеду ў абдымкі Расіі прававым шляхам.

«Дзе дакументы, якія дазваляюць перадачу Віленскага краю ці Клайпедскага порта Літве? Вярхоўны Савет СССР такога рашэння не прымаў. Давайце сфармуем камісію і вырашым. Вярніце Клайпеду, вярніце Віленскі край. У іх была канстытуцыя: усяго тры гарады – Каўнас, сталіца Літвы, Шаўлі, Панявеж. Што ж, тры гарады вашыя, усё астатняе трэба вярнуць. Гэта наша тэрыторыя. Мы атрымалі гэта дзякуючы вайне. А Сталін быў добры і аддаў. Узяў у беларусаў, аддаў літоўцам. Ён забраў у немцаў Памеранію і Сілезію і аддаў іх палякам…» – так у 2018 годзе заяўляў цяпер ужо нябожчык дэпутат расійскай Думы і лідэр ліберальна-дэмакратычнай партыі Расіі, Уладзімір Жырыноўскі.

Як прапаганда хлусіць

Расійская прапаганда ставіць пад пытанне прыналежнасць Клайпедскага краю Літве сыходзячы з таго, што на момант заканчэння Другой Сусветнай вайны ён не належыў Літве. Але ігнаруецца той факт, што Германія аддзяліла гэты край ад Літвы ў сакавіку 1939 года пасля заключэння Пакта Молатава-Рыбентропа. 

У 2014 годзе, пасля таго, як расійскія вайскоўцы ціха ўвайшлі ва ўкраінскі Крым, дзейная ў Літве грамадская ўстанова Būkime vieningi падзялілася апублікаванай парталам «avaaz.org» петыцыяй са зваротам на рускай мове да рускамоўных жыхароў Літвы, заклікаючы іх запатрабаваць далучэння Клайпеды да Расіі.

Ці існуюць дакументы, што Клайпеда належыць Расіі? 

Што такіх дакументаў няма, пацвердзіў і сам В. Жырыноўскі, заявіўшы, што “мы атрымалі яе дзякуючы вайне”. І ні ў адным міжнародным судзе Расія не зможа прад’явіць ніякіх дакументаў, якія пацвярджаюць яе правы на Клайпеду і Клайпедскі край. Калі б такія юрыдычныя дакументы і аргументы існавалі, Расія ўжо даўно б пачала судзіцца.

Асуджэнне Пуціным пакта Молатава-Рыбентропа. 

Яшчэ ў 2005 годзе падчас прэс-канферэнцыі, адказваючы на пытанне латвійскага журналіста, прэзідэнт Расіі пацвердзіў, што ў 1989 годзе “ім начыста было запісана”, што З’езд народных дэпутатаў Расіі асуджае пакт Молатава-Рыбентропа і лічыць яго юрыдычна несапраўдным.

Нібыта гэты акт не адлюстроўваў меркаванні савецкага народа, а быў асабістай справай Гітлера і Сталіна. “Вы хочаце, каб мы паўтаралі гэта кожны год?” – рытарычна пытаўся тады У. Пуцін. І сказаў, што «гэтае пытанне закрытае. Усё. Мы больш не будзем вяртацца да гэтага пытання».

Рэвізія адносінаў Расіі да пакту Молатава-Рыбентропа. 

Пуцін не жадаў вяртацца да пакту, аднак вярнуўся. Адразу ж пасля таго, як увёў войска ў Крым і адарваў яго ад Украіны. А ўжо ў лютым гэтага года, калі пачалі забіваць украінскіх дзяцей, старых, усіх жыхароў, бамбаваць іх гарады і вёскі, расійская прапаганда, якая ўслаўляе свайго правадыра, стала лямантаваць аб тым, што яны імкнуцца вярнуць сабе ўсе свае старыя, “спрадвечныя” землі.

У апошняе дзесяцігоддзе пуцінская Расія захапіла частку Грузіі, Украіны. Украіну рабуюць, яе людзей забіваюць з жахлівым энтузіязмам. Скаляць зубы і на краіны Балтыі, і на ўвесь постсацыялістычны свет. Не ў сілах выхаваць агульначалавечыя каштоўнасці, яны мабілізуюць жывёльны інстынкты свайго народа і кажуць: ідзіце, бярыце сілай і рабуйце ўвесь свет. Ён – ваша законная здабыча.

Аб тым, што свет не бачыць у сённяшняй расійскай агрэсіі ні сэнсу, ні законных падстаў, сведчыць той факт, што ў кастрычніку 2022 года Генеральная Асамблея ААН галасамі 143 краін асудзіла анексію Расіяй акупаваных тэрыторый Украіны. А Расію падтрымалі толькі яна сама і чатыры дзяржавы, якія не маюць нічога агульнага з дэмакратыяй – Сірыя, Нікарагуа, Паўночная Карэя і Беларусь.

Юрыдычныя падставы прыналежнасці Клайпеды Літве. 

Літоўскія гісторыкі падкрэсліваюць, што юрыдычнай падставай прыналежнасці Клайпедскага краю з’яўляюцца прынятыя ў 1923-1924 гадах рашэнні Канферэнцыі Амбасадараў, якімі Клайпедскі край у 1924 годзе быў перададзены Літве. Іншых міжнародна-прававых актаў, якія гавораць аб чыіх-небудзь правах на Клайпеду, няма.

migration.lt

Дамова аб Пабрацімстве Клайпеды і Магілёва была падпісана 8 сакавіка 1997.

27 лютага 2022 году, на трэці дзень уварвання расійскіх войск ва Ўкраіну, мэр Клайпеды заявіў аб спыненні пабрацімскіх сувязяў з расійскімі і беларускімі гарадамі. Паводле яго ён звярнуўся да кіраўніцтва гарадоў партнёраў, каб тыя супраціўляліся агрэсіі супраць Украіны, але рэакцыі не было. У афіцыйным спісе гарадоў пабрацімаў Клайпеды Магілёва няма.

Магілёў. media працягвае сачыць за жыццём Клайпеды, нягледзячы на спыненне партнёрскіх сувязяў з Магілёвам са спадзевам, што пабрацімства між гарадамі адновіцца.

Клайпеда месціцца на захадзе краіны і з’яўляецца портам на Балтыйскім моры. Насельніцтва 160 тысяч чалавек.

фота: seanews.ru

Flo ліквідуе бізнэс у Беларусі

Навіна ад

Распрацоўшчык папулярнага дадатка ў сегменце жаночага здароўя Flo заявіў пра ліквідацыю бізнэсу ў Беларусі. 

Рашэнне аб закрыцці прадстаўніцтва было прынята ў канцы верасня, хаця чуткі пра гэта распаўсюджваліся яшчэ вясной 2022 года. Кампанія не жадае мець справу з саўдзельнікамі краіны-агрэсара.

У сакавіку, пасля пачатку поўнамаштабнага ўварвання Расіі ва Украіну, у ТАА “Фло Хелс Бел” змяніўся ўладальнік – усе акцыі падраздзялення перайшлі ад амерыканскай Flo Health Inc да фізічнай асобы. У той жа час, у самой кампаніі інфармацыю аб выхадзе з Беларусі ніяк не каментавалі.

Увесну гэтага года супрацоўнікаў Flo ў Беларусі папрасілі вырашыць пытанне ўласнай рэлакацыі з лімітавым тэрмінам да 14 сакавіка. Тым, хто працягваў заставацца ў Беларусі, кампанія адключыла доступ да карпаратыўных рэсурсаў.

Адзначым, што на сайце Flo ўжо даўно няма згадак пра офіс у Мінску, а таксама не публікуюцца вакансіі з прапановамі працы ў Беларусі. 

Разам з тым, кампанія за апошнія некалькі месяцаў актыўна пашырае каманду ў суседняй Літве. За чэрвень – верасень бягучага года штат літоўскага офіса вырас удвая, да 245 чалавек.

Што вядома пра Flo Health

Кампанія з беларускімі каранямі, якая займаецца папулярным дадаткам у сегменце жаночага здароўя. Штаб-кватэра размяшчаецца ў Лондане, а прадстаўніцтвы знаходзяцца таксама ў Нідэрландах і ЗША. У той жа час, у Вільнюсе размяшчаецца офіс распрацоўкі Flo.

Дададзім, што на канец 2021 года кампанія налічвала 400 супрацоўнікаў, каля 200 з якіх тады яшчэ працавалі ў офісе распрацоўкі ў Мінску. 

Увосень 2021 года Flo ацэньвалі ў 800 мільёнаў даляраў, і аналітыкі прагназавалі кампаніі статут адзінарога на рынках ўжо ў найблізкай будучыні.

Характэрна, што дадатак Flo тры гады запар з’яўляецца самым папулярным у катэгорыі Health&Fintess у AppStore. Па дадзеных кампаніі, у яе прадукта ўжо больш за 250 мільёнаў унікальных карыстальнікаў у свеце.

фота: 24tv.ua

Кошт эвакуацыі мужчын з Расіі ў Магілёў дасягнуў 1000–1200 даляраў. Пачута ў Магілёве

Навіна ад

Уцёкі расійскіх мужчын ад мабілізацыі ў суседнія краіны – усім вядомы факт, пра які сведчаць кіламетры відэасюжэтаў. І вось з’явіліся сведчанні, што дапамога ўцекачам ад вайны становіцца ў Беларусі прыбытковым бізнесам. 

Размовы пра тое, што расійскія  мужчыны ўцякаюць не толькі ў Грузію і Казахстан, але і ў Беларусь вяліся ў благасферы ад пачатку мабілізацыі. Але вялізарныя памеры ўцёкаў на Каўказ і Сярэднюю Азію зацянялі хвалю прыезду да нас расіян. Хаця многія заўважылі, што ў Магілёве стала больш мужчын, якія размаўляюць на рускай мове з “кніжным” піцерскім, маскоўскім або краснадарскім акцэнтам.  

Кожны, пэўна, чуў ад сваіх магілёўскіх знаёмых гісторыйку, як магілёўка ці магілёвец прыняў брата/швагра/сваяка, якому ў Расіі пагражае адпраўка на смерць ва Украіну. Больш глыбокае расследаванне паказала, што звесткі пра тое, што нехта ў Магілёве ратуе знаёмых мужчын з Расіі ад мабілізацыі, сапраўды праз другое ці трэцяе рукапацісканне чулі многія магілёўцы. Такія аповеды пэўны час усіх цешылі, сведчылі пра добрыя сэрцы беларусаў, пра нашы чулыя адносіны да блізкіх. 

Але вось тое, што гэта становіцца бізнесам, чуць раней не даводзілася. Дакрануцца да гэтай тэмы дапамаглі бабулі ля пад’езду, якія, як вядома, ведаюць усё. 

Падслуханая размова групы бабуль на лаўцы каля пад’езду магілёўскага Задняпроўя дала найбольш канкрэтную інфармацыю. 

  • А мой унук бізнесам заняўся – з гонарам выдала бабуля ў чырвоным паліто. 
  • Да няўжо? – хорам выдыхнулі суседкі. 
  • Вывозіць расіян у Магілёў, а зяць ім кватэры тут падшуквае. 
  • І што ж тое за бізнес? – расчаравана выдыхнулі суседкі  – Мабыць рублёў па 50 ці па 100 бярэ за прывоз.
  • А вось і няпраўда ваша. Бярэ ён з іх 1000 даляраў. Нават і 1200 браў! – з выглядам пераможцы адказала бабуля ў чырвоным. 
  • За што ж такія грошы яны плацяць?
  • А за тое, што вязе не па смаленскай дарозе, а крыху ў аб’езд, дзе іх не сцерагуць ваенныя або паліцыя іхная. А тут іх ужо чакае зяць з кватэрай, дзе яны будуць жыць. – з выглядам знаўцы сістэмы ўцёкаў ад мабілізацыі патлумачыла дасведчаная бабуля і дадала – 1000, гэта толькі за прывоз сюды, а за кватэру яны потым яшчэ асобна плацяць. 
  • Да багатыя могуць уцячы, а што рабіць астатнім расіянам? – кіўнула галавой суседка.  

“Слухаць болей, робячы выгляд, што калупаюся ў мабільным, было ўжо задужа невыхаваным і прыйшлося сыйсці недаслухаўшы” – апісаў размову ў адным з паблікаў магілёвец. 

У  гэтым расповедзе бабулі пра бізнес унука і зяця на расіянах усё досыць неканкрэтна і ўмоўна. Верыць падобнай інфармацыі складана, але чамусьці верыцца. Ужо задужа ўсё дакладна кладзецца ў кантэкст падзей вакол нас. Расіяне гатовы плаціць вялікія грошы, каб уратаваць сваіх мужчын ад вайны. 

А ўскосным пацверджаннем праўдзівасці прыведзенай размовы, якую інакш можна было б палічыць звычайнай гарадской плёткай, стала нечаканая тэндэнцыя росту коштаў на здым кватэр у Магілёве. Рост яшчэ не катастрафічны, але ўжо прыкметны.  

фота з адкрытых крыніц

Магільнік ядзерных адыходаў плануюць пабудаваць у Беларусі – магчыма, на Магілёўшчыне

Навіна ад

У лік прыярытэтных месцаў пад будаўніцтва ўключылі раёны, што пацярпелі ад аварыі на Чарнобыльскай АЭС.

Калі працуе АЭС, то яна выпрацоўвае адкіды. Гэта азначае, што краіне неабходна стварэнне пункта пахавання радыёактыўных адыходаў. Гэты аб’ект павінен быць цэласным, адзіным і дазваляць рэгуляваць пытанні абыходжання з такімі адходамі па ўсёй краіне і на доўгі прамежак часу.

Зараз у краіне праходзіць грамадскае абмеркаванне праекта стратэгіі абыходжання з радыёактыўнымі адкідаміі. Разглядаецца ўся тэрыторыя Беларусі.

Сёння прадстаўнікі Дзяржатамнагляду паведамілі журналістам аб планах па будаўніцтва пункта пахавання радыеактыўных адкідаў у Беларусі.

Пра якія адкіды ідзе гаворка.

“На тэрыторыі Беларусі будуць пахаваны радыёактыўныя адкіды, якія ўтварыліся ў нашай краіне. – распавёў першы намеснік начальніка Дзяржатамнагляду Леанід Дзядуль – Радыёактыўныя адкіды – гэта рэчывы, якія змяшчаюць радыёнукліды, якія ўжо не плануецца ў далейшым выкарыстоўваць. А адпрацаванае ядзернае паліва падлягае перапрацоўцы. У адпаведнасці з пагадненнем з Расійскай Федэрацыяй перапрацоўка будзе праводзіцца на тэрыторыі Расіі, а ўжо астатнія прадукты перапрацоўкі мы пахаваем у Беларусі”.

Нагадаем, што Беларуская АЭС пабудавана каля беларуска-літоўскай мяжы, за 18 кіламетраў ад горада Астраўца Гродзенскай вобласці. Афіцыйны запуск першага блока станцыі адбыўся 7 лістапада 2020 года. 26 красавіка 2022 года адбыўся фізічны запуск другога энергаблока. Але БелАЭС працуе ўсе гэтыя гады нестабільна, з пастаяннымі перапынкамі на рамонт.

Прапрацоўваемыя варыянты пляцоўкі:

– зона паблізу дзеючай станцыі, 

– тэрыторыі, якія пацярпелі ў выніку аварыі на Чарнобыльскай АЭС. Гэта найперш раёны Магілёўскай і Гомельскай абласцей.

Пункт пахавання радыёактыўных адкідаў бачыцца як модульна арганізаваны аб’ект.

Гэта значыць, для кожнага тыпу адыходаў будуць асобныя модулі. Яго плануецца будаваць паэтапна.

“Праз 10 гадоў будзе неабходна размясціць адкіды, якія ўжо ўтвараюцца на БелАЭС, на пункце пахавання. Таму першую чаргу гэтага аб’екта плануецца стварыць і ўвесці ў эксплуатацыю менавіта праз 10 гадоў. У планах прыпаверхневае пахаванне, а не глыбіннае” – адзначыў начальнік упраўлення Дзяржатамнагляду Дзмітрый Паўла.

Пункт пахавання радыёактыўных адкідаў патрабуе стварэння дадатковай інфраструктуры. “Гэты аб’ект у стратэгіі прапанавана разглядаць як пункт эканамічнага росту, адзначаны яго патэнцыял для развіцця рэгіёну, у якім ён будзе размешчаны”, – звярнуў увагу Дзмітрый Паўлаў.

Пытанні бяспекі

Першы намеснік начальніка Дзяржатамнагляду Леанід Дзядуль падкрэсліў, што пытанні бяспекі персаналу пункта пахавання радыёактыўных адкідаў, насельніцтва, якое пражывае паблізу пункта, уплыву на навакольнае асяроддзе пастаўлены як галоўныя. 

“Вакол гэтага пункта можна стварыць навуковы кластар, каб распрацоўваць новыя тэхналогіі і мерапрыемствы па забеспячэнню ядзернай і радыяцыйнай бяспекі” – дадаў ён.

фота з адкрытых крыніц 

Страляніна ў Расіі – пакушэнне на ваеннага камісара, скулшуцінг у Удмурціі

Навіна ад

У ваенкамаце горада Усць-Ілімска Іркуцкай вобласці малады мужчына некалькі разоў стрэліў у ваеннага каміраса раёна – паведаміў медыярэсурс tayga.info спасылаючыся на відавочцаў. Стралок быў затрыманы, ім аказаўся мясцовы жыхар Руслан Зінін 1997 года нараджэння. Ён прыйшоў у ваенкамат без павесткі, а напярэдадні моцна перажываў выклік у армію яго лепшага сябра – сцвярджае маці Руслана. Маці таксама прызналася, што не ведае, адкуль у сына зброя. Ваенны камісар Усць-Ілімскага раёна ў крайне цяжкім стане дастаўлены ў рэанімацыю.

У горадзе Іжэўску, які знаходзіцца ў Удмурціі, 26 верасня невядомы мужчына адкрыў страляніну па ахоўніку школы і некаторых дзецях. Па інфармацыі тэлеграм-канала Baza ахоўнік пры гэтым загінуў. Канал Zvezdanews паведамляе, што нападнік доўгі час адстрэльваўся ад паліцэйскіх, а ў школе “вельмі шмат параненых”.

Кампанія з Украіны «Метінвест» ліквідуе сваю структуру ў Беларусі

Навіна ад

Горна-металургічная група «Метінвест» пасля пачатку поўнамаштабнай вайны Расіі ва Украіне прыняла рашэнне аб закрыцці сваіх падраздзяленняў у Расіі і Беларусі. Цяпер у гэтых краінах засталіся збытавыя структуры: беларуская «Метінвест Дыстрыбуцыя» і расійская «Метінвест Еўразія».

«Там засталіся аперацыйныя каманды, якім дадзены інструкцыі па ліквідацыі», – паведамляе генеральны дырэктар кампаніі Юрый Рыжанкоў, якога цытуе інфармацыйная кампанія «Інтерфакс-Україна».

ichef.bbci.co.uk

Па яго словах, у беларускай і расійскай структурах працавалі топ-менеджэры, менеджэры, спецыялісты, якія былі грамадзянамі Беларусі ці Расіі. Многія з іх адрабілі ў кампаніі больш за 10 гадоў. Пасля 24 лютага работнікі або былі звольненыя, або звольніліся самі. Цяпер засталіся адзінкі.

Галаўныя прадпрыемствы кампаніі месціліся ў цяпер акупаваным расійскімі войскамі Марыупалі. Заводы зазналі сур’ёзныя разбурэнні і ацэнка стратаў можа быць вызначаная па вызваленні гораду ад расіян.

У структурах «Метінвеста» у Марыупалі працавалі 35 тысяч чалавек. З іх прыкладна палова выйшлі на сувязь з кампаніяй, большая частка выехала на тэрыторыю, падкантрольную Украіне. Больш за тысячу ўладкаваныя на прадпрыемствы групы, яшчэ 2 тысячы праходзяць перападрыхтоўку – чакаецца, што яны далучацца да калектываў у Запарожжы, Каменскім і Крывым Рогу.

МЗС Беларусі не мае інфармацыі аб забароне грамадзянам Беларусі наведваць Польшчу і краіны Балтыі

Навіна ад

Ведамства зняпраўджвае звесткі «шэрагу інфармацыйных рэсурсаў» аб увядзенні забароны для беларусаў, якія маюць шэнгенскія візы. Тым часам, у Літве не выключаюць, што такія захады могуць быць уведзеныя.

“Па стане на сённяшні дзень (19 верасня), у МЗС Беларусі няма ніякай афіцыйнай пацвярджальнай інфармацыі на гэты конт”, – заявілі ў прэс-службе МЗС Беларусі, піша БелТА.

Паводле выдання, раней шэраг інфармацыйных рэсурсаў распаўсюдзіў інфармацыю, што Эстонія, Латвія, Літва і Польшча ўводзяць забарону на ўезд грамадзян Расіі і Беларусі з шэнгенскімі візамі, выдадзенымі ў іншых дзяржавах ЕС.

Адно з расійскіх інфармацыйных агенцтваў апублікавала такую інфармацыю, спасылаючыся на МЗС Эстоніі.

«Разам з тым карэспандэнту БЕЛТА на сайце МЗС Эстоніі не ўдалося знайсці пацвярджэння, каб гэта забарона датычылася і грамадзян Беларусі. У адной з публікацый гаворка толькі аб тым, што Эстонія разам з Латвіяй, Літвой і Польшчай забароніць уезд праз знешнюю мяжу для грамадзян Расіі, якія маюць кароткатэрміновую шэнгенскую візу. У Эстоніі забарона на ўезд уступае ў сілу з 19 верасня», гаворыцца ў публікацыі БелТА.

З 19 верасня ў краінах Балтыі і Польшчы набывала моц забарона на ўезд расійскіх турыстаў з шэнгенскімі візамі праз знешнія межы Еўрапейскага саюзу. У Літве загаварылі аб падобных захадах адносна беларусаў, пісаў Магілёў.media.

Забарона на ўезд грамадзян Расіі, звязаны з вайной ва Ўкраіне.

Міністарка ўнутраных справаў Літвы Агне Білатайце даводзіць, што цяпер вырашаюць пытанне, ці не прыняць падобнае рашэнне адносна беларусаў.

«Я ясна бачу, што беларускі рэжым таксама ўдзельнічае ў ваенных дзеяннях і арганізуе гібрыдныя атакі супраць Літвы, выкарыстоўваючы нелегальных мігрантаў. Я думаю, што гэта сур’ёзныя аргументы для вырашэння пытання беларусаў», – лічыць урадоўца.

фота: prsa.pl

У Літве задумаліся, ці не абмежаваць услед за расіянамі ўезд турыстам з Беларусі

Навіна ад

У краінах Балтыі і Польшчы набывала моц забарона на ўезд расійскіх турыстаў з шэнгенскімі візамі праз знешнія межы Еўрапейскага саюзу. У Літве загаварылі аб падобных захадах адносна беларусаў.

Забарона на ўезд грамадзян Расіі прадугледжаная ў прынятай парламентам Літвы пастанове аб аб’яўленні надзвычайнага становішча на мяжы з Расіяй і Беларуссю. Такі парадак уведзены ў сувязі з вайной ва Ўкраіне.

g2.dcdn.lt

Міністарка ўнутраных спраў Агне Білатайце кажа, што пакуль невядома, як доўга будзе трываць такі парадак, аднак расіяне, паводле яе слоў, ужо цяпер павінны ацаніць, ці варта ім ехаць у Літву, калі яны не трапляюць у спіс выключэнняў, піша інфармацыйнае агенцтва DELFI.

«Як вядома, ідзе жорсткая вайна, яе арганізавала Расія супраць Украіны. Мы бачым, што Расія як дзяржава непрагназаваная, агрэсіўная, 3/4 яе грамадзян падтрымліваюць такія дзеянні сваёй краіны. Непрымальна, каб расіяне, якія падтрымліваюць вайну, свабодна падарожнічалі па свеце, Літве, ЕС. Гэта аспекты, якія датычацца бяспекі, паколькі падтрымка вайны – пагроза для бяспекі нашай краіны і ЕС», – тлумачыць міністарка.

«Пакуль мы не бачым прыкмет заканчэння вайны, – адзначае яна. – Пакуль Расія дзейнічае агрэсіўна, мы, відаць, павінны будзем прымаць пэўныя рашэнні».

Паводле яе ў Літву будуць упускаць толькі тых расіян, якія адказваюць наступным крытэрам: асобы, якія прыязджаюць па гуманітарных прычынах, змагары з крамлёўскім рэжымам, дысідэнты, якія праязджаюць праз Літву транзітам, асобы, якія ажыццяўляюць міжнародныя перавозкі, асобы, у якіх ёсць візы з працяглым тэрмінам дзеяння або від на жыхарства.

Агне Білатайце заўважае, што цяпер вырашаюць пытанне, ці не прыняць падобнае рашэнне адносна беларусаў.

«Я ясна бачу, што беларускі рэжым таксама ўдзельнічае ў ваенных дзеяннях і арганізуе гібрыдныя атакі супраць Літвы, выкарыстоўваючы нелегальных мігрантаў. Я думаю, што гэта сурʼёзныя аргументы для вырашэння пытання беларусаў», – лічыць урадоўца.

Паводле Службы аховы дзяржаўнай мяжы Літвы, з паўночы да 9 гадзін у краіну не ўпусцілі 11 грамадзян Расіі.

«Большасць з іх спрабавалі трапіць у Літву праз КПП Кібартай. Астатнія спрабавалі праехаць праз беларуска-літоўскую мяжу», – паведамляе кіраўнік службы Рустам Любаеў.

Паводле яго, латышскія калегі раніцай сказалі, што ў іх пакуль не было ніводнага такога выпадку.

Навіны пабрацімаў. На Мікалаеўшчыне Расія параніла дваіх пенсіянераў і разбурыла жылыя дамы

Навіна ад

У Ачакаве расійскія войскі абстралялі тры жылыя дамы. 73-гадовы мужчына і 59-гадовая жанчына атрымалі раненні.

Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці.

Мікалаеў расійскія войскі атакавалі 18 верасня ноччу. Разбурэнні зазналі гарадская больніца і гаражны кааператыў. Абышлося без пацярпелых.

niknews.mk.ua

Ачакаў абстрэльваўся 18 верасня двойчы. Першы раз гэта адбылося ноччу.

«У выніку цяжкія раненні атрымалі два чалавекі. Пашкоджаныя жылыя дамы. У некаторых раёнах гораду няма доступу да сеткі Інтэрнэт», – паведаміў у тэлеграм-канале кіраўнік абласной ваеннай адміністрацыі Віталій Кім.

Выданне «Миколаївськие новини» удакладняе, што раненні атрымалі 73-гадовы мужчына і 59-гадовая жанчына.

niknews.mk.ua

У дзень ракеты трапіла па адкрытых тэрыторыях Ачакава і абышлося без пацярпелых.

У Мікалаеўскай вобласці з пачатку поўнамаштабнага ўварвання Расіі загінулі 436 грамадзянскіх асоб, у тым ліку 11 дзяцей.

Пабрацімства Мікалаева з Магілёвам было замацаванае дамовай у 2009 годзе.

31 мая 2022 году мэр украінскага гораду заявіў, што Пагадненне аб пабрацімстве з Магілёвам скасаванае і выказаў спадзеў, што яно будзе адноўленае, калі Беларусь стане свабоднай.

Магілёў. media працягвае сачыць за жыццём Мікалаева, нягледзячы на спыненне партнёрскіх сувязяў з Магілёвам.

Мікалаеў месціцца за 65 кіламетраў ад Чорнага мора. Да вайны ў ім жыло 490 тысяч чалавек. Траціна з іх вымушана была пакінуць горад. Паводле Генштабу Узброеных сіл Украіны Мікалаеў адзін з асноўных кірункаў наступу расіян.

Яго рэгулярна абстрэльваюць, знішчаючы гарадскую інфраструктуру і змушаючы мясцовую ўладу капітуляваць. Прэзідэнт Украіны Уладзімер Зяленскі прысвоіў Мікалаеву ганаровае званне «Горад-герой».

Вайна ва Ўкраіне. У Харкаўскай вобласці атакаваная псіхіятрычная лякарня, а ў Краматорску – гасцініца

Навіна ад

У Харкаўскай вобласці загінулі чацьверы супрацоўнікаў псыхіятрычнай лякарні, якія эвакуявалі пацыентаў. У Краматорску, горадзе ў Данецкай вобласьці, ракеты трапілі ў гасьцініцу. Там абышлося без ахвяраў.

Паводле кіраўніка Харкаўскай абласной ваеннай адміністрацыі Алега Сінягубава, расійскія ракеты пацэлілі ў псыхіятрычную лякарню, якая месціца ў сяле Стрылеча. У больніцы перабываюць звыш 600 пацыентаў.

“Паводле папярэдніх дадзеных, на жаль, загінулі 4 мэдычных работнікаў, 2 пацыенты параненыя”, – піша ў тэлеграм-канале Алег Сінягубаў.

 Па Краматорску расійскія войскі стралялі ноччу. Снарады пацэлілі ў гасцініцу. 

images.unian.net

“Паводле папярэдняй інфармацыі, пацярпелых на месцы выбуху не зафіксавана”, – паведамляе інфармацыйнае аценцтва “УНІАН”.

Выданне піша, што 17 верасня, паводле кіраўніка Данецкай абласной ваеннай адміністрацыі Паўла Кірыленкі, у выніку абстрэлу расіянамі паселішча Канстанцінаўка былі параненыя пяць чалавек, сярод іх дзіця.