Category: Навіны Магілёва

Горача не будзе – пахмурнае з дажджамі надвор’е. Прагноз на тыдзень

Навіна ад

На працягу новага рабочага тыдня ў Магілёўскай вобласці сіноптыкі прагназуюць у асноўным воблачнае з дажджамі, цёплае надвор’е. Будуць пераважаць вятры паўночна-усходнія і паўночныя. 

Удзень чакаецца да +15, +24°С, начныя тэмпературы падрастуць да +11 +16°С. Працягласць дня з панядзелка да пятніцы падрасце і дасягне 17 гадзін і 7 хвілін – не хапае ўсяго 2 хвілін да макісмальнай велічыны дня. Ужо ў канцы працоўнага тыдня сонца ўзыдзе ў 4:27, зойдзе ў 21:34.

Сінаптычны прагноз на панядзелак, 12 чэрвеня. 

У ноч з нядзелі на панядзелак да +11°С, раніцай +14°С, увечары да +16°С. У дзённыя гадзіны паветра прагрэецца месцамі да +20°С. На працягу сутак будзе воблачна, пераважна без ападкаў. Вятры на працягу сутак паўночна-усходнія, хуткасцю да 4 м/с, пры парывах да 9 м/с. Геамагнітнае поле няўстойлівае. Убываючы Месяц.

У аўторак, 13 чэрвеня будзе воблачна, без ападкаў. 

Будуць панаваць паўночна-ўсходнія вятры хуткасцю да 4-6 м/с. Уноч і раніцай ад +12°С да +14°С, днём тэмпература падрасце да +18°С, месцамі і да +20°С. Да вечара слупок тэрмометра ўтрымаецца на рысцы не ніжэй за +17°С. Геамагнітнае поле спакойнае. Убываючы Месяц.

Серада – воблачная

У сярэдзіне рабочага тыдня, 14 чэрвеня, прагназуецца воблачнае надвор’е, пераважна з дажджамі. Начныя і ранішнія тэмпературы да +16°С, у другой палове дня да +22°С. На працягу сутак прагназуюцца паўночна-усходнія вятры хуткасцю 3-5 м/с. Геамагнітнае поле спакойнае. Убываючы Месяц.

Чацвер – дажджы 

У чацвер, 15 чэрвеня, сіноптыкі прагназуюць воблачнае з дажджамі надвор’е. Вецер паўночны, хуткасцю 4-5 м/с. Ноччу і ўранні да +15°С, у абед і на працягу другой паловы дня +15° +17°С. Месяц убывае.

Пятніца, 16 чэрвеня

У апошні дзень працоўнага тыдня, 16 чэрвеня, па папярэдняму прагнозу будзем чакаць у асноўным воблачнае, з ападкамі ноччу і ў першай палове дня надвор’е з панаваннем заходніх  вятроў хуткасцю да 3 м/с. У другой палове дня воблачна, без істотных ападкаў, з паўночнымі вятрамі 3-4 м/с. Уноч і ў ранішнія гадзіны да +13°С, удзень і ўвечары да +24°С. Маладзік.

Фота: mogilev.media

Куды схадзіць на выхадных – у Магілёве адкрылася годная выстава

Навіна ад

У магілёўскім музеі імя В.К. Бялыніцкага-Бірулі адкрылася выстава “V Трыенале дэкаратыўнага мастацтва Беларускага саюза мастакоў “ДЭКАРТ-22. Выбранае”.

Для Беларускага саюза мастакоў стала ўжо традыцыйным раз на тры гады напрыканцы года ў лістападзе праводзіць буйны мастацкі праект, прысвечаны сучаснаму дэкаратыўна-прыкладному мастацтву. 

Цяпер творы Трыенале выстаўлены ў магілёўскім філіяле Нацыянальнага мастацкага музея – музеі імя В.К. Бялыніцкага-Бірулі.

У выставе ўдзельнічаюць не толькі сябры секцый дэкаратыўнага мастацтва і тэкстылю“Беларускага саюза мастакоў”, але і творчая моладзь, студэнты, мастакі з усіх рэгіёнаў Беларусі. Прадстаўлены формы як класічнага, традыцыйнага мастацтва, так і новыя эксперыментальныя інтэрпрэтацыі.

У экспазіцыі можна ўбачыць сучасны тэкстыль, кераміку, шкло, батык, метал.

Фота: mogilev.media

Сёння магілёўскіх выпускнікоў будуць заганяць на канцэрт расійскіх Z-артыстаў

Навіна ад

Хочуць школьнікі, ці не хочуць, але адміністрацыі гімназій і школ прымушаюць іх пайсці на канцэрт прапуцінскіх спевакоў – Вольгі Бузавай, гурта “Прапаганда” і іншых.

Сёлета ў Магілёве выпускны вечар ператворыцца ў афіцыйнае мерапрыемства з афіцыёзнай праграмай. Звычайнага развітання са школай у адзінаццацікласнікаў практычна не будзе – выступленні чыноўнікаў і канцэрт прапагандыстаў зоймуць увесь вечар, каля пяці гадзін, з 18:00 да 23:00. Мерапрыемства будзе праходзіць перад “Атрыумам”. Бацькі і дзеці выпускнікоў, што цэлы год рыхтаваліся да аднаго з самых запамінальных вечароў у жыцці, проста пастаўленыя перад фактам.

– Спачатку пагражалі, што напішуць дрэнную характарыстыку, а атэстат не выдадуць 10-га, тыпу яго падправяць. – расказаў беларускім журналістам адзін з магілёўскіх выпускнікоў – Пасля абурэння бацькоў “слёзна” прасілі прыйсці. Цяпер ужо проста «настойліва рэкамендавалі». Тлумачаць, што павінна быць максімальная яўка, казалі, што самі ўсё разумеюць, але зрабіць нічога не могуць, бо пры адсутнасці людзей на канцэрце пытацца будуць з адміністрацыі школы.

Пра новы фармат правядзення выпускнога вечара ў 2023 годзе школьнікі і іх бацькі даведаліся ў пачатку траўня. Цяпер усе раней запланаваныя мерапрыемствы на вечар прыходзіцца адмяняць альбо істотна скарачаць – па сваёй праграме юнакі і дзяўчаты змогуць адсвяткаваць толькі бліжэй да апоўначы.

Культурную праграму для выпускнога вечара ў Магілёве падрыхтавала упраўленне культуры гарвыканкама. У спісе – расійскія спевакі, што адзначыліся актыўнай падтрымкай вайны супраць Украіны. 

Хэдлайнер канцэрта Вольга Бузава – актыўная прыхільніца Пуціна, у кастрычніку 2022 года яна ездзіла ў самаабвешчаную ДНР з гуманітарнай дапамогай. У канцы 2022 года яна выпусціла адмысловую песню з крытыкай тых расіян, якія паехалі за мяжу на фоне масавай мабілізацыі.

Вакалісткі гурта “Стрэлкі” ездзілі ў Данецк яшчэ ў 2017 годзе, да поўнамаштабнай вайны і анэксіі Расіяй новых тэрыторый Украіны. А «Прапаганда» адзначылася тым, што павіншавала расейскіх мужчын з 23 лютага фатаграфіяй (на загалоўным фота) з літарай Z, якая стала сімвалам уварвання, а ў лістападзе 2022-га выступала ў расейскай вайсковай частцы, пажадаўшы байцам «вярнуцца з перамогай жывымі і цэлымі!».

У канцэрце таксама возьмуць удзел магілёўскія артысты. Дзмітрый Азаранка выканаў сумна вядомую песню “Беларуская жонка”. Таксама будзе спяваць Ганна Трубяцкая, якая раней выступала на украінскім шоў “Х-фактар”.

Фота з адкрытых крыніц

Дзівосы дня цвярозасці – на Магілёўшчыне гарэлку нельга, піва можна, на Гомельшчыне піва нельга, гарэлку можна

Навіна ад

10 чэрвеня ў Беларусі пройдуць выпускныя вечары ў школьнікаў, і па гэтай прычыне практычна ва ўсіх рэгіёнах краіны будзе абмежаваны гандаль алкагольнымі напоямі. Але ўсюды па-рознаму.

Чытачы mogilev.media падзяліліся дзіўным назіраннем. Заўтра, 10 чэрвеня ва ўсіх крамах Магілёўшчыны забараняецца продаж моцных алкагольных напояў, а вось піва і слабаалкагольныя напіткі можна будзе набываць. А вось на Гомельшчыне абмежаванне адваротнае – так, у крамах Рагачоўскага раёна нельга будзе набыць піва і слабаалкагольныя напоі, тады як на любую прадукцыю з градусам вышэй за 7 – ніякіх абмежаванняў.

Атрымліваецца, што калі на Магілёўшчыне нельга будзе набыць гарэлку, а піва можна, то на Гомельшчыне піва не, а вось гарэлку – колькі заўгодна.

Фота: чытачы mogilev.media і з адкрытых крыніц

Санслужба выявіла небяспечныя цукеркі

Навіна ад

Санітарна-эпідэміялагічная служба выявіла наяўнасць сарбінавай кіслаты ў турэцкіх цукерках “Coco” вытворчасці турэцкай кампаніі “Antat” – паведамляе Магілёўскі абласны цэнтр гігіены, эпідэміялогіі і грамадскага здароўя.

Цукеркі – з какосавай стружкі, пакрытыя шакаладнай глазурру. Сарбінавая кіслата, што ўваходзіць у склад прадукта, не была пазначаная на этыкетцы.

Фота ілюстрацыйнае.

Цёпла аж горача, дзесьці пройдуць дажджы, магчымы навальніцы – прагноз надвор’я на ўікенд

Навіна ад

На канец тыдня ў Магілёўскай вобласці сіноптыкі прагназуюць ноччу ад +11° да +17°С, днём – ад 16°С да +27°С.

Будзе пераважаць пераменна воблачнае і пахмурнае з ападкамі і навальніцамі надвор’е. Працягласць дня вырасце да 17 гадзін 3 хвілін 11 чэрвеня. У нядзелю сонца ўзыйдзе ў 4:28, зойдзе ў 21:31.

Сінаптычны прагноз надвор’я на другія чэрвеньскія выходныя наступны.

Сёння, 9 чэрвеня, пятніца 

Надвор’е абяцае быць воблачным з праясненнямі. Уноч да +13° +17°С, днём тэмпература падрасце да +24°С, месцамі да +26 +27°С. Днём месцамі пройдуць невялікія дажджы, магчымы навальніцы. На працягу сутак будуць паступаць паветраныя масы з паўднёвага захаду, захаду і паўночнага ўсходу. Хуткасць вятроў 3-4 м/с, месцамі пры парывах да 9 м/с. Убываючы месяц. Магнітнае поле спакойнае.

Субота, 10 чэрвеня

Будзе пераважна пахмурна. Уноч і ўранні да +13° +17°С, днём слупкок тэрмометра падымецца да +17° +20°С, месцамі і да +21°С. Удзень месцамі магчымы кароткатэрміновыя дажджы, не выключаюцца навальніцы. На працягу сутак будуць паступаць паветраныя масы з паўночнага ўсходу, хуткасць вятроў 4-6 м/с, пры парывах да 10-14 м/с. Убываючы месяц. Магнітнае поле няўстойлівае.

Нядзеля, 11 чэрвеня

Ноччу воблачна, да +11° +15°С, раніцай да +17°С, удзень паветра прагрэецца да +18°С, месцамі да +23°С. Пахмурна, пераважна без ападкаў. З рання і да вечара вызначаць надвор’е будуць паўночна-усходнія вятры хуткасцю 3-7 м/с. Убываючы месяц – апошняя чвэрць. Магнітнае поле спакойнае.

Ранак панядзелка 12 чэрвеня пачнецца з воблачнага надвор’я, з ранішнімі тэмпературамі +11° +14°С, з паўночна-усходнімі вятрамі хуткасцю да 3-7 м/с, якія прынясуць у асобныя раёны дажджы. Днём да +18° +21°С. Убываючы Месяц. Магнітнае поле спакойнае.

Фота: mogilev.media

Спакуса паліўнай карткі – сем магілёўцаў скралі тону саляркі

Навіна ад

З лютага па красавік бягучага года сем магілёўцаў выкралі з прадпрыемства не менш як тону дызпаліва на агульную суму каля 2 000 рублёў – паведамляе прэс-служба Магілёўскага абласнога УУС. 

У шасці працаўнікоў мелася некалькі паліўна-заправачных картак арганізацыі, прызначаных для транспартных сродкаў прадпрыемства. Мужчыны карысталіся імі, запраўляючы асабістыя аўтамабілі і перадаючы карты адзін аднаму, а таксама свайму прыяцелю – сёмаму фігуранту. 

Яны таксама злівалі паліва ў каністры і перапрадавалі іншым людзям. Узбуджана крымінальная справа.

Фота: Магілёўскае УУС.

Клімавіцкіх школьнікаў адправяць пажыць у вайсковай частцы на дзесяць дзён

Навіна ад

Дваццаць непаўнагадовых навучэнцаў клімавіцкіх школ правядуць дзесяць дзён у ваеннай частцы ў Пашкава пад Магілёвам. Іх чакае жыццё ў намётавым лагеры, розныя армейскія заняткі, у тым ліку і фізічныя.

З 23 чэрвеня дваццаць юнакоў ва ўзросце ад чатырнаццаці гадоў і старэй з розных школ Клімавіцкага раёна правядуць частку сваіх летніх канікул на базе ваеннай часткі ў складзе зводнага атрада. Жыць школьнікі будуць у намётавым лагеры. У пашкаўскай частцы для іх падрыхтавалі розныя мерапрыемствы, заняткі, у тым ліку фізічныя – паведамляе клімавіцкая раённая газета “Родная ніва”. 

Мерапрыемства арганізавана аддзелам адукацыі Клімавіцкага райвыканкама нібыта з мэтай выхавання школьнікаў у патрыятычным духу, а таксама каб пазнаёміць хлопцаў з армейскім жыццём вайскоўцаў. 

Фота ілюстрацыйнае

Вечарам 10 чэрвеня, з-за свята выпускнікоў, па Першамайскай у Магілёве не будзе хадзіць транспарт

Навіна ад

У сувязі з правядзеннем свята “Выпускны вечар” 10 чэрвеня 2023 года будзе закрытая вуліца Першамайская – паведамляе Магілёўаблтранс. У сувязі з гэтым усе тралейбусныя маршруты, што хадзілі праз цэнтр горада, памяняюць маршрут свайго руху. Тралейбусы з Задняпроўя і з вуліцы Чалюскінцаў будуць хадзіць толькі да плошчы Арджанікідзэ. Змены ў руху адбудуцца на перыяд з 16.00 да 23.00.

Фота ілюстрацыйнае

З пачатку года санслужба выявіла няякасную прадукцыю на 75% аб’ектаў з тых, якія правярала

Навіна ад

Магілёўскі абласны цэнтр гігіены, эпідэміялогіі і грамадскага здароўя падсумаваў вынікі праверак на прадпрыемствах гандлю і грамадскага харчавання па ўсім рэгіёне.

З 578 арганізацый, якія трапілі пад праверку, парушэнні былі выяўленыя ў 340 – што складае 58% ад агульнай колькасці. З 1 263 абследаваных аб’ектаў парушэнні правіл гандлю знайшліся на 944-х, а гэта 74,7% ад усіх.

У структуры выяўленых парушэнняў часцей за ўсё траплялася рэалізацыя тавараў без маркіроўкі або з неадпаведнай інфармацыяй на маркіроўцы – 213 выпадкаў. Таксама была выяўлена рэалізацыя прадукцыі са скончаным тэрмінам прыдатнасці або захоўвання – 163 выпадкі, парушэнне ўмоў захоўвання харчовай прадукцыі – 153 выпадкі, рэалізацыя без дакументаў, якія сведчаць пра якасць і бяспеку – 36 выпадкаў.

Фота ілюстрацыйнае