Вывесці ў суседнюю краіну збіраліся больш за 1 тону сыру, на які не было суправаджальных дакументаў. Ладунак ацэнены ў 15 тысяч рублёў. А выкрылі кантрабанду ў Мсціслаўскім раёне.
На перавозчыкаў складзены пратакол і ім пагражае штраф у памеры да пяцідзесяці працэнтаў ад кошту прадмету адміністрацыйнага правапарушэння, паведамляе інтэрнэт-рэсурс GOLK.by.
Паводле выдання кантрабандыстаў выкрылі падчас «спецыяльнага мерапрыемства супрацоўнікі аддзелу па барацьбе з кантрабандай Магілёўскай мытні сумесна з супрацоўнікамі абласнога ДАІ Мсціслаўскага РАУС».
У Расію, на мяжы з якою адсутнічае сталы беларускі пагранічны і мытны кантроль кантрабандай вязуць металалом, мясныя харчы ды іншыя грузы, пісаўМагілёў.media.
Двое грамадзян суседняй краіны нават спрабавалі вывезці з Беларусі 6 тон агародніннай прадукцыі без фітасанітарных дакументаў. Расіян спынілі ў Мсціслаўскім раёне. Як вынікае з публікацыяў праўладных мэдыяў у гэтым раёне найбольш затрымліваюць кантрабандыстаў.
Андрэй Іванец заяўляе, што Міністэрства адукацыі будзе жорстка кантраляваць і каардынаваць працу ў сямейным выхаванні.
На што будзе нацэленая дзейнасць ведамства ўрадовец згадаў у інтэрв’ю тэлеканалу «БТ», гаворачы пра ўвядзенне ў школах «гендарнага курсу».
Паводле Іванца «міністэрствам адукацыі не рэкамендавана ніякага гендарнага курсу». Ім распрацавана шэсць факультатываў для вучняў розных класаў аб сямейных каштоўнасцях, якія заснаваны на традыцыйнай культуры, традыцыйных каштоўнасцях беларускага народу».
«Бо не проста так мы ў Канстытуцыі замацавалі ўжо тое, што шлюб – гэта саюз мужчыны і жанчыны», – адзначае ён.
«У сувязі з гэтым Міністэрства адукацыі будзе вельмі жорстка кантраляваць і каардынаваць працу ў сямейным выхаванні. Таму што нам чужая еўрапейская ідэалогія, чужыя еўрапейскія каштоўнасці, і мы проста не маем права дапусціць таго, каб яны ўсяляк праніклі ў розумы нашай моладзі», – настойвае Андрэй Іванец.
Ён лічыць, што прынятыя яго ведамствам захады не дазволяць «еўрапейскім каштоўнасцям» нейкім чынам трапіць «і ў беларускую сістэму адукацыі, і ў грамадства ў цэлым».
Абодвух жанчын затрымалі на аўтавакзале ў Віцебску, адкуль яны спрабавалі з’ехаць на аўтобусе ў Расію.
42-гадовая жыхарка Віцебску пазнаёмілася з 20-гадовай жыхаркай Магілёўшчыны ў сацыяльных сетках і ўгаварыла заняцца прастытуцыяй. Дзяўчыне былі абяцаныя добрыя ўмовы пражывання ў апартаментах і зарплату ад двух тысяч долараў штомесяц, паведамляе тэлеграм-канал «МВД Беларуси».
Супраць суценёркі, якую праваахоўнікі называюць «трафікёршай» узбуджана крымінальная справа.
Грабянёўскае, ці «Святое» возера – яшчэ адна перліна Магілёўскай ўнікальнасці. Гэта найвялікшы ў тутэйшы вадаём. Яго глыбіня сягае 19 мэтраў. Ён лічыцца помнікам прыроды з адметнай экасістэмай. Возера застаецца, нягледзячы на не найлепшыя для сябе часы, улюблёным месцам адпачынку гараджанаў.
Магілёў.media працягвае прагулкі па вядомым мясцінам гораду. Мы стараемся паказаць у сваіх відэазамалёўках хараство магілёўскіх краявідаў. Яны дапамагаюць адпачыць ад будзённасці, акунуцца ў свет гісторыі роднага гораду і, магчыма, угледзець будучыню.
Грабянёўскае возера ўпершыню ў гістарычных хроніках згадваецца ў 1643 годзе. Паводле жыхароў пасёлку Грабянёва, больш за пяць дзясяткаў гадоў таму, возера было невялікім. Калі паблізу пачалі масава будаваць жыллё, з вадаёму бралі пясок. Возера значна павялічылася як памерамі, гэтак і глыбінёю.
Старажылы кажуць, што ў даўнейшыя часы з возера выцякала рачулка Качарага. Па іх словах вадаём з Дняпром злучаў Гаджыеў роў. Складаную сістэму сувязі возера з ракой знішчылі меліяратары. З таго часу вада ў ім зрабілася стаячай, чысціць не спрабавалі. Працы камунальнікаў зводзіліся да ўпарадкавання пляжу.
У 2012 годзе возера прызнавалася самым чыстым вадаёмам у горадзе, а праз два гады санэпідэмстанцыя выдала прадпісанне аб забароне купання, бо вада не адпавядала стандартам па мікрабіялагічных паказчыках.
Каб Грабянёўскае возера ўратаваць, трэба пазбавіць дно арганікі. За шмат гадоў на ім пласт арганічных адкладаў вырас да двух мэтраў, і яны гніюць. З надыходам спёкі вада награваецца і пачынае «цвісці».
Адзначаецца з 2013 году. Заснаваны Генеральнай асамблеяй ААН, каб звярнуць увагу грамадскасці на ролю дабрачынных арганізацыяў і асобных людзей у пераадоленні агульначалавечых праблем і цяжкасцяў.
Міжнародны дзень дабрачыннасці супадае з гадавінай смерці Маці Тэрэзы Калькуцкай, якая прысвяціла жыццё служэнню бедным і хворым.
У 1979 годзе ёй была ўручана Нобелеўская прэмія за ўнёсак у барацьбу з беднасцю. Манашка аддала ўсе грошы абяздоленым у Індыі.
У 2003 годзе яна была абвешчана багаслаўлёнай, а 4 верасня 2016 году далучана да спісу святых Рыма-каталіцкага Касцёлу.
1860 год. Нарадзіўся Кандрат Лейка.
Пісьменнік, празаік, драматург і педагог.
Друкаваўся ў газетах «Наша ніва», «Наша думка» і «Беларускі календар». Выдаў п’есу «Снатворны мак» – першую для беларускага лялечнага тэатру.
У 2015 годзе ў выдавецтве «Кнігазбор» пабачыў свет яго зборнік «Пан Трудоўскі».
1893 год. Нарадзіўся Язэп Фарботка.
Нацыянальны дзеяч, паэт, фатограф, навуковец.
У 1918–1920 гадах далучыўся да беларускага палітычнага і культурнага руху.
У 1918 годзе быў кансультантам і кіраўніком справамі беларускай дэлегацыі на перамовах з Украінскай Народнай Рэспублікай, дзе абмяркоўваліся вайскова-палітычныя пытанні і эканамічнае супрацоўніцтва Беларусі і Украіны.
Па Другой сусветнай вайне быў арыштаваны і сасланы на Данбас. У канцы 1945 году пасяліўся ў Лодзі (Польшча).
Удзельнік клуба «Беларуская хатка», служыў акторам, адміністратарам у «Беларускім савецкім тэатры».
Першыя вершы надрукаваў у газеце “Наша Ніва” у 1912 годзе – «Зацьменне» і «Зруйнаваў». Пераклаў урывак «Пана Тадэвуша» на беларускую мову.
Займаўся мастацкай фатаграфіяй у «Віленскім фотаклубе» Яна Булгака.
1917 год. Нарадзіўся Язэп Сажыч.
Грамадска-палітычны дзеяч. Старшыня Рады Беларускай Народнай Рэспублікі (1982-1997).
Адзін з заснавальнікаў аддзелу Беларуска-амерыканскага задзіночання ў штаце Мічыган.
З 1953 году сябра Рады БНР. Заснаваў аддзел Згуртавання беларускіх ветэранаў у Дэтройце, выконваў абавязкі сакратара ў справах ветэранаў пры Радзе БНР.
У сакавіку 1993 году браў удзел у святкаванні 75-й гадавіны незалежнасці Беларусі ў Мінску.
Памёр 19 лістапада 2007 года ў Сэнт-Клэр-Шорз, Мічыган. Пахаваны на беларускіх могілках у Іст-Брансвіку (Нью-Джэрсі, ЗША).
1918 год. Саўнаркам бальшавіцкай Расіі выдаў пастанову «О красном терроре».
Згодна з ёю «падпадалі пад расстрэл усе асобы, датычныя да белагвардзейскіх арганізацый, змоваў і мяцяжоў».
У 1917-1922 гадах было расстраляна 140 тысяч чалавек.
1937 год. Расстраляны Анатоль Дзяркач (Зіміёнка).
Беларускі паэт, сатырык, гумарыст, мемуарыст.
Служыў у земскай і гарадской управах у Мінску. Член партыі эсэраў. У 1908 годзе арыштаваны, адпраўлены ў ссылку.
Пасля “Лютаўскай рэвалюцыі” у Расіі ў 1917 служыў у мінскіх адміністрацыйных органах Часовага ўраду.
Працаваў у газетах «Беларуская вёска» і «Піянер Беларусі». З 1924 рэдагаваў сатырычны часопіс «Дубінка» (дадатак да газеты «Звязда»). Працаваў таксама ў часопісе «Полымя».
Член Саюзу пісьменнікаў савецкай Беларусі з 1934 году.
Арыштаваны савецкімі органамі ў 1936 годзе і ў 1937-ым расстраляны. Рэабілітаваны ў 1957 годзе.
1944 год. Нарадзіўся Майкл Дуглас.
Амерыканскі актор, сын актора Кірка Дугласа (Даніловіча), ураджэнца Беларусі, з Чавус.
Сусветна вядомы па ролях у фільмах «Ракавая жарсць» ды «Асноўны інстынкт», прадзюсар фільму «Палёт над гняздом зязюлі».
Уладальнік некалькіх «Оскар».
2002 год. Памёр Артур Вольскі.
Пісьменнік.
Працаваў дырэктарам Дому літаратара, рэдактарам выдавецтва «Юнацтва».
Аўтар зборнікаў, кніг паэзіі, прозы, казак для дзяцей, пʼес, сцэнароў.
Перакладчык з рускай, украінскай, літоўскай, латышскай, нямецкай і іўрыту.
Бацька беларускага спявака Лявона Вольскага.
У публікацыі выкарыстаныя звесткі з рэсурсу «Вікіпедыя» і іншых адкрытых у інтэрнэце крыніцаў
Звесткі пра пераслед паводле праваабаронцаў, медыяў і родзічаў тых, хто зазнае яго.
Ірына Леўшына
Падоўжаны тэрмін утрымання пад вартай да 28 верасня.
Дырэктарку і галоўную рэдактарку інфармацыйнай кампаніі БелаПАН Леўшыну, а таксама былога дырэктара кампаніі Дзмітрыя Наважылава затрымалі 18 жніўня 2021 года. Яны праходзяць па так званай «справе БелаПАН» з былым намеснікам дырэктара кампаніі медыяменеджарам Андрэем Аляксандравым і Ірынай Злобінай, якіх затрымалі 12 студзеня 2021 года.
Фігурантаў справы праваабарончая супольнасць прызнала палітзняволенымі.
КДБ прызнаў «экстрэмісцкім фармаваннем» «групу грамадзян з ліку супрацоўнікаў інфармацыйнага агенцтва ЗАТ «БелаПАН».
Леўшыной выстаўленае абвінавачванне ў «стварэнні экстрэмісцкага фармавання або ўдзел у ім».
Наважылаў абвінавачваецца ва «ухіленні ад выплаты падаткаў у буйным памеры» і «стварэнні экстрэмісцкага фармавання або ўдзел у ім».
Дзмітрый Крыцкі
Затрыманы.
Праваабаронцы, спасылаючыся на праўладныя тэлеграм-каналы, паведамляюць, што жыхар вёскі Быстрыца Кобрынскага раёну зазнае пераслед за ўдзел у пратэстах 2020 году. Акрамя таго ён быў падпісаны на «экстрэмісцкія» тэлеграм-каналы.
Ян Габіс
Затрыманы.
Праваабаронцы пішуць, што жыхара Маларыцкага раёну забралі, бо ён быў зарэгістраваны ў плане «Перамога». Пра тое зняволены расказвае на відэа, апублікаваным на праўладных тэлеграм-каналах.
Пра перажытае тады апавядае ўрач-інфекцыяніст Глускай цэнтральнай раённай больніцы Валянціна Дрэйгал. Яна лічыць, што каранавірус часова адступіў, але нікуды не падзеўся.
Медыкі чакаюць росту захворванняў, выкліканых рэспіраторнымі і кавід-інфекцыямі. Павелічэнне колькасці хворых чакаецца ўжо ў верасні. Міністэрства аховы здароўя запэўнівае, што медыцына падрыхтаваная да магчымай эпідэміі.
Тым часам, медыкам на месцах дазволілі стрымана расказваць аб сітуацыі з захворваннямі і згадваць з чым яны сутыкнуліся ў пандэмію. Падчас актыўнай яе фазы ў 2020 годзе звесткі пра сітуацыю з каранавірусам у рэгіёнах перасталі публікаваць. Дазнацца пра лічбы хворых было немагчыма. Міністэрства аховы здароўя публікавала агульныя дадзеныя па краіне. З іх праблематычна было зрабіць высновы пра маштаб эпідэміі.
glusk.by
Урач-інфекцыяніст Глускай цэнтральнай раённай больніцы Валянціна Дрэйгал кажа, што каранавірус часова адступіў, але нікуды не падзеўся, і ўжо ў верасні беларусы зноў сутыкнуцца з ім.
Па яе словах, у пандэмію ў Глускім раёне праз COVID-19 павялічылася колькасць інфарктаў і інсультаў. Стала больш смяротных выпадкаў, выкліканых каранавіруснай інфекцыяй. У пацыентаў рэзка ўпаў зрок, а ў кагосьці слых.
«У часткі пацыентаў назіраліся рэўматоідныя сімптомы, гэта значыць болі ў суставах. У кагосьці зніклі, сказіліся ці знізіліся смакавыя адчуванні, пахі, і працэс іх узнаўлення быў даволі працяглым. Пацярпела сістэмы згортвання крыві, адсюль трамбозы, у тым ліку сасудаў вачэй», – згадвае Валянціна Дрэйгал у інтэрв’ю газеце «Радзіма».
«У некаторых пацыентаў, – працягвае яна, – сурʼёзна пацярпелі ныркі, і аднаўленне працякала і працякае павольна. Разлад кагнітыўнай функцыі (пагаршэнне памяці, здольнасці ўспрымаць новую інфармацыю). Зʼяўляліся стрэс, трывожнасць – пасля перанесенага захворвання. Людзей адольвалі страхі, яны баяліся зноў заразіцца і захварэць, на гэтым фоне нават узнікалі псіхічныя разлады, якія патрабавалі медыкаментознага лячэння, – усё гэта посткавідный сіндром».
gdb.currenttime.tv
Валянціна Дрэйгал заклікае цяпер вакцынавацца «усяму даросламу насельніцтву і дзецям, пачынаючы з пяцігадовага ўзросту».
Яна лічыць, што гэтай восенню давядзецца вярнуцца да масак і сацыяльнага дыстанцыянавання. Па яе словах прафілактычныя меры дапамагаюць абараніцца ад хваробы, але гэта вонкавая абарона, а абараніць арганізм знутры здольная вакцынацыя.
«Два апошнія гады, мусіць, кожны дзень на працы, тут, у кабінеце інфекцыйных захворванняў, сутыкаюся як з праявамі гэтай хваробы, так і з яе наступствамі. Я бачу, як хварэюць прышчэпленыя і як тыя, хто разлічваў толькі на свой імунітэт і ад прышчэпкі адмовіўся. Сярод апошніх колькасць цяжкіх выпадкаў непараўнальна большая», – даводзіць мэдык.
Паводле афіцыйных звестак ад наступстваў каранавірусу памерла больш за 7 тысяч беларусаў. У пандэмію шпіталі сутыкнуліся з бракам лекаў і кіслароду. Тады не хапала нават павязак, каб абараніць органы дыхання. У краіне людзі для больніц шылі іх самі, ствараючы валанцёрскі рух.
Акрамя таго, 7 чалавек параненыя, з іх – трое дзеці.
Пішам, як вайна ва Ўкраіне ўплывае на жыццё еўрапейскіх гарадоў, якія маюць партнёрскія дачыненні з гарадамі Магілёўскай вобласці.
Мікалаеў расійскія войскі атакавалі ўначы. Горад зазнаў масіраваны ракетны абстрэл. Пашкоджаныя тры медычныя ўстановы, дзве навучальныя ўстановы, музей і жылыя дамы.
Абстраляныя былі і паселішчы Мікалаеўскай вобласці. Там зафіксаваныя пашкоджанні жылых дамоў і гаспадарчых будынкаў. У выніку абстрэлаў узніклі пажары.
«Толькі за ўчорашні дзень у Мікалаеўскай вобласці ў выніку баявых дзеянняў пацярпелі 7 чалавек. Сярод пацярпелых 3 дзяцей – усе з аскепкавымі раненнямі. На жаль, ёсць і загінулыя – 8-гадовае дзіця», – паведаміла старшыня абласнога савету Ганна Замазеева.
Яна піша, што ўсе пацярпелыя дастаўлены ў медычныя ўстановы, ім аказваецца неабходная дапамога.
«На сённяшнюю раніцу ў шпіталях Мікалаева перабывае 579 грамадзян, якія пацярпелі ад нападаў акупантаў на Мікалаеўшчыну», – дадае яна.
Паводле папярэдніх дадзеных, расійскія войскі білі па Мікалаеўшчыне ракетамі С-300. Іх абломкі адшуканыя каля аднаго з будынкаў, удакладняе інфармацыйнае агенцтва «УНІАН».
Пабрацімства Мікалаева з Магілёвам было замацаванае дамовай у 2009 годзе.
31 мая 2022 году мэр украінскага гораду заявіў, што Пагадненне аб пабрацімстве з Магілёвам скасаванае і выказаў спадзеў, што яно будзе адноўленае, калі Беларусь стане свабоднай.
Магілёў. media працягвае сачыць за жыццём Мікалаева, нягледзячы на спыненне партнёрскіх сувязяў з Магілёвам.
Мікалаеў месціцца за 65 кіламетраў ад Чорнага мора. Да вайны ў ім жыло 490 тысяч чалавек. Траціна з іх вымушана была пакінуць горад. Паводле Генштабу Узброеных сіл Украіны Мікалаеў адзін з асноўных кірункаў наступу расіян.
Яго рэгулярна абстрэльваюць, знішчаючы гарадскую інфраструктуру і змушаючы мясцовую ўладу капітуляваць. Прэзідэнт Украіны Уладзімер Зяленскі прысвоіў Мікалаеву ганаровае званне «Горад-герой».
Мілая дачніку карціна, калі на ягоных палетках пасеянае ўвесну ўзышло ды саспела. Пра ўрод на сваіх сотках ён гатовы апавядаць гадзінамі, чакаючы ад суразмоўцы захаплення ды зайздрасці. Каб пераканаць яго ён абавязкова нечым свойскім пачастуе. Уважліва выслухае калегу пра гісторыю ягоных поспехаў на зямлі.
Падслухоўваць такія гаворкі найчасцей даводзіцца ў прыгарадных цягніках. Дарогаю да лецішча, ці з яго, з наладаванымі торбамі садавіны ды гародніны, дачнікі з выглядам дасведчаных аграрыяў расказваюць адзін аднаму сакрэты свайго майстэрства.
Гэта нічога, што ўсё свядомае жыццё яны аддалі гораду. Папросту беларуса цягне да зямлі. У ёй яго сіла і ўпэўненасць, што заўтра абавязкова надыдзе і ўсё будзе добра.
Пра тое напісаў Магілёў.media яго чытач. Разам з развагамі пра «сялянскую душу беларуса» ён даслаў серыю фотаздымкаў з поспехамі сваёй аграрнай чыннасці. Ягоныя творы папоўнілі «Фотаальбом Магілёў.media».
У фотаальбоме Магілёў.media – сабраныя фотаздымкі, дасыланыя чытачамі. Іх аўтары суправаджаюць свае работы невялікімі допісамі. У асноўным тлумачаць, чаму вырашылі сфатаграфаваць той, ці іншы ўпадабаны вобраз. Як і раней, чакайма фотаздымкай і допісаў да іх у паштовай скрынцы [email protected].
Звесткі пра пераслед паводле праваабаронцаў, медыяў і родзічаў тых, хто зазнае яго.
Антон Малюга
Асуджаны да трох гадоў калоніі.
Паводле праваабаронцаў нагодаю для крымінальнага пераследу стала, нібыта, збіранне ім звестак аб размяшчэнні воінскіх частак і адсыланне іх у «экстрэмісцкія» тэлеграм-боты.
Малюгу прызналі вінаватым у «садзейнічанні экстрэмісцкай дзейнасці» і «незаконным збіранні звестак, якія складаюць дзяржаўныя сакрэты».
Справу разглядаў суддзя Мікалай Сянько.
Сяргей Раманаў
Змешчаны на месяц у памяшканне камернага тыпу, пішуць праваабаронцы.
Раней яго некалькі разоў змяшчалі ў штрафны ізалятар, а таксама пазбавілі былі рэжымнай перадачы і званкоў родным.
Праваабаронцы нагадваюць, што 22 снежня 2021 году Мінскі абласны суд актывісту анархісцкага руху Раманава асудзіў да 20 гадоў калоніі. Столькі ж далі яго паплечніку Аліневічу. Рэзановіча пакаралі да 19, а Дубоўскага – да 18 гадоў калоніі.
Разглядалі справу ў закрытым рэжыме.
Уладзімір Целяпун
Затрыманы.
Праваабаронцы пішуць, што яго забралі з дому і паводле папярэдніх звестак, яму інкрымінуюць «распаўсюджванне экстрэмісцкай інфармацыі ў Фэйсбуку». Па зняволенні ўтрымліваўся ў Мазырскім аддзеле міліцыі.
Вольга Кронда
Асуджанай да трох гадоў «хатняй хіміі» і штрафу ў 3000 рублёў забаранілі хадзіць у казіно ды гуляць у азартныя гульні, пішуць праваабаронцы.
Кроўду абвінавацілі ў абразе міліцыянта Руслана Куцко і абавязалі сплаціць яму «маральную кампенсацыю», але яна таго не зрабіла і на яе наклалі такія абмежаванні.
