Tag: глуск

Рэкордныя 5 дзён правяла ў лесе 79-гадовая пенсіянерка Глускага раёна і выжыла дзякуючы кукурузе

Навіна ад

Ратавальнікі з дапамогай валанцёраў 4 дні шукалі грыбніка-недарэку і знайшлі яе ў прытомнасці. Здарэнне адбылося паблізу вёскі Поблін Глускага раёна. 

Па інфармацыі Міністэрства па надзвычайных сітуацыях яшчэ 13 кастрычніка ў 22:30 ратавальнікам паступіла паведамленне аб жанчыне, якая пайшла ў лес у грыбы і не вярнулася.  Мабільнага тэлефона жанчына, парушыўшы шматлікія папярэджанні і правілы, не ўзяла з сабой.

Як аказалася, Юлія Давыдаўна, жыхарка вёскі Поблін, раніцай 13 кастрычніка пайшла ў лес у грыбы. Калі яна з надыходам змяркання не вярнулася дадому, то дачка пенсіянеркі патэлефанавала ў МНС. Каб у спадарыні Юліі быў мабільны, то лакалізаваць яе месцазнаходжанне было б адносна проста. Але яна не выявіла асцярожнасці і прадбачлівасці. 

Наступнай раніцай ратавальнікі, работнікі міліцыі, лясгаса, валанцёры, мясцовыя жыхары пачалі пошукі, але яны напачатку былі безвыніковымі. З кожным днём надзея на выратаванне раставала. Тым часам  жанчына 4 ночы вымушана была праводзіць у лесе. 

Толькі 17 верасня раніцай ратавальнік Сяргей Анцюшэня знайшоў Юлію Давыдаўну ў полі паміж вёскамі Поблін і Разлевічы. Ёй пашчасціла натрапіць на кукурузнае поле. Менавіта збожжа кукурузы стала ежай і дапамагло выжыць.

Жанчына была ў прытомнасці, але яна зусім знясілела і толькі прасіла піць. Ратавальнікі неадкладна перадалі пацярпелую медыкам. Пенсіянерка шпіталізавана.

Парады: Вопытныя грыбнікі і спецыялісты па выжыванню раяць збіраючыся ў грыбы браць з сабой не толькі нож і кошык для грыбоў, але і заплечнік для паклажы, гумовыя боты і порхаўку (дажджавік), мабільны тэлефон і паўэрбанк, компас, сродкі ад насякомых, бінт і антысептык, ліхтарык, свісток, а яшчэ хаця б невялічкую бутэлечку з вадой і крыху ежы. 

І самае галоўнае – апранацца ярка.

фота: МЧС

Глускія “лесавікі” вучылі калег з усёй краіны працаваць з Азіяй

Навіна ад

Але ў саміх з-за санкцый праблемы з новым абсталяваннем.

У Глуску ведаюць як пераарыентавацца на новыя рынкі. Менавіта таму работнікі лясной гаспадаркі Беларусі тут на семінары вывучалі вопыт перапрацоўкі драўніны на перадавым заходнім абсталяванні і працы ва ўмовах санкцый і крызісу.   

Глускія “лесавікі”, падобна, становяцца лепшымі ў Беларусі. У гэтым годзе галоўны ляснічы Глускага лясгаса Мікалай Ляпко дзяліўся вопытам выкарыстання фінскага харвестара Usewood па догляду лясных культур. І вось цяпер рэспубліканскі семінар «Вытворчасць і рэалізацыя паганажных профільных вырабаў» прайшоў на базе Глускага лясгаса. 

Вытворчасць

Глусчане, як паведаміла газета “Радзіма”,  паказалі і расказалі калегам, як працуюць сучасныя лініі лесапілавання Wood-Mizer, Brodpol, Mebor, якія піламатэрыялы на іх вырабляюцца, як арганізаваны тэхнічны працэс сушкі прадукцыі ў сушыльных камерах Baschild (2010 г.) і Termolegno (2020 г.). У сталярным цэху гасцей азнаёмілі з вытворчасцю профільных дэталей і прадукцыі. Абсталяванне заходніх машынабудаўнікоў якаснае і мае добрую вытворчасць.

Даведка: Глускі лясгас размешчаны ў паўднёва-заходняй частцы Магілёўскай вобласці на тэрыторыі 75 858 га, у тым ліку пакрытых лесам 68 648 га. Працягласць тэрыторыі лясгаса з поўначы на ​​поўдзень – 55 км. і з захаду на ўсход – 40 км. У ягоны склад уваходзяць 8 лясніцтваў. Па лесараслінным раянаванні тэрыторыя лясгаса адносіцца да Цэнтральна-Прадпалескага комплексу лясных масіваў, падзоны ялова-грабавых дуброў.

Рэалізацыя прадукцыі

Работнікі глускага лясгасу таксама падзяліліся вопытам працы гандлёвай пляцоўкі. Геаграфія паставак на экспарт прадукцыі дрэваперапрацоўкі ў іх раней налічвала больш за 30 краін. Але пастаўкі ў Літву, Латвію, Польшчу і іншыя заходнія краіны практычна прыпыніліся з-за санкцый і немагчымасці пераводу грошай. Цяпер самым важным стратэгічным напрамкам работы арганізацый галіны сталі пастаўкі прадукцыі на кітайскі рынак.

Як паказаў семінар, глускія “лесавікі” здолелі пераарыентавацца на іншыя рынкі збыту сваёй прадукцыі і захавалі калектыў. Але праблема ў тым, што новае абсталяванне, якое яны выкарыстоўваюць, з-за санкцый практычна немагчыма набыць, а заходнія рынкі амаль цалкам закрытыя. Застаецца працаваць з Азіяй і спадзявацца на змену знешнепалітычных умоў гаспадарання.

фота: glusk.by

Глыбінная творчасць Магілёўшчыны прадстаўлена на традыцыйнай выставе

Навіна ад

Дакрануцца да мастацтва Глуску можна было за 5 рублёў.

Творчая прэзентацыя Глускага раёну прайшла з прымусова-добраахвотным поспехам у Магілёве 22 верасня. Так, з прадстаўлення самага паўднёвага рэгіёна Магілёўшчыны распачаўся восеньскі этап абласнога фестывалю народнай творчасці. 

Фестываль народнай творчасці “Беларусь родная, музычная, народная” – творчы праект Магілёўскага абласнога метадычнага цэнтра народнай творчасці і культурна-асветнай работы. Ужо на працягу некалькіх гадоў на сваёй пляцоўцы ён знаёміць магіляўчан і гасцей горада з народнай творчасцю рэгіёнаў Магілёўскай вобласці.

У ходзе фестывалю сёлета раёны прадстаўлялі сябе каля Магілёўскага абласнога цэнтру народнай творчасці па вуліцы Першамайскай.  Бязлюднае днём месца ў рабочы час не спрыяла цікавасці магілёўцаў да канцэртаў пад адкрытым небам на Тэатральнай плошчы. У выніку праходзілі гэтыя ўрачыстасці зусім не ўрачыста, без бачнай цікавасці магілёўцаў, пра што паведамляў Магілёў.media.

Памылкі летняга этапа часткова ўлічаны цяпер. Перад будынкам абласнога цэнтру праводзіліся толькі выступленні фальклорных калектываў, якія стваралі атмасферу і прываблівалі гледачоў. 

Выставачныя праекты перанесены з вуліцы ў фае будынка. У ім народныя рамеснікі ва ўтульнай атмасферы паказвалі свае ўмельства і праводзілі майстар-класы. 

Глускі раённы музей паказаў мінулае раёна і ягоныя дасягненні. Вось толькі ваенная  форма часоў Другой сусветнай вайны на манекенах неяк выбівалася з агульнага кантэксту, стварала дысананс агульнай мірнай атмасферы свята. 

Завершыў праграму канцэрт лепшых калектываў мастацкай творчасці, індывідуальных выканаўцаў, майстроў народнай творчасці Глускага краю. Зала была амаль поўнай, што тлумачылася прымусова-добраахвотным прывадам студэнтаў, у якіх распачаліся заняткі. 

Уваход на прэзентацыю быў вольны, а кошт білета на канцэрт складаў 5 рублёў. 

 

«Стала больш смяротных выпадкаў». Шчыраванні медыка з глыбінкі пра часы пандэміі

Навіна ад

Пра перажытае тады апавядае ўрач-інфекцыяніст Глускай цэнтральнай раённай больніцы Валянціна Дрэйгал. Яна лічыць, што каранавірус часова адступіў, але нікуды не падзеўся.

Медыкі чакаюць росту захворванняў, выкліканых рэспіраторнымі і кавід-інфекцыямі. Павелічэнне колькасці хворых чакаецца ўжо ў верасні. Міністэрства аховы здароўя запэўнівае, што медыцына падрыхтаваная да магчымай эпідэміі.

Тым часам, медыкам на месцах дазволілі стрымана расказваць аб сітуацыі з захворваннямі і згадваць з чым яны сутыкнуліся ў пандэмію. Падчас актыўнай яе фазы ў 2020 годзе звесткі пра сітуацыю з каранавірусам у рэгіёнах перасталі публікаваць. Дазнацца пра лічбы хворых было немагчыма. Міністэрства аховы здароўя публікавала агульныя дадзеныя па краіне. З іх праблематычна было зрабіць высновы пра маштаб эпідэміі.

glusk.by

Урач-інфекцыяніст Глускай цэнтральнай раённай больніцы Валянціна Дрэйгал кажа, што каранавірус часова адступіў, але нікуды не падзеўся, і ўжо ў верасні беларусы зноў сутыкнуцца з ім.

Па яе словах, у пандэмію ў Глускім раёне праз COVID-19 павялічылася колькасць інфарктаў і інсультаў. Стала больш смяротных выпадкаў, выкліканых каранавіруснай інфекцыяй. У пацыентаў рэзка ўпаў зрок, а ў кагосьці слых.

«У часткі пацыентаў назіраліся рэўматоідныя сімптомы, гэта значыць болі ў суставах. У кагосьці зніклі, сказіліся ці знізіліся смакавыя адчуванні, пахі, і працэс іх узнаўлення быў даволі працяглым. Пацярпела сістэмы згортвання крыві, адсюль трамбозы, у тым ліку сасудаў вачэй», – згадвае Валянціна Дрэйгал у інтэрв’ю газеце «Радзіма».

«У некаторых пацыентаў, – працягвае яна, – сурʼёзна пацярпелі ныркі, і аднаўленне працякала і працякае павольна. Разлад кагнітыўнай функцыі (пагаршэнне памяці, здольнасці ўспрымаць новую інфармацыю). Зʼяўляліся стрэс, трывожнасць – пасля перанесенага захворвання. Людзей адольвалі страхі, яны баяліся зноў заразіцца і захварэць, на гэтым фоне нават узнікалі псіхічныя разлады, якія патрабавалі медыкаментознага лячэння, – усё гэта посткавідный сіндром».

gdb.currenttime.tv

Валянціна Дрэйгал заклікае цяпер вакцынавацца «усяму даросламу насельніцтву і дзецям, пачынаючы з пяцігадовага ўзросту».

Яна лічыць, што гэтай восенню давядзецца вярнуцца да масак і сацыяльнага дыстанцыянавання. Па яе словах прафілактычныя меры дапамагаюць абараніцца ад хваробы, але гэта вонкавая абарона, а абараніць арганізм знутры здольная вакцынацыя.

«Два апошнія гады, мусіць, кожны дзень на працы, тут, у кабінеце інфекцыйных захворванняў, сутыкаюся як з праявамі гэтай хваробы, так і з яе наступствамі. Я бачу, як хварэюць прышчэпленыя і як тыя, хто разлічваў толькі на свой імунітэт і ад прышчэпкі адмовіўся. Сярод апошніх колькасць цяжкіх выпадкаў непараўнальна большая», – даводзіць мэдык.

Паводле афіцыйных звестак ад наступстваў каранавірусу памерла больш за 7 тысяч беларусаў. У пандэмію шпіталі сутыкнуліся з бракам лекаў і кіслароду. Тады не хапала нават павязак, каб абараніць органы дыхання. У краіне людзі для больніц шылі іх самі, ствараючы валанцёрскі рух.

Анонс суботніх забаваў на Магілёўшчыне. Кірмаш народных рамёстваў, фестываль сямейнай творчасці і Дзень гурка

Навіна ад

Апошнія фэсты лета правядуць у Глуску, Асіповічах і Шклове.

Імі завяршаецца абласная праграма фестываляў і святаў клубных арганізацыяў рэгіёну «Яскравае свята лета».

У Асіповічах чакаюць на фестываль-кірмаш народных рамёстваў «Асіпоўшчына рамесная».

Пройдзе на пляцоўцы ля Раённага цэнтру культуры.

У праграме: выстава і продаж работ майстроў дэкаратыўна-прыкладнога мастацтва. Канцэрт духавога аркестру.

Арганізатары запрашаюць на майстар-класы па ткацтву паясоў, вырабу керамічных гаршкоў і кашоў з лазы.

У Глуску запрашаюць на рэгіянальны фестываль сямейнай творчасці «Сузор’е талентаў».

Адкрыюць ля Дому рамёстваў.

Тут пройдзе музычна-песенны фестываль, конкурс на лепшую прэзентацыю «атрыбута побыту беларускай сям’і».

У гарадскім парку плануюць правесці конкурс «Тата, мама і я – спартыўная сям’я», а таксама спаборніцтвы па шахматах і футболу.

Увечары абяцаюць канцэрт і салют.

У Шклове ў 16 раз правядуць Свята летняга ўраджаю «Дзень агурка».

Арганізатары запэўніваюць: цікава будзе і малых, і старым.

«Дзень агурка» адзначаць на пляцоўцы вакол комплексу будынкаў гарадской ратушы, у якой месціцца гімназія.

У праграме парад страваў, тэматычная тэатралізацыя, конкурсы, квэсты, інтэрактыў для дзяцей, фестываль фарбаў.

Ля ратушы створаць спартыўна-гульнявую пляцоўку. Тут жа адбудзецца агурочны гастрафест. Не абыдзецца свята без гораду майстроў, фотаасяродка.

Завершыцца «Дзень агурка» канцэртам і дыскатэкай.

 

Кіраўнікі раёнаў выправіліся ў школы. Правяраюць іх гатоўнасць да навучальнага году

Навіна ад

У Глуску спраўдзіў падрыхтоўку мясцовай школы мастацтваў старшыня райвыканкаму Ўладзімір Кніга. З ім на агледзіны навучальнай установы хадзілі яго падначаленыя, а таксама супрацоўнікі міліцыі і пажарнай службы.

Ці засталіся чыноўнікі задаволеныя станам школы мастацтваў, невядома.

Мясцовая раёнка “Радзіма” паведаміла толькі пра факт самаго візіту ў навучальную ўстанову «спецыяльнай камісіяй з прадстаўнікоў раённага выканаўчага камітэту, спецыялістаў сферы адукацыі, санітарнай, пажарнай, праваахоўнай службаў», якая ацэньвае гатоўнасць да прыёму вучняў». Службоўцы не прамінулі сфатаграфавацца.

У прэзентацыі дзіцячай школы мастацтваў адзначана, што яна дом для тых, хто не можа ўявіць сваё жыццё без музыкі, песні, танца. Ва ўстанове працуюць15 настаўнікаў. Тут навучаецца 274 школьнікі. Яны вучацца па 2 спецыялізацыях: музычнае (фартэпіяна, баян, акардэон, домра, цымбалы, гітара, флейта), харэаграфічнае.

Звычайна на агледзіны школ выпраўляюць шараговых чыноўнікаў, якімі кіруюць службоўцы з сістэмы адукацыі. Кіраўнікі райвыканкамаў наведваюцца ў навучальныя ўстановы з праверкай зрэдку. Іхны візіт найчасцей выкліканы неабходнасцю падкрэсліць клопат аб мясцовым насельніцтве і яго патрэбаў.

Да сярэдзіны жніўня навучальныя ўстановы павінны атрымаць гэтак званыя пашпарты гатоўнасці. Школы і дзіцячыя садкі аглядае міжведамасная камісія, якая дае экспертную ацэнку іх падрыхтаванасці.

фота з русурсаў: glusk.gov.by, glusk.by

«За два дні раскупілі 12 тон цукру». У раёнах Магілёўшчыны чыноўнікі спрабуюць суняць ажыятаж

Навіна ад

З’явіўся новы аргумент, якім тлумачаць, адкуль ажыятаж – жыхары Балтыі сталі раскупляць цукар. Тым часам, чыноўнікі запэўніваюць, што цукру на складах дастаткова. 

Глуск

У Глуску «тое, што робіцца ў крамах Глускага райспажыўтаварыства» яго кіраўніцтва лічаць панікай.

«З кожнага праса кажуць, што цукру хапае і кошт не мяняецца, але людзі не слухаюць. За раз па дзесяць упаковак бяруць, лаюцца з прадаўцамі і з намі. Мы завозім цукар паводле плану. У аўторак, 19 ліпеня, прывезлі 12 тон цукру, развезлі іх па магазінах. Да канца дня ўсё раскупілі. Наступны завоз па графіку ў нас у пятніцу. Ну, калі такая справа – будзем прасіць завод загрузіцца па-за графікам яшчэ і ў панядзелак», – апавядае супрацоўніца «Райспажыўтаварыства» Алена Мандзік.

Мясцовая раёнка «Радзіма» адзначае, што «цукар змятаюць з паліц».

«Адны чакаюць росту коштаў, іншыя паглядзелі, што пакупнікі з Прыбалтыкі і Польшчы, якім Прэзідэнт Лукашэнка дазволіў ездзіць у Беларусь без візы, закупляюцца нашымі прадуктамі па поўнай праграме, трэція паддаліся ўсеагульнай паніцы», – піша газета Глускага райвыканкаму.

Клімавічы

Падобная сітуацыя, як у Глуску, у Клімавічах. Тамтэйшыя чыноўнікі запэўніваюць, што цукру назапашана дастаткова. 

Тых, хто закупляе прадукт у запас дакараць, што яны паддаліся чуткам аб дэфіцыце і падаражэнні прадукту.

Начальнік аддзелу эканомікі райвыканкаму Галіна Зубарава даводзіла, што цукар адносіцца да сацыяльна значных тавараў і цана на яго рэгулюецца дзяржавай. Урадам вызначаныя гранічныя максімальныя надбаўкі.

Паводле чыноўніцы ў крамы РАЙПО «ужо паступіла 14 тон цукру», а «у гандлёвыя аб’екты сістэмы Еўрагандаль – 3 тоны». Таксама ёсць ён і ў крамах сеткі «Нівагандаль», у гандлёвых абʼектах малога бізнесу.

На Магілёўшчыне шукаюць фартунніка, які ў латарэю выйграў тэлевізар

Навіна ад

Разыгранку тэлевізара, арганізавала Глускае райспажыўтаварыства. Прадаваць латарэйкі пачалі 3 ліпеня. Збыць усе 122 білеты змаглі толькі 8-га.

Жыхары райцэнтру «належнай актыўнасці» у набыцці латарэек не выявілі, піша мясцовая раёнка «Радзіма». Не прададзеныя білеты давялося аддаць на рэалізацыю ў адну з тутэйшых крамаў.

Шчаслівым аказаўся білет №122. Хто яго набыў арганізатары не ведаюць і цяпер высільваюцца, каб яго адшукаць.

У райспажыўтаварыстве пра сваю задуму правесці латарэю кажуць, што яна не стала «першым блінам камяком», але клопату дадала.

фота: glusk.by

 

Траціна замала. Кіраўнік раённай вертыкалі незадаволены дзейнасцю БРСМ

Навіна ад

Старшыня Глускага райвыканкаму Сцяпан Чачуха кажа, што ў раёне моладзі ад 14 да 31 году – 1800 чалавек. А ў БРСМ запісаныя менш за траціну – 28,9 працэнты.

«Ёсць куды расці і што паляпшаць у рабоце арганізацыі», – настаўляе ён актыў праўладнай моладзевай структуры.

На ягоную думку для маладых спецыялістаў, якія прыязджаюць працаваць у раён патрэбна ладзіць больш імпрэзаў, каб на ёй моладзь знаёмілася.

«Трэба прыкмячаць і выяўляць актыўных маладых людзей, прыслухоўвацца да іх, падтрымліваць іх ініцыятывы», – цытуе вертыкальшчыка газета «Радзіма».

Чыноўнік лічыць, што варта «адрадзіць такія ранейшыя формы работы, як провады навабранцаў у армію ды ўшанаванне маладых бацькоў».

фота: glusk.by

У Глуску мясцовая міліцыя заклапочаная не «цывілізаванымі» паводзінамі грамадзян

Навіна ад

Яна бядуе з таго, што жыхары раёну не належным чынам абыходзяцца з маёмасцю месцаў адпачынку. Зламыснікаў будуць лавіць з дапамогай фоталавушак.

Невядомыя, піша газета «Радзіма», зламалі дарожныя знакі «Заезд забаронены» на двух лодачных станцыях. Таксама пашкодзілі шлагбаумы, якімі быў перагароджаны праезд да пляжаў.

«Мы жывём у цывілізаваным грамадстве, дзе праваахоўнікі, камунальныя, дарожныя і іншыя арганізацыі стараюцца рабіць наша жыццё бяспечней і камфортней», – цытуе зварот міліцыянтаў раёнка.

Паводле іх «некаторыя людзі не цэняць працу іншых, праяўляюць непавагу, ламаюць чужую маёмасць, смецяць, адчуваючы ўсёдазволенасць і беспакаранасць».

Міліцыянты паведамляюць, што факты вандалізму змусілі іх паставіць у месяцах масавага адпачынку людзей фоталавушкі.

фота: glusk.by