Tag: Беларусь

Журналісты пачаткоўцы з Латвіі пагутарылі на «Славянскім базары» з Лукашэнкам. МЗС Латвіі лічыць, што яны парушылі рэкамендацыі аб бяспецы

Навіна ад

У Латвіі разбіраюцца, чаму дзіцячая ўстанова наведала Беларусь, ігнаруючы рэкамендацыі аб бяспецы падарожжаў і ўдзелу ў інфармацыйнай вайне.

На факт удзелу Рыжскай дзіцячай акадэміі радыё і тэлебачання «Academy KidsTV» на фестывалі ў Беларусі звярнула ўвагу Міністэрства замежных спраў. Яго кіраўнік звярнецца ў адказныя інстанцыі, каб тыя далі прававую ацэнку паездцы, піша выданне Jauns.lv.

«Адкрытае ігнараванне рэкамендацый МЗС у пытаннях бяспекі перамяшчэння і ўдзелу ў інфармацыйнай вайне такіх арганізацыяў недапушчальнае і мае быць спыненае», – напісаў міністр Эдгарс Рынкевіч у сваім твітары.

Рыжская дзіцячая акадэмія радыё і тэлебачання «Academy KidsTV» паехала ў Віцебск на фестываль « Славянскі базар».

У Акадэміі заяўляюць: гэта «прыгожы дзіцячы конкурс, у якім удзельнічаюць 23 краіны», таму не ўбачылі прычынаў, каб не наведаць суседнюю краіну. Арганізацыя дадае, што раней яе гадаванцы ездзілі ў Іспанію, Літву і плануюць у Македонію.

«Шмат розных дзіцячых заняткаў, нам было вельмі цікава. Мы хадзілі фатаграфавацца, адпрацоўваць інтэрв’ю на розных мовах. У асноўным нашы дзеці размаўляюць па-англійску», – расказалі ў дзіцячай арганізацыі.

Праўладны тэлеграм-канал «Пул первого» не прамінуў адзначыць удзел латышоў на фэстывалі. Ён напісаў, што «перад сцэнаю Першага падлавілі журналісты рыжскай дзіцячай Акадэміі Радыё і тэлебачання».

На апублікаваным фота падлетак з мікрафонам стаіць побач з Лукашэнкам. У каментары да яго напісана:

«Упэўненыя, што ў дадзенай сітуацыі ў свеце, гэта будзе пазітыўнай падзеяй у грамадскіх адносінах».

У Міністэрстве замежных спраў Латвіі ўказваюць, што «рэжым Лукашэнкі па-ранейшаму падтрымлівае ваенную агрэсію Расіі супраць Украіны, супраць яго накіраваныя сурʼёзныя міжнародныя санкцыі».

Акрамя таго ў міністэрстве звяртаюць увагу, што спецслужбы Латвіі, так і іншых краін НАТА публічна папярэдзілі аб разведвальна-вярбовачнай дзейнасці расійскіх і беларускіх спецслужбаў.

У Магілёве аднаўляюць помнік ахвярам Халакосту. Як тое робіцца, выклікае здзіўленне

Навіна ад

Мармуровая стэла развалілася на часткі, калі на яе падчас навальніцы абрынулася дрэва. Тое адбылося 29 чэрвеня.

Амаль увесь прамінулы час фрагменты помніка заставаліся на зямлі. Пляцоўку падмялі, а дрэва вывезлі. Цяпер узяліся за аднаўленне.

Ім займаецца, як удалося высветліць, будаўнічае ўпраўленне пры гарвыканкаме. Кантралююць хаду прац мясцовыя ідэолагі і пракуратура.

Для таго, каб паставіць на пастамент цяжкую з мармуру стэлу камунальнікі выкарыстоўваюць круглякі з парэзаных дрэў.

У наведнікаў яўрэйскіх могілак, дзе стаіць помнік, такі метад яго аднаўлення выклікае саркастычныя ўсмешкі. Паводле іх, у 21 стагоддзі існуе вялікі выбар тэхнічных сродкаў для гэтага. Наведнікі адзначаюць: узгрувашчванне на круглякі цяжкога фрагменту помніка небяспечнае для работнікаў.

У магіле пад помнікам пахаваныя парэшткі забітых у 1941 годзе нацыстамі нявольнікаў, створанага імі ж, гета. На выгравіраваным у мармуры надпісу няма згадкі пра нацыянальнасць пахаваных. Адзначана толькі, што тут спачываюць 2 тысячы загінулых «савецкіх грамадзян».

Пасля таго, як улада распачала кампанію збірання звестак і пошуку ахвяраў генацыду беларускага народу ля помніка сталі праводзіць пафасныя імпрэзы з удзелам школьнікаў і службоўцаў. Фотаздымкі з такіх мерапрыемстваў тыражавалі праўладныя медыі. У каментарах да іх не згадвалі Халакост і нацыянальнасць забітых.

Дзяржаўтаінспекцыя адпрацуе месцы несанкцыянаванага гандлю на дарогах. Пакуль толькі ў Мінскай вобласці

Навіна ад

Супрацоўнікі дзяржаўтаінспекцыі сталічнага рэгіёну возьмуцца за грамадзян, якія прадаюць прадукцыю ў непасрэднай блізкасці ад аўтамабільных дарог. Гэта тычыцца тых хто вырашыў на ажыўленых магістралях падзарабіць, прадаючы дары лесу, ці вырашчанае на сваіх палетках.

Комплекс прафілактычных мерапрыемстваў міліцыянты назвалі «Дарога для дарожнага руху».

Заяўляецца, што іхныя меры скіраваныя на папярэджанне дарожна-транспартнага траўматызму і спыненне фактаў знаходжання на дарогах асоб у стане ап’янення.

Асаблівую ўвагу, піша агенцтва «Белта», супрацоўнікамі ДАІ нададуць грубым парушэнням уразлівай катэгорыяй удзельнікаў дарожнага руху: пешаходамі, веласіпедыстамі, возчыкамі коннага транспарту.

За пашкоджанне, забруджванне або загрувашчванне аўтамабільнай дарогі, а таксама пагрузку і выгрузку ладунку на праезнай частцы пагражае штраф да 160 рублёў.

фота: brestcity.com

У Магілёве паказваюць калекцыю карцін, сабраную «Белгазпрамбанкам». Віктара Бабарыку на адкрыцці не згадалі

Навіна ад

Карпаратыўную мастацкую калекцыю збіраў Белгазпрамбанк, калі ім кіраваў Віктар Бабарыка. У 2020 годзе ён быў канкурэнтам Лукашэнкі на прэзідэнцкіх выбарах і апынуўся ў няволі. Карціны год пабылі пад арыштам, як рэчавыя доказы.

Уся калекцыя налічвала 150 твораў сусветна вядомых беларускіх мастакоў, а таксама скульптуры, старадрукі. Увесь збор ацэньваўся ў 20 мільёнаў долараў. У Магілёў прывезлі 38 палотнаў, пісаў раней Магілёў.media.

Іх паказваюць у выставачнай залі Музею гісторыі Магілёва. Выстава называецца «Тихая жизнь». Яе адкрыццё адбылося 15 ліпеня.

З клопатам пра беларускую культуру і з разуменнем неабходнасці вяртання на радзіму беларускай спадчыны збіралася гэта калекцыя. На адкрыцці ніводным словам не згадалі Віктара Бабарыку, нібыта, гэтае імя забаронена называць услых.

На выставе прадстаўленыя карціны жывапісу і графікі вядомых у свеце, але паўзабытых ці невядомых на радзіме, беларускіх мастакоў.

Аснову экспазіцыі склалі пейзаж і нацюрморт. Карціны разнастайныя па стылістыцы, задаволяць самага прыдзірлівага наведніка.

Найбольшую ўвагу грамады, якая прыйшла на адкрыццё, прыцягвалі карціны касцюмера, дызайнера і сцэнографа шматграннага ў творчасці, Леона Бакста; знакамітага Фэрдынанда Рушчыца – удзельніка аб’яднання «Свет мастацтва», заснавальніка жанру мадэрнісцкага пейзажа ў мастацтве Беларусі; Абрама Маневіча – ураджэнца Магілёўшчыны, блізкага сябра Альберта Эйнштэйна. І безумоўна, Хаім Суцін! Яго творчасць прадставіла адно палатно, але вельмі экспрэсіўнае.

Выстава мастацкіх шэдэўраў «Тихая жизнь» прабудзе ў Магілёве да 28 жніўня.

Дзень у гісторыі. Раскол хрысціянскай царквы. Партызанскі парад. Заснаванне музею гісторыі Магілёва

Навіна ад

16 ліпеня 1054 года адбыўся раскол Хрысціянскай Царквы.

Хрысціянства падзялілася на каталіцкую з цэнтрам у Ватыкане (Рым) і праваслаўную з цэнтрам у Канстанцінопалі (Візантыя, цяпер Стамбул, пасля акупацыі Асманскай імперыяй).

16 ліпеня 1944 года адбыўся ў Мінску Партызанскі парад

У ім бралі ўдзел 30 партызанскіх брыгад у асноўным Мінскага і Магілёўскага партызанскіх злучэнняў. На мітынг і парад сабраліся больш за 30 тысяч партызан і 50 тысяч жыхароў гораду.

16 ліпеня 1976 года памёр Ян Станкевіч.

Мовазнавец, гісторык, палітычны дзеяч.

Імкнуўся выкарыстоўваць найперш уласныя рэсурсы мовы – дыялектнай, даўнейшай, часам наватворы – каб засведчыць яе жыццяздольнасць і адметнасць ад суседніх. Каб найбольш адметныя рысы беларускае старой ды жывой народнай мовы знаходзілі сабе месца ў сучаснай моўнай практыцы.

16 ліпеня 1990 года заснаваны Музей гісторыі Магілёва.

Месціцца ў будынку гарадской ратушы.

Асноўная экспазіцыя прысвечаная Магілёву ў часы Магдэбурскага права.

Сярод экспанатаў адзіны ў Беларусі экзэмпляр Статута Вялікага княства Літоўскага 1588 году.

У канферэнц-зале праходзяць урачыстыя гарадскія імпрэзы.

 

У публікацыі выкарыстаныя звесткі з рэсурсу «Вікіпедыя» і іншых адкрытых у інтэрнэце крыніцаў

 

 

 

Хроніка прыхаванай рэальнасці. Суды, зняволенні, вызваленні

Навіна ад

Звесткі пра пераслед паводле праваабаронцаў, мэдыяў і родзічых тых, хто зазнае яго.

______________________________________________________________________________________________________

Ганна Кандраценка

Жыхарку Магілёва прысудзілі да трох гадоў калоніі за абразу Лукашэнкі, старшыні Гарадзенскага аблвыканкаму, суддзі і міліцыянтаў.

Паводле праваабаронцаў, абвінавачанне сцвярджала, што жанчына размяшчала «абразлівыя каментары ў некалькіх дэструктыўных тэлеграм-каналах» на працягу 2021 года.

Суддзя Наталля Панасенка пастанавіла спагнаць з Кандраценкі штраф у памеры 3200 рублёў.

______________________________________________________________________________________________________

Ягор Лебядок

Вайсковаму эксперту прысудзілі 15 сутак арышту за, нібыта, «непадпарадкаванне». Адміністрацыйную справу разглядала суддзя Вікторыя Шабуня.

Лебядка затрымалі раніцай 12 ліпеня. Пасля на праўладных каналах з’явілася «пакаяльнае» відэа з ім. Падчас вобшуку ў Лебядка забралі сістэмны блок і мабільны тэлефон.

______________________________________________________________________________________________________

Канстанцін Рудніцкі

Суддзя Кацярына Груда прызначыла палітвязню 6 гадоў калоніі ўзмоцненага рэжыму і штраф у 3200 беларускіх рублёў. Пад вартай яго трымалі сем месяцаў.

23-гадовага былога студэнта-праграміста за «Дапамога ў незаконных дзеяннях з персанальнымі звесткамі» ды «Дапамога ў распальванні варожасці».

______________________________________________________________________________________________________

Мікалай Шарах

Асуджаны на 15 сутак за аватарку ў Фэйсбук.

паводле калегаў, старшыню Свабоднага прафсаюзу беларускага затрымалі, калі ён вяртаўся з Вярхоўнага суда, дзе разглядалася справа аб ліквідацыі гэтага прафсаюзу.

______________________________________________________________________________________________________

Анастасія Малашук і Аляксей Кедыш

Пасля чатырох месяцаў у следчым ізалятары заснавальнікаў брэнда керамікі Piuceramics асудзілі на тры гады абмежавання волі без накіравання ў папраўчую ўстанову адкрытага тыпу.

Іх прызналі вінаватымі ў дзеяннях, якія груба парушаюць грамадскі парадак.

Па абвяшчэнні прысуду абодва былі вызваленыя ў зале суда.

______________________________________________________________________________________________________

Аксана Каспяровіч

На волі.

Пад крымінальны пераслед трапіла за каментар па «справе Зельцара».

Вырак вынеслі 29 чэрвеня ў Гарадзенскім абласным судзе. Настаўніцу музычнай школы з Ліды пакаралі 1 годам і 2 месяцамі агульнага рэжыму, прызнаўшы вінаватай у «распальванні варожасці». З улікам тэрміну, які Аксана ўжо правяла ў СІЗА, сядзець ёй заставалася менш за два тыдні і 8 ліпеня Аксану вызвалілі.

Два жыхары Горацкага раёна злавілі злодзея – ён паспеў абнесці вясковую краму

Навіна ад

Аляксандр Міхайлоўскі і Аляксандр Ляўтко праходзілі міма сельскага магазіна ў роднай вёсцы Копцеўка, калі заўважылі, што адно з вокан узламанае. Пашкоджанымі былі рашотка і шклопакет. 

Неўзабаве, побач з крамай два Аляксандры пабачылі незнаёмага нецвярозага мужчыну. Пры сабе ў яго былі і скрадзеныя ў краме тавары – паведамляе  Магілёўскае абласное Упраўленне ўнутраных спраў. 

Жыхары Копцеўкі на месцы затрымалі падазроную асобу і выклікалі міліцыю. Віна затрыманага была ўстаноўленая ў ходзе далейшых следчых мерапрыемстваў, а пільныя сяльчане атрымалі падзякі і каштоўныя падарункі.

Без масак. Прадстаўнікі Міністэрства абароны не падтрымалі кітайскіх калегаў у нашэнні сродкаў індывідуальнай абароны

Навіна ад

На сустрэчы з супрацоўнікамі апарату аташэ ў пытаннях абароны пры Пасольстве Кітаю ў Беларусі беларускія вайскоўцы былі без масак. Кітайцы ж іх не здымалі нават пад час фатаграфавання. Фотазмкі апубліканыя ў тэлеграм-канале “Министерство обороны Республики Беларусь”.

Супрацоўнікі Дэпартаменту міжнароднага ваеннага супрацоўніцтва сустракаліся з кітайскімі вайскоўцамі, бо ў тых скачалася дыпламатычная місія, а таксама з нагоды акрэдытацыі новага аташэ.

Дзяржаўная камісія па ахове здароўя Кітая ў сувязі з улікам рызыкаў распаўсюджвання штаму «дэльта» рэкамендавала сваім грамадзянам насіць маскі для абароны ад COVID-19 не толькі ў закрытых грамадскіх месцах, але на адкрытых пляцоўках падчас канцэртаў, спаборніцтваў, у шматлюдных парках.

Вызначаны тры групы грамадзян, якія абавязаны з асаблівай увагай падыходзіць да нашэння масак. Сярод іх вайскоўцы, якія аднесены да службоўцаў, якія часта знаходзяцца ў месцах павышанай колькасці людзей.

У Асіповічах цэх алюмініевага ліцця вырабляе «канкурэнтаздольную» прадукцыю на абсталяванні 1970 гадоў, але спадзяецца на мадэрнізацыю

Навіна ад

Цэх падраздзяленне мясцовага заводу аўтаагрэгатаў. Алюмініевую вытворчасць пры ім запусцілі ў 1976 годзе. Нямала тутэйшага абсталявання працуе з таго часу. На той момант яно лічылася сучасным і эксклюзіўным.

«Тыя індукцыйныя печы для плаўкі металу, што былі ўстаноўлены ў сярэдзіне 70-х і маюць серыйныя нумары 001 і 002, працуюць і цяпер, – адзначае газета Асіповіцкі край. – Але гэтыя печы ўжо фізічна і маральна састарэлі, патрабуюць вялікіх намаганняў працаўнікоў цэху для іх абслугоўвання, таму ў планах прадпрыемства іх замена – адзін з прыярытэтных пунктаў».

Цэх мае патрэбу ў набыцці новай печы і аўтаматычнага комплексу для ліцця пад высокім ціскам, але няма фінансавання.

«Гэта дазволіць істотна пашырыць наменклатуру выпусканых сплаваў. Абмежаванасць у выбары гатункаў алюмініевых сплаваў можна лічыць галоўным вузкім месцам асіповіцкай металургіі», – спадзяецца на прарыў кіраўніцтва.

Паводле яго ўласная каляровая металургія «у сённяшніх геапалітычных рэаліях» – важны элемент эканамічнай бяспекі краіны і інструмент для ўмацавання пазіцый нашага машынабудавання на знешніх рынках».

Спажыўцы вырабаў цэху алюмініевага ліцця – МАЗ, БелАЗ, ды расійскія прадпрыемствы. У цэху працуе 126 чалавек.

 

Пчаляры збіраюць першы мёд, але з-за надвор’я мала надзеі на ліпавы

Навіна ад

У Магілёўскім раёне лясгасы сабралі 0,5 тоны мёду. Для разумення, усяго за год усе лясгасы Магілёўскай вобласці летась сабралі 2,6 тоны. Гэта ў 1,75 разы больш, чым было ў 2020, але ў 2019 годзе збіралі цэлых 5,5. 

Такую статыстыку, падае газета  “Прыдняпроўская ніва”.

Гэтыя афіцыйныя лічбы даюць уяўленне пра агульны стан пчалярства на Магілёўшчыне.

Па эфектыўнасці магілёўская пчалярныя гаспадаркі лідарствуюць у Беларусі. Так, адна пчаліная сям’я ў сярэднім па Магілёўшчыне здабывала мёду больш, чым у сярэднім па краіне ў 2021 годзе, паказваючы 26,1 кілаграмы на вулей. У Клічаўскім раёне пчолы давалі рэкордныя 50 кілаграмаў на сям’ю – паведамляла “Лясная газета”. 

Што да прыватных пасек, 75 кілаграмаў збірае вопытны пчаляр Іван Клімко з Пастаўшчыны. 

Для Беларусі гэта выдатны паказчык, але рэгіёны з лепшымі прыродна-кламатычнымі ўмовамі – найперш, з даўжэйшым летам – дэманструюць удвая большую ўраджайнасць.

Сёлетняя ўраджайнасць пакуль радуе пчаляроў, хоць надвор’е пачынае трывожыць. Пастаянныя дажджы перашкаджаюць збору ліпавага мёду. 

“На ліпе працавалі толькі дзве раніцы – піша на форуме плаляроў Беларусі адзін з карыстальнікаў – потым то спёка, то дождж. Суквецці ўжо цямнеюць. Як заўсёды, з ліпавым мёдам у пралёце.”