Тры гады калоніі атрымаў прадпрымальнік, якому, як аказалася, нельга было давяраць на захоўванне маёмасць.
Як паведамляе Магілёўскі абласны суд, у 2019 годзе мужчына заключыў дамову захоўвання з арганізацыяй, па якой яму было перададзена 189 розных ваннаў. Пачынаючы з таго года і аж да 2024-га ён іх распрадаваў, нягледзячы на тое, што не меў на гэта права. Удалося прадаць 162 ванны на суму амаль 39 тыс. рублёў.
Як гаворыцца ў судовым рашэнні, усякія патрабаванні аб вяртанні перададзенай на захоўванне маёмасці прадпрымальнік ігнараваў. У выніку дырэктар арганізацыі пайшла ў праваахоўныя органы. Яны выявілі ў мужчыны 27 нераспрададзеных на той момант ваннаў на суму больш за 6,6 тыс.рублёў.
У судзе прадпрымальнік сваю віну прызнаў часткова, не пагадзіўшыся з ацэнкай кошту ваннаў. Таксама часткова кампенсаваў шкоду.
Спачатку суд Магілёўскага раёна прызнаў яго вінаватым у спробе растраты маёмасці асобай, якой яна даверана, у асабліва буйным памеры, і прызначыў падсуднаму тры гады калоніі ўзмоцненага рэжыму і штраф у 16,8 рублёў. Затым Магілёўскі аблсуд пакінуў прысуд без змены.
Фотаздымак з адкрытых крыніц