Tag: тэрарызм

Бабруйскі суд прызначыў працяглыя тэрміны зняволення для групы абвінавачаных у «тэрарызме»

Навіна ад

Справа разглядалася на закрытым працэсе, які пачаўся 15 ліпеня. Вырак яшчэ не набыў моцы і фармальна абвінавачаныя не сталі асуджанымі. Праўладныя медыі абвінавачаных называюць «злачынцамі» і «тэрарыстамі».

Тэлеграм-канал «MOGILEVNEWS» называе імёны абвінавачаных і тэрміны, якія ім прысудзілі.

Канстанцін Ермаловіч – 16 гадоў пазбаўлення волі;

Віталій Мінкевіч – 15 гадоў пазбаўлення волі;

Ігар Казлоў – 14 гадоў пазбаўлення волі;

Надзея Полькіна – 2 гады пазбаўлення волі;

Наталля Кед – 2 гады абмежавання волі.

Паводле «MOGILEVNEWS» ім інкрымінавалася спроба ўчынення акту тэрарызму, абраза прэзідэнта і супрацоўніцтва з арганізацыяй, якая ў Беларусі прызнаная экстрэмісцкай.

Пра матывы ўчынкаў абвінавачаных не паведамляецца.

Паводле праваабаронцаў 30 верасня абласная міліцыя выпусціла відэа, на якім Віталь Мінкевіч прызнаецца ў закладцы «вучэбных мін» на чыгунцы.

Праваабаронцы паведамляюць, што Канстанцін Ермаловіч, Віталь Мінкевіч, Ігар Казлоў былі затрыманыя 26 верасня 2021 года і яны былі змешчаныя у бабруйскае СІЗА-5. Траіх КДБ унёс у «спіс асоб, датычных да тэрарыстычнай дзейнасці».

фота: wikimapia.org

Хроніка прыхаванай рэальнасці. Суды, пераслед, вызваленні

Навіна ад

Ксенія Луцкіна

Следчы камітэт паведаміў дэталі крымінальнай справы супраць былой журналісткі беларускага тэлебачання. Яе вінавацяць у змове, дзеля захопу дзяржаўнай улады неканстытуцыйным шляхам. Імя зняволенай не паведамляецца.

Паводле следчых «затрыманая была адным з лідараў журналісцкай забастоўкі, у ходзе якой удзельнікі вылучалі патрабаванні палітычнага характару».

У паведамленні ведамства адзначаецца, што падчас расследавання затрыманая прызнала сваю віну, ва ўчыненым раскаялася і актыўна супрацоўнічала са следствам.

Ксенія Луцкіна прызнаная праваабарончай супольнасцю палітзняволенай. Заяўляецца, што ў яе праблемы са здароўем. У 2012 годзе ў жанчыны выдалілі адну з двух пухлін на галаўным мозгу. Іншую кранаць не сталі, каб не нашкодзіць жыццёва важным органам.

Андрэй Любецкі

КДБ унёс у «спіс тэрарыстаў» хірурга і яшчэ чатырох чалавек. Цяпер у ім агулам 876 чалавек, 137 з якіх – беларусы.

Уладзімер Гундар

9 дзень трымае сухую галадоўку фігурант «справы Аўтуховіча». Інвалід ІІ групы гэтак пратэстуе, як заяўляе, супраць няспынных здзекаў сілавікоў і парушэння сваіх правоў. Спыніць яе збіраецца па выхадзе з карцару, куды яго «за дрэнныя паводзіны» змясцілі 30 чэрвеня на 10 дзён. Жонка зняволенага кажа, што ён выглядае кепска, моцна схуднеў і «становіцца шэрым».

Алег Букас

Жыхар Бабруйску, палітзняволены выйшаў на волю, цалкам адбыўшы тэрмін у калоніі. Ён быў асуджаны за гвалт, як заяўлялася на судзе, у дачыненні да супрацоўнікаў міліцыі ў жніўні 2020 года. Яму прысудзілі два гады калоніі. А, затрыманаму разам з ім, бацьку прысудзілі – чатыры.

Абвінавачаныя ў тэрарызме на чыгунцы

Пракуратура Гомельскай вобласці накіравала ў абласны суд крымінальную справу на трох жыхароў Светлагорску. Іх вінавацяць ва ўчыненні «акту тэрарызму на чыгунцы» у лютым 2022 году. Яны, нібыта, знішчылі транспартнае абсталяванне, якое кантралявала бяспеку эксплуатацыі чыгуначнага транспарту.