Новости по тегу "прафілактыка правапарушэнняў"

Асіповіцкая міліцыя пахвалілася новай формай выкарыстання працы паднявольных – заробленыя імі грошы пералічаны ў дзяржбюджэт.

У чэрвені 2026 года, паводле капітана асіповіцкай міліцыі Еўдакімовіча, так званыя дармаеды і тыя, хто выйшаў з лячэбна-працоўных прафілакторыяў, былі прыцягнуты да “грамадска карыснай працы”. Міліцыянт адсправаздачыўся за дзве такія акцыі, ўдзел у якіх прынялі 40 чалавек.

Гэтае прыцягненне, як заўжды аздоблена высокімі словамі пра прафілактыку правапарушэнняў і фармавання адказнага стаўлення да працы і грамадства. Аднак цяпер капітан яшчэ пахваліўся “вялікім прагрэсам” у эканамічных стасунках з прыцягнутымі да паднявольнай работы. Маўляў, важным элементам арганізацыі акцый стала афармленне праваадносін з удзельнікамі: з 36 грамадзянамі былі заключаны адпаведныя дагаворы.

То бок, раней нават ніякіх дагавораў ніхто не афармляў, а цяпер навідавоку ледзьве не змена грамадска-эканамічнай фармацыі – працу падняволеных аформілі дагаворамі. Праўда, такі прагрэс, відаць, закрануў не ўсіх. Нічога не кажа Еўдакімовіч пра чатырох астатніх грамадзян. Пэўна, іх праца пакуль застаецца па-за новымі эканамічнымі стасункамі і працавалі яны па-старынцы без аніякіх дагавароў.

Але і тыя, хто перайшоў у новую эканамічную фармацыю ў аплаце сваёй працы, па выніку нічога для сябе не выйгралі. Аплаты як не было, так і не з’явілася, бо “грашовыя сродкі, сабраныя ў рамках мерапрыемстваў, былі накіраваны на рахунак ДУА «Асіповіцкі раённы цэнтр карэкцыйна-развіваючага навучання і рэабілітацыі».

Паводле капітана міліцыі, праца ўдзельнікаў набыла дадатковую гуманітарную каштоўнасць – яна стала укладам у падтрымку людзей, якія маюць патрэбу ў асаблівай дапамозе і ўвазе. Гэта значыць, што ўдзельнікі, а гэта беспрацоўныя людзі і тыя, хто спрабуе вярнуцца ў самастойнае жыццё пасля ЛПП, такой патрэбы не маюць.

Па ўсяму відаць, сутнасць прагрэса эканамічных адносін так і не была засвоена асіповіцкімі “прафілактыкамі”. Таму нават афармленне дагавароў аб аплаце працы ў даным выпадку было ўсяго толькі мараннем паперы.

Фотаздымак: “Асіповіцкі край”

Магілёўская пракуратура ўпэўненая: без грошай – не нап’юцца.

У Магілёўскай вобласці праз суд абмяжоўваюць дзеяздольнасць грамадзян, якія злоўжываюць алкаголем, і разглядаюць гэта як адзін са спосабаў барацьбы з алкагалізмам.

У 2025 годзе пракуратура Магілёўскай вобласці накіравала ў суды 65 заяў аб абмежаванні грамадзян у дзеяздольнасці. Яшчэ 18 спраў тычыліся пазбаўлення непаўналетніх права самастойна распараджацца сваімі даходамі. Прычына ва ўсіх выпадках адна – алкаголь.

Як правіла, у падобных справах фігуруюць адны і тыя ж абставіны:

усе даходы трацяцца на алкаголь;
удзел у ўтрыманні сям’і адсутнічае;
адбываюцца рэгулярныя сямейныя скандалы;
здзяйсняюцца адміністрацыйныя правапарушэнні.

Менавіта па такой схеме развіваліся справы ў Асіповіцкім і Бабруйскім раёнах.

У адным выпадку мужчына жыў з пажылой маці і траціў грошы выключна на спіртное.

У другім – 46-гадовы жыхар Бабруйскага раёна цалкам ігнараваў выдаткі на сям’ю, пазычаў грошы ў суседзяў і патрабаваў ад жонкі купляць яму алкаголь.

У абодвух выпадках суды падтрымалі пазіцыю пракуратуры і абмежавалі мужчын у дзеяздольнасці.

Пад абмежаванні трапляюць і непаўналетнія. Калі падлетак траціць заробак, дапамогу або іншыя выплаты не па прызначэнні, у тым ліку на алкаголь і цыгарэты, суд можа пазбавіць яго права самастойна распараджацца грашыма.

Так, у Бабруйску такое рашэнне было прынята ў дачыненні да непаўналетняга сіраты, які расходаваў сродкі на спіртное.

У пракуратуры ўпэўненыя, што такая практыка – адзін са спосабаў барацьбы з алкагалізмам і звязанымі з ім правапарушэннямі.

Мабыць, адзіная дзіўнасць ва ўсёй гэтай гісторыі – лічба. Шэсцьдзясят пяць грамадзян-алкаголікаў, дармаедаў і дэбашыраў на ўсю вобласць – гэта амаль што нічога. Куды суды рассарціраавалі ўсё астатняе насельніцтва, якое злоўжывае алкаголем?

Фота ілюстрацыйнага характару з адкрытых крыніц.